رواية وقد كانت صدفة الفصل التاسع عشر 19 - بقلم غـدير عبداللّٰه

"وقد كانت صدفة"

يَا صُدفه التَلمِني وَياك واشَريْها بثَمَن عَمرَي ⛓️❤️
_____________________________________

درت وجهي واشوف كرم واگف ورايه ويباوعلي اني بس شفته رأسا گمت وگتله..

غنى:كغم (كرم)شتسوي هنا؟

كرم: والله اجيت اشوف خطيبتي بس لگيته گاعده ومتونسه على الاقل سلمي سألي رأساً شسوي هنا؟

طبعاً أهنا نصدمت شنو خطيبته هو اني موافقته حتى گتله بس من وره خشمي..

غنى: اهلا تفضل هنا

كرم :بعد وكت والله وگعد ويانه على الطاوله حتى بدون ميسلم على حسين ابد محبيت تصرفه..

غنى:يي شنو سبب زيارتك الموفاجأه للجامعه؟

كرم :والله اجيت حتى اشوف خطيبتي وبنت عمي شلونه واله ميصير ،من گال خطيبتي رأساً اجت عيني بعين حسين .

غنى: دقيقه دقيقه اوگف شنو خطيبتك شنو بنت عمي أنتِ دتفتهم الي دتگوله شنو انت ابن عمي بس بالاسم اني ستوني يالله شفتك وعغفتك وجايني تكول خطيبتي وتعال انت شلون دخلت؟

كرم:مالج علاقه،يي وانتِ حتصيرين خطيبتي البارحه اجتني الموافقه واليوم اجيت حتى اشوفج بس لگيتج گاعده ومتونسه وي هذا الاخ وأشر على حسين،اباوع لحسين الحواجب مطبوگه وشراين ركبته ناطه يريد ينفجر گال...

حسين:هذا الاخ الي دتگول عليه عند اسم وعيب عليك خلي عندك اسلوب بالحجي هاي عود انت دارس وهيج اسلوبك لعد شنو خليت للجاهل..

هذا من سمعه هيج گوم ولزمه لحسين من ياخته وحسين اطول من عنده هم لزمه من ياخته الشباب گله گامت تباوع واني جنت صايره وره كرم باوعت لحسين بنظرت ترجي حتى يعوفه ليفضحنه گدام الجامعه كله هو عافه اجيت صرت بنص بيناتهم وجهت كلامي الكرم ..

غنى:شوف كرم اني جنت كُلش محتغمتك رغم ما اعرف اسلوبك بس هسه اتضحلي هذا الشي وإن جان عندك امل انو اتزوجك فهسه غاح وجايني حتصيرين خطيبتي اصلا حتى بعدني ما مفكره بهذا الشي واخر همي وهسه اگوله الك اني مموافقه فهمت اني م م و ا ف ق ه وإن جان على الي انطاكم الموافقه اني اعغف شلون اتصرف ويا..

وعفته ومشيت هو ضل صافن بعد ميعرف شنو يحجي احسن يستاهل عباله خايفه لو استحي مشيت وصلت نص الطريق اشوف مريم ما هيه درت وجهي واشوفه على نفس گعدته وتباوع بتجاه كرم أشرت اله شافتني اجت گتله...

غنى:ها عجبج عليج بالعافيه بس من هسه اگولج هذا يمشي وره حجايت ماما ف خاف تبادرين أخذي حذر تمام

مريم:هوب عمي شنو سالفه هو مال اعجاب اي بس من گلتي وره أمه نگلب واهسي يله أمشي صار النه هواي نسخت تعالي صدُك سولفيلي ليش اليوم تاخرتي..

غنى:يي مو ليوم ... خلصنه محاضره صار وكت الرجعه للبيت واحس راسي حينفجر من التفكير حتى اريد افتهم المحاضره ماكو دخلت للبيت واني فايره اعرف منو انطه الموافقة دكيت الباب سمحت الي بالدخول..

