رواية نوارس مهاجره الفصل الثامن والثلاثون 38 - بقلم zeanab_almusawi

#نوارس_مهاجره35
#زينب_الموسوي
الجزء الثاني
السلام عليكم  ... احبابي

مستمره  وياكم مع رحلة النوارس ...
وطلبت توقيف القصه لكن صاحبة القصه رفضت لكون الذكريات. سببت عدها  حزن
لذلك رجعت انشر 
🌹🌹🌹🌹🌹🌹🌹

طلال
مباراتي الاخيره..
  الاجواء تختلف عن الي تعودت عليها ..
المدينه جديده.. والحلبه مامتدرب عليها ..
القاعه اكبر ..  والمصارعين كلهم. بنفس حجمي  واصخم

الصحافه...و القنوات التلفزيونيه امريكيه.. وعالميه
حاضره  اهنا
الجمهور اكبر... في  ممثلين ..اعلامين... رياضيين ..سياسين  ..وعسكريين  برتب كبيره

في غرفه المصارعين الامريكان اجتمع بينا المدرب
وهو يقف على  مسطبه عاليه
واحنا المصارعين العشره متجمعين مع بعض ونسمع اله

   وبدى  بالقاء كلمات تشجيع علينا

(الكم الشرف بتمثيلكم امريكا. ..وخوض مباراه مع عدو امريكا الاول  ...خوضوا مباراه النصر... لاتفكرون بالهزيمه ..
وتذكروا
امريكا متنسى ابطالها.. وتكرمهم حتى وان كنتم مقيمين ..لاتحملون الجنسيه  خدمتكم للامريكا.... تكفي دليل على انتمائكم )
انتبهت على تعابير المصارعين
الي سخن داخلهم الحماس
وبدوا بالقفز. وابراز العضلات
انتبهت عليهم كلهم يحملوون خوف داخلهم ... رغم اضهار الشجاعه

تعالت هتافات الملعب والصيحات ..توصلنا واحنا في غرف الاستعداد ..
غادرنا الغرف ..ومشينا في ممر تمليه اعلام امريكا  .. والممر مظلم  رجعني لممر الزنزانه والسجن ... وعيوني بدت تزغلل
فتحتهم وغمضتهم عدة مرات
رجعت ابصر  بشكل عادي

طلعنا امام الجمهور..  تناثرت قصاصات الورق ..والاضاءه العاليه..   ...واعلام  امريكا الي راسميها. على وجوهم ..التصفيق والحماس مجرد سمعوا اسمائنا ..
تسلسلي كان السابع
بعدها اسماء الفريق الروسي وبدت صيحات التهكم. من الجمهور الامريكي.. والتشجيع من الجمهور الروسي

بدوا باول مصارعين..  واحنا الباقين ننتظر لحد تجي تعليمات المدرب. ...
الغلبه كانت للمصارعين الامريكان
واني
ناوي اخسر واطلع من هالاطار ..
واتحرر نفسيا
هذي نيتي كانت ..قبل لا ادخل الحلبه ...وتغير ت هالنيه.. من اعتليت الحلبه.. وشفت من ضمن الحضور ..وجه يهتف  امريكا ..امريكا ... وهو يدخن السيگار  وينفث دخان سيگارهه باتجاهي ..  وتعلوا وجهه ابتسامه غرور بنفسه... واستهزاء بيه
مع هتافه.. ارسم امامي سجن وزنزانه.. واغتصاب
باوعته بنظرات حقد..  وكراهيه
وباوعني بنظرة تكبر  كانه يگلي (اني الي قتلت طلال )

وبداخلي ذكرت اسمه ( جيرالد )
وجهت غضبي لل مصارع الخصم  ..تجاهلت توجيهات المدرب.. والسيناريو المرسوم
ضربته.. وضربته..  ركلته برجلي وراسي لحد رجلي تعبت من الضرب .. وبكل مابداخلي من  الم  .. وانكسار
فقدت اي تركيز.. واني اضرب
وكل الي اشوفه عيونه.. تباوعني
وترجعني للحظه الي امر جنوده بكلمة  ( اخذوه ) والي صار بيه بعد هذي الكلمه

تحولت وحش كاسر.. اضرب بلا رأفه .. ضربت  الروسي براسي مرتين  .. هوه. وگع  .. واني بديت ادوخ... لكن تماسكت
وگفت على صفارة الحكم.. واديه تلزمني ..كلي ارجف .. والهث  .. واسب

بعدني الحكم  عن المصارع ..وخلاني قريب من المدرب
الي صرخ بيه
: فقدت عقلك انت
جاوبته

: نعم فقدت عقلي
  قبل لا يامر الحكم  بستأنف  اللعب هجمت على المصارع وضربته ..
وتهجمت على الحكم ايضا
والجماهير انجنت..  من الحماس

استبعدني الحكم ..وطردني من الحلبه
هذا الي ردته اطلع.. بدون مااخليه يتفرج عليه انضرب

رجعت للغرفه دمي.. يغلي صار وقت الانتقام.. صار وقت استعيد نفسي.. وذاتي افكاري مشوشه
هذي فرصتي.. لو ضاعت راح ابقى طول حياتي تحت ذله ..وسيطرته..
ماعندي خطه معينه ... وتفكيري مشوش .. شفت اثنين من امن الصاله ديركضون باتجاهي
وهمه يصيحوون ( انت بطل مستر تي .. لقنت الروسي  درس مينساه)
مدوا اديهم يسلمون عليه وياخذون سيلفي وياي
اخذت الصور.. وبالي يم جيرالد
ودمي الي يغلي صار  بركان محبوس  بداخلي

تمازحت  مع الامن.. وضحكت معاهم

: ها عجبتكم المباراه

: اكيد عجبتنا  واو   انت بطل

: اشكركم. جدا

:  خلينا  ناخذ  توقيعك

انطيتهم  توقيع و انطيتهم تشيرت عليه اسمي
وطلبت منهم طلب

: ممكن خدمه

:نعم مستر تي

: في مشجع مع الجمهور  اسمه جيرالد  صديقي  ومن زمان مملتقي بيه ممكن تخبروه مستر تي  يريد يتحدث  معاك  على انفراد ممكن

