وعصفت بنا الاقدار الفصل التسعون 90 - بقلم Rozaya

وعصفت بنا الاقدار... البارت الثاني والثمانون
للكاتبه زهراء ( روزايه)...

وها أنا اليوم أدوس بساطك غريبا،
بعدما كانت هذه الروح منزلي" 🖤
.....

فجر.. فتحت عيني مغوشه عطر قوي بخشمي
راسي على رجله وهو كاعد ركبه ونص بس فتحت عيني
صاح هاي دكه تسويهه ؟!

رفعت نفسي من رجله ولازمه راسي صداع عندي
اتذكرت شصار جان يبوس بيه وهسه فاقده يافشلة
الفشله همزين عقيق ماتدري كتله يمكن هبط ضغطي

اواب.. شو تعالي وخله ايده على كصتي وكال شبيج
فجر معقوله من البوسه شتحسين شو وجهج اصفر
فجر.. مثلا شنة معقوله عندك شك؟؟ ترى اني قطه مغمضه وانت هجمت عليه بخرامشيك شتريد مني اظل واكفه على رجليه

اواب.. انعل حظج سويتيتي اخرمش دكومي اطلعي
لايكولون شو شسوالهه ووضعج مومال بوسه احتمال
مريضه بعدين. نحجي

فجر.. لاتحجي لاحد
اواب.. المن احجي شوصايره تك خيط من يحجولي
عليج بالديوان عوزج بس عگال وهسه كله كلامج
مگلوبي يجذبون عليه؟ لو انتي انثولتي؟

فجر.. هسه بعدني خجلانه وجديده ماراح ارد عليك
خلي اصحه زين واشوفك منو الثوله
اواب.. تعالي قبل لااطلعين وادنه عليه لزم ايدي
ومشه اصبعه على. شفتي وكال ترى مبينه شجنه
نسوي روحي غسلي

فجر.. ابتسمت وطلعت شكد هيلك عبالي ثگيل
بس اذا هو السبع ودكول عقيق منحرف بعد
اترجى من اواب طلعت من الغرفه همزين محد اكو
الصاله فارغه ركضت للمغسله

ومااحس غير وحده تلزمني من ثوبي وكالت لزمتج
وين جنتي هاااا وضامه وجهج داكه دكه فجر افندي
فجر.. اهووو عقيق وخري خلي اغسل
عقيق.. باوعيلي شكو دايره وجهج عينج مكسوره
فجر.. اي مو ***** وانكسرت عيني ولج وخري على اساس ماتعرفين لو اله تخليني اغرد

عقيق.. عزااا هاي شبي وجهج اصفر شنو متخربطه
وحمرتج هلو هلو ماسحهه ابن الشيخ متستحين
حقيره تتختلين بالغرف وابيتهم واطلعين هيج
فجر.. انجبي انعاله ام السوالف العوجه الله يرحم
ايام زمان وسوده عليه ابن عمي جان اسمه السبع
ويمج يصير عصفور منحرفه امشي خليني اغسل

عقيق.. وكفت يمهه غسلت وكعدت على الدرج مثل
الدايخه خفت عليهه مامعقوله من البوسه باوعتلي
وكالت امشي من يمي جاي تحسسيني مسويه
جريمه

عقيق.. موجريمه بس وضعج مايعجب قابل بس انتي
تنباسين خاف بيج شي
فجر.. ميخالف اروح للدكتور واكله اعاني من مشكله
عويصه بالبوسه اخرب ويجوز من تطور الامور يشيلوني
بالاسعاف عقيق ام كفشه لصمي حلكج

عقيق.. كعدت بصفهه وكلبي اختنك كتلهه فجر مشتاقه للسبع
فجر.. سوده عليه كل من ورا البوسه اتذكرتي شوفي هاي
مساوئهه هم خربت وهم هيجت مواجعج كومي نتمشه
بالبستان

