باليـوَّم يوميَن أفگِدك وأنـهّ الأحـٰس متغَير ..
حنيتلِك بس الصـوَّر كُِلش حضّنها صغَير !
غزل الحجامية
..
ريحانه كعدت بمكاني ماكدر اتحرك خفت كلت يمه شصاير خفت ع ابوي وهيه تبجي
شذى الو ريحانه وياي
ريحانه احجي شذى شصاير شكوو ابوي بي شي
شذى لا مابي شي
ريحانه ليش تبجين لعد هبطتيني احجي شصاير
شذى شصاير شصاير حضج المصخم ابجي عليج شناقصج هذا وياخذ عليج هذا هم حضنه
خليت التليفون بحضني وبقيت صافنه عود صدك هبطتني وكعدتني بالمطبخ خايفه وبالاخير هيج دكلي
ريحانه اكلج شذى الله عليج مضروبه براسج وانتي صغيره
شذى لا واني جبيرة والنبي من البارحه ابجي عليج وابوج اليوم كال خابروها بالي يمها يمكن حلمان بمج الله يرحمها بس ميريد يحجي
ريحانه الله يرحمها لا اني تمام مبيه شي
شذى عود صدك تحجين انتي ابد ممقهورة
ريحانه لا والله ابد مقهورة ع نفسي ضيعت نفسي بس ان شاء الله اخلص
شذى امين زين هسه انتي شجاي تسوين
ريحانه مجاي اسوي شي كاعده يمهم
شذى يعني جابو الزفه
ريحانه اي قبل شويه وجنت نايمه وقبل شويه طلعت يمهم
شذى زين منير وين
ريحانه مادري بس العروس واهلها هنا
شذى طبعا جاي يقهرن بيج
ريحانه على شنو وداعتج اني الي اقهرهم
شذى نجبي نجبي تقهرينهم هو انتي شايفه روحج شكد باردة اهمداج
ريحانه اوك باردة يعني شتريديني اسوي المهم امج اشلونها
شذى زينه الحمدالله اكلج العروس حلوة طالعه
ريحانه اي زينه نفس شكلها بس مكثرين مكياج خطيه انوب اسود وبنفسجي صايرة جبيرة عبالك
شذى اي زين منير عجبته
ريحانه يعني شنو عجبته غير مرته
شذى يمعودة قردة والنبي جنها سناء المخبله الي جانت ويانه بالمدرسه
واني احجي وي شذى دخل منير من باب الشارع شافني بالمطبخ واحجي بالمبايل واضحك ع سوالفها طب شافني رفع حاجبه
ريحانه شذى اروح هسه بعدين اخابرج
شذى ميخالف بس ديري بالج على نفسج
ريحانه ماشي حبي يله باي
سديته التليفون هو طب عليه بالمطبخ باوعت من الشباك كلهم يباوعون علينه
منير شجاي تسوين
ريحانه شنو
منير ردي ع السوال
ريحانه شسوي يعني واكفه
منير ويامن تضحكين لعد مو جنتي مريضه
ريحانه يعني اذا مريضه مالازم اضحك
منير نطيني التليفون
ريحانه شبيك منير تخبلت
منير كتلج نطيني التليفون
مد ايده اليه حتى ياخذ التليفون باوعت الهم كلهن يباوعن علينه ومريم مبستمه وزهرة واطياف يخزرن وهنه اصلا ممفتهمات السالفه
نطيته التليفون فتحه شاف شذى باوعلي وخله التليفون بيدي وطلع يمهن ابتسم
وكلهن هلهلن ويباركن اله
خليت التليفون بالكاونتر وطلعت يمهم هو كاعد يمها
ومريم واكفه يمه باوعتلي وابتسمت
مريم شنو خويه لحد هسه تغار ع ريحانه
منير شنو مافهمتج
مريم يعني لحد هسه تفتش بتليفونها وتغار عليها وتتعصب وماتشوف احد كدامك ياريت رجلي يرجع هيج صاير ميغار عليه
اطياف يمعودة يا يغار شبيج انتي منير يغار ع ريحانه مستحيل
مريم لعد الي شفتي قبل شويه شنو
اطياف تصرف عادي يريد يشوفها وي منو تحجي
مريم حقج اطياف ممجرب سعد يغار عليج فامتعرفين هل سوالف شتكولين عمه
عمتها اي والله حقه يغار عليها كمر الله يحفضها
باوعت مريم اليه ورجعت باوعت لاطياف نضرة هزيمه ابتسمت اني الهن الحمدالله مخابيل ذني
انوب يذبني بنصهن سترك ربي
باوعت لزهرة تباوع لمنير وتباوعلي لانو منير يباوعلي
