رواية وضاقت الأرض بي الفصل التاسع والثلاثون 39 - بقلم لبنى الموسوي

دگيت الباب وايدي ترجف. دقيقة وهو ما فاتحها، رجعت دگيتها وفتحت عيوني ويا ما انفتحت بسبب الشي الي شفته گدامي. هو ظل مصدوم بجيتي، واني مصدومة من منظره سابح بالدم ووجها كله كدمات حتى ملابسه ممزقة. تقربت منه بخوف، حطيت ايدي على گصته دتنزف بغزارة، گبل سحبني للغرفة وسد الباب. -صخر هاي شبيك؟ منو مسوي بحالك هالشكل احچي؟ -شجابچ لهنا؟ -هسه وكتها بربك؟ حچيتها وشمرت جنطتي ع الچرباية. دا أسحبه للحمام،

ابتعد عني بنترة: شني الجابچ ردي شمس. -صخر لتعاند، شوف الدم شلون ديجري بس خلي اشوف جرحك خاف يحتاجله خياط. باوع والله هسه اروح، اني ما جاية حتى اتوسل بيك بس ردت اگولك على شي مهم وراها متشوف وجهي بعد. بقى يباوعلي بعتب، سحبته من ايده للحمام، ردت اغسل وجها، دفع ايدي وغسله بنفسه. عيني ع الدم مديوگف ابد، رفعته عليه شفت گصته مفتوحة. -صخر هاي لازم تتخيط ترى ميفيدها شي غير الخياط.

دار وجها طلع من الحمام، لحگته اتوسل بي لساني وگع يلا وافق، ولو ما ملحتي الزايدة چان ظل راسه مفتوح. رحنه للمستشفى خيطوها اله ورجعنا للفندق. طول الليل ما حچيت شي لأن شكله كلش تعبان وما حبيت اضوجة اكثر. هو هم ساكت. قريب التسعة طلب اكل، شوية وجابوا حطه گبالي ورجع تمدد بمكانه. -شنو متاكل؟ -لا مالي نفس. -اي واني هم. ردت ألمه گال: اكلي وجهچ اصفر. -لا والله دگول النفسك اول شگد نزفت وتالي لگمة متحط بحلگك. باوعلي وسكت.

-صخر گوم الله عليك بلا هالعناد. -من اجوع عودن اكل. -لا هسه ع الواهس. حچيتها وگمت سحبته من ايده، ما گال شي گعد ياكل بدون ميباوع عليه، قريب منخلص تفاجأت بي من سألني: -رايحة الفرات المچان شغله؟ -اي. -اليمتة؟ -البارحة، بس انت شعرفك؟ -كملي بوية كملي. -قبل لا اسولفلك اريد اطلب منك طلب. -شني گولي؟ -اريدك تجاوبني بصراحة، هالشي الصاير وياك سببه فرات مووو؟ -اي. -شوداك يمه؟ -رحت خاطر اصفي حصة ابوچ من املاك جدچ.

-ليش صخر، ما اريد منهم حصص خل ياخذون كل شي بس يتركوني بحالي. -موش بمزاجچ السالفه ولا بمزاجهم، عندي تتبرعين بيهن للمحتاجين ولا تخلين هالوادم الما تخاف ربها تتمتع بمالچ. -كمل شصار بعد؟ -اكيدن ضاجوا، عبن ما متوقعين هالسالفة مني، من هيچ حب فرات يستفزني وحچة اعليچ. -شنو احچي؟ -حچي ما ينگال عوفچ منه. -صخر فدوة اريد ننهي هالسالفة اليوم، لذلك اترجاك تحچيلي كل شي مثل ما راح احچيلك.

-شمس بسچ عاد، هالكلام آنه ما تحملت اسمعه واسكت، وشوفة عينچ هذا حالي بعد حچايات هذاك العار تالي جاية تردين اعيدنه يمچ؟ -اني هسه راح اگولك شحچة، شمس اجتني للشغل وگالت اني مندمانة على شي بالدنيا گد ندمي على زواجي من صخر. لهنا هذا الحچي اني حاچيته صدگ، بس اكيد مراح يكتفي بهالشي، والله اليعلم شنو زود من يمه كلام حتى خلاك تعصب وتتعارك ويا هالشكل. گبل باوعلي بعصبية.