:ممكن   طبعا اناديه حالا

: انتظركم في الحمامات

ضحكوا من گلت الحمامات لان اتصورها اما شغلة شذوذ او مخدرات

راحوا يجيبوه وهمه في غاية الفرح بالتوقيع والصور والتشيرت .. واعرف  جيرالد مراح يرفض ..يتصور داسلم عليه واعرف الحراس مارين بهذي المواقف 
ارتديت ملابسي 
سبقته للحمامات واني الدم على  وشك  يتفجر  داخلي من الغضب
  فتحت الابواب كلها اتاكد التواليت كله  فارغ.. ومافي احد يسمع
انتظره.. وبالي كل صرخه.. كل الم ..كل ذل ..مريت بيه بتلك الليله. مو بس اني  فقط
كل السجناء بابو غريب وان كانوا مذنبين. .. الي شفناه متقره قوانين ولا عداله

اقتربت الخطوات من الباب

وهو يتحدث بفخر للامن.. كيف هوه صنعني بطل ... مع اقتراب خطواته وسماع صوته .. تحفزت كل ذرة رجوله  انهدرت بسببه .. وحان وقت استردها
..وگفت  خلف الباب.. اول مدخل قفلت الباب
ابتسم ..وهو يخلي ايده على كتفي .. وخرتها بسرعه
وعيوني صارت  مليانه اصرار على اذلاله

: مستر تي ليش تريدني بالحمامات.. مااعطوك غرفه خاصه بيك.. اگدر اتكلم معاهم ويعطوك

صوتي جاوبه  بحرگه

: الحمامات تناسب  قذارتك 

اندار بوجهه عني   وهو ينظر للمكان باستهزاء 
واني كملت الحجي وياه

؛العالم صغير  جدا والتقينا.
كنت ابحث عنك من زمان وهسه صار الوقت المناسب نتحاسب

: نتحاسب على شنو ؟

: على جرائمك. ..
راسا
وجهت اله اول ضربه  براسي على عينه.. وهو يرتدي نظارات  انكسرت 
فقد القدره على النظر.  بتركيز وصرخت بيه
على حقارتك.. على وحشيتك

بعدها... ضربته برجلي على (اعضائه)  نزل للارض
واني اصرخ باذنه ( وهذي الضربه  راح  تذكرك  بيه  وبكل الي جنودك المنحطين  اغتصبوا كرامتهم )
ضربته  مرتين..  وتلاثه..  بطنه  وهو يصيح الحرس 
نزعت  تشيرتي  وخليته بحلكه واني  دايس  عليه
جردته من بنطلونه
ودرته للخلف 
اخذت تلفونه 
وبديت اخذ صور اله وهو يطلب المساعده ..
حاول يدفعني ويوگف   من عرف  قصدي  من الصور..  قبل لينهض دفعته باديه على الحمام سقط قريب التواليت 
بدا طرق على الباب من ناس تريد تستخدم الحمام 

استرجعت انفاسي ...
وصار لازم افتح الباب
شفت دمه ينزل من حلگه بصقت عليه ..

و فتحت الباب
شافوني بعض المشجعين  اجوي ركض للحمام الي انملى ناس   يسلمون عليه ويحيوني

: اشكركم  اشكركم. ياشباب هذا مشجع روسي... وتهجم عليه بالحمام.  وسب امريكا
و هو شاذ

ثار جنونهم وماانتبهوا ان هو يحجي انگليزي مثلهم ويگلهم
( اني القائد  جيرالد ) 
لكن صوتهم بالسب عليه والغلط كان اعلى

التمت الشباب تركل بيه واني اصور
في شاب اخذ ورقة الرهان بايده وكتب عليها( گي شاذ )
وبعضهم لصق على ضهره
ويبصقون عليه
طلعوا  اقتربت منه  وصيحت باذنه

: ليله ممتعه( جيرالد الگي )
اتحداك تفتح حلگك بكلمه  وتكول انضربت  الاوسمه والنياشين الي عندك تمنعك
(يا  الگي) الليله عراقيه  بحته ليله تعادل كل تاريخك الوصخ مراح  تنساها  طول عمرك واشك راح  تتفرج مصارعه بعد

نزلت صورهه  بالحمام  على صفحته وهو يصيح   لا تصور  ... اتوقف .. ارح التدفع الثمن غالي

طلعت من الحمام .. وتلفونه بيدي
  رميته باول حاويه قمامه ..  ورجعت للغرفه
اسمع اعلان فوز الفريق الامريكي.. ونفس الهتافات والتشجيع
توجه المدرب عليه وهو فرحان بالمبلغ  الي كسبناه

: اسف ياصديقي استبعدوك من السفر لروسيا  للجوله الثانيه
لكن. المبلغ  اكبر  مما تتوقع

: مااحس نفسي على مايرام. اخذني على المستشفى

گعدت على مصطبه اتصبب عرگ. وبردان

: مستر تي. وضعك مقلق

اندارت ارجاء الغرفه بيه ..وحسيت روحي غادرتني  ..وكل صور السجن والعذاب امامي
غمضت عيني واستسلمت للاغماء

......

وعيت على نفسي في ردهه مستشفى... والممرضات يدفعوني على سديه.. وجنبي المدرب... ومنظم المباريات ...
اخذوني لغرفه للفحوصات ..والانعاش 
اهتموا بيه ..واجروا سلسلة فحوصات  ..والنتيجه كانت ارتفاع بالضغط
لدرجه الدكتور راد يعرف شنو الموقف الي كنت بيه
جاوبته
: مصارعه وتوتر نصحني ابتعد  وارتاح

واستذكرت الي صار...
هو شفت روحي تتصارع مع الماضي
انتزعت مستر تي من داخلي ..واني اشوف جيرالد
واسترديت روحي.. استرديت طلال السجين.. المغلوب على امره.. وتركتله حرية الضرب والانتقام.. لنفسه.. وكرامته
بعدها اختل التوازن عندي
لحد صحيت بالمستشفى
والدكتور ينصحني
( ابتعد عن المصارعه )
شعرت بالحريه وغادرت السجن توا
الانتعاش يمليني.
والامل والحياة اتذكرت وجه  امي الي حرمتها  مني  واختاريت المنفى بديل عن احضانها
اتذكرت والدي.. وبيتنا.. واخواني.. واخواتي 
تذكرت زوجتي.. الي تنتظرني

اخذت التلفون واتصلت بيها

؛ ايه حبيبتي خلص بعد ماكو مستر تي اني طلال.
وداگلج تسافرين ويايه للعراق اشتاقيت ل اهلي

