رواية وضاقت الأرض بي الفصل السبعون 70 - بقلم لبنى الموسوي

#وضاقت_الأرض_بي

للكاتبة #لبنى_الموسوي

گمت جاي البس الفانيلة نغزني گلبي
حسيت راح يصير شي
بس ابد ما حسبت للكارثة البسببها راح تنگلب حياتنا رأساً على عقب

يا ستار يارب على هالشعور الحسيت بي
لحظة صمت تشرح الأحساس المريت بي كل شي بية سكن حتى انفاسي

صاح ايوب وياي ريحان
رديت اي وياك بس لساعني ما طلعت من حجرتي

فتحت الباب ومشيت
ما اشوف إلا إلياس دش للبيت يركض
چان السلاح معلگ بالصالة اخذة وطلع بسرعة رهيبة

شمرت الجهاز ع الميز وركضت ورى
لبست عباية امي وطلعت
من كثر ما مستعجل عبر البستان من السياج ما راح للباب

آنه منا عندي شعور غريب
ومنا شفت اخوي إلياس بهاي الحالة
رجعت للبيت اركض ادور ع الجهاز ماكو
من الخوف نسيت وين حاطتة اخر شي لمحتة على الميز

رحت شلتة بالعجل
- ايوب وينك الوووووو
- ها ها شمالچ

- اخوي اخوي
إلياس اخذ السلاح وعبر للبستان الداخلي الحگ اعلي عفية

- گعدي إسحااااق بالعجل

حچاها وسد الخط بوجهي
صعدت اركض
ظليت ادگن بالباب مثل المسودنة لبين ما فتحها لية إسحاق

- ها ريحان

- إلياس
إلياس وايوب بالبستان الداخلي ما ادري شني الجاي يصير الحگ اعليهم عفية

گبل طب يركض الغرفتة
سحب السلاح ودفعني ونزل سوة الدرج خطوتين
اريدن انزل بعد ما اگدر رجلي متعيني

سمعت صوت اطلاق نار خفيف
وگعت بالگاع ابچي على حسي گعدت غسق مفزوعة

- شبيچ ريحان
إسحاااق وييين ليش ما هو وشعندچ هنا ااحچي ولچ

- طلعوا للبستان كلهم

حچيتها بشهگة قوية
لبست حجابها ونزلت گدامي تركض
توني جاي انزل الدرج
تكرر أطلاق النار حطيت ايديني على اذني وصرخت بكل حسي

هي صرخة هي وگعة
ماتوجعت كلش كافي الوجع المسيطر على گلبي بهيچ لحظات

گومتني غسق تصيح اسم الله
على حسي كل اخواني صحوا حچتلهم غسق كل شي طلعوا يركضون حتى ابوي

امي وعمتي ما تحملن
لبسن العبي بالعجل وطلعن خلافهم
آنه همينة لحگتهن
ما بية اظلن بمچاني وما اعرف مصير اخواني وايوب شني

دخلنا للبستان الدنيا ظلمة
ما نعرف وين همَ
ظلينا نمشي شوي وسمعنا حس الهوسة قريب تتبعنا وما نشوف إلا جثثهم بالگاع

ايوب وإلياس مجطلوين والدم على طولهم
صرخت بكل حسي
اخوي والانسان الربيت على ايدة وبالتالي صار زلمتي

صعب كلش
احساس بشع ابد ما ينوصف
وآنه اشوفن اغلى اثنين بحياتي جاي ينازعون الموت جدام عيوني

صرخ إسحاق جيبوا السيارة لهنااااا
ركضوا حبيب وصخر
دخلوا سيارتهم للبستان وتعاونوا صعدوهم بيهن

الكل مشى للمستشفى
إلا إسحاق
ظل بمچانة وصرخ بينة دشن للداخل بالعجججججل

عمتي تبچي
امي منهارة وما تدري بالدنيا شجاي يصير
آنه من السكر جسمي ما احسن بي بعد ورجليناتي ما تعيني خاطر اتحرك

گبل إسحاق طفر
سحبنا بـ ايدناتة الثنتين وصلنا للبيت ورد للبستان

دشينا منهارين
انگلب البيت بصريخنا العالي
يردن البنات يعرفن شبينا وشني الجاي يصير ماكو
ما بينة حتى نجاوبهم

غسق.. ولچ ريحااان احچي
شبيكم فهميني
ليش تبچون إسحااااق صارلة شي جاااااوبي ولچ مو راح امووووت

