رواية مزهق للإقتصاص الفصل السادس 6 - بقلم رمش عقيل

مزهق للإقتصاص.

بقلمي::رمش عقيل

تصويت لطفاً.التعليق بين الفقرات.🤍

꧁ـــــــــــــــــــ꧂

يا حَبيبي وصاحَبي وحَزن القصيده
أنتِ اول ضيم يـجويني واريدهَ

꧁ـــــــــــــــــــ꧂

بعد مرور شهر ...

بيوم، چنه هستونه مكمّلين الشغل صعدت شويه ونزلت نكمل تحضيرات الغدا وسرور بالصالة متمددة ومُنتهى تفرك براسها تعبانة ما جان أكو شي غريب لحد ما دخل آخر شخص كنت أتوقعه شيث

دخوله گلب الجو خلى الكل بحالة صدمة
الهدوء خيم مُنتهى ما عرفت شلون تتصرف تريد تگوم بس أدموعها سبقتها

رفل ركضت له وهو ضمها بحضنه وكأنه الزمن رجع
رجع كل شي.

::-ياروحه انتن يابعد كل حيله

سحبها من حضنه ودخل لمُنتهى اللي چانت تغطي وجهها بأديها وتشهك حيل تحاول تضم دموعها
بس دمعتها فضحتها ما گدرت تتحكم بصوتها ولا برجفتها تقرب منها باس راسها وحضنها وهيه صرخت بي ما تريده

::-رووححح روحح ارجعع منينن ماا اجيتت

::-خل اشوفچ يبعد كل روحي واهلي

::-ولييي

::-ههههههه

::-اييي اضحكك اضحكك وخرررر شيثث ارجعع ارجعع منين ما اجيتت

::-بت الكلب خل اشوفچ باوعيلي

::-صااارلكك شكثرر خلصت دراستك ليش ما رجعت ليشش عاااجبكك تبقه دايح

::-يول دستي بطني خل احجي

گومها يبوس بديها وراسها سحبها بحضنه وهيه دفعته

::-عساج لا رضيتي شو وخري

وخرها ورجع سلم علينا وحده وحدة راح اتجه لـ عماتي بعدهن واگفات مكانهن مدري مصدومات لو بعدهم ما مستوعبين كعد وياهن ظل يحچي ويضحك شويه كأنه شي ما صار

دخل سديم وشعيب وراهم غفار سلّموا علي وكل واحد چان وجهه يحچي قبل لسانه وراهم دخل أمير وهيثم أول ما لمح شيث گام شيث من يم عماتي بسرعه يريد يشرد ما يباوع لا على واحد ولا حتى على المكان

امير::-انيي كتلك لا تجي لو لا

::-السلام عليكم عمي

::-ابن الكلب اليوم انعل حتى ابو عمك الزموه الي

::-مووو گداام البنات اميرر

هيثم::-بعد ايدي الداايح ابو النسوان حلتلك الكعده مووو

شيث::-خل افهمكم

أمير ما سكت جر الحزام وسفطه على ظهر شيث شيث ركض شاردو بس شعيب لزمه ورجعه ما لحگ يوگف رجع أمير وضربه مرة ثانية

رفل گامت تبچي بصريخ صوتها ملأ المكان وهوه عافهم وركض إلها حضنها وهيه چلبت بـ رگبته تبچي وهو مدنّگ عليها ويهدي بيها وهيه ابد

مُنتـهى شافتهم سكتت ما گدرت تحچي
زعلت وراحت ضايجة بس من اللي شافته واللي حست بيه اختنگت بالمكان وگام والله حقها بكلشي صار وما الومها من تزعل ابد.

::-اشش

رفل::-بعد ما احبك

::-افف ليش

::-ما اريدك نهو گامت تبچي من وراك

دار يريد يروح للغرفه بس قبل لا يدخل گال

::-احد يمها بالغرفه

::-اي هيف نايمه وسرور هم كاعده يمها

رجع وگال رفل صيحيلها خلي تجي لغرفتي

هوه گالها والولد ضحكوا

غفار::-والله قديم هيهه بقت غرفه تبرعنا بيها لهارون

::-گمم لكك غرفتي ترجع

راح صعد فوك ومُنتهى لا راحت ولا حچت وهو هم ما نزل للضهر من صبينا الغده نزل راح للمضيف سلم على جدي وعمامي وبعدها رجعوا كلهم فرشنا السفرة بالصالة حتى يتغدون واني رحت للبيت أشوف ريفان صارلها أسبوع تعبانة ونايمة بالفراش