عقيق.. طلعنه نتمشه وحدنه ام اواب تخبز ولبابه يمهه
كاعده والحجيه تصلي طلعنه من الباب الخلفي الجو حلو
وبدت الدنيا تغرب تمشينه شويه صار القصر كدامنه
شكد كرهتك ماشفنه راحه بيك دمرنه هالمكان

رجعنه للبيت انساعد ام اواب بالعشه لبابه بليل تحضر غراضهه جنت كاعده ومرجعه راسي على الكنتوري
وصافنه على حالنه شلون عصفت بينا الدنيا وشلون اقدارنه تغيرت بين ليله وضحها

قبل 3 سنوات فرحانين بعرس لبابه لجراح وواحد يحب الثاني وهواي سمعنه كلام من نسوان القصر الي دكول هنيالهه عن حب والي نظره حقد وحسد من نوال واهلهه
وهاي تاليتهه لبابه تحضر نيشانهه لغير جراح واشوف بداخلهه حزن عميق ويقابله نظره رضا بقسمه رب العالمين ...

اما فجر الحلقه بيدهه وسبحان الجمعهم من غير ميعاد
سافر اواب وترك كلشي ورجع ملهوف عليهه لان الله قاسملهم كلشي من غير تدبير رب العالمين البشر
يفشل بي..

اما اني اني اليتيمه الماعندي بالدنيا بس السبع وتاليته
بالسجن مظلوم شكد خسرنه احباب من 2006 وهسه نهايه 2016 خسرنه خاله ساهره الام الحنونه الصابره
خسرنه هواي ابرياء مظلومين لو الليالي المرت علينه
للصبح مانايمين من الخوف والقلق...

انتبهت على صوت ام اواب وهي دكول يبنيات اريد اسولف وياجن عدلت كعدتي وسدت الباب وكعدت
كالت ادري مااكون ام ولا مثل ساهره الله يرحمهه بس اريد احجي وياجن واتسمعني

لبابه راح تزوج هالشهر والسبع البارحه كايل لياسين خليهه تستعجل بالزواج حته داز على اسامه وحاجي وياه
وموصي عليهه ولازم نستعجل نكمل غراضج يمه
باجر نطلع نشتري الباقيات

بالنسبه لاواب ياسين مايقبل يسوي عرس وحفله يكول ماافرح واخوي بالسجن مظلوم ومايفضل فرحته على حساب اخيه عضيده والسبع هو وبالسجن ويفكر بيكم
وانطه لكل وحده صوره حل

لبابه.. يعني اواب شوكت يتزوج؟
ام اواب... اواب بس هالشهر هو هنا عنده امتحانات لازم يرجع والسبع كال مايسافر اذا ماياخذهه وياه مايعوفهه
وهي على ذمته وكال ياسين اسويلهم عرس بدون حفله بس عشا وانتو اتزوجوا ببغداد وره اسبوع تسافرون..

فجر.. اني اسافر ولبابه تزوج وعقيق وين تروح؟
ام اواب.. هذا بيتهه عقيق احنه كاعدين بخير رجلهه
بس السبع كال ماتكدر تظل بالقريه تضوج حسب كلام
السبع كال تروح. يم ضرغام وهو يتكفل بتعينهه ودوامهه

لبابه.. مو المفروض ضرغام وجراح نلكاهم سند النه اذا مولخاطرنه لخاطر السبع شوفي محد دك علينه وسأل
ام اواب.. لايابنتي لاتاخذون غيبتهم جراح مريض حته مجاز من الدوام ورايح هو وصديقه لاربيل يتعالج ورغم هذا يوميه يخابر ياسين يسأل عليكم

وضرغام بعد السواه ودخل جبار السجن حزب جبار
يركض وراه وتهديد وحته ناشرين عنه يحجون ويتهموا
عود ياخذ رشوه ويشوهون بسمعته وهم والله يخابر ويأمن ياسين انتو بنص اهلكم وياسين ابوكم