- إليااااس ايووووب
ايوب وإلياس ولچ ايوووب وإلياااااااس

امل.. شبي إلياس
ريحااان جاااوبي اخوچ شببببي عليش تدگن وتلطمن شني مااااااات

ريحان.. لا لا اسم الله اعلي
بس تصوب واخذوا ومشوا للمستشفى
هساع يصير زين اي اااي يصير زين آنه متأكدة اخوي قوي ما يستسلم للموت

الحجية هيلة.. يمة وليدي ساااابح بدمة
يمة شلون بية لون ماااات
يمة اموتن خلافة ما ااااتحمل كل شي ولا بزررررري

ريحان.. اسم الله لا تتفاولين اعلي
هساع يرد لينة سالم هو وايوب آنه متأكدة
موش اول نوبة تصير
قبلها إسحاق وصخر همينة تصوبوا وتالي الحمد لله تعافوا وصارت سوالف

الحجية هيلة.. لچ بنيتي موووو هيچييي
ما تنوعتي شلون الدم تارس طولة الحلووووو شلون يعيش حاچيني شلووووون

حچتها وظلت تلطم
لا ساعة لا ساعتين للفجر ندگ عليهم محد يرد
گاعدين بالصالة ودموعنا تجري ما نسمع إلا اصواتهم برة

كلهم يصرخون بصوت واحد
بصوت ترس گلوبنا گبل لا يترس الدنيا
لااااااااااا اله إلا الله محمد رسول الله علي ولي الله

فزعنا بركضة وحدة
باوعنا للحديقة جنازة على اچتافهم
شال حنظل السلاح ورمى بالهوى الى ان فرغ المخزن كلة

حنظل.. وحگ ربك يخوي
دمك ما راح يروح هدر وآنه اخووووووووك

الشيخ ضاري.. نزل سلاحك وليدي
الوادم نايمة ما يصح الجاي تسوي انت واخوتك

صهيب.. چا شني الصح بوية
حاچييييني شني الصح عگب ما چتلوا وليدك
والثاني متمدد بالمستشفى لو يعيش لو يمووووووت

غسق.. اباوع عليهم منهارين
محد بعقلة كلهم طلعوا صدمتهم بالصياح
ديحاولون بهاي الطريقة يستوعبون موت اخوهم

وحقهم والله محد يلومهم
موت إلياس فاجعة ممتوقعيها بعدة بعز شبابة انقتل غدر وعاف ورى بنية شابة واربع اطفال

النسوان صوتهن ترس المكان
طلعن للحديقة يركضن صاحت بيهم الحجية نزلووواا التابووووت بالعججججل

حطوا يم رجلها شمرت نفسها علي
تبچي وتنعى بحس عالي
من حرگة گلبها خفت لتموت على جسد ابنها لا سامح الله وتصير المصيبة مصيبتين

رفعت الچفن طلع وجهه ازرگ مابي شوفة
گبل غمضت وصرت ابچي
عاشرتة سنين انسان طيب ما فد يوم طلعت الغلطة منة بحقي او بحق غيري

بس تعودنا بهذا البلد الزين ميعيش
رجعت باوعت
مرتة تبوس برجلة عمة صبيحة يم راسة تدگ وتلطم على خدودها

الحجية تمسح على وجهه وترثي مصيبتة
ريحان منتهية گاعدة يمهم ساندة راسها على چتف امها وتبچي من گلبها

موقف مينشرح بكلمات الدنيا
اني الما عرفتة غير بس من اربع سنيين انفجعت بي لعد اهلة شلون الله يساعدهم

اجو بـ هالأثناء عمامة وولدهم
گاموا صخر وحبيب سحلوهن سحل ليجوة وسدوا الباب

بعدنا بالممر صاحت ريحان
وگعت بالگاع تدگ وتلطم على راسها حيل فجأة غاب الوعي عنها

بالگوة شلناها اني والبنات
قاست شمس سكرها واصل 500 گبل ضربتها الأبرة

ظلت تسعفها بالأسعافات الضرورية
شوية وصحت
صوت النسوان ترس البيت كل اقاربهم اجوي سمعت ريحان حسهن رجعت تصرخ

تريد شمس تسكتها ماكو
معجزة ظلت عايشة بعد كل شي صار
بحيث حتى مدتگدر توگف على حيلها الجسم ينفض والشفة زرگة ويابسة حتى عيونها صارن دم

