ناراحيدرة الفصل الثاني والعشرون 22 - بقلم Namarq

وخاطري الكُلش عَزيز بكلمة منك ينجبر

..

لبسني الذهب أحساس كُلش حلو تمنيته ما يزول وأبتسامتي ما غابت ولا لحظة من وچهي .. دقايق قليلة وعمتي گالت اله بوسها صارت حلالك داده ..

مسح لحيته بحركة سريعة ولزم ايدي عصرها وباوعلي بنظرات خاطفة وتقرب مني طبع بوسة على خدي بهدوء وأبتعد ..

راد گلبي يخرج من مكانة بسبب بوسته كل جسمي رجف وضليت مدنگه ما رفعت راسي من الخجل الي اتملكني ..

خلونه لوحدنه بغرفة وطلعوا أرتبكت وبقيت ساكتة خجلانة من قربة ومن فستاني القصير الفاضح جسمي كل شوي اعدله من ناحية الصدر وأرفعة وچهي أحمر من الخجل..

گعد يمي كلش ولزم ايديه أثنيهم باوعلي بأبتسامة وهمس بأذني بنبره بيها بحه وحنيه..

حيدرة :- صرتي حلالي

باوعتله بأبتسامة خجولة وضليت ساكتة ما جاوبتة أبتعد ورفع راسي من حنچي وگال بهدوء..

-ناردين..

جاوبته برجفه وبكلمات متقاطعة:- ها ياعيونها..

حيدرة:- سالمات بويه

-يسلمك الباري إليه..

-مممم شو باوعيلي

ضليت مدنگه اطگطگ بأصابيعي تالي رفع راسي وباسني بخدي ..

-ها لا تموعين جوه ايدي ادري بيچ ترفه..

ضليت أجر النفس گوه أحس الغرفة مابيها هوى مدري الخجل عماني وگطع النفس مني

گلتله بتوتر:- أي احچي شنو ردت مني..

أبتسم وجاوبني:- جري نفس بالأول وصلي على نبيچ..

-اللهم صل علي محمد وال محمد

-هههههه أفدي الخجلان أنا من شوكت ناردين تخجل ما أدري بهالصفة وعلي..

-ليش شگالولك مو أنثى وأخجل..

-عمي منو يگدر على لسانچ..

-ليش لايكون ما عاجبك..

-لا يابه عاجبني شلون چا..

سكتنه أثنينه دقايق وهو صافن علية وأيده صارت تتجول على شعري وتتلمسه صار صوت نبضات گلبي تنسمع بحركاته..

تالي تحمحم وگال:- قبل كل شي أريد احچيلچ اإي عندي اعرفي من هسة..

-تمام اسمعك..

-شوفي ناردين يابة الله بالخير من اليوم صرتي تخصيني مسؤوليتي أنا وبس كل شي يخصچ لازم يكون الي علم بي

من اليوم صرتي خطيبتي على شرع الله ورسوله وگدام الناس الكريمة الكل عرف عقدت عليچ أقاربي وأصدقائي

ما اگلچ رح اتحكم بيچ لو اتٲمر عليچ وأفرض قرارات جديدة وأتشرط لا بوية بس كل طلعة وطبه لازم عندي علم بيها واصغر تفاصيل عنچ اعرفها لأجل حمايتچ وما تتعرضين بخطر وأي شي تتعرضين اله حتى لو تحسينه تافه وما يسوى ينگال تعاليلي وگولي اليه متفقين لهنا ؟

-تمام مو مشكلة اصلاً افرح من تبدي تسألني وين رحت وين اجيت أني أحب الأهتمام ..

تنهد وجر نفس طويل :- المهم يابه عندچ شي تگولينه ؟ احچي لا تستحين لا تخلين خجل بعلاقتنه ..

-لا ما عندي والله..

-مممم تمام چَا متفقين يلا بويه طالع أنا..

-بس مو ما بقيت هواي ؟

-بعدين اجي تشبعين مني وتملين وداعة عيونچ الحلوة..