: اروح بس انت وعدتني تحل شغلة رعد وتشهد ويايه

: ان شاء  حبيبتي

بعد المكالمه بنص ساعه بديت افقد التركيز..  وكلش امامي يتمايل ..
خفت على نفسي.. دخلت للفراش ..وغمضت عيوني وارجع افتحها.. اشوف الصور مو واضحه ..
خليت على عيوني غطاء اسود ومفتحتها.. لحد الصبح

گعدت عندي الم قوي براسي
طلبت من الاستعلامات حبوب وجع راس.
وانتظرت واني اجمع اغراضي بالحقيبه 
انطرقت الباب 
فتحت ..واخذت الحبوب
وغادرت للمطار   ..احاول اتجاهل الالم  ..واسيطر عليه  لكن يزداد

صعدت الطياره.. بالاقلاع  اختفى الهوا... وبديت ادور على نسمة هوا..
  المضيفه  انتبهت عليه ..
واجتي تحاول  تفتح ازرار قميصي.. وتهفي وخرت ايدها عني. تفاجات وشرحتلي

:سيدي احاول اساعدك. افتح قميصك

: ابتعدي عني  مااكدر اتتفس

مرت عشر دقايق عليه احاول فقط اتتفس
دنگت راسي لحد كمل الاقلاع  استقر حالي
وحضرت المضيفه تطمئن عليه
اعتذرت على تصرفي. وراحت
بديت اقلق على صحتي
لازم اشوف دكتور  بس اوصل
بقيت اعد الدقايق للوصول
ومن وصلت اخذت تكسي للبيت
الساعه ثمانيه الا ربع. دگيت الباب  فتحت ايه
تلگتني

وهيه مبتسمه  ترتدي بيجاما حرير  سوده. وشعرها لامته كله 
ومع مكياج خفيف.

: الحمد لله على سلامتك 

: الله يسلمج شلونج

: الحمد لله

: شطالعه اليوم  كمر 

ابتسمت  واني رحت للقنفه احس راسي راح يتفجر

:اگلج ايه راسي حينفجر  من البارحه بالليل لحد هسه

: لا سلامتك اخاف بالمباراه احد ضربك على راسك

: مااتذكر. يجوز

گعدت يمي وبدت تفرك راسي
استسلمت لسحر اناملها... وبديت انعس  وكانها تعرف مكان الالم
اخذت راسي على حضنها  وفتحت شعرها  غطى وجهي
وهيه تضحك
فتحت عيني شفت فرحتها بوجودي يمها 
مديت ايدي على رگبتها حتى تقترب مني
وانصاعت.
بعدها تركت الامر ..لشفاهي تعبث ..وتلثم.. كل جزء بوجهها
دقائق سوا   ..عادلت  عمر كامل
مااريد اتركها.... لكن الم راسي وعيوني تزعلل ...ونفسي ضاق

ابعدتها عني  بايدي
تفاجات ...وفشلت

: ايه اختنگت مداگدر اتتفس
سكتت ودنگت ولمت شعرها
وعدلت ملابسها

وگامت من يمي. واجاني صوتها من المطبخ

: تتعشى ويايه

بداخلي غضب من الموقف. والصور  متفارگ خيالي  ..مخنوك مااگدر ارد عليها
فتحت الشباك اتتفس وهيه تتفرج

ايه

كنت على وشك ان اصدگ الحلم 
الي استمر دقايق 
كان طلال مشتاقلي  ..واديه لمستني
وباسني..  وصحيت على كابوس يگلي مخنوك

بس في تغيير .. واني لازم اصبر
حضرت الاكل على الطاوله

وهوه  بعده واگف بالشباك يتنفس هوى 
يمكن اختنگ لان باسني

: تحب اقيس ضغطك اخاف صاعد

: ياريت والله

دخلت لغرفتي جبت الجهاز
وطلعت
لگيته گاعد على الكرسي
ورافع ردن قميصه

: نزل الردن عادي اقيسه من ورا الملابس

: ايه ترى صدوك مريض واختنگت بالطائره

: اكيد. يله انطيني ايدك

قست صغطه مابيه شي

: ضغطك طبيعي ...تحب نروح للفراش انومك

انهد بيه

: داگلج راسي راح ينفجر  وانتي تريدين تنامين بثمانيه
مثل العجايز

اكتفيت باخر كلمه 
ورحت للمطبخ... اتصور  اريد  انام
واني كان قصدي  اساعده ينام
وكلمة عجوز  مرتين  يكررها
الظاهر  هذا  احساسه  اتجاهي

الى متى اضحك على روحي ؟

مشيت عنه صاح ورايه ...

: ايه افتهمي داكولج مريض

: سلامتك
في اكل  على الطاوله
واني داخله انام مثل العجايز

سديت غرفتي.. وكطعت الامل

خلص  اكمل حياتي بهالشكل بلا مااذل نفسي اله... انسان فقد الاحساس... وصار وقتي اجمد احساسي
طول الليل افكر واعيد التفكير
وصلت لهذي القناعه
خليه بحياتي..  لان مااگدر على بعده ...ومامستعده ادخل احد ثاني لحياتي..  لا عندي وقت ولا خلگ 
وبنفس الوقت اشيل اي انتظار  لوضعه يتغير... ويصير بنا علاقه زوجيه

وبعد هالقرار  نمت نوم عميق

للصبح  .. گعدت سويت ريوك وبدلت وگعدته.. اذكره بموعد المحاكمه

صاحني وهو بفراشه

: تعالي ايه داحجي وياج

: احجي اسمع منا

تأ فأف

: افففف شراح يخلصها وياج
يمعوده مريض  افتهمي شبيج

: افتهمت والله انت شبيك گوم راح نتاخر على المحكمه

نهض من افراشه وهو ياكد
: اكيد افتهمتي

هزيت راسي مبتسمه ( اي )

طلعنا الصبح اني وياه  على المحكمه.
هو يسوق  ..واني اقرا الشهاده الي كتبته المحاميه حتى هو يحفظها

: طلال اي شي عن حياتنا لاتذكر... اي خلافات
والطلاگ كول بسبب عملك كمصارع
: حفظتهم والله حفظتهم

