ناراحيدرة الفصل السابع عشر 17 - بقلم Namarq

وتحَسب إنكَ جُرمٌ صغَير وانتَ الليل وسَماه ونجومه وقَمره عند احِدهم

..

- عفوا ؟!

- والدك حاليا بالسجن لزمنا هو وجماعته احنا عند باب بيتك سيد حيدرة ننتظرك

غلقته مصدوم چنت جاي للبصرة بسببه وهسه هو بالسجن! حركت السيارة رجعت لبغداد وموبايلي صامت قبل ما انزل من السيارة فتحته دك اتصالات من حسن وطيبة..

دخلت للبيت طيبة گاعدة بالطارمة وتبچي..
- خير طيبة شكوو شصاير حبيبتي!؟

اجت تركض وتبچي حضنتني ..

طيبة :- ويين چنتت حيدرررة اجووو اجووو الشرطة قبل اربع ساعات دكينه عليك ومارديت والشرطة اخذت حسن وياها وراحووو

- شششش بويه مسحي دموعج روحي بس جيبيلي كلاص ماي نشف ريگي خل افهم السالفة غبت عن بغداد نص يوم وهيچي يصير بيكم بغيابي

گعدت علئ الكرسي شربت ماي وتصلت علئ حسن مايجاوب ..

مغلق ، ابن الثور ماترد رحمة للحسين

صحت لطيبة :- ليش اجوو ومنو چان يمچ؟

طيبة :- ماادري بس سمعت حسن يحچي علئ ابوي وحتئ الشرطة ؛ محد يمي بقيت بحدي

سكتت وتنهدت .. ياابه ارريد ارووح للمركز هسه ، شلوون اعوفچ بحدچ بالبيت ،وين اوديچ ،السالفه رح اطول

- ماادري

- رووحي لبسي حجابچ وتعااي للسيارة

- خوش هسة دقايق

تشتت تفكيري ما اعرف وين اوديها حرت حييل مناا افكر بإلي أتصل عليه وكال لزم هلسكير ومنا افكر بحسن اخذو ، وطيبة ما اكدر اتركها بحدها بالبيت واروح ..

حركت السيارة واتجهت لبيت ابو سالار ..افضل شي واحسن حل اجه علئ بالي ،

- تبقين يم البنات وراح ٲتٲخر اني لاتخافين وتقلقين عفيه بالسباعيه حتئ لو تباتين اليوم عدهم موغريبين خوش حچي ؟

- اي والله لاا ما اقلق ابقى يمهن

- يلاا حبيبتي نزلي ..

طلع مصطفى حاچيته دخلت جوا وصلتها واتوجهت للمركز دخلت شفت حسن كاعد يم الشرطي سلمت عليه وحچيت وياا

- ألقينا القبض على چاسب بتهمة التجارة بالمخدرات اتصلنا عليك بعدما عرفنا انو عنده ابن كبير عايش بغير محافظة وطلعت انت سيد حيدرة..

- اولا اعتذر على التأخير چنت بالبصرة والطريق اخذ نص وقتي جائز ما فهمت الموضوع صح چاسب يصير ابوي بس انا وأخواتي قاطعين علاقتنه بي يعني اعتبر ما يهمنه اذا چان تاجر مخدرات ويسكر

- ويسكر هم؟

ضحكت ضحكة عالية:- خليها على الله حبيبي وين فد سالفة طايح حظها متجمعه بي المهم بشنوو افيدك..

- سيدي والدك شغتله مو سهلة ابداً ، خطيرة جداً واحنا حاليا قابضين عليه وهو بالسجن وباچر يتحول للمحكمة ومناك ..

- لجهنم

- القاضي رح يحكم لو اعدام لو مؤبد لان مو فقط هوو يتاجر ؛ كذلك جماعته واحنه لازمي بس هوو وكم شخص ودا نحقق وياهم

اثناء الحديث اجه علئ بالي حادث ابو سالار ، الله يرحمة الواضح ما عدهم علم بالحادث والقضية مامشتبها بي والله خوش طلع منها
هذه فرصة واجتلي تبليغ واحد مني عليه رح تنفتح القضية بعد رجلية تلمست ارض المركز
يحلم يطلع منه الا علئ جثته

لليل رجعنه بعدما انهلكت من التعب..

