ناراحيدرة الفصل السادس وثلاثون 36 - بقلم Namarq

رواية '' نــاراحــيدرة ''

//// بقلم نمارق رحيم ////

بارت _35

يگول :-

چنه مثل ماي وهوا
حالة صداقة وحُب سوة ..

وهسه آنه واحد منهدم
فارگ حبيبه وصآحبه ..!💔

⭐⭐⭐⭐⭐⭐⭐

- رائد تصاووب استشهد لك ماااات رااح منه بعععد حيدرررررة

حسيت على گلبي رح يوگف اعز صديق عليه شلون يمووت باوعت على الموبايل شفت المتصل عباس جاوبته وبالگوه الكلام يطلع مني.. لااا لااا عباس اكيد چذب ما ميت لك شلوووون؟؟ جااي يمكم جااااي انااااا

غلقته ونغزات بگلبي قوية مناك صعد ضغطي بسبب ابوي وهسه هالخبر الي اجه مثل الصاعقة ما گدرت اسيطر على نفسي وابقى واكف صحت بأسم حمززززة..

اجه ركض رحنه للمستشفئ اكدوا الخبر وفعلاً استشهد ! ما تحملت واقعي المؤلم حالتي يرثى لها وانهيار بالأعصاب حاد .. ضربوني تخدير

افز شوي وارجع انام حيلي انهد ما عندي طاقة لحتى اگوم برحيله سبب ألم چبير اليه ..
...

ناردين

اتأخر ما رجع حسن اتصل على كل اصدقائه الي يعرفهم محد يرد گلبي نار عليه نشفت عيوني من البچي للفجر خابروا وكالوا اله حيدرة بالمستشفى

اني تخبلت وتخيلت مسوي حادث ومتأذي بسرعة راح حسن وعافنه اندك ونلطم انتضرناه للساعة 10 الصبح يلا رجع لوحده

كال مابي شي بس صديقة توفى وصاعد ضغطه وسكره وإنهيار بالاعصاب هواي انقهرت حقه ادري بي يعز ويحب اصدقائه هواي لحيت عليه الا اروح ما قبل يوديني ورا العصر رجع للمستشفى صبرت وبقيت كاعدة لـ8 بليل

گلبي نار على حيدرة والكل مخبوص ما سكتت رحت لخالتي اخذت منها عبايه وطلعت للشارع شفت 3 شباب من جوارينه كاعدين يكنكون عبرت منهم وسلمت من بعيد..

كلتلهم اني والبنات قلقانين على زوجي وكلنا نار عليه ومحد موجود بالبيت خويه اجيتلكم طالبة مساعدتكم ما اگدر اخذ تكسي بلا زحمة وصلني للمستشفى ..

كالي تدللين وهو يعرف حيدرة وفعلاً وصلني تشكرته ودخلت ادور بالردهات والعبايه على كتفي وتسحل كلها تراب وشعري طالع وعيوني حمر ونعالي احمر وصايرة فلم ..

شافني حسن تخبل ورزلني رزاله عدلة ما اهتميت لگدما مهتمة اشوف حيدرة .. جان نايم بقيت ساعة كاملة كاعدة يم راسه واقرا قران وامسح على خده واعصر بيده..

ارتاحيت من شفته ورجعني حسن ما قبل ابقى وبهذا وضعي مرن 3 ايام وهو بالمستشفئ الظهر رجعوا هو وحسن دخل عيونه ذبلانه واسفلهم اسود وحالته حالة ..

صعد للغرفة بدون كلام صعدت ورا مباشرةً تمدد على بطنه بدون غطى دخل حسن انطاني علاگة ادويه وطلع

كعدت يمه وايدي علئ ظهره كلتله البقاء لله حيدرا ياعمري شلونك شلون صرت !

همس بصوت متقاطع..
-تعبان ناري..

-ياروحها لنارك حقك تتعب وتحزن الصديق مو قليل

عدل گعدته عيونه حمره گالي محتاج حضنچ فتحت ايديه وشمر روحه بحضني.. حسيته مكسور ما يكدر يقاوم ويتظاهر بالقوة عصر ايدي قوي..

بچيت وصاح بصوت تعبان وثكيل رايد انام دفيني بحضنچ اخذيني بكلامچ من هالعالم ما عندي طاقة اتحمل اكثر..

تمددت وخلا راسه على رجليه وغطيته بقيت اللعب بشعره واقرا عليه سور معوذات لحدما حسيته صدگ نام..

