رواية وعصفت بنا الاقدار الفصل الثالث والعشرون 23 - بقلم Rozaya1122

وعصفت بنا الاقدار... البارت الثاني والعشرون
للكاتبه زهراء ( روزايه)...

وعصفت بنا الأقدار!!! بين شتات العقل
و دموع مذرفة وأحزان موقدة ا
طفئت شعاع الفرح..
الابدان اصبحت منهكة والأرواح مفزوعة..
ما الذنب.. لا ذنبا لنا سوى انا خلقنا أناث..
بين وحوش وطغاة..
أعلنت علينا الاستبداد..

خلف قضبان القصور وحوش وقيود..
خلف أساور القلب امنيات واحلام..
وخلفك • ﭑآنتـٰـهہ َالأمن والأمان..
فاقف كالدرع لي وكن كالسيف لهم..
ألاوطان ليست أراضي بل أحضان ..
أحتضن حزني و خوفي..
فبك عوضي ..
بقلمي سمسمة الدليمية...

....

عقيق.. سد التليفون رفعت راسي علي
باوعتله كتله منو يعقد على منو؟!

السبع.. ياسين يعقد ع ام البنات حته
ينجب جبار ويطلع لسه منهزم اكيد اذا
سمع بالعقد يطلع راسه

عقيق.. واذا طلع راح تصير مشكله هو يريد
خاله وبعدين شتريد تسويله تريد تبتلي
حته تفوت سجن..

اصابيعه بعدهن بشعري ويباوعلي ويحجي
شوفي يانسمتي الهادئه ...

انه ادري كتال ابوي وعائلتي هو جبار
لان انه جبير جنت واتذكر قبل اسبوع
تعارك ويه ابوي ع الشيخه ..

بس الموكفني ماعندي دليل وهالشي حرام
مرت عليه ايام سوده وفقدت بيهه وچم مره
بمره افوتله للمضيف واسلاحي بيدي
اريد اكتله..

وجانت تمنعني الحجيه بركات هي
دكلي ماعندك دليل وخاف الله يحاسبك
جنت طايش وصغير وكل همي ثار ابوي

كبرت واعتمدت ع نفسي وياسين ساندني
بخطوه خطوه ويوم منهن كال امشي انروح
للمرجع مالتنه بالنجف ونسأل ع حكم ثارك..

ورحنه بيومهه وسألنه وكالوا القصاص
مذكور بالقران ومن حقك بس اله بدليل
وكون واثق من عمك هو كتال ابوك

والمشكله كل هاي السنوات ماعندي دليل
جنت اتمنى التقي بعمي علي وافتهم الحقيقه
منه لان كالو هو الكتال بس ام جراح والحجيه
جانو يكولون علي بريء

مالحگت علي وميت بسكته قلبيه بيومهه
جنت بالشغل بعيد وظليت لحد هسه
كل ظلم جبار يدل هو كتال اهلي بس
من اريد اكتله وتجي العشاير والشيوخ تلومني
غير عندي دليل !!

هنا الناس اطبل ويه اليطبلون يعني
محد يكلي عفيه وكفوو منك راح يسوو
شيخ اصيل صاحب مبدأ

وهاي غير الاحزاب الوراه تدرين مستعد
يأذي شكو شخص احامي مستعد حته يكتل
الحجيه ويكتل ابنه هذا انسان شابع دم...

عقيق.. جمره اذا بيوم اخذت ثارك اني وين
اروح انت راح تروح سجن واني اظل وحيده
ماعندي احد بهاي الدنيا بس انت!!

السبع.. خاف جنت بهم هسه صرت بهمين
والله كمت اغمض عيوني حته لا اشوف الحقيقه
لان فكري يمج ادري بيج تتبهذلين وراي..

عقيق.. اني احجيلك الصراحه خاله ساهره
كالت حته اذا رجعتي لاهلج راح تتعذبين
منو يهتم بيج ومنو يعالجج واحتمال يزوجوني
لواحد من ولدهم..

