ناراحيدرة الفصل الخامس وأربعون 45 - بقلم Namarq

روايـة : نـاراحـيدرة

//// بقلم نمارق رحيم /////

بارت_ 44

⭐⭐⭐⭐⭐⭐⭐⭐⭐⭐

حسيت علئ ايد حيدرة علئ چتفي درت وجهي وأشوفه واگف يباوع لقيس ويخزرني ..

وگفني ورا ظهرة وقبض ايده بصبر گال بحده مُمزوجة بعصبية:- الله بالخير خطوبتيش بوية ؟

قيس :- ناردين خطيبتي

-شنو هالتمسلت شنو خطيبتك من شوكت يابه؟؟

ارتبكت وهذا چذب گباله ما عرفت شسوي گلتله حيدرا كافي خلي ندخل جوا ..

حيدرة: اسكتي انتي جاي احچي وياا هذا

قيس: هذا اله اسم شنو ما محترمني أنتت!

- اي والله ما محترمك

-حيدرة بروح الاعزاز كااافي عوفه لا تسوي مشكلة..

- نـاري ادخلي جوا بسررررعـة

-ما كاتله احد اني..

عـاط بيه بحده:" لخاطرررر محمد رووحيييي مناااا..

-لااااا تصيح

حيدرة: اللهم طولچ يارووووح..

عفتهم وركضت بسرعة لاگتني نبراس..

-الحگيلي خيه

نبراس :- هيه وحدة من الاثنين لو مسوية مصيبة لو مشكلة

-اثنينهن خيه

دفعتها وركضت للمطبخ فتحت الشباك حتى أشوف شدا يصير ياربي..

حيدرة واگف يحچي وياا، تالي لزم قميص قيس وأبتسم بوجهه وخزره همس بأذنه مدري شنو ومباشرةً طلع من البيت ..

عزه شنو گال اله وطلع بدون ما يحچي شيء؟ بشنو هدده؟ وجهة صار ينطي الالوان بسبب كلام حيدرة..

التفت عليه وشافني اباوعله سحگ الجكارة برجلة ورفع حاجبه و اشرلي بأيده بمعنئ "انتظريني جايلچ"..

بلحظتها من شفت عصبيته حسيت روحي مسويه مكسورة همست بگلبي اجاك الموت يا تارك الصلاة دخيلك ياعلي..

دخل للمطبخ، وصاح :- نااااااااردين صخييييييييمه

تخصرت وجاوبتة..هاااا عيني خير شرايد؟

حيدرة:- شنو هذا الي سمعته ست ناردين؟

سويت نفسي ما مهتمة وما مُبالية لشيء طگطگت أصابيعي وجاوبتة.. ما فهمت شنو تقصد ياسيد حيدرة؟

حيدرة: يگولون متقدملچ عريس واسمه قيس؟

-اي صحيح كلامك..

حيدرة: ما شاءالله شهالسرعة هاي وانا اخر من يعلم مو ؟

-ليش انت منو؟..

قبض ايده وجر نفس وگال بحزم.. موافقة !؟

ابتسمت وجاوبته.. اي باركلي ، الي اتقدملي خوش واحد لأنو رجال وما يخون

حيدرة: وصل بسمارچ..

-مو بسمار هذه الحقيقة ابن عمي ، حاليًا انت طليقي مو زوجي وما الك اي حق تدخل بيه ولا تحكمني عسى انخطب واتزوج وأسافر اني حُرة

سمعني وظل ساكت كأنو بكلامي هدمته ابتسم بإنكسار وبقى يباوع بعيوني بعتب..

حيدرة: يواهس تضحك الدنيا على شفافك
يبو إلليل الحلو اليلعب علئ چتافك..

-خسرتني وانتهى يا حيدرة ، رجعت ناردين القديمة ابشرك..

حيدرة: هنيال گلبي چا..

-گدرت بگلبي تلعب عاشت ايدك..

جر نفس طويل وتنهد وگال بتعب..تمونين يناري يا صحوة جمر..

-اني مو نارك ! ، اني ناردين فقط إذا خلصت كلامك تگدر تروح وقتي ضيق اعذرني ما فارغة حتى اتحاور وياك ..

ضحك وجاوبني: "لازم يصير العكس ويضيع تعبي علمتني الدنيا من أرتاح أحط ايدي اعلى گلبي..

-لازم تتذوق مرارة الشعور الي عيشتني اياه بكُل لحظة چنت بيها وحدي مخدوعة بيك..

هز راسه وگال.. وترجعيلي !

صفنت بعيونه شفت لمعة ودمعة بيهن جاوبته واني أتصنع القوة واجر النفس گوه..

- لا ..

أبتسم وهز راسه ورئستاً طلع..

دخلت نبراس سولفتلها چان تضحك

- شبيچ عيني حاچيتلچ سالفة تضحك ؟

نبراس: غير سالفة تضحك ونص حيدرة هيچ يصير بي ويعصب شكله اشتعلت عنده هرمونات الغيرة!!

خليت ايدي علئ راسي واتچيت علئ الحايط: "ما أعرررف حاليًا كلشييي ما أعرررف لا تسألين..

نبراس: شبيچ عزه اشاقة وياچ ليش تبچين نوينه!! اسفة والله مو قصدي

دخل حسن وهو يكف بردانات قميصة ويگول: "يلااا يمعودات امشن اوصلچن اتأخر الوقت ونعست كفيلچن علي..