گلت لأمي إنو شيث إجه بس ريفان ولا تذكرت منو شيث أصلاً تنسى هواي حتى ما گامت تاكل وأمي گاعدة يمها تحاول تهديها والتعب واضح بعيونها

ما طولت كلش مقهورة عليها رتبت البيت ونظفته ورجعت لبيت جدي لأن جدي ما يقبل نبقى هناك إلا وقت النوم بعكس باقي اعمامي حتى وقت النوم ما يتواجدون ماعدا احنا لأن مطبوك.

من رجعت لگيت البنات بالصالة وهيف ترجف من العصبية وتصيح على سما الجو متوتر والهدوء ثگيل كأنه شي كبير صار واني بعدني ما أعرفه.

::-سمااا خليي يجي هسه والله امووت والله

سما تحاول تخابر زهرة تهدي بيها مُنتهى تريد تنطيها ماي وهيه ولا همها بس تريد امير يرد عليها لحد ما دخل البيت سحبها وصعدوا فوگ

::-شبيها

سما::-ما ادري صعدت فوك نزلت متخربطه كل اوضاعها سودنتني خاابري خابري.

كعدنه نتغدى احنا وعماتي بالمطبخ والولد گعدوا بالصالة يشربون چاي أما عمامي وجدي راحوا للديوانية

هيف نزلت تركض شكلها تريد تطلع بس سديم ومهدي كَاموا يمنعوها مو بالقوة بس يحاولون يهدّوها أعاين على إيدها ترجف دخلت أمي باوعت عليها وهيه تسودنت گامت تتفحص بيها وتصيح وتغلط وبدت تسب على أمير بصوت عالي

وأمير واگف عالدرج ساكت وشيث واگف ورا المحجر مكتف إيديه يتابع عبالك  ما صاير شي يتفرج على مسرحية

الوضع ثگيل شوية سديم أخذ هيف وطلعوا والباقي رجعوا يكملون الغدا وأمير ما نطق بحرف
حتى سما ما صعدت يمه ظلت بالمطبخ لحد العصر

الولد راحوا طلعوا وهيف وسديم لحد الآن لا حس ولا خبر من سألنا گالوا گاعدين ببيت جلال

صارت الساعة بال9 لا شيث لا أمير ما نعرف وينهم
وهيف هم بعد ما رجعت وسما بقت تلف وتدور حايرة
ما حد گدر يهديها

"سما"

الساعة صارت 12 واني بعدني آخذ الحوش، وأرده
وهو ماكو.

التلفون بيدي قرب يطفى الساعة صارت بال2
مليت ضاك صدري وهو بعده ما رجع أفتر بالبيت عبالك مخبلة البيت كله صامت رجلي توديني أكعد الولد بس أستهدي بالرحمن واكول هسه يجي

رحت توضيت كعدت أصلي صلاة الليل
كل ركعة بيها دعوة دعيت ربي يرجعه بالسلامة
ويطمن گلبي

أندك الباب گلبي طفر دخلت هيف

عاينت عالچرباية ورجعت باوعت علي
وأني بعدني بالسجادة أكمل صلاتي وكلّي أمل إنو دعائي راح يوصل قبل الفجر همست

::-امير وينه

كملت صلاة وجاوبتها

::-هستوه خابروه وطلع

ماحبيت اخوفها وهيه مريضه

::-وين

::-ما ادري

اعيونها حمر ومبينه ما نايمه

::-شبيچ

::-ما ادري

اجت تمددت يمي وحطت راسها بحضني قلبت راسها صار بجه بطني گالت

::-ريحتج طيبه

::-ريحه الچادر مال الصلاة

::-والله اجنن حتى انتِ من ذبينه تبقه هيچ احب عطرچ

نزلت راسي بستها من راسها غمضت اعيونها تريد اتنام گالت

::-امير ليش ما اجاني

::-ما اجه ابد؟

::-اجه يم جلال بس ما اجاني اول مرة هيچ وهو يدري ماعندي غيره ولا اكدر انام بدونه ماعرف اله اشوفه يلا تغمض عيني