حسن :- يخوي چا غير طلعت روحي منين طلعتلنه هالسالفة..

- ما ارتاحيت من هلثور سنتين هم رجعت وشفته بحكم انا ابنه لو اعرف اتبره منه! ما اتشرف اكون ابن هالحيوان المو بشر

حسن:- الله يخلصنه منه ومن مخدراته

جاي اسوي وتالي ضربت جبيني بنسيان وگفت السيارة.. لحظة لاا چؤؤ نسيت طيبة خرب عمي

حسن :- شنو نسيتها ليش هيه وينهاا ؟

- غير انت المحترم والشريف عفت اختك الصغيرة ورحت وي الشرطة وخبلتها لوحدها، وديتها لبيت ابو سالار الله يرحمة ورحت للمركز

- والله دگيت عليك ماترد والشرطة انتضرتك فوگ الساعة تالي اخذوني وظل بالي عليها بس انت كلت تجي شعجب وديتها الهم ؟

- ما ادري اجوو على بالي واقرب شي

- هاا

- اي يلاا وصلنه انزل حبيبي

- رووح انت والله باردة شعندي نازل وياك

- جحش موبيدك

نزلت ودكيت الباب ، اهز بالسويچ ومنتظر، تردد على سمعي صوت ناردين

يااا الله ...

...

اندك الباب ، چنه نلعب اوراق اني وخواتي وطيبة ، وحيل فرحانة لجيتها النه لانو ملل بالبيت وسوت النا جو..

اجتي فجأة وصلها حيدرا وراح ماهمني والتهيت اسولف ونلعب بغرفتنه چنت كاعدة يم الشباك وسمعت صوت صف سيارة بعددت البردة وچان اشوف سيارة حيدرة دخلت بالفرع..

رحت نزلت وكفت بالطرمة وندگ الباب گلت منو..

صاح :- اني اني حيدرة صيحي لطيبة بلا أمر عليج..

فتحت الباب وچان اتصير عيني بعينه صارلي اكثر من 8 شهور ما شايفته! سكتت وهو صافن بوجهي

تالي تحمحم ودنگ راسه وگال:
- ناردين صيحي لطيبة اريد اروح

هزيت راسي وگلت اله:- تمام هسه رح تجي ادخل ليش واكف هنا الجو بارد هسه يجي مصطفى اگعد يمه ..

ما قبل يدخل عفت الباب مفتوح رحت لمصطفى صحتله طببهم هوو واخوو

ورحت لطيبة صحتلها نزلت بعدما شربوا چاي راحوو..

رجعت للغرفة وحضنت مخدتي.. ياالله متغير هواي 8 اشهور ما شايفته

استغفرت ربي ما اعرف اني من افكر بي بيني وبين نفسي

حلال لو حرام ؟ ،،،

اجه امجد رحنه انه ونبراس ونور سلمنه عليه وكعدنه ساكتات بس هو يسولف ويفتح مواضيع ومصطفى ويانه

تالي صعدوا للغرفة اتأخر الوقت وكذلك رحنا احنا لحتى انام ، امجد رضى ونسى الموضوع مال طردة امي سالار حاچي وياا ومصالحة

،،، لان سالار متصل علئ سالار وحاچي عليها

وعلئ تصرفها الي يفشل وحلفها بعد ما تعيدها وكالها لؤي وجيته علئ البيت ما انساها ارجع لبغداد ويصير خير

وفعلاً امي سكتت ومن اجه امجد ماطلعت بقت بغرفتها لا سلمت ولا اعتذرت

ليلتها مانمت للفجر والتفكير صرع راسي تحلمت بي وياريتني ما متحلمه رجع نفس احساس اول حلم ورجعت افكر بي

ثاني يوم من رحت للكلية بالإستراحة شفت عبدالرحمن يباوعلي ويضحك..