-اي شك يلا شك هي ظلت على هاي، اذا انت ابنه تهمتني اني سقطته ونهيت كل شي بلحظة وحدة ما استغرب بعد اذا صدگت بكلام فرات وشكيت بيه. نفض ايده وگام للحمام، غسل ورجع، لملمت هوسة العشى ورحت گعدت گباله. -سؤال وجاوبني بصراحة، بعدك متصور اني ورى الشي الصار بأبنك؟ عدل گعدته وباوعلي بحدية.

-تنوعي بوية، آنه عشت بدوامة بالمدة المضت بس ربچ وحده يعلم بيها. بين عگلي اليأكد بالدلائل انتِ ورى هالعملة، وبين گلبي المو راضي يصدگ شمس دنياي ممكن تسوي هيچ بعد كل الحب القدمته ليها.

-واحد يدزون اعلي بالمستشفى، تعال حرمتك شاربة اعشاب وسقطت الجاهل، اتحمل المسؤولية وراح نرفع بيها تقرير لأن فعلتها تعتبر جريمة ولازم تتحاسب عليها. تعرفين شني السويته خاطر اسكتهم، بچم واحد توسلت والچم واحد ما يسوة انذليت. وتدرين شكثر تحملت نظرات مسمومة، نظراتهم الچانت تحچي گبل لسانهم وتگول عليش سقطت الطفل وهم متزوجين!

لو غيرهم الشكو بيني وبينچ علاقة غير شريعة، وحچاية والاخرى اطلع جنسيتي وعقد الزواج خاطر افتك من كلامهم المثل السم. -ولمن اجيتچ بيومها چنت انتظر منچ تبرير، لكت ما حچيتي لية كلمة غير آنه ما سويتها وهالشي مو كافي خاطر يرفع التهمة عنچ شمس. -شتريد اجاوبك يعني، اذا اني نفسي مچنت مستوعبة الگاعد يصير؟ -چا تريدين آنه الاستوعب؟ -ليش لعد ما عندك ثقة بيه؟ -لا شمس، شني الي سويتي خاطر تخليني اثق بيچ؟

شو بكل مرة تفضلين نفسچ عليه، من خطوبتنا لليلة زواجنا لدراستچ ببغداد وحتى حملچ ما چنتي راغبة بي بس عبن جاي تدرسين وما تتحملين التعب الزايد. -حچاية التنگال ترى، قابل افرط بقطعة من روحي علمود والله شنووو دادرس وتعبانة! -هاي الحچاية الما عاجبتچ تگلب موازين، تغير حال، تبدل سلطة، تشن حرب، تزرع السلام، تفرق اثنين ومرات تجمعهم. لسانك حصانك، إن صنته صانك وإن خنته خانك.

من هيچ الإنسان لازم يثمّن كلامه گبل لا يحچي، عبن كل كلمة تطلع من حلگه تصير سيف على الرگبة ويظله مسؤول عنها لآخر يوم بحياته. -ما أدري، حقك وحقي، بس اني أشوف إذا العلاقة بين المرة والرجال تكون خالية من الثقة فـ بلاها أحسن. -وصلت بوية، يلا گولي العندچ خاطر تردين بساع. -أي هسه راح أحچي، بس قبل كل شي أتمنى تصدگني لأن اني ما تصرفت من كيفي واجيت أگولك.

وبنفس الوقت ما أريد مشاكل، يعني حتى لو افترقنا لازم نتعاون علمود نخلي الچان سبب بخسارتنا البعض ياخذ الجزاء اليستحقه. -أحچي عاااد. -قبل أسبوع تقريباً يلا گدرت أوقف على رجلي، راجعت المستشفى والتقيت ويا الدكتورة لأن هي الشي الوحيد الي خطر على بالي ساعتها. واجهتها بشكوكي، وگلتلها شگد دفعولچ حتى تچذبين، بس بعدين تأكدت هي ممچذبة واني فعلاً شاربة أعشاب.

