نقيب قلبي الفصل السادس وثلاثون 36 - بقلم شقراء

الجزء السادس والثلاثون
#نقيب_قلبي

مقدام..شكوو شبيك صقر ؟؟
شبيها زينة...ليش تبجين !!
صقر..لك انت زلمة لو فرخ دجاج..
مرتك لاعبه لعب ومحاسبتلك حساب؟؟
مدام متعرف تربيها اني اربيها..
من كالت الحجيه ع السحر هي نكرت..
وماخلت قسم ما قسمته...
وهسه تطلع مخليته بغرفتهم..
روح طلعها لا ادخل عليها للغرفه..
بسرررررعه..
_لج ايااااات بت الكلبببب..
اليوم انتقم منج ..
اليوم ادمرج ولج..

صقر..تعالي يابت الناس..
تحجين كلشي والا قسم عظيم..
اخذج واشمرج بباب اهلج واكلبها فصول..
اخليهم يغسلون عارج وتصيرين عبره..
احجي شلون دخلتي وشوكت؟؟
وبس هذا لو اكو غيره؟؟؟
لج ساقطة ظالمه..
لج اخوي راااااح ..
اخ يا شاهين اخ..
لج كتلتي اخوي بقذارتج..

زينة..جانت بالارض كاعده ومقدام يرفس بيها..
ويكلها احجي لا اليوم افرغ سلاحي براسج..
المشكلة البيت متروس سلاح..
وذول دمهم حامي..
صدك خفت وقتها ضليت ارجف اكثر..
كلت ليروح يكتلها بسببي..
وخطيه عدها بنيه..
لزمتني رجفه ضليت اختض..
اجه صقر حاجاني شوي هدات..

كعدت ايات عدل وكالت رح احجي ..
بس بالاول انطيني كلمة شرف ماتموتني..
رفسها كلها متطلعين منا الا جنازة..
اجت ع صقر ركضت ورا صارت..
صقر ابوس ايدك ..
ماريد اموت اريد بتي..
اريد افترق عنها ماريد اموت..
كلها صقر الج الامان احجي..
بس اذا جذبتي بحرف اسلمج اله..
والوالدة راحت للسيد..
يعني راح يحجيلها بالتفصيل..
اذا طلع كلامج عكس كلامه مالج عذر..
بيدي اسلمج لمقدام..
كلتله لا احجي احجي..

حجت شلون اول واحد ..
مشربته لشاهين بيوم العرس قبل ليروح للحلاق..
كالت ردتكم بس تتفرقون بالاول..
بس مافاد..
كالت المرة التسوي العمل هذا هاويها..
ماظن راح يعوفها بسهولة..
كالت اسويله واحد يعلك كلبه بالغانيات..
حتى تمل منه مرته..
بس انت ماعفتي وبقيتي..
تالي هذا الخشبة من رحتي تجيبين..
حطيته لان محد بالبيت..

بس مادري بي موت لو اذيه لشاهين..
اني ردتكم تفترقون..
مثل ماحرك كلب اختي..
ردت احرك كلبه..
كلها صقر واختج شريفه موووووو؟؟؟؟
لج اختج دارت علينا واحد واحد..
منو التشوفه تذل نفسها بس محد انطاها وجه..
لج اختج مرة صعدتلي نص الليل تدك بالباب..
طلعت خزرتها كتلها شعندج..
تكلي ضايجه اريد اسولف..
لو ماارزلها وكتلها ..
اذا شفتج عتبتي هذا الطابق اذبج من فوك..
احترمي نفسج ترى اعرف دروبج..
من وقتها خافت وكفت ..
بعد يااخت كاعده تدافعين عنها حضرتج..
كالة على راسج وراس اختج والخلفوجن هم..
كمللللي وبعدددددد...

كالت واحد كلتلي اقري ..
وجاي اقرا بوجه ضرغام وفز ..
ومن باوعلي خفت..
ماشفت وجه ضرغام..
لا شفت وجهه مشايفته بالدنيا كلها..
وبس باوعلي ضل يصرخ..
عفته وطلعت خفتت..

زينة..شنووو يمه ابنيييي...
الله يحرك قلبج..
الله ينتقم منج لج سااااااقطة...
كمزت عليها فقدت..
لزمت بشعرها وانا اجر بيها وجيان تجر بيه...
يصيحون ولج تولي احنا نحاسبها ماكو..
من وصلت لجهالي فقدت..

