رواية وعصفت بنا الاقدار الفصل الرابع وسبعون 74 - بقلم Rozaya1122

وعصفت بنا الاقدار... البارت الواحد السبعون
للكاتبه زهراء ( روزايه)...

( حبايب قلبي نص ساعه وانزل احداث مستقبليه على شكل خاطره مثل ماوعدتكم بالفيس بالغش استمتعوا بقراءه البارت بين مااجهز الخاطره .... انتظروني )
....

لبابه.. جراح شبي ظهرك
جراح.. التفت عليه شبي ؟؟
لبابه.. شنو هاي الخراميش الي بظهرك
جراح... مابي شي هاي من التدريب
لبابه.. ليش بالتدريب يخرمشوك

جراح.. لبس التشيرت مالته وينزع بساعته
وكال هو تدريب كلشي انشوف واكو اثار قديمه
لبابه.. سكتت ماعرفت شحجي اتعوذت من الشيطان
وطلعت الف فكره اجت ابالي وارجع اكول لا موهيج
توصل ...

عدت على السالفه يومين دك تليفوني رانيا جاوبتهه
زرفت اذني بالصياح وهي تصيح على سيوفي
لبابه.. اكو يوم خابرتج اذا ماتصيحين
رانيا.. ولج هذوله الثنين شالعين كلبي سيوف يكتل باخو
وذاك مايخلي نعال مايشمره علي عود من يجي ضرغام
يسكتون انتي شلونج

لبابه.. الحمدلله خاله شلونهه وسهاد
رانيا.. امي زينه وسهاد شالت صارلهه اقل من شهر نسيت
اسولفلج
لبابه.. وين راحت؟؟
رانيا... باعت ذهبهه واشتغلت بشركه اهليه هنا ببغداد
وحسام انطاهه الحديقه بنت بيهه هي وبناتهه بس تخابرنه
ماتجي دوامهه مزعج

لبابه.. وبناتهه وين وصلن؟؟
رانيا.. مروه مورسبت بالسادس وهسه على اساس
بطلت وساره بالسادس بس كسلانات مالهن واهس
بالدراسه انطيهن اكلن ونوم ومسلسلات

انتو شلونكم فجوره وعقيق ؟؟
لبابه.. زينات هسه عطله مخلصاتهه يتابعن تلفزيون ليل
نهار والسبع احتمال هذا الشهر يسوون عمليه لعينه
رانيا.. بلكي الله ويرجع نظره عاد لخاطر هاي اليتيمه..

لبابه.. حجيت وياهه شويه وسديته نزلت جوه جراح طالع
وعقيق وفجر كاعدات يشوفن تلفزيون سمعت من عمتي
نوال حامل حته شفت زوجهه من فوك من يجيبهه جبير
بالعمر موشاب بس يكولون متمكن وحالته الماديه زينه...

عقيق.. قلقه حيل على عمليه السبع رغم انطوا نسبه نجاح
زينه بس اخاف مايرجع نظره وينصاب بخيبة امل اقوى
جان يخابر بواحد واني افتر وراه لحدماكمل سد التليفون
وكال عقيق شبيج رجليج اطك وتفترين وراي

عقيق.. اروح وياك لبغداد
السبع.. شتسوين انه ادخل مستشفى انتي وين تظلين
عقيق.. اروح وياك مالي علاقه ابات يمك بالمستشفى
السبع.. اكعدي راحه

عقيق.. اروح جمره اذا عفتني هنا تلكاني متخربطه
اخذني قبل لا اتخربط شوف كلبي كام يوجعني
السبع... ضحك منيلج هالسوالف كبرتي ولسه نفس
عقلج تظلين هنا واني اسوي العمليه واجي

عقيق.. مااظل جمره اروح وياك انت راح تسوي بأهلي
ومحد غريب هو ضرغام وجراح ابات يمك كول
اي يله جمره كول اي
السبع.. لاااا

عقيق.. والله راح ابجي جمره لاتسوي هيج تدري بيه
بس تنام مستشفى انام وراك والله كلبي يوجعني
هاك اسمعه شلون مخربط
السبع.. شلون وياج لا اكدرلج بويه فلتي عن السيطره
وابن امه وابو اليكدر يرفضلج طلب

عقيق.. بسته من خده وركضت حضرت جنطته
وكلما اتذكر شي اروح اخلي بعد يومين عمليته
الليل كله اصلي وادعي ياربي على الاقل رجعله نظره
ابمكان فرحته بالولد الظلت مرهونه

اخذنه جراح من الفجر وموعد عمليته ب2 الظهر
تغدينه بالمطعم ورحنه للمستشفى اهلي كمل
كل الفحوصات وكلساع وكال جراح عينك على عقيق
اخر شي من صاحوا اسمه كال ادعيلي وراح

عيوني ماوكفت من كدما بجيت كامن يحركني
اسبح باصابيعي واقره ايات وادعي تنجح العمليه
كال الطبيب دقيقه حيل وتاخروا هواي واني
اكلني الانتظار متت من القلق ..