شغلو اغاني وكامن يركصن وهوسه
وكفت يم غرفه الحجيه اني ومبتسمه واباوع عليهم
اطياف فرحانه وتركص وتباوعلي بقيت واكفه بمكاني متحركت وعماته وبنات عمه يركصن وخوات زهرة هماتين يركصن
بس مريم لازمه ابنها واكفه تباوع مثلي باوعتلي واحتي ذبت ابنها يم عمتها واجتي يمي جرتني
ريحانه وين وين
مريم نركص يعني وين يله يله
ريحانه يمعودة ياركص اني جاي انزف مالت ركص
مريم يمعودة لاتصيرين مدري اشلونج قابل لازك لعلج دركصي اركصي
جرتني وكفتني يمها وتركص ع الخفيف بس تتحرك واني همين
اطياف اول مره اشوف مرة تركص بعرس رجلها
مريم ان شاء الله تجربينها حبي هسه عوفينه نركص
اطياف مريم عرس اخوي ماريد اسويلي مشكله
مريم وسعد هنا هم ماريد اسوي مشكله اني ترة
بقت تباوعلها اطياف وسكتت
ريحانه شنو شبي سعد
مريم يمعودة يولون اثنينهم واحد اخبل من الثاني
ريحانه ليش شصاير
مريم اطياف دكله انته حاط عينك ع وحده واني اعرفها هيه هيج حجت وسعد كام عليها موتها يكللها تريدين تذبين براسي كل يوميه مصيبه وكتلها
ريحانه يا وهيه ليش هيج تحجي
مريم دكول شاكه بي يحجي وي غيري
ريحانه يا
مريم يمعودة هيه هاي خبله تدري طول الوقت هو يحجي وي غيرها بس بالمزاجيات يله تتعارك ويا
ريحانه تغار عليه
مريم ههههههه منو تغار اطياف لا حبي اطياف ماتحبه اصلا بس تحب نفسها دكلج وين اروح وهيه بهل حقارة وي اخوها وامها وعبالها احنه ماندري
ريحانه يا يعني انتو تدرون بيها تاخذ فلوس من منير حتى تكعد يم امه
مريم من زمان بس مغلسين هيه ماعدها احساس
ريحانه يمعودة ماعليه بيهم اني نارهم تاكل حطبهم
مريم معقوله يعني ابد متضوجين لانو هو مزوج عليج
ريحانه اني ماعندي احساس انو راح ابقه وي منير ماعرف ليش عندي احساس انو ح انفصل عنه
مريم الله لا يكولوها يمعودة تطلكين يعني قصدج
ريحانه اي وليش الله لا يكولها
مريم يمعودة انتي تدرين المطلكه شنو سمعتها بمجتمعنه
ريحانه اكلج المجتمع الي يحجي اتحدا اذا ماجان عنده وحده من العائله مالته مطلقه لازم لو عمته لو خالته لو اخته لو امه ماكو عائله حاليا مابيها بنيه مطلقه
مريم حتى لو بس السمعه تبقه
ريحانه يكوون ممرتاحه واطلكت احسن مايكولون معذبه رجلها لو جاي تخون بي واني ماستبعد هذا الحجي من اطياف واخوها
مريم حقج انوب هسه هاي راح تصير وياج بنفس البيت يمه تشردين
ريحانه يمعودة ع شنو اشرد بيتي قبل لا يكون بيتها لا احتك بيها ولا اتقرب منها اصلا
مريم هاي انتي زين وهيه تتوقعين تبقه ساكته
ريحانه مالي دخل بيها يطبها طوب اني كاعده يم خالتي
مريم صدك خالتي اشلون صارت
ريحانه مثل ماهيه والله
مريم خير ان شاء الله
اطياف شنو رئيكم نزف العرسان
عمتهم براحتهم احسنلهم هسه
صدك زفيناهم زهرة تباوعلي بطرف عينه اني اصفك وساكته منير باوعلي وصعد نضرته مالت شماته مغثه معرفت اوصفها بوقتها سكتت وطبيت يم الحجيه بعدها نايمه
اول مطبيت كعدت ع صوت الباب
ريحانه عمت عيني كعدتج
الحجيه لا يمه سالمه عينج شنو زفوهم
ريحانه اي قبل شويه زفوهم اسويلج عشه جوعانه
الحجيه هو يمه بالعرس ممسوين عشه شنو
ريحانه مسوين بس انتي متاكلين منه موزين عليج اني اسويلج عشه
الحجيه براحتج يمه بس مو هسه فد شويه هسه ماشتهي
ريحانه براحتج بقيت الباب مفتوح حتى اذا يريدن يدخلن يسلمن عليج يجن