عقيق.. هي تحجي واني كوه حابسه دمعتي هاي تاليتي بدونك ياجمره مالي مكان ومن بيت لبيت لو شنو وضعي اعيش خطار يم الناس صاكه على اسناني وكوه صابره

سمعنه صوت ياسين كال يالله ودك الباب لبسنه الحجاب
ودخل سلم واجت عينه عليه شافني محتقنه عاد نفس حجي ام اواب واني مدنگه بالكاع قطع كلامه وكال بويه عقيق السبع يسلم عليج وكال اسألهه شنو تريد لاتجبروهه

اذا تريدين يمي اخليج على راسي واذا يم ضرغام والنعم منه واذا ماتريدين اثنينهم ترجعين لبيتج يم ام جراح
هم بكيفج

فجر.. العفو شيخ بس البيت موبيتنه هو كله بيت جراح
والصراحه مالنه اي كعده لا الهه ولا النه بذاك المكان
يم مرت جراح

ياسين.. لا يابنتي جراح بده من الصفر وراتبه جان يله يكفي مصرف لاهله البيت الجبير وبيتكم وبيت ضرغام
هن بيتين موتذكرن وفلشوهن وسووهم مشتملات حته
تكعدون سوه بس كلهن للسبع محد اله الف بيهن جراح
كاعد بخير ابن عمه

فجر.. هااا ماندري والسبع ماحاجي النه
ياسين.. مايحجي ولا يقبل البيت الجبير لجراح ولايداعي بي وجراح يسدد اله كل شهر بس البيت الثاني المشتملين
اله ودنگ راسه وكال القطعه والبيتين كلهن بأسم عقيق

عقيق.. ركزت على كلامه وهو يعيده مرتين وكلهه باوعتلي هنا مااتحملت ابد بسرعه بجيت بجيت بألم
وحرقه گلب ماعافني جان حاسب احساب لكلشي
وحته مأمن وين اكعد ليش هيج ياجمره اعاتبك لو شنو اسوي بعد مابيه اتحمل افراك...

من شافني بجيت كام طلع والبنات يسكتن بيه
شلون اتحمل اعيش وحدي شلون افارك فجر ولبابه
واعيش وحدي والسبع ماكو شلون فرت بيه الدنيا
شلون اتحمل احس طاقتي خلصت واني اعد الايام
على اصابيعي...

خلصت هاي الليله مثل القبلهه واني فارشه سجادتي
واسأل رب العالمين يفرج عنه لح بالدعاء احنه نسأل
رب المعجزات

صليت الفجر ونمت كعدت على صوت لبابه تبدل راحت هي وام اواب للعشار تكمل تجهيزات وفجر هستوهه كاعده كمنه للمطبخ سلمنه. على الحجيه وسوينه ريوك
نزل اواب من فوك استحيت اخذت كوب الجاي ولفتي
ورحت للغرفه ...

فجر..اسويلك ريوك
اواب.. لااا تريكت من الفجر ويه ابوي
فجر... هاا شعندك كاعد
اواب..صليت وابوي عنده طلعه وتريكت وياه
فجر.. شبيك تباوعلي هيج
اواب.. العصر اخذج لطبيب وضعج ماعاجبني
فجر.. مابيه شي لاتلح ترى تخربطت من وراك

اواب..لان بستج ؟؟ الله بالخير حجيه فجر ام اللسان
تهزج بوسه وبعدين تعالي لو صدك مصدومه مابادلتي
هذا اضفرج بركبتي حافرهه

فجر.. انت ليش مستفز وتفشل الواحد ترى انت اجيت
ماشايف لاثگلت ولا استحيت ذبيتهه براسي ترى
اني انثى وكلي مشاعر شكالولك بايس جبار ومااحس

اواب.. نسخه من ضرغام تكج ماكو لاتحاولين
تبررين لروحج طلعتي رومانسيه زياده عن اللزوم
وعليهه لازم نعودج على الموضوع حته ماتتخربطين بعد