-ههههههه تمام

-يلا سلميلي علئ الجماعة وبالچ علئ نفسچ ماشي ؟ مع السلامة ..

-تمام صار ربي يسلمك الله وياك ..

حيدرة: گمت وطلعت من الديوان سلمت علئ الولد وطلعت بره البيت ..

ركبت سيارتي واخذت راحتي بالصفنات والتنهدات . .

أول مره احس نفسي ضعيف گدامها أو بالأحرى اليوم حسيت بهالشي من المسافة القريبة بيني وبينها والجمال الگاعد يمي گوه لزمت نفسي عنها وما اتقربت..

جريت نفس طوويل.. اااخ يا ناردين يانار الما تطفه من صدري..

شلون راح تگدر تميز الصح من الخطٲ وأنا سيد الخطٲ بحياتها..

أنتبهت على موبايلي يدگ الأتصال صامت فركت راسي وضغطت رد مباشرةً..

-هلا عثمان

- هلاا ، ال ٲسسد خابرتك لحتئ اگلك الي ردته تم وصار .

-كفوو والله عاشت ايدك تمام حبيبي نلتقي بمكان تواجدهم..

-صار أي أوامر ثانية ؟..

-حالياً لا من تبدي خطه جيم ادزلك أمر ابقى متواجد على أي ساعة اخابرك ..

-حاضر ان شاءالله

-زين عثمان يلا دير بالك وفتح عيونك عشرة عشرة ما اوصيك بعد ؟؟

-أكييد لا توصي حريص يلا في أمان الله..

-اعرفك ذيب وما ينخاف عليك الله وياك..

غلقت الاتصال واندگ الباب شمرت الموبايل ورفعت الجامة..

حسن:- ها خياي وينك شجاي تسوي؟؟..

-چنت أخابر ليش صاير شي؟؟..

حسن:- لا بس لا تتأخر عيب من سالار وعمامه واكفين منتظرينك وظل بالهم عبالهم رحت..

- اهاا اسمعني حساني ما اگدر اظل اكثر رح احچي وي سالار واگله اريد اروح اعذرني عندي شغل مهم لأن فعلاً عندي طلعه ما يصير اتأخر عليها وعلي الموعد الثابت أنت ابقى وي طيبة اجي عليكم بليل تمام ؟ ..

حسن :- أهاا هيچ السالفة ماشي توكل الله وياك..

سلمت على سالار وبلغته گال اخذ راحتك رجعت ركبت سيارتي انطلقت متوجه لبيتي دخلت وصعدت لغرفتي ..

فتحت الخزنة علئ بصمة ايدي ..طلعت الملفات البنفسجية لازم اسلمهن لرائد ..

غيرت دشداشتي الئ بنطرون وسترة
...فتحت المجر طلعت المسدس خليته علئ خصري ..

طلعت امشي علئ سريع ركبت سيارتي وسقتها بسرعة منطلق لمكان تواجدهم ...الحثاله

...

ناردين

بعد ما عافني وراح طلع خلاني بدوامة اشبه بمتاهة وتفكير عميق بين گلبي وعقلي تهت..

دخلن نرجس ونبراس وعماتي البقية .. عفتهن وگمت صعدت بقيت گاعدة بالغرفة وحدي لحدما مسحت المكياج وبدلت ملابسي

تمددت وأني صافنة علئ ايدي المتزينه بالحلقة واسمه المنقوش عليها بلمعان "حيدرة"..أبتسمت وأني أتأملها ..

خواتي اجن للغرفه بدلن ويسألني شبيه وشنو صار بيناتكم وشنو حچيتوا واجاوبهن ببرود:- ماصار شي والله كلام عادي بين أي أثنين مخطوبين جدد ..

عماتي بعد ماتعشن راحن والكل راح ماباتو .. وطيبة بقت گاعده تنتظر حيدرة وتسولف وي نور.. وبالنسبة لنرجس بقت عدنه لأن زوجها ما اجه عليها وباتت عدنه

بقينه ننظف بالصالة ونشيل بالبطالة المي الفارغة والكلينكس والچكليت المشمر ونغسل بالمواعين العشه طاح حظنه بين قوسين..

