رواية وقد كانت صدفة الفصل الثاني والعشرون 22 - بقلم غـدير عبداللّٰه

"وقد كانت صدفة"

خلينه ب بساطة
معيش الروح
ما محتاجُ ادخلة
بمتاهات
النهايات الحزينة
يردن دموعَ
وأنه دموعي خلصت
بالبدايات...

_________________________

طلعتلي أمه سلمت عليه ودخلت للبيت گعدنه نسولف شويه بعدين سألته گتله...

ايلاف:اگول خاله شنو الي صاير شبيه ميسم اول تالي تطلب اجازه ومتشيل تلفون هم؟

اسراء:اوف اوف يايلاف ميسم رح تسويلي گلب ثاني بصف گلبي من وره عمايله!

ايلاف:ليش شنو الي صار؟ شبيه ميسم خاله خوفتيني، عدلت گعدتي وباوعت عليه..

اسراء:بعده ماحچت وجان تدخل ميسم مو ذيج ميسم ابد شكله وضعه ،وهاي اجت ميسم سولفوا انتو اني رايحه براحتكم..

ايلاف:هزيت راسي وگمت لميسم أمه طلعت بره رحت اله شكله الوجه اصفر وحاجبه مخليه لصقه جروح نتبهت على أيده بيه كانيولا ،هاي شبيج ولج شصاير بيج تعالي سولفيلي وسحبته من أيده وگعدت گباللي....

ميسم:ايييه ماكو شي بس تمرضت شويه جنه العرس ميرهملي ضربوني عين ههه ،انتِ شلونه العرس مالتكم؟

ايلاف: ميسم لتغيرين الموضوع احجي شنو الي صاير وضعج ابد ما عاجبني شكلج مثل وحده مسويه حادث..

ميسم:يي هو سويت حادث الحمدلله..

ايلاف: ميسم بلا تفاهتج هسه سولفيلي.

ميسم:يي والله شبيج مدا اكذب !

ايلاف: صدُك تحجين؟!

ميسم:يي والله.

ايلاف:عزززه بعينج وتگوله برود أنتِ صدُك تحجين لو شنو فهميني ،سولفيلي شنو الي صار الحادث وين وشلون وليش؟

ميسم:اوف والله ما اريد اتذكر بس شنو اسوي .. دخلت للقاعه... وانطانيا رقمه ومنتضره يتصل بيه بس مو تگولين لماما على الي صار وهاي السوالف وجنت بوضع ميسمح انتبه لتصرفاتي يعني خاف تحجين گباله گلت اله ساعدني الرجال وأخذ السياره يصلحه ها حبابه...

ايلاف: يعني أنتِ هسه مقتنعه بهاي سوايتج والحادث الي تعرضتيله علمود واحد باعني برخص ولج أنتِ شنو من بشر اني شفت هواي بشر بس مثلج وحده ضعيف وبلا كرامه ما شفت ولج أنتِ الى متى تضلين هيج وضعج ليش ميسم؟

ليش تسوين بنفسج هيج مو دتأذيه لروحج حرام بعد شكم يوم الله يحاسبج على نفسج ليش.

گامت تبجي واني مدري شنو يصير بيه من اشوف واحد يبجي وهو ضعيف مو بيده اي شي يسوي
حضنته خطيه ما تحملت هم صرت ابجي وياه واني أشوف ماكو بيده شي تسوي غير البجي، اوف يعمري أنتِ لتبجين والله كل ما اريد اقسه عليچ گلبي مد ينطيني والله كله هذا لمصحتج الي دا اسوي واني شنو الي بايدي غير اساعدج مسحت دموعها وگالت..

ميسم: مسحت دموعي ،لا هاهيه أن شاء الله حتجاوز هاي المرحله وأنتِ وماما والكل وجودك كافي بالنسبة إليه خلص اني البارحه گعدت ويه نفسي وأخذ قرار وان شاء الله مراح أتراجع عنه واترك شكو ذكره لان حرفيا تاذيت نفسي بعد ما تتحمل اكثر من الي هي بي ..

