رواية نوارس مهاجره الفصل الأول 1 - بقلم zeanab_almusawi

‎السلام عليكم
‎متابعاتي وصديقاتي .. الغوالي قبل لا ابدي انشر
‎اخبركم ان النشر يومي
‎لعدة اسباب
‎هي القصه مكامله ودانتظر النهايه
‎وسبب حالتي الصحيه
‎ودوامي ومسووليات
‎اخرى
‎القصه في اول فصولها حتكون عاديه
‎لحد تتصاعد الاحداث
‎ومثل ماخبرتكم سابقا حتكون جزئيين
‎متابعه شيقه

‎———#نوارس_مهاجره1
‎#زينب_الموسوي
‎#نوارس_مهاجره1
‎#زينب_الموسوي

‎مثلما النوارس نحن مهاجرون ....بلا اجنحه. كل مانملك حقيبة سفر  كل مافيها حسرات  ... حملتنا اقدارنا بعيدا حيث لاعنوان ولاسكن .... نقف على ارصفه غريبه .... وشوارع بارده
‎وطرق مسدوده . بيوت تفتقد الدفء  لم نتخيلها قبل على خارطة
‎نسكب دمعه هنا ... ونمحي اخرى هناك
‎نتطلع الى ماكان ..
‎كان لنا وطن ...
‎كان لنا اهل
‎كان لنا جيران واصدقاء
‎وكانت لنا احلام .... احلام تركناها خلف  جدران النسيان
‎فنحن مهاجرون  ....
‎تخلينا عن الاحلام وسعينا لغربه
‎غربة لم تداوينا .... لم تحتوينا
‎سرقت سنين عمر اوحد
‎واهدتنا الم الفراق

‎فصرنا .  (نوارس مهاجره )

———————————

‎القصه تتحدث عن ثلاث فتيات شقيقات عراقيات
‎ولل امانه  التامه القصه  وصلتني عن طريق اخ وصديق محامي
‎عرفني على بطلين في القصه اذكرهم نهاية القصه
""""""""""""""""""""""""""

‎في مدينة
‎ ديربون العائده لمقاطعه وين من ولايه مشيگان الامريكيه
‎حيث الاغلبيه العربيه والاسواق
‎والمحلات واللافتات  وعيادات الاطباء والجوامع والحسينيات
‎والصحف والمطاعم ورائحه الاكل والقهوه كلها عربي
‎والمناخ المتقلب
‎فقد تكون الشمس حارقه وبعدها بثواني تمطر السماء مطرا غزيزا
‎وقد تثلج لساعات وايام
‎وتدفىء خلال دقائق
‎بارده مثلجه حد الانجماد بل صقيع يجعل عظام الجسد ترتعد
‎حاره رطبه ممطرا صيفا وشتاء
‎وسكان  مشيكان  يفسرون جوها
‎بعباره( انها مشيگان )

‎ديربون هي بمثابه بغداد ...للعراقيين
‎وبيروت ...للبنانين
‎وصنعاء... لليمنين
‎وكذلك دمشق.... للسورين
‎وغيرهم

‎لكل جاليه محلاتها.. وثيابها ..
‎وعاداتها تمارسها بحريه
‎في بلد الحريه

‎ارضها خضراء
‎ورودها بكل الالوان
‎ لاتستغربوا ان صادفتكم ورده زرقاء في حدائقها
‎مائها عذب ..كانه عسل مصفى

‎وتحوطها اربع  بحيرات عظمى

‎تشتهر  بزراعة التفاح  والحنطه
‎وتشتهر بفريق الفتوبل الامريكي
‎(لاينز الاسود )
‎وفريق الهوكي (ريد ونگز الاجنحه الحمراء )