طلع الطبيب مبتسم كال الحمدلله نجحت العمليه
مبدئيا بس بقت من ينتبه من البنج نتاكد رجع نظره
وان شاء الله خير طلعوا للغرفه بين المنتبه وبين
بعده تحت تأثير البنج مايحجي اي شي بس نفسه
يصعد وينزل ...

سادين عيونه اثنينهم بشاش جراح وضرغام موجودين
وياسين كلساع يخابر ونكله بعده مافتحهن لليل يله اجه الطبيب كام يرفع بالبلاستر وطلعوني بره احس رجليه صارت خيوط مااتحمل بعد كلساع اريد ادفع الباب واكلهم شصار..

طلع الطبيب وجراح يمي كاله الحمدلله على سلامه مريضكم
وعافنه ومشه اباوع لجراح اكله رجع نظره يكلي ماادري
هستونه انريد انفوت طلع ضرغام خله ايده بصدر
جراح ودفعه كاله امشي شويه ونجي فوتي انتي
متعي نظرج ...

طبيت واني اهتز مثل السعفه راح يشوفني جمره
رجع نظره وكفت بالباب ونزلت دموعي وهو مرجع
راسه ليوره وكال هسه انه اشوفج بعيوني لو بگلبي
لو من عطرج اعرفج..

ركضت للجربايه اهز بي جمره تشوفني اني
عقيقتك كلي تشوفني ؟؟
السبع.. شلون مااشوفج وعدل كعدته وكعدنه بصفه
وحضني حيييل وهو يشتمني شمه الورده الفواحه

مسح دموعي وهو يكلي عليمن هالبجي هاي رجع
نظري اوكفي لاتتحركين خليني اشوفج سنتين ونص
عقيق وانه محروم منج وماشايف هذا الوجه البريء

تلمس خدي صعد ايده على عيوني نزلهن على شفايفي
كال كومي اوكفي افتري وعينه تصعد وتنزل على طولي
ورجع فتح اديه اثنيهم وكال تعاي ياحبيبتي شلون كبرانه
وصايره تخبلين ...

حضنته واني ابجي من الفرح صح عين وحده
والثانيه كاله لاتحاول بيهه نهائيا طافيه حته عمليه
ماتفيدهه بس هاي وحاليا نظرهه ضعيف اذا مارجعت طبيعي يخلوله عدسه بس على الاقل رجع لحياته
الطبيعيه وكتبله فحص حته يسويله نظارات...

ظليت كاعده يمه مايكدر يفتحهه ومتعلم على الظلام
يكول احس نفسي دخت مدد وغمض واني فرشت سجادتي وكمت اصلي شكر لرب العالمين على سلامته

اجه ضرغام وجراح جابولنه عشه كعدوا شويه
وهو تعبان وراحوا اجت الممرضه ضربته ابره بالمغذي
ونام للصبح كالت لتخلوا هواي يفتح ويشتت نظره
لان يتعب ثاني يوم اجه الطبيب شافه وطلعنه

شكد حاول ضرغام ياخذنه والسبع قفل اله انروح للشقه
وصلنه للشقه وهم رجعوا وجبنه غده ويانه فتحنه باب
الشقه وطبينه جانت مكلوبه كلاب اباوع للسبع
ومستغربه مايوم اجينه ولكيناهه هيج صح نلكاهه بيهه تراب بس على ترتيبهه...

هسه لا الطبلات مو بمكانهن حته وحده من القنفات
متحركه من مكانهه اكواب جاي وخاوليات مشموره
التفتت علي كتله هاي منو مسوي هيج؟؟
السبع.. ماادري يجوز جايين هنا ضرغام جراح تعالي
للغرفه وعلى كيفج رتبيهه راح انظل شكم يوم هنا...

شلت الفرشه لعبت نفسي منهه مدري ليش لان مبين
واحد نايم عليهه ومهوسه وطلعت وحده من الكنتور
من نجي اجيب وياي وتظل هنا فرشتهه ومدد
واني بدلت وكمت انظف بيهه من 11 ل2 هلكتني هلك
وسخه بشكل موطبيعي..