واني مااريد اهلي اريد اظل يمك
صح اخاف من القصر وجبار بس
اظل يم خاله ساهره...

السبع.. انتي شكد بريئه والبگلبج ع
السانج!!

عقيق.. غير احجيلك الصراحه اني مااضم
عليك عندي شعور حلو ومرتاحه حيل يمكم
وفرحانه لان راح ادرس ...

السبع... شايفه نسمه الهوه التهب بعد ريح
حاره جمر وتجي هيج نسمه هوه بارده
تحسهه تسلم ع الگلب من تفوت هاي انتي
بحياتي !!

عقيق.. ضميت راسي واني مبتسمه
سحب ايده من شعري وكام كال كومي
يله خلي نتريك..

كمت قبله للحمام غسلت ورفعت شعري
حيل ليفوك وشديته ذيل حصان
ورحت سويت ريوك وهو راح يغسل..

تريگنه سوه واني مدنگه احسه يسمع
دكات كلبي وحاس بشعوري لذلك مستحيه..

كمل كال الحمدلله راح ابدل واروح اقفلي
الباب واكعدي اقري من اجي اسمعلج
موالكاج مخلصتهه تسخت..

طلعت وراه للباب قفلتهه ورجعت لميت
الشقه وطلعت الكتب حسب الجدول
من مدرس اليوم عندي تاريخ ورقتين
وجغرافيه ورقتين واسلاميه...

ظليت طول النهار اقره كلما اوكف وابطل
اتذكر نفسي واكول ليش مااصير واوصل
وادخل كليه واصير مدرسه ويكولون ست عقيق
شكد حلوووو..

حفظتهن حيل بحيث مااغلط ابد واكتب
بورقه وهو موفرلي كلشي لحدما اجه
المغرب جايب عشه جاهز...

رتبته واكلنه ورحت للغرفه جنت لابسه
تراك عادي بس بهاري الجو بي بروده
وشعري رافعته وجبتله الكتب واجيت
كتله سمعلي!!!

بده يسمعلي ويسألني ويلخصلي
علمني شلون اطلع التعريف والتعليل
عندي نشاط وهمه موطبيعيه...

كملت ورحت للغرفه خابرت ع تليفون
خاله طلعتلي لبابه سألتهه شلونهم
وشصار ماصار؟!

جاوبتني والله ياعقيق مانعرف شيصير
جبار بعده منهزم من جهه القصر هدوء
بس اكو شغله موحلوه !!

الشيخ ياسين يعقد ع ماما بحجة
يحميهه وجبار اذا سمع راح يطلع
وضرغام كاعدله بالباب حته ينفذون خطتهم

عقيق.. وخاله موافقه؟!
لبابه.. ماما احسهه تمثل القوه وداخلهه هش
بدت تنهار البارحه للصبح مخليه صورة بابا
وتبجي ...

عقيق.. زين وام اواب موفشله منهه حبابه!!
لبابه.. شمدريني هم عدهم عادي كالت هي
حمايه مابيهه شي وحته اجت ع ماما
وسولفت وياهه ...

عقيق.. سديته منهه ومددت بفراشي
ظليت افكر بحياتي شويه وغطيت
بالنوم نفس الكابوس شفته!!

نفس الحركه مال الشباك ونفسه الكاعد
ع صدري واصرخ ومايطلع صوتي
فزيت مرعوبه واني الهث بس كدرت اوكف
ع رجليه

فتحت الباب وطلعت اركض عبالك
واحد يركض وراي السبع نايم هزيته اكعد
بسرعه فز وكام ع حيله..

احجي والهث واوصفله الشفته
شفايفي احسهم خشبه مهشمه
من كدما يابسات ابلل بيهن وماكو..

لزمني من ايدي وكعدني ع التخم وهو
يهدي بيه اسم الله ماكو شي هذا يسمو
جاثوم وجابلي كلاص مي..

السبع.. لاتنامين بالغرفه كومي مددي
بفراشي واني اجيب فراش من الغرفه
راح جاب واجه لكاني مدده ..