نبراس :- اي حساني هسه نجي

حسن: واگف بالباب مو تتأخرن خوش

-مـاشي

صحت لنور اجت وكملنه گعدت اني اشد بخيطان حذائي عبر حيدرة باوعلي وخزرني

حيدرة: ليش ايدچ ترجف ؟

- ايد منو؟

حيدرة: أنتي، لأن أنا واگف يمچ صح ؟

- لا تحچي من كيفك ماشي ماكو هيچ شيء

حيدرة: صدگتچ بويه

- مشكلتك عيني

-يا بعد عيني..

-عندك انفصام عاذرتك

خزرني وشمر الجكارة وصاح: "دنچبي لچ..

تفاجئت من ردة فعلة وجاوبتة: وشدعوه عصبت ما حچيت شيء!! ..

سمعنه حسن اجا بسرعة اخذ حيدرة وطلعوا برا..

وتالي رجع فحطان اخذني علئ صفحة..

حسن: ناردين لا جفصين رحمة لمحمد!!

- شنو شبيك شحچيت انيي!!

حسن: لا تحچين هلكلام يم حيـدرة كفيلچ الله يتخبل بالزايـد بالگوه هديته ..

- أي كلام ؟؟

- انفصـام ومريض ومن هذا القبيل

- ليش شكو بيها هالكلمات ؟؟

- يتحسس منهم أخوي

- اوي..

- ها صار معلوم ؟

- ماشي

- عفية ناردين كافي جفصات مو تعيديها بروح العزاز..

- حساني گلت الك خووش يعني خووش..

- كفو من شاربچ

- ميانة زفرة

- شنسوي بعد اخوچ خلاني احچي مثله

- وأني أبتلي بأثنين سالار

- هنيالچ چَا علئ أخو وحمى مثلنا

- أستقر حسانييي

- ههههههههه خليني انفخ بنفسي شبيچ يلا امشي وصيحي لأختچ..

هزيت ايدي بضحكة وجاوبتة: "حبيبة الگلب

طگها بضحكة عالية هز السويچ وطلع.. صعدنه بالسيارة وصلنه وراح البيت فارغ.. سالار طالع عنده خفارة ومشغول..

و نور ضاربه ركن وگعدت تخابر برائد ويسولفون ..طلعنه من الغرفة وعفناها گعدنه بالهول ..

نبراس: نارو عندي خطه

- خطتيش ؟

- شوفي هي خطه وحدة فكرت بيها

- وشنو هي ؟

- وافقي علئ الخطوبة من قيس

- وشنو الغايه ؟

- شغلي هذا المطي الي متربع بعقلچ وَ وافقي وخلي حويدر يحترگ بدمة ..

- شكلي اني الي رح احترگ مو هو..

- اسمعي مني واخذي بكلامي، اكيد سالار رح يگول لحسن ..وحسن يگول لحيدرة..

- خوب انگول لرائد احسن

- اي صح هسه دام نور تخابرة نحچي وياا ونتفق ..

طلعنا وهي ركضت سبقتني، اخذنه الموبايل من نور گوة، وحچينه لرائد..

رائد: والله مدري شگول بس طلعتن عدچن عقل توب..

نبراس: اي شعبالك لعد

رائـد: لعد اذا هيچ، إذا عدنه خطه بالشغل انتن تسونها متفقين ؟

- اي تدلل للحجز و الاستفسار الاتصال علئ هذا الرقم

رائد: اي يابه، المهم رحَ اروح باچر اسوي العلية والباقي علئ الله ان شاءالله يحس شوي ويصحى علئ نفسة

- بس رائد!

رائد: ها نعم ناردين احچي

- أني ما أريدة

كفختني نبراس علئ راسي وگالتله: "معليك بيها..

رائد: ناردين أني أريده يصحى علئ نفسة مو بس لأجل يرجعلچ هواي مستهان بهواي أشياء حتئ للشغل ما جاي يجي ويفكر هوااي

- ربي يريح باله

ضحك بهدوء وگال: " نوب تدعيله فدوا..

باستني نبراس بخدي عفتها وگمت رحت أمشط شعري وأشوف دموعي بالمرايا تنزل علئ خدي، تلمستهن ومسحتهن احاول ما أضعف بس گلبي تعبان حيل ومو گد هالحمل الثگيل..

چانت فاتحة سبيكر أسمع رائد يگول إلية ونبراس ساكتة تباوعلي بقهر علئ حالي..

رائد: ولچ بوية يرجع وهو الممنون ويعض اصابع ايده ندم أني أربي الچ وشحده إذا زعل فاهيتنه والله اگلب الدنيا إذا كسرچ مرة الثانية أكسر ايده وأني بمثابة أخوچ بظهرچ لا عبالچ وحيده..

بقيت ساكتة ما گلت شيء تالي ترخص ورجعت نبراس الموبايل لنور..

اجتي يمي گعدتني بصفها فتحت شعري وصارت تظفرلي وتسولف وياي وأني ساكتة أعرفها تريد تغير من حالتي النفسية وتنسيني همي..

تالي تمددنه بالفراش حتئ أننام، باوعتلي وگالت..

نبراس: اگلچ تؤامي ..

- ها عيني..

نبراس: لا تنامين وأنتي مقهوره بداعتي..