فجر.. اواب اسكت ترى مقهوره
اواب.. خيرج
فجر.. صدك بعد شهر نتزوج ونسافر
اواب.. اي عندي امتحانات مااكدر واذا رحت مالي حق ارجع لان دوام اقل شي 8 اشهر ومااكدر اعوفج وحدج
نسوي عرس بسيط

فجر.. مااريد عرس اصلا اخذني للبغداد وانت سوي هنا
ومناك بالفندق مااريد هوسه واصلا مااكدر افرح وعقيق
دمعتهه بعينهه

اواب.. الله كريم يله راح اطلع رايده شي
فجر..لااا سلامتك كام من الكرسي كرص خدي وطلع
احس حياتي فوضى لان كلشي صار بسرعه بسرعه
ماجنت رايده هيج ابد ..

رانيا.. ضرغام وتاليتهه فهمني والله اذا صار شي عليك
اموت وراك انت ماتخاف يوميه مهدديك شيردون منك
ضرغام.. ******* **
رانيا... قدم شكوه عليهم لاتستهزء بالموضوع

ضرغام..عوفج من هاي السالفه اسامه خابرني الاسبوع
الجاي يريد العرس وخابرت لبابه كالت ماعندي شي كملت غراضي باجر اخذ اجازه للجهال وانروح للبصره
لاتعوفيهن وحدهن البنات ومناك اروح للسبع اشوفه ...

رانيا... ثاني يوم حضرنه الغراض وطلعنه بالي مامرتاح ضرغام يوميه تهديد حته نشروا عنه ويسمو عميل
حارو شسوو واني متخبله وهو ولايمه يكول كل واحد يموت بيومه وطبعا كل الي بالجيش ماهامهم الموت
وكلمتهه المعتاده كل واحد بيومه ...

وصلنه للبصره لبيتنه المشتمل وضرغام راح للسبع
خابرت البنات طلبت منهن يجن ماقبلن كالن لبابه
ماتوصل ذاك البيت وظليت حايره شلون اروحلهن
حاولت شكد اقنع لبابه ماقبلت كالت مااريد الزفه تطلع
مناك مولهدرجه اريد اذي جراح ...

تالي ضرغام كام ياخذني يوميه الهن احضر وياهن
والجهال اعوفهم يم امي كملنه كلشي ورحنه لبيتهه
رتبنه الجنط وعيالهه ناس مثقفين حته ماادخلو بس
يخابرون محتاجين شي ...

لبابه.. كاعده بالبدله واباوع بالمرايه وام الصالون تشتغل
بشعري صافنه على قدري الي افتر افتر وخلاني ارتبط
بانسان ثاني ساعات تجين عصره روح مثل المخاض
وروحي تريد تطلع واني اتذكر جرح كلبي ...

ماادري منين جبت القوه منين جبت هاي الجرأه وقررت
ارتبط جراح من الماضي اغمض عيني اشوفه سراب
من ينذكر اسمه مااهتز الوجع والصدمات تقوي الانسان
وتخلي شخص ثاني..

شكد حبيته شكد بجيت علي بس بنفس الوقت طلع من كلبي من غدرني ماهامني اتزوج فقط لو كايلي اريد اتزوج انتي ماتتحمليني احتمال اقتنع واكول حقه بس من اتذكر يباوع بعيني ويكلي ماابدلج وثاني يوم يطلع
متزوج و4 اشهر لو اتذكر من يتعنه عليهه لبغداد واخابره
اكله مشتاقتلك الغرفه وحشه يكلي واني هم واني واني وهو سهران وياهه كلهن هذني بلحظه الي اتذكره واحن اله يتراكمن كدامي واكره نفسي ....