كمت منه نزلت للهول طيبة ونبراس كاعدات وايدهن على خدهن ويتهامسن دخلت خالتي تسأل عليه طمنتهن وكلتلهن من يكعد ينزل جوا

3 ساعات وگعد ساكت رجعت دلكت راسه شوي هدأ وبدأ يحچي وياي..

-شخص عزيز عليه مو يوم ولا يومين من شفته عاشرته 4 سنوات من انا بالبصرة اعرفه ما مستوعب مات ناردين !

-الله يرحمة إنا لله وإنا اليه راجعون حبيبي ما يصير هيج تسوي بنفسك قوي روحك كلنا على هذا الطريق..

هز راسه وايديه على وجهة...سألته صديقك شلون توفى؟..

- رائد مات مغدور و شهيد

تنهدت وجاوبته.. الله يجعل مثواه الجنة الله يساعد گلب اهله عليه!!..

- ناردين امه ماتت من سمعت بالخبر

شهگت.. عزاااا ياررربي دخيلك !

-بعد گلب الوالدة ما تحمل لج اخخخخ

-حيدرة فدوة اهدئ بعد هذا يومه الله كاتبله هيچ الله يرحمه..

-والنعم بالله..

-ارجع تمدد رايحه اسويلك شيء تاكله

-ما اشتهي لا اتعبين نفسچ..

-لا لازم تاكل حساني كال حتى بالمستشفى ما اكلت شي ما يصير معدتك تبقى فارغة لخاطري اجبر نفسك على الأكل حتى تتقوى..

سكت ما رد بست خده وحضنته لصدري ظليت امسح على شعره وگلبي مورم عليه..

تركته نزلت جوا دخلت للمطبخ ودخلت نبراس وراي طلعت لحم كلتلها اريد اشوي لحم بس ما اعرف شلون ينشوي..

نبراس:- جيبي حبيبتي اني اسوي

اخذته مني و راحت تموعه خلته بجدريه وهي تگول شنو سالفه صديقة وشلون مات..

-خل اسوي الاكل بالأول تالي اكلج

-خوش

بقيت ساعة ونص بالمطبخ شويتله لحم بمقلاة هوائية وحضرت لبن حامض يحبه اخذت الاكل فوگ ودخلت للغرفة..

اتفاجئت فارغه ما موجود خليت الصينية على الميز وصحتله ماكو! تالي گالتلي طيبة طلع من البيت قبل دقايق..

حسن خاف عليه لا يسوي شيء وهو تعبان كعدت اللوب يارب عدي هليوم على خير..

رجع ورا ساعات ساكت ما جاوبنا وين راح..

نبراس

كعدت يم ناردين وسألتها شنو صاير ومنو هذا صديقه احچيلي..

ناردين:- "سولفتلها"..

-هاا اسمه رائد !

-اي..

طلعت من الغرفة مصدومة اجه ابالي الولد الچان يلاحگ نور واخذها من المدرسة

عزا بس لاصدك هو نفسه الي مات؟ هو اكيد هو.. لان صديقه ماكو غيره رائد، لازم اكول لنور لااااازم تعرف..

...

نور

بعد خطوبة سالار رجعنه إلى اربيل نهاية شهر السابع بالنسبة إلي مقضيتها نوم واكل

بالنسبة لسالار دا يتعب فوگ طاقته يطلع من 6 الصبح ويجي بـ6 المغرب يلف راسه وينام ويجيب ويا العشه والغدة..

كال نبقى اسبوع اسبوعين ونرجع لبغداد ما اريد اقطع هالمرة خطيبتي تنتظرني

بس رغم التعب فرحان بطيبة والظاهر كلش حبها واتعلق بيها افرح من اشوفه فرحان يارب يتمم الزواج على خير وبدون مشاكل لان تعبنه حيل..

من چنه ببغداد راسلني اول مرة شخص لازك بيه وحظرته بوقتها ، ثاني يوم رجع راسل من غير رقم وكذلك حظرته

تالي من رحنه لأربيل اني ومصطفى وي سالار بقى يتصل ويلح اكول الو ما يجاوب تالي اسده وكل يوم نفس الشيء بحيث تعودت

مرت فترة وبيوم من الأيام راسلني كال ادعي لامي مريضة..

كلتله الله يشافيها يارب بس ارجوك لا تراسلني مو بحمل مصايب ومشاكل بعيدة عنها

قرا الرساله وما رد ورا ايام اختفى لا يتصل ولا يراسل ..