جريت نفس وجاوبتها: " ما مقهوره..

نبراس: وااضح!! ولچ شوفي شلون مخنوگه وما تحچين زين سولفيلي..

- شسولف خليني ساكتة..

نبراس: نوينه فدوا لا تكتمين لخاطري احچي اخاف عليچ لا تنفجرين.. وهذا الهدوء ما قبل العاصفة

- لا تخافين الي كاتبة الله يصير..

عدلت مخدتي وتغطيت بالبطانية غمضت عيوني وأني أحاول اهدئ من نفسي تذكرت إلي صار وكلام حسن رئستًا حچيت..

- نبراسي اسمعيني

نبراس: عيونها وگلبها لنبراسچ احووي محد يدلعني هيچ بس أنتي ولا احد يضيفلي ياء التملك انصهرر يا يابهههه

- شبيچ تخبلتي ؟؟

نبراس: شنسوي خيييه خليني نطرب علئ الخبال يلا احچي اسمعچ..

- باعي من واكفين بالطارمة وحيدرة عصب اجا حسن حچالي شيء وراح

- شنو گال الچ ؟

- "سولفتلها"

ضلت صافنة بوچهي متفاجئة ..

نبراس: مو گلت الچ حيدرة وتصرفاته مو خالية ابد ابصر شنو سالفته!! ..

- ما ادري، بس تدرين أني خفت من كلام حسن!!

- معقولة عنده ماضي ؟

- يُمكن؟ لذلك تصرفاته بسببه؟!

- الله كريمَ بس انتي اخذي الكلام لا تحچين هالكلمات يم حيدرة يجوز صدگ يتحسس

- ما احچيهم اني، بس مرات صدگ ينرفزني ويخليني اتخبل من تصرفاته المتناقضه

- الله يساعدچ ادري بيچ شگد تعبانة بسَ
ما تدرين شنو كاتبلج رب العالمين و انتي
صبرتي هواي وتحملتي كُلشي أكيد رح يجي يوم ويعوضج ربي عن الأيام الي عشتيها

- آمين ونعَم بالله..

‏﴿ فَاسْتَجَابَ لَهُمْ رَبُّهُمْ ﴾‏

...

ثاني يوم..

رائد: الله يساعدك حويدر

حيدرة: هله

- ها شبيك ترد من ورا خشمك

حيدرة: صح

- چنك مشغول ؟

- جاي افكر بشخص

- منو هذا الشاغل بالك هنياله ؟

- قيس الحمار

- هاا دخل بقائمة الحميريون

- أبـد ما ارتاحيتله من البداية وتالي طلع متقدم لناري الكـلب السافل الگ* ..

من أول يوم گلت اله أبتعد ولاا توصل إلها
بس ما سمع!! ما يدري سوالفة كُلها عندي اگدر افضحه بس أريد اشوفة وين يوصل..

- أي عمومًا هسه أنت شجاي تسوي

- جاي أبحث عن معلومات تخصه

سحبت كرسي گعدت عكسه مسحت علئ شواربي وگلتله بنبرة هادئة..

- صدگ مادريت شصار بحبيبه الگلب ؟

- شبيها ناردين ؟

غمزلتة وگلتله: " ها علئ أساس ما تحبها..

ترك القلم من ايده وگال: " كافي مصاخه واحچي شصاير بعددد ؟..

- أمس خابرتني دايحددون موعد الخطوبة ورايحيين العصر يشترون الحلقات

وگـف بعصبية:"صدگ تحچي أنت حلقاتييييش صبرررك ياالله..

- وداعتك شني قابل اچذب عليك

- شنو موافقة شنووو بكيفهااا اگلب الدنيا كلها إذا توافق علئ غيري أقسم بالله يا رائد

- لعد تبقئ مخليه ايدها علئ خدها وتسمع اغنية ابكت الملايين وبصفها باكيت كلينكس اكيد لا من حقها تعيش حياتها وتستقر وتتزوج

- أنا حياتها

- ما يفيدك هالكلام حبيبي

- تسكت لو ارگع الابتوب براسك ؟

- راسي يولي بس الابتوب بملونين شعليه المسكين

- بغلاتي صدگ تحجي ؟؟

- ما اگدر احلف عندي عذر شرعي

- لا تشااااقة رويد مو وقتهاا شووف اسمعني خلي ترفض افضل إلها والكائنات وقيس موته علئ أيدي

- روح انت واتفاهم وياها اني ما دخلني بشيء

- تمام يابه يصير خير رايح الها..

.. شمر الابتوب علئ الحايط رگعه،
طلع و اني اصيح :- عثمان الحگ كسرو لابتوبك

...

ناردين

الصبح گال سالار امشن اطلعچن لان باچر نرجع لأربيل..

نـور : اني ابقه اهنا ما اروح

سـالار : شلون تبقين لوحدچ ؟

- رائـد رح يجي هسه

غمزنالها وصرنه نضحك عالي..
- هااا هاا رح يجي رويد أي أخذو راحتكم البيت چبير .. سالار ضحك وهي صارت مثل الطماطة راحت للغرفة بخجل وضلت تسب بينه

بدلنه اني ونبراس وطلعنه ركبنه السيارة ..

سالار: وين ترحن ؟

- غير انت أبو الطلعه

سالار: عود جاي اخذ رأيچن امده الاخو

نبراس: ههههههه معليك بيها كيفك لأي مكان..

