رواية وعصفت بنا الاقدار الفصل السادس وستون 66 - بقلم Rozaya1122

وعصفت بنا الاقدار... البارت الثالث والستون
للكاتبه زهراء ( روزايه)...

( بارت طويل تعويض لعيونكم ... اسفه على التأخير )

اعتذرلي ؟ وبعد شيفيد اعتذارك
ينقبل ما ينقبل
بالسمه الغربان باعتنه وشرتنه
وقسمتنه نصير جم وجبة اكل
.....

رانيا... عينه بعيني وهي لازمته من زنده محتميه بي
مع العلم مابدر مني اي تصرف حته تخاف جانت الصدمه
اقوى من انطق احرف بس عيوني مفتوحه وصافنه علي
وكلبي رافض يصدك

هو لزم ايدهه ووخرهه واجه عليه قبل لايوصل اني بسرعه ركضت للبيتنه عفت كلشي مااريد اواجه مااريد احجي احس روحي بمتاهه اريد اصرخ واريد اضرب بس ماجاي يطلع بيدي

اجه وراي اني هادئه او اتصنع الهدوء من اثر الصدمه
سحبتني ايده وحضني بسرعه دفعته حيل بكل قوتي
ارتد ليوره وصحت وخر عني

ضرغام... لاتحسبيهه بغير شي خليني افهمج
رانيا.. مااريد افتهم اي عذر واي سبب مااريد ضرغام
ودينه باجر لبغداد وطلكني

ضرغام.. انجبي وسدي حلكج لوينزل امر سماوي بطلاگج
مااطلك خليني افهمج وعود اذا مااقتنعتي نحجي

رانيا.. انت منو؟؟ حته تأمرني وتمشيني على مرامك
كتلك اني مااقبل القسمه على اثنين اطلكني وانت الممنون مدام جبتهه كدامي لوتصير موضرغام مااتقبلك بعد

ضرغام.. ماجبتهه حته اذيج ولا اخليج كدام الامر الواقع
بس كتلج مامحسبلهه هيج حساب وتورطت رانيااااا
اسمعيني واحكمي والله ماناوي اذيج ولا استغفلج

رانيا.. كتلك مااسمع اي عذر اطلكهه تخليهه مايهمني
الرجال الي يدوس على مرته وهي صاينته ومقدمتله
كل متطلباته مايستاهل تفني عمرهه وياه راح دكلي اتحملي لا مامجبوره اتحمل انت انسان واني انسانه انت عندك مشاعر واني مشاعري تفوق احاسيسك من تقبل اني ادك هيج دكه ومااحجيلك عن علاقتي السابقه هذيج الساعه نتعادل  اما هسه اني مااقبلهه على نفسي اعيش ويه واحد مثلك

مثل عليه. دور الحزين والوفي لمرته وبالتالي شطلع
متزوج صديقتهه قبل 5 اسنين بغض النظر عن كلشي
وعن اسباب الزواج شلون دنت نفسك على صديقه مرتك
المقربه

ضرغام.. شنو دنت نفسي احد كالج من ماتت مرتي مات الاحساس عندي احبهه وحزين عليهه بس مايمنع اني رجال وبحاجه المره وبعدين هسه انتي كاتلج ليش تقربتلهه ترى هي مره وحده وبعد ماوصلتلهه وصار نتيجه تفريغ لا اكثر

رانيا.. وتريدني اصدكك هسه من دكوا مره وحده؟
وليش اصدكك موانت نفسك السألتك كتلك شلون اتحملت بدون مره كتلي الحزن مامخليني اشوف بس خلاك تشوفهه واتمم زواجك بيهه

ضرغام.. اسمعيني رانيا زواجي اتممه بيهه سواء اليوم او بالماضي مال اطلكهه وترجع بنيه مستحيل لان راح تبقه
عيبهه عليه موعليهه لاتناقشيني بهذا الموضوع وعسما نايم وياهه الف مره هم مالج حق لان هذا الشي قبلج وانتي موبحياتي اشتم گفه ايدي راح ارتبط بيج

حاسبيني ليش ماكتلج وضميت عنج اي حقج بس ماردت
اجرحج ولاردت اضوجج عبالي اكدر اطلكهه شمدريني
لزگت بركبتي وقسما بالله وروح اولادي كل شهر اني
محاول اطلگ وماتصير ماسامعه واحد تورط تورطت اني