كلت اطنشه افضل لاتصيرلي مشكلة بسببه إذا حچيت وياا.. مر اسبوع نفس الكليشه .. كل ما اطلع من المحاضرة وحدي لو وي صديقاتي بالقسم اشوفه واگف امام القاعة عبالك ينتظرني

،،البنات ضلوو ينتبهن ومن يشوفني يغمز ويبتسم

يالله هذا خبل شبي يكوول صديقي لو اعرفه
ماعبالك حچيت وياا بس مره وموقف موحلو مبين عليه عنده سوالف مكسرة

كلت احاچي العميد عليه احسن لان ما اريد سمعتي تصير موحلوة بين الطلاب القسم

طلعت من المحاضرة مدنگه ما اريد اشوفه بس لمحته واكف مشيت بسرعه وچانت وياي رسل زميلتي رحنه للحديقة وسولفتلها عليه

تالي من كتلها اريد اشتكي عليه كالت بصدمة:
- اسمه عبد الرحمن مو؟؟

- اي ليش شبي

رسل :- كولي والله ! عززه بعينچ ولچ هذا ابن العميد عماد ،، نوب تردين تشتكين عليه حتئ يفصلوچ من القسم والله

- وإذا ابن العميد اريد اشتكي عليه لأنو يضايقني بنظراته و وين ما اروح يلحگني

رسل :- ولچ وثوله وين لايكتلچ ابن العميد ويباوعلچ يمكن معجب بيج لو يحبچ ؟ فوكاها تشتكين والله بطرانه وترفسين النعمة برجلچ هوو الله ينطي جوز الماعنده سنون

- شبيج اكلتيني اكل لايكون تردينه اخذي بس ريحيني منه

رسل:- وين الگى بجماله بس جديات ناردين لا تشتكين غيرج سووها وفصلوهم فصل نهائي يعني عبد الرحمن مو شخص عادي ديري بالج منه طنشي احسن

- امشي امشي صوچي اني اسولفلچ

اسبوعين نفس الشي صرت اكرهه اروح للكلية بسببه واتأخر بالقاعة ما اطلع حتى لااشوفه

وبيوم گاعدة بالحديقة نتغده مسويات عزيمة اني جبتلهن بس عصاير وهنه مبدعات

،،الدولمة ،، والبرياني ،، والدجاج ،، والمقلوبة ،،

لمه حلوة وضربنه المحاضرات ما رحنه ماعدنه محاضرة مهمة كنسلناها وكعدنه ناكل ونسولف

دا اكل وألتفتت چان اشوفه واكف من بعيد يم الزرع وتركيزه عليه غصيت بلكمتي انتبهت عليه رسل وشافتني چان اتباوعله وضحكت عليه..

اتبدئ العصير علئ تنورتي تنرفزت ..

الحقيرة تعمدت تشمره عليه حتئ اكوم ادري بيها كمت واني متجهة للحمامات حتئ اغسل توصخت

چان يلزمني من ايدي دفعت ايده بعصبية:
- منو الي سسسمحلك تلززم ايددي؟

عبد الرحمن:- اهددي ارريد احچي وياج كلمتين لا اكثرر ما اسويلچ شيء

- واني ما اريد احچي ويااك ومره الثانية لا تلحگني لا اشهرررك

- اگعدي والله كلمتين واروح وبعد ما اضايقچ بس اسمعيني

نفذ صبري وجاوبته:
- احچي هنا بمكانك وروح..

- ماشي ناردين

صفنت مستغربة:- انت منين تعرف أسمي ؟؟

ابتسم وگال إلي: ناردين جاسم صالح ، مو بس اسمچ كلشي عنچ اعرفه اسمچ ،، عمرچ ،، منطقتچ ،، عائلتچ ،، وكلشي

ظليت مصدومة جاوبته شلوون تعررف عني كل هالمعلومات منووو انت اساساً !!

- مو صعبة على عبد الرحمن هذن سهلات اصلاً شوفي مثلا ابوچ متوفي صارله 10 اشهر اخوچ سالار مسافر إلى اربيل اختچ التؤام بقسم رياضيات وعندچ اخ واخت بالإعدادية

صفنت مصدوومة عزه هذاا شنووو وشلوووون يعرررف كل هذا المعلومات!!