غنى:يعني أنتِ صدُك تحجين تنطين الموافقه حتى بدون علمي لا وهم متفقه على المهغ واني ما ادغي والله صرت احسج مو امي احس بس تغدين تخلصين من عندي ليش تدغين بيه اني ما موافقه ليش تحجين من كيفج ليش تخليني بموقفه يغيت الگاع تنشگ وتبلعني على الي صرت بي وين بالجامعة ، احجي واصيح احس روحي فقدت

عبير:لج مو عيب ترفعين صوتج على امج ها حقيره وثانياً اني لمصلحتج لان اريد الج الزين هيج تسوين بيه يلي بلا تربيه حرامات تعبي راح هيج ..

غنى:يا مصلحه التحجين عنه ها يا مصلحه تغدين تزوجيني الواحد اسلوب بالكلام ما عنده يعني تخيلي اجه اگوله شلون دخلت يگولي مو شغلج هذا الي تردين مصلحتي بي الي هو بس سألته يگول ما الج علاقه وتدغديني اعيش حياتي وياه وسكتت راسي مدري شنو صار بي احس الدنيا دتفتر بيه بعدين اذاني گامت تصوفر بعد ما اگدر گعدت على القنفه هي شافتني هيج اجت عليه ..

عبير: غنى شبيج ماما غنى

غنى:مادغي ماما راسي ديأذيني كُلش واذاني دتصوفر ..

عبير:يااا ولج خاف صعد الضغط صبري شويه اسويلج گلاص ليمون واجي نامي شويه ورفعي رجليج ليفوگ..

غنى:راحت هي وسويت مثل مكالت الي احسر قبق راسي حينشلع من مكانه شويه واجت جابته نطتنيا شربته شويه گدرت اگعد گتله اني رايحه للغرفه انام گمت وصلت قريب الباب بعد ما أكدر دخت لحگ عليه بابا ولزمني من ايد گال ...

عصام:هاي ليش شبيج بابا غنى تعالي گعدي هنا..

غنى:لا بابا اروح للغرفه احسن هنا كُلش ختنگت وباوعت لماما ،هو نتبه عليه

عصام:ها شكو شنو صار ليش تباوعين لامج هيج..

غنى:بعدين بابا اگولك هسه اريد انام ،ورحت صعدت لغرفتي سديته وسمعته يحجي ويگول ليش هيج وضعه وشنو صار نمت..

گعدت تقريباً العصر احسن شويه نزلت الكل موجود والوجوه ابد متبشر بخير عرفتهم درو بالموضوع.

عصام:ها بابا شلون صرتي؟

غنى: الحمدلله تمام

عصام:اكلتي؟

غنى:لا بعدني هسه اسويلي لفه واكل بس ليش تسأل صاير شي؟

عصام:شوفي بابا اني دريت بالموضوع وعرفت امج هي الي دازه الموافقة ف هسه اريد احسم الموضوع واسمع الحجايه من عندج حتى ارد الهم خبر لان حتفشل من عمج إذا ما رديت خبر لان حتى هو ميدري بالموضوع..

غنى:بابا اني من هسه اگوله الكم وهاي گدام الكل حتى لتكولين ما سمعت وهاي السوالف اني من بعد الي شفته اليوم عرفت شنو طبعه اني مموافقه على هل الزواج وخلص.

اشوف ماما وجه ميگصه الطبر وهذا طبعه متسلطه تحب كُلشِ على مزاجه تحس نفسها هي المتسلطه بالبيت ولأن اغلب الوقت بابا بالدوام ف تأخذ راحتها أما بابا كُلش بسيط ومتساهل ابد ميحب الشي خطأ يگول عنه والعكس صحيح وابد ميفرقه كوله عنده واحد بس اني أحسه يحبني مادري لان اني الوحيده بنته أو ما اعرف يمكن من وجهت نظري هيج..

عصام:ها هيه بابا خلص هذا هو بعد نسد الموضوع هنا وبعد ابد مينفتح هاهيه،بعد كله راحت لشغله طبعا ايسر وامير ما حجوا شي لان موافقين الرأي وي بابا ف ماعلقوا على شي .

بعد مرور من الزمن....