::-هسه يجي نتعارك وياه ثنينه

::-بعد ما احچي ويااه شايف روحه عبالك بس هوه امير والله ما تلام ريفان بي بعد ولا ادافعله

::-ههههههه خوش واني هم اطبگ وياج

::-گومي نامي على الچربايه وعلاجج شربتي

::-اي

گامت حطت راسها على الچربايه مثل الي اذكرت شيء عاينت عليه

::-وامير من يجي

::-ينام بره مالچ شغل بي

غفت هيف شويه وأنـي بقيت عيني ما تغمض أنتظر والتلفون گدامي قرب يطفى بي ٤٪ أذن الفجر

گمت توضيت صليت بس صدگ بچيت مو دموع شهگات مكتومه أخاف تگعد هيف ما متحملة وأنا بعد گلبي تعب فوگ كل التعب والضيم ما أريد أزيد عليها

سهران ومتونس ناسي إنو أحد ينتضره لو مو ناسي يمكن صايرله شي بس ليش ما يرد هو من ليمت يبقى لهالساعة لا لا اسم الله عليه يمكن عنده شغل يمكن انشغل يمكن التليفون طفى وما گدر يرد بس تعبت تعبت من يمكن.

نزلت حتى الجادر ما ذبيته كعدت جوه حطيت راسي على رجليه انتضرة بس هو ماكو ...

"مُنتهى"

دگ تلفوني رفعته اشوفه طلع شيث رديت گال

::-اني وأمير بالباب افتحي النه مغفول

رجعت اريد اغفه وگال

::-ولچ لااا تنامين

::-اجيت.

سديت التليفون وطلعت من الغرفة على خفيف
فتحت الباب شوي شوي ما أريد أحد يحس
مشيت صوب الباب الرئيسي وهم فتحته واني بعدني واگفة وره الباب همس شيث

::-هاي منو النايمه اهنا

التفتت على الجهه الثانيه شفت وحده من البنات
لابسه جادر الصلاة كاعدة على المصطبة مال الحديقة
الدنيا بعدها ما ضوت الفجر توه مأذن والهوا يبرد شويه أول ما سلقيت الباب رفعت راسها عيونها حمر ابتسمت چانت سما !

صرخ شيث

::-يماااه ربييي ان شاءلله مرة مثلها

گالها هو وبعدها بثواني وصلت رفسة من أمير
رجعته ليوره وگال بعصبية

::-شبّيك هسه اني شگلت

بس ما چان يشاقه أمير مبيّن عليه الغيض
هو سحبها من إيدها ودخلو سوا وإحنا دخلنا وراهم

::-جوعان؟

::-لا اكلت برا وانتِ مو زعلانه ولي كملي زعلتج

::-اهه ميته عليك اراضيك دولي والله بطران

"سما"

كعدت على صوت الباب شلت راسي بثگل ولمحت وجهه لحظة حسيت روحي رجعتلي

ما حچه شي اجه سحبني من إيدي بلطافه واني مشيت وياه خطواتي ثگيلة وعيني بالكوة مفتوحة

::-شعندچ باقيه گاعده

::-الك عين تسأل مو اخابرك ليش مترد واصلاً هيف الي خلتني گالت من يجي گعديني

::- وينها

::-بالغرفه

::-ماا أدري تلفوني خرب

مبين كلش تعبان بالگوه علي جاوبني من النعاس حتى مگتله تريد شيء دخل شاف هيف نايمه

::-ليمت اجت

::-مساع حتى اعيونها حمر ليش هيچ وياها

راح يمها باس خدها وضم إيدها بحنية أخذ ملابسه وطلع للحمام

واني فرشت فراش على الگاع وتمددت عيني سدت بدون ما أحس وغفيت بس شوي فتحت عيوني صارت على الچربايه ماكو هيف راحت بس أمير بعده نايم

گمت بالگوة احس روحي متكسرة خطواتي بطيئة
رحت أشوفها دخلت غرفتها لگيتها نايمة على الچربايه
وسرور يمها وميليس بالگاع عفية بنات كل دقيقة بغرفة
ما تعرفين وين تلگيهم

سديت الباب بهدوء وشفت نقاء طالعة من غرفة زهرة
تمسح بعيونها مبينة ضايجة رحت يمها شلتها حضنتها

::-شبيج ليش كاعده

::-وقار دفرتني بس ادفر حتى بطني گامت توجعني

::-خليها تولي تعالي انام بغرفتي تجين

هزّت راسها بـ اي بستها بهدوء ورجعت دخلت للغرفة.