سالار: عود رادت تكحلها..

ودانه لمول الكاظمية .. افترينه شوي اكو شارع بي مطاعم ومحلات خلئ السيارة بالكراج ونزلنه ..

الساعة بـ١٠..

نمشي ونبراس تبزني وتضحك مدري شبيها، وسالار گبالنه يمشي ويهز بسويچه

دخلنه بمطعم طلب صاج دجاج وببسي

گعدنة علئ الكراسي ..

خارج المطعم گعدنة ننتظر ونباوع
علئ الشارع والناس الي تعبر ..

نبراس اخذت موبايل سالار وكصتلنه صورة، تالي بزتني ..

- شبيچ شبيچ دنبوس انتي؟

نزلت الموبايل كصت صورة للأحذية

- الحمدلله والشكر سوالفچ قديمة

ضلت تكص ميه الف صورة ..ساعه تاخد ايد سالار وتكص مثل الكبلات لو تخلي ايدها علئ لحيته وتكص صورة وهو ميت ضحك

تالي سحب منها الموبايـل ..

سـالار : هو مطعم للأكل لو للتصويـر ؟

ضحكنة و سكتنه ..

جاب الأكل اكلت قليل ما متعودة آكل هيج من الصبح الجـو حلو الفجر ماطرة..

سمعت صوت قيس يگول:
- السـلام عـليكم

غصيت بلگمتي صرت اكـح شركت
والببسي يطلع من خشمي!! جريت كلينكس مسحت ملابسي وجهي الله لا ينطي يلعن ابليسه شلون اجا؟ حتى هنا لاحگنه!!

گام سـالار سلم عليه وجر كرسي گال اله.. تفضل اهلاً وسهلاً..

گعد وگال:
- شنو هلصدفـة الحُلوة توني طلعت من هذا المحل صديقي وشفتكم هنا تاكلون

همست نبـراس:
- علينا هلكلاوات ؟

بقى يحچي ويلغي، طگت مرارتي يعني
اني شنو ذنبي اشوفه من الصبح؟

يمدح بنفسه وبشغله اني هيچ وهيچ وهذاك اليوم انطوني نجمتين واترقيت.. وبقى يحچي براسي عود ينفخ نفسه گبالي.. خليت ايدي على خدي واضحك مجاملة

صافنه.. چان اشوف سيارة سودة
صفت يمنه ..

نزل منها حيـدرة

شهگت والتفتت علئ نبراس همستلها.. ولچ شووفي منووو اجاا !!

هاي اشو فرحت:
- ايي عاشو حويدر ما خانني احساسي
رح تصير مضارب وشدو روسكم يلگرعان

ياربي عبالك عزرائيل واجاا صابتني رجفه وخوفه اجاا دخل للمطعم يمشي على السريع احسه بده يركـض ..

لابس سترة جلد اسود وكاف ارداناته ورافع شعرة وايده بجيب بنطرونة الاسود ومناظرة طبية حول عيونة .

يباوعلي ومركز عيونه عليه ويخزرني بعصبية سترك يالله شافه سالار وگام ابتسم واجا حيدرة وكف يمنه وكلنه وكفنه..

حيدرة :- سلااام .

سالار :- هلا بيك اليوم الكل مجتمع

.. ماجاوب باوع لقيس وگاله :- انت شعندك اهنا ؟

قيس :- شنو شعندي، انت شعليك ؟

.. حسيته يريد اقل كلمة بأي حجه لحتئ يضربة

حيدرة :- هذاااا منو الشعليه منووو ؟؟؟

قيس :- شبيك حيدرة يمعود كاعد بالمطعم مو ببيتك

سحبه من ايدة وگاله :- انت طلبت ايد ناردين للخطوبة ومنتظر الرد موو ؟

- اي صح ومابيها شيء رايدها بالحلال وخطبتها

مسح علئ قميصة وابتسم بوجهة :- توكل بويه ماعدنه مرة للزواج .

- شنوو و ناردين ؟

-ناردين مرتي تخصني

- شنو مرتك انت طلگتها

-مالك دخل بابا كنسل الموضوع وشيله من بالك تمام ؟؟

صاح قيس ودفعه ،وسالار يگله :- علئ كيفك حيدرة الرجال ماكال شي شبيك انت

حيدرة :- خلي يتوكل منا افضل يلاا

هز راسه ومدلي ايده اليه لزمها وگال :- فرصة سعيدة

دفع ايده مني ولزمه من ياخة قميصة وحچه بعصبية ،،،

حيدرة :- منوووو انت وتلزززم ايدهااااا ولك

سالار :- حيدرة صدك تحچي عووفة شبيك

حيدرة :- عندك خيارين لو تروح مناا لو تروح مناا اختار بسرعةة

قيس :- لك علئ شنو شايف نفسك انت شنو المطعم بأسمك وما اعرف دووولي بعدني محترمك

گال هيچ وچان يضربة بوكس على وجهة لزمه سالار يهدأ بي وقيس لزم خشمه يصب دم ..

باوع لحيدرة وگاله :- بسيطططة رح تدفع ثمن هذا البوكس غالي

حيدرة :- يلاا بوية يلااااا مناا دروووح وعود انتظر شنو تسوي..

اخذ سويچه من الميز وراح اجاا صاحب المطعم من خلصت العركة يسأل شنو صار سكته سالار ودفع فلوس الاكل واشرلنه نطلع، وناس تباوعلنه بأستغراب..