جنت ستوني طالعه من الحمام واشوف الجام مال الشبابيك كله مكسر والطلقات ما اعرف منين تجي من حلات روحي نزلت راسي وكعدت قريب الجربايه مالتي يم الكزاز واحس شي حار ينزل مني بس ما اعرف منين احس الي دا اشوفه فلم الطلقات فوگ راسي تمطر بعد ما اعرف شنو احجي اريد أصيح اريد يطلع صوتي ماكو من هول الصدمه وگاعده ومقرفصه جسمي إلى أن هدئت الطلقات واني على نفس گعدتي مصدومه واسمع التلفون يدگ واخاف اروح اجيبه مرت تقريباً عشر دقائق وجان تنفتح الباب وما حسيت بعد بشي..

امير

بعد وصول خبر وفاة الطفل وعدم ظهور الادله بحق المتهم ولقد حكمت المحكمة على المتهم ... بالحكم 10سنوات في السجن ورفعت الجلسه،خلص القاضي الحكم على وكيلي ونحكم ضل يصيح واني ما ادري واني ما الي علاقه هو طلع گبالي ومن هاي السوالف ،اني سويت الي عليه سويت الي اگدرله وأهله وأخو ضلو يصيحون اجه اخو تهجم عليه لزمني من ملابسي..

.. ليش ليش ما طلعته انت مو محامي مالته مو انطيناك فلوس ليش..

امير:لعد شسويلك قابل بيدي اني گتله روح اكتله اني سويت الي عليه واخوك ما عنده ادله حتى تظهر برائته بحثت ودورت ماكو اي ادله وحتى الشهود ماكو غير الي شافوا هو الي ضربه ،ضل ايصيح ويغلط راد يضربني اني رگعته كله ختل توازنه ورجع عليه بالاخير اجت الشرطه فاككتنه حتى ابو ما گدرله ضل يصيح ..

..اني الك بسيطه رح تندم على هاي سوايتك ،گتله

امير: شنو تريد تسوي سوي

وراح طلعوا اني هم نفظت ملابسي وطلعت وهم شفته گاعد ويخز عابت اي والله يخزر القزم هم بي عله ، ركبت بالسياره واحس نظراته ابد مو راحه الصراحه خفت يي خفت بس مو على نفسي خفت على واحد من اهلي يضرر لان اني اعرفهم هو لو ما اخو مكبسل جان ما سوه هذا الحادث ومن عرفت بعد ما أكدر انسحب لان مات ألطفل وما أكدر اشهد ضده لان وكيلي قررت ما اكول وهي المحكمه تقرر شنو عقوبته..

رحت للمكتب عندي شكم شغله خلصتهم وقضايا طلاق وكومه شغلات هم خلصتهم بال1تقريبا رجعت للبيت دخلت الوجه كله مگلبه صبت امي الغده جان گاعد بصفي ايسر
امير :خير شكو اشوو الوجه مگلبه صاير شي؟

ايسر: والله خويه علمي علمك

امير:اكول يمه شو غنى ما هيه شنو لساته بالجامعه

عبير:لا نايمه لان اجت تعبانه گالت لتگعدوني ،شفته شالت عيونه على أبويه وهو ولا شافه اكيد صاير شي خلصنه غده صعدت اريد انام گال أبويه للكل

عصام:اذا گعدت غنى اريد الكل موجود تمام

امير:خير يأبه صاير شي؟

عصام:من اكعد تعرفون كُلشِ..

امير:هزيت راسي وكملت طريقي دخلت للغرفه نمت على الجربايه گعدت اگلب بالتلفون واجت على بالي اكيد هسه بالدوام گلت اراسله راسلته دزيت
.

💬شلونج

ظليت شويه وصلت الرساله بس ما شافته بعدين مسحته ونمت

گعدت تقريباً العصر لگيتهم هم ستوهم گاعدين نزلت غنى وضل أبويه يسأله اسأله ستغربت شكو شنو صار بعدين گال اني عرفت السالفه طلعت الوالده دازه الموافقة من كيفه اني هم سكتت ما نطيت رأي لان هاي سوالف امي تتصرف من كيفه بدون متاخذ رأي أحد گالته غنى اني بعد الي شفته اليوم وضلت تحجي بالاخير گالت مموافقه ما عرفت شنو السبب گلت من تهدأ شويه اسأل طبعا اني ما الي دخل بالموضوع هو أبويه الي يتصرف خلصت الگعده بدلت وطلعت ويه جماعتي تعشينه بعدين رجعت ..