تالي فجأة دز رسالة

(ما تصوريين شكد فرحان سوو تحليلات لامي وطلعت سليمة وراجع لبغداد)

كلتله الحمدلله ربي يحفظها ..

دز ( ويحفظني الچ ام رموش الشگر )

كلتله بعفويه .. لا والله

دز (حلغومتي عندي الج خبر يشووگ شگ )

-شنو هالخبر !

- ( اصعدي اتصال )

-لاا ما اصعد لو تحجي لو احضرك ..

دز ( لعصابج سندوسة الرقيقة لعد اسمعي الخبر وهو بعد يومين بالضبط اجي اخطبج من اخوج)

كلتله..
-عزا منووو كلك موافقه لاتجي واتعب نفسك

- ( اتوافقين حياتي والله ما تصوريين شكد فرحان)

-ما موافقة..

دزلي اخر رساله ( و القران احبببج )

طلعت من المحادثه بيومها كل شوي افكر بي واكول معقولة يسويها صدگ و يجي يخطبني؟

دز بصمه صوتية على ( الواتساب) حملتها وسمعتها يصيح بيها بنبرة فرح واضحة..

'' لج نويرا بنت گلبي احبـچ وحگ الحسين احبچ ولأخر يوم رح ابقئ احبچ حلغومتي وامنيتي ''

ابتسمت لا ارداياً وما رديت عليه، صرت كل شوي اسمتع للبصمة بضحكة،

رجع اختفى 3 ايام ماكو اي شيء عنه كلت شعجب مو عوايده، لان حتئ من جنت احظره يراسل وما يمل فا قلقت

جنت كاعدة يم سالار نتعشه دگ مبايلي كمت غسلت ورحت شفت المتصل( نبراس )

رديت عليها..

-هلاا بلگاطعة شلونچ شعجب متصلة..

نبراس :- ولجج رائد مااااااااااااااااات

شهكت بصدمة ومن عيطتها بالمكالمة
صحت ورجف جسمي.. شنوووو!

سالار:- ويامن دا تحجين شنو صار ؟؟

كتله:- وياا نبراس

سالار:- شنو شبيهاا نبراس بيها شيء ؟؟؟

-لاا لاا مابيها شيء بس تعرفها مخبله واتصلت اتصيح اي اي كملي..

نبراس :- رائد مااااات

-على كيفج نبراس شمدريج وشلون تذكرتيها..

نبراس :- غير هوو صدييق حيدرة ... سولفتلها

حبست دموعي گوه رحت دخلت بالغرفة ماتحلمت عفت الاتصال وكعدت بالكاع ابجي بدون صوت حتئ سالار ما يسمعني..

نبراس :- ولج وينج دا تبجين؟ الله يرحمه بـَس ما فهمت ليش تبچين الــووو ويننج

-نبراس آخر فترة صرت احبه والله ولج قبل كم يوم گالي فرحان ورح يخطبني

-ولچ شنوو هذا حچي جديد يمته مخابرچ ومراسلتچ حيوانه ليش ما حچيتيلي ضامه عليه احچيلي كلشيي

-سولفتلها وآني ابچي..

-والله مدري شحچي وشگول! بس بعد الرجال راح لرحمة ربچ انسي كل ذكرى احسن

-شنسى نبراس دخيلچ شخص يحچي وياچ ويضحك ويسولف غصب عنچ تضحكين على سوالفه شنسسى؟ آخر مرة سمعت صوته يگلي احبچ للموت..

-كافي حبيبتي كطعتي گلبي الله يرحمة خيه بچيج ما رح يرجعه اتقبلي الواقع يمكن معجبه لو حبيتي اهتمامه او غير شي بس أكيد مو حب حب..

-ولج گلبييي گلبيي نبراس...

-نور مو هيچ ما گلتلچ حتى تنقهرين زيادة إذا صدگ تحبي روحي اقريله قرأن هذا الي يفيدة مو دموعچ..

-شلووون مات كلتي؟

-شهيد متصاوب ما اعرف شلون استشهد حيدرة ما گال لناردين شلون مات بالضبط لان صارلهن كذا يوم يحققون بالقضية تنتهي نهائياً يلا يحچيلها

-هاا

-اي يلا رايحة اني بالچ على نفسچ حبيبتي قوي گلبچ وگولي الله يرحمه هذا حكم ربچ همزين ما خطبچ لو قوا حبچ وتطورت علاقتكم چان تعذبتي اكثر بعد ربچ كاتبله يموت..

-والنعم بالله..

...

