_بتعملي ايه؟
_بكتب البارت الجديد عشان انزله،حضرتك عاوز مني حاجه يا بابا؟
_قومي بس بلا بارت بلا زفت انتي فاكرة ان حد بيشوف الهبل دة اصلا؟!
_اه على فكرة في ناس زيي بيهتموا بالحاجات دي و بنحبها اوي كمان.
_طب انتي عبيطة و عرفناها ، لكن انتي اصلا محدش يعرفك عشان يشوفو اللي بتكتبيه.
_عادي مع الوقت هكبر و في ناس كتير هيعرفوني و هنجح في الكتابة لإني بحبها.
_بطلي هبل انتي فاكرة ان دي حاجه مهمه أو
مربحه كل ده هبل و بعدين بتنزلي لمين اصلا ده
انتي كل اللي عندك اتنين تلاته؟!
دموعي نزلت
_مش مشكلة كل الناس بيبدأو بعدد صغير و بعدين بيكبروا مع الوقت محدش بيبدأ كبير.
_قومي بس اعمليلي كوباية شاي كدة البتاع ده كده كده مش هيفيدك بحاجة ده تضييع وقت.
قومت دخلت المطبخ اعمله الشاي و انهرت من
العياط لوحدي كالعاده بنهار لوحدي و بقوم لوحدي
و بنجح لوحدي حتى لما بفشل بفشل لوحدي
عمري ما كان معايا اي حد في اي مرحله بدخلها
غير بس شوية كلام من امي و اخويا في البداية.
______________________________
_اتفضل.
قولتها لبابا و انا بديله كوباية الشاي و دخلت جري على اوضتي ركني الهادي اللي بيحتويني دايما بين جدرانه.
شوية و سمعت صوت بابا من بره
_لوكا.
مسحت دموعي بسرعة و رديت
_نعم يا بابا حضرتك عاوز حاجه؟
_اه تعالي.
_نعم.
_الشاي ده مش حلو زي المره اللي فاتت.
سكت و مردتش كمل كلامه و هو بياخد بوق من الشاي
_متبقيش عبيطه كده انتي زعلتي ليه دلوقتي انا
بفهمك، اللي انتي بتعمليه ده مش هيفيدك بحاجة
مش مذاكرتك أولى بالوقت ده؟
_يا بابا انا بحب الكتابة و القراية و اي حاجه ليها علاقة بالكتب.
_بس مش هيفدوكي بحاجة يا فرحتي لما تخلصي في اليوم كتاب و اتنين و دراستك مهمله فيها؟!
_مين قال اني مهمله بدراستي يا بابا انا بجيب أعلى الدرجات في العيله كل ترم؟!
_بس مش بتطلعي من الأوائل يبقى كل كلامك ده ملوش لازمه عندي.
_هو لازم يعني عشان ابقى شاطرة و مجتهدة في
وجهة نظر حضرتك اني اطلع من الاوائل حتى لو
درجاتي حلوه و كل المدرسين بيحلفوا بشطارتي لو
حضرتك تفتكر يعني انا مطلعتش من الاوائل
السنة اللي فاتت لإني جبت اقل من المركز
العاشر بدرجتين بس كدة مش شاطرة؟!!
رد عليا بقسوة
_ملك بلاش بجاحة اقل من المركز العاشر بدرجتين
يكش تبقي اقل منه بواحد من عشرة حتى بس
مطلعتيش من الاوائل في الآخر.
دموعي نزلت بقهر و انا بسمعه بابا علطول كدة
قلبه قاسي عليا او بالاصح علينا كلنا انا و اخواتي
بس انا اكتر واحدة فيهم بتعرض لكلامه لإني اكتر
واحده فيهم عندي طموح عايزة احققها و بجري ورا
حلمي مش زيهم كلمه توديني و كلمه تجيبني.
مش هكدب عليكم بنهار؟اه بنهار و مرة اغمى عليا
في اوضتي وسط انهياري بس برجع أسند نفسي
و اقوم من تاني يمكن لإني عارفة اني لو استنيت
حد يجي يقومني مش هقوم و لإني عاوزه اللي
بحلم بيه يبقى حقيقة هفضل وراه لحد م اثبت
لبابا و لكل الناس اني موهوبه و مجتهدة و ناجحة.
