رواية نصف شهر عسل الفصل السادس وثلاثون 36 - بقلم غزل الحجامية

بين صديقاتها هي الاكثر وفاء واستماعآ لهم .بين اقاربها هي المغرورة الغامضة. هي مجرد

صورة يراها كل شخص حسب منظورة.. اما عنها ف هي لا تعرف نفسها من الاساس .

..

ريحانه وتريدين اعوفكم اشلون خاله

الحجيه يمه انتي ماعندج شي هنا اني بنتي وجنتي وابني موجودين واذا ع ابنج ترة مو اول طفل ينولد بهل دنيا وامه وابو سوة

هواي يايمه ينولدون واهلهم مو وياهم لا تسوين هيج يايمه باوعي لنفسج يايمه عيشي حياتج لا تضيعينها ع غلطه مامسوينها يايمه مامسوينها انتو

ريحانه خاله اني عشت ابيت بي مرت ابو ماعشت وي امي امي متوفيه من اني صغيره صح مرة ابوي زينه بس مو مثل الام

يمكن اني اكثر وحده تعرف معنى بعد الام من البنيه الطفل يجي عمر يريد

يشوف امه وابو سوة مايفرقهم حتى الموت مرات من جنت اشوف ام اسد وابوي كاعدين سوة  اضوج وازعل من امي لانو

توفت وعافت ام اسد تزوج ابوي وتجي ابمكانها

بس بعدين اكول امر الله هذا وحرام الاعتراض واني خاله ماريد بنتي لو ابني يجون للدنيا ويشوفون امهم وابوهم منفصلين ماريدهم يعيشون يم واحد منا اريدهم يعيشون بينه

الحجيه والله يايمه امرج عجيب ولو ماهل طفل ابن ابني ادعي عليه عسا لا اجه يايمه وعذابج بسببه وبسببي عسا الله ياخذ هسه امانته مني

ريحانه لا خاله لا دكولين هيج اسم الله عليكم اثنينكم وانتي مريضه وهيج تحجين ميصير

باوعت لخالتي صدك شكلها مريض الله يساعدها

الك حكمه بيها يارب يعني شي مالنه دخل بي وطاح براسنه

اوف ياسد علي شمسوي بدنيتك وهيج طحت طيحه

يعني حتى الشغله الي موزينه الي سويتها طلعت زينه حبوب وماحبوب وبالاخير طلع مضحوك عليك بيهن اوف ياسد علي اوف

شوكت الله يفرجها عنك ..

بقيت كاعده يم خالتي وبقت تسولف وياي ع نسوان قبل وسوالف قبل وذكرت نبراس وسوالف نبراس هواي وابنها الله يرحمه

هيه تسولف واني اكل باضافري طبعا صارت هاي طبيعه بوقتها انتبه لنفسي من اكل اضافري يصير شي موزين وياي يعني اتوتر

وصدك بوقتها خالتي وهيه تسولف غفت

طلعت كلت خلي اسوي كاستر ع ما تكعد خالتي ناكل سوة

طلعته وطلعت الحليب كسرت بسكت حتى اخلي عليه  طبت اطياف وزهرة يسولفن بقن واكفات ويحجن

اني مهتميت جريت خاشوكه وايدي ادهنت الخاشوكه كلها دهن

باوعت الخواشيك ممغسوله عدل لعبت نفسي

ريحانه هاي منو اليوم غاسل الاماعين

زهرة اني عيني انتي جنتي يم عمتج كاعده

ريحانه لو عايفتهن هواي احسن

زهرة والله ماعوف البيت وصخ لكد ماتكملين انتي

ريحانه ع اساس انتي غاسلتهن عدل هاج الخواشيك كلهن زيت بعدهن صدك تحجين

زهرة والله اذا معاجبج الغسل انتي اغسلي وبعدين شقصدج يعني اني ماغسل عدل

ريحانه اي مغاسلتهن عدل هاج مو كدامح

اطياف عيب ريحانه زهرة عروس جديده وحتى لو شفتيهن مونضيفات اغسلسهن واسكتي مو اله دكوليلها هسه اذا احد يسمعج يكول زهرة وصخه

ريحانه اني مكلت زهرة وصخه كلت مممنضه عدل وهل شي مو جذب والي

يسمع مو مثل الي يشوف هل مره اني شفت الخواشيك ونبهتها باجر يمكن  منير يشوفها شدكله اذا هو الي شاف

