وقد كانت صدفة الفصل الثالث وسبعون 73 - بقلم غدير عبداللّٰه

"وقد كانت صدفة"

بدايةً اعتذر عن تأخير البارت بسبب الظروف حصلتلي وليس سهواً عنه واليوم ياله گدرت اكمل كتابة ف اسفه اذا تاخرت عليكم،وقراءه ممتعه مسبقاً ❤️
_____________________________________

وتستمر حياتنه كظاهرة المد والجزر، لا تخلوا من الصراعات التي تعرقل العلاقه بين امواج البحر لكن بالنهاية لا مفترق له.

بارت اليوم ح يكون مخصص لايلاف..وميسم..وغنى..وشهد.

هذولي البنات خاضوا عدت تجارب خاضوا عدت منعطفات بحياتهم من الالم من الخذلان ومن الفقدان لكن انهوها بنجاح والعوض الي اجاهم من بعد كل هذا الصبر..

غنى:نايمه على السديه والدكتوره لازمه بيده الجهاز واني اعصابي مشدده ما ادري ليش،وااحاول اقره تعابير وجه رخت ملامح شويه وبتسمت وگالت...

..الف مبروك حبيبتي بنوته!

غنى:فتحت عيوني من الصدمه ما مستوعبه الخبر درت وجهي لرفل الي واگفه بصفي وداتضحك..

رفل:يااا بنيه الف مبروك حبيبتي تتربه بعزكم أن شاء الله

غنى:ييعني هسه اني حامل ببنيه مو؟

رفل:يي ولج بنيه

غنى:وهنا تسكب العبرات وجان تنزلت دموعي واني اضحك والله جان حاسسني گلبي انو تجيني بنيه،ءدكتوغه عادي اشوفه واسمعه دگاته؟

..يي عادي،جان ترفع الصوت واسمعه خليت ايدي على حلگي احجب صوت الشهگه الي مو راضيه تخلص باوعت وعيني على الشاشه شلون تتحرك لو ودي اضل طول اليوم مگابلته وهم ما اشبع من شوفته حسيته دخلت لگلبي قبل لا اشوفه واشمه...

رفل:ولج داده هاي من هسه وكحه بعدين كافي بجي مو زين...

غنى:مو بيدي والله وحده تنزل،ضحكت الدكتوره

..هاج كلينكس شوفي خشمج شلون صار احمر

رفل:يا حبيبي يله هاي دموع الفرح أن شاء الله تولدين بالسلامه وتفرحين بيه أكثر ..

غنى: إن شاء الله ،طلعنه من يم الدكتوره بعد ما اخذت صور رحت متوجه لحسين من شافنه اجه ملهوف علينه

حسين:ها بشروا؟

غنى:بنوته

حسين: والله؟

رفل:يي والله

حسين:الحمد لله يارب نعمه،يله امشي نروح

غنى:اجه عليه وخله أيده وره ظهري وكمل...

حسين:الف مبروك حبيبتي الحمدلله ربي ستجاب دعائي ونطاني نسخه ثانيه منج.

غنى: الله يباغك بيك ابو بنيتي ،بتسم وكملنه الطريق
بعده صعدنه السياره ومشينه وتلفونه ابد ما سكت كل ساعه متصل على احد لهناك وجان يوگف يم مطعم نزل ربع ساعه واجه محمل بالعلاليگ ويا ولد ثاني هم شايل أجه صعدهم ورجع صعد..

غنى:هاي شنو المن؟

حسين: حبيبي هاي لبنتي أنتِ مالج شغل

رفل:يي عمي لبنته هه بعد راح سوگج يا غنى حتجي الي تحل مكانج،بس خوش اجه بوقته اليوم ما الي خلك اسوي عشه،هو ضحك

غنى:حسيت بالغيره ورديت بغضب،شنوو لا حبيبتي اني الاولى والاخيغه لا بنته ولا شي..

رفل: حبيبتي غيرج گالوه

حسين:رفل مو وقتج!

غنى:لا ماكو هيج شي مو حسين؟

رفل: اكيد هسه يگلج يي ومن تجي طلعين من الملعب بعد هو بنته الهم الساحه..

حسين: حجه بقلت صبر،رفل مو وقتج هسه تهيجيه هرموناته وتگب علينه ورانه طريق.

غنى:شنو قصدك يعني اني مخبله و اگب عليك بسيطه حسين

حسين:لا حبيبتي مو أن...

غنى:ولا كلمه امشي للبيت تعبت نفسيتي اغيد ارتاح.

حسين:هاك استلم،بسيطه اني الج رفل اذا ما اسودن ليث عليج ميخالف.

رفل:متگدر!

حسين:نشوف

غنى: وصلنه لبيت عمي بعد ما گضيت الطريق كله مطنگره ولا درت وجهي ولا حجيت رغم شگد حاول يضحكني لو يحجي وياي ابد ولا نطيته وجه صُدك ضوجني وبنفس الوقت قهرني واني منا نفسيتي زفت من وره لعبان النفس بحيث بس نزلنه تقيئت لحد ما ختنگت هو اجه ورايه گال..

حسين:بقلق،ها غنى شبيج؟

غنى:هوه وخر عني اريد هوه،وضليت اتنفس اجت رفل بيده بطل ماي أخذته منه شربته وبعده دخلنه جوه هذا الحجي كله واحنه بشارع على الرصيف گاعدين..
دخلنه جوه تلگتنه ايلاف من شافت وضعي ختفت بتسامته عباله شو شنو صاير واجت تهرول گالت..

ايلاف:ها شكو شبيج غنوه خو مصاير شي الج للطفل احجوا؟

رفل:لا ما بيه شي الحمد لله بس نزلنه من السياره وستفرغت من وره الفره تدرين بيه متتحمل،وبعدين هاااا غنوه حامل ببنيه ..

