الفصل 8

شهد:انا كدا خوفت ليكون روح حصلها حاجه على:لا روح كويسه انا مكلم يونس الصبح ومطمن عليهم كلهم ... طيب بصى هكلمهم فى القصر عشان تطمنى شهد:ياريت على كلهم وردت عليه عمته راضيه وقالتله ان يونس راح يوصل روح ورحمه لدكتورة عشان يطمنو على روح على قفل وبص لروح:اطمنى ياستى يونس اخد روح ومعاها رحمه وراحو لدكتورة عشان يطمنو على روح اطمنتى كدا شهد:الحمدلله كنت قلقانه جدااا طيب انا عايزة رقم يونس عشان ابقي اكلمه اطمن على روح

على:اكتبي عندك ياستى..... شهد:شكراا جدا واسفه انى جيت من غير معاد وعطلتلك على:لا عادى ولا يهمك شهد:انا لازم امشي بقي الباب خبط ودخلت منى على:اشربي العصير الاول قبل ماتمشي مينفعش اول مرة تيجى مكتبي وتمشي من غير ضيافه شهد ضحكت:ماااااشي...... عند دكتورة روح اللى كشفت عليها وراحت قعدت على مكتبها ورحمه ساعدت روح وراحو قعدو قدام الدكتورة رحمه:طمنينا عليها يادكتورة

الدكتورة:للاسف ياروح جسمك ضعيف جداا لازم تاكلى كويس وياريت يكون فى راحه تامه انتى بقيتى فى اواخر الشهر السادس وبعد الشر لو حصل اى مضاعفات هيكون خطر عليكى انتى والبيبي وانا هكتبلك على شويا ڤيتامينات لازم تاخديهم فى وقتهم روح:تمام شكراا يادكتورة الدكتورة وهى بتمد ايدها بروشته:ده واجبي رحمه وروح خرجو ونزلو كان يونس ساند على عربيته رحمه:اتاخرنا عليك يايونس يونس وهو باصص لروح اللى عينيها فى الارض:لا ياحبيبتى

اتطمنتو الحمدلله رحمه:الدكتورة بتقول ان جسمها ضعيف جداا ولازم تاخد بالها من نفسها وكمان كتبتلها الروشته دى عايزين نجيبها يونس اخد الروشته من رحمه:تمام اركبو وانا هعدى على الصيدليه ونجيب العلاج روح ورحمه ركبو ورا جمب بعض ويونس ساق العربيه وبعد شويا وقف عند الصيدليه ونزل جاب العلاج وبعدها رجعو على القصر ================ فى القصر كانو الكل متجمعين دخل يونس ووراه روح ورحمه يونس:السلام عليكم الكل:وعليكم السلام

ورحمه الله وبركاته رحمه:مساؤكم قمر راضيه:جمر كيفك يابتى فاطمه:طمنينا ياروح الداكتورة جالت ايه رحمه:جسمها ضعيف يافطوم ومحتاجه راحه وتاخد بالها من نفسها عشان ميبقاش فى خطر عليها هى والنونو راضيه:لا يابتى لازمن تاخدى بالك على روحك يابتى اجلال:ابن ابنى لازمن ياچى جوى كيف ابوه ويكون فى علمك انى ناويت اسميه سليم على اسم ولدى صفا:صوح ياما ماهو حفيدك وزين انك اختارتى اسم سليم لاچل يكون كيف ابووه روح قامت وقفت مرة واحده:مش

هيحصل اجلال كمان وقفت:ايه اللى مش هيحصل يابت البندر روح بقوة:مش هسميه الاسم ده لو على جثتى ومش هسمحله يكون زيه ابدااا يونس:اهدى ياروح محدش هيقدر يجى جمب ابنك وانتى ليكى الحريه الكامله فى كل حاجه تخصه.... رحمه خدى روح ترتاح شويا راضيه:اطلعو يابتى وانى هچيبلكو الوكل فى اوضتكو رحمه:حاضر ياعمتو روح طلعت مع رحمه وفاطمه وراضيه دخلو المطبخ ويونس بص لاجلال وصفا بغضب وطلع هو كمان صفا:هى الداكتورة دى اديتها حبوب