دخلت للمطبخ بعد ماكملنه تنظيف وكلشي گعدت اتعشه وياهن..

دخل سالار وهو يصيح :- گالو اليوم الگمر انخطب للشمس القاسي هههههههههههههه

ما رديت گلت الحمدلله وگمت من السفرة ..

سالار :- ليش گمتي ما اكلتي شي وانتي تعبانة اليوم كله احچي وياچ شبيچ مصفنه احسچ ضايجة ؟؟

- ها مابيه شي لا يظل بالك

-چذابه اعرفچ من عيونچ عليه هالسوالف؟ احچي شبيچ شنو مضوجچ حيدرة ؟ سمعتي كلمة موحلوة من الموجودين؟.. احچي وأنا اخوچ..

-لا والله بالعكس كلهم فرحانين على فرحتي بس سالار ..

-ياعيون سالار وروح اخوچ گوليلي..

-مشتاقه لأبويه

حچيت بخنگه ودموعي نزلن على وچهي تنهد وجر نفس بصعوبة..

سالار :- الله يعلم بيه شگد متعذب بموته مشتاقله بگد السمه ابوي لحظة وحده مانسانه شلون ننساه مستحيل اصلاً خليها علئ الله الوجع والقهر البگلبي ماينسولف ياناردين..

بچيت وفتح ايديه گالي تعالي لحضني جرني من الكرسي ولمني لحضنه ..

-شششش لا تبچين ولچ اني ابوچ واخوچ وصديقچ وكلشي ترديني اصيرلچ انتي موكلتي مشتاقه لابوي ؟ هاچ هياتني اگبالچ ابقي حاضنتني لحدما ترتاحين

أبتسمت ومسحت دموعي بعدت عنه تالي صار يضحكني يحاول يطلعني من الجو الي اني بي

- ام اعطوب اليوم طالعه تخبلين والله فرحتلچ اكثر من حويدر هههههههههههه الله يقدرني واسويلچ زفه من هاي التمام زفه بغداديه علئ اصلها ازفچ بيدي لحيدرتچ هههههههههههه

- عابت هسه ليش تضحك صدگ طالعة حلوة؟

-ويا جمال بعد جمال ناردينتي ينذكر؟ طالعة تشگين وعلي..

-لا تخليني أنغر ههههه..

-يلوگ الغرور لهل سمار بوياي..

- فدوا اروحلك ياروحي صدگ سالار هو حيدرة وين راح؟..

-عنده شغل وهسه يرجع ياخذ اخته وحسن..

-ااهاا ماشي لعد..

-يلاا رايح اولي فوگ وانتي ابقي اخذيلچ صفنات ريلاكسيه على گولتچ وجري حسرات صفني وبصفنتچ اتذكري وجهة الحبيب الغالي ورح تضحكين وكل الهم يروح صدگيني جربي وشوفي..

-ننننن هذا بسمار هههههه ولي روووح..

طلع من المطبخ وطيبة كاعدة علئ الدرج هيه ونور دايسولفن صارت بوجهه ،دنگ راسه وصار علئ صفحه ،كاكت وراح صعد علئ السريع مرتبك وهيه خدودها صارن حمر

بقيت اضحك عليهم ،،وعلئ شكل طيبة صارت طماطه

اندك الباب عرفته اجه من دگته للباب مميزة..

وحسن ومصطفئ كاعدين بالديوانية يلعبون بليستيشن واصواتهم عاليه يضحكون وحسن ينصب علئ مصيطف وهذا يصيح ،،والباب ماسمعو

طلعت للطرمه باوعت من الزروف حيدرة واگف منتظر عدلت شعري وفتحتله الباب..

دخل وهو يگول :- السلام عليكم يابه..

-هلو بيك تفضل..