مندري شصار وياهم
قريب الثنتين صاح حبيب يا الله
گامن النسوان يركضن تلگنة من يم الباب صاح نصبن فاتحة الغالي بوية

امل.. شلون يعني ننصبها ؟!!
چا ودمة الما اعرف شلون انهدر راح يروح خلصصص

حبيب.. خوية ما يروح
بس المجرم لساعة ما نعرف شني تردين نترك العزززة ونحير ندور اعلي

امل.. اااااي تدورووووون
تدورووون وتجيبوا اليم رجلي ورجلين اميمتة خاطر ننهش لحمة النگس بسنوووونة

حبيب.. خوية شمس
تعاي اخذي ام محمد الحجرتها شكلها تعبانة
وانتِ عمة نصبي الفاتحة بالعجل خاطر السلف يعرف بالسالفة

حچاها وطلع
ظلت امل تلطم ورى نريد نلزمها ماكو
لا خلت شعر لا خدود ملخت نفسها تملخ حتى خواتها ظلن صافنات عليها

نصبنا الفاتحة والحال بس الله يعلم بي
الحجية انتهت
كل شوية يغمى عليها خطية والنسوان يگعدنها بالمي

ريحان شبه فاقدة
حتى ماكو واحد يوديها للمستشفى
ظلت شمس فوگ راسها تخاف لتروح تدخل بغيبوبة ومحد يحس عليها

إما امل فهاي وحدها قضية
من الدگ واللطم والصياح الصيحتة ما ظل بيها شي لليل وگعت علينة واخذوها الولد للمستشفى

ثاني يوم الحال اهون
گدرت ريحان ترجع توگف على رجلها وگعدت يم امها بالفاتحة

توها الملة بدت تنعى صاحت ريحان
اجة وووودعني يوووووم
قبل اسبوعين گلبة چان يعلم راح يموووووووت

شفتة بالمطبخ صافن اعلة الشباك
گلبة چان حاس راح يمشي ويتركنااا للأبدد
همَ مووووش يگولون المؤمن يظلة اربعين يوم ظيف بهالدنياااااااا

وهو مؤمن والله مؤمن
يمة گالي همزين دار ايوب قريبة خاطر يوميا اجييچ

چا وينة يووووم ويننننة
عليش عافني ومشى وين صااار وعدة وشلون انطاااا گلبة يكسرني هيچي بروحتة هااااي

لكمممم اااااخ يفراگ الأخووو شلون يكسر
لا والله يذبح موش يكسر وبسس وهاي آنه انذبحت بفرگاگ يبوووو محمدددددد

رد خوية رد
رد وآنه انطيك الظال من عمري
رد وآنه اااامنعنك تطلع بذييييچ الليلة الگشرررررة

رد خوية رد احلفنك بالخوة البيناتنا
رد يبعد اختك وآنه الما فرد يوم نخيتك ورديييتني

گوم إلياس گوووم
گوم يبو طول الحلو نومة الگبررر موووش الك والله موووش الكككك

صبيحة.. گولي يا الله عمة
كلنا اعلة هذا الدرب ما يصح الجاي تسوي كفررر هذا كفرررر

سكينة.. گومنها يبنيات تغسل لا يصير بيها شي

ردنا نشيلها سحبت ايدها حيل
- لحد يكضنننني
عساني بالمووووت ولا اعيشن الظال من عمري بلاية اخوي الحنين

بعدها تحچي سمعنا صوت الدبه
درت وجهي هناء واگعة
انخبصنا ما نعرف نحير بيها لو بريحان لو بالحجية الحالتها بس رب العالمين يعلم شصايرة

اخذناها اني والبنات للغرفة
غسلنة الها شوية وصحت حتى متتحرك بس مفتحة عيونها وخالة نجمة يمها انتهت من البچي

طبت عمة صبيحة شافتهن على هالحالة
گبل گالت گومي ينجمة اخذي بنيتچ وامشي الداركم لون ظلت هنا ما تعيش ازيد

شمس.. اي گومي خالة اني اساعدچ بيها

بس حچتها باوعتلي
- تعاي يمة لبسيها الحجاب ايديني ما تعيني
- صار خالة بعيوني

رحت للكنتور طلعت الها جنطة صغيرة
لميت شوية من ملابسها ولبستها الحجاب وساعدتها شمس اخذنها للبيت