جوة ولا ايه ياما اجلال:انى چبت اخرى من البت دى ولازمن اخلص منيها صفا شهقت:هتجتليها ياما اجلال:اكتمى هتفضحينى تعالى نطلعو فوج ================= فى جناح يونس فونه رن برقم غريب اللى رن عليه اكتر من مرة ويونس ماكنش بيرد رد عليه:السلام عليكم شهد:وعليكم السلام ازيك يايونس انا شهد يونس:انا بخير انتى عامله ايه واخبار عم محمد شهد:احنا بخير الحمدلله انا برن عليك عشان اطمن على روح ورحمه بردو مش بترد

يونس:اسف ياشهد ماكنتش اعرف انه رقمك على العموم روح كويسه وراحت ترتاح فى اوضتها شهد:طب الحمدلله طمنتنى انا كنت قلقانه اوى عليها والدكتورة قالتلكو ايه يونس باستغراب:وانتى عرفتى منين شهد:من على يونس:بتقول ان جسمها ضعيف ومحتاجه راحه شهد:طب هو انا ممكن اكلمها ولا مش هينفع يونس:طب ماتكلميها عادى اكيد صاحيه شهد:ماهى رحمه مش بترد يونس:هى روح مش معاها تلفون شهد:لا مش معاها عشان كدا بتصل عليكو انتو يونس:طيب انا هرن على

رحمه اخليها ترد عليكى شهد:تمام شكراا يايونس واسفه لو ازعجتك يونس:لا عادى ولا يهمك يونس قفل مع شهد ورن على رحمه قالها ترد على الرقم اللى بيرن عليها وقالها اخر الرقم عشان تعرفه وعرفها انها شهد وقفل معاها ودخل ياخد شاور عشان ينام ================ فى اوضه رحمه قاعدين روح ورحمه سوا ورحمه رنت على شهد اللى ردت عليها شهد: والله كتر خيرك ياست رحمه انك تكرمتى ورديتى عليا شرف كبير ليا والله روح ورحمه ضحكو رحمه:يابنتى مانا مش

بترد على ارقام غريبه شهد:اه مانا عارفه بتفكيره حبيب القلب روح:عامله ايه ياشهد شهد:ولا اى حاجه كنت هموت من القلق عليكى بس روح ضحكت:انا بخير ياحبيبتى متقلقيش عليا وركزى فى امتحاناتك لو سمحتى شهد:مانا نزلت الكليه النهارده بحاول الم اللى فاتنى... انتو بقي عاملين ايه من غيرى رحمه:ميت فل وعشرة شهد:واطيين ... والحرابيق عاملين ايه رحمه باستغراب:مين روح ضحكت ومقدرتش تتكلم

شهد:خلينى انا اعرفك على الحرابيق قصدى على الحربوقه اجلال مرات عمك والحيزبونه صفا مرات اخوكى رحمه ضحكت اوى:يخربيت عقلك انتى عارفه لو سمعوكى هيكون اخر يوم فى عمرك ... بس والله لايقين عليهم اوى شهد:محدش يقدر يمس شعره منى يارحومه قلبي انتى البنات فضلو يتكلمو كتيييير اوى لحد ماتعبو ونامو =============== صباح يوم جديد فى اوضه اجلال دخلت صفا:صباح الخير ياما اجلال:وهياچى منين الخير طول ماالعجربه دى وسطينا

صفا:انى چايه اجولك چدى طلب يونس من بدرى وجاعدين فى المندرة معرفش بيتحدثو فى اى اجلال بقلق:هيكون فى اى صفا:معرفش ياما بس ده مصبرش لما يصحى لا ده خلى مرت عمى فاطمه تطلع تصحيه اجلال:لع اكيد فى حاچه ولازمن اعرف بعدى من وشي صفا:على فين ياما اجلال:خليكى واجفه على السلم لو لمحتى حد نازل عرفينى صفا:حاضر اجلال نزلت وماكنش فى حد خالص قربت من باب المندرة عشان تسمع بيقولو ايه =============== فى المندرة قاعد عثمان وقدام يونس

يونس:انت متاكد ياچدى عثمان:ده حجها ياولدى يونس:بس هى رافضه ياچدى تاخد فلوس عثمان:انى كلمت المحامى وجال انه جدامه يومين وياچى وهكتب نصيب ولدها من ورث سليم ومش هجولها واصل ولازمن تاخد بالك يايونس مرت عمك وصفا مش لازمن يعرفو يونس:حاضر ياچدى اجلال اتصدمت من الكلام اللى سمعته وطلعت بسرعه ودخلت هي وصفا الاوضه صفا:مالك ياما اجلال:انى مستحيل اسمحلهم يعملو اكده صفا:يعملو ايه ياما انتى سمعتى ايه