الحجيه اي يمه زين سويتي
صدك شويه ودخلن عماته لمنير ومريم سلمن ع الحجيه
بس مبقن هواي شويه وراحن اول مطلعن اني كمت للبيت غيرت ملابسي و رجعت الكراسي للحديقه ورتبت البيت الغراض الاماعين مالت الاكل شالوهن همه طلعوهن بره
اني مسحت البيت وعرس وهوسه البيت صايرة عبارة عن وصخ ذبيت مي بسرعه وجريته نضفته ونضفت المطبخ يمه كل هذا الوصخ والطبخ مو بالبيت لعد لو طابخين بالبيت شيصير
طلعت اكل اسوي لخالتي واليه فتحت الثلاجه داشرب مي
وطبت زهرة لابسه سيت نوم ابيض مفتوح من كل مكان وبدون ملابس داخليه بحيث جسمها كله مبين
بقيت صافنه عليها هاي شبيها كبر
زهرة يا اسفه بس ردت اسبح ونسيت الحمام وين
ريحانه لا عيني ع شنو حقج الحمام ع اليمنه
زهرة اي شكرا اريد اسبح تدرين عروس ومنير ستعجل واني اريد اصلي كلت خلي اسبح اذا نطاني مجال اصلي اذا لا الله يعذر
ريحانه عفتها تحجي لانو اعرف شنو غايتها من الحجي ونطيتها ضهري عاد هيه عافتني وراحت للحمام
شويه وطب وراها منير لازم الخاولي بيدة ينشف بشعره
منير وين زهرة
ريحانه بالحمام تسبح
منير اها شجاي تسوين
ريحانه عشه لخالتي
منير انتي تعشيتي
ريحانه لا هسه اتعشه وياها
احجي ويا واسوي بالاكل وهو ورايه منطيته ضهري شويه وحسيته تقرب عليه كلش خله راسه على ركبتي
منير اممم مابديتي تغارين
ريحانه من شنو
منير من زهرة
ريحانه ياستار شكو حتى اغار شعدها اني ماعندي
منير اني
ريحانه شبيك
منير اني عدها وانتي ماعندج
ريحانه ومنو كلك انته شي الواحد يغار عليك
منير يعني مغرتي ابد هسه
ريحانه منير ترة مو بحالك اني تعبانه واريد اكل دخت ابتعد
زهرة منير
اول ماحجيت هيج زهرة طبت لابسه روب ولافه شعرها بالمنشفه
منير من سمع صوتها ابتعد مني بس بقه واكف يمي
زهرة شجاي تسوي
منير احجي وي ريحانه
زهرة بشنو
منير ميخصج زهرة اصعدي فوك
زهرة اني العروس ترة مو هيه مو كافي اني سكتت ع حجيها وياي هسه حتى ماخرب يوم عرسي
ريحانه ياستار استر ياحجي
زهرة اي سوي نفسج الملاك البريئ اسمع نزلت كتلها وين الحمام نسيته
دكلي مو خدامه عندج اني هذا بيتي وانتي اجيتي عله بي تريدين شي روحي بنفسج وشوفي انوب شافتني لابس ملابس النوم دكلي
همزين لبستيهن قبل لا تموتين متي عليهن انتي عروس اول يوم عرسها هيج تستقبلها
ريحانه هيه تحجي واني صافنه هاي صدك تحجي شوكت يفكرن بهيج جذب ويجذبن عزة العزاهن
ريحانه بربج اني هيج حجيت
زهرة بعد ناقص جذبيني عيني عينك
ريحانه لا ع شنو اجذبج قابل ماعرف طينتكم شي اخس من شي
اول ماحجيت اجاني راشدي نضربت ع الكاونتر
باوعت لمنير لزمني من شعري
منير شنو شي اخس من شي اشو انتي ماتحترمين
ريحانه اني الي ماحترم صح اني ماحترم ابتعد اخذت العشه وطلعت زهرة بالباب شافتني باوعتلي بطرف عينها نضرة انتصار وشماته اني غلست ورحت يم خالتي
مر الوقت عادي بقيت اني وخالتي تعشينه وسولفنه وبقت تسولف ع ايام زمان يبو شكد سولفت بوقتها اسمعها واطفي اريد
انام وهيه مو ماتشوف عبالها اني مستمتعه صح اني جنت مستمتعه بس نعست هههههه
عاد شويه ونمت بدون مادري وماحسيت ع نفسي
للصبح كعدت ع صوت ضحك كلش قوي
مالت زهرة ومنير
حتى خالتي كعدت
خالتي يمه ريحانه كاعده
ريحانه اي خاله هسه كعدت
خالتي يمه الباب مفتوح شنو