رانيا.. المهم مالي علاقه انت شايف وجهي اللطيف والحنين الرومانسي ماشايف الجانب الثاني اذا انجرحت شلون اكره وتدري كلش زين ليش اطلكت وتحملت الكتل والضيم علمود ماارجع موبس علمود حبك لا علمود اني انسانه ومااقبل كان من يكول يهيني ولو بكلمه

جبتهه وتحتمي بيك وتلزمك من زندك مااعرف شكول
بس الله يسامحك الله اعدل العادلين لا ادعي عليك
ولا احقد هسه العليك اطلكني عيشه وياك مااعيش
واذا تجبرني اعيش وياك تحلم تشوف رانيا القديمه
انت بمكان واني بمكان

ضرغام.. ماتريدين تسمعين مني
رانيا... لا مااسمع اي كلمه مااسمع منك وياريت
حته وجهك مااشوفه ..
ضرغام.. راح اعوفج على راحتج بين مااطلك وعود نحجي
رانيا.. شتحجي انصحك بقيهه لان انت بحاجه المره
لان رانيا ماراح تكون الك زوجه

ضرغام.. لحدالان بالي طويل وياج وعاذرج بس اذا ظليتي تلغين هاي اللغوه اطيح حظج
رانيا.. انت فالح بس بالتهديد كدرتك على رانيا
ضرغام.. لللللللج راح اكوملج

رانيا.. موزين عليك انت رجال متزوج اثنين ويطلب
من عندك طاقه لاتصير عصبي وتتمرض وزوجتك
الاولى بعدهه صغيره وانت ماتتحمل لازم تادي الواجب

ضرغام...لا اله الا الله راح اتحملج واريد اشوف السانج
هذا لشوكت يظل يلغي كتلج ماعندي شب وياهه كفرت
زنيت والله شنو نمت وياهه قبلي يامره مااعرفج جنت
فارغ رجال ماعنده مره بيوم احتاجيت وين اولي اشوفلي كح.... وعندي وحده على ذمتي

رانيا..مااحاسبك على القبلي اصلا اني جنت متوقعه انت واحد ابو نسوان ومستحيل صابر كل هاي السنين لاعبالك عود هاي  اللهفه مالتك بيوم عرسنه تثبت انت ماجان عندك شي اصلا مااستغرب اذا ماهاي اللهفه نفسهه وياهه

بسرعه لزمني من فكي وصاك على اسنانه اذا مااسكتي
اشگ حلكج انتي شي ثاني وتقربي الهه احتياج لا اكثر
لاتقارنين نفسج بيهه يحجي وايده رخت بطرف اصبعه
يحرك على مكان لزمته وكال انتي رانيااا الحب بعد تعب
وسنين حرمان لاتقارنين نفسج بأي وحده ماابدلج وماافضل وحده عليج ومسح باصبعه على شفتي ووخر ايده..

رانيا.. لاتلزمني ضرغام شوفني واكفه بطولي واحجي وعبالك هادئه لااا النار البكلبي مااكدر اطلعهه واعبر عنهه اذا تعزني وخر عني ولاتشوفني وجهك واذا شفت هاي الجايبهه اشحطهه شحط روح يمهه لاتنتحر

عفته ورحت للغرفه اسمعه يصيح خبله سخيفه خلي اخلص من هاي البلوه وشوفي شسوي بيج رانياااااااااا
صوته رج البيت وهو يغلط ويفشر جان الفشار كله على عمامهه اسمعه يصيح اخوات الكح..... ابتليت سويت زين...

رانيا.. ماطلعت من الغرفه لان هو جوه من سمعت باب المطبخ انفتح يله طلعت ملابسه نازعهن وشامرهن على التخم وماخذ التشيرت من الحبل وطالع كلبي نار غسلت
وطلعت اريد اشوف زوجته مثل مادكول

طبيت للهول مال البيت الجبير والكاعه كاعده ويمهه ام جراح وامي بالغرفه وفجر وعقيق كاعدات كدامهه
وهي بس شافتني عبالك وحش كدامهه ادنت ليوره وعود تحتمي بام جراح

فجر.. شبيج فزيتي هاي غانيااا مغت صغغام
رانيا.. عقيق تعالي وياي اخذت عقيق ودخلت للغرفه
كتلهه فهميني موكلتي راح يطلك موهذا جابهه

عقيق.. رانيا حبيبتي هدي حالج هسه اروح احجي للسبع ونفتهم اني مارتاحيتلهه من سألتهه عمه ام جراح شلون اتزوجج ماكالت حمايه وماعندي احد دكلهه هو رادني

رانيا.. ويجوز صدك صدكي بيهه ولاتصدگين بضرغام
عقيق.. اذا يريدهه محد جابره يتزوج عليهه وضامهه
عن الناس هو مايجذب وحته السبع كال صدك ساعدهه
هسه اروح افتهم منه واجي...