اجلال:چدك عايز يكتب لابن روح نصيبه من ورث اخوكى صفا بصدمه:سليم اجلال:وكان عايز يعمل عملته فى السر ومعرفنيش واصل صفا:وهتعملى ايه ياما اجلال:لازمن افكر زين ... بت البندر مهتاخدتش چنيه من فلوس ولدى وااااصل ================== فى المطبخ كانو البنات بيحضرو الفطار مع فاطمه اللى كانت معترضه ان روح تعمل معاهم وعايزاها ترتاح بس مع اصرار روح وافقت فاطمه وراضيه يسبوهم يحضرو الفطار

وبعد فترة كان الكل فطرو ويونس راح الشركه ورحمه وروح طلعو اوضتهم عشان يتجنبو اجلال وصفااا خالص وراضيه وفاطمه بيحضرو الغدا وعثمان فى اوضته ================ عند شهد خارجه من العمارة عشان تروح الكليه فجاه وقفت عربيه قدامهاا وكان على على:صباح الخير ايه الصدفه دى شهد:صباح النور انت ايه اللى جابك هنا على:انا ساكن مع طارق قريب من هنا وبعدى من هنا كل يوم شهد:غريبه اول مرة اشوفك على:ده من حظك القمر شهد:لا والله على:راحه فين

شهد:الكليه اكيد على:طب تعالى اوصلك فى طريقى شهد:توصلنى.... هو انت اخدت عليها ولا ايه على:انتى تطولى يابت على باشا الهلالى يوصلك بدل ماتتمرمطى فى الموصلات شهد:مواصلات مرة واحده ده هو تاكسي اعمى بيوصلنى لحد الكليه ياعلى باشا الهلالى على ضحك:طب اطلعى يلا شهد:اوكى شهد ركبت وطول الطريق بيضايقو فى بعض لحد ماوصلو قدام الكليه شهد:الف شكر ياعلى باشا على:بقولك ايه ماتيجى اعزمك على الغدا النهارده شهد بردح:نعم ياعمررررر...

انت عشان وصلتنى مرتين هتفكرها سايبه ولا ايه على:ابو شكلك انزلى يا بت خسارة فيكى الغدا اقسم بالله شهد:طب هتعزمنى فين على:هاهاها كان زمان ياماما قبل واصله الردح اللى عملتيها دى شهد ضحكت:طب انا هطلع اجدع منك على:ازاى بقي انشالله شهد:هعزمك على الغدا عندنا فى البيت ايه رايك وهطبخلك بايدى كمان على:الله الغنى ياختى شهد:لا والله مش بهزر هقول لبابا وهستناك النهارده ايه رايك بدل مانت لقيط كدا ومش لاقى مكان تاكل فيه قشطااا

على ضحك:بعيداا عن ان انتى بتهزئينى مش بتعزمينى بس انا موافق شهد:خلاص استناك على الساعه كام على: ٥ كويس شهد:كويس جدااا طب بتحب تاكل ايه على:ااممم ممكن ورق عنب وبشاميل وبانيه وفراخ مشويه شهد:اييييه حيلك حيلك على ضحك:بهزر طبعااا هاكل من الاكل اللى انتو هتاكلوه شهد:اوكى يلا سلاموووز على:سلامووووز شهد نزلت ودخلت كليتها وعلى مشي ================

رحمه وروح كانو فى اوضتهم وروح نزلت المطبخ عشان تشرب وكانت اجلال وصفا واقفين بعدين عنها وشايفينها اجلال بهمس:خليكى اهنه راجبي الطريج زين صفا:حاضر ياما ربنا يستر اجلال مشت وكانت روح قريبه من السلم اجلال قربت من ضهر روح وخنقتها بدراعها وبايد التانيه كتمت بوقها اجلال بهمس زى فحيح الافاعى:بجا عايزة تاخدى ورث من فلوس ولدى ديه على چثتى يابت البندر روح كانت بتحاول تبعد عنها بس مش عارفه

اجلال:انى بجا هخلص عليكى انتى واللى فى بطنك اجلال زقت روح بقوة وكانت هتقع من على السلم ومسكت فى تربزين السلم وروح كانت مرعوبه واجلال قربت منها وزقتها تانى بكل قوتها روح صرخت باعلى صوت لما وقعت من على السلم وراسها كانت بتخبط فى درجات السلم ولما وصلت لنهايه السلم كانت بتنزف بقوة وفقدت الوعى صفا كانت واقفه وشايفه اللى بيحصل وشهقت بقوة:نهار مش فايت اجلال كانت بتبص عليها بغل وفرحه:تستاهلى الموت يابت البندر