جرني من ايدي بعصبية وسالار يصيح بي وين ماخذها لك

حيدرة:- بس اخذها جولة بالسيارة..

سالار:- نسيت انت انفصلت عنها على اي اساس تاخذها ؟؟

-ساعة وارجعها لا تخاف ..

-شنو ساعة توكل بويه ما تروح وياك انساها ناردين مو الك ..

اشرلي اصعد اني ونبراس للسيارة اخذنا جنطنا وصعدنا بسرعة.. اشوفهم يتعاركون هذا يكبس والثاني يضغط اخر شي حيدرة طگ ايد بأيد وهز راسه ورجع لسيارته شخطها وراح..

ثاني يوم رجعنه إلى اربيل ، سالار گال لقيس ماكو قسمة وما موافقين ، وهو صار يلح ويخابر ومُصر على الخطبة تالي لبسه سالار وما رد على مكالماته ..

...

حيدرة :- اندگ الباب العصر نزلت من غرفتي سمعت صوت حسن يصيحلي طلعت برة، شفت سيارة الشرطة بالباب وقيس واگف منتظرني

- ياهلاا تعال اتفضل اليوم جاي لبيتي شعجب شرايد

قيس :- انت الاتفضل وياي

- وين يالله اتفضل وياك علئ دليمة لو مندي لحم ؟

اجا الشرطي باوعلي وگال، :- انت معتدي علئ الضابط قيس بمكان عام

- چؤؤ سودة عليه اغتصبتك بوية ؟

قيس :- اعتقلوو

حسن :- انت هييي اخذ جماعتك ويلاا مناا ترااا صابرين عليك وما فاضحينك

- سمعت كلام اخوي؟ انگلع مناا يلااا واريني عرض چتافك هاي اذا عندك

صفت سيارة عثمان ونزل وهو يگول :-هاا يا جماعة عركة واني ما ادري موعيب علئ شواربك حويدر

-ها حبيبي ما صاير شيء بس جهال يريدون يلعبون گدام بيتي بدون تربية

ضحك عثمان واجاا يمي سولفتله على الصار وگف يمهم وطلع بطاقته گبالهم وگال :- تكسحو منا ومن المنطقة بسرعة ..

ركبو سياراتهم بعد ماعرفو عثمان منو..

وهو بقى واگف بمكانه يخزر بنظرات حاقدة عليه ابتسمت وگلتله ..

- رايد اشيلگ واصعدگ بسيارتك؟ تكسح يلاا مناا بوية

ركب سيارته بدون حچي وراح ..

ضحكنه وهزيت ايدي تعال حبيبي دام اجيت ادخل ارتاح ونتعشى صار الليل ..

....

ناردين :- چنت گاعدة اباوع علئ فيديو علئ اليوتيوب، اشياء تغير حياتك وفيديوهات طبخ ومكياج ..

راسلتني نور علئ الواتساب ..

گالت :- ولچ صارلي ساعة احچي وياچ ليش ما تردين

دزيت :- يمته راسلتيني وشوكت هاي؟

-على الفيس

-ياا الفيس خافيته صارلي هواي ما فاتحته..

-شنو ما فاتحته ناردين مكتوب نشط الآن يعني متصل هسه فاتحته

-ياعززه ولچ والله ما داخلة عليه !

-صخااام بس لا مهكرين حسابچ !!

-عزه شلون يتهكر شمعرفني اني رايحة اشوف

-مااشي وردي بسرعة

طلعت من المحادثة خليت على الفيس ما يفتح !..صرت ابچي بس لا صدك ومهكرين حسابي وصفحتي نوب المن اگول سالار وطالع

خابرت نور گالت :- ولچ دگي على حيدرة لكيد يعرف ان شاءالله يحلها بسرعة لا تفكرين هواي ولچ كلشي يخصنا بهالحساب..

-ااااي تمااام..

غلقته منها وبسرعة خابرته ماكو مغلق دزتلي رقمه الجديد اخذته من موبايل رويد..خابرته دقايق و رد .. وسولفتله

حيدرة:- على شنو خايفة بويه حتى لو مهكرينه على الاقل بس محادثات بي ماكو شيء

-حيدرا المحادثات بيها صوري وفيديوهات لأخواتي

-هلاو هلاوو شكد چنت اكلچ صفحة على الفيس او على غير برنامچ خليها بس للتصفح ومراسلات لاا دزين صورچ اخذي الحذر اخخخ منج

-اووي شعرفني هسه شسوي سيدي؟؟

-خليها عليه والچ الصافي ،، انتظري لا تخافين ولا تبچين اعرف الهكر منو اسلم حسابچ لفريقي ويرجع الچ بـ5 دقايق

-اوكي انتظر لعد..

سده بوجهي مرت نص ساعة واكثر ما اتصل تالي اني دگيت عليه..

جاوبني :- اخ يابه چنت نايم بسابع نومه احلم بعيونچ الي كل يوم لون .. وفززتيني عبالي صاير هجوم لبيتي خرب يومچ

-اووي يحلم بعيوني.. چا غير انت ما گلتلي شصار ولا خابرت

- چا غير رجعت حسابچ ونمت لان تعبان .