باوعلي وسحبني من ايدي وگال:- شكوو شبيچ

-شنو شبيه مابيه..

-لابيچ شيء والله شنو باچيه ؟

-لا متوهم

-چا عيونچ شبيهن حمر ؟

-هيچ من الله

-ها هيج صارت والنعم بالله زييين امشي ادخلي

-لا تنتر..

-وعلي تعبان وطاح حظي اليوم لود وشغل هالكثر لا تزوديها عليه..

-هو حظك طايح من زمان

-لا الله وكيلچ من عرفتچ

-تلونت حياتك غير

- بالاسود

- سيد الالوان

-بالطيحان الحظ

باوعتله ببرود وسكتت..

حيدرة:- يمعود حسن يلااا تعااال لك مستعجل

-ليش مستعجل؟ ها وين رايح؟..

-ليش مهتمة

تعصبت وگلت:- ترا خطيبتك

ابتسم وغمزلي..

-منو المزعل الحلوة ومضوجها ؟..

-ماكو..

-لا انا متأكد اكو شي سمعتي كلام موحلو؟

-لا

-چَا؟..

-اشتاقيت لأبوي اليوم حسيت بوحشه وتمنيته وياي ويشاركني احلى لحظات عمري بچيت ولذلك صارت عيوني مورمه وحمرة..

تنهد وگال:- الله يرحمه ويصبر گلبچ اهديله سورة على روحه وأستغفريله هو وياچ بكل مكان ما يفارگ عزيزة روحه وبنته

جريت نفس گوه وجاوبته وأني أهز راسي.. ان شاءالله امين

صاح ...لك حسساني ديلاا وين صرت يمعوود ويننك خوما نمت اجيبلك مخاد لراسك لمربع

حسن :- براس الشارع اجييت عليش يااابه تصيح

-امشي ولك عندي شغل والله اركب يلا طيبة وينها ؟

اجه سالار كاله حيدرا صيح لاختي بلا امر عليك

راح يصيحلها ..وحسن طلع من البيت

بقينه واكفين وهو ايده على خده گالي لا تضوجين وتنقهرين القهر ما يرهم لجمال عيونچ..

هزيت راسي وطلعت مني ابتسامة گالي ديري بالج على نفسج وطلعوا بعدما اجت طيبة ركبوا بالسيارة وراحوا..

...

مرت خمس ايام واني گاعدة بالبيت ونرجس بقت عدنه لان تريد تروح ويانه للنجف نزور ابوي وسالار باقي بالبيت يمنه

اندگ الباب الظهر جان تدخل امي وخوالي الثنين ..

گالوا لسالار هيه تريد ترجع لبناتها وبعد ما تجبرهم علئ شي وسدو السالفة

سالار ماقبل وطردها بس خالي حلفه بداعة ابوي خل تبقى وبدون مشاكل ودوخه راس ..

وهيه دخلت وگعدت نزعت عبايتها وراحت لغرفتها ولا عبالك مسويه شي وطبيعي الوضع عدها..

ثاني يوم رحنه كلنه اني وخواتي وعماتي للنجف وراحت امي ويانه..

رحنه للمقبرة ولو بعد شهر ونص علئ سنوية ابوي بس احنه اتفقنه انروح انزور قبرة براس السنه ونبدي سنه جديدة وياا وهم خواتي طاگ گلبهن عليه وما صبرن للسنوية ..

رشيت مي ورد علئ قبرة وخليت بخور وسورة البصرة مشتغله صوت القارى حلو وهادئ..

سالار زارع يم القبر ورد وحشيش اخضر ومكان نضيف والهوى دافي ..