اجلال جرت بسرعه على اوضتها هى وصفااا رحمه خرجت من اوضتها لما سمعت صرخه روح ولسه هتنزل السلم اتصدمت من منظر روح اللى واقعه فى اخر السلم وحوليها بركه دم رحمه صرخت باعلى صوت:روووووووووووووح فاطمه وراضيه وعثمان خرجو بسرعه على الصوت والكل انصدمو لما شافو روح فاطمه جرت عليها ورفعت نقابها كانت راسها متعورة:روح يابتى رحمه نزلت بسرعه وقربت منها:ماما دى بتنزف عثمان:كلمو الاسعاف بسرعه رحمه عيطت:رووووووح

يونس فى الوقت ده وصل وكان ماسك فى ايده شنطه صغيرة وشاف منظرهم وهما متجمعين حولين روح ورمى اللى فى ايده وجرى بسرعه عليها:فى ايه... ايه اللى حصل عثمان:مش وجته ياولدى شيلها ناخدها على المستشفى راضيه:يلا يا ولدى البنيه بتنزف يونس نزلها النقاب وشالها وخرج ورحمه وعثمان راحو وراه يونس حطها فى الكرسي الخلفى وراسها على رجل رحمه اللى راكبه جمبها وعثمان قدام ويونس اللى ساااق باقصى سرعه .......

فى شقه عم محمد اللى استقبل على بكل حب وقعدو كلهم ياكلو على السفره فى جو جميل كله هزار وضحك من على وشهد على:لا بس بجد تسلم ايدكى الاكل تحفه محمد:ام شهد الله يرحمها اتوفت وهى بتولدها وشهد اتحملت مسؤليه البيت من وهى ف اعدادى كانت بتطبخ وبتعمل كل حاجه على:ربنت يرحمها شهد:المهم ان الاكل عجبك على:حلو جداا والله البشاميل وورق العنب وبانيه بس نسيتى انتى الفراخ المشويه شهد ضحكت:المرة جايه بقي متبقاش طماع كدا على ومحمد ضحكو

تلفون على رن وكان طارق على:ايه ياطاروق طارق:انت فين ياعمى على:انا فى بيت عم محمد مالك فى ايه طارق:كنت بكلم يونس وعرفت منه ان روح فى المستشفى على قام وقف:ايه فى المستشفى ليه ايه اللى حصل طارق:يونس ماكنش عارف يتكلم بس اللى فهمته منه انها وقعت من على السلم ونزفت كتير على:لا حول ولا قوة الا بالله طارق:انا كنت بكلمك عشان تروح وتبقي مع يونس انا مش هقدر اسيب المأموريه اللى عندى اخلصها واجيلكو على:اكيد هروح الوقت على طول

طارق:خد بالك على نفسك لان الدنيا ليل على:سيبها على الله على قفل مع طارق محمد:خير يابنى فى حاجه حصلت على بص لشهد:روح فى المستشفى شهد بصدمه:اييييه على:وقعت من على السلم محمد:لا حول ولا قوة الا بالله يارب شهد:وهى عامله ايه اتكلم على:معرفش ياشهد والله بس انا لازم اسافر الوقت عشان ابقي مع يونس شهد:انا هاجى معاك انا مش هقدر اسيب روح لوحدها محمد:وانا كمان ياحبيبتى هاجى معاكى على:طب اجهزو بسرعه عشان نتحرك

شهد دخلت الاوضه بسرعه تغير ومحمد كمان وبعد شويا نزلو وركبو مع على اللى اتحرك على الصعيد ================= فى المستشفى يونس ورحمه وعثمان واقفين قدام اوضه العمليات بعد ماالدكتورة قالتلهم ان الجنين للاسف مات ومحتاجه عمليه تنضيف ومن وقتها محدش خرج يطمنهم يونس اللى كان هيتجنن ومنظرها وهى واقعه فى الارض وبتنزف مش بيروح من باله رحمه اللى بتعيط فى حضن عثمان اللى بيحاول يهديهاا الدكتورة خرجت يونس قرب منها:روح عامله ايه

