رواية وقد كانت صدفة الفصل السابع 7 - بقلم غـدير عبداللّٰه

وقد كانت صدفة

مرت من هنا
كان كل شيء يتبعها،
الهواء ،
والليل ،
والغيوم ،
والأغاني..
_________________

ايلاف :بعدين اجتنب لحضه إدراك وتذكرت يا هذا صديق رافد عزه شلون فشله هسه شيگول عليه باله بس لا نوب يگول لرافد اي كُلشِ اتوقع اي؟!.

خلصت ورجعت على شغلي صارت الساعه تقريباً 6:30 رحت للغرفه الانعاش اشوفه دخلت الممر ماكو احد بس الممرضين يفترون دخلت الغرفه جان بس واحد بيه الي هو سيف.

داجيك بجهاز الضغط فجأه گام ينخفض النبض رأساً
طلعت شفت الممرض كتله على السريع يصيح الدكتور ويجيب جهاز ديسي شوك (جهاز صعقه كهربائيه) ورجعت، اجه وهو ويا الدكتور وبعد ممرضه حضروا الجهاز وهم ديخلون الجل بالجهاز ..

..كتله حوله100 انطاني وصعقته صعقه ،حجه الدكتور نزيد مره ثانيه هم حوله عل ال180وصعقته هم ماكو كتله عل 200 صعقته صفر النبض...

هنا جانت اخر مرحله توقف القلب فجأه ،بعد ماجان نبض  المريض ضعيف ضربته ابره ادرينالين بس جان عندي شعور انو يعيش كتله بعد مره كال الدكتور الثاني

..ايلاف هاهيه مات صفر الجهاز ؟

ايلاف: گتله بسرعه على ال250صعقته جان يرجع ينبض للقلب هففففف وخرت الجهاز رجعت الاجهزه مال الضغط جيكت وضعه تركت الممرض يكمل شغله وطلعت ويه الدكتور الثاني ..

..عفيه عليج ايلاف بس مره ثانيه ملازم تخاطرين بهيج شي

ايلاف: دكتور حتى تنقذ حيات شخص بينه وبين الموت شعره لازم كُلشِ بين ايديك تسوي حتى لو جان خطر..

وصلنه الغرفه اول مفتحت الباب اتلگاني الولد المرافق ويه المريض

..دكتور خير شصاير شبي سيف ؟!

..الحمدلله احسن بس قبل اشويه ردنه نفقده بس يمكن دعاء الوالده أثر بأنو يرجع يعيش وهسه استقر وضعه خلال ثلاثة ساعات او اكثر يگعد من البنج .

تركتهم يحجون بعدني ما مشيت خطوه حجه ..

..زين دكتوره يصير ادخل اشوفه؟

ايلاف : باوعت عليه مدري ليش حسيته يريد يحاجيني.. حالياً لا بس يگعد ويستقر وضعه تكدر تشوفه وهسه عن اذنك ..

.. تمام شكراً دكتوره

ايلاف:والو هذا واجبي ، رجعت كملت شغلي، بعدين رحت للغرفه شويه استراح احس راسي حينفجر من الصداع وصيت على جاي گاعده سانده راسي على الكرسي مغمظه عيوني اندگت الباب

ايلاف:تفضل

الفراشه ام احمد : صباح الخير دكتوره

ايلاف :صباح النور ام احمد اشلونج ؟

ام احمد: الحمد لله عايشين بهاي الدنيه هذا جاي حضرتج

ايلاف: تسلمين حبيبتي

ام احمد :اكول دكتوره اجه والد شاب سال عليج كال اريد دكتوره ايلاف

ايلاف : باستغراب منو وينه بالله موجود ؟!

ام احمد:ماعرف والله، يي موجود ذاك اليوم شفتج واكفه ويا وتسولفين تكوليله رافد ماعرف منو

ايلاف:يااا خاله هذا اخويه

ام احمد :يا سوده بوجهي خليت الولد ينتظر اوگفي خلي اصيحله

ايلاف:لا اسم الله عليج خاله لتگولين هيج عادي، هسه اني اروح أله لأن هو يدري هيجي وقت اطلع لان اني ودكتوره ميسم نختلف 3 ايام بالاسبوع فهو يجيني بس هو وينه ؟

ام احمد: هنا واگف بالباب ،گمت رحت فتحت الباب دار وجه واجاني رأسا وگال

..صدُك ايلاف سيف راد يموت احجي بداعت غلاتي عندج ؟

ايلاف :عل كيفك شبيك بالاول أخذ نفس تعال أهنأ بالغرفه.

