ناراحيدرة الفصل السابع والعشرون 27 - بقلم Namarq

رواية ' نــارحيــدرة 🔥

بقلمي //// نمارق رحيم ////

بارت _26

لا أعلمُ إلى متىٰ يبقه هـذا الشعُورُ
و إلىٰ أينَ تأخُذني هذهِ الأشواقُ
نبضاتُ حُبكَ بداخليْ
كلماتُكَ البسيطةَ تحتلُني
عيناكَ و ماذا عَنُها !
جعلتنيْ أقعُ في غرامِ حُبها

⭐⭐⭐⭐⭐⭐⭐

نور :- بعد ماسافرت ناردين ،رجع سالار للبيت ثاني يوم ،ابــد مايتاحچه وكل شوي ويصيح هو وامي واحد ماطايق لخ ،ومبين الموضوع كبير لدرجة من يصيح نشرد اني ونبراس صاير يخوف مادري شبي وليش هيچ اتغير !؟ ..

الواضح امي حاچيه اله موضوع ،او سر قديم .. بحيث من يتعارك وياها علئ ابسط شيء ،تهدده وتگله احچي الهن وهو يسكتها ويطلع بره البيت معصب ،

صار حتئ نبراس ما يسئل عنها مثل قبل وما يسلم ولا يكعد يمنه ،

يخلي المسواك البيت ويروح لغرفته ويقفل الباب عليه ،لليل يلا يطلع وهكذا

عجزت اعرف اشنو الموضوع حتئ مصطفئ كتله حاچي انت اقرب اله بلكت يسولفلك بس هو قافل وما حچه النه شيء ..

مر اسبوعين ونفس الشيء ،اخابر علئ حيدرة حسيته هو هم ضام شيء لان كتله علئ خبال سالار وكتله -حاچي وافهم منه شبي؟ ،
بس جاوبني نفس كل جواب وببرود وكٲنه يدري :- عوفو وابتعدو عنه هو يرجع لطبيعته من وحده من يرتاح .

تالي ينطي الموبايل لناردين نحچي وياها ومفتوح سبيكر ،كالت رح تروح للدكتور باچر.

حسيتها ما ماخذه راحتها بالحچي، وتريد تسولف اشياء خاصه بيناتنه ،بس لان حيدرة موجود يمها واكف ،فتجاوب علئ كد الجواب

ققلته منها وبالي مشغول افكر بيها ،الله يعينها
لومت نفسي لان مارحت وياها لــ لندن چان طززت الدراسة ورحت هنه كم شهر وترجع ،هسه منو الي يساعدها ويبدلها ؟

اعرفها تخجل من حيدرة ..

وارجع كل ليله ،افكر لسالار وليش هيچ تغير تعامله وصار جاف وسطحي

،شنــو السبب ؟؟!

...

ناردين :- بعد ماگالي انروح للدكتور ،گومني علئ الكرسي گعدني ،واتصل علئ العامله تجي ..

الي طول هلاسبوع تجي يمي ،وشنو احتاجه اتسوي ،بٲتصال واحد من حيدرة

تطبخ ،،،او مرات الاكل جاهز يجيبه

تغسل الملابس ،،، وتنظف الشقة

گالي هو جابها لحتئ تساعدني يعني عامله او مُساعده ولها راتبها الخاص ،هيه اجنبيه مو عربيه بس تحچي عربي فصحئ ،وتفهم عليه من احچي

هيه تبدلي لان اخجل من حيدرة ،وهيه التسبحني وكلشي تساعدني بي ،حتئ بؤقت الاكل توكلني ،مرتاحتلها كلش فعلاً انسانه طيبة وتساعدني بحنيه

..اتصل عليها،اجت طلعتلي بنطرون وبلوزة ؛ الجو بارد ثلج
ولبستني رباط علئ رگبتي وكلاو علئ شعري لا اتمرض لان من وصلنه ليهسه ماطالعه من الشقه وهاي اول طلعه الي فيمكن يتغير عليه الجو واتحسس ،

اجه حيدرة وهو مبدل ولابس مناظره الطبية الشفافه ،

راحت العاملة الي اسمها ( دانيلي) ،اخذ محفظته وموبايله

- يلا نروح .

- اشو خايفه !،

تقدم يمي وسحب الكرسي وفتح باب الشقة وهو يگولي :- انا يمچ هذا الشيء كافي لحتئ يزيح الخوف من گلبچ وخلص ،انتهئ الموضوع اطمئني .