شگد شايفة فواتح
مثل فاتحة إلياس ما شفت ولا راح اشوف
من گد ما طيب
الصغير يبچي علي قبل الچبير والغريب ينعى مصابة قبل القريب

يومين واحنة مفجوعين
ثالث يوم خلصت الفاتحة ما شفنا الولد بـ هالأيام ولا عتبوا البيت بسبب النسوان

اليوم هدأ الوضع
النسوان راحن والبيت فرغ بس فراغة مو بالمكان لا فراغة بالروح

روح البيت ماتت بموت إلياس
محد يحچي محد ياكل محد يتنفس كلمن بكتر وكلة كوم وجهالة اليكسرون الظهر كوم ثاني

لليل گاعدين بالصالة هادئين بشكل
من خوفي ع الحجية ظليت مگابلتها وگاعدة
كل شوية اخذ ضغطها لأن فجأة يرتفع وتحتاج لعلاج

صاح الشيخ يا الله
گمنا ع السريع لبسنا الحجاب
باوعت للباب دخل علينة هو والولد بس حالهم يكسر لب الگلب 

من التعب ما بيهم يرفعون راسهم
گعدوا بالصالة مدنگين لا هم حچوا شي ولا احنة الي سألناهم

عيوني صارت على إسحاق
اول مرة اشوفة مكسور بـ هالشكل
وكسرتة چانت واضحة بعيونة المليانة دموع

سألتهم تردون چاي هز الشيخ براسي اي
عفتهم ورحت اركض للمطبخ
سويت قوري شكبرة
ادري بيهم بهيچ حالات ماكو شي يبرد راسهم غيرة

رجعت للصالة صبيتة وقدمت الهم
بس شربوا گامو الغرفهم
ردت اگول الإسحاق يجيب ود لأن اخذوها يم بيت عمهم ويا الجهال بس مگدرت شكلة تعبان

صعدت ورى لگيتة متمدد وايدة على عيونة
طفيت الضوة وتقربت منة
وخرت ايدة من وجهه وسحبت راسة الحضني گبل حسيت بشهگتة

بچة بصوت مخنوگ
ما حچيت اي شي ظل بحضني بالنص ساعة فجأة هدأ باوعت علي نايم

بستة من راسة وانسحبت
تمددت گبالة رفعت اصابيعي امسح على وجهه
والله لو يطلع بـ ايدي اشيل الوجع من صدرك الطيب واخلي بصدري بس مو بـ ايدي

ما اعرف شلون غفيت
گعدت على صوتة ديبدل رفعت راسي الساعة بالستة

- وين رايح حبيبي
- للمستشفى ايوب الوحيدة بس اخوتة جارة
- ليش هو بعدة بالمستشفى
- اي الضربة اجت اعلة راسة ودش بغيبوبة

حچاها وطلع من الغرفة بسرعة
ما گدرت ارجع انام
گمت غسلت ونزلت جوة لگيت الكل گاعدين هاي اذا ناموا من الأساس

للعصر جابوا الجهال
اول ما طبت ود ركضت الحضني تبچي ظليت ابوس بيها واحچي شوية وهدأت

- شبيچ حبيبتي ليش تبچين
- علي يگول عمو إلياس مات صدگ ماما... وبچت

ثناء.. يا ادب سززز اني اعلمك ابو راااس

غسق.. عوفي يمعودة هو طفل شفهمة قابل

حچيتها وشلت ود
غسلت الها ورحنا للمطبخ سويتلها بيض وگعدتها ع الميز حتى اوكلها

- شلونچ هناك نمتي لو لا

- لا بالليل بس ابچي اعليچ وعمة نجاة ضربتني
- صدگ تحچين
- اي ماما
ضربتني وعضتني همينة هنا... واشرتلي على ايدها

غمضت عيوني اصبر بنفسي
اهدي غسق اهدي مريضة لتخلين عقلچ وياها
رجعت باوعت الود ليش ضربتچ وبس انتِ لو كل ولد عمچ انضربوا

- لا بس آنه
عبن ابچي واصيح اريدن ماما
تگلي امچ نايمة بالگبر تردين اخذچ تنامين جارها

- اسم الله ان شاء الله هي هالحقيرة
گومي ماما گومي بس هو مو صوچها صوچ الأخذكم يم هالخبلة