رانيا وياي كملت واجانه ضرغام ماكو هوسه ولاغريب
ابيت الشيخ ياسين اجت سيارتين وودعت اخر محطه
من حياتي وخليت رجلي بقطار جديد وماادري شراح
يصير يوكف بيه باقرب محطه لو يكمل طريقه...

بالسياره ماحجينه ابد لان مخبوص زفه وهوسه على الشارع واهله واصدقائه فرحانين وصلنه للاستوديو اخذت صور وبس رانيا وياي فجر ماقبلت تعوف عقيق
لان خلصتهه بس بجي وكلما اباوعلهه تدمع عيني ...

طلعنه من الاستوديو لبيتنه مااتزوجنه بفندق اجت علا وامه ومرت اخو واخواته الكبار ظلن يمي بحدود الساعه
وكل واحد راح لبيته وظلينه وحدنه مجرد ماانسد الباب اختنكت كلبي اوجعني خايفه حيل خاف اتذكر وتخرب لو انفعل شكد قريت ايات شكد دعيت بس الدمعه محصوره بعيني..

مجرد مااتذكر حالته هسه شنو الجان مايقبل البس ضيگ هسه بدين رجال غيره اهفي بيدي من الحراره التطلع مني واسامه بره ويه جماعته ياخذون صور ياربي ساعدني وخليني قويه ومااتفشل ...

فتح الباب ودخل اني كاعده على الجربايه خله تليفونه
على الميز واجه كعد بصفي ابتسمت بوجهه مد ايده على اكتافي وحضني صار راسي على كتفه وباسني من راسي
وكال ادري بيج خايفه ومنفعله حته ايدج ترجف وبارده
هدي حالج تعرفيني شنو ماكو داعي لهالخوف..

لبابه.. اريد اطمئن مااكدر مد ايده على فكي رفعه وباسني من شفايفي وابتعد كال كومي خلي نبدل نصلي خليج
طبيعيه يحاول بس يهديني بس يبعد الخوف عني بس
اني عقلي قافل ماجاي يهدء وكلبي رافض يضرب بجدران صدري ومنتفض...

خلاني على راحتي بدلت وغسلت وتعشينه امه جايبه العشه ويحاول يشغلني بغير مواضيع بس الخوف مبين عليه صلينه واني ادعي يارب يارب ساعدني اول زواج
اله واني مو بالوضع اليتمناه...

رحنه للغرفه هو مدد واني احاول الهي روحي ساعه افتح الكنتور ساعه اشيل الجنطه وهو مركز عليه اخر شي كال
لبابه تعالي عوفي هاي الخبصه قريت ايه الكرسي بكلبي
ورحت مددت بصفه نمت على ظهري وعيني بالسگف
رفع خصله من شعري ولزم ايدي ودنگ على شفايفي
باسني جامده بمكاني حته مااعرف ابادله بالي مشتت...

اخذني بحنانه وهدوئه باسني من رگبتي ويحرك اصبعه
على بشرتي وايده مدهه يبعد الروب مال السيت هناا بعدني اضغط على نفسي وحركاته خلتني اهدء بس عقلي
وكلبي الماجاي يهدء ...

غمضت عيني وهو ايده بشعري ويبوس بيه واشوف هذيط الليله مال عرسي كدامي وغيرهه وغيرهه
مااعرف شصار بيه واني اتذكر حرگه كلبي لو الصار لو العشته بكل ليله ويه جراح كلبي فقد اخر ذره صبر
وكسر كل الحواجز ومنعني...

دفعته بدون شعور واني ابجي بصوت عالي واعيط
وخر عني واتوسل بي ابتعد بسرعه وهو مصدوم من حالتي انهاريت اصرخ بعلو صوتي لاتلزمني الله عليك
لاتلزمني وخر ايدك عني..

مااتحرك ابد واكف ويباوعلي واني منهاره جريت الغطه
خليته على راسي وابجي جوه الغطه يمكن بالربع ساعه اني على هاي الحاله احس الالم انعاد من جديد ومأثر على نفسيتي حيل ماجاي اتجاوز الصار بيه موحبا بالماضي بس الم وكسرة روح ماجاي تنجبر...