ايلام:اسمعه تحجي وشي بداخلي فرح وأخيراً صحت من السبات الي جانت بي.

واني وياج حبيبتي احنه خوات اي شي يصير وياج اني اول الناس حتى قبل اهلج اوگف وياج ما اريد اشوف ضعيفة اني هذيج الايام لا ربما قسيت وياج بس المصلحتج ،جنت اريدج قويه صبوره تگدرين تتحكمين بمشاعرج اتجاه اي موقف شفتي واگف ويه غيرج ..

لاتخلين گلبج هو دليلج لان المشاعر تجرف الشخص للهاويه ،دائما القرارات الي تاخذيه تكون عقلانيه حتى لا توگعج بالخطأ تمام...

بعدين غيرنه الموضوع اجت هم أمه جابت التقديم ضلينه نسولف ونضحك حاولت اغير اله شويه جو أطلعه من الكأبه الي هيه بيه.

بعدين اتصلت برافد يجيني گال بالطريق انتضرته شويه ورمش الي سلمت وطلعت.

راحت إيلاف رجعت اني دخلت للبيت گالت ماما ..

اسراء:ها شلون صرتي شويه غيرتي جو مو لتضلين خاتله بغرفتج طلعي گعدي هنا حبيبتي اخاف عليج مثل اول أمس من لگيتج واگعه بالگاع..

ميسم:ماما لتخافين والله ما بيه شي هياتني كُلشِ مابيه وهاي اروح بس اشرب دواه واجي اگعد يمج ..

اسراء:يله روحي

رحت صعدت لغرفتي دخلتله تذكرت يوم الي وصلني سيف يوم الحادث..

نرجع للزمن شويه..

بعد ما دخلت للبيت الگه ماكو احد بي دخلت وامشي على كيفي احس جسمي ثگيل بالگوه أمشي وكله يوجعني بحيث وصلت للدرج اريد اصعد ما اگدر جسمي كوله يرجف اصعد درجه درجه وصلت للباب الغرفه فتحته دخلت بعد ما سيطرت رأساً وگعت واغمه عليه بعدين ماما سولفت تگول...

اسراء: دخلت للبيت لگيت نزار گاعد على التلفزيون وحسن بالمطبخ دياكل سألت بعد ما سلمت...

اسراء:لعد ميسم وين؟

.. مادري لعد مو وياج راحت..

اسراء:لا راحت قبلي وگالت متصله عليك وگايل اله بالبيت وحسن هم جاين من العرس اني اروح ..

..لا والله ولا تصلت ولا شي وهاي ستونه اجينه ..

اسراء:صدُك تحجي لعد وين راحت، صحت حسن ولك حسن وينك تعال..

حسن :ها ماما

اسراء:ما شفت اختك وين؟

حسن :لا والله ما شفته ..

اسراء:يا يمه وين راحت ولك روح شوفه وين خاف نايمه ولو حتى سيارته ما هيه ..

حسن :يمكن بره صافته بالشارع..

اسراء:لا وين تخليه دروح شوفه بسرعه..

راح صعد واني افتر على نار وين راحت هاي البت بالليل ماكو بالخمس دقائق واجه شايله ودينزل الدرج تلگيته

اسراء:يمه بنيتي شبيه ولك وين لگيته احجي..

حسن:ماما مو وكتج هسه صحي لبابا خلي نأخذه للمستشفى لگيته واگعه مغمى عليه.