: شبيك كل شويه تلزم راسك

:ايوته صار يومين الصداع مخبلني

: اخاف بسبب الرطوبه والجو ديتغير 

: مااعرف يمكن 

وصلنا للمحكمه.. باقي عشر دقايق على الجلسه  التقت المحاميه مع طلال وسلمت عليه
والدكتوره حضرت لتقييم حالتي النفسيه انفردت بيها 

: دكتوره  ممكن متذكرين ان زوجي كان سجين اخاف هالشي يسيء اله. والله هو دخل السجن بريء

ابتسمت وهيه تربت على كتفي
: اكيد مااذكر اي معلومات تخصج او تخصه اني قسمت قسم التخرج ماافشي اسرار مرضاي

: اشكرج دكتوره تحبين تتعرفين على زوجي

: طبعا اكيد
اخذتها سلمنا عليه... وهو بدى عليه الاحراج..  وبعده يفرك براسه
دخلنا للقاعه.. وحضر القاضي
نفسه وبعده يتذكرني.. وحافظ اسم نوارس بدا الجلسه

: يؤسفني ابلغكم ان رعد اختفى  مع الطفله..  عندما بلغناه على عنوانه بكليفورنيا رجع التبليغ... بان العنوان خطأ
مع ذلك ..القضيه لازم تكمل واستمع للشهادة

خبر اختفاء رعد نزلني للگاع  كنت  اتصور  بكلفورنيا
ضاعت الطفله شراح  اگول ل ماما الي تنتظر؟ . وروان الي وصتني  بنتها  ياترى تسامحني
من الصدمه ماانتبهت على شهادة الدكتوره... فقط گلماتها بحقي
( انسانه رقيقه.. واعيه..  هادئه كل مشكلتها القلق الزايد  نتيجة لظروف حياتها بالعراق )
نزلت هيه..  وبعدها 
شهادة طلال  نادوا اسمه وگف
وصعد للمنصه يشهد
ساله القاضي

؛ حضرتك مصارع

: سابقا. اعتزلت السبت الماضي  ..وافكر بمشروع بمدينة ديربون.. يفيد الناس ويفيدني
واستقر مع زوجتي ايه

: زوجتك ام طليقتك

: زوجتي. الطلاق كان حاله مرينا بيها..  هيه تخاف عليه من المصارعه.. وطلبت اتركها وتركتها ل اجلها

: تعتقد زوجتك تكره المصارعه لان عنيفه

: اكيد هيه  انسانه  هادئه.. مرحه..  حنونه  وطول فترة زواجنا ماتفرجت مباراه وحده على تلفزيون  ولا حضرت معاي

: كم سنه صار متزوجين

ابتسم وجاوب

: من عمرنا ١٩ سنه اتفقنا على الزواج  وتزوجنا عمرنا ٢٩ وحاليا عمرنا ٣١ سنه
استمرت شهادته..  بصوت هاديء  ..واضح وانگليزيه عاليه .. وثقه بالنفس
وعيونه عليه  طول الشهاده
انتهت الشهاده  والقاضي نطق الحكم

: الطفله حاليا مجهولة العنوان مااگدر اقرر مصيرها ..
ورعد مطلوب القضيه ثانيه.. لو ماحضر ينحكم غيابي بحالة ان الحكم ضده..   والشرطه القت القبض عليه او سلم  نفسه الطفله  تتحول الوصايه ل ايه ...طول فترة الحكم
اما في حالة الحكم لصالحه فالوصايه... تبقى للاب  الا اذا ظهرت الوصيه

نطق  الحكم  وغادر.
وگف الكل الا اني وطلال
الي التفت عليه

: ايه مابيدنا شي نسويه
عرف  والدتج  مراح  تشهد لصالحه  اخذ نوارس  وانهزم

: غلبنا مرتين  ونوارس راح تموت مثل روان

: نحاول بطرق ثانيه نسافر ل اهله لكليفورنيا  يمكن  يعرفون عنوانه  يله كومي
اني هم عندي اشغال
رحت وياه  بالممر شفت الدكتوره.. والمحاميه.. شكرتهم وطلعنا

صعدنا السياره وگفنا بعد مسافه امام مقهى  صغير

: انزلي دنشرب گهوه يمكن الصداع يخف

نزلت وياه ..وگعدنا.. طلبنا گهوه

: البارحه عفتيني ونمتي واني الصداع نساني احجيلج حدث مهم

: خير شنو الحدث
: تتذكرين القائد الامريكي الحقير بالسجن الي  وهو سبب

ماكمل اني كملت

: جيرالد اتذكره شبيه مات

: لا  ممات
حضر المباراه الاخيره  وبعد الجوله الاولى استدعيته للحمامات
وبسطته بسطه  طلعت كل قهري
هاج هذي الصور شوفيها صورته بتلفوني وتلفونه ونزلتها العالم كلها تشوفه

: داشوف بالله
اخذت التلفون  اني  اتفرج وهو يضحك

: يستاهل الحقير الكلب
شلون  وجه  وجه مجرم. عاشت ايدك خوش بسطه والمكان الي مختاره يناسب حقارته

:حتى تتاكدين تركت المصارعه 
وحتى عنواني الجديد مانطيته
وراح  اوفي بكل وعد  وعدته الج
نبني  بيت..  وافتح بزنسس ..
ونسافر..  ونعوض
قبل لا يكمل احلامه
قاطعته

: طلال كلمة الي گلتها البارحه. موتتني  خليك صريح ويايه
والله ماازعل بس گول بداعة امك وابوك ( تشوفني فعلا عجوز ). ماگدرت اكمل بجيت بلا مااحسب احساب الناس الگاعده
وقبل لا يجاوب دگ تلفوني ملاك
تسال عن الحكم

حجيتلها  الصار  وبدا العزا.عدها مجرد سمعت مختفي هو ونوارس
سديت التلفون  وهو مدنك على الميز  ويفرك براسه

ويمكن نسى .يجاوب  سؤالي  او تناساه

: شبيك طلال راسك بعده

: راسي وعيوني .. يله نطلع

: نروح للمزرعه اكيد ماما اليوم تتمرض  وملاك عدها طفل اكيد تحتاجني

: باعي اوديج للبيت اخذي سيارتج وروحي واني اجي بعدين
عندي كم شغله اخلصها 

: اوكي. يله نروح

طلال
راحت ايه للمزرعه..  واني توجهت ادور على دكتور  داخل ديربون  ...
قطع الاطباء في الشوارع واسمائهم.. مالها عدد  وكل عياده  تدخلها  يكون المراجعين حسب  جنسية  الدكتور  وگاعدين  عبالك مقهى ويحجون  بالسياسه
الدكتور  العراقي  مرضاه عراقيين
واللبناني   مرضاه  لبنانيين