واحنه نحجي طب منير ماتوقعت زهرة راح تحجي وراح دكله كلت راح تخجل وراح تسكت اشو هاي ركضت لمنير وتحجي

زهرة شوف منير هل مره اختك شاهده كافي اني مليت كل يوميه نفس الحجي ومايعجبها العجب صح هيه

مهتمه بخالتي بس مو هيج اني هم ماكدر ع كل هذا الوحدي ومن نحجي وياها نطلع احنه الموزينات

منير هاي شكو شصاير

اطياف مصاير شي بس انته تدري بريحانه وحجيها وهل مره صدك زودتها بس يله زهرة عادي غلسي منير هم جاي من الشغل وتعبان

منير احجن شصاير

زهرة انته تدري البيت كله عليه وهسه من اجتي اطياف صارت تساعدني وريحانه عليها بس بشغل خالتي

طبت للمطبخ وشافت الخاشوكه ع الطباخ بيها زيت

يعني اذا ع الطباخ اكيد بيها زيت غير جاي نسوي عشه

منير اي واذا يعني بيها زيت شصار

ريحانه مو هيج الحجي الخاشوكه جانت بالكاونتر وكلها وصخ

زهرة لا جانت ع الطباخ واطياف تشهد جنه واكفات نرتب وهيه طبت علينه

ريحانه شنو ترة اني طبيت اريد اسوي كاستر وانتن طبيتن ورايه

اطياف يا ريحانه شبيج احنه جنه واكفات ع الطباخ وانتي طبيتي علينه

ريحانه ياااا راح تخبلني صدك تحجن انتن

زهرة وفوك كل هذا صارت تصير وصخات جايفات خواشيك وصخه اني تحملت هواي اكثر من هيج ماتحمل شوفلك حل وياها

ريحانه ولجن انتن شنو صدك ساقطات انوب اني كلت جايفات وخايسات

..واني احجي منير ضربني راشدي وجرني من شعري

منير هاي اني هنا وهيج تحجين لعد اذا اني ماكو شنو تسوين واطياف

وزهرة يحجن بس ماصدكهن واكللهن هيه ريحانه ثوله ثاريج صدك مثل مايكولن

..  اباوع لاطياف وزهرة وحده تبتسم للثانيه ويباوعلي بنضرة شماته فرت منهم دفعت ايده مني وعطت

ريحانه كافي عاد انته شيحجن تصدكهن جذابات ماحجيت هيج اني كتلها انتبهي مره ثانيه البيت بيتنه وعيب احد

غريب يشوف البيت وصخ هل مره اني شفته يجوز المره الثانيه منير يشوفها شنو يكون ردت فعلج

زهرة احجي عدل انتي كلتي الخايسات الجايفات اماعين متعرفن اتنضفن وهسه كدامه كلتي ساقطات شنو احنه هيته عندج

ريحانه هسه اني كلت خايسات جايفات اوكي لو انتي جايه وشايفه الخواشيك مالت الاكل كلهن زيت ومضمومات شتكولين ع الي غسلهن

زهرة مو اني الي غلستهن انتي غسلتيهن احجي هل حجي لنفسج

ريحانه اهاا يعني هسه صارت اني وقبل شويه دكولين لمنير البيت كله عليج انتي وريحانه عليها بس بخالتي

..بقت تباوع ماعرفت شتحجي واني باوعت لمنير الي خزر زهرة لانو عرف هنه جذابات

زهرة اي قابل كلشي بالبيت عليه انتي هم مرات تكب عندج الندارة وتساعديني

ريحانه انتن الحجي وياجن يقصر العمر ومامنه فايده جذب بجذب واني مالي خلك الكم

عفتهن وطلعت رحت للحمام طبيت وسديت لباب ورايه قوي وكفت ورة الباب واحجي وي نفسي شهل برود الي اني بي

ليش هيج صرت باردة احس مالي روح الله لا ينطي الي هيج سوة بيه هاي مو اني

اني وين جنت اربعه وعشرين ساعه اعراك ب اسد علي وشذى هبه هسه
اني ذني الاثنين ماكدر عليهن صدك عود والله لو ريحانه القديمه اله تدفنهن بمكانهن .