حيدرة

-دممم رائد ما يرووح هدر الأ انتقم واخذ حقه اخووي..

عثمان:- طبعاً حبيبي واحنا وياك بكلشي

-محروگ گلبي عثمان.. الا اقبض عليه وين يروح مني الي كتله الگا الگا، وبساعتها اعذبه عذاب الا اخلي يتمنى الموت فلا يطلع اسمي حيدرة..

ابوي خليته بالمركز وأمرت عثمان يراقبه ما اريد يطلع مثل مره القبلها اخلص من موضوع ثار رائد واتفرغ اله

رجعت للبيت اجمع بالملفات والاوراق ..

ناردين:- شدتسوي؟..

جاوبتها وانا اكتب باللابتوب.. اشتغل..

ناردين.. تركته ونزلت دخلت لغرفة طيبة كاعدت يمها نحچي ونبراس ماخذتلها ركن للصفنات الريلاكسية ..

-اكلج طيبة عادي اسئلچ سؤال صغيرون..

-اي گولي..

-حيدرة شنو يشتغل؟؟..

ارتبكت و دارت وجهة وجاوبتني بتلعثم شنو يعني يشتغل غير دكتور..

-شبيچ مرتبكه

-عادي ما بيه شيء شبيه مثلاً..

-واضح

-اي

-وهو واضح دكتور..

دخل حسن لازم علبه صبغ گال لطيبة :- بعد اخوچ رايد اطلع تعاي صبغيلي حذائي بالعجل مستعجل وربچ اجيبلچ نساتل من اجي ..

ضحكت وكلتله وياك لنبراس وناردين ورغد..

حسن:- من عيوني شعندي غير بنت حويدر ومرته واختها..

باوع لنبراس وضحك وهي دارت وجهة..

ابتسمت تذكرت سالار اشتاقيت لأيامنا القبل چان هم مثل حسن يگلي صبغيلي حذائي لو نضفي غرفتي واني اشرط عليه الا ينطيني ألف مصروف لمدرستي..

شكد حلوة ذيچ الايام امنيتي ارجع الها حتى لو اعيش يوم واحد سألت نبراس على الالبوم الي بي صور لفرقة BTS'' صارلي هواي ما شفتهم

گلتلي بالكنتور جابت الالبوم وياا غراضي من چنت بلندن خلتهم صعدت للغرفة وطلعت الالبوم طشرت الصور اكثر من 20 صورة وحيدرة گاعد گبالي فاتح الابتوب گعدت مبتسمة..

صحت..فدوووة لهل خلقة..

حيدرة:- مو وقت خبالاتچ..

-لا مو عليك حبي على جونغ كوك

عاف اللابتوب وباوعلي وگال هذا منو؟

-حبيبي بفرقة BTS..

-ها جماعتج كوري مو؟

-اي عشقي الاولي

-عشقها الاولي ام خشم..

باوعلي صفح خزرني ورجع يشتغل..

- صدققةةة لهل خلقةة شنوو من عيون بقلاوة ،، و حواجبه احلئ من حواجبي قبل ما احفهن،، الخشم موزه مگشرة ،، الشعر شكلاطه ،، الحلك كرزاية ،،، خلقه لوز علئ كعك ياربي

-احترگت عشيرتچ بنار ونفط رح اسحب الصور منچ احرگهن گفيلچ علي كاعدة تتغزل بي گبالي شهل صلافه..

حچه آخر كلمتين بتنرفز متت ضحك..

-مضغوط شني انت احلى من بارك جيمسن ؟ غير يخبووول

شمر عليه علبه الكلينكس..

باوعتله صفح باوعلي بنظرات حادة رفع حاجبة وهز ايده وهمس الفاهيه ام الجفصات..

-حوويدر ابوو المهماااات..

- حويدر بعينچ

- خووش، لعد اسمع، حويدرنا كعد، مايغرد بعد، أسد بابك علئ گلب حبابك، احساس ماالك، وناردين متانيتك وها وها وها حويدر ماكو منه اثنين،

گام بسرعه بدون ما يحچي فتح الجرارة الميز طلع لاصق اجه يمي يتوعدلي..

-لا والنبي اني اعتذر والله واطلب السماح سيدي وياك وحدة خبلة ليش تتعصب ما تسوى..

-شششش..

خلا الاصق على حلگي ورجع كعد صرت ادندن يطلع صوت تلحين ما اگدر احچي ربع ساعة وخرته ميته ضحك وهو طلع نزل جوا..