هواي فكرت يلا وصلت للحقيقة، ولأن اني ما أكلت ولا شربت شي غير بالبيت فأكيد الموضوع ورى وحدة من البنات العايشات وياية. وفعلاً بعد ما راقبتهن وحدة وحدة، گدرت أعرف منو وراها من خلال اتصال لمحته بجهازها. چانت كاتبة ع الرقم: نهر حبيبي. تأكدت هذا فرات بعد ما ربطت الأسم بالمعنى. وحتى أحسم الموضوع، رحت لمكان شغله وقشمرته بكلمتين، طبعاً تعرفهن شنو هن لأن قبل شوية حچيتهن إلك لحد ما انطاني الرقم.

رجعت للبيت، وتحججت أتصل بحبيب حتى أتأكد من الرقم، وبالفعل دگيته بجهاز البنية وطلعت مسجلة عليّ: نهر حبيبي. ما خليتها تشك بشي، خابرت حبيب وطلبت منه أقابلك وراها رجعتلها الجهاز وتشكرت منها. وهاي اني اجيتك، علمود أحچيلك كل شي وأثبت برائتي إلك ولحبيب ولكل شخص شك بيه اني مسويتها. -أحچي بالتفصيل شني الصار. -مو حچيت كل شي. -بعد أريدن أزيد من هذا. گعدت سولفتله كل شي صار، من ساعة مراجعتي للدكتورة لحد جيتي للفندق.

باوعلي وصفن، گتله شبيك چان تندگ الباب، گام فتحها وانصدمت بالشرطة گبل گمزت من مكاني خايفة. -أنت صخر ضاري؟ -أي نعم آنه، خيركم؟ -مقدمين عليك بلاغ ولازم تحضر حالاً. -ياهو القدمه ممكن أعرف؟!! -فرات إحسان. -خير إن شاء الله، بس أخذ حرمتي للبيت وأجي خلافكم. -لا هسه لو سمحت. -گلتلكم أجي خلافكم، مجرم خوما مجرم. -ماشي بس لتتأخر الضابط يريدك اليوم بالتحديد. -إن شاء الله. سلموا وراحوا، بس سد الباب ركضت عليّ:

-صخر ليش ورطت روحك ويا؟ أنعل أبو الفلوس، ناقصنة مشاكل يعني! -جهزي روحچ خاطر أردّنچ وأولي. -شلون؟ مو والله بالي راح يظل وياك. -بوية مامش شي يخوف، كله على بعضه لعب جهال. -زين لعد اتصل عليّ من ترجع عفية. -إن شاء الله، بس استعجلي شوي عبن ما ظلي وكت. عدلت حجابي وطلعت ويا، الطريق كله ساكت، انقهرت عليّ فوگ ما ضاربه الدور هو اليشتكي، شگد ناقص لعد. وصلنه دانزل باوعتله: -عود ليش اشتكى فوگ ما ضربك؟ والله حلوة هاي. -ضربني شني؟

أنتِ تعرفين وين هو هساع گبل لا تحچين؟ -وين؟!! -بالمستشفى، عسى لا طلع منها إن شاء الله. -عززززة، هاي شمسوي بيه لعد؟ -انزلي عاد بوية تراچ جاي تعطليني. -اتصل حباب مو تخلي بالي يمك. -والله افتهمت بس فضيني واليرحم أهلچ. نزلت واني أباوعله، فتحت باب البيت ما تحرك لحد ما سديتها، طبيت جوة البنات بالصالة سلمت عليهن ورحت لغرفتي. بالي كله يم الموبايل، ظليت بالساعات أنتظره يدگ لحد الوحدة وهو ماكو. هسه شسوي أتصل بحبيب؟!!