حسيت ايده على راسي وهو يكول لبابه هدئتي
اشهك جوه الغطه وملابسي ماتستر وفشلانه وخجلانه
من السويته وخربت عليه اول ليله بعمره رفع الغطه
مني واني لازمته سحبه بقوه وجرني من ايدي وحضني
حيل ايده على ظهري يحرك بيهه ويكلي اهدي اهدي
مااسويلج شي...

بجيت بحضنه بجيت واني اتذكر واكله ماجاي اتحمل
ماجاي تنجبر روحي اني اتأذيت حيل اتأذيت بهيج ليله قبل سنوات وراح نص عمري بالالم انت ماتستاهل وحده مثلي اني اكرهه اكرهه السوه بيه هيج دمرني
اخذ احلى ايام شبابي جنت احجي بدون وعي مامنتبهه على روحي ...

اسامه... اشششش اهدي كلشي راح ايام شبابج هسه
بدت وانه وياج خطوه بخطوه اهدي حبيبتي والله
مااتقربلج بس اهدي لاترجفين لبابه حبيبي على كيفج

لبابه.. سكن روعي واني بحضنه رجع نفسه ليوره ومدد وخلاني على صدره كتفي طالع لابسه بس السيت الابيض
دنك باسني من كتفي وهو لازم ايدي لحدما هدئت وبطلت شهكه...

مافتح موضوع ولا حاول يعيد نمت بحضنه تعبانه
وهو يلعب بشعري فتحت عيني هو كاعد بس بعده
بالفراش بس كتله صباح الخير باسني من شفايفي
وكال صباح النور شلونج هسه

لبابه.. زينه اني اسفه
اسامه.. لاتتأسفين ماضي وراح صح متأذي وصح كل رجال مايتمنى مرته بهالوضع بس اسأل الله الصبر
الانسان موكلشي نفسه وشهوته لازم يراعي غيره
بغض النظر المتعرضتله بس مبينه صدمتج قويه
ومااريد ازودهه عليج

لبابه..ياريت كلهه مثلك تفتهم غيرهه ولو كلهه تعامل نسوانهه بهالحنان جان كل عائله تلكاهه عايشه بسعاده
اسامه.. ماكو كلهه ماكو قانون يتعمم على الجميع لكلشي شواذ واستثناء راح دكولين شنو الجابره يتحملني وقابل
مرته متحطمه من زواجهه السابق وهالشي حيل صعب عليه بس كل موقف انمر بي بحياتنه درس النه بالمستقبل

اني ماراح ادخل بتفاصيل وياج بس عرفت سبب انهيارج وهالشي شايف عنه بعيني من جنت صغير جان عمري تقريبا 13 سنه او اكثر وقبل كاعدين ابيت جدي الجبير
كل عمامي بي وجان عرس عمي الوسطاني وجابوله ابنيه صغيره عمي انسان همجي الى درجه جنت اسمعهه شكد تووسل بي يعوفهه بهاي السالفه شباك غرفتهم على السطح واني دائما فوك وصرت بس اراقبهم

بيني وبين نفسي اكول عمي شكد حيوان خطيه مالهه ذنب ليش هيج يأذيهه رغم ماجنت مستوعب كلشي وبعدني صغير واهل قبل على الفطره بس مرت عمي
لسه بين عيوني شكد جانت تعاني تخيلي جانت ماتكدر تكعد ومن تشوفه تكعد عدل وتجبر نفسهه واشوف علامات الالم مرسومه عليهه تخاف منه عمي يكولون من صغره على اساس بي جني مدري شنو ومتشافي وساعه يكولون مخبل ...