غسلت وجهي وطلعت طبيت يم خالتي لكيت اطياف كاعده باوعتلي اني مهتميت درت وجهي منها رحت يم خالتي

شفت نومتها مو طبيعيه عيونها مفتوحه وتشخر بصوت ماعرف اشلونه

ريحانه اطياف هاي شنو شبيها خالتي

اطياف شبيها نايمه

ريحانه بس نومتها مو طبيعيه

اطياف هاي اشلون شلج بيها يعني حتى النومه خليتي بيها اشكال

ريحانه هاي شبيج ترة جاي احجي ع امج ونومتها صدك موطبيعيه مجاي تشوفينها وشنو هاي الي جاي يطلع من حلكها

..سائل ابيض يطلع من حلكها وهيه تشوخر

اطياف غير نايمه لازم يطلع هيج من حلكها واسكتي رجا مالي خلككم

..بقيت اباوعلها من كبر لفج اي والله اكو وحده تشوف امها هيج وتغلس بقيت كاعده يم خالتي وطولت بنومتها

ردت اكعدها كلت اكعدها اسولف وياها شويه بلكي تصير زينه اول ماردت اكعدها دكت عليه شذى اطياف باوعتلي من دك التليفون

رفعت التليفون وجاوبتها

ريحانه الو هلو شذى اشلونج

شذى لحمدالله بخير انتي اشلونج عندي خبر  الججج يخبلل

ريحانه خير اشوفج فرحانه شكو شصاير

شذى اسد علي اسودي باجر يطلع

ريحانه شنو شتحجين انتي صدك تحجين

شذى والله العظيم ابوج وضرغام وعلاوي راحو هسه يوصلون ساعه ٤ الصبح اله الكتاب مالته طالع وكامل  الصبح هوة هنا يعني

ريحانه الف الحمدالله

شذى شبيج اشو احسج مفرحانه اني كلت هسه تهلهل بالتليفون

ريحانه لا بالعكس كلش فرحانه

شذى منير اشلونه وياج والعروس الجديده اشلونها

ريحانه بخير الحمدالله

شذى شبيج ولج احس بيج شي

ريحانه لا مبيه شي والله بس دايخه شويه الحمل متعبني

شذى صدك بعدج تنزفين

ريحانه اي والله ولج ماحس اكو حركه ابطني ليش

شذى اي عادي هاي الاشهر الحركه مو هواي بيها انتي شوكت تروحين للدكتورة

ريحانه والله مادري

شذى باعي باجر من تجين تباتين واذا يصيرلنه مجال نروح اني وياج شتكولين

ريحانه ماشي باجر اني اجيكم

شذى عوزها ماتجين حتى العب بيج فلك كلهم راح يجون اريد نستقبله من الباب كون كلنه موجودين

ريحانه ماشي بس يعني خبر اكيد موو

شذى اكلها راحو يجيبونه

ريحانه زين امج اشلونها

شذى زينه الحمدالله من سمعت لخبر لحد هسه لازمه المصلايه وتدعي

ريحانه حقها والله

شذى يله حبيبتي اني اروح اشوفج باجر

ريحانه ان شاء الله يله ياعمري باي

..

سديته منها واني ممصدكه انو اسد علي هذا هو راح يطلع وراح اشوفه فرحانه بس الفرحه ممبينه عليه ماعرف ليش

صرت مرات اشك بنفسي اكول اني داخذ مهدئات لانو هاي مو سوالف بنيه عاقله الهدؤ الي اني بي مو طبيعي

باوعت لاطياف تباوعلي بس نضرات متباعده يعني تباوع ودير وجه

اطياف شنو اخوج راح يطلع

ريحانه اي ان شاء الله باجر

اطياف خير ان شاء الله بس كون يعوف سولفه المكسرة

ريحانه اسد علي ماعنده سوالف مكسرة

اطياف اي عيني هيه الحبوب مو سوالف مكسرة صحيح ادويه هاي

ريحانه اها كتيلي حبوب اعتقد الحبوب شغلت رجلج مو شغلت اسد علي وانتي اعرف بهل شي

اطياف شقصدج يعني

ريحانه مقصدي شي انتي تعرفين كلشي ولا تخليني افتح دفاتر هسه خالتي

نايمه ومحاجه نفتحها وانتي تعرفين هيه شبيها وتعرفين سوالف رجلج كلها

..خزرتني وكامت بقت تباوعلي احسها تريد تاكلني اني مهتميت باوعت لخالتي وكعدتها هيه عافتنه وطلعت