ريحانه لا خاله مسدود
كمت رتبت شعري وكمت باوعت للساعه 10 ونص كلت خلي اكوم احسلي لزمت القراصه وطلعت من الغرفه الف بشعري
رحت غسلت واخذت المنشفه انشف وجهي وطبيت للمطبخ شفت زهرة ومنير واكفين يم الثلاجه ويتباوسون اني غلست درت وجهي بسرعه بس منير شافني ابتعد وصاحني
منير ريحانه
رجعت واني انشف وجهي وريلاكس ولا كانو شفت شي واني اصلا خجلت متت من الخجل
منير تعاي يمعودة شردتي تاخذين
ريحانه لا مردت شي بس ردت اسوي ريوك بس كلت بعد وقت
زهرة يامسعدة يابعد وقت ساعه راح تصير 11 وانتي لحد هسه نايمه شكوو
ريحانه اذكر بيوم عرسي كعدت من الصبح ونضفت وكذا انتي هسه مو كاعده من الصبح شبي السينك كله ماعين
زهرة عروس حبي ماسوي شي
ريحانه اني هماتين جنت عروس حبي ونضفت باول يوم
زهرة هاي انتي مو اني
ريحانه ليش ع ايدج نقش الحنه لو متعرفين تغسلين يله حبي اغسليهن بسرعه ع ماجيب خالتي تريد تتريك اليوم بالمطبخ وماتحب تسمع المطبخ هوسه
وعفتهم وطلعت زهرة بقت فاكه حلكها عبالها راح اخليها تتحكم بيه لو تخليني اشتغل عدها صح ساكته اني بس مو بكلشي
ورحت يم خالتي حسيتها حست بيه ضايجه بقت تحجي وياي كتلها امشي للمطبخ ناكل وماعترضت كالت يله يمه
كومتها ع كرسيها وطلعتها بالمطبخ شفت منير كاعد يشرب جاي وزهرة تغسل بالاماعين
منير ها يمه
الحجيه هل يمه صباحيه مباركه
زهرة اشلونج خاله
الحجيه هل يمه
ريحانه زهرة كملي بسرعه حتى اكمل ريوك خالتي جوعانه ترة
زهرة مابقه بس ذني كم ماعون
ريحانه اي هواي الله يساعدج من البارحه لليوم الاماعين ع السينك حتى الاكل بقه عليهن
الحجيه يا يمه وين اكو مره تعوف اماعينها من اليل للصبح
ريحانه عروس جديده خطيه ماحكت
زهرة اي والله منير منطاني مجال انتو نمتو من وقت اني ومنير للصبح يله نمنه
ريحانه الله يساعدج حبي
بقت تباوعلي من جوة لجوة ومنير مدري شعجب ساكت عاد وخرت اني كمت سويت الريوك وهيه واكفه تباوعلي كملت الريوك مالتي ومالت خالتي خليته ع الميز
ريحانه خاله نطلع بالحديقه
الحجيه يله يمه بكيفج
باوعتلي زهرة ورفعت حاجبها
اخذت خالتي وطلعنه خليتها بالحديقه ورجعت اخذت الريوك لكيت زهرة ومنير يحجون بس مبين يتعاركون اني مهتميت اخذت الاكل وطلعت
كعدت يم خالتي شفت من شباك مالت المطبخ زهرة ترفع بيدها وتحجي يعني عصبيه ومنير هماتين مهتميت شويه وزهرة صعدت فوك
ومنير شويه ولحكها
كملنه ريوك ونضفت البيت وسويت الغده واسولف وي خالتي مشطت شعرها
للعصر واجتي زهرة يمنه هستوني نزلت الطاسه مالت خالتي الي تخرج بطنها بيها
زهرة باوعت ومعاجبها
كعدت تسولف وي خالتي واني كاعده عاديه
زهرة اكلج خاله انتي ليش تسوين بالطاسه ليش متلبسين حفاضه مو احسن الج واكو مالت كبار الج
ريحانه لا ليش تلبس اني موجودة واني اخدمها متحتاج الحفاضات
زهرة اي عادي اني همين موجودة واخدمها بعيني بس هيه سالفه نضافه يعني افضل الها هيج قذارة
الحجيه خلفله عليج يمه يعني هسه اني صرت قذرة
زهرة لا خاله مقصدي اني هيج شي
الحجيه قصدج يمه مقصدج انتي حجيتيها
ريحانه زهرة لا تدخلين بخالتي اني الي كايمه بيها تسويها بالطاسه بحفاضه شي راجع الها لا تدخلين بهيج سوالف
زهرة اي عيني صدك مالي دخل هيه السالفه اذا تبقه وراج نخيس