اخير شي لزمني صقر وكتفني..
ووخرني منها..
ضليت اعيط بيده..
وخرررر عوفني ابرد كلبي..
لك شعندي غير جهالي...
لك ذوله اطفال شنو ضررهم..
الله يااااخذج ..
ياربي يحرك قلبج ...
ضل يحجي باذني ع كيف..
اسكتي كافي كافي..
اني اخذلج حقج..
بس خل نعرف اذا اكو شي بعد نطلعه..
مو احسن ميبقى وتتاذون...
اهدي حبيبي اهدي بس اهدي..
جان يحجي بهدوء ويمسح ع جتفي..

سكتت وكلها كملي ترى مو متحملج فضيها..
كتلته بعد ما ضميت شي بس الخشبه..
اخير واحد رشيته رش ع حايطهم..
مثل التراب هذا..
كالت هيج رح يتفرقون مثل هالتراب..
كتلها بيوم شفتج فوك؟؟؟
كالت اي هو بيومها بس ماكملته ماكدرت..
لان سمعت صوتج وردت انزل..
بس هذني ماكو بعد..

كال مقدام من رخصتك صقر..
بس اخذها اريح قلبي بيها...
كتله ادبها بس لتاذيها..
لتنسى بنتك منها..
والسمعه غاليه مقدام فاهمني...
كال حجايتك سيف ابو عكاب بس جيبها..
اخذها للغرفه وطلع بته كل لجيان خلوها يمكم..
ومانسمع بس عياطها..
دكيت عليه الباب..
كتله اذا سمعت عياط ادخل اموتها بيدي..
صدك عاط بيها بعد ماسمعنا حسها..
عوذه شنو من مرة..
لو رجال ااااخ الا اطلع حياة شاهين من عيونه..
بس للاسف حرمة والها حرمة..

رحت اخذت صقر وضرغام..
_اني رح اخذ الجهال واجيب عشا..
دربالج ع نفسج زينه..
جيان ماوصيج بعد اخوج..
عينج عليها..
_بعيوني لا توصي..
اخذتهم جبنا عشا واشتريت حلويات الهم..
ماردتهم يحسون بالي يصير..
رجعنا كعدتهم يمي الاعبهم..
وزينه صاعده لغرفتها..
خابرت مقدام طلعلي..

مقدام ..صقر اطلكها بعد ماريدها..
صقر.. لتتخبل عندك منها بنيه..
اكعد واسكت لتتسرع..
والمرة ماتستقوي الا من تأمن عقاب رجلها..
صير حوك وحط عينك ع بيتك..
مو عبالك السهر والعربده مالها ثمن..
ترى ثمنها غالي ..
وشفت شلون مرتك عوجه ومسوي كوارث..
وهجمت بيتنا..
لو ابنك المات وهو واصل خيره..
وذاك السقطته..
حاسب نفسك قبلها..
لان كله فعل ايدك..

شوف شاهين الله يرحمه..
اااخ ياخوي حتى ماكدر انطقها..
الله يرحمك..
شفت زينه شلون تخاف منه..
مكالمه متخابر اهلها من وراه..
رغم هذا حقها..
وباقل موقف توكفله وكفه..
لو جيان شوفها شلون هي وفهد جنهم طيور..
ليش هذا كله؟؟
لان هم حاكميهن..
مقدام انت نجر مو اني الاعلمك..
ضب مرتك ترى اني اجيت اذبحها بيدي..
بس وكفت بعيني بنتك..
وزينه توسلت بيه ..
كالت ترى هاي سمعه ..
وتلطخ بيكم طول العمر..
محد يصدك ماعدها شي..
وعدها بنيه تحكمون عليها بالموت وهي عايشه..
مقدام..هي لو النسوان كلها مثل زينه..
جان طلعت عن الشرع وتزوجتهن كلهن..
_صم حلك لتصير ملطلط...
مو انطيناك مجال..
_لا صدك صقر اسئلك شي وجاوبني...
انت بعدك رايد زينة؟
_مو وكته هالحجي هسه..
اخوك بعده ترابه رطب وروحه لايبه..
لتصير ناقص وتحط عينك ع حلاله..

واحنا نحجي دخلت الحجيه ..
سلمنا عليها وانطيتها ماي خطيه فحطانه..
كعدت مددت رجليها وكالت صيحولي زينة..
وتعالو كلكم التمو..
بس الجهال خلوهم بعيد..

زينة..اجت ام فهد وكعدنا كلنا وحتى ايات..
كاعده مدنكة ووجهه مينشاف من الكدمات..
كالت ام فهد هذا سحر..
ووديته للسيد بطله..
ومن شافه ضل يدك ع راسه..
يكول هذا مسوي بخشبة مال تابوت!!!
والقصد منه يا اما تموتون ..
يا اما تنهلكون وتتعذبون..
ويخليكم ثنينكم متعذبين..
لا انت التستقرين وي رجال..
ولا هو اليستقر وي مرة..

للحكاية بقية..