شلت الجهاز لازم يعرف حتى يساعده لأن صخر تعبان كلش وميگدر يتصرف وحده. داتصل على حبيب دگ موبايلي، باوعت هذا رقم غريب عرفته هو گبل رفعت الخط بدون ما أحچي. -ها شمس هذا آنه صخر. -وين صرت والله متت خوف عليك. -راجع بالدرب. -شلون طلعت منها أحچيلي؟ -گلت لعمچ الطماع راح أتنازله عن حصتچ ببيت جدچ، مقابيلها يتنازل عن الشكوى المقدمها عليّ ووافق بساع. -وصدگ راح تتنازل؟!! -أكيدن لا، شني شايفتني تسودنت؟ -تعال عليّ حباب.

-وين بوية ظلي بمچانچ. -لازم نكمل حچي، هواي شغلات تحتاج توضيح وثانية تحتاج حل، قابل راح تخليها هيچ؟ -تنحل لا تخافين بس مو هساع. -صخر تعال. -ما أگدر. -بيمن أحلفك؟ بداعة أبوك تعال واني أدري بيك شگد تحبه. سكت شوية، وراها گال: -يلا جهزي روحچ خمس دقايق وأصيرن يمچ. سديت الخط وگمت أركض، غيرت ملابسي وما أخذت وياية غير جهازي والفلوس.

فعلاً خمس دقايق ورمشلي، طلعت من الغرفة البنات كلهن بالغرف، سديت الباب ومشيت بهدوء ما أريد وحدة منهن تحس عليّ. فتحت الباب الخارجي لگيت صخر واگف گبالها، بس شافني سحبني من ايدي صعدني بالسيارة وتحرك ع السريع. وصلنه للفندق اتصل على حبيب، گاله: -باچر من ترد من دوامك ضروري تجيني للفندق محتاجك بشغلة. شوية وسد الخط، راح للحمام سبح لأن كله دم ورجع تمدد يمي بدون ميحچي ولا حرف. -صخر راح تظل ساكت؟

-أنتِ مو گبل ساعات گلتي حقك وحقي؟ -أي. -چا خلص بوية تصافينه. -لا والله!!! لا تصافينه ولا راح نتصافى، مستحيل أرجعلك بعد ما شكيت بيه وتركتني بوقت اني بأمس الحاجة بي إلك. -وشني المطلوب هساع؟ -نتطلگ. -صار تتدللين، بس خلصي هاي السنة واعتبري روحچ حرة من ساعتها. -صدگ عود؟!! -يابة هساع شني الرايدته بالضبط لا تسودنيني. -لا سلامتك ما أريد شي.

درت وجهي عنه ضايجة، بالچذب ما زحم روحه واعتذر ع الأقل، بس مو صوچه صوچي اني الثولة الگاعد أنتظر اعتذار من واحد مثله. رجعت باوعت عليّ، نايم والمخدة على وجهه، سحبتها حيل چان يخزرني. -شمالچ بهالليل تسودنتي؟ -شراح تسوي بموضوع فرات العار؟ -خله يطلع من المستشفى وعودن أتصرف. -وحدك؟؟ -لا أكيدن أنتِ وياي، بس انطري شوي وتالي تعرفين كل شي. بس حچاها ضربت المخدة على وجهه، -يلا ارجع نام نوم الظالم عبادة.

درت وجهي سمعته يضحك، ما اهتميت إله بس ضجت من نفسي، يجوز أذيته بـ هالضربة لأن راسه مخيط بس والله مو بـ ايدي تصرفاته حيل دتنرفزني. غمضت عيني أحاول أتجاهل وجوده بالمكان، فجأة حسيت ايده صارت على بطني شوية وكفخت أنفاسه قريب من رگبتي. -آسف وحقچ عليّ حبيبتي. -وخر صخر، أسفك هذا ميجي قطرة يم العذاب العشت بيه وأنت بعيد عني بعد ما شكيت بيه ودرتلي وجهك ورحت. -أنتِ گلتيها، آنه نفسي ما استوعبت چا شلون ترديني أستوعب؟

-أي صح ما استوعبت بس ما شكيت بنفسي، أنت مو دوم چنت تگولي أنتِ روحي وحياتي ونفسي ومن هالحچي البدون معنى. إذاً المفروض متصدگ لو مدري شيصير، لأن ماكو واحد يشك بروحه هاي إذا چنت روحك من صدگ. -روحي وداعتچ وأعز همينة، بوية أنتِ من كل عگلچ أنهي كل شي بعد ما متت ألف مرة يلا حصلت عليچ. آنه بس بعدت خاطر لا تزيد الطلابة، چنت متأكد لو إن حچينه مرة أخرى راح نخوطها خوط وهيچ نخسر بعضنا بلاية منحس على أرواحتنا.