الدكتورة:للاسف الوقعه كانت جامده جداا وزى ماقولتلكو ان الجنين مات وعملنلها عمليه ومطلوب منكو تاخد الجنين عشان الدفن يونس:دفن الدكتورة:روح كانت فى اواخر الشهر السادس والجنين كان اتكون وفى الحاله دى بيدفن رحمه:طب وروح يادكتورة الدكتورة:الخبطه اللى كانت فى دماغها كانت صعبه وراسها اتجرحت والحمدلله انه بسيط بس اللى انا لاحظته ان فى كدمات وجروح وحروق كتير فى جسمها نتيجه عنف بس الظاهر انها قديمه يونس بصلها اوى ولعن سليم ابن

عمه فى الوقت ده الدكتورة:هى الوقت هتتنقل اوضه عاديه بس مش هتفوق حالياا ممكن على بكرة الصبح باذن الله عن اذنكو عثمان:اذنك معاك يابتى لا حول ولا قوة الا بالله العلى العظيم ربنا يصبرك ياروح يابتى رحمه عيطت اكتر ودخلت فى حضن جدها تانى:خسرت ابنها ياجدو هتكون حالتها ايه لما تفوق وتعرف انا خايفه عليها اوى يونس بص لرحمه وقرب منها:رحمه رحمه بصتله يونس:ايه اللى حصل روح وقعت ازاى

رحمه:معرفش احنا كنا فى الاوضه وهى قالت هتنزل تشرب وبعد ماخرجت بشويا سمعت صوتها بتصوت عثمان:لا حول ولا قوة الا بالله يارب يونس:وماكنش فى حد غيرها لما خرجتى من الاوضه يارحمه رحمه بتوتر:لا يونس استغرب توتر رحمه وحس انها مخبيه حاجه

روح خرجت من اوضه العمليات واتنقلت على اوضه تانيه والكل كانو معاها ويونس طلب من جده يرجع القصر عشان مايتعبش وياخد معاه رحمه اللى رفضت تسيب روح وعثمان رجع مع السواق ويونس دفن الجنين ورجع المستشفى تانى وعلى اللى كان على تواصل مع يونس طول الطريق بيطمن على روح ============= فى عربيه على شهد اللى مبطلتش عياط لما عرفت اللى حصل مع روح محمد:اهدى يابنتى بقي المهم انها بخير شهد بعياط:صعبانه عليا اوى يابابا محمد:ربنا يصبرها

ويعوضها خير يابنتى على:لازم تبقي قويه ياشهد عشان هى تستقوى بيكى مش لازم تشوفك كدا محمد:على معاه حق ياحبيبتى شهد مسحت دموعها:حاضر ... لسه كتير ونوصل على:ساعتين وبعدين يونس قال ان روح مش هتفوق غير بكرة الصبح وهنكون وصلنا قبل ماتفوق باذن الله محمد:ان شاء الله يابنى ============= فى الاوضه اللى فيها روح يونس واقف ساند على الباب وعينه على وروح اللى راسها ملفوفه بشاش وفى كدمات فى وشهاا اللى شاحب

رحمه قاعده على الكنبه وبتعيط فى صمت يونس قرب وقعد جمبها واخدها فى حضنه:اهدى يارحمه هتبقي كويسه رحمه:زعلانه عشانها اوى يايونس اوى هى دايما بتقول انه مش فارق معاها اللى فى بطنها بس ده حته منها يونس:ان شاء الله هتبقي كويسه واحنا كلنا معاها مش هنسيبها اهدى بقي رحمه:حاضر يونس:رحمه انا لما سالتك قدام جدى كان فى حد لما خرجتى من الاوضه انتى اتوترتى وقولتى لا وانا متاكده انك كذبتى عليا

رحمه:بصراحه انا لما سمعت صرخه روح وخرجت من الاوضه ونزلت بسرعه سمعت باب اوضه مرات عمى اجلال بيتقفل يونس بغضب:لو ليها ايد فى اللى حصل مش هرحمها رحمه:اهدى يايونس انا مرضتيش اقول قدام جدو لما نتاكد من روح لما تقوم بسلامه ان شاء الله يونس:باذن الله ... ارتاحى شويا ياحبيبتى وروح كدا كدا مش هتفوق غير الصبح رحمه:وانت مش هتنام شويا يونس قام من على الكنبه:لا يارحمه ارتاحى انتى