عقيق.. طلعت من يمهه وهي ظلت يم امهه اني عندي نظره وحده بالمقابل اذا نارتاحيتله وهاي ابد مابلعتهه
احسهه تمثل والهه غايه ابالهه اني هم عقد عليه السبع
حمايه وجان اي واحد يسالني اكله لان ماعندي اهل
ولحد هسه مااكول حبني اكول ماعندي احد وساعدني

رحت لبيتنه جان باب المطبخ مامسدود فتحته واسمع
صوت ضرغام والسبع وجراح يسولفون ظليت بالمطبخ
وهاي اول مره اتسمع على احد بس استحيت ادخل ليجوه

جراح.. وهسه شراح تسوي
ضرغام.. خلي يهدء الوضع واروح لشيخهم احجيله
شنو ابتليت خطبت منهم فوك ماساعدتهه
جراح.. انت ماساعدتهه الي يساعد مايتقرب انت
متمم زواجك يعني موصاحب فضل عليهه

ضرغام... هم انته انوب شلزگتوا بسالفه متقربلهه
منو بيكم مامحتاج مره بحياته لاتصيرون براسي
يوسف كفرت خوما كفرت مره عندي وبالحلال
وشمدريني راح اتعرف على رانيا جنت رافض ارتباط
حقيقي وعائله

جراح..ليش ماكتلهه لو محاجيهه قبل زواجكم مااتخذت
هيج موقف وانت تدري بيهه مجروحه من هالموضوع
ضرغام.. والله مامتوقع توصل هيج كلت اطلكهه مثل
مادخلنه بالمعروف نطلع بالمعروف

السبع.. ضرغام حلهه البنيه هم خطيه تنكسر بس لازم
تحلهه مدام رانيا رافضه تتقبل الموضوع لازم تشوفلك
حل اخذ ياسين وروح لشيخهم فهمه الوضع

جراح.. وهسه انت تقنعني خفت من عمامهه شعجب
ماطلعت اسلاحك بوجهم ضرغام احجي الحقيقه
البنيه هم عاجبتك وتريدهن اثنينهن

ضرغام.. من اكلك انت زمال وارعن وكلب ابن كلب
الخله النجمه على جتفك كوم جراح من وجهي
تبقه طول عمرك مصخم

جراح.. دروح ماعجبك الحجي لان حقيقه احجي
الصدك محد اكو نسمعك هاي انه كدامك قبل هم حبيت بنت خالي وعرفت لبابه مستحيل بيوم اتقبل ارتبط بنوال حتلو مجرد مساعده ولا حته افكر اساعدهه بس انت عاجبك الدور تعيش حجي متولي

ضرغام.. انت براسك نعال اكلك يكتلوهه بيت عمه
يكلي عاجبتك
جراح.. ليش يكتلوهه اول وحده اخر وحده تطلك
هذيج محكمه وروح انت بمعرفتك قدم شكوه واخذ
ضمان الهه
ضرغام.. راح اكوم ****** سكت جراح

السبع.. انت ليش عصبي جراح كلامه منطقي وواقعي
بس انه اعرف هواي ناس هيج عدهم البنيه التطلك عار
احنه ماانريد انأذيهه صار 5 سنين انته حاميهه مو بالاخير نرجعهه لنقطه الصفر بس لازم تلكه حل واله رانيا تعوفك من حجت وياي مبينه مايهزهه حبك كدام موضوع زواجك

ضرغام.. اني متفق وياهه من زمان اطلك وكلما افتح الموضوع مدري شسوي بروحهه واخاف ابتلي بيهه
اليوم وروح ليث بيدي اخذتهه لعمامهه رغم رفضهه
بس ماتوقعت حته اسلاح رفعوا بوجهي شنو اطلكهه
طلعت حجتي مايصير عدنه طفل 4 عمام عدهه جنهم
جلاب مرعدوني