ماعجبني الوضع ..
طلعت  خارج  ديربون  لمنطقه اسمها ( گاردن ستي)  دخلت عياده
دكتور امريكي حسيت الفرق كل المرض صامتين.. وهدوء تام
كتبت اسمي.. وانتظرت الدور
وقبل ل اعرف اي شي ..عن حالتي  والي راح يگوله الدكتور قررت  ايه متعرف  اولا مناقصه هم  وقلق وحزن ثانيا. مراح تصدكني  وتعتقد داتهرب
بهذي  الافكار  نادوا اسمي ..
استقبلتني  بنت صغيره  افريقيه
اخذت  وزني  وضعطي
ودخلتني  غرفه  انتظر الدكتور
بعد دقيقتين  دخل الدكتور وهو يبتسم  بكلمة( هلوووو  )بدا حديثنا  باسئله
عاديه عن  سبب زيارتي  للعياده

وصفتله الالم براسي. والزغلله بعيوني ..
فحص ..وحولني مفراس داخل العياده

اعطاني ملابس خاصه لونها اخضر .. وتركني اغير. ملابسي
كملت وطلعت للممر .. اخذتني ممرضه للغرفه .. الي بيها
الجهاز ..  ودخلت بيه
حسيت بالقلق على نفسي
اخذوا المفراس
وطلعت لنفس الغرفه .. وارتديت ملابسي انتظر الدكتور
الي دخل وهو يحمل النتبجه
وعلى وجهه علامات الجديه .. والعمليه
جلس.  يشرحلي

. واضح   متعرض  لحادث بالراس  او ضرب

: نعم  كنت  مصارع  واحيانا انضرب  بكرسي  او  بأيد  او رجل     من  مصارع  ثاني

؛ هذا  الضرب  سبب  عدم وصول  الدم.  لبعض المناطق براسك  وفي  اورده دمويه  هيه الي تغذي منطقه  الراس والعيون  فيها خمول  لان ميوصلها.  دم.

: والحل  دكتور

: لازم  تتعالج  حالا  اي اهمال يسبب.  فقدك   للنظر

ومثل اي مريض اول ميستوعب الصدمه وبعدها يسال عن العلاج ... واني سالت عن العلاج

:في  طريقتين  الاولى  هيه  علاج  بادويه  ومحفزات  وابر
ونعيد  المفراس  بعد شهريين من  العلاج  لو في تحسن والاورده بدت تستقبل الدم ..
منحتاج الطريقه الثانيه الي هيه تدخل جراحي باستبدال الاورده

: والعلاج فعال اكيد

؛ حسب  التزامك  بيه
وضروري  جدا تبتعد  عن  اي ضرب  عن  اي  اذى  لمنطقه الراس

: اكيد التزم  وابتعد عن المصارعه  نهائيا

: لاتقلق  الامر  في  بدايته
وممكن نسيطر  عليه
واحب  اوضحلك  ان للعلاج اثار جانبيه

:مثل شنو

: النعاس ..الخمول..  شهيه للطعام.  وزياده في الوزن

: اگدر  امارس  الرياضه  حتى اتخلص  من  الخمول  والنعاس وزياده  الوزن

: اكيد لكن بعيدا عن العنف وخاصة  منطقة الراس

: واگدر اسافر. ل اهلي بالطائره

: السفر مفيد دائما  فقط اخذ الادويه معك  واحرص على تناولها.

وهو يطلع طلب الايميل مني

:انطيني ايميلك.. وادخلك برنامج  يذكرك ب الرسائل التذكيريه  بالعلاج  ومواعيده يوصلك  وتگدر  تتواصل معي في حالة  اي  طاريء

تبادلنا الايميل واخذت اول ابره بالعياده ..
وطلعت للبيت حتى احضر اغراضي للمزرعه  ...
وصلت  ..خبيت الادويه ..والتحليل..
بدا جسمي يثكل لدرجه نمت بمكاني

ايه ؛
فات وقت الغدى  ..وصار العصر
وهو  حتى  مااتصل  يتصور اتصل  بيه  واتعصب  لان  مااجى
حتى ملاك وماما مخبرتهم راح يجي
طلعت للمزرعه مع ملاك وابنها وكلبهم  سريع ...
   ...استمتع  بالمناظر والخضار
ولون  الشجر  الاخضر  ..والاصفر  ..والاحمر
وملاك  تشرحلي.. عن ..المزرعه وعن كل شجره  وصلنا لمنطقه
تريدني اصممها
مكان لحفلات الاعراس المفتوحه  بالهواء الطلق بالصيف

واني صفنت وتخيلت

: باعي هسه موديل (الحصان )
يعني حفله بالريف وبعد ما القس يعقد للامريكان يصعدون
العريس والعروس على حصان

: هيه ناقصه حصان بعد

: اشبيج  جيبي فد حصانين
خلي الاباء يعلمون اطفالهم
مقابل اجور بسيطه

: لج خوش فكره  والله  واسوي اعلان بالگروبات العربيه  على النت 

شوفي هذا النبع  شگد حلو
اهنا نخلي سقيفه خشبيه  بيضه
وفد ستائر  بالوان قوس قزح
يوگفون العرسان  تحتها
والقس امامهم
وكراسي المدعوين خلف النبع
والله تطلع فد شي  .. وكم شجره متسلقه حول المكان
وطبعا كل عرس لازم تغييرين شويه
صممنا بخيالنا  وگعدنا قرب النبع
وغطست رجلينا  بالمي
ونلعب بالمي
: ايه تتذكرين  من كنا صغار  ونلعب بالحديقه بالصونده

: اتذكر. الايام الحلوه تمر بسرعه
: اي والله  ... ايه شايله هم ماما  اذا ملگينا  نوارس  تموت والله

: اني نفسج همج .. وملاحظه متحجي ويانا   .. ومحملتنا الذنب
: البارحه تگلي  انتي السبب  وراح اتركين  وصيتها وتلتهين بحياتج