ايلاف:ياااااااا بعد عمري حبيبتي الف مبروك أن شاء الله تولدين بالسلامه ولج غنى حتصير ام ما صدك...

حسين:ولجن دخلنه جوه متشوفن روح رايحه مو وقت سوالفجن هسه تذكرتنه بالباب...

رفل:يا صُدك نسينه البت تعالي داده تعالي رتاحي، مشينه وهنه يسولفن..

..ولج ايلاف تعالي وياي اسولفلج شنو سويت بحسين،دخلنه جوه وبشرنه الكل فرحت بالخبر بما انو اول حفيده الهم لان الباقين كله ولد...

اجوا الولد وباركوا النه بعده تعشينه وخلصنه ماخلني البنات اگوم وياهم كله هنه سونه خطيه،اما حسين ابد معافني گاعد يمي وكل ساعه يباوعلي واني ما اباوعله يريد من عندي احجي ويا واني متجاهلته.

بعده أجن البنات وجابوا الجاي الكل جانو موجودين حتى بيت عمهم علي ابو ايلاف، اجت هيه وابنه بحضنه

مخليته وگعدت بصفي جان عمره ابنه سنه جان تگول..
ايلاف:يي هسه شنو قررتوا تسموه؟بعدني ما حجيت حجن البنات...

رفل: اني اگول لو تسموه هاله كُلش حلو

لارا:لا موده احلى

حنين:اني برأي مرح لطيف

حسين:ولا وحده من هذني احنه مقررين من قبل..

ليث:يي بالله شنو هو؟

غنى:باوع عليه حسين بدون وعي بتسمت اله وكملت،قررنه نسميه بسمله

لارا:لا بأس بي

رفل: لطيف

ايلاف:امم حلو

آدم:هو شنو الحلو بيه هاي اذا اريد العب وياه لازم اتوضه ومن تروح اصدق عليه بربكم هذا اسم وإذا أجه الهم ولد عود سموا تصديق كُلش يرهم،هم سمعوا كلامه لو ماتوا من الضحك..

غنى:ندست بخاصرته ،حسيننن!

حسين: آدم ؟

آدم:شكو؟

حسين:غمزله،اسكت

آدم:اخخ والله وقت خله الزلم تخاف من النسوان،بهل الأثناء جان يدگ تلفونه وهو بسرعه طفر وبس الترابه وراه جان نسمع صوته توسله يحجي...

آدم:حبيبتي بس خلي افهمج الووو... سكت يعني نكبس ،وجان يجي..

حسين:ها خوش النسوان صاگرتك

ليث:هههه والله بس بوخه

رافد:بس لو اعرف خطيبتك شلون قتنعت بيك ما ادري.

آدم:مثل ما حنين قبلت بيك وانت گضيته عليه احبج واوعدج ،وضلوا واحد شمر على الثاني حجي والباقين يضحكون عليهم...

ايلاف:اباوع على الكل گاعدين سوه يسولفون ويضحكون كل واحد بيهم گاعد يم شريكه كل واحد اختار نصفه حتى يكمل باقي حياته.

اتنقل بنظري على كل واحد بيهم ترجعني ذاكرتي لمواقف الي جنت اتخيل يجي هذا اليوم الي همه حالياً بيه،اجت عيني على رافد حبيبي وبصفه الانسانه الي دخلت على حياته مثل المرهم عالجت جرحه وصارت هيه دواه تعرفه شنو يريد تعرف شنو يحب وكانوا تفهمه من مجرد نظره.

جان هاي النقطه المفقين عليه ثنيناتهم وهي التفاهم،رغم فرق العمر لكن التفاهم جان أساس لعلاقتهم من بعد ما تزوج رافد تغيرت حياته كلياً صار يسولف ويضحك ويتشاقه بعد ما جان الحزن يرافقه، وحالياً مبتعدين عن فكرت الاطفال بين ما تخلص جامعه...

درت وجهي اجت عيني على رفل وليث المعروف عنهم عصافير الحب الكل يدري بيهم ولا عبالك كبار ومتزوجين هذولي رغم العركات والخبالات ملاتهم لكن واحد ميگدر بدون الثاني عركتهم مطول ساعه بعده لو هو لو هيه تتنازل عن زعله ويرجعون مثل قبل حالياً صار عده اطفال ثنين امين وأحمد.

أما غنى بعد كل هذا الصبر وجان يجيه الفرج بعد كل العراقيل الي حاولت تبعدهم عن بعض لكن جان ثقتهم بعض اقوه من كُلشِ واجهوا ،جان أساس علاقتهم الثقه وهذا شي أساس بحياتهم رغم الغيره الزايده بينهم لكن جان حلاوه علاقتهم.

وبعد ما طلع تعينه أجلت هاي السنه بسبب الحمل ،خطيه جان حمله اول اشهره صعب لكن هسه الحمدلله گدرت توگف على حيله...

بهل الأثناء جان يدگ تلفوني امير گال اني جاي،گمت ولميت غراضي تصل عليه طلعت ويه طلعتي غنى هم طلعت ويايه تروح لبيته..

اجه امير أخذ من عندي تَمام وسلم عليهم وبارك لغنى وحسين بعده مشينه گضينه الطريق كله نسولف منا لحد وگف يم الكورنيش باوعت عليه گال...

امير:يله مرتي نزلي..

ايلاف:هااا وين؟

امير:وين يعني! نتمشه شويه مختنگ

ايلاف:لعد مجايبه ملابس لتمتم وبارده؟

امير:اني الفه بالستره مالتي نزلي يله،نزل هو واجه فتح باب الصدر نزع الستره ولف الطفل بيه خليت جنطه مالتي بالسيارة ونزلنه نتمشه..