وتاليتهه شنو سنتين كاملات اني انام اكعد صوت مرت عمي وهي تووسل بي باذاني لو الكتل التحصله وبيوم منهن كعدنه الصبح نتريك وصاحوا حركت روحهه وراحت هذيج الشابه ماعدهه اطفال بسبب العنف التعرضتله موكل وحده تتحمل ولا كل وحده تكدر تتجاوز
المحنه

ومن يومهه كبرت وكل درس وكل موقف اتعرضله اتذكرهه حته طلاگ علا ومن تجي تبجي اخاف عليهه
من هذا الموضوع وحجيت وياهه وحلفتهه خوما يعنفج
حيل يوترني هالموضوع وانعكس على طبعي وصرت هادىء لذلك يالبابه مااريد تتأسفين على شي انتي مالج
ذنب بي الي اريده منج تساعدين نفسج وتخلينه
انعيش براحه ماراح اسألج انتي تحبيني لان انه رجال واعرف واحس وادري بمشاعرج بس عيبج الوحيد ادورين
نفس الدائره...

لبابه.. رفعت راسي وبسته من خده ودنكت على ركبته
بستهه ميل راسه وكتله الله يخليك الي ويحفظك
من كل شر اوعدك اكون الك زوجه صاينتك بكلشي
ابتسم وحضني واني اسمع دكات كلبه شكد متوتره...

ابتعدت منه لبست الروب وطلعت سويت ريوك وهو
يرد على الاتصالات يخابرو يباركوله تريكنه وكال بدلي
انروح لاهلي نتغده بدلت وطلعنه اهله محد يمهم بس اخواته واخوته مرتاحه حيل وياهم وتعاملهم حلو ...

رجعنه المغرب جبنه عشه جاهز تعشينه وكعدنه انشوف تلفزيون كمت خابرت فجر تبجي هي وعقيق بس رانيا
ماخذتهن يمهه وهوسه الجهال على الاقل مو وحدهن...

لبست دشداشه قصيره ومددت بصفه مد ايده جوه
راسي وحضني ونمت ومرت هيج ايام عرسي الاولى
تفاهم موطبيعي وابد ماحاول يفتح موضوع واني اريد
اقوي نفسي اكثر وابادر...

رانيا... بيوم عرس لبابه وره ماراحت الزفه جبت البنات
ورجعنه لبيتنه عقيق ماخليناهه تدخل بيتهه خاف تنقهر
جنه كاعدين نتعشه وصاحت ام جراح ضرغام الحگلي
ركضنه كلنه جراح يتقيء دم وخشمه ينزف وجهه احمر
من الدم يغسله ضرغام يرجع بوري ومفتوح

اخذه للمستشفى واحنه دخلنه ليجوه يم ام جراح كالت يكتم بداخلي ومايحجي الشعور العنده صعب ومايكدر يحجي مثل بلاع الموس خابرت ضرغام كال ضغطه مرتفع وصدره تعبان من التدخين شويه ونجي بس يستق
مروه ماكعدت يمنه واصلا ذاله نفسهه زياده وهو مامعبرهه وحاير بحزنه بس هي الله يهديهه
ماادري شعدهه قابليه

هاي الليله صعبه لجراح صعبه حيل الله يساعد
كلبه حبه وكيانه تفتت مثل فتات الخبز
وبعد مانكدر انرجعه رغيف بشكل دائري...

رجعوا والكانيوله بيده نام بالاستقبال وامه تبجي
يم راسه وهو صدره يصعد وينزل من قوه تنفسه
وحزنه المكتوم ومحد يكدر يشيل عنه ولو ذره بسيطه
وراح يظل مدى العمر بحسره حبه النظيف ...

رجعنه لبيتنه انسولف عن تحضيرات فجر
ماظل شي واخر قرار راح تجي عقيق يمنه بعد مالهه
شي بالبصره تخرجن ودوام ماكو وهي قررت تسكن ويانه ...