رحمه فردت جسمها على الكنبه وغمضت عينيها ونامت من التعب ويونس قعد على الكرسي اللى جمب روح ومسك ايدها وباسها:لو ليها ايد فى اللى حصلك هيندمو ندم السنين صدقينى ياروح &&&&&&&&&&&& فجر يوم جديد وصل على وشهد اللى نزلت تجرى من العربيه ودخلت بسرعه تسأل الاستقبال اللى قالولها على رقم الاوضه اللى فيها روح وقالت لعلى ومحمد وطلعت تجرى بسرعه وهما وراها شهد لما وصلت عند الاوضه دخلت بسرعه من غير ماتخبط

يونس ساب ايد روح وقام وقف:حمدلله على سلامتكو محمد:الله يسلمك يابنى شهد قربت من روح وعيطت اول ماشافتها يونس:اهدى ياشهد واحمدى ربنا انها بخير ورحمه صحت على صوتهم وقربت من شهد وحضنو بعض وعيطو محمد:يابنات لازم تهدو عشان لما تفوق تستقوى بيكو مينفعش كدا رحمه:صح ياشهد ماينفعش ننهار قدامهم كدا انا اصلا خايفه عليها لما تعرف شهد:وانا والله ربنا يقويهاا الكل:يارب شهد:هى وقعت ازاى

رحمه:كنا فى الاوضه وقالت هتنزل تشرب وبعد ماخرجت سمعتها بتصرخ ولما خرجت من الاوضه لقيتها واقعه وبتنزف شهد بصت ليونس:يعنى وقعت لوحدها ولا حد وقعها محمد:عيب الكلام ده ياشهد المهم نطمن على روح شهد:هنطمن يابابا وهنعرف منها وقعت ازاى بس ورحمه امى لو حد ليه ايد فى اللى حصل هيندمو واوى كمان يونس:من غير ماتقولى ياشهد لو حد وقعها قصد حسابه هيكون معايا انا واكيد مش هسيب حق روح ابداا محمد:اهدو ياولاد ان شاء الله خير يونس:على

فين ياعم محمد محمد:برا يابنى مرضاش يدخل عشان روح يونس خرج وعلى اول ماشافه حضنه:هتقوم بسلامه ياصاحبي يونس:خوفى كله كان بيبقي على عيلتى ياعلى اول مرة احس بالخوف الكبير ده حاسس قلبي وجعنى ومنظرها وهى واقعه والدم حوليها مش بيروح من بالى على:ربنا يخليكو لبعض يايونس محمد خرج من الاوضه يونس:على خد عم محمد القصر عشان يرتاح محمد:لا يابنى انا هفضل معاكو لما اطمن على روح يونس:اللى يريحك

الرجاله قعدو برا يستريحو والبنات جوا الاوضه يستنو روح تفوق ==================== صباح يوم جديد فى القصر وتحديدا فى اوضه اجلال صفا:اهى مامامتش ياما افرض بجا اتكلمت اجلال:دى بت چبانه مهتجولش حاچه صفا:يارب ياما لان يونس لو درى بالموضوع مش بعيد يجتلنا اجلال:بلاش انتى تخافى وتتوترى اكده عشان محدش يشك بحاچه واااصل يلا روحى على اوضتك صفا:حاضر ================ فى المطبخ كانو فاطمه وراضيه صاحيين من بدرى بيحضرو اكل عشان روح

راضيه:لسا شوى والوكل يخلص فاطمه:اه ياخيتى راضيه:جلبي واچعنى على البنيه يافاطمه جوى فاطمه:منظرها وهى سايحه فى دمها ماهيروحش من بالى واصل راضيه:بت زينه وطيبه وجلبها كيف الحليب مهتستاهلش اللى بيحصلها فاطمه:يعلم ربنا انى حبيتها كيف رحمه بتى راضيه:اطلعى اچهزى وانى هخلى فتحيه تحط الوكل وهطلع البس كمان عشان نروح المستشفى فاطمه:حاضر ياخيتى ====================== فى المستشفى البنات قاعدين على الكنبه

وفاقو على صوت انين روح:ااااه شهد ورحمه قربو منها بسرعه شهد:روح حبيبتى انتى سمعانى روح كانت بتحاول تفتح عينيها لحد مافتحتهم وشافت البنات رحمه:انا هنادى الدكتورة بسرعه رحمه خرجت من الاوضه وقالت ليونس ان روح فاقت وراح عشان ينادى الدكتورة ودخلت الاوضه تانى وسمعت روح روح بتعب:مات ... هو مات ياشهد شهد:اهدى ياحبيبه قلبي وارتاحى ولما تبقي كويسه هنتكلم روح بتعب ظاهر:انا مش حاسه بيه جوايا ياشهد ....