نقاء طبگتها حيل صوت الباب چان عالي خلى أمير يفز من نومه باوع علينه وعلى طول چان نظره للساعه
كأنه يحاول يفهم ورجع نضره عليه

::-مو هستوچ نمتي شكعدچ

::-شفت اختك واجيت

::-وانتِ نقوه

::-اريد انام يمك عمو

::-تعالي

راحت اله واني رجعت بفراشي

::-سمااي اهنا يمنه

باوعت علي ورجعت عليها

::-لا هنا اني وياج تعالي عوفي عمو

::-ما

::-وقتي تليفونج بال10 وتعالي اهنا

گمت وقته وهو بي1 أريد أوديه للشحن بس ما بيه حيل نقاء نايمة بنصنه سحبتها بحضني حطيتها بحنية وظليت يمها بس چنت تعبانه عيوني وگبل غفيت ...

"اديان"

إجه شيث دخل بهدوء وكعد يم سديم، مهدي، وسيف،
مُنتهى صبتله چاي كعد يتريگ وياهم لا صوت لا نفس

دخلت هيف شعرها واگف عبالك طاگ بي عبه غسلت وجهها وكعدت يمهم فلتت الشكّالة وصاحت

::- مهنو سوي الي

راحت الها مُنتهى ربطته الها رتبته وعاينت عليهم كلهم ثبتت نضرها على شيث وگالت

::-شلونك شبح أوبرا شلون چانت ليلتك عدنه حلو لو لا

::-لاا

::-الاجنبي شبيك مفلس

::-ما بيه شيء

::-وانتَ سدوم

::-اعيونه

::-بس انتَ تفتح الگلب

كعدنه نتريگ والضحك والگصة شغالة كلها تحچي وكل شي طبيعي بس هيف عينها چانت تراقب وانتبهت إلها
وجها مشخوط الأحمر مغطي خدها وعيونه؟ مو نفسهن
متغيرات مطفية

::-هيف باوعي

غلست

::-شبيچ هاي منو هيچ مخرمشچ

::-سدر لعبت وياها وهيچ صار

::-اعيونچ شبيها

::-تحقيق خو ما تحقيق شسالفه

خلت وگامت مهدي گال

::-شاخطه

::-لا والله شبيها

::-تولي

گمنه نضف كملنه كلشي وحضرنه الغده وأمير وسما ما نزلوا گلت الـ هيف تگعدهم بس گالت هستوهم ناموا عوفيهم

"سما"

غفيت بحضن چنت كل يوم أتمناه عايشة على أمل إنه يصير يوم إلي وصار بس كعدت واني نايمه على أيده وصايرة يم صدرة نقاء ماكو وهو نايم بعمق نفساته هادئة ووجهه يمه گلبي احسه حلم

صفنت بيه عيوني تسبح بتفاصيله واني أتجرأ شوي شوي أقرب بس قبل لا ألمسه، قبل لا أبوسه شفت الساعه 12 ونص! شهكت

::-عزاااا

اله شويه طحت من الچربايه وهو طفر گال

::-شصار يمعوده خو ما بيج شي؟

دمعت اعيوني لأن والله راح يرعد رعد ياارب دخيلك بس ما سويت شي وگلت

::-مووو دگ المنبه عبالي رحت شو بعدك؟

::-شنيي

عاين على الساعه وطفر چنه مخبل

::-خرب مو گتلج كعديني

::-اندري اني هم منايمه لأن انعس واخذتني النومه

::-اششش اسكتييي

دولي لبست صايه خليجيه لونها بني على ملابسي خاف الولد موجودين وعدلت حجابي وطلعت نزلت وهيف صاحت

::-شرفوا العرسان

رحت للمطبخ غسلت وچهي وشربت ماي بارد حطيت چاي على النار قررت أسويله لأن لو يموت هو ما ينزل يتغدى لازم اول شي يتريك

رتبت الصينية بهدوء الكلاص، الاستكانات، شكر، والجبن والگيمر كلشي لازم يكون بمكانه عبالك تقديم ملك

وبين ما يخدر الچاي سمعت خطوات التفت. رفل جايه تركض وعيونها تلمع

::-أمير يصيح گلب الغرفه گلاب ويگول صيحيها بسرعه

رحت واني بعدني مشدوهه من كلام رفل دخلت الغرفه واشوفه سابح والكنتور مفلش الگاع متروسه هدومه چنها حرب مو تبديل ملابس

چان كلشي بداخلي يبرد البارحه صفطته قطعة قطعة عبالي ارتاح اليوم واذا بيه كل شغلي رايح اله شويه دمعتي نزلت مو بس على الكنتور على التعب.