السبع.. والله اليجي من ايده عسا الله يزيده انت لو مامتمم زواجك جان حجينه وكلنه حمايه وهاي بتكم
ردت الكم صاغ سليم وروحوا تاكدو موهسه انت ماخذهه
لو تحلف ببير زمزم محد يصدكك مره وحده

جراح.. ولا انه اصدك ضرغام ابو نفس مره وحده
شنو فرق المره الوحده عن المره الثانيه

ضرغام.. انت ظل مسلت وراح اكوم ابتلي بيك
وروح اولادي مره ومافكرت وراهه ابد ولاعدتهه
اني اسكت رانيا يطلع جراح يفك بحلكه غسل لهالحلك
مشهودلك اتجيب حطب وتعلگهه

جراح... شتسوي سوي انت ناصحك وفاضحك سوه
احسب احسابك رانيا. تعوفك وانت ماعولت تلكه الانسانه
التريدهه كل عقلك تحمي الماتريدهه وتعوف التحبهه

ضرغام.. راح اروح لياسين احجيله واكيد اول
ماراح يشتغل شلون وليش كوم السبع روح ويانه
السبع.. هاك التليفون خابر عقيق خلي تجي
جراح.. كوم احنه نساعدك تبدل عليمن داز عليهه
السبع.. لا خابرهه خلي تجي..

عقيق..بسرعه طلعت من المطبخ تليفوني عفته هناك
ركضت للبيت لگيته يدك كتلهم اي اجيت رجعت للبيت طبيت السبع كاعد هم من شافوني كالو ننتظرك بره رحت سديت الباب وراهم ورجعتله

السبع.. تعالي ساعديني اريد ابدل
عقيق.. جمره اني جنت بالمطبخ وسمعت كلامكم
السبع.. عقييييييق من يمته تصنتين على غيرج

عقيق.. والله مامتعمده اجيت ولكيتكم تحجون وهي
رانيا دزتني احاجيك  وظليت اسمع وحته من كتلهم
خابروهه اني ركضت للبيت تليفوني عفته هناك

السبع.. تعاي انطيني ايدج
عقيق.. مديت ايدي كومته سحبني من خصري علي
وحيل ضغط كتله اااخ جمره والله مامتعمده
مد ايده لزم شفتي الجوه صح ملامحه باهته لان ماجاي تنعكس على عيونه بس نبره صوته ادل على عصبيته

السبع.. هاي المره سويتهه المره الثانيه ازعل عليج
اذا عدتيهه اي كلمه تجي بأذانج حتلو عليه يحجون
تسحبين نفسج واطلعين وممنوع تسمعين على احد

عقيق.. اسفه جمره والله مامتقصده واني موهذا طبعي بس سمعت لان على رانيا
السبع.. تعاي طلعيلي ملابس اريد اروح وياهم
عقيق.. ماحجيت رحت طلعتله دشداشه وحضرت ساعته
نزع التشيرت وانطيته الدشداشه لبسهه واخذ الساعه
يلبس بيهه ويحاجيني

السبع.. السمعتي ماتحجي بين ماانشوف حل
عقيق.. اني ماانقل كلام
السبع.. ادري بيج يله تعاي نطلع انتي ظلس يم البنات
بين مانرد
عقيق... رش عطر وطلعنه هو راح وياهم
واني طبيت جوه ضجت لان صرت بموقف موحلو. .

رانيا بالغرفه ماطلعت وهاي كاعده كالت ام جراح فجر
اخذيهه لغرفتج ترتاح
فجر..عقيق تنام يمي اخذيهه يمج
خزرتهه ام جراح رجعت خزرت خاله اني بسرعه ضحكت

طبينه اني وياهه للغرفه وام جراح اخذتهه للغرفه الثانيه هاي فارغه بيهه بس فراشات شكو شي زايد نخلي بيهه
فجر طلعت كتابهه تريد تقره كتلهه شبيج وياهه

فجر.. اكو فد شي ماتعرفي بيه اول مااشوف
الواحد تجيني ريحه اذا طيبه اشتمهه هذا الشخص
زين واذا موطيبه هذا موخوش انسان وهاي البنيه
اشتميت ريحه غريبه لاهي طيبه ولاهي موطيبه