-يعني هسه اگدر ادخل عليه ؟؟

-لا حذفته افضل انا اسويلچ حساب جديد واستخدمي وكلمة السر تبقى عندي

-ليش عيني غيرت حسابي

-بويه افضل افضل..

-منو الي هكر حسابي شو ما گلتلي؟؟

- افتحي كاميرة و اكلچ .

-لييش

-مشتاق لوجهچ.. مو تردين تعرفين افتحي واگلچ

-ما افتح..

-بكيفچ.. ترى تنصدمين منه

ظليت الوب وفضول قوي اعرف منو وهو مُصر تالي اتصلت فيديو شفته نايم ومتغطي والقلم وره اذنه، والغرفة ظلمة وبحضنه لابتوب مشغل اضاءة خفيفة

-هاا يلا احچي شنو صار

-انا موجود لا تخافين

-تدري عيوني راحت من البچي كل فكري رح ينشرون صوري..

- امرع دينه شنو ماكو زلمة بضهرچ ادوس ببطنه الي ينشر بصور بنتي

-بنتك؟؟ تؤؤ ما گلتلي منو الهكر حسابي؟؟

تنهد وگال :- رقية

-والله حسيت وشكيت بيها الله لا يوفقها ليش هيچ سوت شمسويتلها اني شهالحقد..

-خابرت على عثمان يروح يسجنها لان مو بس هكرت حسابچ لا اكو اسباب ثانية كبيرة ..

-الله ينتقم منها حسبي الله والنعم الوكيل بيها..

- معليچ بيها تولي

سكتت تالي طگها بضحكة وگال.. شوفي غرفتنه الجميلة صايرة ظلمة بدونچ يمتى تجين وتنوربها

-منوره بيك ما يحتاج..

ضل يضحك عالي وآني اباوعله صفح ينرفزني بكلامة

- ما تحبلين

-شنوووو ؟؟

ضحك عالي :- اقصد ما تحنين

-على شنووو

-عليه وعلى گلبي التعبان..

-ليش انت منو

- ما تگولين هذا الزلمة اعزب باقي لوحدة لا مرة تواسي ولا حبيبة

- اي گول ناقصة حياتك بدوني

- حياتي دائما ناقصة و سرسرية وگوا**دة

-رح اغلقه..

صاح.. لحظة لحظة

-شكو؟؟

-رح يصير بيه انفصام تدرين..

-اي هاي اعراضها

- تخليني اشتاقلچ و ما اريدچ

سكت ..

-روحي بوية روحي انهي الاتصال لا نتكاثر علئ الخط

-باع اللسان !

-لاتگولين باع وعلي كلمة تنرفزني

-ليش بلا ؟

- فوبيا بسببها

-اووي عيني فوبيا وكذا

- والله من چنت صغير ولد المنطقة ياهو ايگولها اگله تعال يجي يمي بالنعال علئ حلگه تالي يتوب وبعد ما يحچيها

- عزه بعينك

-اي صح عندي هواي حچي وياچ بس افرغ هاليومين ونحچي مخليچ على راحتچ بعدين اشوفها شلون تصفى..

حاولت انهي الكلام وما اجاوبه ولا اسألة لانو رح اطول المكالمة فگلتله.. اوكي باي..

نمت من گد التفكير بي تحلمت بي .. ثاني يوم دخل سالار عصبي و عيونه حمر جمر دخل يركض وبيده المسدس ! دخل لغرفتنه اخترعنه كلنه انخفق گلبنه جسمي صار يرجف واني ما مسويه شيء..

اجه ولزمني من ايدي گال بصوت متقاطع:- انتي چنتي تدرين أبو حيدرة هو القتل ابوي ؟

احچچچجچچي ...ولچچچج

-شنووو شدا تحچيي وخرر ايدك جاي توجعني سالارر..

دخل مصطفى دفع سالار مني ولزمه على صفحة هدأ وفرك راسه وگال.. احد بيكم يدري منو قتل ابوي ؟؟

مصطفى :- لاا هو حادث وبعد محد فتح الموضوع

- ناردين تدري اكييد، احچي ولچچچ
-لااااا !
-تدرين ابو حيدرة قاتل ابوي وساكتة ؟؟؟
-لاا ما ادرري ما ادرري
-چذاااابة حيدرة گالچ
-بالنبي ما گالي والله
- هسه تقنعيني انو انتي ما تدرين وصارلچ سنتين ونص مغلسه موووو

-كاافي عااااد مصختهااا

- رح تخلينيي اربيچ من جديييد نااارديين صاايرة لاا تحترمين ولسانچ طولان شوفي ست ناردين واسمعي نبراس انتي وياها ، إذا سمعت مسويات شيء من دون علمي لو شفت ضامات عليه شيء وموضوع كبير ما تلومن غير نفسچن

اصير صدك سالار ثاني ، وجهة الي يضحك ويسولف وياچن بعد ماكو لان حيل تعبت منچن كل وحدة تسوي مصايب وما تخليني بعين الاعتبار

بس اصبرن طالع هسه وباچر رايح لبغداد گبل لحيدرة إذا صدك هو ابو القتل ابوي وحدة منچن تدري رح اتصرف وياها تصرف ماحلمانه بي بعمرها..

عافنة وطلع گعدت ابچي وايديه علي وجهي..