طلعني من الشقق للسيارة ،ومن السيارة للعمارة كبيرة ..تخص الدكاترة بمختلف المجالات الطب .

نزلنه ،صعدنه المصعد طابق _9

الناس احسها تخــوف ! ،بحيث ضليت منزله راسي وبدون كلمة ،وماخذه وضعيه السايلنت

اصوات ضحك وكلام ،فعلاً حسسني اني يمكان غريب ،تالي اعرف حيدرة وراي اطمئن

تكلم بالانكليزي .. وياا ،السكرتيرة

دقايق ودخلنه ،فتح الباب غرفه الدكتور ..

سلم علئ حيدرة ،والواضح علاقتهم قوية لو اصدقاء قُداما

يحچي وياي بالانكليزي واني مثل الصنم ،مااعرف احچي لو اترجم كلامة، لان انكلوشتي ضعيفه
فحيدرة يترجملي عربي واني ارد علئ الدكتور بالعراقي ،وحيدرة يترجمله انكليزي
وصارت لخه
بين قوسين صار حيدرة (حجي گوگل) والوسيط المترجم ،

تالي الدكتور انطاه ورقة بيها عنوان ،وطلعنه

واني صافنه بالطريق گتله :- لعد انت مو گلتلي رح تصير جلسه وعلاج ويرجع ظهري وامشي اليوم؟

جاوبني وهو يسوق :- اي اي

- لا والله جديات شنو وين رح نروح؟

- للمستشفى

- ليش!

- عمليتچ اليوم بويه

كزبر جسمي :- ليش لعد چذبت عليه تدري بيه بعدني خايفة ليش هيچ مااريد رجعني للبيت فدوه حيدراا

- لا تبچين احنا المن اجينا من بغداد للندن غير علمود العملية ؟

- والعلاج ؟؟

- العلاج الفيزيائي بعد العملية ان شاءالله

- حيدرة بس ،خايفة اجلها فدوة

- لا ماكو تأجيل ليش خايفة انتي قوية

- يا قوية تبزني بريشه ينغمي عليه

ضحك ، :- ليش تضحك اخاف دا اگولك خايففة شنيه

باوعلي وهو يضحك عليه ، :- انصهر شني

- يااا حيدرا

- عيونه

- رح احس بالعملية وجع ؟

- اكو شيء اسمه مخدر

سكتت ودرت على الجامة احس گلبي مقبوض

دخلنه للمستشفئ والخوف ملئ گلبي ،خايفة اذا يصير بيه شيء داخل العملية ...

استعدوني ولبسوني لبس العملية گعدوني على السديه قبلما ادخل ابتسملي وگال واني لازمه ايده.. ناري انتي قوية ارجعيلي سالمة.. هزيت راسي (اي) ودخلوني..

...

حيدرة :- دخلت للعملية وبالي يمها اتصل رائد طلعت من المكان وجاوبته..

- هلا رائد

- هلا حبيبي بشر طلعت من العملية لا ؟

- لا والله توها دخلت

- اي ان شاءالله بالسلامة تطلع يارب

- امين اگلك حبيبي الي ابالك تشيلها من راسك ادري بيك بشنو جاي تخطط ترى

ضحك :- علئ دلعونه وعلئ دلعونه احبها وداعت حيدورنه

- انچب شبيك

- يخوي احبها ولحسين وعلي احبها واريدها ،صارلي اشهر مراقبها واعشگها ،يمن فدوة يروحون الخلگ لعيونها

- انت تلعب لو شنو بيوم من عرفتو بيه خطبت عارضت اول واحد انت وحتئ بالعرس طلعتني واحد مامهتم لشغله وهسه اتگلي احب واحب انت عاقل ؟؟

- هيه خلت عقل براسي ،استسلمت لو تريد تنتحر انتحر مااتدخل بيك يخوي لو تزوج اربعة ،حيدرة احبها

- اي حب هذا ؟ اصحه رائد ،نسيت شنو چان اتفاقنا ؟؟

- لا ما نسيت الاتفاق بس قسم احبها ورايد اخطبها من ترجع انت من لندن حتئ تحچي وي..

قاطعته من اجه الدكتور ،وگلتله روووح بعدين اتناقش وياك ..