رحت بسرعه صحت لنزار اجه يرگض ورحنه للمستشفى بالسياره أخذوه من عدنه ودخلوه للغرفه يفحصوه ننتضر على نار شويه وطلع الدكتور رحنه

..بشر دكتور شبيه بنتي

..ماكو شي بس صاير عده نهيار عصبي اثر حاله تعرضت اله المريضه خلاه تفقد أعصابه وتنهار مما أدى لحالت الاغماء وداوينه الجروح الي بجبينه هم خيطنا اله والحمد لله على سلامته

.. شكراً دكتور زحمناك زين نگدر نشوفه؟

..حاليا لا بس تصحه تكدرون تخرجوه هم

..تمام شكراً الك مره ثانيه

بعدين تذكرت هي اذا جايه للبيت لعد سيارته وين؟

ضليت افتر اريد اعرف شنو الي صار وشنو الي خلاها تنهار ضليت اسأله هواي تتردد براسي وانتظرت تصحه حتى اسأله شنو الي خلاه بهاي الحاله وليش كذبت عليه وگالت ابوه جاي معقوله لان شافت ماهر بس لا هي اكيد بعد ميأثر هذا الشي عليه واني شفته هم رگصت وتونس اكيد قسه گلبه وكرهت اكيد.

بعدين صحت دخلنه اله واشوف بايده الكانيولا وگصته مضمده رحت اله گعدت يمه بست راسه وگتله...

اسراء:شلون صرتي احسن مو؟

ميسم:هزت راسها ييي

اسراء:ميسم شنو الي صار شنو الي خلاج تفقدين وتنهارين هيج وليش كذبتي عليه وگلتي بابا جاي وتصلت عليه وسيارتج وين؟

ميسم:باوعت لماما بنضره هي فمتني انو ما اريد اگول گال بابا

..عوفيه هسه مو وكت اسألتج خلي نطلع وبالبيت ستجوبيه ،وطلع طبعا مبين زعلان لان كذبت عليهم وخليته يخاف عليه

اجه الدكتور سجل النه خروج وكتبولنه وصفه علاج هم ورجعنه للبيت

اول مدخلت حسن ساعدني صعدت لغرفتي بدلت ملابسي وگعدت على الجربايه بعدني اريد انام جان ماما تقتحم الغرفه ونفس الاسأله عادتهم الي بعد ما أكدر أضم عليه لازم اكول اله

ميسم:ماما سمعي سويت حادث ... بعدني ممكمله كلامي

اسراء:وشگت عزه بعينج ولج شلون احجي منو الي ضربج شنو صار احجي عقلي بعد ميشيل احجي

ميسم:سولفتله على الي صار بس ما گلت اله على سيف هو الي ساعدني والي صار بينه بس گتله الرجال الي ضربني گال اني اصلحه الج طبعا سويت اله فلم

اسراء:زين ليش اغمه عليج؟

ميسم:ماما أنتِ تعرفين ليش ماكو داعي اسولف

اسراء:على ماهر قصدج مو؟

ميسم:يي

اسراء:بس هذا جواب مو مقنع واني شفتج صح نقهرتي بس مو لدرجت يسبب انهيار ورفعت تك حاجب

ميسم:ماما ليش مد تصدگين بيه حبابه اريد انام ما الي واهس احجي والله بعدين اسولفلج كُلشِ!

اسراء: تمام حطلع اني بس بعدين اعرف اعرف يله هسه نامي أخذتي العلاج

ميسم:يي أخذته ،طلعت هي واني رأسا نمت لان العلاج بي مهدء

ثاني يوم اخذت اجازه 3ايام لان كُلش ما أكدر اداوم بعدني مابيه حيل اشيل ايدي هم مشه اليوم كوله نايمه بالفراش وماما كل ساعه تجيبلي الاكل بالاخير ما تحملت

اسراء:ميسم فضيه يله شنو الي صار

ميسم:عن شنو

اسراء: ليش اغمه عليج احجي

ميسم:يوهه ما...