‎ولايفصلها عن كندا سوى جسر
‎يستغرق عبوره عشر دقائق 

‎تدخل  فتاة عراقيه في نهاية عقدها الثالث   لعياده طبيه  لدكتوره جي  في مشيگان

‎:هاي  عندي موعد مع الدكتوره

‎:الممرضه تفضلي اكتبي اسمك بقائمة المرضى وانتظري دورك

‎: اني مو مريضه والبارحه اتصلت بدكتوره جي وحددت موعد معاها

‎:الممرضه شنو اسمك لو سمحتي
‎:ملاك اسمي
‎:الممرضه   تفضلي اجلسي دقايق وانطيها خبر

‎اخذت مقعدي في غرفه الانتظار
‎وكلي قلق وتأهب.... الف سوال ضرب راسي
‎كل مينفتح باب وينادون اسم حيلي ينزل للگاع ......
‎اباوع على وجوه الموجودين وكل شويه احسبهم
‎شوكت تصيح اسمي ..
‎الانتظار صعب
‎صعب وبس
‎الا موت وخاصة الي بحالتي خلصت عمري انتظر ....
‎انتبهت على نفسي
‎احرك رجليه سريع حتى الكرسي بدا يهتز
‎وارجع احدث نفسي ......

‎( اهدي ... الناس انتبهت ....
‎اووف اذا الدكتوره  متعرف
‎هيه وين .... معناها تحطم اخر امل عندي )

‎مرت نص ساعه انفتح باب عرفه الدكتوره جي
‎وطلعت الدكتوره

‎بابتسامة الم انرسمت  على وجهها الابيض من الثلج
‎وشعرها الفضي وعيونها الواسعه توحي بجمال محى اثاره الزمن ومابقى الا اطلال
‎نادتني بصوت خافت ....

‎مشيت شبه مشلوله

‎: تفضلي ملاك

‎وگفت وكل مابيه يتوسل ان وسط هذي الاوراق الي تحملها بايديها المجعده
‎اجد جواب ومواساة ل احزاني
‎وبدون مااجاوبها كلمه
‎دخلت لغرفتها واني اسمعها تگلي
‎:تفضلي اجلسي   ملاك

‎گعدت على طرف الكرسي خوفا من الي راح اسمعه

‎حاولت  بخبرتها الطبيه تهدأني وتحتوي قلقي

‎:يبدو عليك القلق  اهدي

‎هالكلمات خلتني ارجع جسمي على الكرسي  واحاول اشرحلها قلقي

‎:  فعلا قلقه من اول متصلت بحضرتك البارحه البارحه  وخبرتج عن الموضوع وگلتي راح اساعدكم انولد بالبيت  امل عدنا كلنا

‎جلست على كرسيها  امامي  وملامح وجهها  انرسمت عليها تعابير العطف

‎:اول شي احب اعرف احوالكم الوالده وانتي  كيف متقبلين الموضوع

‎تحسرت بحرگه واني اجاوب على سوالها الي اصبح اول سوال  اواجهه  من الكل

‎: صعبه علينا كلنا والاصعب احساسنا بالذنب اتجاهها  وبضياعها
‎تصوري دكتوره مرات اتمنى لو مجاين ل امريكا وداخلين هالمشاكل كلها
‎شنو الي جنيناه ؟
‎عمر ضيعناه بدون منعرف وين رايحين

‎:قاطعتني وردت
‎:جي   هيه عرفت هذا الشي راح يصير واستعدت اله

‎هزيت راسي اوافقها الراي

‎:ملاك  صحيح  كانت مستعده

‎راجعت اوراق امام ميزها وكانها تبحث عن شي وسالتني

‎:هل  سالتي   اصدقائها  او المدرسين  يمكن عندهم اجابه ؟

‎من حديثها عرفت ماعدها علم او اي معلومه تفيدني وبديت ارد بملل
‎: اختي ايه سألتهم كلهم

‎نظرت لساعتها. وهذي علامه ان وقتي اوشك على الانتهاء واسترسلت بالحديث
:

‎: اني بدوري راح اسال الممرضات الي بالمستشفى يمكن بالصدفه احد  وجدها

‎:  ياريت دكتوره  متتصورين وضعنا شگد صعب
‎لازم تظهر. وتحسم الامر
‎تحركت من كرسيها وهيه توضع ايدها على جبهتها
‎وكانما تحاول تتذكر شي