ريحانه شنو شنو اكلج عيني ترة انتي هذا اول يوم الج هنا لا تشيخين فهمتي
اماعينج من البارحه لليوم محد حجه وشي يخصج ميخصنه معليج بسوالفنه
شي يخصني نخيس منخيس البيت بيتها لخالتي وهيه تقرر شتريد
منير زهرة
طب منير واحنه نحجي وشكله سامع كلشي بقه يخزر بزهرة بس زهرة ولا جنها عاديه
زهرة ها حبيبي كعدت
بقه ساكت ويباوع خالتي غلست واني همين نمت ع رجل خالتي وبقت تلعب بشعري وتقرة قران
عاد منير كعد يم زهرة شكله متعصب وهيه ولا جنها عاديه يعني مبين السالفه سوت نفسها محاجيه شي
بقينه كاعدين ومنير يسولف وي خالتي وزهرة تباوع يمنه ويسرة
زهرة اكلج ريحانه وين تخلين غراضج هسه انتي
ريحانه هنا اشرتلها ع المكان
زهرة يا اشو صغيرة اشلون كفن شنو ماعندج ملابس انتي
ريحانه لا حبي نص ملابسي عفتهن الج عروس جديده كلت خطيه اشياء ماحتاجهن عفتهن الج شنو مشفتيهن
بقت تباوعلي بعدين باوعت لمنير منير مهتم يعني شي عادي غلس عاد هيه كامت بعصبيه وطلعت من الغرفه
صح حسيت نفسي جلبه بوقتها اشلون هيج احجي وياها خطيه بس بعدين كلت لا والله يطبها سم عبالها هيه الي راح تسيطر عليه لا والله
لو شيصير اني وحدي وهيه وحدها محد تدخل بالثانيه
مر اليوم عادي منير قرر ثاني يوم يروح للشغل واسمع صوتهم باليل يتعاركون اشلزن منير يروح للشغل وهيه بعدها عروس
اتذكرت يوم عرسي ثاني يوم كعدت منير ماكو الحمدالله والشكر
لفيت راسي ونمت وصدك ثاني يوم منير راح للشغل كمت الصبح اني سبحت خالتي وكعدتها بالغرفه سويت الريوك
ريكتها لاحضت خالتي تسولف هواي اليوم يعني اذكرت سوالف يبوو قديمه كلش واني وياها خليتها
على الكرسي وين اروح اخذها وياي وتسولف هيه واني اندمج وياها
نضفت البيت وغسلت الملابس ونضفت المطبخ قبل لا يجي منير بنص ساعه نزلت زهرة
هستوني اني طفيت الغده
زهرة صباح الخير خاله
الحجيه هله يمه صح النوم
زهرة اممم والله خاله منير للصبح يله خلاني انام ميكعد ابد
الحجيه الله يسعدكم يمه
طبت سبحت وصعدت بدلت بسرعه ومكيجت ونزلت كعدت يمنه اني وخالتي نسولف وهيه تباوع علينه وتباوع ع التلفزيون معاجبها
طب منير تلكته هيه كبل حضنته وباسته
منير ها يمه اشلونج
الحجيه هله يمه الله يساعدك
منير ويساعدج
زهرة الله يساعدك حبيبي
تحجي ويا وهيه حاضنته بيدها وهو يباوعلها
منير البارحه مو نمتي مطنكرة من وقت شغيرج اليوم
زهرة هاا لا حبيبي بس الزعل مو حلو بينه وزعل الحبايب ميطول
منير الله يهديج
زهرة هاي شبيك حبيبي قابل مخبله اني
منير لا عمي حشاج
حضري الحمام
زهرة تدلل
راحت حضرت الحمام اله وهو كعد يمنه اني والحجيه سكتنه بقت الحجيه تسبح واني صافنه
منير شمسوين غده
ريحانه مركه قيمه وتمن
منير اي ترة ميت من الجوع
زهرة طب اسبح حبيبي وتطلع تلكي الغده جاهز
منير ان شاء الله
كام منير وهيه هم راحت
اصبله غده
ريحانه خاله تتغدين
الحجيه لا يمه مو هسه فد شويه
ريحانه براحتج
شويه وطب منير ينشف بشعرة وكعد
طبت ورا زهرة وبيدها الصينيه
منير يمه تتغدين
الحجيه لا يمه الف عافيه ماتغده هسه فد شويه
منير اممم ريحه القيمه تشهي منو طابخها
الحجيه المعدله ريحانه
منير عاشت ايدج
ريحانه باوعت لزهرة عوجت حاجبها وابتسمت اني غلست
اشو منير هستوه اكل وصاح
منير خرب عشيرتج شنو هاي
وذب الاكل من حلكه
الحجيه خير يمه شكوو شصار