ام احمد :يله اني استأذن اعذرني خاله ماعرفتك وطلعت حتى ما رد عليه مخبوص

رافد :, ايلاف احجي عليج الله شبي سيف وضعه كلش خطر شبيييي

ايلاف:شبيك على كيفك انت منو كالك هيجي؟

رافد :يعني صحيح الحجي

ايلاف:لا والله مو هيجي اهدء اشويه واكعد وهسه اگولك وضعه گعد وحسيته كُلش متوتر اول مره اشوف اخويه بهيج وضع شلون خايف على صديقه سولفته على وضعه كولشِ وهسه وضعه احسن.

خلال شكم ساعه ويگعد وهسه يا اخي العزيز گوم وصلني لان رح اوگع على وجهي من كثر النعاس .

رافد: اني ماگدر اوصلج لان هسه وقت اني اضل يم سيف خلي اشوف امير يوصلج !؟

..بس منو ام...!؟ بعدني مامكمله أخذ تلفونه وراح ياا هذا شبي هسه اني بيا حال والله كُلش نعسانه بعد ماعرف شكول بس اثاوب حتى شربت الجاي هو وبارد حتى بس اصحصح خلصت اخذت غراضي والجنطه وطلعت رحت لمكان الگال عليه لكيته واكف ومنطيني ظهره.
وديخابر من حس عليه دار وجه ونهى المكالمه

ايلاف :ها يله خلصت توصلني ؟!

رافد : لا اني حظل رح يجيج امير يوصلج

ايلاف:لا منو هذا أمير عزه شلون اروح وحدي ويا؟

رافد :هاي شبيج بويه امير ابن خالته لسيف الي ويا المرافق حيرجع للبيت يرتاح ومن يصير العصر يجي لان احنه هيج مقسمين مسوي مناوبات علي لان أمه متكدر تجي بس تجي تتخربط حتى ابوه فبقينه اني وامير ويا يله هسه اجه هذا

درت وجهي اي والله هذا اجه تقرب علينه اجه يم رافد

امير :ها يله بس تحتاج شي خابرني اني بس أسبح وارتاح واجي ما طول أن شاء الله

رافد :لا ما احتج شي متقصر بس دير بالك على الدكتوره

امير :افااا لا توصي حريص الدكتوره بالحفظ والصون دار وجه عليه ها دكتوره نتوكل ورفع حاجبه؟

ايلاف: سويت روحي ماكو شي صايىه ،تمام مشينه للگراج مال السيارات هو يمشي قبلي واني وراه وصلنه يم السياره.

طلع السويج وفتح السياره چانت نوعيته( تاهو )ماعرف شنو اسمه بالضبط

لان اني مو كُلش اعرف بالسيارات بس هو حجه اسمه جان لونه اسود صعد هو بالصدر فتحت الباب الخلفي وصعدت على الجه اليمنه وسديت الباب بس رفعت راسي اجت عيني بعينه، بالمرايه كُلش خجلت رأساً درت وجهي للجامه مشت السياره..

بس ما ادري ليش احس الحرارة صعدت الراسي، ماعرف ليش هاي اول مره اصعد وحدي كلمره لو ميسم وياي لو بابا لو احد من اخوتي يوصلوني فتحت الجامه أخذت هوه شويه ارتاحيت سديته مادري ليش أحسه أو يتهيئلي انو ديباوعلي ..

مشت فد مسافه قطع الهدوء الجنه بي  وهو تليفوني رن بعد ما جنت سارحه مدري وين من دك فزيت فهو من سمعه تحمحم، اخذت الجنطه مالتي جانت بصفي فتحت ادور على الموبايل ماهو وكومه غراض حاطه بيه حتى وگع مدري شنو ما انتبهت عليه من وره الخبصه مالتي بعدين انگطع ورجع دك واخيرا لگيته طلعت ماما دتتصل رفعت الخط

ايلاف:هلا ماما صباح الخير؟

شيماء :صباح النور امي وين صرتي مو اتاخرتي الساعه بال9صارت وانتي بعدج مدگوليلي وين صرتي

ايلاف:ماما هياتني بالطريق جايه ما أتأخر

شيماء :زين منو الي يوصلج ؟؟

ايلاف:بصوت خافت ماما صديق رافد هو الي يدوصلني

شيماء: شلون لعد اخوج وين مو گال اني اجيبه !

ايلاف :ماما بعدين مو هسه هاي وصلت لمنطقتنه ،نهيت المكالمه ورفعت راسي عبالي ديباوعلي ضليت اني صافنه عليه انتبهت على عيونه وهاي اول مره اركز بشخص كُلش حلوات لونهن رصاصي على زرك مادري شنو هالدمج كُلش حلوات ،بعدين رفع رأسه للمرايه شتت نظري عنه گتله اني واريد إتلافه توتري..