-بس شكيت بيه وهذا كافي. -آسف والله آسف، بس لا تحمليني الذنب وحدي كل الجاي يصير ذنبچ أنتِ گبل الكل. -اني؟!! -أي، ياهي الفضلت دراستها عليّ وخلتني أشك بحبها، ويا هي الاجت يم الثعابين برجليها وعافت الأمان وراها. أنتِ لو غيرچ؟ جاوبي خوبن ما تردين تاكليني بگشوري وكأني المذنب الوحيد بهاي الطلابة. -صخر لتلوف الموضوع، أنت شكيت بيه وعفتني بأكثر وقت محتاجتك بيه، يعني كل هالكلام ميشفع للشي السويته حضرتك فلا تحاول.

-أي چا عليش جاي اعتذر منچ؟ آنه اعرف بروحي غلطان كلش زين لكت أرجع وأذكرنچ الغلط غلطچ مثل ماهو غلطي موش أنتِ الضحية وآنه السفاح. -أي يلا وخر أريد أنام. -ما أوخر، مو أنتِ تردين نتطلگ چا خلني أشبع منچ گبل لا تحرمين عليّ. -دير بالك تلمسني. -بوية أنتِ ليش منحرفة؟ آنه گلت ما أبعدچ عن حضني ما قصدت الشي الخطر على بالچ الوسخ هساع. -أي صح صدگتك. ردت أبعد رجع سحبني على حضنه، -نامي ولا تتحركين من مچانچ خاطر لا نخرب كلش.

-لتهدد صخررر. -ما أهدد بس نامي وفضيني. باوعتله ودرت وجهي، حضني من خاصرتي وثبت راسه على راسي همس بهدوء: -أحبنچ. اني أدري حقه بكل شي سواه، إذا خالتي وحبيب شكوا بيه أجي أعتب عليّ هو صاحب المشكلة المستحيل يفكر بعقل من يواجه هيچ موقف. والدليل حتى اني ما گدرت أفسر إله بيومها، لأن ماعندي شي أحچي ومستحيل أشك بفرات واني بذيچ الحالة لهالسبب حقه صخر لو شك بيه.

بس مع ذلك مستحيل أسامحه بسهولة، مثل ما ضربها زعلة من صديته بيوم العرس اني راح أردلهيا. هاي فرصتي الوحيدة، لازم أزرع الثقة بيناتنا من البداية، أريد أوصله لمرحلة لو شاف الغلط بعيونه ميصدگ لأن عنده ثقة عمياء بيه. غمضت عيوني أحاول أنام، عود اني بهالتصرف گاعد أعاقبه بس بالحقيقة اني داعاقب نفسي قبله. حيل مشتاقتله، أبد مو سهلة يكون يمي بعد كل هالبعد وأمنع نفسي عنه.

أبسط شي ميتة على حضنه، شگد يعجبني هسه أدور وجهي عليّ وأدفن راسي بصدره وأنسى كل الي صار بس لازم أقاوم حتى ليتكرر هالغلط. ما اعرف شلون غفيت، حسيت الصبح على صوته ديحچي بالموبايل، گمت غسلت ورجعت للفراش صارلي يومين ضاربة الدوام لا خوش راح أحافظ على معدلي. كمل الاتصال ودار وجهه عليّ: -صباح الخير. -صباح النور، شوكت ترجع للبصرة؟!! -الضهر أمشي بس أشوفن حبيب. -أي زين حتى أرجع ويا.