مد ايده جوه راسي وقربني علي
صرت بحضنه لزك اول مره هيج
يوميه اعيش شعور حركه جديده

مصفطه اديه ع كلبي وايده تتحرك
ع كتفي بهدوء شعور غريب احس
كلبي مثل الفراشات وتتراقص بحديقه
عطره...

حس ع دكات كلبي سريعه عباله
متخربطه بس اني جنت مرتاحه
همس يم اذني تحسين بشي؟!

هزيت راسي واني ع صدره
هدوء ثواني واحس بوسه
رقيقه انطبعت ع مقدمه راسي
شفايفي لامست بشرتي ...

كزبر جلدي بسرعه وانتفضت
بحركه لا اراديه خلته يضمني اكثر
لحضنه بوسط هدوء تام ...

احلى ايام عشتهه يمهه ماكو شعور
خوف نسيت كلشي نسيت اهلي
ونسيت مرضي حته من يوجعني گلبي
اكول هسه يجي واصير زينه...

رانيا... هستوني كاعده تريكت واريد اغسل المواعين
ودك تليفوني المتصل
ضرغام يتصل صايره افز من اشوف اسمه
جاوبته صوت وهوسه يمه ...

ضرغام.. تحضري نص ساعه واجيج
يريدوج بتربيه مال بغداد واذا متكدرين
وحدج خلي امج تجي وياج!!

رانيا.. عزااا ابو ليث ماما لازمه عده
واني ممتحضره شلون!!

ضرغام.. لعد خابرتك شحجي مواكلج تحضري
هسه امر عليج يريدون حضورج بالتربيه
لان نقلج مزعج واذا تاخرنه اخذج يم عقيق ..

رانيا.. شلون اروح وجهالي وخاف نتاخر
ضرغام.. راح اوصلكم وانتي ظل
شلون وعزززه!!  يله وصلت...

رانيا.. سده واني ركضت للغرفه حجيت لماما
كالت شلون اروح وياج واني لازمه عده
وعمتج ماتكدر تخاف من جبار...

ساهره.. ضرغام امين نسيتي شلون نقذهه
شكم مره وكعدنه بخيره لاتخافين عليهه
خلي تسوي تنسيب هو كال مونقل حته خاف
يرجعون لبغداد..

ام رانيا.. اذا خلصت العده مالتي نرجع لبيتنه
بس اني اخاف من طليق رانيا اعرفه نذل والله
يجي ياخذ الجهال لوترجعيلي غير جان عدنه
سند هسه انظل وحدنه

ساهره.. كولي يالله بلكي تنحل الامور
ونكدر انشوفلكم حل الله لاينطي من عدم
شباب هاي الحلوه وخلاهه بدون زواج...

رانيا.. هن يسولفن واني بدلت بسرعه
لبست بنطرون قماش وستره طويله
سوده لبست شالي وردت اخذ سيوفي
وياي بس ماقبلت ماما ..

سمعت هورن بالباب طلعت بس خوف
وارتباك شلون اروح وياه وشلون خاف يشوفني
احد ويوصل الحجي لطليقي..

فتحت باب السياره وصعدت وهو نزل انطه علاكه
مال مسواك لعمه ساهره وحجه وياهه واجه
شغلهه وطلع وكال شلونج؟!

رديت علي زينه الحمدلله جان لابس عسكري
والطريق فارغ بهذيج السنين الوضع يخوف
موياهو الجان يطلع ...

حجيت اني كتله تكدر تاخذني لمنطقتنه
القديمه؟!
ضرغام.. اذا كملنه من وقت اخذج ترى ماسويت
نقل شفتلج واسطه تنسيب لان خاف ترجعين
لبغداد...

رانيا.. سكتت وهو ساكت صارت شمس
كدامنه نزل هاي مدري شيسموهه كدام
وجهه ومد ايده نزل الكدامي...