______________________________
_لو أتقدم لك شاب زي باباكي في كل حاجة
نسخة منه في الصفات و كل حاجه هتوافقي؟
كنت بقلب في الفيس بوك بتاعي و لقيت البوست
ده في جروب بنات على فيس احنا عاملينه و
قعدت افكر كدة لو بجد اتحطيت في الموقف ده
ممكن أوافق و اخلي الاجيال اللي جاية ورايا
حاسين بنفس احساسي؟
بصيت في الموبايل تاني و لقيتني بكتب كومنت على البوست ده
_لا مش هقبله،هقبل حد حنين اكتر يعملي اللي
انا عايزاه منغير ما يبقى كل همه الناس هتقول
عليا ايه الناس هتعمل فيا ايه،يبقى حنين عليا و
على أولاده و يدعمني و يدعمهم في نجاحاتنا و
يفرح معانا على اي انجاز حتى لو صغير و احقق
كل اللي عاوزاه وانا عارفة و متأكدة ان ورايا راجل
هيفتخر بيا هيفرح بنجاحي و هيشجعني و
يقومني لو فشلت في مرة.
ساعات الكلمه اللي انت بتقولها ك هزار مثلا او
وجهة نظرك ممكن تدمر ناس كتير مش شرط يبينو
ده و انهم اتدمرو بس هتلاقيهم بينهاروا في أقرب
فرصة تنفع ينهارو فيها.
______________________________
_ماما بصي كملت ال200 فولوور على البيدج بتاعتي.
قولتها بفرحة و انا مبسوطة و فخورة بنفسي وسط
تجمع عائلي بسيط قدام التليفزيون في اليوم ده.
ردت عليا بعدم اهتمام و هي بتعمل اللي في ايدها
_طيب كويس استمري بقى.
رغم ان الجمله بسيطة و تبان مش تشجيعية اوي الا
انها فرحتني و لو شوية ان في حد هامه نجاحي و
بيشجعني حتى لو ده مش باين.
بس طبعا لإن بابا قاعد مينفعش فرحتي تكمل ابدا. ضحك بسخريه
_تلاقيهم ناس فاضيه زيك مش لاقيين حاجه يعملوها.
حاولت اتماسك و ابتسمت بالعافية
_مش مشكلتي ناس فاضيين ولا مش فاضيين
المهم اني لقيت حد يشجعني و يبين لي اني
مهمة ولو عند فرد واحد.
و قومت جريت على اوضتي اول ما دموعي بدأت تنزل عشان منهارش قدامهم اكتر من كده.
_في ايه يا احمد انت كل مرة هتفضل تقولها كدة
سيبها يا اخي تعمل اللي هي عايزاه مش كفاية
شغال تديها في إحباط في الدراسة لحد ما
مستواها نزل سيبها بقى بالله عليك كفايه كده.
_و هو عشان مستواها نزل في الدراسه تعاتبيني
انا بدل ما تاخدي منها التليفون و تمنعي عنها
الزفت ده؟!!
_ما هو منك نزل منك انت محسسها انها مهما
عملت برضو هتفضل فاشله لحد ما بقت نفسيتها
في الأرض و ياريتك بتاخد بالك لأ مكمل في اللي
بتعمله.
_مني انا!مش عشان هي مهمله و فاشلة بجد يعني؟!!
_ادخل يا احمد الله يخليك طيب بخاطرها بكلمتين البت خلاص جابت آخرها و مع ذلك بتعاملك كويس و بأحترام.
_مش داخل اطيب بخاطرها يا أميرة هو انتي علطول معاها هي ما تشوفي بقى انها مقصره مره!
_يعني انت مصمم بردو انك مش غلطان؟
_لأ مش غلطان و انا اصلا مش قاعدلك فيها انا غاير.
_هتروح فين يا احمد؟
_غاير في ستين داهيه تاخدني ملكيش دعوة.
و مشى و هبد الباب وراه
______________________________
حطيت إيدي على بوقي اكتم صوت شهقاتي
عشان محدش يسمعني منهم كفاية اللي حصل
بسببي لحد كدة.
مسكت موبايلي و نزلت البارت الجديد على
البيدج بتاعتي و قفلت الموبايل و قررت اهرب
زي بعد كل مشكلة بتحصل بهرب بالنوم بروح
لعالم خاص بيا جوة أحلامي مفهوش كل القسوة
بتاع العالم ده.
تاني يوم صحيت فضلت قاعدة في اوضتي لحد ما
جه معاد الدرس بتاعي فا قومت لبست و خدت
حاجاتي و مشيت من غير ولا كلمه و قابلت مريم صاحبتي اللي اول ما شافتني قالت بأستغراب
_مالك يا لوكا شكلك متضايقه؟
ابتسمت بمرارة و غلب
_عادي خناقة جديدة مع بابا في البيت كالعادة.
_طب هوني على نفسك مفيش حاجة مستاهله ده كله.
و فتحت موبايلها شوية و هي بتكلمني على ما المستر يدخل و بعدين بصتلي و هي بتقول
_بت يا لوكا ايه الجمدان دة!!
_جمدان ايه يا مريم هو ايه اللي حصل؟
_ده*******.
ضحكت بفرحة وانا بقولها
_ايه اللي بتقوليه ده!!!!