رغم جان الجو بارد بس يجنن ،جان منظرهم يخبل لاف تَمام بالستره وضامه لصدره وهو جنه جرو بس رأسه مطلعه وأبو شايله اخذت تلفون امير وأخذت شكم صوره وبعده كملنه مشي واحنه نسولف...

ايلاف:امير؟

امير:اممم

ايلاف:تدري اليوم گاعده وتذكرت كل واحد بينه شنو سوه وشنو صار وياه وبالاخير شنو حصل..

امير:مثل شنو يعني؟

ايلاف: يعني حياتنه والي عشناه والمغامرات الي خضناه.

امير:ضحك.. يي وبعد؟

ايلاف:ليش تستهزئ والله دا احجي جد...

امير:يي كملي...

ايلاف:يي تدري احس الحُب قدر مكتوب النه نعيشه،يعني ما جنت متوقعه انو ح يجي يوم اعيش هل شعور أو الشغلات الي صارت كله، مجنت اتوقع انو راح يجي يوم ويصير عندي اهتمام الشخص بعد ما جانت الدراسة ماخذه كل تفكيري،او خلي نگول مجنت افكر بهل الاشياء مستبعدتها عن بالي.

لكن الي غير تفكيري ومن بعد الي صار ويه ميسم ومن ظهر سيف بطريقه خلاه تخربط كل موازينه،وخلتني اني هم ارجع اعيد وجهت نظري اتجاه مصطلح الحُب،الى أن جربت شعوره وكانو شي غريب يعني مشاعر متلخبطه گلب ينبض بال مشغول كل هل الأمور جان إحساسه حلو اول مره اجربه...

امير:حلو هذا الشي خاصه من يكون حُب صادق وياج ومن تشوفين الطرف الآخر يسعى ويجازف حتى يحصل عليج مو حُب مصلحه،لا يحببج بي گوه.

تدرين مرات احس أو اقارن انو الحُب مثل القضيه يا اما تربح ويحكم عليك بالإفراج أو تخسر وينحكم مؤبد.

ايلاف:يعني شنو قصدك بالإفراج أو المؤبد ما فهمت؟

امير:اول شي خلي نگعد واسولف لان سالفتج يرادله گعده مو مال مشي،گعدنه على المسطبه وخطيه تَمام نام لفلفه زين وكمل،شوفي خلي اوضحه الج وخلي نعتبر الحُب قضيه لا على التعيين والقاضي القدر هو بيده الحكم يا اما نكمل يا اما لا،والشاهد هو الأفعال أو المواقف الي شهدت على هذه القضية والمحامي هو الساعي لهاي القضيه حتى يدافع بيه عن موكله ويظهر برائته...

ايلاف:هزيت راسي يي..

امير:ف المحامي رح يسعى حتى يكسب هاي القضية ،لازم يكون الادله موجوده حتى من خلاله يظهر الحكم يا اما افراج وهو الفوز بهذا الحُب أو المؤبد وخسارته ،فالقدر هو الي حاكم على كل هاي الأمور..

ايلاف:رفعت تك حاجب وكملت،يي وشنو حكمت القضيه مالتنه بالإفراج لو المؤبد؟

امير:باوع الي صفح وگال،أنتِ شنو تگولين؟

ايلاف:بتسمت افراج

امير: بتسم ونزل على تَمام بأسه وضلينه نسولف بعده گال، يالله امشي خلي نرجع گمنه ثنيناتنه نمشي وصلنه يم السيار صعدت اجه خلاه بحضني وراح صعد بعده رجعنه للبيت...

ايلاف:زين سؤال؟

امير:گولي..

ايلاف:انت گلت انو الأفعال والمواقف هي الي تشهد على هاي القضيه زين بهاي الحاله الطرف الآخر من هاي القضيه وين يعني منو هو ما وضحت؟

امير:احنه مو گلنه انو القاضي هو القدر،والطرف الآخر هو المتهم (المحُب)بهذا القضيه من خلال اعتراف المتهم بأفعاله القدر هو الي عنده الحل لان هو الي راح يصدر الحكم بالنهاية،فحياتنه عباره عن محكمه تتناول قضايا كثيره..

ايلاف:وجهه نظر حلوه...

امير:اعجبج تره

ايلاف:يي والله هواي

امير: ضحك،ها بديتي تتحارشين؟

ايلاف:انييي مستحيل...

وصلنه البيت نزلنه دخلت جوه وامير ضل يصف السياره واني صعدت رحت نيمت تَمام بالجربايه مالته ورحت بدلت وبعد نمنه لان ورانه دوامات...ثاني يوم الصبح

ايلاف: صباح الخير حبيبي

امير: صباح النور

ايلاف:يله تعال اكل بين ما أبدل لتمتم حتى اخذه لماما

امير:تمام يله روحي

ايلاف: رحت صعدت فوگ گعدت تمتم وبدلتله الحلو بي يگعد مصحصح ميتنعوص بس نومت الظهر يگعد متنحس لان يحبه ..

بدلت اله وكملت ونزلت دخلت المطبخ لگيته امير ديغسل المواعين مالته..ياااا ليش غسلتهم مخليتهم؟

امير:عادي مصار شي،واجه بتجاهنه... شنو ميصير اساعد مرتي رفع حاجب وصار مقابيلنه قرب وجه عليه أكثر وضل صافن واني هم صافنه بعيونه غمضت عيوني عبالي يسوي شي وفجاه نزيت جان يجي يبوس تمتم وهو يضحك..شبيج يحضي نزيتي شنو عبالج ابوسج؟

ايلاف:خجلت ءها لا بس هيج

امير: ههههه دروحي روحي واني صاعد اغير ملابسي

ايلاف:صعد هو واني سويت ممه لتمتم ولفيت الحجاب بعده اخذت الجنطه مالتي ومالته جان ينزل امير مكمل قفلنه البيبان وطلعنه وصلني لبيت اهلي نزلت وديت تَمام لماما يضل يمه ورجعت صعدت السياره ومناك وداني للمستشفى...