::-يااا ليشش

::-الغثرة والدشداشه الجديده وينهن

وگفت يم الباب نظرتله وگلت بصوت هادي بس بي نغمة عصبية ما تحتاج توضيح

::-الغثرة مكويه ومعطره ويه الغثر بالباب الثاني وبعدين انتَ مو اهنا تحط دشاديشك مالاتك بالميز مال المرايه هم مكويه

راح اخذهم يبدل واني باقيه باب الغرفه صاح

::-شبيچ

مدري اجاني احساس انو لازم اذكره سديت الباب وگلت

::-ترا اني مو مرتك حتى تصيح عادي وتفلش ومو هامك

::-اممم ومنو النايم بحضني توه ابوي

::-مرتك بس اتفاق ليش انتَ نسيت مرتك؟

::-مالچ شغل شيء ميخصچ ومرتي مدام على ذمتي مرتي انتِ

::-بسس من چنت اگول چان يختلف الحچي وتگول مالي شغل بيچ بس انكمل الاتفاق اروح

::-ماا لازمچ

گالها وراح يطلع ضحكت فرحانة أن بده يلين شوي مو مثل قبل وتقده چنه أحن سديت الباب ورجعت أرتب الغرفة وذكرت الچاي رحت أشوفه لگيته كاعد على الكرسي وتلفونه بإيده ما عرفت منين جابه جبتله الچاي چان خادر ومدري منو مطفي الطباخ اجيت اصبله انطيته صبيت ما حسيت اله وضرب الگلاص بالگاع وصرخ بيه رجعت ليورة فازه

::-هاااذاااا چااااييي

::-شنو شبي اسويلك غيرة

::-ثاااانيي مرة لا اسوينن هاچ انتِ اسممي بي

بهدوء دخلن نسوان عمامه واني بعدني محتفظة بصمتي بس گلبي يغلي وهو بعده يغلط ولا كأن شي صار ما حسيت بأي ذرة احترام لا إلي ولا لحچايه گدام الناس طلعت من المطبخ ورحت للغرفه وسديتها باوعت على الغرفه گالبها گلاب الملابس الي طاشهن لميتهن بخربطه ورجعت طشيت الباب الاول والثاني والثالث ملابسه كلهن وبعدها شمرتهن من جديد داخل الكنتور

وگفت گدام المراية صفنت بنفسي چنت أريد أشوف "مرت أمير" شلون ممكن تطلع إذا حبت تنتقم بطريقتها مو بالكلام اني العاشگتك هسه بس راح اخليك تعض اديك ندم لأن راح تحبني لبست صاية مخططة رصاصي وبيجي وشال بنفس اللون رصاصي لفيته عدل وطلعت نزلت أدور عليه ما لگيته

رحت للمطبخ لگيت خالته وعماته حتى الگلاص الي انكسر لامينه صبينه الغده وكعدنه نتغدى وكلشي طبيعي كأنه ما صار شي لـ 3 تقريبًا اجت عمتهم وبناتها سلمنه عليها وهيه تباوع ياهي النستها واحنه متنه من الضحك گالت يعمه والله ناسيتچن

::-هااا يمه منو نسيتها

هيف::-عمهه انااا

::-اكليي تبن انتِ مرتين سلمت عليچ هلكتيني اني ما اعول اكملچن وانتِ كلساع لازمتني بوسيني

اديان::-معوزه حنان عمه بوسيها بعد

هيف::-اي عمه

رجعت باستها

وهيه كعدت وجبنه ماي الها شربت وگالت

::-لزموني مهدي وسيف يمه اني رايحه روحي وهاذا كسر رگبتي

ام هيثم::-ههههههه يحبونچ تعاليلنه دائماً نشتاگلج

كعدنه نسولف وياها هيه والبنات وكل وحده لاهي بضحكتها وسوالفها البنات كعدن يسولفن ويه زهرة واديان وفجر ومُنتهى جابت صينية الحلويات وكعدت بينهم تضحك الجو كلش هادي ولطيف لا هيف، ولا سرور، ولا ريفان، يحبون يگعدون ويه بنات عمتهن راحن اعتزلن وحدهن