گاعد بالمكتب وكومت شغل عندي والتليفونات الإثنين يتصلون وكل ساعه يدگ، دگ تلفوني الشخصي مو مالت الشغل بس دگه ستمرت شكم مره رفعته بدون ما اشوف الاسم واسمع صوت امي واصوات هوايه وجان شي ديتكسر ..

امير:خير يمه شنو هل الصوت شنو صاير احجي واسمعه تحجي وصيح..

عبير:والك يمه تعال مدري منو دي يرمي على البيت وماكو احد بس اني واختك وما اله صوت واخاف اصعد اله فوگ خابرت ابوك گال جاي بالطريييق ،وصاحت گمت من مكاني مفزوع ادگ ماكو محد يشيله اخابر غنى هم كذالك بسرعه صعدت السيارتي وطرت ما اعول اوصل بسرعه دخلت للبيت واشوف ...

ميسم

واشوف القاعه مليانه نسوان دخلنه اني وماما نبدل طبعا ماما أصرت نتأخر مادري شنو الغايه خلصت عدلت شكلي لبست الفستان طلع يجنن عليه خاصه ويه المكياج والتسريحه موضوع ثاني طبعا ماما طلعت گالت من اگولج يا الله طلعين گتله ليش گالت ما الج علاقه اني هم گعدت انتضر شويه ..

وسمعت العريس حيطب لبسوا اني مادري شنو صار الي گمت بسرعه الباب فتحته وردت اشوف جان تجي ماما وتخزرني يعني لتطلعين دخل هو و وياهه لازمه من أيده صدُك تمنيت نفسي اني بمكانه واني الي لازمه ايده غوشت عيوني من الدمع لازم هذا اليوم الي ويكون اسعد يوم بس ما مكتوبلي افرح صدُك بهاي اللحظه حقدت عليه من كل گلبي مسحت دموعي قبل ليخرب المكياج ضلو فتره يرگصون ويطگون صور اشوف البسمه ابد ما فارگته كل ساعه يشاوره واني أحقد وبنفس الوقت انقهر.

خلصوا وطلع هو واجت ماما گالت يالله اني صابني شعور غريب بداخلي توتر مو طبيعي طلعت واشوف الانظار كله عليه وماما تمشي وتقره المعوذات وتغلط عليه ليش تلبسين هيج واني ابتسم جان الفستان لونه احمر و طويل وبي فتحه فوق من الركبه كُلش جان يجنن..

اخذتني من ايدي وعرفتني على اقربائهم واشوف النسوان كله تسأل اجت خالتي وصفنت عليه ..

..ها شنو الگمر الطالع تعالي خلي ابوسج اجت وباستني

اني ابتسمت اله ضلينه نسلم وهاي بعدين اجت رنا من الصالون طالعه كُلش كيوت وهم اخذتني دگ بوس عباله ما اجي للعرس بعدين عرفت غايت ماما طلعتني اخر وحده حتى تضغط بعض الناس وجان تصير عيني بعين العروس قابلته ببتسامه وهي قابلتني بصدمه عباله ما موجوده صدُك بهاي الحظه ودي ابوسه رحت اله وگتله..

ميسم:ماكو كون هسه ابوسج على هاي الخطه بس حرمات خاف الحمره تروح يله اخلي بابا هو يقوم بالواجب جان تضربني على متني..

اسراء:ايا ادب سزز احترمي نفسج اني الج بسيطه يله روحي عن وجهي ،وبدت الاغاني تشتغل والناس تردح رحت اني للعروس أمشي واصفك وتمايل بشعري صعدت على الستيج هي گامت گالت ..