دخلت بعد ما بصمت رحت الغرفه مالتي دخلت غيرت الملابس وگعدت اخذت جدول اليوم بعده سحبت التلفون وتصلت على ميسم...

..الووو ها ماسه شلونج؟

ميسم: الحمدلله تمام انتِ شلونج تمتم ابو تمتم؟

ايلاف:كلهم بخير،هاا بشري وافق سيف على الروحه لو لا؟

ميسم:يااا تصدگين نسيت اگوله خرب حظي ميخالف اليوم احجي وياه...

ايلاف:خوش مو تنسين..

ميسم:لا ما انسه،زين وشهد خابرتيه شفتيهم يرحون لا؟

ايلاف:يي البارحه تصلت عليه گالت نروح بس كون من ينزل زوجه من الواجب

ميسم:اهاا وغنى؟

ايلاف:غنى متروح لان البارحه من رحت لاهلي سألته تگول ما بيه حيل وحسين هم ملتزم بدوام متگدر..

ميسم:شنو السالفة هيه شويه ونرجع قابل نضل لليل،بس ولو خطيه حامل الله يساعده ..

ايلاف:يي والله البارحه لو تشوفيه من رجعت من الدكتوره وجه اصفر نص الطريق وذابه من رأسه..

ميسم:يي هيه هاي الحباله يالله الله يگومه بالسلامه .

ايلاف:أن شاء الله يله داده اني اروح اكمل ومو تنسين تگوليله خوش؟

ميسم: ميخالف الله وياج هلا يروحي...وغلقته من عده گمت من الفراش عدلته ولميت شعري رحت الحمام غسلت وجهي وطلعت بره لگيت عمتي توه خاله القوري على النار صبحت عليه وبديت احضر الريوگ اليوم ما عندي دوام اوف...

خلصنه وبعده گمت على البيت عدلته ونظفت طبخت الغده هدرته على النار ،حسيت روحي خفيفه بسرعه خلصت كُلشِ لان من وره هوسه الجهال ما اشوف دربي واليوم ما همه بالروضه ف البيت هدوء ماكو احد هو يصير الظهر بعد ما اعرف راسي من رجليه من وراهم يجون ويه عمي وقت رجعته من الدوام وابوهم الصبح ياخذهم...

خلصت كُلشِ رحت اخذت ملابس وللحمام سبحت وطلعت ويه طلعتي جان تدخل الهوسه ويرأسه صوفي بصياحه....

صوفي:مومااااااااااااا

ميسم: هااا امي هنا تعالي بالغرفه..

صوفي:سلام عليتم،واجه يركض لحضني بوسته وعضعضته وهو يضحك وجان يدخلن السعالوا مكفشات والوجي أجلح املح دخيلك ربي،خزرتهم هنه ثنيناتهن خافن واگفات وحده بصف الخ...ليش ماگلوت سلام اني شنو گلت؟

ردن سلام عليكم...رديتهم

..بعدين هاي شنو ليش هيج شعركم مخربط وملابسكم هم؟

غزل:مومااااا هاي وحده بنيه تعالتت ويه ثوله (زوله)واني وثوله تتلناه،طبعاً غزل عده رتله باللسانه تخليني اگزز عليه رديت بعصبيه واني خربان ضحك على أشكالهم .

ميسم:ليش تعاركت ويه زوله؟

ازل:مومااا تگُلي دبه حميسه گتله وأنتِ مردانه جان تجر شعلي واني هم جريت شعله واجت غزوله هم ويايه تتعارك وبسطناه.

صوفي:موماااا وهاي البنيه وتحه حتى المعلمه تصيح عليه وهيه تتعالت

ميسم:هسه يالله تعالوا خلي ابوسكم شو اليوم ما جيتوا بستوني؟
واجن بحضني،افيش دبدوباتي الحلوات وهسه تعالو بدلوا ملابسكم وبعد خلي اشوف واحد بيكم ملابسه لو شعره مخربط شأسوي بيكم...

ازل:شنو تسوين؟

ميسم:بعد حلا وچبس ما انطيكم لو اشوفكم تبجون هم ما انطيكم .

صوفي:لا مومااا حبابه بعد منسوي وتاحه حبابه!

غزل:يي موماااا بعد وتاحه ماتو

ازل:حبابه تلشِ ولا ككو،موماااا ريلاكث

ميسم: والله انتو تخلون الواحد يصير ريلاكس من وراكم ، خلي نشوف يلله كل واحد يجيب ملابسه ويوگف سره حتى أبدله.

راحوا كل واحد جاب ملابسه ولزم سره لازم نبديه بصوفي وانهيه بزوله خلصت طلعنه بره راحوا غسلوا اديهم واني رحت للطبخ بسرعه صبيت الغده لان عمي يجي جوعان ف نصب من وقت اما سيف خطيه بس يوم الجمعه والسبت ويانه يتغده لان يوميه دوام ويرجع الساعه ب٣ االظهر ف ميلحگ...

خلصوا بعده راحوا كل واحد لغرفته اني كفيت المطبخ بسرعه ورحت شفت الجهال نايمين رحت بالصاله انتضر سيف علما يجي حتى أصب اله غده...

أما بخصوص ايناس من يوم الي صار والكتله الي أكلته عبالك صحته على زمانه عتكفت عن العالم كله تروح الدوام وترجع غير الغرف متطلع منا لهنا حتى حجي قليل تحجي ويانه حتى تعامله وياي تغير،مرات انقهر عليه ومرات اگول لا تستاهل السوته مو قليل خربت حياة غيره في سبيل حياته...