يباوع ع الطريق ويحجي كال شكد
عمرج واتزوجتي؟! جاوبته ٢٢
ضرغام.. وشكد ظليتي ؟!
رانيا.. سنتين وشويه لان جهالي واحد ع واحد

صار عندي فضول كتله انت كلت اني
اشبه زوجتك عندك صورتهه؟!
ماحرك شفايفه بس كال امممممم..

سكتت حسيت بحجم غبائي شلون
بيه ياربي شوكت اعرف اسولف محفظته
كدامه سحبهه وطلع منهه صوره صغيره
مال هويه...

لابسه حجاب ماروني ومبتسمه
تنطيني شبه فضيع سبحان الله بس عيونهه
اوسع ماعرفت شحجي بس كتله الله يرحمهه...

سكت هو رجعهه للمحفظه وكمل الطريق
هدوء لحدماوصلنه للتربيه هو عنده واحد
يعرفه مجرد طبيت للمدير العام وسالني شكم
سؤال وطلعنه...

من صعد كال عندي دوام وتاخرت راح اخذج
يم عقيق وباجر هم يرجعون وارجعي وياهم
اني اتاخر وطلع بيه للشقه ...

حجيت بكلبي كلت صاير لطيف وكلامه
هادىء وبطل طبع الاستفزاز فززني رفع صوته
اني مووو وياج؟!

غمضت عيوني بملل وكتله موكلت اخذج
لبيتكم اريد اشوف منطقتنه نكدر نسكن بيهه!!

ضرغام.. قبل شويه يمكن حجيت مگلوبي
مو كتلج تأخرت عن الدوام ست رانيااااا

رانيا.. ابتسمت ع جرت حرف الالف
رفع حاجبه وكال هسه ماناويه تنزلين
لو عاجبج اخذج وياي للدوام!!

رديت علي وين تاخذني شمدريني
وصلنه غير دكول!!

ضرغام.. الصبر ياراعي الصبر
ظلي وخلي اخذج للدوام الليل موحش
حته نتسامر ...

رانيا.. رجعنه ع كلامك هستوني كلت
صاير لطيف وراح الاستفزاز..

ضرغام.. نزززززلي بسرعه لو يختفي
اللسانج لو يرفع نار كلبي انززززلي وفوتي
بسرعه..

رانيا.. مخبل بسرعه يتنرفز نزلت
وطبكت الباب
حيل صاح لللللللج كسر بايدج...

ماالتفتت مشيت لباب العماره مااندل
اجه وراي يعدل ببدلته سلم ع البواب
وصعد يندلهه دك الباب واحنه واكفين
ماكو صوت

طلع تليفونه خابر ع السبع كاله
احنه بالباب كول للمحروسه مالتك
تفتح الباب راح الدوام عليه ...

واكفين ننتظر عقيق عود تفتح
كلما اباوعله اشوفه صافن عليه وعينه
تصعد وتنزل ع طولي  ..

حجه وهو مرتجي ع الباب
ماكو شويه اگصف من هذا
البنطرون !!

باوعت ع رجليه شبيهن اصلا
ماعندي افخاذ جبيره بس هذا منحرف
كتله اي عندي بعد واحد اگصف!!

ضرغام.. خير ان شاء الله بالجيه
الثانيه البسي خلي انشوف ابدااع
الخالق ...

رانيا.. ترى اني امانه عندك عيب
هالكلام
ضرغام.. شحاجي!!! انتي مطلعتهن واني
عليه اباوع شلون اغمض لاوالله تعذريني...

رانيا.. دائما كلامك يحسسني اني
وحده مدري شلوني هو هيج ؟!
ضرغام.. شسوي مااعرف اجامل وعندي
خلل بالتعبير

ردت اكلج طالعه حلوه بس ماوكع بحلكي
غير هالحجي !!

رانيا.. والله غريب انت هسه تذمني لوتمدحني
ضرغام.. اثنينهم!!  طالعه حلوه بالاسود شوفي
صايرين سيت اني وياج نتراهم مووو وغمز
بطرف حاجبه

رانيا... درت وجهي عنه وادعي بكلبي وين
راحت عقيق وهو ابتسامه بوجهه كال شو
انداري بسلا خجلتي !!