: حقها  والله يساعدها  هم فقدت بنتها. وهم حفيدتها

:شنسووي  مكتوب علينا القهر

والملامه  استمرت بينا  لحد
بجى حسن خلته بحضني

: اخذي حسن بحضنج وداصورج  وادزها لطلال

: لاعفيه لاتدزيله صور خليه عايش الدروشه هسه عباله داغريه

: وشكو بيها اذا اغريتيه هذا رجلج

: ملاك فدوه لعينج اتركي طلال بحاله واني بحالي خلص احنا راح نبقى عايشين سوا  مثل رهبان ..دراويش ..مااعرف المهم بعد مااتعب روحي وافكر بحل وياه المهم اشوفه يوميه گبالي  لان والله مااگدر  احرم عيوني منه
الي بيه يكفيني الله يخليج

نزلت دموعي  وملاكي يمي

: ياحبيبتي  هالگد تعبانه
شجاه  ليش ميفكر بحل

: ياحل ملاك  وج البارحه اختنك وگام يدور الهوى لان باسني
خلاني الليل كله افكر اخاف ريحتي محلوه شميت نفسي الف مره. .. ومجلب بكلمة عجوز
ثقه بنفسي  وانوثتي مابقت عندي..  الاحساس  بالرفض من رجال تحبيه  يخليج  تحسين انشطبتي  من الوجود..  ومن قائمة الاحياء   ومااعاد  الج اي ذكر

: هسه هو وين  ؟

: ماادري. گلي روحي للمزرعه واني اخلص  شغلي واجي
وحتى  مااتصل  واعرف مراح يجي  ومااتصل  بيه لو اموت

: گعدت الساعه تسعه بالليل  جسمي نحلان
جريت نفسي للشاور
معقوله نمت كل هذي الفتره
تذكرت ايه تنتظر ني
ليش مااتصلت  تسال عليه
طلعت من الشاور ركض اخذت التلفون  اكيد هسه تصب غضبها كله عليه وتتصور وديتها حتى منبات سوى

اتصلت رن التلفون متجاوب اكيد نامت. رديت اتصل واني اغير ملابسي حتى اطلع جاوبت وهيه تضحك

: هلووو ايه اشو تضحكين

: العب ويه حسن

: ها الحمد  لله  يعني مزعلانه لان  مااجيت 

: ها صدوك  نسيت 

: نمت  بلا  ماادري  هسه يله گعدت. ودابدل  حتى اجي عليج

: ماكو داعي خليك مرتاح الدنيا ليل وانت مريض راسك وضغطك

: متصدكين والله مريض

: لا حبيبي ليش مااصدك
اخذ راحتك عيوني اروح  اتابع مسلسل باي

: ايه شبيج  متگوليلي
تعبان ونمت شصار يعني

: مصار شي عادي واني مزعلانه. روح ارتاح 
باي

سدت التلفون  ماافتهمت هيه زعلانه لو مامهتمه
طلعت اجيب اكل.. الادويه بعد تاثيرها حتى على رجليه مااگدر امشي

ايه
التجاهل يوجع  لذلك هو سلاحي القادم وردي على تجاهله اليه

رجعت من المزرعه  الصبح .. فتحت الباب ..البيت هدوء
وهو نايم بالصاله.. ويمه صينية اكل. ..نايم حتى  بالحزام
عبالك  ميدري  بنفسه
عندي كم غرض جايبتهم من المزرعه  تركتهم  على كاونتر وتسحبت  لغرفتي  وبدلت
ورحت للشغل

اعمر بيوت الناس على الورق بعد مافشلت اعمر بيت بالحقيقه
كان. مطلوب مني  واجهة  بيت لزوجين امريكان  اخذت العنوان ورحت  صورت  البيت  من الخارج  ورجعت  للمكتب وبديت ارسم افكاري
لحد ساعه ٢ الظهر. اتصل طلال

وهو عصبي ويصيح

:شفت كم غرض من المزرعه عرفت راجعه ليش ماگعدتيني

: منظرك مستمتع بالنوم گلت اخليك نايم

: وطول النهار  مافكرتي تتصلين تسالين عليه متگولين اخاف محتاج شي مات فطس

: ياعيني غير مشغوله ودارسم خريطه

: شوكت ترجعين 

: نص ساعه حبيبي

: حجزت  على اون  لاين  تذاكر للعراق  نسافر  ل  اهلي  راجعين من العمره   واريد اشوفهم

: الله وياك شوكت الحجز

: الله  وياك شنو  تروحين ويايه لاتگولين مگتلي

: شعندي  رايحه  خليني اهنا وانت  سافر. تونس يم اهلك وناسك اني شكو بنصكم

؛ ليش انتي مو جنتهم  وذولي اهلي يعني اهلج همين

: اي والله صدوك نسيت
ولايهمك  انطيني  موعد  السفر حتى  ابلغ  الشغل

: بعد تلث ايام  نسافر

: تلث  ايام  حتى مالحگ اشتري  هدايا  ل اخواتك واخوانك  زوجاتهم  اطفالهم

: من ترجعين نطلع نشتري ومن العراق  نشتري الباقي
بس تعالي

  : صار  جايه

طلال
قبل لترجع ايه رحت على العياده اخذت الابره
ورجعت.. للبيت كانت موجوده ..من فتحت الباب ودخلت.. لحد وصلت  لميز الطعام.. الي تجهز الاكل عليه ..مشالت راسها غير باوعتني خطف وكالت

:همزين  اجيت ميته جوع دقايق الاكل جاهز
سحبت الكرسي وكعدت  النحول مسيطر عليه  لكن جوعان لازم اكل

گعدت گبالي

: يله  تفضل  بالعافيه

راقبتها ..طول ماهيه گاعده ..فاتحه يوتوب ..والتلفون على الميز.. عينها عليه ..واتابع مسلسل تركي

: هالايام اتابعين تركي
جاوبت وعينها بين الماعون وبين المسلسل

: اي حلو التركي. يشبه الهندي  بس الجذب البيه ينجرع شويه

؛ ليش  اتابعيه  اذا  تعرفيه جذب

؛ مرات الجذب  ياخذك من عالمك  الحقيقي  الي مفروض عليك تعيشه

تقصدني اني اكيد ( بالواقع المفروض )
: ممكن  تنتبهين  شويه  عليه

بنفس وضعها ردت

: وياك حبيبي

تنفست بحرگه. وذبيت الخاشوگه ( الملعقه ) على الميز
وحجيت وياها

: ايه اعرف انتي صبرتي هوايه وتحملتي   واعرف  انجرحتي مني  لكن  التجاهل  الي دتصطنعيه  ديأذيني