للوحدة أجه حبيب، أخذه وطلعوا بره بالنص ساعة يلا رجع للغرفة. -ها شو تأخرت؟ -ويا حبيب چنت، تردين نتغدى گبل لا أمشي؟ -لا ما أشتهي بالبيت أكل. بس حچيتها تقرب لزم ايدي، -ديري بالچ على رويحتچ يرويحتي أنتِ. ولا تخلين هاي البت تشك عرفتي عملتها، مشي الأمور طبيعية لبين ما آنه أجي وأگلچ على شني ناوي. -وفرات؟ -بالمستشفى، يحتاجله أسبوع بالقليل يلا يطلع منها لا تخافين. -وشوكت راح تجي مرة ثانية؟ -عليش تسألين؟ بس لا راح تشتاگيلي.

-لا اشتاقلك شنو، بس داسأل حتى أشوف الموضوع هذا شوكت يخلص لأن حيل مضوجني. -يفض أولها وتاليها يفض وعيونچ. -أي زين، ولتنسى عقم جرحك ليلتهب مو تهمله. -صار. حچاها ومد ايده لجيبه طلع المحفظة، انطاني فلوس ورصيد وباسني من خدي حيل بقيت ثابتة بمكاني. ما أحس إلا باس شفتي بلهفة، ردت أدفعه سحبني عليّ بحركة سريعة ولزم ايدي قيدني. بين القبول والرفض ما گدرت أتصرف، ظليت جامدة وهو يحاول يعبر عن اشتياقه إليّ لحد ما بعد عني مبتسم.

-صخر هاي.... -اششش، لا تكملين ما أريدن أسمع مغثة، آنه طالع الدرب المنية يجوز هاي آخر لحظات تجمعنا سوة. -اسم الله عليك لتحچي هيچ. ابتسم بوجهي وشال جنطته بدون ميگول شي، طلعت ويا چان حبيب جوة دينتظرنا وصى عليّ وسلم وراح. الطريق كله وحبيب يحاول يعتذر مني، ما اهتميت لكلامه اني حلفت ما أسامحهم بسهولة ولازم أكون گد كلمتي. غسق. يومين مرت وإسحاق ما يحچي وياية.

بالبداية عادي ما اهتميت بس بعدين ضجت كلش، تعودت عليه ما أتحمل يتجاهلني هالشكل. ثالث يوم ما اجة ع العشى. خلصت من هوسة المطبخ وصعدت لغرفتي ألملم بيها. لـ 12 كملت كل شغلي. طلعت الجدول شفت محاضراتي وبلشت أقرأ شوية. قريب الساعة يلا اجة. بس سلم وراح ينزع بملابسه، ضجت كلش. قمت من مكاني صرت وراه، قلت له: إسحاق. رد: نعم، بدون ما يباوع بوجهي. -اني آسفة. أدري بروحي غلطت وما چان لازم أحچي هالكلام بس صارت بعد.

سكتت شوية أنتظر رده. ما جاوبني شي، لبس ملابسه وراح تمدد ع الجرباية، عصبني بشكل. رحت وراه چان حاط إيده على عيونه رفعتها. -إسحاق مو داحچي وياك شنو السالفة؟ -شرايدة بوية؟ -آسفة. ولتحچي شي أدري كلام چان أثول بس والله ما قصدته. يعني كل الموضوع. چنت ضايجة وما لگيت سبب لرفضك. فـ حچيت هالشي حتى أشوفك شتجاوب بس للأسف ما حصلت منك لا حق ولا باطل. -أنتِ جاية تلعبين على الميزان غسق. -هههههه.

أي أدري اني محامية وأنت قاضي يعني مو گدك. ها هسه شنو؟ يا معود داحچي عاد لتصير غثيث. -بوية ليش ما تخلين لسانچ بحلگچ مو أحسن؟ -أي ميخالف أخليه بس گول رضيت. رجع حط إيده على عيونه، لا هذا ناوي يخبلني. -إسحاق باوعلي مو داحچي. -أريد أنام فكچ مني عاد. -اشتاقيت لحضنك. بس حچيتها رفع إيده من عيونه باوعلي مستغرب. -ها شبيك تباوع؟!! يعني عودتني على حضنك وفجأة تحرمني منه طبعاً اشتاقت له واشتاق لك. قَبل سحبني من إيدي.