حجيت بانزعاج ليش مااخجل شكالولك
عليه موانثى؟!!

ضرغام.. صدقه للأنثى!!!

اسألج سؤال انتي  غبيه لوتستغبين!؟
لو انتي من اساسج كاتلج الثول!!

رانيا.. ضرغام لتجاوز اني شحاجيه
لازم تجاوز متكدر ترى اني موصغيره
عمري ٢٧ سنه

ضرغام.. منو كال صغيره !! بس عقلج
هلكده اراهن علي ودماغج سميك
وماتفتهمين بسرعه !! وتفكيرج
كله اعوج ...

رانيا.. استغفر الله مدك ع السبع اتشوفهه
وين راحت هاي!!

ضرغام.. عيب هي كلساع ومد ايده
دك الباب مره ثانيه ويباوعلي واني
كلساع اجر الستره عيونه جدا جرئيه..

كتله راح دوامك بعد!!
ضرغام.. فدوه الج موانتي انثى
وكلشي لخاطر الانثى يهون...

جان يحجي وهو يتسهزء بكلمة انثى
انفتح الباب عقيق بوستهه
وكتلهه يمعوده وينج كالت جنت اصلي
وماادري بالتليفون!!!

عقيق.. تفضل ابو ليث
ضرغام.. كلاص مي بروح اهلج ريگي
نشف!!

راحت عقيق للمطبخ وهو واكف
تقرب بخطوات سريعه صار قريب
كلش مغرگ نفسه بالعطر بس هادىء

حجه وهو رافع راسه ليفوك
لاتلبسين هيج واطلعين كدام احد
استري علينه يرحم والديج ترى كلوبنه
رگيگه كدام هيج قالب...

وسعت عيني والتفتت بسرعه ورحت لعقيق
للمطبخ انعل بليسك لايستحي ولايختشي
شرب مي وطلع...

عقيق.. اعذريني انتظرتو هوايه بس جنت اصلي
وتليفوني بالمطبخ ومن دكيتوا الباب رحت اريد
اخابر السبع ولگيته متصل هوايه..

رانيا.. خطيه ظل باله؟!
عقيق... اي عباله شو شصار كومي
ارتاحي
رانيا... هي ليله وحده السبع اجه المغرب
تعشينه وحده اني وعقيق
ونمنه سوه بغرفتهه ومن الصبح كعدنه
رجعنه للبصره..

ساهره.. موكلشي نتمناه نحصله ولاكلشي
نعيشه راح ناخذه قياس ونكول هاهي بعد
منشوف ضيم بحياتنه

هاي اني كدامكم ربانه ابوي وحده امي توفت
وعافتنه اني واخويه صغار وربانه وتعب علينه
ودرست وصرت معلمه واخويه اخذ شهادة الثالث
وراح تجاره ماتعين...

جنت ملكه ابيتي وبين عائلتي بناتي
مثل الورود وزوجي علي مدللني مايوم رفع
صوته عليه ومااملك بالدنيا غير بس زوجي
وعائلتي واخويه..

مايوم حسبت راح افقد اعز مااملك من اول دخول
سنه ٢٠٠٦ مااعرف احزن ع فقد منو والطم على منو
علي ابو بيتي وسندي بهاي الدنيا فاركته بدون
وداع ...

بنتي الطفله البريئه البكر مالتي انذبحت وماشفت
جثتهه واندفنت وكمت بس بالحلم اشوفهه
وكمت احارب وحدي حته احميجن من جبار
وظلمه..

ووراهه كسرة اخوي وموته هددتني للكاع
ماكدرت اشيل روحي واوكف ع رجليه
صرت وحيده واحارب واحمي بناتي من الذيابه

وين اروح ومنو يسمعني حته اذا اشتكيت
كالو جبار حزب ومليشيات ادعمه ويكدر
ياخذ بناتي واروح بيهه وهن عودهن طري...