اسراء:ميسم تحجين ترى والله أخذ السياره من عندج وانطيه لاخوج واخليج ترحين بالخط

ميسم:لا ماما مو هيج طبعا كُلشِ ولا السياره مالتي ،تمام بعد قبل ما اسوي لحادث جنت كُلش مقهوره وابجي وما دا اگدر احجي بس احمس بروحي ومن نضربت ضليت ابجي وصارت خوفه بيه ورهبه رجعت للبيت كل ساعه تجي بالي صورته مدا اگدر انساه من الكتمان صرت ابجي حيل إلى أن اغمه عليه وبعد ما اعرف شنو الي صار

اسراء:باوعت اله بنظرت عدم تصديق كلامه مابي ربط بس مبين على ملامحه هذا الشي عفته ونزلت طبعا ابوه هم زعلان من عده من سولفتله نقهر على حالته وحتى خطيه فلوي گاعد بمكانه وين كل يوميه يروح اله رگض من تجي من الدوام وديتله اكل مياكل يريده اله

.. ميسم ميسم وينج شو تاخرتي

ميسم:هياتني جاي ،نزلت رحت للمطبخ گعدت يمه دتسوي لحم بعجين لحسن يحبه وعشه رحت ساعدته شويه ضلينه.

صار الليل كلمن راح الغرفته دخلت الغرفه اريد انام واسمع رنه موبايل شلت المخده واني مخليته صامت فتحته وجان تجي رساله من...

امير..

..بنتكم الحمد لله عدت مرحله الخطر

عصام :الله يبشرك بالخير دكتور شلونه وضعه ؟

عبير:دكتور نگدر نشوفه؟

.. الحمدلله وضعها تمام وبس تصحه من البنج تكدرون تشوفوه وهسه حينقلوه لغرفه خاصه

امير: تمام شكراً الك دكتور

..والو العفو هذا واجبي

راح الدكتور والفرحه على وجه امي وابويه باينه اجه ايسر جان بره هم فرح خطيه وعيونه دمعت راح لهناك مسحهن واجه طلعوه من غرفه العنايه لغرفه ثانيه بدت تصحه بالبدايه تعكمش وجه بعدين گامت تحجي وتغرد ما خلت شي مضموم...

غنى:ولك امييغ؟

امير:ها ولج لصيحين ..

غنى:اميغ وينك تعال؟

امير:هاي اني يمج واگف

غنى :ولك ليش ما جبتلي اندومي ها؟

امير:ميخالف اجيبلج بعيني بس اصحي..

غنى:اريد هواي مو تصيغ بخيل ؟

امير:انعم الله عليج صرت بخيل يله شگد تردين.

غنى:اريد 5 لا هذا الحقيغ ايسغ اكلهن كلهن..

ايسر:ايا حقيره هو اني وين شفتهن حتى اكلهم .

غنى:ايسغ وينك؟

ايسر:ها اني يمج

غنى:حقيغ ليش اكلت الاندومي مالتي إذا ما اگول لاميغ يحجي ويه وحده ثلاثينيه ويگوله يغوحلج اميغ وعشيغته اذا مافضحك اصبرلي..

ايسر:هسه أنتِ شنو الي خليتي حتى تفضحني ..

امير:درت وجهي لايسر راد يطلع صحت ،هيوو وين رايح امير يروحله فدوه مو اصبرلي.

غنى: گامت تصيح ولك اميغغ ؟

امير:خليت ايد على حلگه، اشش ولج فضحتينه..

غنى:وخغغ ايدك وهاي الحمغه الي لگيته بالسياره مالتك مالتمن ؟

امير:كله گامت تباوعلي ،الله يطيح حضج غنى فضحتني واني الج اصبريلي همزين ربك دگ التلفون وإذا صديقي واني خوش أخذته فرصه وطلعت د..

امير:ها خويه بشر لگيتهم؟

..لا والله ما لگيتهم دورت عليهم سألت ماكو رحت لمحلاتهم سألت گالو عدهم أقرباء بغير محافظة ودائما يرحولهم واني هم طلع عندي معارف بنفس المحافظة خابرتهم وهم سألو ماكو اني هم ما تصرفت گلت اخابرك حتى اشوف شنو تسوي واني بالخدمه..

امير: حبيبي ما قصرت بس ممنون منك حالياً اشوف والدي شنو يگول حتى ابدي لان گال اني اتصرف وهسه اني متوقف عليه ومن اريد منك شي اخابرك مع السلامه

غلقته ودخلت مره ثانيه لا هالمره لگيته صاحيه بس تتألم راح ايسر صاح للدكتوره حتى تجي تضربه ابره أو فد مهدء لان كلش متأذيه ..