الى أن وبيوم گاعدين جان نسمع بس صياحه بالم كل احنه گمنه على صوته دخلنه عليه جان نلگاه تتلوه من الالم بسرعه اجه سيف أخذه وراح للمستشفى وعمتي وياه ضلينه ننتظر كل ساعه ادگ عليهم ولا واحد يشيله صار الليل هم ماكو خبر بالاخير ياله شاله سيف وگال اخذوه للعملياته وبعده لي هسه مطلعت سالت ليش گال عملية مراره لان مرارته حيل ملتهبه وقالعيه اله وگال اليوم نظل يمه ...بعده غلقته منه وضليت انتظر...

لليل كُلش وجان يدخل سيف بس وضعه مو تمام بسرعه اجاني وگالي

سيف: ميسم بسرعه حضري الي ملابس لايناس أخذهم ويايه بين ما اغير ملابسي وأخذهم..

ميسم:ليش شنو حترجع مره ثانيه؟

سيف:گاله بتنهيده طويله،يي

ميسم:خير سيف شكو شنو الي صاير ايناس بيه شي؟

سيف:باوع عليه وضل صافن شويه ودار وجه وگعد على التخم وخله ايدي على رأسه،ايناس حيل مريضه واحتمال يقلعون الرحم مالته...

ميسم:شهگت مفزوعه من الي سمعته،معقوله لعد مو گلت مراره متاذيه وحيسوله عمليه؟

سيف:يي قلعوه بس طلع عده كيس وهذا الكيس سام وإذا ميقلعوه يأثر عليه...

ميسم:نقهرت حيل عليه رغم الي صار وشگد جنت شايله عليه بس من بعد الي سمعته حيل تاذيت رحت اخذت ملابس اله وديتهم السيف وراح للمستشفى مر سبوع وبعده قرروا يسون العملية بس الغريب من هذا ابد ولا حجت ولا گالت وكانوا مقتنعه بالي ديصير وياه أمه مقهوره عليه أكثر من عده حتى اني مهما كان الي سوته بس قهرتني...

سيف:هاي وين صافنه؟

ميسم:درت وجهي وإذا سيف عاگد حواجبه وبملابس الدوام توه داخل،هاي شنو شوكت اجيت ولا حسيت بيك؟

سيف:غير صار ساعه احجي وأنتِ مدري وين بالج

ميسم:دروح بدل وعندي شغله وياك..

سيف:يا ستار استر من شغلاتج ،خاف مشتاقتلي واني ما ادري وظل يغمز...

ميسم:دروح واسولفلك،راح واني رحت اسوي اله غده وأحضر مقدمات شلون افاتحه بالموضوع خلصت وأخذت الصينيه بالصاله ماكو احد اجه گعد وبده ياكل رفع رأسه وياوعلي

..مو راح اغص بالاكل تعالي اكلي وياي؟

ميسم:لا بالعافيه بس عندي شغله اريد اگلك عليه بس حباب كون توافق؟

..غير اعرفه شنو هيه.

ميسم: شوف على أساس هاي الجمعه قررنه اني والبنات نطلع كلمن هيه وزوجه وجهال سفره نروح المنتزه ونأخذ غدانه ويانه ف شنو تگول حباب وافق والله صار النه هواي مطالعين هيج سفره .

..اممم ومنو ومنو يروح؟

ميسم:كيفت واجيت يمه ،ايلاف وامير وشهد واشتر هم.

..وغنى؟

ميسم:متروح لان خطيه تتعب وحسين عنده دوام ،ف هسه شنو گلت يي لو لا حتى انطيهم خبر؟

..ما ادري الله كريم اشوف جماعتي خاف يطلعون ..

ميسم:عبست وحجيت بضجر،اهااا جماعتك اهم وصلت يمي گمت تلوف بالكلام اني صوجي حجيت جنت ادري بيك متروح يي على ابو أنتِ طلعين ويه صديقاتج، ولا فديوم گتلي خلي نطلع سوه ولا فديوم طلبت من عندك حاجه اذا ما طلعت سين وجيم بيه بعد التوبه اذا طلبت من عندك حاج....عاط بيه

..ولج شبيج نهديتي ادري مسجل ميسكت أنتِ شبيج من كل عقلج، فهمتي شگلت اني گلت خاف يطلعون حتى إذا تيسرت الروحه اعتذر منهم، واروح وياج اكلتيني وشربتيني ،بس اني ناقص اذا خليتج ترحين...عاف الاكل وگام

ميسم:يااا سيففف ،عافني وراح الغرفه ضليت اللعن بروحي خرب حظي ادري شجاي نهديت بالرجال يالله بالله هذا هسه شي قنعه..

ثاني يوم الصبح دا أبدل للجهال دخل سيف گال بسرعه بس حجاه من وره خشمه مبين بعده شالي عليه رديت عادي خلصت تبديلهم ودا امشط الصوفي شعره..الله يمه فديت الصاك مالتي جان صوفي ياكل اللفه مالته وگال..

صوفي:مومااا يعني ثنو ثاك؟طبعا جهالي من النوع على كُلشِ يسألون رديت..

ميسم:يعني شخص جميل...

صوفي:يعني بابا هم ثاك مو؟باوعت لسيف جان منزل رأسه على التلفون بس اني ادري بي اذانه ويانه.

ميسم:ضحكت،يي صاك كُلش بعدين منو گال الك هذا الكلام؟سالته بعفويه

صوفي:المعلمه!