منير المركه متروسه لامندوزي
الحجيه يا يمه ع بختك اشلون هيج
ريحانه لا مبيها اني ضكتهت قبل لا اطفيها مبيها شي
زهرة شو خلي اضوكها
ويععع هاي شنو يالمعدله صدك اشو طعمها كلها لامندوزي شبيج متميزين الامندوزي من الملح
ريحانه يله عادي يجوز بالغلط اذا اني كعدت من الصبح تنضيف وطبخ وغسل ملابس بعد الطبخ عليج زهرة شتكولين خالتي
الحجيه اي يمه تتعاونن بيناتجن الاكل على زهرة والتنضيف عليج
منير هسه انتن قسمتن الشغل شاتغده
ريحانه اكو دجاج ولحم كومي زهرة سوي غده سريع وبس مركه اطبخي التمن مبي شي مو
بقت تباوع زهرة على منير منير رفع حاجبه الها يعني كومي
اخذت الصينيه وكامت
عرفت هاي السالفه منها هيه الي مسويتها عبالها راح اسكت كبر يكبرها سوالف
جهال منير بقه كاعد ساعه كامله وبعدها زهرة بالمطبخ عاد اجتي مسويه مركه دجاج حمرة ومنير ميحبها حمرة بقه يباوعلها وكام
زهرة هاي شنو حبيبي وين رايح
منير اكلي لفتين هواي احسن اليه 2 نسوان ومابيجن خير شكد تصيرن بعد
الحجيه يمه ريحانه شكو شصار
ريحانه خاله مسويه مركه حمرة مالت دجاج
الحجيه يا يمه زهرة شبيج ماتدرين بي يكرها الحمرة
زهرة شدراني اشم ايدي
وعافتنه وطلعت حتى الصينيه مشالتها حريت الصينيه وتغدينه اني وخالتي بيها
نص ساعه ورجع منير صدك جايب لفات وببسي تغده وصعد
للعصر نزلو اني بالمطبخ اسوي كيكه وخالتي نايمه
زهرة زين شلبس اذا نروح
منير زهرة عدتي هل سوال 100 مرة كتلج بكيفج
زهرة اوك اني اشوف شي حلو
منير امي نايمه
ريحانه اي نامت كالت كملي وكعديني
منير شجاي تسوين
ريحانه كيكه
زهرة هيه مالت كيكه دزي من برة حتى رخيصه ارخص من مالت البيت
ريحانه احب اسويها بالبيت واكو باذنجان بالثلاجه طعي وسوي محشي للعشه
زهرة اليوم اني ومنير مو هنا فماسوي عشه
ريحانه عادي حبي حتى اذا مو هنا قابل خالتي اذا مو هنا انتو متتعشه
زهرة سوي انتي اي شي سريع
منير لا تسوين هو كلنه نروح سوة
زهرة شنوو
منير اي هيه زيارة امي تروح ويانه وقابل نعوف ريحانه وحدها هم ناخذها
زهرة ليش يعني يروحون ويانه اني وانته العرسان خلي نروح وحدنه
اباوعلهم بالجام مالت الكاونتر منير خزرها هيه باوعتله وعاديه وعافته وصعدت
منير حضري نفسج ساعه 8 نروح
ريحانه لا اني ماروح اخذت الحجيه وروحو
منير كتلج حضري نفسج نروح سوة
وعافني وطلع
كملت الكيكه اني وماهتميت ورحت لخالتي اول مطبيت كعدت
ريحانه صح النوم ياحلو
الحجيه الله يصحح طريقج يمه
ريحانه ساعه هسه 6 ونص صلي وكملي حتى ابدلج لانو منير راح ياخذنه للزيارة
الحجيه يازيارة يمه
ريحانه والله مادري بس اكيد للامام الكاظم
الحجيه سلام الله عليه بس يمه بيه حيل الطريق اني
ريحانه لا حجيه شبيج بالكرسي والسيارة حتى متحسين
الحجيه ان شاء الله
جبت الكيكه وسويت وياها عصير واكلت اني وخالتي طب منير
منير شوف الخيانه ماذكرتني
الحجيه تعال يمه تفوتك كيكه ريحانه
كمت جبتله عصير وماعون خليتله كيك اكل ويسولف وي خالتي باوعت للساعه 7 كملنه الكيك كمت شلت الاماعين نضفت المطبخ
وحضرت شيلت خالتي وعبايتها وطلعت فساتني اسود وبي ورد ابيض
من جوة وصاعد لنص الخصر وشال هماتين مزهر من الصفح
اخذته وطبيت اسبح بدلت وطلعت رتبت وجهي ادري بيهم