كلتله بدهشة:- انت منووو وشتررريد مني؟؟

- اريدچ انتي

- نعععم !!! شقصددك ؟

- ناردين اني احبچ !

انصدمت ! :- شنوو تحبني شداتحچي اخي؟؟

- اي احبچ واريدچ اريد اتزوجچ!

- شبيك اي زوااج شحبيت مني؟؟

- حبيتچ وجذبتيني بجمالچ وعفويتچ واسلوبچ وهدوئج كلشي حبيت بيچ

سكتت مصدومة منه ..

- باچر الوالدة تجي تطلب ايدچ

- لااا لاا تتعب نفسك لاا تجي اني مااريد اتزوج ولا اريدك ارجوووك ابتعد عني

- لا تستعجلين اخذي وقتچ بالتفكير عايفچ على راحتچ

- لا اني ما موافقة خلص وابتعد عني

اجت رسل رحت وياها بسرعة وعفته واكف وضاج من ردي عباله اوافق لو افرح

سولفت لرسل بعدما لحت عليه الا احچي الها شنو صار ،،،،

رسل :- عزززززه دريت بي يحبچ والله بس اخ هنيالج شگد حلو وين تلگين مثله عندﭲ حظ وبخت ابن عميد وشخصية وزنكيل وحلووو واشگر وطوله يخبل وانيق وعيونه تخبل ولچ والله وافقي ولاترفضي يعشيچ اميرة بالجنة

- انچبي شايله الزواج من راسي

- بس ناردين

- فدوه رسل اسكتي وارجعي اكلي هاچ هااي دولمة اكلي وسدي الموضوع

كعدت تاكل واني صافنة خطر على بالي حيدرا

سماره وعيونه.. وشخصيته ورزانته واسلوبه وهيبته وهدوئه وضحكته.. وكلامه..شنسى منه؟

خلص الدوام ورجعت للبيت ونفس الشي امي ماطابخة بس الها والگا نور خطية دوامها عكسنه مرات فتحل قبلنا ونلگاها مگليه طماطة لو مسويه فد اكله ما ادري امي شنوو من گلب عدها وهالگد قسى علينا

هذا الشهر كال سالار اجي قبل رأس السنه لبغداد اشوفكم وباقي على رأس السنة كم يوم وندخل بسنه جديدة

هاي السنة بابا مو ويانه كل سنة نحتفل لو نطلع للمدينة الألعاب تصير اجواء حلوة وننتظر ادگ الساعة تصير بـ12 ويطگون الألعاب النارية بالجوو وبكل بغداد ونستقبل السنه الجديدة نوعاً ما بفرح

لكن هاي السنة ما رح نحتفل مجرد اتذكر بابا عيوني تنعمي من البچي رجعت للغرفة ببؤس وما تغديت شبعانة من اكل العزيمة

كلت ما انام باچر عندي امتحان واذا انام اجرها جره وحده من العصر للمغرب

اخذت موبايل شوي كلت اتصفح وبعدين اگوم ادرس

طلعت الفيس صرت اتصفح بالمنشورات ايدي اخذتني على حساب حيدرا

اباوع لصورة البروفايل مخلي صورة ايده وكاتب بالبايو (It is unfortunate that you do not know where to go and all places ask you to stand. )

(من المؤسف أنك لا تعرف إلى أين تذهب وكل الأماكن تطلب منك الوقوف .)

تنهدت وطلعت من الصفحة اجت نبراس تريد الموبايل انطيته الها ورحت طلعت الملازم والمحاضرات وگعدت ادرس على السبورة

كأنو استاذة واطلع صوت عالي حتئ اركز بالمادة هاي نصائح وحدة سچاچه ويانه بالشعبة گالت اشرحوا لنفسكم واقروا بصوت عالي ورح تفهمون المادة وتحفظون..