طبعاً اني واگف ومنطي ظهري للباب دخل ايسر والدكتوره وإذا اشوف ايلاف الجايه مادري شنو الي صار تخربط وضعي هي ابد ولا باوعت ولا رفعت عينه ليش هيج تسوي بعدين وجهت كلامه لابويه وگالت...

ايلاف:عن اذنك عمو تگدرون تطلعون بره حتى المريضه تاخذ راحته ..

عصام:يي براحتج دكتوره يله عبير يله امير..

امير:أبويه يحجي واني عيني عليه ابد ما رفعته وباوعتلي راحت لجهه الثانيه مال غنى وماادري شنو سوت خليت وطلعت بس كُلش ضجت ليش هيج تتصرف ويايه بعدين تذكرت البارحه اني شنو سويت اهوو هاي شلون مشكله رحت لابويه وگتله شنو گال صديقي....

عصام: خوش اني اتصرف

امير:يأبه شنو انت تتصرف هو يريدني اني الاتأذه أنت شعليك؟

عصام:امير گلت اني اتصرف واني اعرف هذوله النماذج إذا رحت انت راح تخرب الاول والتالي لانك عصبي ومتعرف شنو تسوي تالي كلشِ ما نحصل اني ادز جماعه واروح الأهل واگوله يسلمهم وإذا ما انطونه خبر اتصرف غير تصرف

امير:بس يأبه هو يقصدني ال....

عصام:أمير كافي خلص سد الموضوع هاي طلعت الدكتوره خلي نشوفه..

امير:فور دمي عصبني حيل ضجت شنو هاي ليش محسسني طفل صغير درت وجهي واني عصبي واشوفه باوعتلي خطف ودارت وجه ،وانتِ هم الثانيه مدري شبيكم اليوم هفففف راحت هيه ودخلنه مره ثانيه للغرفه لگيت غنى نايمه گلت الامي ..

امير:يمه روحي انت وابويه وايسر للبيت واني اضل يمه ميحتاج تبقون..

عبير:لا ماعوفه وحده

امير:يمه اني يمهه شنو السالفة

عبير:ماكو ما اروح اضل اني يمهه

امير:يأبه احجيلك كلمه من البارحه انتو هنا روحو شويه رتاحوا وتعالوا ما اگول الكم لتجون.

عصام:يي عبير امير كلامه صح شوفي وضعج شلون صار حتى علاج مالتج ما اخذتي خاف هم تتخربطين علينه ونصير بدال وحده بثنين ..

عبير:بس ش...

عصام :لا بس ولا شي امير موجود وأيسر هم..

ايسر:يي عادي اضل

امير:لا ما كو أحد يبقه حتى ايسر انت هم روح بأجر عندك دوام واليوم ما رحت روحو كلكم ولا تجادلون بعد كلهم قبلوا وراحوا وبقيت بس اني..

جريت كرسي وگعدت بصف غنى وخليت راسي بين ايدي وغمضت عيوني حاولت شويه انام من البارحه اني منايم غمضت عيوني طبعا اني من النوع بسرعه اكعد من النوم ابره إذا وگعت بسرعه افز واگعد.

نايم ومغمض عيوني سمعت حركه مال الكيلون الباب دينفتح بس اني نفس وضعي ما تحركت بس اسمع الباب نفتح ...

___________"
يتبع...

شلونكم بنات طبعاً اغلب التعليقات على الصوره الي نشرته سابقا تگولون امير وايلاف وهو خطأ مو هذا الثنائي
الصوره الي نشرته لميسم وسيف.

أما ايلاف وامير هم الي بغلاف الرواية بس الفرق انو الي بصوره الولد عيونه هم ملونه بس مو نفس الون المذكور من الگه صوره للعيون حنشره الكم
لاتنسون التصويت وتعليق ومتابعة للحساب بدربكم والانستا همghe.92

دمتم برعاية الله وحفظه
غدير عبدالله