‎:اتذكر  بزياراتها الدوريه للعياده  طلبت صوره ويايه ومع
‎الممرضات  ومن سألتها ليش جاوبتني  حتى اكتب عنج

‎المعلومه شدتني واستغربت هيه متحب تكتب ومتعرف تعبر

‎:شنو قصدها  دكتوره
‎جاوبتني وهيه تنظر ل ارضية العياده وتحاول تركز

‎:الي افتهمته بعدين منها هيه كاتبه قصه عن حياتها

‎:ياقصه دكتوره  اول مره اسمع هيه كاتبه قصه

‎:هذا الي فهمتني اياه وشرحتلي ان القصه فيها  انفعالاتها.. والمها...
‎  والغريب رفضت اقراها

‎الحديث اخذ ماخذ الغموض والجديه

‎: طيب هالكتابات وين موجوده منو اخذهن ؟

‎:اعتقد صديقتها مروه  ؟
‎ لازم تبحثين عن هذي القصه يمكن تفيد
‎ وگفت واني اسالها وهيه ظلت رايحه جايه بالغرفه

‎: شنو بيها هذي القصه دكتوره  ياترى

‎:اعتقد بيها  احساسها .حبها. غضبها
‎محاولتها  ل ارضائكم
‎اصعب الالام الي عاشتها
‎دراستها المتعثره
‎خوفها من الناس يكتشفون الامر
‎ انتابني الخوف واني اتصورها ذاكرتني بالقصه وخوفي محملتني الذنب

‎: دكتوره جاوبيني عن سوال واحد

‎اطرقت براسها وجاوبتني

‎:اعرف السوال
‎تريدين تعرفين هل تتحملين انتي المسووليه ؟
‎حقيقه مااعرف الجواب
‎لذلك اريدج تدورين على الاجابه بنفسج
‎ابحثي عن القصه حتى تعرفين الجواب

‎ شكرت الدكتوره وغادرت العياده
‎في طريقي الى سيارتي فكرت اجرب اتصل بمروه  رغم معلوماتي عنها عايش بولايه ثانيه تجي فقط للتسوق شهريا مع عائلتها .....

‎طلعت الموبايل من جنطتي واتصلت

‎رن موبايلها ....

‎جاوبت بسرعه

‎: هلوووو. مروه حبيبتي شلونج
‎: بخير الحمد لله

‎:  اريد اسالج عن قصه كاتبتها  روان
‎جاوبتني بصوت خافت ( الظاهر  خايفه من اهلها ميريدوها تتدخل )

‎: اني اتصلت بيج البارحه لان عرفت  اموركم صعبه وانتي مجاوبتي ......

‎: حبيبتي  اعذريني يجوز نايمه...  انتي بديربون حاليا

‎:بلي موجوده واحب  ابلغج القصه عندي ...  بيها كل حياتكم
‎كتبتها وانطتنياها ...

‎بگد مافرحت بجوابها بگد ماشلت هم كيف اقرا الي كتبته

‎:يعني عندج هسه اجي اخذها

‎:: هلا بيج تعالي

‎صعدت سيارتي
‎واقصى سرعه مسموحه سقت السياره توجهت لبيتهم ......
‎وادعي تكون وسيله توصلنا الها ....

‎وصلت كانت تنتظرني برى بالحديقه الاماميه
‎حجبت نظرتي عنها
‎اعرف نفس نظرات اللوم والعتب
‎وهيه اصطنعت الانشغال بترتيب ثيابها ...

‎اقتربت سلمت عليها
‎ردت

‎(هلللو )

‎مااعرف شنو الي خلاني اخذها بحضني
‎واخلي راسها على جتفي لثواني تخيلتها هيه   واطلقت حسرات بالفضاء الواسع ......