عقيق.. من شفتيني شنو اشتميتي
فجر..ريحه زبل
عقيق.. امداج حقيره اني زبل
فجر.. لا جذب اتشاقه اشتميت ريحه مي ورد

عقيق.. لان اني ورده اكلج فجر السبع كال سجلي وياهه
دورات تقويه للسادس
فجر.. تعالي باجر وياي وشوفي اكلج عقيق كولي للسبع
فجر ماتفتهم رياضيات خلي اواب يدرسني

عقيق.. هاااا موكتلج تحبين
فجر.. انجبي شعلي الحب بس افتهم علي وبالرياضيات
موزينه واستحي اكول للسبع
عقيق.. بس تقريني من يقريج
فجر.. شكد فطيره انتي هو اذا شفت اواب تظل معلومه
براسي

عقيق.. يعني تحبي؟؟
فجر.. انجبي حبيش بس اتشاقه وياج
عقيق.. انجحي فجر موتعيدين السادس
فجر.. مدام الدكتور يدرسني انجح لاتخافين يأبرني ابر..

انفتح الباب لبابه هاي انتن هنا كاعدات ادور عليجن
ورانيا تبجي وحدهه كله من وره ضرغام من جاب
هاي كل عقله

عقيق.. ماحجت شي
لبابه.. شتحجي سواد وجهه راحت بدلت واجت للمطبخ
دكول لعمتي اساعدج بالعشه وعمتي انطلقت وياهه
دكول خومانطردهه...

فجر.. عوفنهه عليه هاي دواهه يمي
لبابه.. اكعدي لاتسوين وكاحه خلي انشوف نهايتهه
فجر..مالهه نهايه هاي باقيه على گلوبنه

لبابه.. دك تليفوني بيدي المتصل جراح جاوبته كال
راح نتعشه يم الشيخ ياسين فجر يمي دكلي كليله
اواب يدرسني كتله فجر عدهه امتحان خلي يجي يدرسهه اواب ..

كال هسه اخابره وخلي ام تكعد يمهم كتله ميخالف
اعرف فجر اواب براسهه بس مطمئنه من ناحيته
لان رجال ونعم منه وياريت فجر تصيرله على الاقل
مانخاف عليهه...

رانيا.. كلبي نار وهذا ولا مهتم عافني وراح يم ياسين
وبس اطلع الكه هاي كدامي ضغطت على نفسي وكلت
ماانطيهه مجال كمت لكيتهه بالمطبخ وماخذه راحتهه
طلعت كبه اريد اسوي جان دكول خليهن اني اسوي انتي تعبانه ارتاحي

رانيا... ياريت تكعدين بمكانج هذا البيت موبيتج ولابيت
رجلج حته تاخذين راحتج بي صار ساعه من اجيتي
ماكو داعي لهاي الميانه

اقبال... ماراح الومج حقج صعبه عليج انه من زمان كلت
لضرغام احجيلهه مااعرف ليش ساكت اولهه وتاليتهه
راح تعرفين

رانيا.. خليج صريحه وياي ممكن اعرف شنو غايتج
اني وانتي نعرف شنو سبب زواجه منج راد يساعدج
بعد هالتمثيل على شنو

اقبال.. انه ماامثل صح هو ساعدني علمود وضعي بس وراهه ماظلينه هيج زواجنه عادي ويجيني كل اسبوع
يعني مره ورجال وحته من نتزوجج ماعارضت لان مقدره
وضعه اسبوع يله يجيني انتي ليش مامتقبله الوضع

رانيا.. ذبيت البيدي وسحبت كرسي وكعدت واشرتلهه
تكعد ممكن نحجي انتي مره واني مره خلينه نحجي
مكاشف انتي تحبي؟؟

اقبال.. ليش مااحبه قبل لايكون زوجي اني حبيته
وخاصه من ساعدني حبيته اكثر وتم زواجنه وهو مدللني
مامقصر وياي بعد اكو مره ماتحب رجلهه مثل ابو ليث

رانيا.. اكرص بفخذي اريد اصبر روحي على كلامهه هي موصغيره تقريبا بعمري بس احلى بهواي رشيقه حيل
عيونهه ملونه وبشرتهه حنطاويه عيونهه كبار
حيل حلوه مقارنه بينه هي احله بهواي

سويت نفسي هادئه بس بداخلي بركان بلعت ريگي
وكتلهه انتي تدرين بي راح يطلگج؟؟

اقبال.. ميطلكني المفروض منج تتقبلين الوضع
لان غيرته وشهامته ماتخلي يعوفني بيد عمامي
واتاذه منهم