اخذت ملابسي ورحت سبحت السبع نايم العلاج
فدمره يخلي يكعد نص ساعه ويرجع ينام حضرت الغده
بالمطبخ ورحت كعدت يم راسه جمره حبيبي يله
اكعد اتغده فتح عيونه كال ابيش الساعه

عقيق.. ب3
السبع.. وماصليت ليش هلكد نايم
عقيق.. غير علاجك منوم كوم غسل وصلي
الاكل مغطيته حته لايبرد.. كام للحمام واني
انتظره طلع نشف شعره وصلى واجه
للمطبخ وجهه اصفر فدمره تعبان اكلنه بهدوء
كملت سويتله جاي وكعدت بصفه

السبع.. دايخ فدمره مفعول البنج ثاولني
عقيق.. هسه يروح ارتاح شعندك هسه انام شورانه
السبع.. اريد اشوفج زين بس ماجاي تساعدني عيني
عقيق.. تلحك تشوفني وتمل هسه انطيهه مجال عينك
بعدهه جديده وكالك لاتعبهه..

السبع.. ماتتعب بشوفتك كومي للغرفه راح اغفه
عقيق.. رحت وياه للغرفه مددت بصفه فتحت المكيف
وفتحلي ايده نمت عليهه يلعب بشعري واني مغمضه
واشم برگبته مرتاحه حيل اهم شي رجع مثل قبل...

جريناهه نوم ماحسيت غير بوسات على خدي
فتحت عيوني واشوفه كدامي هاي نعمه وهو يحرك
اصبعه على خدي وخشمي وكال صح النوم ياحلو
ابتسمت وحركت اديه وحضنته من ركبته وكتله
هاي العيون التشوفني احسن نعمه

السبع.. كبرانه ومتغيره
عقيق.. لعد شلون مااكبر غير متزوجه
السبع.. والتزوج تكبر مثلا ليش؟
عقيق.. فجر كالت كل وحده تزوج تكبر
السبع.. وانتي شدكلج فجر تصدكين..

عقيق.. مد ايده جوه راسي وسحبني على صدره
باسني من راسي ونزل لرگبتي بوسات خفيفه
تتناثر على بشرتي وكانها ندى الفجر وهو يلامس الورد

بادلته بكامل احساسي مشاعرنه واحساسنه ترجمته
افعالنه بكل هدوء وهو كلساع ويرفع راسه وكال
كلبج شلونه انطي اشاره الامان ويرجع من جد وجديد..

خليت راسي على صدره واخذ نفس بصعوبه
تعبانه وهو يفرك بأيدي وبكلبي لحدما هدأت
حضنته حيل وجانت هاي الليله ليله عناق من بعد
فراق بصر طويل...

مرن يومين تحسن حيل يجي ضرغام علي
يطلع وياه شويه ويرجع كال منرجع نغير جو
وصارلي هواي ماجاي لبغداد وعنده معارف ويوميه
ملتقي بواحد..

لبابه... بس اني وفجر وعمتي اليوم اجه جراح
من بغداد فرحنه بسلامه السبع حته عمتي سوت
عشه ووزعته على الجيران لسلامته..

اجتنه ام اواب العصر تتحمدلنه على سلامه السبع
وبس سألناهه شلونه اواب بجت دكول مايرجع
شكد حجينه وحاولنه مايفيد حته صرت مااخابره
لان نتعارك اني وياه بس يسمع بطاري الرجعه..

تكسر الخاطر على فراك ابنهه لا زوجات مرتاحات
ولا امهات مرتاحات كل واحد همه لون ظلت للمغرب
واجه الشيخ ياسين اخذهه...

جنه كاعدين نتعشه ودك تليفون جراح ابرار كلنه
كمنه ولزمناهه بالسره نخابر بيهه كالت راح ادزلكم صور
اشترك جراح على الخط وكامت ادزلنه صورهه
متغيره هواي سمنانه ومبينه من اهل الخارج مو من عدنه

كاعدين انكلب بالصور اني وفجر وجان تطلع صوره
كدامنه بالمطعم هي واواب كاعده بصفه ومخليه
ايدهه جوه فكهه وهو مرجع نفسه ليوره ومبتسم

بسرعه اخذت التليفون من ايدي فجر وكبرت الصوره
وشمرته وكامت اعرف بيهه جاي تنسل على البطيء
من وره افراكه وادري تحبه وياخوفي يخطب ابرار
لو يحبهه وهذيج الساعه ينكسر گلبهه..

اخذت التليفون مال جراح وصعدت ليفوك خابرت
على ابرار سألتهه عن اواب كالت شقته بصف شقتي
ونروح سوه للجامعه وهنا عباله بالعراق بس يشوف
واحد يحجي وياي لو يباوع يصير نار يكول
ماكو هيج مذله لازم تشوف وتسكت..