..ءءبلازحمه ممكن تستعجل شويه لان امي قلقه عليه لان اتاخرت هز رأسه كال

.بصوت قريب الهمس أو كانوا ديحاجي نفسه تدلل ماما وبنت ماما ماعرف اشصار بيه كُلش خجلت رغم هو ديحجي ويه نفسه، واخيرا وصلت للبيت بعد معاناة نزلت وكتله

ايلاف: شكراً خويه زحمتك وعطلتك عن شغلك.

امير :لا عادي دكتوره شنو السالفة

ايلاف :تسلم ،سديت الباب هو شخط السياره وراح واني ركض اول مفتحت الباب ماما تلگتني

شيماء :وين صرتي مدگوليلي

ايلاف: دكولي وعليكم السلام هياتني يمج يعني ياماما متدرين عندي شغل والازدحمات كومه

شيماء:لعد ليش مو اخوج جابج

ايلاف:لعد متدرين صديقه مسوي حادث!!

وهو ويا بالمستشفى الي اداوم بيه
شيماء:شهگت وحطت أيده على گلبه يم اسم الله عليه منو بس لا سيف ؟!

ايلاف:يي هو

شيماء:الله يساعد أمه هسه شلون وضعه تعالي أمشي سولفيلي ،هذا الحجي احنه دنمشي بالحديقة دنفوت من باب المطبخ للبيت نزعت حذائي تكرمون وسولفتله كولشي بالاخير كتله

.. كافي ماما راسي گام يوجعني اليوم هواي سولفت كولش تعبانه عفته ورحت نمت على وجهي من التعب ...

ميسم

فتحت باب الاستقبال وجان تصير بوجهي خالتي وماهر گاعدين احس روحي تخربطت رجليه تخشبت بعد ماعرف أمشي لا اني المتقدمه خطوه وإلا اني الراجعه

شعور لا أحسد عليه
(تذكرت يوم الي نه كُلشِ بي) شايفين من واحد يحب شخص والشخص لو ودك تنطي عيونك هم تنطي والاخير يجيك بمكالمه ينهي گُلشِ بهذا كلامه الي ابد طول عمري محنساه ابد وهو يگول..

ماهر:اسف ميسم البيناتنه انتهى واني ما احبج وافقت علمود اهلي يقبلون حتى اقدم على البعثه وإذا اريد اتزوج فحتزوج الانسانه ال... قاطعته

ميسم :بخنگه لعد واني شنو اني هااا ؟؟
ماهرانت مو اعترفت وكتلي احبج وتعرف بيه اني احبك وما اگدر بدونك،صرت أصيح واني احجي ويا وحجيت شكو شي بگلبي واني اعاتبه..

صح اگوله حبيبي بس  اول مره اعترفله وابوح بكل مشاعري اله  بس ماعرف الدمعه منين نزلت احس الهوه شح عليه اريد اتنفس بعد ماگدر گوه تجرعت وگتله يعني هاهيه انتهى اليناتنه روح الله وياك بس خلي شغله بالك انتهيت انت من هاي اللحظه لا خطيبي هههه خطيبي بعد تحلم تعرف يعني شنو تحلم تشوف طرف ثوبي ومن هاي اللحظه حالك حال الغريب لا ابن خالتي ولا كُلشِ وسديت التلفون بوجه .

بيومه حيل متت من البجي لان جان العقد مالتنه مقرري بعد يومين..

مادري من شفته بهاي اللحظه وهو واگف گدامي گانو رجعلي ذاك اليوم وذيج اللحظه وجان دگول امي

اسراء:هلا ماما اجيتي تعالي سلمي على خالتج

ميسم:حاولت اسيطر وابد ما أبين ضعفي گدامه شجعت روحي ومشيت بثقه بس داخلي نار تسعر رحت سلمت على خالتي وهو كتله

ميسم :اي شلونك ماهر شو من شوفك وبينتله ولا كانو اكو شي بينه؟!

ماهر : الحمدلله بخير والله تدرين جنت مسافر وهاي خلصت والبارحه اجيت واليوم كلت اشوف خالتي شلونه ،طبعاً ماما من يوم الي فسخ الخطوبه صارته مو كُلش علاقته وي خالتي رغم بس هي الوحيده اله واخ واحد بالخارج عايش مزوج..