‎:اه يامروه
‎لو يرجع الزمن اه
‎شهكت بالدموع وردت

‎: ياريت مشتاقتلها حيل

‎للحظه تخيلتها هيه مسحت دموعها  عن خدودها

‎  :احجي ويايه بصراحه هم كرهتني
‎بعدت عينها عني وجاوبت بصوت مليان الم
‎: :كلكم ضلمتوها ومحد افتهمها

‎: :وين الكتابات

‎:  :هذا الدفتر
‎وفي تسجيل صوتي محملته على سي دي  وهيه تعزف وتغني
‎ولو صعبه عليج تسمعين صوتها  وتتذكرين

‎:ملاك: تعرفين شنو بيه الدفتر قريتيه انتي

‎:مروه : فقط سمعت التسجيل صوتها حلو واغانيها  مليانه حنين

‎اخذت الدفتر والتسجيل ومابقى   گدامي الا اشكرهاً  واواجه الكتابات واشوف المكتوب بيها مهما  يكون

‎: :شكرا مروه
‎سلميلي على الاهل

‎انسحبت من يمها ودخلت السياره عائده للبيت

‎بداخلي خوف افتح
‎واحساس قوي يگلي لازم تقريه
‎ اسوق واحاول اركز على الطريق
‎دموعي نزلت مجرد قريت اسمها مكتوب على الدفتر

‎حاولت ابعد نظري واطرد التفكير بيها بالنظر من الزجاج
‎على المناظر  بالطريق ...
‎نفس الخضار يرجع كل ربيع
‎ونفس النسيم المنعش ....
‎تكرار الفصول احيانا يكون روتين ويسلبك متعه الاحساس بان الحياة تستمر مهما حملتنا الدنيا مصايب واهوال
‎الحياه تمشي ......
‎يمكن منحس بيها ومرات نتجاهل الاحساس
‎وينبهنه الها خط تجاعيد يظهر اهنا  اوهناك
‎او شعره بيضه
‎او صوت بكاء طفل وليد يعلن قدومه للحياة رغم المغادرين يوميه
‎استغرقت بتفكيري وصلت البيت فتحت الباب
‎مثل كل مره ارجع امي گاعده على سجادة الصلاه وبيدها السبحه والقران ودموعها المبتهله لربنا ودعائها
‎( ربي اغفر وارحم  وتجاوز عما تعلم  )
‎سلمت عليها
‎ملاك :الله يساعدج ماما

‎ماسمعتها ردت عليه هيه صار فتره متحجي ويانا ومعظم وقتها للعباده
‎الله يعينها شگد شافت مصايب

‎فتحت الغرفه  حسن نايم سديت الباب ليگعد

‎اخذت مكاني بالمطبخ اعد الي اگدر عليه ..
‎الاكل فقد طعمه وماعاد يثير الشهيه عدنا  مجرد حاجه

‎بعد ساعه قدمت الاكل لماما
‎وانزويت في غرفتي
‎خليت الاوراق   امامي
‎مديت ايدي بتردد
‎فتحت اول ورقه ورجعت سديته
‎اتهربت  من نفسي بحجة اسوي جاي
‎وبالمطبخ رايحه راجعه واسولف  ويه روحي ليش خايفه
‎قابل اني مااعرف حياتها
‎معاشت ويايه معاصرت كل الماسي
‎مجرد سطور اقراها واشوف شنو بيها
‎بخار القوري  وعاني ....مليت كوبي وتركت المطبخ

‎مرت ساعات واني بنفس الصراع

‎لااني گادره اقرا ولا گادره اترك الدفتر
‎اشجع نفسي وارجع اتردد
‎لحد اخذت القرار بقراءة كم ورقه
‎اخذت الدفتر  خليته قريب من گلبي حسيته ينبض من جديد
‎يتنفس سمعت صوتها وشفت وجهها الخايف
‎رجعت الذاكره بيه من قريت اول سطر ذاكرته
———-