ميسم:رفعت راسي مصدومه على كلامه،شنو وشگالت الك سولف الي؟

صوفي:ثوفي مومااا هداك اليوم من لحنه للوده(الروضه) لحنه للست وبابا اخدنه من لأح دالت الست هده ابوك دتله يي بابا، گالت ابن الاوادم اگول عليمن صاك على ابوك اكيد امك عوبه هو هذا حضهن گاعد (على للسان المعلمه)

صوفي:ستت عيب موما مو عوبه حبابه

ميسم:اني سمعت كلامه لو شطت للسمه بسرعه رحت لبست حجابي ورحت وياهم شافني سيف گال...

..ها وين؟

ميسم:اروح وياكم

..وشعندج رايحه شنو تصدگين بحجي جاهل؟

ميسم:يي اصدگ بي انت ما الك دخل،وذا ما اروح وياكم اروح بسيارتي وحدي.

..ماكو

ميسم:براحتك

.. ميسمممم!!

ميسم:ماكو اروح يعني اروح وذا متوديني اني اعرف المن اودي

..المن؟

ميسم:شهد

..ياربي سترك شلون ثنين امشي عمي امشي بس سمعي هااا اني الاحجي متفتحين حلگج خوشش؟

ميسم:سويت نفسي اعدل حجابي وما رديت،صاح بصوت
..خوشششش

ميسم:خوش خوش

..يله بسرعه اريد اشوف تاليته وياج شلون .

ميسم: ميخالف دوديني واني اگلك شلون تاليه، باوع عليه بخزره طلع اخذت الجهال صعدتهم بالسيارة وصعدت بالصدر ومشينه طلعت قلم حمره خطيت شفايفي هو يباوعلي ويهز بيده..احسب حسابك توديني للدوام لان ما جبت سيارتي...

وصلنه نزلت وأخذت الجهال ودخلت الروضه سالت صوفي على اسم المعلمه عرفته ودخلتهم راحوا همه للصف واني توجهت للاداره اطگ بالكعب مالتي وصلت دگيت الباب رفعت راسها المديريه گملت ...احمم مرحبا ست المديره؟

.. أهلا منو حضرتج

ميسم:اني ام طالب عدكم جايه دا اقدم شكوى على معلمه قليله ادب جايه تربي اجيال خلي تربي نفسه بالاول يالله تجي تربي طلبه وتدرسهم.

..العفو منج ما اقبل تتجاوزين على أحد المعلمات احنه هنا مؤسسه تربويه وكادر تعليمي...

ميسم:والمؤسس التربويه الي تحجين عليه بلا تربيه،شنو معلمه تگول للطفل انت حلو اكيد على ابوك وامك عوبه هو هذا حضهن لو من يجون هيه ليش هي بالاخص الي تستقبلهم حتى تشوفه ابوهم ،وحتى وتحاجي ابني على شغلات عيب احجيه وجايه تگليلي احنه تربويين لعد وين التربيه بالموضوع فهميني..حيل تعصبت وعطت بيه هيه نصدمت وخافت اكيد على سمعته لانه روضه اهليه ونموذجيه خافت على صيته

..تمام اهدي اعصابج وهاج هذا الماي وهسه أصيح للمعلمه واشوفه بس شنو اسمه... تمام.

راحت شويه واجت وياه معلمه خزرته هيه باوعت عليه بعين صلفه دخلت واجت گعدت گبالي حجت المديره وياه...

..يي ست.. شنو الكلام الي گايلة للطالب عن ابو وأمه وغالطه عليه؟

..اني مستحيل اغلط وبعدين هيه شنو لهيج درجه تصدگ بحجي زعطوط...

ميسم:احترمي نفسج ابني مو زعطوط وكُلشِ يفتهم ومن محاجيتن وگالج عيب تحجين على ماما عبن هو يعرف العيب اكثر منج يااا هه مربيت اجيال..

..احترمي نفسج لج غصبن عليج وعلى الأكبر منج اربي وأنتِ الممنونه بعدين تعالي منو انتِ وتحجين عليه...

ميسم:اني جنت منتظرته بس واحد يگلي يله اطفر عليه وهيه گالت هيج وانطتنيي الضوه الأخضر طفرت عليه ومن شعره التنكث بي جريته حيل،لج غصبن على منو ادب سزز حقيره متستحين تبصبصين على الزلم سافله لا والنوب اسمه مربيه اطفال تفوو على الي سواج معلمه...

ما نطيته مجال الحارس راح صاح لسيف واجه عليه وهو يجر منا والمديره منا وما فكيت عنه تالي سيف لزمني من خاصرتي واني نقطه ضعفي هديته اضحك هيه بسرعه وگعت بالگاع وشعره المنكوش الاحمر تخرب حصرتني الضحكه بس خاف تروح هيبتي گدامه لتموا باقي المعلمات اجه سيف لزمني من ايدي حيل وطلعنه بعد ما عفنه الهوسه يمهن نسحبنه وطلعنه يجر بايدي واني ادردم عليه صعدنه السياره عاط...

.. والله العظيم كلمت جاهل ظلم بحقج ولج بابا أنتِ اكو عقل براسج لو.. استغفر الله ياربي گتلج نروح نحاجيه نفتهم منه مو تتعاركين..

ميسم:يوووه شنو تريدني اسمع اله وأيدي على خدي شمدريك يجوز قبل اشكال سوت، ومن توصل يمي لاااا هنا الوضع يختلف ما اسكت لو هسه ما ادري شنو يصير.

وبعد شعرفني اني اكيد انت هم شكم مره حاجتك ومكيف للوضع عادي ولا تحجي ولا تگول يأبه هاي مدري شلونه المعلمه نظراته مو شي روحي حاجي الاداره،
بس ماكو اني ضاربني بعرض الحايط وبس ميسم تحجي لا صرت بلا عقل مدگول انسانه عده مشاعر مدگول عده احساس تغار لا ماكو هذا الشي بقاموسك ابددد.