ضربت راسي بخبال شلون وياي يمكن رح اخليه يتخبل عزاا تالي بالنهاية نگعد اني وياا ونشد علگ بلكت نعقل..بقيت اضحك رجعت الصور بالكنتور

...

حيدرة

بعد اسبوع عرفت منو الي قتل رائد من خلال تسجيلات الكاميرات على الرغم إنها مغوشه بس گدرنه نلمح رقم الدراجة

الي عبرت على سيارته ومن نزل رائد تلازموا بوكسيات لحد ما صوبه طلقتين بصدرة..

راح شهيد دافع عن ماله وشغله و روحه ..

رائد ابو الضحكة الحلوة الي كل ما يشوفني ضايج لو مقهور يجي يشاقيني لو يوديني لفلان مكان تالي يعوفني بدنيتي وحدي اصارع..

قسمت اقتل الي ضربه رح الگا حتى لو موجود بأخر الدنيا الا اعذبه عذاب اخلي يتمنى الموت

مر اسبوعين حصلته وصار بمركزي اعترف هو الي كتله چان عندة عداوة من سنتين من عرف شنو يشتغل رائد قرر يكتله وخطط لليوم المناسب وكتله برصاصتين حتى ما يوصل الاخبار لانو جان ببغداد

يومين مگابله وگاعد نتل صلخ كلهن جربتهن ثالث يوم تحول للمحكمة وانعدم بسبب ملفه الأسود ..

رحت بنفس اليوم إلى النجف - مقبرة وادي السلام

بطل انت بطل ورفعة رأس وفخر النه حبيبي إن شاءالله يجي يوم واستشهد مثلك كلش اتمنى هليوم.. ما كملت فرحتك ردت تخطب الي تحبها الله يرحمك يارائد..

....

ناردين

رجع حيدرة فرحان صاحني اجيت للغرفة حضنني من ورا ظهري وشالني اتفاجئت عزا هذا معقولة حيدرة ضل يفتر بيه تالي نزلني قربني منه وباسني

تالي ابتعد راح تمدد على الچرباية والفرحة مبينه بعيونه.. بقيت واكفة بمكاني صافنه بوجهة

ضحك وگال فرحان ناردين فرحان بأنتصار وهم بشغله ثانية ما متوقعها .. شنو تردين هسه گولي بسرعة اطلبي ويجرالچ من هالعيون الاثنين

كعدت يمه مبتسمة گلتله.. ما اريد شي والله وجودكم انت والاحبهم كافي ما اريد اطلب اشياء..

فتح ايديه بمعنى احضنه ابتسمت ورحت حضنته قوي باسني وگال رايد اكلچ شي كلش حلو بس مو هسه انتظريني..

-ليش مو هسه..

-افضل اي يابه بويه يا باباتي اطلبي واحچي شنو تريدين اجيبلچ ؟..

-مممم عادي نطلع سوا..

-ولو اوضاعي مو تمام بس عادي تدللي گومي بدلي نطلع نتونس..

-صدگ! ..

-اي والله واعذريني لو بيدي اطلعج كل يوم بس حكم شغلي شسوي كلش مشغول هالفترة!

هزيت راسي بالقبول وباسني بخدي ضحكت وطلعت اسبح وابدل وهو نزل جوا ..

...

بالصالة ..

حيدرة:- يمه خير شبيچ؟..

ام حيدرة:- رايده ارجع البصرة بعد گعدتي اهنا المن صارلي ثمن اشهر اهنا رجليه صرت امشي عليهن بدون عكازة ورگبتي طابت رجعت مثل گبل..

حسن :- يمه شهل حچي ، ما ترحين لمكان تبقين اهنا..

ام حيدرة:- ليش؟..

حيدرة: البيت فارغ ما يصير ترحين لوحدچ منو يعينچ ابقي اهنا..

ام حيدرة:- وتاليتي شنهو ؟

حيدرة: ما اعرف ابقي فد شهر، لحد ما اصفي مشاغلي

...

ناردين..

طلعت من الحمام لبست بنطرون وبدي طويل ظفرت شعري ولبست جنطة وردية صغيرة صفح.. نزلت گلتله حيدرة كملت..

طيبة:- طالعة حلوة ياعيني شهالجمال وين رح ترحون؟..

حيدرة:- حبيبتي اونسها شوي ما طالعه صارلها هواي تردين ترحين ويانه؟ گومي بدلي يلا

طيبة :- اي صدك حقها لا والله عندي اشياء اريد اسويهن مسويه جدول يومي وامشي عليه ما اگدر اطلع جيبولي فد شيء أتذكر المقولة
لا تنسئ اخااك.. ههههه

ضحك وجاوبها ..ياروح اخوچ بعيني يابه..