مصطفئ :- تره مهما يكون يبقئ اخوچ الچبير ما يصير تعلين صوتچ عليه شفتي عصبي جاي غير تسكتين يهدأ وتحچين وياا وتتفاهمون موو تشحني زايد

خزرني وطلع ما راضي گعدت نبراس يمي ساكته تالي گالتلي.. چنتي تدرين لو لا

-لا ما ادري بس چنت شاكة وهو هم جان شاك!

- وااضح .

طلعت من الغرفة واني تمددت ميتة بچي مليييت وتعبتتت ،،،، كل يوم مشكلة لو مصيبة جديدة وذبوها براسي

سالفة حادث موت ابوية الي رح يصير 3 سنوات انفتح من جديد ،،،،،

اكيد رح تصير مشاكل بسبب هلقضية

اخذت موبايلي بسرعة طلعت رقم حيدرة دگيت عليه يرن يرن يرن ،، دقائق وجاوب

-هلاا

جريت نفس وگلتله.. هو سؤال واحد

-شنو ناري صايرلچ شيء ؟؟

-اسألك سؤال وجاوبني بدون لف ودوران!

-تمام احچي اسمعچ..

- صح ابوك هو كاتل ابوي ؟

سكت ...

-ليش ساكت احچي اي لو لا
-منو الگالچ
-يعني صح؟؟
-اي
-هو الدعمه؟؟

جر نفس وزفره وجاوبني.. اي

- لييييش ما گلتليي انت آخر مرة گلتلي مو هو واعرف الي دعمه !!

-عبالي من حققت وياچ بالمركز گلتلچ ما ادري ماگايل وسبحان الي ينسى

-حالياً والدك وين؟؟

-بالسجن

-الله ينتقم منه دنيا واخرة ما رح اسامحه إلى يوم الدين..

غلقته كعدت لازمه راسي بوجع ،،،،

بلحضتها ضاقت الدنيا بعيوني ،،،
حسيت كلشي رجع لنقطة الصفر ،،،،،،

رجع بالليل سالار ما حچه شيء ،لا وياي ولا وي نبراس تعشه وراح نام ثاني يوم اجه اخذ ملفات واوراق وطلع..

ما اعرف شنو يسوي وشنو يخطط تالي اخذ ملابسه وصاح لمصطفى گاله:- اني رايح لغير محافظة عندي تدريب كم يوم وارجع انت مو صغير عمرك 20 سنه ابقى هنا دير بالك عليهن وعلئ نفسك لحدما ارجع واذا صار شي اتصلوا عليه

اخذ الجنطة وطلع،، بقينه بالشقة 5 ايام وتالي رجع ،،،

اول ما اجاا گال :- شنو سالفة هاي ما ادري عنها شنو انتن بنات عم حيدرة ؟

صفنت بوجهه :- ليش اني ما گلتلك ما سولفتلك نبراس ؟

سالار :- لا سمعت من حسن بالصدفة هو هم عباله ادري !!

-صدك والله ؟؟

- ضاحك بوجهچ احچچي

- سولفتله كلشي گاله الي حيدرة و خالتي الله يرحمها .

ضل متعجب، :- ليش ما گلتلي من يمته هلحچي

- من شهور

- ليشش ما گلتيلي شنوو طرطور اني يمچن ؟؟؟

- لا حشاك بس نسيت و اني عبالي حيدرة گالك

- لا ما گالي ،، حلوو حلوو ومن اسئلچن شنو ضامات عليه اتجاوبن ماكو شيءء

-وروح ابوي عبالي تدري!

گعدنا نسولفله كلشي نعرفه.. حچينه الي حچته ام حيدرة النه.. وهو يستمع بتفاجئ.. تالي مسح وجهة وگال رايح اخابر حيدرة وباچر الصبح الي حچي وياچن..

-اي ماششي..

طلع من الغرفة ثاني يوم الصبح صاح النه..

سالار :- دام انتن طلعتن بنات عمه لح، فاا لازم ترجعن لبغداد

-شنو لييش !

-تدرن بيه اني مو اخوچن ولا مصطفئ ونور ما عايشة ويانه ، فاا گعدتچن هناا ما تصير ما تجوز ترجعن لبغداد ﺎحسـن..

-صدك تحچي سالار!

-دام حيدرة ابن عمچن هو اولى مني

ارجعن لبغداد وآني اروح افهم منه وادور على عائلتچن حتى لو ابوچن وامچن ماتوو اكيد عدچن خوال عمام..

-اي عمام حيدرة عمامنه
-تعرفيهم انتي؟
-اي هشام وجابر اخوان ابوي جبر
-زين لعد

هسه بدلن على السريع ،،،

-ماشي

لبسنه بسرعة، وطلعنه ومصطفى بقى بالشقة طول الطريق يسأل ونبراس تجاوبه هو هم مصدوم من عرف القصة وامنا شلون انقتلت ظل يستغفر ..

يصفن ويگول :- والله وكت
طلع حسن القريب وسالار الغريب ..!