شمرت روحي على قبرة وحضنته بأثنين ايديه خليت راسي علئ القبر واحس مخليته على صدرة ودا يسمعني

صرت اشكيله وبنفس الوقت اسولفله على خطوبتي واني اگول بهمس- بابا حبيبي انخطبت بنتك انخطبت لشخص التحبه واتمنته بابا ردتك وياي بهيج يوم مهم انت چنت تتمنى هلشي وفرحت من دريت احبه وفرحت من قريت الفاتحه بابا لوما متت بهذاك اليوم چان هسه انت يمنه ليش عفتنه ورحتت باباا والله الدنيا بدونك ماتسوى وبدون صوتك وعيونك وحنانك بابا مشتاقتلك هواي هواااي

بچيت واجن خواتي يبجن يم راسي وعماتي ينعن بصوت واطئ..

قريت سورة يس وبست قبرة وشغلت بخور ..

التفتت الكل اهنا موجود بس امي قرتله الفاتحة بسرعة وبچت شوي ورجعت گعدت بسيارة ما طولت دقايق ..

استغربت منها ،هزيت راسي .. هه شتوقع منها !

زرنه الامام علي عليه السلام وگعدنه بالكوفة نتغده وسط الناس والعوائل ثاني يوم طلعنه لكربلاء زرنه وبقينه يومين ورجعنه لبغداد

مرت فترة ما نحچي ويا امي واحنه النطبخ ونضف وهيه تطبخ لنفسها ومعليها بينه..

بس وياا نور تحجي وياها علئ رغم نور ضايجة وزعلانة منها حييل وما تحچي وياها ..

وحتئ مصطفى وسالار مبتعدين عنها ملتهين بدراستهم..

الكلية ما جاي اداوم حتى نبراس گاعدين بالبيت والهدوء قااتل ..

گلت اگول لسالار خاف لا انفصل ونوب ما يخلوني اداوم وتعالي عيدي من جديد ..

صعدت لغرفته وكلتله اريد ارجع اداوم صارلي اكثر من ثلاث اسابيع ما رايحة للجامعة ..

سالار :- ولكعبه ناسي وملتهي بشغلي ناسي هلموضوع اي ارجعي وابدي داومي من باجر

-خاف يفصلوني

-لا لاتاخافين داومي ومعليج هسه اخابر ابو الخط يجي عليجن باجر واروح وياج احجي وياهم وافهمهم وضعنه

-ماشي ان شاءالله يلا تصبح علئ خير

- وانتي من اهله حبيبتي..

طلعت والملل كاتلني ما اعرف شسوي الموبايل چان موجود علئ شحن اخذته وفتحت الفيس تمددت وضليت اتصفح ماكو شي حلو لو خبر بي حظ يفرحني ويغير جوي

تالي بحثت علئ صفحة حيدرة طلعتلي اول وحدة بسرعة.. اخ هذا يطلعلي بالمقترح وين ما اروح ..

لا لا ما اراسله هو ما بادر ما سئل عني خطبني وكال مع السلامة ليش اراسل..

رجعت علئ صفحه ماتحملت الشوگ چان قاتل .. بقيت صافنة بالكيبورد وايدي تكتب وتمسح..

شگد حلوو لو يراسلني ويگلي شلونچ ياحظي مشاقلج بس هو وين يعرف يراسل ملتهي يفكر ويروح لعيادته وشغل وكذااا..

گلت خلي اراسله بدون ما اگوله أني ناردين والي يريد يصير خلي يصير اشوف شنو يرد عليه..

دزيتله مسج:- السلام عليكم

ما فتح الرسالة مع إن هو فاتح نت ومتصل

رجعت كتبتله - هلو يلثگيل..

شاف الرسالة تالي ورا دقايق منتظرته يلا رد ..

-اهلين

رديت :- شلونك يلمحترم..

دز - زين الحمدلله وانتي ؟

عزه بعينه هذا ماخذ راحته يحچي وياا بنات ويسئل علئ حوالهن بسيطة..

-بخير من رديت ياحلو نتعرف ؟ ..

جان يدز - تعاي اتصال

گال هيج وعيوني صارن بكصتي يحچي صدگ لو يشاقة ما توقعتها منه!..

تالي دز - وين طمستي ناردين

اتفاجئت وي صخام بعينج يا ناردين شلوون عرفني شنو هذا جني خوما جني ..