‎الساعه ١٢ الظهر
‎تعبت واني ابحث عنها او عن طريق يگلنا كيف نوصل الها
‎توجهت  للبيت
‎صعدت سيارتي ...
‎فتحت الراديو على راديو سيناء
‎اذاعه عربيه
‎اسمع بيها مومهم شنو اسمع المهم
‎ابعتد عن التفكير
‎حال يدعو للشفقه لمن يكون كل همك اليوم هو الهرب من التفكير
‎اخذت الطريق اليومي المعتاد
‎انطلق من الراديو اغنيه
‎هدمت كل مساعيي للهرب من التفكير
‎مياده الحناوي تشدو بكل حزن
‎((كان  ياما كان
‎الحب مالي بيتنا ومدفينا الحنان
‎مدفينا الحنان )
‎كلمات الاغنيه فتحت مسار الدموع بعيني
‎هذي الاغنيه ياما سمعنها بطفولتنا  كانت اغنيه ماما المفضله
‎واصبحت مثل النبؤه ......
‎اتنبأت بحياتنا كلها
‎استرسلت المطربه بمقطع مفجع اكثر ...
‎(( زرنا الزمان سرء منا فرحتنا والراحه والامان )
‎( حبيبي كان هنا مالي الدنيا عليه بالحب والهنا حبيبي ياانا
‎يااغلى من عنييه نسيت من انا؟)
‎وگفت السياره
‎وبديت ارد على اساله المطربه 
‎بالدموع ...
‎وسط جحيم گلبي رن موبايلي
‎جاوبت ودموع خانگتني

‎:: الووووو ها ملاك

‎ : شبيج ايه تبجين خير
‎ : اسمعي الاغنيه ملاك

‎قربت الموبايل من الراديو

‎ : دتسمعين
‎تتذكرين گعدتنا بالطرمه
‎وماما  ترش الثيل ونسمعها
‎ولج عبالك القصه لخصت حياتنا
‎وماما تدري الي راح يصير بينا
‎وصلنا ل اخر العالم وماعرفنا السعاده ولا هنى ....

‎صوتها مليان  حشرجه  وقنوط  وهيه تحجي ويايه

‎ : لو تدرين بلي داقراه
‎بجيتي اكثر
‎تعالي يمي

‎: انتي هم تبجين شبيج
‎ماما اليوم شلونها ....

‎ :يعني شلونها. محبوسه بهالبيت والذكريات كل ركن تحاصرها
‎اگلج  محصلتي خبر 

‎ :  ابد فص ملح وذاب  وراجعه للبيت  مسافه الطريق

‎حركت سيارتي
‎واصلت طريقي
‎الازدحام  بهذي الساعه معتاد عليه
‎الكل يريد يوصل للبيت
‎امريكا الوقت بيها ثمين
‎وقت الراحه محدود
‎اليوم يخلص عمل
‎كنت اتصور حياتهم مثل الافلام
‎يطبوون لنادي ويطلعون من نادي ......
‎واتصورت من وصلت الها دخلت الجنه .....
‎اكتشفت حياتهم يومين فقط بالاسبوع
‎وللعزاب فقط الي عنده عائله ميلحك يتصل باهله غير بالاعياد

‎هذي واحد من الاساليب الي اتهرب بيها من التفكير
‎هو السخريه من الحياة
‎وصلت البيت ....

‎انتبهت الحديقه الثيل بيها عالي
‎لازم نگصه لناخذ غرامه ...
‎شوكت يجي الشتى ونخلص من الثيل
‎ضحكت بسخريه حارقه ويه نفسي  ...
‎وشوكت يخلص الشتى ونخلص من الثلج وتنظيفه لناخذ غرامه

‎وصلت للباب اخذت البريد من الصندوق ....
‎هم قوائم دفع
‎ازعج لحظه هيه وصول البريد
‎يعني تدفع فلوس ...
‎فتحت بالمفتاح .....
‎البيت هدوء .....
‎امي نايمه بالصاله
‎فتحت غرفه ملاك ...حاضنه دفتر ونايمه ...باوعتها
‎شگد صايره تشبه ماما
‎كبرها الزمن من وكت ...وانهد حيلها من الي صار

‎ورغم  اتهام الناس الها بالتسلط .ودور القوه الي تمثله علينا
‎جواها طيبه  وحنيه تكفي العالم