وصلنه لبغداد ركن السيارة گدام باب بيته دخلنه حسن فتحلنه الباب انتظرنه حيدرة يجي ورا ساعة يلا دخل للبيت

فات للديوانية وانصدم بجيتنه.. گعد وسالار سولفله مرت ساعات يحچون ..وتعلى اصواتهم كل واحد كلامه شكل ورأيه يختلف

حيدرة :- ما تگدر تخلي ناردين ونبراس هنا ببغداد

-ليش يابه؟؟

-شنو ليش قبل 20 سنة خوالي وعمامي تحالفوا على مرت عمي خديچه وگتلوها لو دروا ببناتها برأيك يسكتون ؟

سالار:- ياگلون تبن مايگدرون يفتحون حلوگهم بكلمة وهمه كاتلين وحده بحجه غسل عار وشرف من الله يغسل اعقولهم ان شاءالله

ناردين ونبراس من اخليهم هنا شحدة الي يدوسلهم على طرف انعل سلفه سلفاه حتى لو من اقاربكم !

- عوفك من الدوخة معليك بيهم تدري بيه مقاطعهم صارلي اسنين ما احچي وياهم من ورا هالسالفه..

حسن :- هسه الحل شنو..

سالار :- يبقن اهنا

حيدرة :- اگول اكل تبن شنو يبقن اهنا

-ادري ياعمي لعد يبقن وياي بالشقه مايصير على الاقل انت وحسن ولد عمها ومحد يحچي إذا يبقن ببيتك !

-شلون تبقى ناردين وانت تعرفها طليقتي

-انت طلگت وانتهى الموضوع هسه هي بأعتبار بنت عمك فقط لا اكثر

حيدرة:- تمام يبقن اهنا بس بحجه ثانية بعدين اگلك عليها .

.. طيبةةة طيبةة

اجت وهي تگول :- هاا خوية هاا

-دخليهن لغرفتچ وسدي الباب انريد نحچي

-تمام..

صاحت النا گمنا ورحنا وراها..

.....

حيدرة :- احچي شنو ردتني بموضوع

سالاز :- سالفة ابوي ما اسكت عنها

- يابه كتلك مو انا الكتلته، ابوي الكتله وهسه هو بالسجن

شسوي مثلااا ؟

- اريد افهم ليش ما گلتلي

- حسن گالي ما اگول ، لحتئ لا تخرب علاقتكم

- خر* بيك حساني

حسن :- گاعد بأمان الله وتوكلني تبن وخر* شعليه انه

- كل البله منك

حيدرة :- سالار خلص انسئ الموضوع

- شلوون انسئ فهمنيي شلوون ،، ابوك حرمنه من ابوي برمشه عين بدم باارد

- بس هسه هو بالسجن وتعاقب علئ افعاله

- اي عقاب يرجعه النه؟

ماتدري شلون انكسر ظهري من مات صارلي 3 سنوات ما مرتاح بحياتي وهو ما موجود بيها .

- ما نگدر نسوي شيء ..تعرف هو گتله لانتقام وثأر وهلشي من سنين

- رايح للسجن ما اسكت .

...

صار الليل ونمنه بغرفة طيبة والكل راح لغزفته ،،

بقيت صافنه تذكرت رغد وضحكتها وشلون جنه نلعب سوا بچيت اووووف يااررب اشتاقيتلها واشتاقيت لخالتي .. ترحمتلهن وگلبي مقهور

اباوع لنبراس تبچي تگول انذلينا لو رايحين للشقة لو رايحين لبيت حيدرة وكل واحد يشمرنا على غيره لو ابونا عايش ما رح يسمح الهم .. لج جان مخلينا بنص عيونا ومدللنا اخ يا بابا انكسرنا كسرة كبيرة من بعدك ..

بجيت وياها بقهر واني اتذكر ابوي كل شرط حياتي انعاد حضنتني وصارت شهگتنه وحدة.. نمنا بألم الله رحيم الله يعلم شلون رح تصفى حياتنا وشنو المضموم النا..

...

حيدرة :- صافن علئ السگف واغرس القلم على جبيني دخل حسن لغرفتي ..

-اجيت والله جابك

حسن :- اجيت بأمان الله اخذ شاحنتك لان شاحنتي عطلت بنص الليل ..وانت محضرلي سيرايز ومصيبة جديدة

-دتعال سد الباب واگعد رايدك بموضوع مهم..

عاف البيده وگعد يمي.. خير يا ستار احچي وآنه اخوك

-سالفة ناردين ونبراس موقته لازم نلگه حل ماگدر اخليهن هنا بحجه بنات عمي لازم اكو سبب قوي لگعدتهن..

-ما فهمت هسه انت شنو تريد مني..

-بعد كم شهر يصير الشغل الصح ورح اسافر ومقرر اخذ ناردين وياي..

-شلون تاخذها هيه طليقتك ترى..

-سالفه علاقتنا انا وياها مرتبلها مفاجئة ومحضرلها شيء ان شاءالله يجي الوقت المناسب وتعرفه

-اي ؟؟

-بقيت انت وسالار وطيبة ونبراس

-شنسوي نلطم ؟

-بلا سالار لطيبة ندري بهذا الشيء

- شنوو لطيبة.. نسيت هو طلگها

- لا سالار ما طلگ طيبة .

-شنوووو شدا تحچي !

-بعدين اسولفلك المهم بقيت انت ونبراس اريد امنها عندك ما اريد وحدة تبقى لوحدها اريد اسافر مطمئن

حسن :- شسوي مثلااا ؟

- اعقد عليها .......يتبع

⭐⭐⭐⭐⭐⭐⭐⭐⭐

بدء العد التنازلي .....💔

بنات اهم شيء تصوتون ⁦♥️⁩.

بارت طويل 4200 كلمةا اتفاعلوو 🌚💔..