گلتله ..رغد نايمه اروح اگعدها لحتى تروح ويانه خطية!..

حيدرة: اي چا روحي جيبيها بلا امر عليچ..

-ماشي..

رحت گعدتها وغسلت وجها لبستها بدله على السريع ومشطت شعرها..

-فدوه اروح اني للحلوات..

ضحكت وطلعت سنونها بأبتسامة عريضة.. بستها من خدها وطلعنه.. اخذها حيدرة شالها على كتفه.. صعدنا السيارة ورحنا.. نفتر بالمول الكاضمية اتعشينه ودخلنه بشارع بي بس العاب.. اشتره الها بيت باربي وخيمة ومطبخ مال لعب

دا نمشي گلتله حيدرة بعدها صغيرة مو مال هيج اللعاب كبار عليها هذني..

ضحك :- چاا بوية منو مساع اشرلي على نگازيه ومكعبات وگال تردين اشتريهن الج؟ ها منو؟

ضحكت بفشله.. يوووو جنت اشاقة غلس على كلامي لعد.. تونسه وتعشينه بمطعم وجبنا عشا الهم ورجعنه للبيت..

بقيت سهرانه لـ3 الفجر، حيدرة نايم بتعب واني العب ويا رغد بيت بيوت ونطبخ بمطبخ باربي، كُل شوي تجي تبوسني بخدي اتگول إليه (أيلاڤيو)، وأني اتخبل علئ جمال حچيها وأرجع ابوسها، حيدرة معلمها كم مصطلح انكليزي هي حافظتهن منه تحچيهن بصوتها الطفولي ..

مرن شهرين .. تعودت على وَجود رغد صرت ما أگدر بدونها ويومي يبدي بعيونها وهي كذلك تعلقت بيه صرت أقوم بكُل شيء يخصها أسبحها على أيدي وتاكل من أيدي ..

بهالفترة دائماً يگلي أريد أصلح علاقتي بأمي بس مَتردد صرت أشجعه واگله أخطي هالخطوة قبل لا تتندم . لا تبقى شايل على أمك مَهما چان السبب قوي .

علي الرغم أشوف أمه كلش حبابة ولا مرة سمعتني كلمة موحلوة فـ أصريت يتصالح وياها وهو يأجلها لأنَ ما عنده الجرأة أول مرة أشوفه هيچ ضَعيف من ناحية إصالح هالعلاقة .

بدأت المدارس والجامعات، داومت مرحلة ثانية بغير جامعة، لأنَ من صارت سالفة عبد الرحمن نقلني حيدرة، صديقات جدد وگروبات جدد وأحلى شيء بهذهِ المرحلة أنو حسن يدرسني .

أني وحسن صرنا أصدقاء نسولف ونتشاقة ونضحك يحچلي كل شيء ويفضفضلي، نگعد سوا نخلي حبشكلات وملازم ويگعد يشرحلي ونگضيها ضحك بضحك.. ويجي حيدرة يخزرنا لو يرزلنا اصواتكم عالية ويحير شنو يسوي عود يغار ويگلي أنا ادرسچ عوفي حساني ..

خالتي حيل تحبني ومعتمدة علية بكل شيء قنعتها تبقى ويانا وحيدرة ما عنده مانع فبقت لخاطري عافت بيتها، أما طيبة فـ بعدها وي سالار گال تخلص سادس ويتزوجون تحبه حيل وتسولفلي دائماً عنه تگول تعلقت بي وما أتخيل روحي بدونه، يجي بين فترة وفترة يبقى 3 أيام يطلعون سوية ويتونسون نوب يرجع لأربيل .

أما نبراس، فهذهِ مصيبة، دائماً يتعاركون هي وحسن واجي اني اهدي بيهم، نبراس تتخبل منه وهو مگضيها ضحك ويگول طبعي أحب اشاقة شقة ثگيل .

يگول حيدرة لو ما طلعنا ولد عم أفضل 24 ساعة يتعاركون مشترين الخبال شراية هل الإثنين الي ما يعقلون أبد مثل توم وَ جيري .

يتبع . . . ❤️

⭐⭐⭐⭐

حبايب صوتوا على البارتات بالضغط على النجمة😘😘

الكاتبة: نمـارق رحيم

حسابي على الأنستا 5naix 💙