‎فززتني  ايه وهيه تسد الباب فتحت عيوني ودققت بملامحها عبالك اشوفها اول مره  .....
‎اتذكرها من هيه طفله لحد الان على طول انيقه ومرتبه  الا هالمره  ..... القهر بهذلها  وطمس جمالها  الطبيعي
‎وانرسمت على عيونها  اثار حزن اوسع من عيونها  الوسيعه 

‎بادرتني باعتذار

‎:اسفه گعدتج  نامي مبين عليج التعب 

‎:ملاك : وشنو الجديد التعب عنوان حياتي
‎تعالي
‎عينيني على هذي المصيبه
‎شوفي هذا الدفتر

‎خليت الدفتر امامها الي بمجرد شافته انفتحت عيونها دهشه وترحيب ببدايه بكاء

‎: : هذا دفترها منين جبتيه

‎تعدلت بگعدتي   وشلت  الغطى عني

‎:: تعالي اقري وشوفي

‎تقدمت بخطوات ونترت الدفتر
‎بسرعه
‎تصفحت اوراقها

‎ : هاي شنو
‎هيه كاتبته
‎: هيه وباقي عند صديقتها
‎وج بس قريت اسمها متت قهر
‎ومن شفت خطها وتعبيرها الضعيف تاكدت هيه كاتبته

‎ :مااريد اقراه  اني مهزومه من التفكير
‎تريديني اقرا

‎وگفت  وگعدتها  يمي. غصب  وخليت  الغطى على اكتافنا اثنينا
‎وبايدي الدفتر.

‎:   ايه خلينا نواجه المهزومين منه
‎يمكن نرتاح
‎اتصوري حياتنا بالعراق واحجي مثل ماهيه كاتبه

‎ايه : اتصور  ليش اني نسيت ؟
‎نسيت  دلالنا وعزنا
‎انسى فرحتي الي انصلبت وماتت
‎شهادتي ..شبابي
‎ماما المريضه ..الغربه
‎مانسيت ولا راح انسى

‎من هنا  رجعنا بالذكريات بحلوها ومرها يمكن   ذكرياتنا اني وايه
‎ تكون وسيله ل ايجاد ماضاع منا

‎وحفزنا    السطر الاول  للاخت  الاصغر  روان

‎   :اني روان اصغر اخواتي
‎احنا تلث بنات ملاك وايه واني روان
‎قصتنا تبدي من سنة
٢٠٠٥
‎كان عمري تسع سنين اعيش في بيت كبير في بغداد حي الجهاد
‎مثل اي صباح عادي في يوم عادي
‎بالصاله اختي الكبيره ملاك تحفظني علوم  قبل ل اروح للامتحان  ملاك ربتني ومسووله عن دراستي
‎كل درجه عاليه اخذها الها فضل بيها وتكافئني عليها
‎وكل درجه ضعيفه تعرفون شيصير
‎كفخه خفيفه عادي متاذي
‎وتبقى توصيني وتسمعني لحد اخر خطوه اخطيها برى البيت

‎: مو تخربطين بالتعاريف
‎خفت ارد عليها لان اعرفها عصبيه

‎: كلها تتشابه عبالك
‎ردت عليه والغضب بعينها

‎ :شنو تتشابه لعد الليل كله شقريتج

‎صلحت الموقف قبل لا انضرب

‎ :اتذكرهم بس اخاف اخربط

‎هدأت شويه من شافتني أتأت بالحجي
‎:: متخربطين صير سباعيه
‎وارجعي بسرعه حتى اقريج ...رياضيات اذا تاخرتي
‎لو طلعتي تلعبين بالساحه اعتبري نفسج ميته
‎اموتج سمعتي

‎: صار  :افتهمت

‎ :يله بابا هسه يخلص ريوك ويوصلج بالسياره
‎ومن ترجعين ويه البنات لاتجين لوحدج

‎هذي التعليمات يوميه اسمعها ويوميه اجاوبها نفس الجواب

‎ :لا انتظر ست ازهار تخلص وارجع وياها

‎وماخلصت منها الا بدخول بابا

‎ابو ملاك : ها نوارس خلصتوا

‎: النورس الصغيره خلصت وصارت  جاهزه 

‎:   والنورس الكبيره مبين عليها التعب
‎روحي نامي باباتي بعد وكت

‎:  لا بابا اخلص شغلي قبل لتطفي الكهرباء وتصير حاره .