بقينا نسولف لحد العصر رجع أمير دخل وسلم عليهم وصعد للغرفة ما طول شويه وسمعت صوته يصيح بأسمي وگمت ما اريد احد يلاحضني اني زعلانه او شيء واني ميته قهر منه

::-تعالي رجعي صفطيهن مثل ما خربتيهن

::-مالي شغل

::-سماا مالي خلگ العب الزعاطيط فضينيي

::-ولعباااس ولااا الي شغل خوش اتفاق انتَ مو گلت اتفاق شغيرك انتَ موگلت ما اريد شي منچ

::-وانتِ المفروض توفين مثل ما قنعت اخوچ يتعالج

::-لا اني گلت صح بس شگلت كلت ازوج وانتَ كلت هالحجي لا تحاول تستغلني بشي

::-علوية وحگ جدج رسول الله اذا الزمچ اله اگضي بيچ التوبه

ذبيت الصايه والشال وگعدت هلكانه من الحر عليت السبلت وگعدت أتهوى شويه بعدها گمت أخذت ملابس ودخلت أسبح طلعت ورجعت للغرفه عاينت عليه بس طنشته وهو بعده واگف يدور بالكنتور.

فليت شعري وصافن مشطت ولفيته وردت آخذ صايه حتى أنزل بس بعده واگف كدام الكنتور.

::-شويه

ما وخر ولا عبرني

::-شبيكك اريد انزل

::-منو لازمج ما تنزلين

::-مو انتَ..

رفع حاجبه وگال

::-هذاك الباب واني اهنا

::-تمام اني طالعه هيج بس اذا صار واحد گدامي من الولد الحرام عليك

خزرني رحت أريد اطلع وهو جراني رفع راسي أبتسمت اله ورفعت رجلي اصير يمه همست

::-اطلع؟

وهو همس بنفس الطريقه

::-اكلي تبن

ميلت راسي ورفعت عيوني اله چان واگف گدامي بخطوات صافن بعيوني بنظره ما بيها غضب بس شي غريب شي ما متعوده عليه من عنده قرب وجهه شوي واني خازرته مثل ما هوه خازرني

بهدوء حط راسه يم رگبتي شمها وكأن ريحتي تهمه كأنه أول مرة يحس بيه وهاي چانت أول مرة يتقرب أول خطوة يخطيها باتجاهي مو بالعصبية مو بالغرور الشايله چانت بيها حنية مخفية بس ما لحگنا نكمل اللحظة.

سمعنا صوت بنت تصرخ بدون تفكير ركضنه اثنينه بس هوه أسرع مني تلاحگنا الخطوات ولمن وصلنه على نص الدرج شفنه ريفان لازمه ايدها وتصرخ وجهها مصفر
دموعها تغسل وجهها وخوفها گلوبنا طاحت من مكانها

::-شبيج شكوو

وهيه تصرخ لزمها وهيه صرخت نزلت الها اركض اريد اشوفها وزلگت اني هم لزمني أمير بيده رجعني علي كعدت يمه

::-على كيفججج انتِ الثانيه

::-عباية

لفها بيها شالها وركض نزل هارون وراه وراهم سديم وسيف كلهم صايرين بصف واحد بس فجأة وهم نازلين صارت رجلي على السيراميك طلع بيه صابون أو شامبو زلگوا اثنين من عدهم وگعوا على الدرج

ركضت للغرفة چبت مي ورجعت أركض چبيت على الدرج حتى اشوف وصار صدك وقف وفجر إجت يمي نبرتها كلها توتر

::-شكو؟

::-شانبو مدري صابون بالگاع

اجت لزمت الگاع

::-منين اجه

::-الله اعلم جيبي سطله مي وصله خل انغسله گبل لا يجون الجهال لو عماتي يصعن

راحت بسرعه جابت ماي وصلة المسح ومسحت المكان كله وباقي يطلع وقف كملت ورجعت غسلت الدرج مرة ثانية ونشفته بحذر