ردت اعرف عدهه مشاعر اتجاهه كتلهه اواب
خوش ولد بلكي منا منا جان تضحك كالت ولج
لبابه ديربالج تحجين هالحجي اواب صديقي واخوي
واعرفه يحب وكل همه حبيبته واني اضحك علي
خطيه من كدما متلوع عليهه...

لبابه.. منيه؟؟
ابرار.. مايقبل يحجي بس يكول جنهه شطب ريحان
تهز كلبي بمشيتهه وشكد حاولت وماحجه ولج حته
يدخن صاير..

لبابه.. من كالت جنهه شطب ريحان كلت موفجر
لعد وينهه وين شطب ريحان صح ضعفت بس موفدمره
وفجر گصيره نهيت المكالمه ويه ابرار واخذتلي فره بتليفون جراح ماكو شي بس لفت انتباهي بالعلامه
مال الشريط اكو خطين واني الي ادري بي جراح عنده
خط واحد..

فتحت الكفر والكاهن خطين واحد اسيا والثاني اثير
سديته ونزلت لكيت فجر تغسل مواعين وترگع بيهن
من العصبيه وجراح كاعد بالهول كعدت بصفه كتله
شوماادري عندك خطين؟؟

جراح.. موملاحظه نفسج هواي تدخلين اذا اشتري خط لازم اخذ رأيج
لبابه.. موتاخذ راي بس لازم اعرف اكو مره ماتعرف رقم
رجلهه. الثاني وضامه عنهه اله اذا عنده شي

جراح.. بطلي هاي السوالف لعبت روحي من الحجي
ماعندج غير هالسالفه خلصت من نوال كمتي ادورين
حجج
لبابه.. شبيك تصيح واجبك تفهمني محد كالك انت متزوجلك جماد مومره اذا ماعاجبك هم لاتدخل بحياتي
وكل واحد يعيش حياته على كيفه

جراح..تخبلي بعد بطلي هاللغوه الزايده رحمه لامج
والخط مرات احتاجه جماعتي عدهم اسيا واشتريته
بعد اقدملج عريضه..

لبابه.. كمت من يمه اسلوب ماعنده وصاير على اقل
شي نتعارك سكتت عنه بس ماادري ليش كمت اراقبه
مع العلم كلشي ماالكه بس كلبي مامرتاح..

نمت بفراشي اجه بصفي مد ايده حضني
ماانطيت اي رد ظل يحجي ويرضي واني ساكته
رفعت راسه علي مااحس بلهفتك القديمه ولابحركاتك
ماافتهمتك ابد يوم ثلج ويوم نار..

جراح... والله احتاريت وياج زين ماتقبلين موزين
دكولين وحش المطلوب مني شسوي وترضين
وهم ماراح ترضين..

لبابه.. درت وجهي عنه صح انحب بعض بس صدك
لوكالو الحب موكلشي ابدماافتهمنه بعض ولا راح
نفتهم ومرات احس كل واحد بينه يمثل على الثاني
عن لايخسره بس افكارنه وعقولنه حيل متباعده
والتقارب فقط بالقلوب وهذا مايكفي...

من اجه من السبع وره 4 ايام كال راح اروح
لبغداد معزوم وهم اشوف السبع انس اصريت
اله اروح مالي نيه سيئه بوقتهه بس جنت حابه
اغير جو بالاول ماقبل بس من شافني زعلت
كال يله بدلي ردت اخذ فجر ماقبلت واجت يمهن
الحجيه ام ياسين واحنه رحنه...

الحجيه.. هاحبوبه اواب شلونك يوليدي
اواب.. بخير حجيه انتي شلونج امي شلونهه
الحجيه.. شلونهه امك المره ضغط وسكر من وراك
ولك هجيت فد هجه وعلعلت گلوبنه

اواب.. شسوي غير دراسه اكملهه واجي اشوفك وارجع
الحجيه.. وترجع يااواب وابوك يريد يفرح بعرسك
وانت دكول ارجع من دهر فر امريكا
اواب.. ارجع بس موهسه من تكبر بت كلبي

الحجيه.. بت كلبك صايرهه جنهه حيه ام سليمان
سوده عليه حته سويده صايره
اواب.. وين انتي شو تخابرين من رقم غريب
الحجيه.. يم السويده يوليدي

اواب.. هااااا
الحجيه.. شبيك انبلع السانك اوبي يابعد طوايف اهلي
اواب..يله سلمينه وياج وديربالج على امي موتزعليهه
واريد بوسه ام الصوت ابمكاني تعرفين المن
الحجيه.. لا بالقران مستفلگ الولد من شاف امهات الشعر
الاصفر..