فاطمه:شعندج جايه مو مجنتي هنا شعنج اجيتي؟

ميسم: اجيت شاورته آه اني ما اجي لعرس حبيبي ماهر لعد منو يرگص بعرسه ،بس من وره هل الكلام هوايه جروح تنزف بسببه هواي دموع نزلت من وره هذا الكلام وگمت لزمت أيده ونزلته وهي لو وده تشرب من دمي نزلنه نركص اني وياه وي اغنيه ساجده خاله ويا خاله اغني وارگص وياه اجت رنا هم ويانه وشفته أشرت لصديقته المكروه يبوو هاي شجابه هنا يله همين نضغطه شويه ضلينه نرگص شويه بعدين رحت گعدت لان احس كُلش اختنگت شافتني ماما اجت ...

اسراء:ها شبيج رجعنه؟

ميسم:ماما بس اريد ماي كُلش عطشت،اني اريده تروح هسه تسويلي محاضره شطوله جان تجي مره متوسطه بالعمر

..اگول خاله أنتِ متزوجه؟

ميسم:لا وعگدت حواجبي ليش؟

.. زين شنو اسمج؟

..ميسم

..انتِ مو بنت اسراء ..

ميسم:يي

شو هاي عافتني وراحت لماما اشوفه شلون سلمت عليه بعدين اجت ماما..

ميسم:اكول ماما منو هاي المره شو اجت سالت عليه وعليج شكو؟

اسراء:ولج هاي تصير بنت خال أبويه اجت سألت عليج تريدج لابنه..

ميسم:يي وانتِ شنو گلتي اله؟

اسراء:گتله مادري اشوف رأي ابوه ورأي البنيه واردلج خبر.

ميسم:تمام وين الماي ونطتني وراحت ، تيهت السالفه هو اني بعدني ما طالعه من التجربه الفاشله جايتني هاي تريد تخطبني لابنه والله بطرانه ضليت گاعده ما الي خلك خلص العرس وگالو اجت الزفه اني هم رحت لبست عبايه اسلاميه فوگ الفستان وشال بس مدري شعجب ماما شافتني ما حجت بالعكس هي گالت روحي لبسي دخل هالمره بس هالمره اني گباله شافني بلع طن هوه اني ضحگت وضلينه نغني ونصفگ اني و رنا وأمه و ماما تهلهل صعد على الستيج بعد ما لبست البرگع ما اعرف شنو اسمه رحت صعدت على الستيج ورحت گتله..

ميسم:مبروك وان شاء الله اختيار موفق يا ابن خالتي ونزلت هو خزرني اني ما هتميت بس كُلش نقهرت بعد ما اتحمل لازم اطلع رحت لماما گتله..

ميسم:يله ماما اني اروح أنتِ روحي ويه رنا گالت ابن عمه يأخذه ..

اسراء:يا لعد وأنتِ وحدج ترحين والبيت فارغ ابوج واخوج ماكو..

ميسم:لا خابرت بابا گال اني بالبيت ،كذبت عليه حتى بس اريد اطلع اريد اوصل للبيت ..

اسراء:اذا هيج يله روحي بس ديري بالج ،حتى ما كملت حجايته اخذت غراضي وطلعت فتحت الباب الخلفي خليت الاغراض ورجعت واني ارجف اريد ابجي اكو غصه بگلبي كل الي سويته كوله حتى أبين للناس اني مابيه شي بس داخلي متحطم ركبت السياره وسقت اديه يرجفن وعيوني صار عليه غواشه من الدموع اريد احجي اريد اطلع صوتي الغصه لازمتني مشيت سريع لان جان الشارع فارغ ماكو احد بيه مشيت وجان تطلعلي سياره من من الفرع من كثر دموعي ما شفته هو يدگ هورن اني بسرعه درته الستيرن السياره وجان ....

__________________
يتبع...

شلونكم بنات واعذروني على التأخير والله قدر الامكان دا انزل لكم بارت لان هذا الأسبوع حرفيا كومت شغل عندي وشكراً الكم على حماسكم الحلو وتعليقاتكم الجميله شكرا كولش هوايه الكم 🤭💋

لاتنسون التصويت وتعليق ومتابعة للحساب بدربكم والانستا همghe.92 لان اي شي يخص الرواية انشره وأوقات التنزيل مقتطفات عن الأحداث

دمتم برعاية الله وحفظه
غدير عبدالله