ا: غلطان حبيبي ماكو تجاهل اني عايفتك على راحتك. بلا ضغط  وبجي  وعركات. وانت لاتشيل هم. وتحس بالذنب بعدين  تاذي  نفسك
اشش هذي الاغنيه للمسلسل  تجنن

من نطقت الجمله الاخيره خلتتي على وشك افرغ الصحن السلطه الي امامي براسها
وتمالكت  اعصابي اكتفيت بترك الكرسي  ورمي الشوكه على الميز
دخلت ل اقرب غرفه بيها سرير ورميت نفسي بيه

ايه
يحدثني عن الصبر  والتجاهل الي  ماذيه
بعدك ماشفت شي  تتصور  سهله  عليه .. اسمع كلمة عجوز 
اتذوق الي سگيتني من ...الم ..وحسره
دخل  نام  لحد الثمانيه بالليل
گعد متعصب ويصيح

: ليش متگعديني  وممتفقين  نطلع نشتري هدايا

: لاتعصب حبيبي  طلبت من امازون  كم حاجه بكرا يوصلون
والناقص باجر  اكمله او من العراق  ارتاح  انت 

طلال

گعدت گبالها مااعرف شنو هالبرود  الي هيه  بيه والموبايل ميفارگ ايدها

: جوعان. نطلع ناكل

: اني مسويه عشى

: لا نطلع افضل

: دقايق اكون جاهزه

گامت والتلفون امامها اتابع مسلسل كوري
دخلت فقط خلت جاكيت خفيف 
على نفس ملابسها. وحجاب
وبايد لازمه التلفون وبالايد الثانيه  تحاول تلبس الحذاء وهيه مدنكه
سحبتها من ايدها 

: دتعاي واتركي التلفون
بالجنطه

: ايدي على كيفك  شبيك

؛ تعالي انتي سوقي اني عيوني مااعرف شبيها

: اوكي  وين تحب نروح

: انتي اعرف بديربون

: نطلع من ديربون  شويه
في مطعم عشتار. فد شي خيالي
وفيه الرجال الي يقدم الشاي
يرتدي  زي بغدادي انيق
وفي اغاني. ..ومطربين  اجواء ترجعك للعراق

: يله  نروح

: اشو بديت تتثاوب شنو القصه
: مااعرف ليش النوم مسيطر عليه.

: يمكن بعدك تعبان من المباراه

؛ يمكن وانتي مااعرف شبيج. احس  مبتعده  عني  ومدمن على  التلفون  ومسلسلات وافلام

: مجرد  املي وقت  فراغي  وابعد نفسي عن التفكير. بحياتي

: تقصدين حياتج ويايه

:  ونوارس  ..وماما المهمومه
وصية  روان  الي مد الگاها

وهيه تحجي حسيت عيوني غمضوا من النعاس وماعدت اسمع صوتها

لحد وعيت على صوتها يوعيني

: طلال وصلنا  
اذا تعبان نرجع للبيت

: لا شنو نرجع  تعالي ننزل

ايه
استمر  دور  التجاهل  مني
واجهني  بادعاء  النعاس  والنوم ساعات
مع ذلك مافقدت صبري
رجعنا متاخرين من المطعم الي طول مااحنا گاعدين هو يتثاوب
وياكل بشراهه قبل مكان هالشكل

بالبيت  اول موصلنا بديت
احضر  كم شغله لثاني يوم
وغيرت ملابسي
واستعديت انام  بغرفتي

وهو بالصاله  صاحني

:  ايه شنو راح تنامين

:بلي تعرف عندي دوام الصبح

باوعني  بنظره افتقدها من ايام حبنا القديم  وهو يگلي

:  كل الغرف  بهذا البيت بيها سرير واحد  وصغير
لازم نشتري سرير واسع النا اثنينا

: اذا  خايف  اهلي يسالون فلتخاف  فهمتهم  اني وياك بالبيسمنت انام

ترك  مكانه واجى يمي ..، وبنفس النظره الي خلتني احس بمعنى حياتي ...
اقترب  وبصوت هامس

: وليش تجذبين  تعالي
نخلي قنفتين  سوا بالبيسمنت وانام

مااگدرت ارد .. كمل

: اني  نازل  قبلج  احرك  القنفات
لاتتاخرين

باوعني يضحك ونزل 
خطف گلبي...  وحسيته مو بس يدگ انما..  يدگ ويرگص ويحتفل
دخلت لغرفه اغير البيجاما
وبعدين ترددت  ..
فتحت شعري ومشطته. خليت مكياج
دز رساله ( وينج )
رديت  ( خايفه اجي )
: ( اذا  تخافين  مني لعد بيمن تأمنين )
( جايه حبيبي )

قفلت التلفون. طلعت من الخزانه  شراشف   نظيفه    ..وبطانيه  وحده..  وسادتين
ونظرت اخر مره لنفسي
واني ادعي ( يارب اعجبه )
بقت  فقط  انزل الدرج.
نزلت كل درجه باحساس شكل

وصلت  امامه  ..وگفت  مااعرف شاسوي ..
: تعالي حبيبتي 

(تعالي  وحبيبتي شنو هالهنا الي فجا  حط بالبيسمنت )

طلع صوتي اخيرا

: خليني افرش الشراشف لان القنفات جلد بارده تصير بالليل

: خليني اساعدج

:اوكي

اخذ هو  طرف  ..واني طرف
انتبهت اصابعي ترجف..  وهو انتبه
ترك الشرشف  .،واخذ ايدي
وضمني لصدره
ورجع راسه على الوساده ..