وصرخت سرور بيهن

::-احنههه يمسلسل هنديي لخاطرر الحسين وحتى لو طاايح منچن چان مسحتنه

كملت اصيح واني رحت يم عمتي ام هيثم اشوفها واديان وجهها مخطوف لونه عماتي يم عمتي يهدنها

شويه ورجعت وهي تعبانة باين عليها الضيم من كلشي إيدها مكسورة مچبسيها وهيه ساكتة ما تحچي دخل وياها هيثم وسيف هشربت المسكن وتمددت حتى صوتها ما سمعنا كأن ما إلها خلق تحچي أو تشرح شصار.

ضلّينا نباوع عليها ساكتين نحس بيها بس ما نعرف شلون نواسيها نامت وهي موجوعة.

رحنه نسوي عشى للليل وكلنه گعدنه سويه سوالف وضحك خفيف يعبّي الجو ريفان كعدت هيف وسرور اخذوها وياهم وطلعوا يتمشن بالحوش احنه بقينه والبنات كل وحده متوزعة بالغرفه سوالف هادئة، بس فجأة سمعت صوت امير يصيح بصوت عالي گالت فجر

::- روحيي عيني العشك ما يگدر يبتعد عنچ

::-ايي كلشش هسه اترزل وارجع

طلعت اركض واني اضحك على سوالفهن دخلت وهو غادي نار يريد ينفجر بعدني ما حاچيه وحط التلفون بوجهي صوت ولد يتغزل بأسمي واني على ساس كاتبه كتابه وغزل وحب وغراميات كلها بهاي المحادثه احس گلبي طاح حسيت بالهحضه نهايتي أدموعي طاحت اشرتله لا وهو بعده يباوعلي بعين ما شفت بيها رحمة صوت النفس بصدري ينگطع كلشي بدا يعتم بوجهي من ...

"سرور"

نتشمه بالحوش بس هيف دگت بينه الناقصه وطلعتنه نتختل للبستان طلعنه وهيف گالت نلعب غميضان
اني قبلت بس ريفان ما قبلت بقت بالترك كاعده
حسبنه طلعت اني وهيه الي تغمّض گلت.

::-بنت امج وابوج تعالي الگيني

مشيت أركض علمود ألبد تلفتت على مكان زين
رحت أركض درت من باب البستان الثاني على الكراج
شفت شيث ويا ابنيه ملثمه وكفت صرت بالزاويه وهو يگلها

::-شجاابچ

::-بس حط الرساله يم مكان زين

::-الكامرة يول

::-طفت

بالحضه عرفتها نفسها بنت الطُرماح صحت

::-شيث

التفتوا عليه اثنينهم هوه بالحضه رفع السلاح بوجهي
وحط إصبعه على حلگه يكلي اش وكل شي بعده انقلب بثواني

::-اشش ولا كلمه لا افجر راسج

انصدمت فتحت عيوني على وسعهن شلون؟ شصار؟ شلون وصلت لهنا؟ درت بصدمة أريد أركض بس رجليه ما طاوعتني كأن الزمن تجمد وهوه بعده واگف سلاحه بيده وصوته ساكت بس عيونه تحچي ألف تهديد ابن عمي ضدنه شيث هوه نفسه الي هددنه والي راد يكتل اختنه بت عمه اديان ما فكر حتى بيه الي اتفق وخان

درت أريد أركض أريد أروح أريد أصرخ بأعلى صوتي أخبر الكل عليه بس بلحظة ...

"هيف"

كملت العد وگلت بصوت عالي

::-لاابد ما لابد معليي

ودرت أضحك طلعت أركض أدور ركضت أول شي على الترك لگيت ريفان بعدها بمكانها بستها على خدها وأنا أضحك وگتلها.

::-غششيني

::-ما ادري

عفت ريفان وركضت بس گلبي گام يوجعني نوب خفت تدخل للبستان وتحي رجعت أدور عدل عيوني تدور بين الخضار والثيل بنص ركضتي دوت طلقات!

وحده وبعدها ثانيه حسيتهن چن أخذن روحي وياهن
التفتت عالصريخ صوت ريفان ينشگ الروح
ركضت بسرعه بتجاها وشفت سرور طايحه عالأرض وريفان يمها منهارة تصيح وتحضنها ...

يتبع ...