نقيب قلبي الفصل التاسع وثلاثون 39 - بقلم شقراء

الجزء التاسع والثلاثون
#نقيب_قلبي

زينة..ركضت ع الزاويه طلعت الروب ولفيت نفسي..
فتح الباب ووكف بي..
صقر..تأخرتي صار ساعة انتظرج..
زين مانمت جوا..
_انت كل عقلك فايت هنا؟؟؟؟
شبيك صقر شهالتصرفات مالت الاطفال..
اليشوفك فايت لغرفتي شيكول؟؟؟
تقرب علي وكف كدامي اني دنكت..

_زينة رفعي راسج وباوعي بعيوني..
اريد اشوف عيونج مشتاقلها..
_بقيت مدنكه ومرتبكة ..
لزم وجهي بيدي اثنينهم ورفع راسي..
ماكدرت اباوع بوجهه استحي..
_اااااخ لج شكد مشتاق لهذا الخجل البيج...
تذكرت اول ماشفت عيونج بالجامعة..
وجنتي تبجين وخشمج احمر..
كلت هالعيون مصيرها الي ...

_عفيه صقر اطلع منا ميصير هيج..
انت محرم علي وغلط الي يصير..
اذا يكعد هسه صقر ويشوفك هنا ننشهر...
تقرب عليه رجعت ليورا..
صرت قريبه ع باب الحمام..
ضل يحجي همس ويتقرب..
_فراشتي تخاف مني..
لا لا مع الاسف..
لزم شعري ويلعب بي ..
غمضت عيوني ..احس جسمي فتر..
شعور محاسه بي قبل..
احس اول مرة يلمسني رجال..

ماحاسه بهالشي ..
من وقت باسني بالسيارة..
غمضت عيوني ..
ردت املي قلبي بهالاحساس..
ماحسيت الا شفته ع شفتي ..
شهكت حيل حاولت ادفعه..
لزمني قوي اجيت اعيط باسني قوي..
سديت حلكي حيل..
نزلت دموعي..
عافني هو استغرب من ردة فعلي..
كتله اطلع برااااااا..
وضليت ابجي..

صقر..من شفتها ذابت بيدي وارتخت اعصابها..
زادت رغبتي بيها اكثر..
بس من بستها قاومتني.
متوقعت هيج حتتصرف..
لان شفتها ذايبه وهالشي شجعني..
بس من بجت انقهرت ووعيت لنفسي..
طلعت بسرعة كعدت بالصالة..

كرهت نفسي اني شلون اتصرف هيج..
ليش هيج غصبتها..
بس هي ليش جاي تجافيني..
معقولة زينة مات حبي بقلبها..
معقول صدك مكالت..
ماتريد ترتبط بعد..
وانوثتها ماتت!!!
صحاني من تفكيري..
صوت لواء..

لواء..صقر شبيك..
_ماكو ولا شي ليش..
_دشوف النفاضه انترست دخان..
شبيك احجيلي يمكن اساعدك..
_لواء تعبان نفسيتي ممرتاحة..
_نفسها صاحبة الجفية؟؟؟
_شلوون!؟
_متعبتك صاحبة الجفية؟؟
_لك انت بعدك تتذكر ملعون..
معليك كوم ولي زعطوط..
_بشرفك كلي اي لو لا بسس..
_ولي روح كاعد يحقق وياي انوب..
امبينه نفسها من ابتسامك ..
شرگت حلكك بس ذكرتها..
هالكد تحبها..

اووووف يا لواء حبها بنص روحي..
لو اصير شايب يبقى حبها اخضر ..
اشو اني كاعد اسولفلك!!
كوم يلا كوم لا دوس ببطنك..
اروح انام بدل ممكابل هالجهرة...

زينة..ثاني يوم ماكدرت اباوع بوجهه..
مقهورة منه من تصرفه..
وخجلانه هم منه ومن نفسي..
احس البيت كله يعرف بالصار..
ضليت طول اليوم منطوية..

بالليل كاعدين ع فلم توايلايت..
كلش احب هالفلم ..
هو سلسلة..
جان طالع الرابع يمكن ..
مندمجة واباوع لواء اجه جاب كرزات ..
جان متواعد وياي نشوفه سوا..
بس اني شغلته قبل ليجي ..
ب DvD..

اجه ووكف يمي شوي يلا حسيت..
لواء..اي عيني صفنات وحركات..
الله يساعد قلبك لواء..
بس انت فقير طلعت..
_امشي عابت شنو هالبسامير..
تعرف بيه احب هالفلم..
_ترى حتى هو يحبج ع فكرة..
اني شفت حتى الجفية ضامها...