حچيت وياا گالي الحمدلله بعدها العملية تمام التمام وانطاني اوراق حتئ اوقع عليها ..

وقعت وانتظرت ساعـات طلعت من غرفة العمليات متمدده ونايمة نقلوها لغير غرفة لحتى ترتاح ..

والعملية نجحت والحمدلله ،ظهرها تحسن وبقئ العلاج الفيزيائي لرجليها شهرين ويخلص كلشي

رجعتها للشقة خليت العاملة يمها وطلعت، جبت مكونات الشوربة ،وسويتلها شوربة خضروات متنوعة

گعدت يمها .. واگلت للعاملة تروح

عدلت گعدتها وكلتها واضح دايخه شربت ادويتها ونامت غطيتها ورجعت علئ الابتوب اشتغل للفجر ..

...

نور :- خلصت عطلة نصف السنة وبدينه نداوم صارلي ايام طلعت من المدرسة بعد ماصارت حله والسايق اتأخر ما اجه

انتظرت بالشارع ماكو ،تالي كلت ارجع مشي ،ومناك امر علئ ابو المحل اشتري لفه فلافل ،جوعانة ماخلونه نطلع بالفرصه وچان يوم متعب ..وكله دراسه وامتحانات يوميه

دا امشي مابعدت من المدرسة اهواي ، بنفس الشارع

چان تصف سيارة يمي قريبة حيل ..

باوعت سيارة سوده ومضلله اول مره اشوفها بالمنطقة ،

رجعت امشي وهيه تمشي يواي ،بطيء

حسيت بالخوف ،وتذكرت كلام نبراس من تگلي
(يخطفون بنات بالحله ويتاجرون بٲعضاء الانسان )

گلت هيه خربانه خربانه لو ابقئ واكفة لو اطكها ركضه ..

تالي انرفعت الجامه ،رفعت راسي ..شاب لابس مناظر

ابتسم وكٲنو شايفته شكله مٲلوف الي !،

بحيث ضليت صافنه ،واسئل نفسي - منو هذا و وين شايفته ؟

- اصعدي

- نععم !! وين

- اوصلچ

- خو ماكو شيء ؟ روح اخي توكل

- الدنيا مغيمه و باردة اصعدي لاتمرضيين هسه تمطر ،

- ما محتاج توصيله اشكرك ماتقصر

- اعمل خير واشمره بالشط ،دا اكلج اوصلچ شبيج مبوزه وخايفة مني

- مااخاف ومنوو انت شايفتك من قبل صحيح ؟؟

رفع راسه فوگ وگال :- اي كل ليله تشوفيني شنو نسيتيني

- شقصدك ؟؟،

- اي غير شايفه القمر انتي

سكتت تنرفزت منه وهو لح ، :- اصعدي شبيج اوصلچ ماعندي شيء وياچ وداعتچ

- روووح منااا لا الم شباب المنطقة گولها مصختهاا عااد

- اي لميهم وبدربچ لمي بنات اكثر شيء ،خلي تنفتح نفسيتهن التعبانه من يشوفني ، تسوين معروف والچ اجر وحسنات بالاخرئ

رجعت امشي طنشته وبداخلي ميته خوف ،، اذا اركض يمكن يدعمني حرت شسوي

فتحلي باب الصدر حتئ اصعد ،تالي نزل وهو يضحك ويتصرف طبيعي وهادئ

- شتريد مني انت ،روح مناا فدوه مامسويتلك شي

- اركبي

- مااركب روح فدوة

جر الجنطه من ايدي وشمرها بااسيارة رحت ركض اخذ الجنطه دفعني ودخلني وسد الباب. ..قفله

ادكدك بالجام وابجي ،صعد وحرك السيارة

- منو انت فدوة وين موديني شتريد مني رجعني فدوووة اخوي هسه منتظرني بالبيت

- رح اقتلچ انا من الدواعش رح افجر السيارة

صرخت :- لا دخيلك فدوة لاتكتلني بعدني شباب ماشفت شيء من פـياتيہ ومراهقتي فدوة نزلنيي ماررريد اموووووت

- رح اقتلچ كتل ذبح نتل

شهكت :- لا دخيلك فدوة بداعت احبابك واعزازك ابوس ايدك خل انزل ماريد اموووت افتتح الباااااب