رانيا.. عوفج من عندي هو مو جان ناوي يطلكج
ترى اجيبه واواجهه كدامج
اقبال.. لااا ابد ماحجينه بهيج موضوع منو كال
يطلگ ترى جابني وانه ماقبلت كتله مااريد مشاكل
وكال تعبت من الروحه والرجعه

رانيا.. يعني علاقتكم الزوجيه تمام
اقبال.. شنو قصدج؟؟
رانيا.. قصدي واضح زواجه مساعده وتممه وياج
مشه حالكم حال المتزوجين
اقبال.. اي طبعا هو كل اسبوع يجيني يومين
والحمدلله وضعنه طبيعي مثلا تخيلي يومين يمي مايسوي شي؟؟

رانيا.. ماشي من يجي اريد اطلع الجذاب بيكم
منو انتي لو هو اكعدج كدامه واحجيلي هالحجي
اقبال.. انتي مشكلتج لان متقربلي ترى كل اثنينهم ثالثهم
الشيطان شحال لو بالحلال

رانيا.. عيوني كامت تلزك احس ضغطي علك من نرفزتهه
مستفزه حيل وتحجي بثقه حته ماخايفه
عفتهه وطلعت من المطبخ اعصابي ترجف مااتحملهه بعد...

حته عشه ماتعشيت اني هسه اصدك منو واكذب منو
هو يحجي شكل وهي تحجي بثقه وماخايفه حته من اكلهه اواجهكم تبتسم معناتهه كلامهه صحيح...

فجر... اجت عمه ام جراح كالت اواب اجه كومي لبسي
واطلعي لبست صايه فوك ملابسي وخليت عطر وطلعت
عقيق وراي تصيح اله اكول للسبع...

فتحت الباب اني عمه كلت السلام عليكم رد السلام
ام جراح فتحت تلفزيون صوته ناسي  تقربت كعدت كدام التلفزيون واحنه وراهه فتحت كتابي كتله عندي امتحان

اواب.. بالاول شلونج
فجر.. زينه
اواب.. عقلج ابمكانه لو زاحف شويه
فجر.. بمكانه بس ينرادله دفعه حته يشتغل
اواب.. لا مااندفعه هسه من كيفه يشتغل

فجر.. ابتسامه مرسومه على وجهي وبده يگلب بالملزمه
يقره السؤال وكال انتبهي وياي وبده يشرحلي
مركزه وياه افتهمت السؤال كال عيدي عدته كله
بدون مااغلط

اواب.. موهذا عقلج سليم چااا شبيج يم المدرس
فجر.. بدلوا المدغس
اواب.. اخذج انه والله خوش افهم
فجر.. اي خوش تفهم بس انت عندك دوام
اواب.. بصوت خافت والله ياام اللسان لاجل عيونج
كلشي يهون وانعل ابو الدوام

فجر.. سويت نفسي اكتب بالورقه ماسمعته
استمر بالشرح لحد ماضبطلي الامتحان
اي مسئله مكتوب وزاري كمت احلهه خوش يفهم
ابو اذانات

اواب.. هسه اروح عندج شي بعد
فجر. لا شكغا تعبتك
اواب.. اي والله تعبتيني حته الله مايرضى
ساعتين واني اصبر بروحي
فجر... شنوو
اواب.. اذا احتاجيتي شي خابريني

فجر.. مافهمت قصده طلع ردت احاجي ام جراح
طلعت بسابع نومه اكول ماخذه راحته ويحجي
بصوت عالي ومترهي...

ماطلعت وراه بس سديت باب الاستقبال وكعدت
ام جراح كالت هاكملتوا هستوني نمت وهي عيونهه
منفوخه من النوم بس كامت بوجهه لفراشهه كملتهه

لبابه... يوميه كمت اتحضر البس ومكياج ونتابع
فلم سوه لو احضر فواكه ناكل سهره بسيطه
يحاول يلزم نفسه واخرهه تنتهي اله يغسل بمي
بارد يله يسيطر على وضعه

جنت لابسه شي قصير وربع ردن وفاتحه شعري وشايلته
من الجوانب انفتح الباب تلگيته بابتسامه
كتله هارجعتوا شو تاخرتوا دنك راسه بتعب باسني من
كتفي وسد الباب ..