عوفك مني اني يطبني مرض خاف على جهالك منه وخاصه هسه وقتنه ابد موحلو، بس ولو اني اعرف اتصرف اطفالي اني اعرف شلون أعلمهم بسيطه..

بس شوف هاا بأجر تنقلهم من هاي الروضه وإذا ما نقلتهم اگول لبابا هو ينقلهم. سكت هو واني هم بعد ما حجيت وصلني للمستشفى نزلت وهو راح...

دخلت ونفس روتين يوميه وقت الاستراحه طلعت اشرب شي راسي مصدع من وره هوسه الصبح طلعت بره شتريت كوب گهوه ضليت اشرب بيه وحدي بالحديقه وصافنه رفعت راسي وشفت شوفه تخردلت بيه..

معقوله هيه غمضت وفتحت عيوني لا هيه شنو السالفة اليوم بيا وجه مصبحه دخلت جوه هيه وبته واني ضلت عيني عليه لحد ما ختفت من گدامي نزلت عيني على أيدي لگيته وحده ترجف لزمته حيل حاولت اسيطر على نفسي...

گمت ودخلت جوه رحت الاستشاريه لقسم الباطنيه للمكتب مالتنه دخلت تفاجئت بوجوده بلعت ريگي ودخلت يمهم گعدت على الكرسي الثاني باوعت عليه ودارت وجه للدكتوره تحجي وياه بعدين فحصت الطفله الي وياه واني مدري شبيه متوتره اهز برجلي حيل رجعت باوعت عليه على شكله حلو معقوله هيه احلى مني لا لا اني بشنو گاعده افكر مستحيل يرجعله بعد تزوجت وشافت حياته سمعت تحجي بالتلفون...

نور: الحمدلله ما بيه شي مجرد لويه عده مو تسمم يي بسبب البرد تمام الله وياك باي..غلقته وحاجت بته يله حبيبتي حيجي بابا علينه ونزلت عليه شالته... شكراً دكتوره زحمناج

..لا ماكو زحمه وسلمينه على محمد..

نور: أن شاء الله...وبعده طلعت

ميسم:باوعت لنرمين ،اگول منين تعرفيه؟

..منو نور؟

ميسم:ما ادري شنو اسمه،سويت نفسي ما اعرف اسمه..

..زوجه يصير ابن عمي

ميسم:اهااا

..ليش؟

ميسم: مجرد سؤال،يله اني اروح اشوف التحليل شنو صار عليه

..تمام عود بشريني

ميسم:ادعي كون ماكو شي

..شوف البطرانه روحي روحي ..

ميسم:وصلت المختبر حاجيت البنيه نطتني النتيجه طلعت بره فتحته قريته المكتوب غمضت عيني بنفاذ صبر بعده سديته وضميته...

..ها بشري؟

ميسم:درت وجهي اله عضيت شفتي بأسه سحبت نفس وكملت ،حامل...

يوم السفره:

ايلاف:يي اجت ميسم وأخيراً،كله دارت وجه للمكان الي أشرت عنه جان تجي ميسم هيه وسيف والجهال تركض قبلهم وصلوا يمنه سلمنه عليهم وگعدنه الولد بجه واحنه بجه،يي شو تاخرتوا؟

ميسم:سُكتِ غير من وره البنات تونه خلصنه ركبنه السياره وگع العصير على ملابسهم وسيف تعصب وضل يعيط ونوب منا الولد يخابروا تالي عاط وباحد بيهم مدري منو؟

ايلاف:امير خابره..

ميسم:هيه صارت بوجه

ايلاف: ههه يله عادي ،يي شلونج ويه الحمل؟

شهد:لحظه يا حمل؟

ايلاف:شبيج لعد غير ميسم حامل!

شهد: والله!

ايلاف:يي والله شبيج

شهد:الف مبروك هاي من شوكت شو اني اخر من يعلم؟

ميسم:لعد مو حجيت بالگروب بس أنتِ خيه مامنتبه.

شهد:يي والله بس اني اخر شي اتذكره من مغامراتج كتلت المعلمه.

ايلاف:ههه تعالي صُدك سولفين شلون كتلتيه يمه اني سمعته متت ضحك رحت سولفت لامير خطيه ضل مصدوم ما متوقع هيج تسوين يگول ميسم هيج يطلع منه...

ميسم:خيه وحده ادب سزز متستحي وسولفت الي صار بالتفصيل الممل لهناك وجان يصيح اشتر..
.
اشتر:شنو اليوم بس لا ناوين تجوعونه هم جاين متأخرين وهم متنطونه اكل لعد لو گايلين ماكلين بالبيت ونجي..

امير:هسه اصبر على رزقك هسه ام تَمام تصب يالله عيني وين الاكل..

ايلاف:هسه يله

شهد:عزه فضحنه الرجال

ميسم:يا خيه قابل غربه

ايلاف:صبينه الغده طبعاً اني جبت الدولمه وميسم جابت تمن باگله ودجاج وشهد عليهم العصائر واللبن والحلويات..

اجه اشتر تعارك هو سيف يريد يگلب الدولمه فض النزاع بينهم امير وهو الي گلبه ضلينه نضحك عليهم طبعاً من عرس اشتر قوت علاقة الولد بعضهم حيل صرنه بين فتره وفتره نطلع سوه حتى غنى هيه وحسين بس رافد مبتعد لان ميحب هيج سوالف لكن علاقة زينه وياهم،المهم گعدنه كل احنه على السفره سوالف وضحك بيومه حيل تونسنه...

خلصنه الاكل ولمينه السفره جنت جايبه ويايه حافظ جاي ويانه صبينه وشهد خلت الحلويات وجانت مسويه كيكه قسمته وخلته ...