‎:    براحتج  يله روان باباتي

‎: : يله بابا

‎: بنتي ملاك انتي سدي باب الكراج ورانا  الوضع بمنطقتنا يخوف

‎: :اي والله بابا البارحه باليل صارت اطلاقات  مگدرنا  انام منها

‎ :والله يابنتي البيت لو ينباع بعته وسافر ت خارج العراق

‎: انشالله ينباع ونسافر على الاقل بالخارج اتعين بشهادتي
‎لعد الله يقبلها خريجة علوم كيمياء وموظفه بالتصنيع العسكري تنطرد بلا راتب وبعد  مالها تعيين

‎دخلت ايه تتثاوب

‎: هم سالفه التعيين

‎:  هو اكو غيرها ياايه

‎:   اسمعيني ملوكه حبيبتي افرضي في تعيين.. والخطف متفكرين شلون تروحين وترجعين للوظيفه بهذا القتال الي بالشوارع
‎اني ادوام بالكليه وايدي على گلبي ...

‎: انتي دومج خوافه

‎بابا تركهم  يتناقشون  واخذني 

‎: :يله روان باباتي

‎ملاك
‎تركت مكاني بالصاله وطلعت خلف والدي حتى اسد الباب
‎سديته ورجعت
‎لداخل البيت اعيش نفس اليوميات
‎تنظيف وطبخ واعتني بوالدتي المريضه

‎عمري /٢٦ سنه
‎كنت موظفه بالتصنيع العسكري الي انلغه بعد ٢٠٠٣
‎وبقيت اقدم على تعيين بكل مكان .... وماحصلت تعيين
‎ والزواج منتظرته بدون امل ...
‎والدي  موظف (كاتب عدل )
‎والعصر يعمل في المعارض السيارات
‎من ايام الحصار هذا عمله
‎اسمه محمد
‎اعمامي بدري .وجدي
‎اكبر منه 
‎والدي من ام ثانيه ورث عن امه بيت بالاعظميه ..
‎اعمامي اعترضوا على هذا الورث بحجة ان البيت ل ابوهم وزوجته الثانيه استغلت مرضه واخذت البيت
‎صارت قطيعه ومحاكم وبعدين رجعوا  تصالحوا والبيت تسجل باسم والدي

————
‎ايه
‎الاخت الثانيه
‎طالبه هندسه سنه اخيره
‎استعد للامتحانات النهائيه
‎دراسه الهندسه بالعراق قصة
‎كفاح من نوع اخر
‎واخر هالكفاح ينطوك شهاده
‎مكتوب بيه مهندس او مهندسه
‎تعلگها على الحايط
‎وتباوعها وتتحسر
‎وانت تشوف لونها بدا يتغير ويوحي بالقدم
‎ويرتفع ضغطك وتسال
‎ياترى اني هم كبرت وصرت قديم ؟

‎ماما مريضه بالقلب
‎والسكر وضغط رغم هيه صغيره
‎لكن المرض كبرها
‎اختي ملاك تولت مسووليه البيت وتربيتنا وحتى تدريسنا
‎احيانا احسها امي
‎شخصيتها قاسيه
‎ومتحب احد يردلها كلمه
‎وهذا نابع من خوفها علينا
‎حتى بابا
‎ميشتري حاجه للبيت الا بامرها

‎بابا صعب اوصفه وكلمة ملاك تخجل امامه ...
‎بابا رسول حب ورحمه في حياتنا كلنا
‎يسمينا النوارس اول ميدخل البيت ينادي ( وينكم نوارس )