استسلمت للامر الواقع وسمعت كلام
الحجيه ام ياسين من كالت الحل الوحيد
التخلصين منه من جبار يعقد عليج
ياسين !!

حته اذا غضب جبار وتعارك يوكفون بوجهه
وراهه ماعنده سلطه عليج حته بناتج هم
مايدخل لان بحماية ولد عمهن

وياسين موغريب ابن عم جبار مايكدر
يحجي حته الشيوخ ماتسمعه مرت اخوك ماتريدك
وياسين ابن عمك مثل اخيك ..

حايره وضايعه ومااعرف شسوي
حجيت لام رانيا واخذتهه الحيره
شلون اغدر بالأمنت بينه ودخلتنه ابيتهه
ام اواب...

مره قليل المدح بحقهه يجينه الاكل
يوميه والخبز الحار وتالي متالي
اخذ رجلهه واني دخيله...

بعصريتهه اندك الباب واجتني بنيه صغيره
كالت عمتي فاطمه تريدج تجين عدهه
حجي وياج...

رحت خجلانه ومنزله راسي رغم مارديت
اي جواب ولاحجيت بعدني بس عيب
ومنو الاصول اغدر بالايد الي انمدت الي...

كعدت يمهه بغرفتهه رغم هي موجبيره
بس تعبانه لان متمرضه من صغرهه..

لزمت ايدي وكالت ماكو مره تقبل بزلمتهه
يعقد عليهه حتلو حمايه
وماكو مره تنطي زلمتهه باي شكل من الاشكال
وخاصه اذا مثل الشيخ ياسين..

لادنگين راسج ياساهره انه هديه للشيخ
واحتواني وربيت ع ايده وهو عزي وجاهي
بس انه من زمان الح ع الحجيه حته يتزوج..

مانقبل بالخلفه القليله وهو شيخ وبس اواب
وماله دخل بامور الشيخه واريدله المره
الترضي وتجيبله خلفه ...

بس انتي ياساهره اعرفنج بنت اصول
وحجالي الشيخ ع سالفه العقد انه قابله
من گلب ورب وانتي اخيتي وان شاء الله
يحميج ويحمي بناتج وتظلن تحت اسمه...

ساهره... لا يا ام اواب لاتحجين هذا الحجي
اني ماكون زوجة فعليه للشيخ ياسين
اني بين نارين لو اقبل بجبار لو بالشيخ

بس لاتفكرين بيوم اكون زوجة فعليه
للشيخ لاعمري ولا حزني ع وحده فاقده
٣ قطع من كلبهه تفكر تزوج وتعيش...

مافكرت ابد ولاراح افكر اطمع بهيج
شي كل الردته وجنت مجبوره ع القبول
هو حماية بناتي كسرت ظهري لبابه

اذا ماقبلت بجبار لازم اقبل ازوجه جراح
وشلون وانه مره جبيره واتخبلت من موضوع
الزوجه الثانيه وهي مراهقه ويتيمه...

غمضت عيوني عن كلشي وعقد الشيخ
ياسين عليه وماادري وصل الحجي لجبار
لو لسه لان هدوء وماكو طير يطير منهم...

كالو جبار مسافر !! والي يكول بالنجف!!
والي يكول هنا بالبصره بس منهزم!!
والخوف والقلق يوميه يزود...

لبابه.. كلنه ضجنه وتحسسنه من. موضوع
ماما بس ماكو حل التزمنه الصمت...

بيومهه اجه ضرغام وجاب سايق وكال باجر
اداومن ورانيا ويانه بنفس المدرسه..

كمنه انروح كله دوامنه صباحي يجي الخط للباب
ويرجعنه للباب مانعرف احد اني وفجر
هي بصف واني بصف بس كافين شرنه...

نرجع ندرس وعقيق تدرس ويانه ع الواهس
واني اساعدهه ومرات رانيا تلزمهه ساعات
بس ماشاء الله عليهه سريعه الاستيعاب ومبينه
ذكيه والهه طموح...