بالامام الكاضم يمسحون المكياج فخليت خفيف بس لعيوني كحل ومسكارة وملمع شفايف
من طبيت سبحت منير صاعد فوك ساعه 8 الا ربع كملت اني وخالتي طب منير وزهرة
باوعت لزهرة لابسه قميص وردي فوك الخصر وبنطرون اسود وشال اسود ومخليه مكياح ع اخر حبايه
والذهب لابسته كله منير باوعلي وحجه وي امه
منير ها يمه كملتي
الحجيه اي يمه
جر الكرسي ودفعه وطلع وزهرة بس تباوعلي اخذت عبايه وياي اني خليته
بالجنطه وفلوس همين عندي اخذتهن اخاف احتاج شي
طلعنه من البيت سديت الباب وقفلته ونطيت المفتاح لمنير
منير فتح الباب الي بالصدر حتى يكعد خالتي اجتي زهرة رادت تكعد
منير وين زهرة ارجعي ورة
الحجيه ها يمه تريد تصعد هيه هنا خليها تصعد عروس جديده خليها تكعد يمك
منير لا يمه ارجعي زهرة
بقت تباوع ورجعت ساعدت منير اني صعدنه خالتي بالصدر وخله الكرسي مالتها بالصندوق وكعدت ورة خالتي وزهرة ورة منير
يمشي بالطريق واذكرت ابوي من اخذني للزيارة بس الفرق جان مو نفس الهوى ومو نفس الحياة الي جنت عايشتها
هسه صرت احس روحي غريبه مو غريبه ع الناس لا غريبه ع نفسي
ماحس نفسي ريحانه قبل الي تتعارك وي اسد علي وتتعارك وي شذى وهبه وانضف واسولف براحتي واضحك
وعايشه حياتي
هيه احس روحي كائن يتحرك بس حتى يسكت المقابيله بس حتى محد يحجي عايشه بس مو لنفسي احس نفسي صرت بارد
ع رئي اسد علي ابرد منج ماكو وصدك هسه صرت باردة ..
اسولف وي نفسي وماحس بالباب من انفتح ونزل منير اباوع مقابيل ابو حنيفه نزل منير وزهرة ورا اخذت جنطتي ونزلت اني
ساعدت منير بخالتي كعدناها ع الكرسي نزلت يم رجلها لبستها حذائها ورفعت راسي باوعتلها وابتسمت
عبالك تشوفني خلت ايدها ع ايدي وابتسمت
وكفت منير يدفع بالكرسي وزهرة واكفه يمه ومخليه ايدها بيده من فوك عبالك راح يشرد
واني امشي بصف الكرسي مالت خالتي
عبرنه الجسر والهوى مالت الجسر يضرب بالجسم عبالك ينطي امل للحياة المنضر يجنن طول عمري جنت احب هل منضر نمشي واذكر باهلي وصلنه للتفتيش
منير مقبل يطبب خالتي ويانه كال عادي من يمنه لانو مرة جبيرة
وصدك طببها من يمه مشينه بالشارعين الي قبل الامام المطاعم والاسواق والمحلات كلها عبالك عيد الجو ابغداد يشتغل طول اليوم ميهم ليل صبح ضهر
لحد ماوصلنه للتفتيش مالت الامام الكاضم وهنا جان لازم ناخذ خالتي من يمنه
اخذتها اني وطلعت عبايتي لبستها وزهرة همين
طبينه التفتيش هووواي اباوع للساعه ساعه 9 الى ربع ومخلين كامرات بالتفتيش شكلها مدور عجبني
ريحانه خاله تدرين اكو كامرات مراقبها هنا شكلهن كلش حلو
الحجيه يا يمه مخلين كامرات يشوفونه شنسوي
ريحانه اي خاله مو بس احنه هنا هووواي نسوان قبلنه ورانه
الحجيه اي يمه والنعم منه الكاضم كلهم يجونه
ريحانه اي صح
وصل التفتيش النه اني وخالتي بالبدايه وزهرة ورانه
فتشوني وفتشت خالتي وصلت لزهرة
المفتشه شنو هاي المكياج عرس لو جايه تزورين
زهرة هو اني عروس
المفتشه يعني من تكابلين الامام دكليله اني عروس اجيت مكيجه
بقت زهرة ساكته صاحت المفتشه ع وحده ثانيه وكفت يم زهرة ونطتها كنلس خلتها تمسح مكياجها كله
باوعت اكو هواي بنات مخليات مكياج بس مو مثل زهرة لا مكياج خفيف يعني بس مسكارة فونديشن بس زهرة مشاء الله مخليه مالت الله واعبادة
المهم مسحت المكياج وطبينه زرنه بقيت اهواي بالحضرة اني وخالتي صلينه ودعينه