- اذبحج مثل الطلي واشوي علئ اذاناتج بصل وراسج اسوي علئ الغده باچه

صرخت ببكاء ،تالي صفن وكال :- علئ طاري الباچه اويلي كراعين يبوو صارلي شهر ماضايك خشم الخروف

- انتتت مخببل مو صااحي عندك انفصاام نزلني فدوووووه

وكف السيارة بعد ماطلعني من المنطقة

- اتغشمر وياج فقير انه بعد گلبي

- انت مخببل مووو ويين عقلككك

- اي والله ،مادري وينه براس الشارع ضيعته

- داتضحك عليه انت

- تريدين انزلچ ؟

- اي فدوة عوفني

- اضحكي

- شنوو

- اضحكي وعد مني ارجعج لبيتج واخذيها من شاربي

- هههههه هاهاهاهاهااا

ضحك :- اخ بوويه صدددقه لهلضحكة ترد الرووح لك فدوووة هههههههههههه

- نزلني فدوه شبيك انت

- بيه انتي ،نور

- هاا شنو وتعرف اسمي !

- نووور

- شترريد عوفني بحالي نزلني افتح الباب فدوة

- من اكول نور كولي عيونها ، نووور

- هاا هاا عيوونهاا

- احبچ

صفنت بوجهه ، :- احبچ برضا لو بالغصب وهاهيه اتقبلي الواقع انتي الي

- شدتحچي انت، شنوو اني الك

- احبچ

- حبتك حيه ان شاءالله نزلننني

- انتي الي سمعتي خليها حلقه بٲذنچ ؟ ،انتي الي شئتي ام ابيتي .

- اننننت منووووو ؟؟؟

- انـا رائــد يبااا ،

صفنت وبسرعة تذكرت هذا نفسه الشفته بالمستشفئ

- انت نفسك الشفتك بهذاك اليوم ؟

- اي نفسي ماكو مني اثنين اسرعي الحجز مسوي خصم

- والله اذا ماتفتح البااااب يــ

- اي شتسوين ؟

شهكت :- اا ابچي

- اوي عيني سندوسه ماتتحمل اخرب علئ الرقيقات

سكتت ،

- اتغشمر وياج هسه اوصلچ لبيتكم

- اي رجعني فدوة حقيرر

- احبچ حقيرة

- الله ياخذك ،ويطيح حظك

- ويطيح حظچ علئ واهس

- انت شنوو ماتخجل من نفسسك

- الخجل يلوكلچ خاوه

..وصلني براس الفرع ،اريد انزل لزم ايدي

- احبچ ولحسين

- الحسين ياخذك عووف ايدي ياماتستحي ادبسزز

- شحلات الادبسززه وياچ ههههههههههه ،موتكولين لاهلچ فرفرتچ بالمنطفة ورجعتج ،ولو اگلچ گوليلهم احسن حتئ تسرع خطبتنه

نزلت وانطاني الجنطة ، :- هاچ جنطتچ نسيتيها سندريلا

اخذتها منه بعصبيه ورحت مشيت بسرعه ،درت وجهي بصدمه سيارته ماهيه شلون وشبسرعه اختفئ وراح !..

دخلت للبيت بسرعه وهمزين سالار طالع، والدنيا ظهر ..ونبراس جايه من نص ساعه

سبحت وبدلت لاحظت نبراس بيه شيء،رغم الكل ماانتبه ان اتٲخرت والساعة ب1 ونص

كعدت واجت يمي تسئلني شبيه، لان چانت تسولفلي شنو صار بدوامها ،وانه صافنه مويمها

سئلتني فماسكتت ماضميت الصار بگلبي ،وبديت اسولفلها شنۉ صار وياي ،الموقف بالمستشفئ واليوم ،

نبراس :- ابتعدي مره الثانية يمكن يخطفچ اتوقعي كلشي منه بعد اتٲكدي من السايق ولاطلعين من المدرسة وحدچ كون وياا صديقاتچ لو بنات المنطقة فهمتيي ؟

- اي زين ،اگول لسالار ؟؟

- لا ولچ هو منا مدري شبي ونوب اتگليله هيچ استري علينه واسكتي بس سؤال المحيرني هو شلون يعرف حيدرة ؟؟

- اي صح كال اريد بس حيدرة

- معناها يعرفه زملاء او اصدقاء

- اكيد ويعرفني دام يدري اسمي نور ويندل مدرستي وببتنه يعرفني لاونوب يكلي احبج

- عزه هسه يطلع مراقبج

- خوفتيني اكثر بعد التوبة اذا ارجع
لوحدي ونوب يكلي احبچ!