كملت قرايه وحضرت كتبي ومددت بفراشي
تليفون ماعندي ماما اخذته من ذاك اليوم
سمعت صوت تليفون ماما كمت للمطبخ

شلته جان المتصل جراح هبت بداخلي
رياح الحنين وكانو جان كلشي خامل بداخلي
وهسه رجع اهتز...

ايدي مخليتهه ع الرد ومتردده اجاوب
لولا كلهه نايمه غمضت عيوني ورديت
وكلت الووو بس سمع صوتي سكت!!

شويه واجاني صوته بس صوت هوه يمه
بحيث الصوت يتقطع كال لبابتي شلونج؟!

احس الكلمه خلتني بحالة فوضى
اول مره هيج يلفظ اسمي وصوته والبحه
وصوت النفس الياخذه !!

جاوبته واني العب باظافيري كتله زينه
انت شلونج؟!
جراح.. اتصلت ع امج وجنت ناوي اكلهه
انطيني لبابه احجي وياهه

لاتحجين اي شي بس اسمعيني اني اعتذر
عن كلشي عن كل دمعه وكعت من عندج
وعن خذلاني الج وحسيتي تلاعبت بمشاعرج!!

لبابه سامحيني وانتبهي ع نفسج
واي شي تحتاجي ضرغام والسبع يمج
ادرسي واوصلي والتشوفي صح سوي ...

لبابه.. خوفني كلامه كتله جراح قاطعني
كال لاتحجين اكو شغله عفتهه الج يم
ابرار من تجي تنطيج اخذيهه واحتفظي بيهه

هسه لازم اروح مااوصيج بعد اهتمي
بنفسج ومامتقصد اذيج ولا العب بمشاعرج
واستغلج غمضي عيونج الحلوه اني احبج
واكتشفت اني ماجنت احب بس انتي ايي
حبيتج وماتروحين من بالي ابد...

لبابه.. كال مع السلامه وسده كلامه دفعه وحده
وكانو مستعجل مااعرف شصار بيه
تخالط الشعور عندي!!

خفت حيل وقلقت اكثر ليش خابر وليش
حجه هيج ؟!واني شبيه خليت ايدي
ع كلبي شبيه اني ليش كلبي يركض
ورجع عندي نفس الاحساس!!

بيومهه ماكدرت انام ابد كلما اتذكر
كلامه اكوم ادعيله الله يحفظه حته اذا
مومن نصيبي بس جراح اول حب الي
وماانسه وكفته وفضله ويانه ابد...

مرن يومين هدوء كاعدين ابيتنه
والسبع يجي علينه بين كل يومين
لو يخابرنه...

سمعنه من الحجيه ام ياسين كالت
جبار متسودن وجاي للبصره لان
ع اساس جان مسافر والسبع وضرغام
وياسين متحضريله...

بس هالمره ماكو سلاح هالمره بالقانون
بس تفاصبيل مانعرف شكو بس هذا
السمعناه من الحجيه..

باليوم الثالث ولا اكدر انساه ولا اكدر
اذكره بدون ماتنزل دموعي مأساة شهد
وبابا وخالو انعادت عليه...

صوت صريخ رج البيت رج
طلعنه مفزوعين واشوف كل الي بالقصر
يركض من زلم ونسوان..

الوحيده اني ماجنت احس بشي
ماوكفتني ايد ماما ولاسمعت عياط
الوراي ويكلولي لاتروحين

ركضت بكل سرعتي وكلبي راكض
قبلي وروحي دكلي اسرعي اكثر
اركض بدون شعور من بستان
الشيخ ياسين للقصر بنص الزلم وماادري
شلون عفت ماما...

المنظر الشفته والهوسه وصوت العياط
مال النسوان والزلم دكول لا اله الا الله
بلكن يلگونه وصوت عمه زينب وهي تصيح
جيبولي ابني مامات مايعوفنه !!!!!

.
.
.
يتببببببببع... متابعه ممتعه