هو اتحمل كتير اوى معايا .... بس المرة دى الوقعه كانت ...... جامده اكيد مش هيقدر يستحمل ...... شهد بصت لرحمه وعيطو الاتنين رحمه:ارتاحى ياروح انتى تعبانه بلاش تتكلمى روح غمضت عينيها وافتكرت اجلال وكلامها ولما زقتها عشان تقع من على السلم الباب اتفتح ودخلت الدكتورة ووراها محمد ويونس الدكتورة:حمدلله على سلامتك ياروح روح فتحت عينيها:الله يسلمك .... لو سمحتى ريحينى محدش فيهم راضي يقولى.... هو مات مش كدا يونس بص لرحمه

وشهد اللى بيعيطو الدكتورة:ده قضاء ربنا ياروح وانتى مؤمنه بالله ربنا يعوضك خير ان شاء الله روح غمضت عينيها بتعب الدكتورة بصت ليونس:هى الحمدلله بقت احسن لو روح حابه تمشي ممكن النهارده بليل هى لو فى وسط العيله احسن من المستشفى ولو فى اى حاجه كلمونى وانا هجيلها وكمان لو تهتمو باكلها لان جسمها ضعيف جداا يونس:تمام شكراا لحضرتك الدكتورة:العفو محمد قرب من روح وحط ايده على

راسها وروح فتحت عينيها:ربنا يعوضك خير يابنتى ده امر ربنا ونصيبه مايشوفش نور الدنيا روح:الحمدلله الباب خبط ودخل عثمان ومعاه فاطمه وراضيه عثمان:كيفك يابتى روح:بخير فاطمه:حمدلله على سلامتك يابتى ربنا يصبرك راضيه:انتى عارفه ربنا يابتى وعارفه ان ده جضاء وجدر ربنا يقويكى روح كانت بتبص لسقف الاوضه ومش بترد على كلامهم عثمان قرب منها:روح يابتى روح بصتله عثمان:ابكى يابتى بلاش تحبسي وچعك چواتك روح:لاول مرة دموعى مش راضيه تنزل

شهد:طب ارتاحى ياروح ياحبيبتى راضيه:دانى وفاطمه عملنلك وكل هتاكلى صوابعك وراه روح:ماليش نفس فاطمه:لع يابتى لازمن تاكلى زين عشان تصدى حالك وتوفجى على رچلك شهد:لازم تاكلى ياروح عشان انتى قايمه من عمليه وجسمك ضعيف رحمه:بصى مش هنضغط عليكى كلى حاجه بسيطه

روح هزت راسها باه ورحمه وشهد ساعدوها تقعد وبدات راضيه تاكلها بايدها ويونس كل ده عينه عليها مش قادر يتكلم حتى حاسس انه قصر معاها ومقدرش يحميها زى ماوعد جده وخرج من الاوضه........ بليل الكل رجعو على قصر الهلالى رحمه وشهد كانو مسندين روح اللى ظاهر عليها التعب ووراها محمد وعثمان وعلى ويونس وفاطمه وراضيه اجلال وصفا كانو قاعدين فى الريسبشن روح بصت لاجلال اوى ولسه هتروح ناحيتهم شهد:راحه فين ياحبيبتى لازم تطلعى ترتاحى شويا

روح:ثوانى بس روح بعدت عن البنات ومشت بتعب لحد ماوقفت قدام اجلال وصفا روح بتعب:يارب تكونى مبسوطه ... حفيدك مات ومش هيشاركك فى ورث ابنك ... بجد بهنيكى من قلبي ... بس عارفه انا مش زعلانه انه راح فى الاول جه بسبب حقارة وجبروت ابنك وراااح بسبب حقدك وغلك ... يارب تكونى مبسوطه لما موتى حفيدك بايدك الكل اتصدمو لما روح قالت كداا روح:فاكرة لما قولتى نفسك يبقي شبه ابنك وهتسميه على اسمه كمان ....