حط راسي على صدره وضغط على زندي حيل. -ههههه. يعني إلا أگول اشتاقيت لحضنك يلا ترضى أستاذ إسحاق؟ -أي چا الي سويتيه مو شوي. يحتاج شي ثگيل حتى يخليني أفك من ضوجتي. -وفكيت؟ -نص ونص. -شنو نص ونص لتخبلني. ردت أقوم أحچي وياه رجع سحبني. -نامي بوية هي تفك ويا الأيام لا تشيلين همها. -إسحاق كافي عاد. مو گلت لك آسفة مو قصدي ليش يصير گلبك أسود؟ -أي آنه گلبي أسود. -لا وين اكو من گلبك أنت قابل تعلمني بيك.

-والله لو تعرفيني عدل ما چان حچيتي ذاك الحچي بيومها. -يبوووو. بس فهمني شسوي حتى تنسى وتريحني. -أنتِ أدرى والله. حچاها وغمزلي بضحكة. صفنت بوجها مصدومة. معقولة الدافكر بيه صح ويريدني أبوسه؟ عززززة. رجعت راسي على صدره خجلانة. زين إلى متى أظل هيچ لا وفوگاها داغار عليه من النسوان واني أبسط حقوقه ما منطيتها. وهاي تالي النهاية. وصلت بيه يطلبها مني بلسانه واني مثل الحجر بلا إحساس. رفعت نظري عليه لگيته مغمض.

أدري الشغلة كلش صعبة بس لازم أتجرأ وأسويها وياه. لا يروح يمل مني بالاخير. وتالي ما أشوف إلا نجاة وغيرها ماخذات مكاني بحياته وأطلع منها خسرانة. تقربت منه بهدوء بَسته من خده. قَبل فتح عيونه يباوعلي. دار عليه شوية صارت شفته قريبة على شفتي. ما أحس إلا يَبوسني بقوة. حطيت إيدي على صدره وتقربت عليه أكثر و چانت هاي أول مرة أبادله بيها المشاعر وبـ إرادتي. دقايق وإحنا على هالحالة.

وأكيد إسحاق مثل أي رجال ما تحمل يكون قريب مني ويظل مقاوم فـ صارت إيده تتجول على جسمي. بالبداية چنت منسجمة وياه. بس جسمي وكل شي يخص هاي السالفة يذكرني باليوم المشؤوم العشت بيه أبشع شعور ممكن تعيشه أي بنية بهالدنيا. صار شعور الرفض ملازمني. ما گدرت أستمر أكثر ولزمت إيده بعدها عن خصري. رفع راسه باوعلي لا إرادياً نزلت دموعي. مسحها بـ أطراف أصابعه وگال: روحي غسلي وتعاي بساع. قمت من يمه ركض. غسلت وجهي وظليت أضمضم.

أحس نفسي أريد أتقيأ ومگاعد أفهم ليش هالشكل ديصير وياية. قبل شوية أحس نفسي طايرة وياه. فجأة كرهت حتى ريحته وصرت ما أطيق له أي أثر على جسمي. طلعت من الحمام بعد ما هدأت شوية. رحت للثلاجة شربت ماي وسحبت علچ من المجر. خليته بحلگي حتى يروح لعبان النفس ورجعت تمددت بصفه. بالبداية ما تحرك من مكانه. بدت الحالة تختفي مني ورجعت أتقبل ريحته شو فجأة رجع سحبني لحضنه. -غسق. -نعم. -آنه ياهو؟ -إسحاق غير. -أي وشيگرب لك إسحاق؟

-ههههه رجلي. -وأنتِ مريتي وبنيتي بذات الوقت. وما مش أبو بهالدنيا يگدر يأذي بنيته خلي هالشي ببالچ ونامي مرتاحة. هزيت راسي بـ ابتسامة وحضنته حيل. أدري بيه ليش حچه هالكلام. ديحاول يوصلي فكرة. أني رجلچ وحلالچ والديصير بيناتنا طبيعي مو قاصد منه يأذيني مثل ما سووا وياية ولد الحرام من قبل. ثاني يوم اجة أيوب أخذني للدوام. وصلنا الريحان انتظرناها بالخمس دقايق يلا طلعت انتبهت عليها گوه تمشي. نزلت على السريع.