-وينچ ماتردين ؟ أدري بيچ يا خبله

تالي هو اتصل گلت خلي ارد بعد انكشفت ما يفيد ..

رديت - هاا نعم..

رد وهو خربان ضحك :-هاا ولج موتيني ضحك قسم بالله وعلي ونوب مسميه حسابها (عنيدة وكلامي مااعيدة) خرررب يومج

-هاي شلوون عرفتني هاي اني..

-من ياحلو هههههههههههه

-جذااب عوف الشقه جديات شلون عرفتني

-سر المهنه يابه

-خوش يلا بيباي اترخص

-تعاي ها سالمين وين رايحة

-شدخلك

-اكلي تبن

-ماشي

-بالعافية

-اشكرك ما تقصر

-واجبي هذا

- الله يوجبك

-جاوبيني شعندج مراسله عندچ حسااب علئ فيس من يمتى بويه وما گايلتلي ؟

-اووو من سنة

-عفيه واني اخر من يعلم بهالحساب ليش ما گلتي بأول ثلث أيام الخطوبة..

وبعدين تعالي شنو هاي يسموها مراسلتني وعود انتي غير وحده شنو جاي تختبريني ست ناردين

-اي يجوز تخوني

طكها ضحكه قوية طرشت طبل اذني

حيدرة :- الله بالخير شهلحچي خو ماكو شي ..اخونج؟ متحلمه خاف ؟

-لا تخون خالتي الشگره..

-ناردين ما أحب الشقه الماصخ..

-اي اخليلك ملح؟

-كلچ ذووق غير

-اصدمك بأذواقي

-من اختاريتيني عرفت ذوقج حلو هممم..

-لاتنغر يلمحترم يلدكتور..

- هههههه لايابه ليش انغر يلا مشغول هسه بعدين احجي وياج ونسولف ماشي

-اي خاف ازعجتك

جاوبني بنبره متعمد يستفرني ويشوف عصبيتي ..

-اي والله جاي اشتغل وانتي خابرتي عطلتيني..

-مع السلامة سلملي على شغلك ياابو شركات..

ضحكت وسديته منها أحب أشاقيها وأشوف عصبيتها وخبالها رجعت اشتغل علئ لابتوب وأشرب چاي..

ربع ساعة ورن موبايلي عبالي رجعت ناردين دگت فما جاوبت..

تالي لح هلأتصال رفعت الموبايل شفته رقم مجهول اتفاجئت..

رديت باستغراب - الو يابه خير منو؟..

عبد الرحمن :- انتظر باجر حبيبي وشوف الاميرة خطيبتك شنو رح يصير بيها الا اكسرها ومااخليك تتهنئ بيها وشوف ،اذا مان*** اني واصدقائي عليها وناخذ شرفك بسيططة واذا انت رجال تعال وخلصها منها وانقذها اذا انت كفو

شمرت الكلاص وگمت من مكاني هذا عبدالرحمن ايا كلب جاوبته بحدة وكل اعصابي تلفت..

-ابن الگوا* * ابتعد من ناردين لا يكون موتك على ايدي لا تلعب بذيلك ياكلب والكائنات الحية اذا تحاول تخطفها لو تلمس شعره منها وعلي انسيك حليب امك يا* ***

عبد الرحمن :- انشوف يلا دي

سده بوچهي رگعت الموبايل بالحايط تفلش ماظل عقل براسي لزمني من ايد التوجعني..

لا اگدر اروح الها لان انا مو بـبغداد وعندي شغل لازم يتنفذ باچر لااازم !! ما اگدر اروح واعوفه بدون ما منفذه ..

ولا انا الاگدر اتصل على سالار لو حسن من خطي هذا او ابلغ ناردين ! يالله ما ناقصني الي بيه مكفيني!! شنو من كااارثه هاي منين اجتلي ما چنت حاسب حساب الها ...... يتبع

⭐⭐⭐⭐⭐

الكاتبة #نمارق رحيم