بوقتها دعيت
يامامي مو يكولون انته الي تقضي الحوائج اقضي حاجتي اجيتك من بعد وقت طويل كلش طويل
واريد حاجتي منك ماحس روحي عايشه يالكاضم يرضيك هل شي ماريد ابقه هيج محيرة
يعني اني تزوجته بس ماجنت اعرف انو هو عباله اني الي كتلت نبراس
ومن اكتشفت انو قاتل نبراس زوج اطياف بقيت ساكته حتى ماهجم بيتهم وهمه تالي هيج يسوون بيه
يعني لا اني اليه ذنب ولا اسد علي اله ذنب بكل هل شي بعد ليش هل شي دايصير وياي انجدني يالكاضم ماريد ابقه هيج
فرج عن اسد علي خلي ينقذني من هل شي الي اني بي
اريد ارتاح يالكاضم
احجي وي الامام وابجي بدموع هادئه وعمتي ع كرسيها وتحجي وي الامام
وتدعي بقيت ادعي حياتي تصلح واسد علي يطلع
حسيت الامام مراح ينساني
زرنه وطلعنه نتمشه اني امشي بصف عمتي وطبينه مطعم اتعشينه وسوالف وزهرة ماتبطل سوالفها
بس اني مغلسه
منها وساكته ومنير هم منتبه الها بس شيسوي هم حاير بيها
رجعنه للبيت والنفسيه مرتاحه من زمان اني من اروح للامام وي ابوي من ارجع احس مشاكلي كلها تنحل
كبل سبحت ورتبت افراشي ونمت لانو رجعنه بوقت متاخر وحتى خالتي شمرت روحها ونامت
كعدت ثاني يوم ع صوت التليفون فتحت تك عين شفتها شذى نطيتها رفض باوعت للساعه الساعه 9 ونص
خرب يومها حلمانه بيه شنو
شمرت الفون بس حاولت انام ماكدرت كلت خلي اكوم
كمت غسلت ولملمت البيت وطبيت للمطبخ خليت بيض ع النار وخدرت الجاي
منير جان بوقتها طالع للشغل
كعدت ارتب بالمطبخ نزلت زهرة وشكلها معاجبني بس غلست اني
زهرة ها صباح الخير
ريحانه صباح النور
زهرة اي والله خوش جاي جنت محتاجته
ريحانه هسه يخدر وصبي
زهرة عمتي ماكعدت
ريحانه لا بعدها خليها ترتاح شويه
زهرة اي خطيه البارحه خابرت اطياف باليل شايفتنه من رجعنه من الزيارة
ريحانه اي
بقت تحاول تفتح وياي موضوع مر الوقت عادي بين خالتي والغده وشغل البيت
لحد ساعه 2 الضهر طبت اطياف وشكلها مسحوله سحل
وجهالها وراها بقيت صافنه جنت هستوني اريد ارتب الحديقه حتى اسوي بيها عصريه
اطياف ع شنو تباوعين وخري من شفتجن ماشفت الخير
ريحانه بسم الله شنو همه يطلعون هيج وقت اعوذ بالله
وخرت منها وهيه طبت كبل لغرفته خالتي اني مهتميت بس صوتها عالي وزهرة طبت وراها كبل
اطياف خبلني يحب وحده اني ادري بي بس يخابر انوب شربه وحبوبه رجع ع سوالفه وهو حلف مايعيدها لهل شغله
الحجيه يمه هو هذا اختيارج كتلج يمه الي يشرب ويكبسل مايتوب ورجلج مشه بالطريق وعاجبه
اطياف يمه الله يخليج اجيج تواسيني لو هيج تحجين اكلج خبلني خبلني شراب العرك البارحه كتلني بدون سبب وهسه هيج سوة بيه كدام مريم كدام اليسوة ومايسوة
زهرة اكلج رتبي السانج شنو شراب العرك قابل هو اول شخص يشرب وانتي جنتي تدرين بي من اخذتي يشرب
اطياف اي عيني انتي شعليج حايرة طلعات وفرات وي رجلج واني مصيبتجن رجعت عليه يكلي جنتي تكودين الهن
زهرة تكودين ع شنو يحبني واحبه وتزوجنه
اطياف اي مو هو يصدك هل حجي اول ماكله هيج يصدك
ريحانه واكفه بالمطبخ واسمع حجيهم من يحجون ماحس اله الباب نفتح عليه مالت الشارع
....
يتبع
طبعا سوري اعرف هواي اتاخرت عليكم اتمنى يعجبكم البارت
#غزل_الحجامية
انستا.oz_ _ _3
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!