خلصت ورا المغرب كعدت على التلفزيون اگلب تالي رجعت اراجع بالمادة وادرس لحد الليل نمت رحت للكلية الاسئلة چانت نار تموت صعبة كلش
كلنا انصدمنا هذا الاستاذ مين جايب هاي الاسئلة

كأنو باحث على اصعب اسئلة ومخليها طلعت من الشعبة ضايجة الا شوي وابچي ما مجاوبة البارحة ضليت ادرس وجان عندي واهس وكلت اجاوب هسه حتى درجة نجاح ما احصل يمكن..

مسحت خدي وكلت واني اصبر بنفسي عادي يابه وذا

وهذا عبد الرحمن هم ما تركني بحالي حييل تعصبت واني مناا متعصبة من الأستاذ رجعت للبيت

بليل اندگ الباب طلع مصطفى واجه صاح لامي كالها اجت مره تريدچ امي رحبت بيها ودخلتها للهول ورحت اسوي چاي سويته وصعدت فوگ

نور:- اول مره اشوفها منوو هاي الي اجتنا بليل

- اني هم ما اعرفها الصراحة

على سؤالها طخت عندي لااا عززه بس لاصدگ سواها ! هاي امه عبد الرحمن؟؟ ضليت احوس اروح منا واجي منا ما اتأخرت عدنا نص ساعة وراحت

نزلت اني ونور ونبرس .سئلتها نبراس :
- منوو هاي

ماجاوبتها باوعتلي وخزرتني سحبتني للغرفة سحل وصاحت بيه ادبسزز حمارررة وديناچ للكليه حتى تدرسين مو تتمعشگين كلبة

- شبيج يووم شدتحچين شنوو اتمعشگ!

- وعمه الله ياخذج ويخلصني منچ المرة اجت تطلبچ لأبنها واحد وياچ بالجامعة

سكتت ..

- توﭲ داومتي ما صارلچ شهرين وترحين تصاحبين وتحبيين فلك ولچ شنوو من بنيه انتي لو مخلفه چلبة اشرف منچ

- يووووم شصاحب شبييج اكلتيني بكشوري هوو الخطبني شعليه اني اكله لا ادز امك لا اعرفه ولا يعرفني ترى !

- كلبة ما يمشن عندي هالسوالف عبالج نسيت سالفه حيدرة والعيادة الي رحتيلها خلي يجي سالار اني الچ يا كح* *

شهگت وظليت ابچي من كل عقلها تغلط وتسب بشرفي.. معقولة هذه امي!

- بنتچ انييي بنتچ والقرررران مو عدوتچ!

- بنت الفگر ولي ادبسزز اذا ما اطيح حظچ ما يطلع اسمي سعاد طلعت ما مربيتچ بربو*

عفتها صعدت للغرفة بچيت بحرگه گلب خفت منها لاتسويلي مصيبة فدووة ربي ما ناقصني بس مصايب امي!!

كلت اتصل بسالار من الخوف ما تحملت بعد اتصلت بس ما يرد وطلعلي مغلق ! رحت نمت وگلبي يأذيني ودموعي على خدي

كعدت مالي نفس وخلگ اداوم بس شسوي ما اريد يسجلوني غياب بدلت شلون ما چان ورحت وحاولت ما اشوف امي انتظرت السايق ورحنه اني ونبراس

ورا المحاضرة چنت طالعة چان اسمعه يصيحلي بأسمي !! ألتفتت عليه يباوعلي بعصبية جر ايدي واني مصدومة من تصرفه المفاجئ..

نترت:- شكوووو خيررر؟؟

ترك ايدي وگال بعصبية :- ولچ اني الي اترفضيني وامچ تطرد اميييي ولچ انييي؟؟؟

- شنوو شدتحجي يمتى امك انطردت؟

- لا تغشمين نفسج وتمثلين انتي فقيرة وما تدرين انو من اجت امي البارحة حتى تخطبچ امچ طردتها وگالت الها محجوزة ناردين لابن خالها وعرسهم هذا الاسبوع !!

بسيطةةة اذا ما اندمچ على كل لحظة ويوم حبيتچ بي ماعاش الي يرفضني ويطرددد ام عبد الرحمن ترقبي باچر شسوي بيچ وشنو رح يصيرر الچ

بعدني ما حاچيه كلمة دفعني من كتفي وراح يمشي سريع بقيت واكفة بمكاني مصدومة تالي گعدت على مصطبة

مصدومة من امي الكلتلهم محجوزة لابن خالها وهذا الاسبوع عرسهم وهيه تقصد لؤي بكلامها!ومن تهديده الي ..