شلتها وصعدت للغرفة
سبحتها وغيرت ملابسها ونومتها بچربايتي
والله العظيم بالأربعين
لو اعرف اخذها واظل بالشارع ولا اخليهم يودوها يم نجاة

شمس.. موت إلياس اثر على صخر كلش
ليالي وهو گاعد عينة ما تاخذ النوم إلا للفجر ساعتين مو اكثر ويگعد يغسل ويطلع ما يرجع إلا لليل

هناء من الفاتحة ظلت ببيت اهلها
صهيب هم عافها براحتها
لأنها مريضة وتحتاج راحة وجو البيت ابد ما يساعد ترجع لهنا

اما أمل الله يساعدها
بسبب الصدمة انعزلت عن الدنيا
حتى اطفالها هملتهم رغم بعدهم صغار ويحتاجون عناية

اكبرهم مريم عشر سنوات
واصغرهم باقر اربع سنين عندة خلل بعقلة شوية مو منغولي بس هبش ميميز عدل

تكفلت بيهم طول هالفترة
اسبحهم وابدل وانطي الباقر علاجة وحتى نومتهم صارت يمي بالغرفة لأن يبچون على امهم

اكثر من اسبوعين مر ع الحادث
شوية بدوا يتأقلمون
صح الجرح يظل بالگلب بس الصبر من صاحب الصبر والنسيان اكبر نعمة بالحياة

گاعدة اظفر المريم لأن توني سبحتها
لعبت نفسي من الشعر اول مرة تصير وياية صفنت على روحي بتعجب

شبيچ شمس اول تالي
قرصت شعرها وبست خدها حيل
يلا عمري گومي للصالة وعينچ على باقر ما اوصيچ

- صار عمة
وباستني من عيوني ابتسمت وگرصت خدها

نظفت المشط من الشعر ورحت الغرفتي
بعدني بالباب لعبت نفسي ازيد
رگضت للحمام وما ارتاحيت إلا ما ذبيت من راسي

غسلت وجهي ورجعت للغرفة
صفنت ويا نفسي يربي معقولة حامل
حتى العادة نسيت موعدها من قهر الشي الي صار

حسبت اكثر من مرة يلا تذكرت
صارلها هواي فايتتني
اصلاً من الفاتحة چان لازم تجيني زين شلون واني ما خليت شي ما سويتة

خفت كلش
الفاتحة هدت حيلي واني حملي صعب
ابد ما بية اخسر الطفل للمرة الرابعة بس بعد كل شي صار صعب يظل

طلعت العمة صبيحة
سولفتلها گالت تعالي خن نتأكد
اخدتني للمطبخ وسوت وياية نفس الي سوتة بالمرة الفاتت طلع اكو حمل

ما ادري افرح لو اضوج
بالفاتحة دگيت ولطمت الوادي وطبيتة بعز الليل الجهال ويوميا يا شايلتهم يا مسبحتهم ورى كل هذا شلون يظل الحمل

من عرفوا بحملي
ظلوا يوصوني بالدقيقة الوحدة ألف وصية
لأن خايفين مثلي واكثر
خصوصاً بعد الأسقاطات المتتالية الي تعرضت الهن خلال فترة بسيطة

لليل اجو الولد
من يومها صاروا ميتعشون
بس يا دوب يشربون الچاي وكلمن يروح الغرفتة

رحت ورى صخر چان ديبدل
سديت الباب وتقربت منة حبيبي عندي الك خبر راح يفرحك كلش

- شني
- اني حامل
- اي بوية بيها الخير ان شاء الله

صفنت علي متفاجأة
اول شي ضجت بعدين انطيتة العذر
موت اخو طفى الفرحة من حياتة ابد مو سهل الصار وياهم واني اكثر من يحس بي

عفتة وطلعت
نومت جهال إلياس ونظفت المطبخ ويا ثناء
من رجعت لگيتة دينام
تمددت بصفة حس علية گبل سحبني الحضنة وحط ايدة على بطني

- ديري بالچ اعلة رويحتچ عدل
ما بية احمل مصيبة ثانية
وليدي امانتچ حافظي اعلة هالأمانة عدل الخاطري بوية

هزيت براسي وبچيت
مسح دموعي وضم وجهي بصدري
ما ادري ليش هيچ مخنوگة
يمكن لان خايفة اخسر الحمل للمرة الرابعة