جراح.. ضرغام مخبل تعارك ويه ياسين كطع بينه
السبع كاعدين وصار عنده فقدان جزئي وهاج راسه
علي بس من الصياح
لبابه.. وتالي شلون؟
جراح.. ياسين باجر يروح لعمامهه وانشوف عوفينه
منهم مشتاگلج حيل

لبابه.. اني هم تسبح احضرلك الحمام؟؟
جراح.. لا اولهه وتاليهه من وراج اسبج وبمي ثلج
وماتطفي النار البيه

لبابه.. مد ايده على خصري سحبني علي ورحنه
لجربايه مددت بحضنه ظلينه انسولف عن ضرغام
وشويه وتغير الموضوع بديت احس بلمساته
ماادري ليش جنت حيل محتاجته واريد البي كل طلباته
رغم لمساته قويه بس استسلمت اله ...

لازمني من فكي وضغطه اصابيعه قويه ويبوس
بشفتي بشراهه خليت ايدي على ظهره نبتت اظافيري
بي اريده يحس بس بدون احساس يمكن استسلامي
اله خلاه يفقد

رغم الالم ورغم ضغطات اديه القويه بس جنت مبادلته
بكامل احساسي اذا ارفض واصيح وخر وادفعه
يتخبل مثل الليله الاولى واذا اسكت صح عنيف بس
تعامله باحساس ومشاعر...

نزع تشيرته وخلاه على عيوني حجيت واني من بين
حالتي جراح لاتأذيني بسرعه طبع بوسه على شفتي
وكال لاتقاومين ومااذيج ...

مااعرف اوصف الاحساس الم على حب على لهفه
على گلوب احتضنت بعد فراق طويل
على ارواح تعانقت واجساد تقاربت
كل الي اعرفه اني تقبلت السواه جراح رغم المي ...

ابتعد من عندي وهو يرفع تشيرته من وجهي
وكال لبابه متأذيه فتحت عيوني باوعتله
العرك تارس وجهه عبالك جان بعز الحر مال تموز

هزيت راسي متألمه ابتعد وحضني يفرك بكتفي
واني ضامه راسي بصدره شكد متأذيه بس
حاسه بحبه ومشاعره وعرفت نقطه عند جراح مايريد
اقاومه مجرد مااحاول ادفعه يتخبل عنده حب التملك...

رانيا.. امي والجهال نامو واني مخليه ايدي على خدي
وكاعده فتح الباب ووكف ارتجه وكال نستأذن
بالدخول سيدتي..

درت وجهي عنه مااحس غير اديه تحاوطني
من ظهري دفعته حيل حته انظربت بالكنتور
وصحت لاتلزمني روح لهذيج قبوله

ضرغام.. رانيااا بيمن احلفلج والقران مااريدهه ومابيناتنه
شي واتمنى اطلكهه هسه شسويلهه اذا عمامهه جنهم
جلاب لعبوا لعب كدامي ضربوهه شنو اطلكتي

رانيا.. اسمع ضرغام مرتك المصونه دكول احنه علاقتنه
الزوجيه تمام ومثل المتزوجين وكتلهه ترى اواجهج وياه
كالت واجهيني

ضرغام.. هاي هي كالت هيج؟؟ امشي كعديهه
وجيبيهه حته افرك حلكهه هي مره وصارت نقمه
عمي اصوم شهر اكفر عن هذا اليوم بس ترضين ا

رانيا.. لاتحاول باجر وديني لبغداد وشتريد سوي
وياهه اني مالي خلك وتعبانه واريد ارتاح
لاتشوفني هيج لان حيل ماعندي

ضرغام.. واني وين اولي ترضيهه ادور كح.... اخر عمري
رانيا.. دور ماهم انتو الضباط كلكم هيج
ضرغام.. لاتجمعين هسه لو مدور واندل مكانهن
ماانقهر كلبي

رانيا والله العظيم قبلج وماردت اكلج حته لاتنكسرين اكثر وانتي مجروحه شسويلهه اذا مانحلت وجبتهه
غصبا عليه اعوفهه يكتلوهه ابات يمهه اخاف منج

رانيا... انت تخاف ؟؟
ضرغام.. يابه وداعه جبار الماحلف بي جذب من اشوفج عصبيه اخاف
رانيا.. لاصدكتك