واليوم جاين بحجت أنو يردون يشوفن ماما صارله شكم يوم تعبانه عود يطمننون عليه بس ماما گلبه حنين على اخته بس هالاخت الوحِده عده
رسل (خالته ميسم):اي خاله انتِ شلونج احوالج أن شاء الله تمام الدوام شلون وياج ؟

ميسم: والله الحمدلله بخير اصلا كُلش متونسه بالدوام رغم التعب الي دا تعبه بس الحمدلله.

رسل :اي الحمدلله ماطول مرتاحه تمام يي هسه اگدر احجي براحتي ما دام تصافت لگلوب والله يا داده جايتج اليوم بشغله واريدج مترديني خايبه!

ميسم :رأسا طخت عندي جيتهم بيه مصلحه مو حتى يشوفون ماما ردته

اسراء : لا داده عليمن خايبه شعندي غيرج غير اختي الوحيده انتِ.

رسل :بعد عمري خيتي ،والله جايتج اليوم اريد نروح اني وياج لبيت حمايه نخطب فاطمه لماهر.

ميسم:طول ما هيه تحجي اني جنت منزله راسي وامسح على فلوي بس من گالت نخطب لماهر رفعت راسي اجت عيني بعينه أحسه ديحتقرني بنظرته وكانو ديكول على عنادج اخذ الي احبه مو انتِ بس ماجنت متوقعه فاطمه الي هيه بنت عمه لأن اني اعرفه جانت ويانه بالجامعة بس بغير قسم ومغروره بشكل رغم هو يعرف اني اموت منه حتى من جانت تجي للبيت خالتي من جنت اروح الهم تباوعلي من طرف عينه عبالك بس هي مخلوقه والباقي حشر .

اسراء :وجهت نظره إليه وهي تگول ماما ميسم گومي رتاحي وراج دوام كانو دتقره الي بداخلي لان صدُك اريد اطلع احس كُلش اختنگت منا ماهر گبال عيني ومن خبر خطوبته لفاطمه ما اريد اگوم حتى بس لا أبين ضعفي گدامهم من گالت ماما گمت وترخصت طلعت رحت لغرفتي.

فتحت الباب ودخلت احس الدنيا دتدور بيه ماعرف شصارلي لزمت الحايط واستند عليه گعدت على الجربايه احاول اهدا نمت بس راسي يفتر الى أن ماعرف شگد وغفيت .

حسيت على ايد دتمسح على راسي اكيد اعرفه لزمت أيده وبسته واني مغمضه عيوني جان تگول...

اسراء :يله حبيبي گومي دخلي للحمام سبحي وصلي حتى تتعشين مگعتج ويانه گلت تعبانه هم يالله رح تصير صلاتج قضاء .

ميسم:گمت للحمام غسلت وخلصت رحت جففت شعري لان الجو بارد بعدين صليت ور ما خلصت ستغربت امي ليش مجابت طاري الخطبه بعدين گلت حتى يجوز لتجرحني .

نزلت لگيته محضرتي الطبله وگاعده رحت بسته بخده قوي
ميسم :مدگوليل منين ذني الخدود عمي هنيال بابا عليهن ،جان تضربني على راسي اخخخخ شبيج غير نتغزل بيج مو زين بس بابا يتغزل گدامنه بيج.

اسراء :شو صاير كُلش متستحين هاي عود انتي دكتوره وهيج اخلاقج لعد لوغير شي شتسوين..

ميسم :منو گلج كل الدكاتره أخلاق يله هس عوفينه من هالاخلاق ،شعجب اليوم مسويتي اكلتي المفضله (صاج دجاج) لازم اكو شي اليوم ؟!

اسراء : اي اكو شي شوف امي طبعا مو كولشِ نريده بها الحياة لازم ناخذه والدنيه قسمه ونصيب اذا الج نصيب بي تاخذي لو هسه تنگلب الدنيه وإذا ما الج فعادي قسمه احنه ليش نبجي ننقهر وندگ ونلطم على شي الله مكاتبلنه بي خير مسامعه الله سبحانه وتعالى من يكول( وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ ۖ وَعَسَىٰ أَن تُحِبُّوا شَيْئًا وَهُوَ شَرٌّ لَّكُمْ ۗ وَاللَّهُ يَعْلَمُ وَأَنتُمْ لَا تَعْلَمُونَ)صدق الله العلي العظيم ...

______''"'"

يتبع

هلا يابه شلونكم اليوم بارت طويل( بس بدون قفله )+ تصويتكم وتعليق بين الفقرات ...
احبكم وشكراً على مشاهده
ودمتم في رعاية الله وحفظه
غدير عبدالله 🦋