جنت كاعده على الدرج واسمعهه بكل وضوح
كالتلي دكيلي على اواب ودكيتلهه من ام جراح
وكعدت بعيد عنهه اني السويده مووو؟؟ اني الك
يا ابن ياسين اني فجر وانت اواب وانشوف تاليتهه..

لبابه..وصلنه لبغداد تغدينه بالمطعم ورحنه للسبع
مشتاقه لعقيق عافوني يمهه وطلعوا مااجوا لليل
بالنهار اني وياهه وللعصر يجون وبليل شكم مره
انروح نسهر يم ضرغام

رانيا... شوفن رجلي احلاهم يمه جنه كمر
عقيق.. السبع احلاهم
رانيا.. احجن الحقيقه بدون انحياز احلاهم
منو؟؟
لبابه.. ضرغام احلاهم اصلا مايشبه السبع
وجراح يكولون على اهل ابو طالع

صدك بعدج تغارين ؟؟
رانيا.. لا ولج مايلحك يحك راسه من الشغل
ويجي يلكاني اني والجهال صايرين من الروس
قبل فتره راد يضربنه تلاثتنه واخذ السويج وطلع
وراحوا خابروا كالوله ماما. تخربطت واجه يركض

لبابه.. وشسوالكم
رانيا.. رزاله غسل ولبس يجي تعبان واحنه اسكت
هذا يتعارك هذا وانقهر علي لبابه ماكو امل اخلف ابد
لبابه.. وهو شيكول ؟؟
رانيا.. شيكول ساكت يكلي انتي كافيه عليه قبلج
خلفت وراحوا الله ماقاسملي بس موبيدي انقهر

عقيق .. اني هم والسبع جبير مومثل ضرغام
رانيا.. نزوجهم
عقيق.. كلبي يوكف
رانيا.. لعد اني شيصير بيه يمه اسم الله

لبابه.. ل12 ورجعنه للشقه اني وجراح بالهول
والسبع وعقيق بالغرفه جنت نايمه بحضنه
وكتله تعبت اقصد من الفره مال اليوم وكام يبوس
باديه ويكلي الحب يمج وينتهي ...

كلساع اكله هم حبيت قبلي يضحك ويكول
لا كلشي قبلج فراغ اصابعه تتحرك على خصلات
شعري ويخليهن على شفايفي ابوسهن ويرجع
يبوسني من راسي..

ثاني يوم طلعوا السبع مايسوق بعده ويريد
يروح للمهندس اليشتغل وياه واخذه واني
وعقيق عزلنه وكعدنه نفكر شنسوي غده
عجبنه انسوي برياني وكعدنه انحضر وانسولف
مخبوصين...

سمعت باب الشقه انفتح عبالي اجو خليت الشال على راسي وطلعت من المطبخ واشوف مروه بنت سهاد
على اخر حبايه كاشخه وواكفه واني مستغربه
شلون فتحتهه حاجيتهه باستغراب منيلج المفتاح؟؟

ماعبرتني اجت كعدت على القنفه طلعت عقيق
من المطبخ كتلهه جاي اسالج منو فتحلج الباب
ووين تندليهه ؟؟

مروه.. اكعدي لبابه اني جايه عليج مخصوص ولازم
تسمعيني
لبابه.. كلبي يركض وعبالك حس بالمصيبه الراح
توكع علي وتخلي فتات الزجاج كعدت كتلهه فهمينه
الشقه شعرفج بيهه ومعقوله الباب مفتوح

مروه... شمرت المفتاح على الطبله وكالت عشت
بيهه اجمل ايام عمري لبابه اعرف صعب عليج
وعليه هم لان جازفت واجيت بس لازم تعرفين
ويتخلى حد اني زوجه جراح بالسر ...

لبابه.. لا ذبح شهد!! ولا وفاه امي !! ولا فقدان ابوي
الغالي كسرني هالكسره عيوني بدت تغوش وعقلي
رافض يصدك وكلبي يهز بيه مثل المرجوحه القديمه
وبس صوت حركتها البائسه تنسمع واني اعيد
بكلمتهه وهي دكلي زوجته...

اهز براسي بلاشعور مثل المجنونه سجين اعمه
ونبت بنص كلبي اريد اجمع الكلمات واكلهه
انتي كذابه ماطلعت مني ولاكلمه بس صوت
الباب ينفتح وعقيق صاحت جراح تعال شوف
هاي شتحجي دكول مرتك ؟!!!!

.
.
.
يتببببببع......... متابعه شيقه