ضرغام.. هسه نظل مطنگرين
رانيا.. لاتعال بحضني
ضرغام.. اوكفي خلي اسبح واجي لللللج رانيااا
لاتعلعلين كلبي

رانيا.. اني راح انام يم الجهال وانت روح يم
قبولتك ام فضل ابنك المستقبلي صارلك مده
محروم روح تعوضك
ضرغام.. شلون حلگ حته مايهونلي اكوم افركه

رانيااا لاتحجين هيج كتلج صارت وغلطه ماتكررت
خريطه ساعه السوده لو بساعتهه عاطل ولاهاي
الدكه منا انتي ومناك جراح جنه ططوه فوك راسي
يعوف السالفه وكال نمت وياهه ...

رانيا.. مامجذب مونمت وياهه ولك صديقه مرتك
شلون الك نفس بيهه
ضرغام.. ولاكه بعينج .. واذا صديقة مرتي اسمهه
مره وبعدين قابل اخت مرتي بربج جايه تحاسبيني
على شي قبلج

رانيا...  مااحاسبك بس اكلك اني مااقبل بالمناصفه
ضرغام.. بس اصبريلي ياسين باجر يروح ويحلهه
هسه راح اسكت عنج خلي تنحل وهذا حلكج اله افركه
ساعه ولك وساعه طبك طوب

رانيا.. اخذت مخدتي وكتله ماانطيك مهله
لان بديت ارسم عليك دوائر وعلى ساعه
اتخذ قرار وتلكاني بالمحكمه

ضرغام.. اذا انتي مره بنت ابوج سويهه
وشوفي اذا ما ******** وعود تعاي عاتبيني

رانيا.. عوذه شلون الفاظ ليش تفشر
ضرغام.. امشي للللج وحق الله لا اكوملج اكلهه
هيج تكلي هيج راسج بي حجاره عود من مااطلكهه
احجي

رانيا.. الصوج موبيك بيه اني الكاعده استمعلك
عفته واسمع صاح بصوت عالي اني الج يالرعنه
رحت مددت يم جهالي روحي واصله لخشمي
واي تفكير واي قرار ماعندي...

عقيق.. جمره هيج البس حلو لو اسوي الشال هيج
السبع.. مااشوف
عقيق.. لا شوفني بكلبك شسوي بعيونك
السبع.. بابتسامه انتي بلسم على الجرح وين
مااحطج اصيح افيييييش

عقيق.. راح اروح اول يوم ويه فجر ادعيلي
بالي راح يظل يمك من تحتاج شي هاي خليتلك
عصا اشر بيهه خاف اطخ بشي

السبع.. عينج بالكاع من تمشين ضحك بالشارع
ماكو رفعه عبايه واطلعين الملابس ماكو
اليحاجيج ممنوع تردين علي بوجهج للسياره
تخابريني على اي شي يصير وتنتهبين على درسج

عقيق.. صار خليتلك مي يمك خاف تعطش والتلفزيون
مفتوح بس تعلي صوته مدد انت تعبان اليوم حته
وجهك اصفر...

السبع.. شو تعاي خليني اشبع منج
وحضني حيل وخر القميص وباسني من كلبي
كزبر جلدي وكال ديربالج على كلبج ياكليبي..

بسته من وجهه واني لازمته باثنين اديه
دفعته على كيف مدد على الجربايه نزعت
الجنطه ذبيتهه بالكاع وصعدت يمه رفع راسه
ليفوك واني كمت ابوسه بهدوء من ركبته وهو ساكن
ومغمض ردت ابتعد لزمني من ايدي...

فتحت قميصه وخليت راسه بحضني كمت العب
بشعره وايده الثانيه احركهه بمنحنيات على ركبته وصدره
لاول مره احس جمره طفل وبادين امه تنومه...

يمكن اقل من عشر دقايق وغفه سحبت نفسي من عنده
وبسته من كصته وغطيته وطلعت قفلت الباب ودفعت من بره لان هو عنده واحد جوه ورحت للفجر..

شويه واجه السايق طلعنه وهي تسولفلي
عن المدرسين صعدنه الشارع العام
وانشوف جبار ووياه اسعود وعكاله وعباته
وواكفين على الشارع ويباوعون باتجاه بيتنه
هذا شوكت طلع مو على اساس ينحكم؟!!!....

.
.
.
يتببببببببع............. متابعه شيقه