نايمه على ايد ضرغام واسولف وهو صافن مقهور على جراح التفت عليه وكال جراح راح يطب طبه علمود السبع واحتمال ينقذ السبع ويهلك نفسه

رانيا.. ليش؟؟
ضرغام.. يكول ماعندي شي اخسره بس السبع وراح يرفع القضيه للتمييز وراح يشتكي عن حزب جبار الي اجو هنا وهددو السالفه اكيد منهم لان هاي الحبوب ماتنباع الا من العصابات والي بالدوله لان تدخل من الحدود تهريب

واحتمال يقللون الحكم او يحصل براءه بس جراح
مايعوفوا ويظلون وراه وهذا وراه لبابه مخبل اصلا
لابعينه طفل ولا نسوان الي حلت بعينه مروه لوتشوفين
شكد نسوان وياه كلهه مايشوفهه بس الحظ وداه لمروه
وخسر لبابه..

رانيا.. احجي وياه خلي يتمنالهه حياه سعيده لايظل نفسه بيهه وماتتوفق بحياتهه
ضرغام.. لا كال ادعيلهه وكال احسن اشوف حياتهه لان
هو يدري بنفسه اذيه الهه مرات من شدة حبنه لشخص
نبعده عنه حته لايتأذى المهم يكون سالم

ترى جراح ابن عمهه ويكدر يخليهه طول عمرهه كاعده
ويلح عليهه لحدما تقتنع بس هو يدري بروحه اذيه
وبنفسه كال اخاف عليهه من نفسي لاتفكرين بيهم
انطوت سالفتهم...

جان بهاي السنه منتشره القصص وفجر وعقيق
ليل نهار يقرن قصص واجي الكاهن يبجن مرات
متفاعلات ويه البطله ظليت اسبوعين بالبصره ورجعت

بالطريق تخربطت وعبالي من التعب بس استمريت على لعبان النفس يوميه خابرت ضرغام واخذت امي على اقرب مختبر حللت وطلعت النتيجه حامل فرحت حيل وبنفس الوقت مو وقته لان ليث صغير ومتعبني

اجه ضرغام كال شبي وجهج معفوس كتله حامل
جان ينزع بقميصه التفت عليه كال هاا الحمدلله
بيهه الخير لعد شو ماقابله؟؟
رانيا.. ليث صغير
ضرغام.. يكبر ويه اخو لا تتبطرين على نعمه الله

رانيا.. حمدت الله وبدت رحله معاناتي من جديد
ويه الحمل وضرغام مشغول بسالفه السبع
ويوميه بالبصره واسمعه مرات يتعارك ويه جراح
يكله راح ادمر مستقبلك وذاك مصر اله يطلع السبع ...

فجر.. اجه اواب اخذني للطبيب فحوصات وهوسه
ونفس المرض القديم وشحوم على الكبد وعندي
خلل بالغده الكظريه ويصير عندي هبوط انطوني علاج
وكال مؤقت بس انسافر انراجع ...

حاليا اني وعقيق يمهم بس من اسافر تنتقل لبغداد
عايشين اني واواب قصه حب ومتفاهمين ويركض وراي ماازود وجبه اكل ومانعني من الحلويات وكلساع افتحي
حلكج اشوف اسنانج اخر شي مليت عضيته يله تاب ...

بيوم منهن اني وعقيق بالغرفه نختار بدله حلوه
واجت ام اواب كالت عقيق يمه البسي واطلعي
الشيخ يريدج لبست عقيق وراحت للمضيف بس
كلبي لعب مامرتاح كمت ركضت وراهه كتلهه خاله
شكوو؟؟

هزت راسهه وكالت ااووف يافجر هاي البنيه متعوبه
اجو عمامهه يريدوهه وصوتهم شعلوه بالمضيف
وحته يصيحون نشتكي عليكم ودرو برجلهه بالسجن
وماعدهه احد مدري منين سمعوا وجايبين العنوان
وطلبوا عقيق هسه تنصدم من تشوفهم....

.
.
.
يتببببببببع............ متابعه شيقه