ثاني يوم اخذني يم خالة نجمة
ظليت يم هناء للأربعين
خاف علية من التعب لأن لو باقية هناك صدگ اطرح كافي بس الحالة النفسية الـ بالبيت

غسق.. ايام وايوب بالمستشفى
يوميا ريحان تسأل إسحاق وهو يرد ماكو شي بعدة على نفس الوضع ادعيلة خوية

اليوم واگف العصر يبدل دگ جاهزة
باوعت مكتوب خالد يعني اخو ايوب رد شوية وعاط صگد تحچي صحى يعني صحى

الأبتسامة ترست گلبي
حيل چنت خايفة لا ننفجع بي واني ادري بأيوب شنو يعني للشيخ وإسحاق تحديداً

سد الخط ونزل يركض
رحت طايرة الغرفة ريحان چانت گاعدة ع السجادة تقرا قرأن وتبچي

- ريحان البشارة
- خير
- ايوب صحى هسه اخو بلغ إسحاق

بس حچيتها طفرت علية
حضنتني تضحك وتبچي اريد اسكتها ماكو اخر شي داخت إلا شوية توگع لو ما لزمتها

- كافي لتسوين بروحچ هيچ
سكرچ مگاعد ينزل
اذا صارلچ شي لا سامح الله راح تأذين اهلچ حيل

ما جاوبت ظلت تبچي
گعدت يمها امسح بدموعها هيچ تحبي وما ادري

- موش حب غسق ايوب بمعزة اهلي
ومثل ما تعرفين
ضربتين اعلة الراس توجع حيل توجع وحگ ربچ

- وهذا وينة الحمد لله گام بالسلامة
- ألف الحمد لله

- يلا دمسحي دموعچ وتعالي نبشر امي خطية تنتظر خبر منة

حچيتها وسحبت ايدها گومتها بالگوة
طلعنا للصالة
گاعدة تسبح وتبچي بس بلغناها ابتسمت ومسحت دموعها

الحجية طيبة كلش طيبة
صح عدها عيوب
وسبحان الكامل بس الطيب الي شايلتة يسوة الدنيا ومابيها

لليل طبوا الولد مثل البارود
الشيخ يسكت بواحد يگب الثاني نريد نعرف شبيهم ماكو

حنظل.. ما اسكت
لا تگلي هدي ولا تگلي فروخة واخوانة مالهم ذذذنب

الشيخ ضاري.. بوية آنه ما ناگص هم لا تزيدها اعلية

صهيب.. اطلع منها يابة خلنة نتصرف ويا إسحاق

الشيخ ضاري.. مااااالكم غرررررض بإسحاق
لا تلوثون راسة بعصبيتكم الزايدة
هو واخوتكم اگدر اعليهم إلا ااااانتو الاثنتين شالعينة الگليبي من يومكم

الحجية هيلة.. شني الصاير يضاري فهمنا

راد صهيب يحچي سكتة الشيخ
- السالفة موش يمكم
ما اريدن بشر يتدخل ويسأل كافي اعلية هالمصاريع

ما گدر عليهم ابد
هو يصيح بسكم جزعتوني وهمَ يصيحون نهدر دمهم يعني نهدرة عليمن ديحچون مندري 

اخر شي گلهم انطوني فرصة للأربعين اتصرف
من حچة هيچ استقروا
كلمن راح الغرفتة واحنة واگفين مثل الأطرش بالزفة محد مفتهم السالفة شنو

ريحان.. اول ايام مرت بصعوبة
لكت رب العالمين رحمتة وسعت السماوات والأرضين وهو وحده اليصبرنا على موت احبابنا

اليوم الأربعين
خلصت الملة وهدأ بچينا
بس نار گلبنا لساعها شالعة ما ترضى تهيد او تبرد

رجعت راسي صافنة اعلة السگف
شكثر الحياة حقيرة
وشكثر الأنسان يطغى ويتمرد بأفعالة رغم حقارتها 

لمن يموت شخص عزيز على گلبك
تسود الدنيا بعيونك

تصير تتمنى الموت
خاطر تخلص من ألم الفقدان
فـ شلون لو چان هالميت هو اخوك ابن امك وابوك

هنا راح ينكسرلك ظهر
ينهدملك عامود
توگع خيمتك عليك عگب ماچنت تحتمي بيها من شر الدنيا ومصايبها