عارفه لو كان جه الدنيا وحسيت بس مجرد احساس انه هيكون شبهه انا كنت هقتله بايدى مش هو ابنى بس كنت هموته ... عشان لما يكبر ميظلمش بنات الناس ويستقوى عليهم .... مش هقولك غير حسبي الله ونعمه الوكيل فيكى انتى وابنك على اللى عملته فى حياتى ... منكوو لله منكوو لله يونس قرب من روح:روح معنى كلامك ان مرات عمى هى اللى وقعتك من على السلم روح وهى باصه للاجلال:ايييه فكرانى هسكت ومش هتكلم

روح بصت ليونس:اااه هى اللى وقعتى من على السلم وعارف قالتلى ايه ... قالتلى مش هسمحلك تاخدى جنيه من فلوس ابنى روح رجعت بصت لاجلال تانى:عارفه لو فلوس ابنك كلها اتحطت قدامى انا هعمل ايه.... كنت هولع فيهم عشان فلوسه دى اللى خليته يعامل الناس بجبروته وهى اللى خلته شيطاااااااان روح حست بدوخه وكانت هتقع ويونس صدهاا ورحمه جرت عليها وسندتها هى وشهد يونس:خدو روح ترتاح فى اوضتها روح طلعت مع البنات

ويونس قرب من مرات عمه:انتى سمعتى كلامى انا وجدى صح اجلال:كلام ايه يونس:ان جدى هيكتب نصيب ابن روح من ورث سليم اجلال:لا معرفش حاچه عن الكلام ديه وكمان البت دى بتكدب انى موجعتش حد وحتى لو كان عاش مكنش هياخد جنيه من فلوس ولدى عثمان قرب منها وضربها بالقلم بكل قوته واجلال وقعت على الكنبه صفا:اماا... انت بتضرب امى عشان خاطر بت البندر ياچدى عثمان بعصبيه:وهموتها كمان اجلال:انت اتچنيت ايااااك على بصوت عالى:اماااااا...

انتى بتعلى صوتك على چدى صفا بصوت عالى:انت بدل ماتدافع عن امك بتوجف فى صف چدك دانتو اتچنيتو اياااك على قرب من صفا وضربها بالقلم:صوتك لو على مرة تانيه على اى حد من العيله لسانك ده هقطعه صفا عيطت وبصت ليونس وصرخت باعلى صوت:مرتك اضربت جدامك يايونس بيه ... لو كنت راچل كنت دافعت عنى يونس ضربها بالقلم:انا راجل غصبن عنك

يونس مسكها من دراعها بقوة:انا صبرت عليكى كتير ومش ناوى اصبر اكتر من كدا وانا بحذرك ياصفا وبدامك ماشيه بدماغ امك خليها تنفعك يونس زقها بقوة:انتى طـــ عثمان بحده:يونس يونس بصله عثمان:عايز تطلق بت عمك يونس:بنت عمى اللى ماشيه بدماغ امها وبتعمل كل مصيبه وتانيه ياجدى وانا مش قادر استحمل اكتر من كدا عثمان:معلش ياولدى عشان خاطرى المرة دى يونس غمض عينيه

بغضب وفتحهم وبص لصفا:لو غلطتى غلطه كمان قسمابربي ماهتفضلى على ذمتى دقيقه واحده بعدها ومحدش هيقدر يمنعنى وقتها يونس بص لاجلال:اما بقي بالنسبه ليكى يامرات عمى كنت مفكرة ان المحامى هياجى بعد يومين مش كدا لا المحامى جه وجدى كتب نص املاك سليم لابن روح اجلال:عملتو اللى راسكو بردك بس ربنا مرضاش بظلم واااصل وخلصنا من ولدها يونس:صح الوقت ابن روح مش موجود وهى مش هتاخد فلوس ابنك يبقي نخرجهم لله ياجدى ولا ايه رايك

عثمان:زين جوى ياولدى من بكرة تشوف جمعيه خيريه او دار ايتام وتتبرع بيهم اجلال بصوت عالى:لع دى فلوس ولدى ومن حجى انى وبس يونس:من بكرة هنفذ كلامك ياجدى عثمان:ده تحذير الاخير ليكى يااچلال ... مرة الچايه مش هيكون ليكي جاعده فى القصر اجلال:ليه هتطردنى من ملك چوزى ووالدى عثمان:ملك چوزك باسم على ولدك ودى كانت وصيته جبل مايجابل وچه كريم وفلوس ولدك سليم نصهم يونس هيتبرع بيهم يونس انا الباجى مبروكين عليكى ...

فلوس ولدك كيف اللعنه كيف ولدك تمام عثمان دخل المندرة ومعاه محمد ويونس وفاطمه وراضيه طلعو لروح