سندتها لحد ما صعدت للسيارة. ما تحرك أيوب يمكن عرف بيها متخربطة سألتها شبيچ گالت: سكري صاعد ودمي نازل. أيوب: چا عليش داومتي لونچ تعبانة؟ ريحان: عندي امتحان اليوم. غسق: لعد ليش ما گلتِ للجمار ياخذلچ إجازة؟ ريحان: ما هو طلع من الصبح وماله خبر بحالتي. أيوب: انزلي ريحان. آنه هساع أمرن للميزان آخذ جنسيته وأردن للجامعة آخذلچ إجازة. -ما أريد أتعبك وياي. -تعب شني الله يسامحچ بس.

انزلي بوية لو أگول لك خابري زلمتچ وامشي لأهلچ أحسن خاطر تظل عينهم اعليچ. -أي كلام أيوب صح. اتصلي على جمار وتعالي وياية اني هم ما راح أداوم علمودچ. -أي هساع أدگن عليه. خابرته وظل يسأل شبيچ وشتحسين. أخير شي گال لها: روحي بس الضهر من أرجع من الدوام أجي عليچ حتى آخذچ للدكتورة. وصلنا أيوب للبيت وراح للجامعة ياخذ لها إجازة. من شافتها الحجية تخبلت وحقها لأن ريحان صايرة هيكل عظمي ع الحمل بسبب السكر. چان إلياس بالبيت.

قاس لها الضغط نازل والسكر معلگ. قَبل طلع جاب لها مشاوي وكرزات وما راح لشغله إلا ما أكلتهن گدامه. أخذتها ورحنا للحديقة بعد ما خلصت شغل البيت. الجو چان يجنن گعدنا نسولف وود تلعب يمنا بعدين اتصلنا بهناء وبالگوه قنعت خالة حتى تقبل تجيبها وتجي. شوية واندگت الباب. بس فتحتها صارت خالة أم هناء بوجهي رزلتنا رزالة جماعية. -وتالي وياچن مسودنات. بلا ساحلاتني سحل وعايفة شغل البيت وراي على يا مال. -غير اشتاقينا لك يا خالة.

-لا گولي اشتاقيت للغاوي تضبط وياچ. بستها أضحك. -لا والله اشتاقيت لك كلش. يعني كل أسبوع يلا تراوينا هالوجه الحلو أدري ليش أحد گال لك إحنا عيالچ. -يمة يمة البت صايرة وكحة ولكم. -ههههه. بعدچ ما شايفة شي يمه. -اسكتي هنيوة. حالچ موش أحسن من حالها. ريحان: شلونچ عمة؟ -يا يا خايبين غير تگولون ريحان هنا! راحت بوستها وظلت تسألها عن وضعها ويا الحمل. عشر دقايق وطبت جوة ظلينا اني والبنات گاعدات بالمرجوحة نسولف.

-أي هنيوة شخبارك ويا أخوي؟ -مثل أخبار أمريكا ويا العراق. -هههههه. يعني في حروب مستمرة. -طاحنة الله وكيلي. -ما عليك بيها ريحان. ترى والله الولد حباب بس هي ما تعرف شلون تكسبه. -كلش حبااااب. هيچي الطيبة تنگط من كل صوب بيه. -ههههه. ياا ياااا ولچ مو آنه أخته گاعدة جارچ شلون تحچين عليه؟ -دولي وإذا أخته. إذا آنه ما جارعة أخوكِ تردين أجرعكِ؟ -هههههه. عزة بعينچ هناء ما عندها صاحب صديق الدور گلبَت على ريحان.

-أي واسكتي لا أگلب عليكِ أنتِ همينه. -والله تسويها. هناء: ضحكت عليهن ودرت وجهي. دگ جهازي بـ هالاثناء طلعت من الجنطة رقم غريب. رديت بلا ما أحچي اجاني صوت بنية تصيح: ألووو. -نعم ياهي وياي؟ -أنتِ هناء خطيبة صهيب؟!! ...