صبيحه.. خايبات وين باقر
يا يا ولچن الفرخ مشى للحديقه وحدة منچن تگوم تجيبه ليصيبه مكروه

باوعت الحرمة اخوي منتهيه
فاقدة وموش بحالة تسمحلها تدور على ابنها وين

سحبت حجابي على راسي وطلعت
باوعت منا ومنا ما هو ياربي الوين راح هالجاهل

خفت كلش
ركضت بكل حيلي ادور علي
رحت اشوفنة ورى البيت وچان انصدم شجابه هذا لهنا

- البقية بحياتچ

ما جاوبتة
سحبت باقر من حضنه لزم زندي جريتة حيل

- دير بالك تكضني نوبة الأخرى

- بعدچ شايلة بگلبچ عليه

- لا
وياهو انت خاطر احملك مشاعر بصدري اصلاً

- عشرة عمرچ
حبيبچ الفتحتي عينچ بالدنيا على عيونه وصرتي مريته

- ساعة السودة اي والله
لون ادري بيك حقير وقذر وموش رجال
فلا چان ضيعت يوم واحد من عمري ويا ادمي مثلك

- لتتجاوزين ولچ
لا عبالچ متسبعة بأخوتچ وابوچ ترى كلكم ادوسكم بقندرتي اذا طخت براسي

توني اريدن اجاوبه سمعت احد صاح حيل
درت وجهي ايوب
فرحت من شفتة واگف جدامي على طولة ولو مبين علي التعب

تقرب من جمار دفعة
ركض هذا راد يرجعلة الضربة صرت بيناتهم وفتحت ايديني گبالة

- جمار دير بالك تطخة وروح اخوي مايصيرلك خيرر

ايوب.. دشي للداخل ريحااااان

ريحان.. ايوب اتركة مو توك طالع من المستشفى

ايوب.. امشي ريحان اسمعي الچلمة

- وانت منوووو حتى تسمع كلمتك

- زلمتي
- زلمتچ شنو ما فهمت
- زلمتي يعني زلمتي.... ورفعت الحلقة بوجهه

گبل بهت لونة
سحبني ايوب من زندي دفعني برة وكضة من ياختة طلعة من البيت سحل

ما ادري شني الصار
ابد مو وكتة شعندة جاي عگب كل شي صار مايخاف اعلة رويحتة يعني

ظليت بالصالة يمهم وبالي ويا ايوب
لا هو اتصل علية
ولا آنه الدگيت علي ولمن اشوفنة اليوم حتى ماالحگ اگلنلة الحمد لله على السلامة

غسق.. گاعدة گبال الحجية واباوع عليها
صاحوا الولد يا الله
عدلنا الحجاب وطبوا گبل گمت سويتلهم الچاي لان شوية ويطلبوا مني

بس شربوا گال الشيخ انتبهوا اعلية
كلنا باوعنالة بأستفهام
گح وفرك وجهه بعصبية وراها اندار على إسحاق

- دم اخوكم ما يروح
بس انطروا شوي اكو شي اوجب من شي والعافية بالتداريج

إسحاق.. يعني ؟!!

- فروخ اخوكم هالساع اولى من اي شي ثاني
هذولة امانتكم گبل لا يكونون امانتي ومن واجبكم تحافظوا اعلة هالأمانة

حرمة اخوكم ما تطلع من هالدار
آنه امس سألتها وهي اختارت تظل ويا فروخها وما تعوفهم وتمشي

كل واحد بيكم حرمتة اجتنة لهنا مكسورة
غسق شمس هناء
بس كسرة اهون من كسرة والعدل يحتم اعلينة نوزع الحگ بالتساوي

غسق.. يحچي واني صافنة علي
عرفت من كلامة
امل راح تنزل ضرة على وحدة من عدنة

وتوجعت كلش
لأن هالشي صعب صعب كلش
ما اگدر اتمنى لا النفسي ولا الخواتي هناء وشمس

رجعت اركز بكلامة
اريد اشوف منو بينا راح تنذبح بهالحكم
وچنت متأكدة
لو اني لو هناء لأن احنة اقرب من شمس لهالمصيبة

نزل راسة وگال هذا امر موش اختيار
صخر انت راح تتزوج حرمة اخوك ومن اليوم فروخة بأمانتك وآنه ادريك گد هالأمانة يوليدي....

يتبع

لتنسووون ⭐⭐⭐⭐⭐⭐
كل الحب ❤🥀