حاولت اكعد خالتي مكعدت تكعد تحجي وياي وترجع اتنام يعني بين الكلمه والثانيه تشخر خليت

منديل يم حلكها بس بقيت بالي يمها بقيت صافنه عليها واحجي وي نفسي خفت عليها

يعني ندمج بيه شعور الفرح انو اسد علي اخير راح يطلع وخوفي ع خالتي وارتباكي من الحياة الي اني عايشتها

بقيت صافنه واحجي وي نفسي لا ساعه ولا ساعتين واطياف ماجتي عرفتها

راح تنام بالاستقبال  كلت هسه اذا اريد اروح باجر لازم انطي خبر لمنير حتى ياخذني الصبح

واذا اصعد هسه زهرة ومالي خلك كلت خلي ادزله رساله

وصدك دزيتله رساله

ريحانه منير كاعد... شويه وجاوبني

منير اي اكو شي

ريحانه باجر اسد علي يطلع وخابروني اهلي تاخذني من تروح للشغل

منير لا من اجي من الشغل

ريحانه ليش اخذني الصبح

منير كتلج من اجي من الشغل لا تلحين

مجاوبته عفته  طفيت  الاضويه ومددت يم خالتي بس اكو ضوه خفيف بالغرفه اكدر اشوف خالتي بي

واني افكر غفيت كعدت وي صلاه الفجر ع صؤت الاذان استحي ارجع انام كلت خلي اكوم اصلي مدام كعدت وي الاذان

وصدك توضيت وصليت .. رجعت لكيت خالتي كاعده بس شكلها غريب باوعتلي وابتسمت اشلون عبالك شافتني

ريحانه ها خاله كعدتي

الحجيه اي يمه كعدت جاي تصلين

..استغربت منها اشلون عرفت جاي اصلي والاذان ساكت نزعت الرداء

ريحانه اي خاله جنت اصلي

الحجيه تقبل الله يمه

ريحانه منا ومنكم اجيبلج مي تتوضين وتصلين

الحجيه اي والله يمه ياريت بس يمه سبحيني خليني انضف نفسي

ريحانه لا خاله مو زين عليج اخاف تتمرضين

الحجيه لا يمه ماتمرض لا تخافين سبحيني

ريحانه خاله الدنيا نص اليل والله تمرضين

الحجيه ديله يايمه العمر واحد ماتمرض لا تخافين

ريحانه ماشي براحتج

جبت كرسيها وخليتها عليه واخذتها للحمام سبحتها بس هل مره ماخلتني اني اليفها هيه صارت تليف بنفسها وتحجي اشلون الي تقرة ادعيه ع جسمها كلش خفت بيومها

بقيت واكفه واكل باضافري ماعرفت شسوي

كملت ذبيت مي عليها لزمت ايدي وابتسمت بوجهي والنبي بوقتها احسها تشوفني

الحجيه يايمه بحق هذا اليوم اريد من الله يسعدج ويوفقج ومايخليج تحتاجين احد ويفتح كل الابواب بوجهج

يايمه اريد من الله يغسل اذنوبج ويسمح همج ويذب مي بارد ع كلبج ياريحانه

ريحانه شبيج خاله خوفتيني عليج

الحجيه لا يمه شنو الي يخوفج مابيه شي مايصير الام تدعي لبنيتها

ريحانه الله يحفضج اليه يارب بست ايدها ونشفتها  وبدلتلها وطلعتها من الحمام

وديتها للغرفه سديت الباب حتى  الغرفه ماتبرد وتتمرض خليتها ع الجربايه ونشفت شعرها حتى امشطلها

الحجيه شوفي يايمه الدنيا صدك اضحك

ريحانه ليش خاله

الحجيه يعني هسه انتي كون بحضن رجلج نايمه واني كون بنتي الي تمشطلي وتتعب وياي باخر ايامي بس شوفي بنتي حتى منايمه بغرفتي

ريحانه لا خاله خطيه نامت بالاستقبال واني يمج

الحجيه الله يحفضج يايمه بس الي جابتها بطني يايمه المن تعبت ٩ اشهر وتعب السنين ضهري نكسر ع ترباتها وتالي يايمه هيج جزاتي