شهكت اني باوعت بوجهه وسكتت..
احس خدودي نار صارت..
ماعرفت شجاوبه..
هذا شمدري يؤ..
معقوله صقر حاجي؟؟
لا لا ميسويها..
_زينة لتخجلين مني تعرفيني شنو..
اني صح ماعرف تفاصيل..
بس الاعرفه صقر يحبج..
نصيحتي الج تزوجو واستقرو..
مدام يحبج وتحبي..
_الله كريم لواء سد السيرة..
ترى احرجتني بما فيه الكفايه..
سكتنا وكعدنا نباوع..

يوم ثاني كاعدين ورا الغدا..
واجت حور بت فهد..
كالت خالة يصيحلج بابا ..
يكول اخوانج اجو!!!!
معقوله ؟منو اجه وشذكرهم بيه؟؟

رحت لكيت مازن ومحمد!!!
كرصني قلبي..
كلت اكيد جيتهم وراها بلوة..
سلمت وكعدت..
ضلو يسولفون ..
شويه وعافونا وحدنا..
كال محمد..
شوفيلي زينة احنا اجينا نحاجيج ..
ترى مو عاجبنا وضعج هنا..
وانت كاعدة بين كومة زلم.!!!
باوعتله كتله بداخلي صدكتك..
لو مابنفسك كلت لتجي ولتوصل..

كال مازن زينة انت ارملة وعدج جهال..
مسؤوليتج جبيرة..
وباجر كلها تتزوج ومحد يريدج..
عديل محمد اخوه مطلك..
وخوش رجال عمره ٤٧..!!!!
وحالته زينة موظف وعنده معرض مال سجاد..
عنده بس بنية متزوجة عمرها ٢٣!!!

كالو احسنلج من ماتبقين عالة ع اهل زوجج..
واطفالج انطيهم لاهلهم!!
عيشي شبابج وتونسي..
صفنت عليهم اباوع!!!
ذولة اخوان لو عدوان..
ذولة اكيد من نسل اخوه يوسف ..
لا لا ذولة اخوته اصلا..

كمت عفتهم كاعدين وطلعت بلا مااكول كلمه..
خفت احجي شي..
اصلا ماعرفت شحجي..
صرت اخاف انطق حرف يمهم..
وبعدين يتأول ضدي..
طلعت صار بوجهي مقدام..
خير زينة شبيج..
لا سلامتك ماكو..
بس اخوتي وحدهم شوفهم اذا يريد يطلعون..
عفته ومشيت..
ضل صافن عليه وراح..

جانو الجهال يلعبون ..
والكل كاعد ..
عبرتهم وصعدت..
رحت فتحت الغرفة ودخلت..
كعدت بالارض ومددت رجليه..
كعدت احسب ظلم اخواني وجبروتهم..
اندك الباب..
كتله فوت.
دخل مقدام كال اخوتج يكولون خل تحضر نفسها..
امج تريد تشوفج ويرجعوج بالليل..
كتله ماريد اروح..
كال زينة لتخافين..
انت امانتنا وصدكي.،
اليرشج ماي نرشه دم..
محد يدوسلج ع طرف واحنا موجودين .،
وابن امه اليضرج ..
ساعتها نشوفه الحرة شتجيب...

الظاهر مقدام عنده خبر عن الي جاي يصير..
كتله هسه انزل..
تحضرت واستأذنت من ام فهد وطلعت وياهم..
طول الطريق ساكتين..
بس دخلنا للبيت ..
جان البيت فارغ محد ابد..
كال مازن شوفي ولج هي...
الرجال ناطينه كلمة..
والدراما مالة المسلسلات التركية حطيها ع جهة..
نغولتج نشمرهم ع بيت جدهم..
وانت تتزوجين غالب..

كتله انطيهم وشوف الا اجرجرك بالمحاكم..
وحتى المنظمات الانسانيه اروح..
كافي صير اخ مرة من المرات..
كافي تصفط حجي وانت بس بالاسم اخ..
طز بيكم وبخوتكم..
وولدي مانطيهم وماتزوج لو تبلط البحر..

هجم عليه مثل المخبل..
راشديات وبوكسات كأنه جاي يعارك زلمة خشن..
اخذ محمد ولدي ..
اني كمت اريد الحكه..
جرني مازن ورجع يضرب بيه..
واني اصيح رجع ولدي ابوس ايدك..
اخذهم محمد وطلع..
وهم يبجون ويدفعون بي..
يصيحون ماما واني اصيح عليهم..
لحد ماطلعو واني اعيط..
كال رح يوديهم لاهلهم وانت هاليومين نعقدلج وتزوجي..

للحكاية بقية...