يا رررب ساعدني اطلع من هلورطة بچيت وعفت رسل ماحچيتلها شيء رغم اصرت عليه احچي لان حالتي مخربطة..

ما تحملت ابقئ بالكلية طلعت والسايق ما موجود لان الدوام بعده ما خلص لذلك ماكو اي سيارة

كلت واني امسح دموعي واتمشئ بالشارع واصبر روحي عادي يابه وذاا اتحملي ناردين اتحملي رح تفرج..

چان شهر 12 والدنيا باردة او بالاخص هذا اليوم جان بارد ثلچ تجمدت وماجنت لابسه سترة لو قبوط بس بلوزة وبردت

امشي وتالي توقفت حيرانه ما اعرف وين اروح احس ضاقت الارض بي !

امشي بضيقة گلب.. احس الهوى بالگوه اتنفسه رجليه اخذتني لطريق عيادة حيدرا ..

رفعت راسي العيادة صارت امامي..

عقلي يگلي لا تدخلين وارجعي للبيت لا تصير الج مشكلة وگلبي المهضوم يگلي ادخلي وروحي لحيدرا اشكيله..

اتراجعت ادخل بس مثل كل مره اتبع گلبي بكلشي دخلت مثل المسوية جريمة ألتفت يمنى ويسرى وجهي ينطي الالوان واحس صخنت

المكان فارغ ماكو احد موجود بس غرفة حيدرة وشفتها مفتوحة صارلي 10 أشهر ما داخلة لعيادته ! من يوم الي گلتله احبك !

تالي طلعت بنية من غير غرفة انتبهت الي وكالت عفوا منو انتي شلون دخلتي بدون استأذان

گلتلها باب العيادة جان مفتوح فعبالي موجودين! جاوبتني صح موجودين بس ما نشتغل اليوم اعتذر تعالي غير مرة الدكتورات ما موجودات ..

جاوبتها بس اني اجيت علمود دكتور حيدرة.. ردت بأستغراب دكتووور؟

- اي ليش متفاجئة

- انتي شنو اسمج؟

- ناردين

- اها هاي انتي ناردين! تقربين اله مو؟

- اي واذا موجود گوليله ادخل لمكتبه!

دا تحچي وياي بهذه الأثناء طلع من مكتبه مكتف ارداناته والقلم ورا اذنه بيده كوب گهوة راح اخذ ملفات من رفوف..

عدل شعره وهو يگول رقية وين راحت؟ چان يشوفني بالمرايا..

بسرعة ألتفت عليه بصدمة وگال..
- ناررردين !!!!

عاف الي بيده واجه ركض باوعلي بأهتمام وگال بنبرة هادئة..

حيدرة:- ليش اجيتي صايرلج شي احجي؟

سكتت ما جاوبته وعيوني على الأرض دخلني إلى مكتبه وقفل الباب..

حيدرة:- ناردين ليش اجيتي لعيادتي گليلي شصاير وياچ منو مضوجچ؟ احچي بويه اكسر راسه وراس الخلفوه..

كالها بنبرة قلق وحنيه ممزوجة بأهتمام مُفرط

باوعتله وعيني صارت بعينه شهگت وبچيت..

حيدرة: افااا ناري تبچي گدامي ولچ بويه دموعچ غاليات گوليلي منو المضايقچ احچيلي هسه اسحله گدام عينچ!؟

بالحظتها ما تحملت وانفجرت بالبچي مثل الطفلة وقررت احچيله كلشي صار..

احس بخگنه ومثل الخشبة النابتة ببلعومي ما اگدر احچي ولا اگدر ابلعها واسكت لزم ايدي بدفو ايده الباردة.. تجمدت بمكاني وحسيت رح ينغمى عليه من البچي تالي شمرت روحي بحضنه ..

يتبع . .

لا تنسون التصويت 🖤

الكاتبة #نمارق رحيم .