ريحانه لا خاله شبيج هسه انتي اشو تخبلين واني مودكولين اني بنتج يعني مضاع تعبج شنو قابل مقصرة وياج اني

الحجيه يايمه انتي مقصرة مستحيل مامنج قصور بس يايمه اريد منج شغله تسوينها اليه بس اريدها بيني وبينج ومادكولين لاحد عليها

ريحانه اي تدللين كولي

الحجيه بس محلفتج بروح امج مادكولين لاطياف عليها ولا لمنير بيني وبينج

ريحانه اي والله شنو هيه

الحجيه شوفي يمه اخاف يصير بيه شي اني عندي ذهب وفلوس مخليتهن فوك السطح نبراس ضامتهن كلش زين جوة كاشيه

يم التانكي مالت المي الكاشيه مدمرة بصبغ احمر يعني تعرفينها اول متشوفينها اريدج اذا يصير بيه شي يايمه تاخذيهن وتتصدقين بيهن اليه ولنبراس ولابني الله يرحمه

ريحانه تدللين خاله بس ليش متريدين اكول لاطياف ولمنير

الحجيه يمه اطياف اذا شافت الذهب والفلوس تطمع بيهن وتاخذهن وما تصدقلنه ومنير هسه الي امشيته حيه ماتتخير عن اطياف بشي

ريحانه زين شنو رئيج انزلهن هل ايام ونسوي بيهن ثواب ع روحهن وصدقه الج

الحجيه لا يمه مالحك اني اريدج انتي تسويهن

ريحانه خاله لا تخوفيني فدوة رحتلج

الحجيه لا يمه علي شنو تخافين ماكو شي قابل لي راحو احسن مني

.. من حجت هيج حسيتها تدري بروحها راح تموت دمعتي نزلت بسرعه

ريحانه ليش هيج تحجين اليوم خاله شبيج خوفتيني اكعد منير ناخذج للدكتور

الحجيه لا يمه يادكتور مايفيدني بس اذا هيح كعدي خلي اشوفه اسلم عليه

ريحانه اول ماحجت هيج خليت راسي بحضنها وابجي

خاله شبيج خوفتيني عليج كلش شكو

الحجيه ماكو شي يايمه امشي انتي كعدي منير واني اصلي ع مايجي

مسحت دموعي وكمت منها لبست شيلتها خليتلها التربه وصلت واني طلعت اكعد منير صعدت متردده اكعده وزهرة يمه يبوو

بس شسوي كلت اخاف يصير بيها شي لخالتي خلي اكعدة وامري الله

وصدك صعدت الدرج بالكوة بطني موتتني ودكيت الباب محد فتح ثاني دكه فتحت زهرة شافتني وعوجت حلكها

زهرة خير ياستار شكوو

ريحانه خالتي تريد منير

زهرة شتريد منه بهيج وقت كوليلها نايم

ريحانه تدري بي نايمه ترة كعدي تريد تشوفه نادري شبيها

زهرة  كولي انتي تريدين تشوفينه صاعده نص اليل ملابسج يذبن مي شتردين

وي حجيها كعد منير دار وجه عليه فاتح نص عيونه ونايم ع الجربايه

منير هاي شكو بيش ساعه

زهرة ساعه ٤ ونص حبيبي

منير شكو ريحانه شصاير امي بيها شي .. وي حجايته كعد ع حيله ع الجربايه

ريحانه لا مبيها شي داتصلي بس كالت كعدي منير يمكن لانو البارحه مشافتك باليل تريد تشوفك

كبل خطيه كام جر القميص لبسه واجه يم الباب وزهرة لزمته من ايده

زهرة هاي وين رايح ..

هنا وخلص البارت وطبعا اسفه اني كتلكم انو كل يوميه بارت بس والنبي النت مكطوع عندي ماعرف اذا عدكم هماتين هيج

بس بسبب المضاهرات وكذا نكطع عندي الانترنت هسه لزمت الفون فجاءة ولكيت الانترنت راجع

طبعا الله رحمه ونور ع ارواح الشهداء الي راحو بهل انفجار ويارب القوة للمتضاهرين وان شاء الله هل مره المضاهرات تجيب نتيجه

اتمنى البارت يعجبكم

تحياتي

غزل الحجامية