: لاتخافين 
مجرد محاوله .  اذا  متحبين  گولي

رديت عليه  واني مخبيه راسي بين ايده وصدره

: طلال  لاتتلاعب بمشاعري
الله يخليك
ترى اني  بديت  اتقبل الوضع مثل ماهوه 

: واني بديت مااتحمل الوضع هذا 
ايوته متدرين شگد احبج
والله جمعني بيج لان يدري احبج
حبيتج انتي..، وبعدين حبيت باب بيتكم.. واني رايح جاي عليه بسيارتي
وراها حبيت كم ورده طالعه من سياج حديقتكم ..
حبيت الطسه الي بشارعكم
وحبيت والدج والدتج واخواتج
حتى المحل الي براس شارعكم حبيته

ضحكت على سوالفه
ورديت
:  اني هم احبك    اصلا اموت عليك

طلال
ايوته باحضاني.. وكلي رغبه وحب ..وهيام.. الها
والنعاس.   وصور السجن الي جددت بشوفة جيرالد ..حالت بيني وبينها
ابوسها واتثاوب.
وهيه اعتراها شوية خجل لمن حست ليلتنا راح تتطور
سدت الاضويه صارت ظلمه جفوني بعد مااگدر  افتحهم 

: ايه حبيبتي  كلش نعست
خليج بحضني ونامي

: شگد. تحب تتدلل  وتتشاقى

اتصورت داتشاقى
لكن لمن حست اديه تتركها
افتهمت مد اتشاقى

: طلال دتشاقى  مو

ماارديت
من  حركتها السريعه وهيه تسحب نفسها
وتلبس تشيرتها
عرفت غضبت عليه واحتمال للابد
وسمعت خطواتها تركض على الدرج

لعنت الساعه الي رحت بيها للدكتور..  وانطاني الدوى 
شگد نسبة الكحول بيه الله يدري
الصبح اروح عليه يغير الدوى

ايه

لو ميته ارحم
شنو من رجال هذا
كله رغبة اليه ويگلي نعست
ليش مصر يذلني

تقاتلت مع النوم. والقهر
الوساده غيرتها تلث مرات
احسها مثل الصخر
لازم  انام.. عندي دوام..
  مااگدر انام  اذا ماافرغ الي بگلبي ...
شنو الفايده اذا هسه نايم
فتحت الضوى  ... ادور موبايلي
واسهر عليه
شفت ماخذه تلفونه بدل تلفوني
نهضت من الفراش  حتى  انزل ارجعه واخذ تلفوني

وشي دفعني افتح التلفون يمكن اعرف سبب  تصرفاته ويايه
مابحثت بالفيس ولا بالانستا
هذولي اعرفهم واعرف الي بيهم

رحت على الاتصالات ادور
الارقام
ارقام عاديه اكثرها اعرفها
ماعدا رقم واحد متصل بيه
خمس مرات بساعه وحده
دگيت على الرقم
جاوبت بنت. وهيه تعلن اسم المكتب ماادري بيت  (   خدمة للحب ) تفضل عزيزي  شنو طلبك )
صوتها مريب! والاسم مريب !
سالتها

: ممكن اسال عن نوع خدمتكم ؟شفت الرقم ومااعرف شنو انتوا

: ضحكت : ممكن نلبي طلبك عزيزتي ... في بنات وفي شباب
عنوانك لو سمحتي

: جديات  كلامك هذا دار  خدمات 
كملت هيه

: نعم عزيزتي تفضلي نوع طلبك

: ماعندي طلب شكرا  غلطت بالرقم اسفه

دارت الدنيا بيه .. التلفون بقى على اذاني
مامصدگه طلال يتصل وياجر بنات
ليش ؟ والقصه الي اخترعها ومرضه شنو كذب ؟
واكيد  من گال صرت عجوز ومااثيره كان يعنيها
لزمت اعصابي
وبحثت بالتلفون عن شي اقوى
بالرسائل بالصور
اي شي يثير الشك
مافي غير هذا الرقم
انتهى صبري.. وانمحى  عقلي
فتحت باب الغرفه.. ونزلت على البيسمنت .. دكات گلبي صارت تدگ براسي  ...فتحت الضوى
مااصحى 

:طلال  اگعد  داحجي وياك

فتح عينه  وهو متمدد

: شصاير ايه شبيج 
ليش تبجين. بس لا امج ماتت

: لا. اني المتت  ... ليش هيج طلال
النعاس ماخذه وميگدر  يركز

: اكعد لاتنام  اسمعني لان اذا ابقى للصبح اموت
ماذيتك بشي اني. قاهرتك.. بينا ثار
ليش تريد تذلني..   هذا الرقم شنو

: ايه على كيفج نعسان باجر كل الي تريديه يصير

: الي اريده يعني انت دورك تضحيه.  داسالك عن هذا الرقم
تأجر  بنات   وحضرتك متونس
واني  مخلصها  عليه  مأسي
وساعديني .. واني مريض
لك عمري ضاع اتمناك واتمنى طفل منك ...
تلفوني اهلك ثابريني بادعيه
وختمات للحمل

تلث سنوات راح تصير. تاركني اتحسر  كل مااشوف طفل

وك ماعندي حجي يكفي
صرخت
ماعندي ... والله لو عندي سلاح هسه اقتلك
مجرم ... حرامي بگت عمري
وشبابي
اسمعني طلال من هاي اللحظه
لاتتقرب مني ولاتحجي ويايه ابد
اني مستغنيه عنك ومااريدك وبزعت روحي
عندي اسهر على مسلسل  افضل من اسهر وياك

ماادري سمعني او لا ...نايم  مثل الي مفارك النوم صار سنين

اعصابي تجاوزت مرحلة الاحتراق.. عطبت  بالكامل
رجعت  انام  وبداخلي بجي يكفيني دهر ...
بجيت  لحد نمت 

طلال

كعدت الصبح  مفزوع
احاول اتذكر. الي گالته ايه شنو
اخاف حلم
صعدت الدرج ركض فتحت غرفتها بعدها نايمه
اجيت وياها بالسرير فزت راسا وگامت

: اطلع برى گتلك البارحه مااريدك ومستغنيه عنك 

: افتهمي اول ايه

مااريد افتهم انت افتهم داكلك مااريدك 
اطلع عني خبلتني دست كرامتي
عقل مابقى عندي شخصيتي  تمزقت.

: ايه والله العظيم مريض وداخذ ادويه وهيه الي تخليني انام بلا ماادري بنفسي

:بعدك تكذب .. مريض .. وادويه
وهذي الارقام يمهن تصحى

انتبهت على الي تگوله
شفت الارقام والمكالمه يعني متصله ومفتهمه الارقام شتعني

اخذت التلفون  واني مدنگ
وكعدت يمها
وگتلها ( اگعدي داحجيلج  )

اضغطوا النجمه   حتى نكمل