...

نارديـن

مرت ايام بعد عمليتي اخذ الادوية واكل واشرب واحس بديت اتحسن ..

فرق بظهري ..بعد العملية

بقن بس رجليه ...يتحسنن واخلص

وادرس محاظراتي واني كاعدة
ماتركت دراستي باسوء الظروف

حيدرة بهلفترة كلش حسيته غامض و ضام عليه شيء بحيث من يصير وقت الليل تكثر اتصالاته ما يخابر يمي ..

و يحچي كله بالالغاز أو مرات يخابر بغير لـُغه
لو بغير لهجه ..

مايگعد يمي هواي ،من يريد يشتغل يگعد
بزاوية بعيدة عني و بيده كوب الگهوة

ما اعرف شنو يشتغل
علئ الابتوب !! ..

ابقئ صافنة عليه مثل الثولة ..
ومع هذا ماسئلته شنو الدايشتغله

مرات افز بليل بـ 2 ..

الگا بعده علئ الابتوب !

الصبح گعدني فزيت ودانيلي موجودة تعدل بالشقة وهو يخابر

باوعلي وكال رح يجي الدكتور

- ليش يجي ؟؟

- العلاج الفيزيائي

- هااا

- الــ هاا مالتچ فاهيه

- اي لعد شسوي

التفت للعامله كالها لبسي لها الثياب ..

متت ضحك علئ فصيحته ..

اجت فهمت الكاله وبدلتني وكعدت تريكني

نص ساعة واندگ الجرس

دخل الدكتور كعدنة بالاستقبال ..صغير مجرد بي قنفات وشباگ كبير ..

بلش يسويلي رجليه ويحركهن ...

متت وجع طول اليوم بعد ماراح بقيت اون ورجليه موتني احس رح تطلع روحي ..

الم فضيع .....

حيدرة يهدي بيه واني اصرخ
حضني ..واهتديت ... ونمت

وصار الدكتور يجي بين يوم ويوم ..
مر شهر ..واني علئ علاج الفيزيائي

اكدر واوكف بس بصعوبة ..
وما اكدر امشي ..

بس يوم عن يوم التحسن واضح ..
وبديت احرك ايديه طبيعي ..

حيدرة يفرح من يشوفني فرحانة ..

صرت ابدل لـ نفسي ..
و أكل لوحدي ..

وگال الدكتور بعد اقل من شهرين
ويصير اكدر امشي وارجع علئ حيلي ..

وبهاي الفترة حيدرة حسيته تغير
و اتغيرت مُعاملته وياي ..

صار يبتسملي ...ويضحك ...ويشاقيني

ويصفن بوجهي .. هواي

كل ما التفت عليه الگا يباوعلي ويبتسم

دائما من يشوفني صافنة لو اكله ضايجة

يگلي جملته الحفظتها مثل اسمي ومرات اگولها قبل مايكولها إلي ونضل نضحك ..

( يباا يابه يابويه باباتي عيوني الچ اطلبي وتدللي)

فرحت حسيته فعلاً مو مثل حيدرة القديم
الي چنت اذا اتقرب منه يبعد عني ..

هسه هو اليجي يحضنني بلا سبب ! ..

....

چنت متمدده ونايمة وهو طالع ما موجود فزيت على صوت المفتاح دخل ونزع قميصة گعد على القنفه ويباوعلي بتركيز

استغربت منه ومن نضراته إليه باوعت على الساعه بـ3 بليل.. سألته

- شبيك صافن عليه؟

ساكت ما جاوبني تقدم وگعد يمي

يحچي وكٲنو شارب شيء !! ،،،

لان مو طبيعي من نضراته حسيته ما واعي
تقرب مني حيل وهمس..

- ناري يناري ينارا حيدرة

شميت قميصه ما بي ريحه مال كحول او شرب لعد ليش وشبي هيچ يحچي !؟

اول مره يسويها ويتقرب مني لهدرجة اباوع بعيونه كأنو منوم مغناطيسي..

تالي تقرب من اذني وهمس ، :- نــاردين انــــ

يتبع..

لاتنسون التصويت🦋.

الكاتبة نمارق رحيم