اشتر:ايبااه ذكرتوني بأيام الخطوبه

سيف:ليش شكو

شهد:اسكت لتفضحني

اشتر:لا يأبه شكو افضحج ،يي خلي احجيلكم مره تصلت عليه ام عزوز على أساس مسويه كيكه بس شلون كيكه.

امير:يي وشلونه؟

اشتر:بالزباله تكرمون تسمع حسك.

ايلاف:خربنه ضحك عليهم وهيه تگرص بيده وهو يضحك،ضل كل واحد يذكر موقف بأيام الخطوبه

امير:لا الحمدلله ايام خطوبتنه جانت بريئه

سيف:شو باوع عليه،دار وجه امير...

امير:شكو؟

سيف:متاكد بريئه

امير:لعد مكذب عليك

سيف:خوش

اشتر: طبعاً ام تَمام الله يساعدج عليه مسطلحاته كله حقوقيه كله برائه وافراج ياخي دحجي عدل مثلنه ..

ايلاف:ضحكت تعودت عليه،قبل لنروح جانت شهد جايبه وياه كامره وگفنه كلنه سوه وتصورنه بيه وبعد كلمن راح لبيته...

شهد: طبعاً اليوم كُلش تونسنه

اشتر:يي والله

شهد:اگول حبيبي بعد شگد وتلتحق؟

اشتر:ليش؟

شهد:دا اسأل..

اشتر:احتمال الخميس هاي.

شهد:تمام،طبعاً جنت محضرتله مفاجأة عيد زواجنه هاي الاربعاء ف امنت الخميس هو رايح مو الاربعاء...

مر الاسبوع هذا واجه يوم الاربعاء جنت متفقه ويه ايلاف تگول رجله يطلعون سوه حتى اجهز براحتي وصيت سدن اخته الصغيره توصيلي كيكه واني جهزت نفسي ورحت للصالون سوت شعري وعدلت شويه من شكلي وشتريت فستان حلوه وبعده رجعت للبيت المهم صار الليل وبعد ما جهزت الغرفه كله عزوز راح يم سدن ينام واني انتظره يوصل ...

سمعت صوت الباب نسد بسرعه عدلت شكلي وطفيت الضوه وفتحت الشموع دخل هو ضل فتره صافن واني واگفه واباوع عليه وهو ميشوفني فتحه وجان ينصدم بالاجواء الي مسويته ...

اشتر:هاي شنو شمسويه؟

شهد:معقوله متدري اليوم شنو؟

اشتر:لا ما ادري،شنو المناسبه ؟

شهد:حجيت بقهر،عيد زواجنه

اشتر:صُدك ولا ادري،واجه باتجاهي وعينه عليه وصل وخله أيده على خدي...شنو بس لا زعلت حبيبي؟

شهد: لا ما زعلت بس معقوله ما تذكرت؟

اشتر:صار ورايه وگال،ولا ادري من شفتج تفاجئت أصلاً

شهد: أصلا توقعتك حتعرف

اشتر:امم لتتوقعين

شهد:شنوو،درت وجهي عليه لگيته بيده علبه حمره باوعت اله وباوعت على العلبه عگدت حاجبي،هاي شنو؟

اشتر:فتحه وإذا گلاده اسمه موجود بيه واسم عزوز..عيد زواج سعيد يا احلى واجمل شي صار بحياتي يا ام العز

شهد:دمعت عيوني واني اسمعه،عبالي متدري بهذا اليوم؟

اشتر:شلون اني انسه بيوم صرنه نفس واحد وروح وحده

شهد:حضنته احبك زعتوري احبك حيل وهواي وكومه

اشتر:ضحك،اعرف خانج التعبير اهم شي تحبيني ودتعبرين عن الكثره مو؟

شهد:ضحكت من بين دموعي يي

اشتر:واني هم اموت عليج بونيتي...

ثاني يوم ومثل كل مره انتظره الصبح وبيدي طاسه الماي وهو يعدل بشعره واني باوعله..انت شدعوه كُلش حلو؟

اشتر:ها بونيتي على كيفج ويه گلبي تره رچيچ

شهد:فديت گلبك اني

اشتر:شنو بس لا ناويه متخليني اروح تره ماعندي مانع افرش واگعد

شهد:لا داده روح الله وياك ورانه دوامات

اشتر:اها يعني اروح خوش وصل جوابج

شهد:لا مو هيج قصدي اشتر لتفهم...

اشتر:تمام تمام مصار شي يله اني رايح ديري بالج على البيت امي عزوز ما اوصيج ها واي شي تردين أو تعتازين تعرفين وين ترحين ما اوصيج خوش ..

شهد:تمام من توصل طمني ولتنسه يوميه بالليل تتصل عليه حباب ليضل بالي عليك...

اشتر:تمام،واجه بأس راسي وطلع حسيت راح گلبي وياه ركب السياره ومشه ذبيت طاسه الماي وراه راح وضلت عيني عليه سديت الباب رحت كملت بعده اجه السايق عليه ورحت وصلني بالاول للحضانه وبعده للمستشفى وصلت ودخلت مر اليوم كله واني بالي مشغول عليه لحد ما تصل عليه وطمني وصل يالله رتاح بالي ...

مر سبوع عادي كله نفس الروتين ويوميه بالليل اتصل عليه نسولف اني وياه افتح كامره يسولف ويه عزوز وبعده يروح لان حيل يتعب بحيث على طول الاتصال هو يتثاوب مرات ميدري بروح ينايم واني احجي ويا اسولف وهو نايم بعده اغلقه جان وقت الاتصال مالته بالليل يعني قريب12مرات اذا عنده شي لا ياخبر بال7 ...

گعدت الصبح مثل كل عاده نتريگ اني وسدن لان ثنيناته دوام صباحي هيه كليه واني بالمستشفى خلصت كُلشِ اجه عليه السايق ورحت وصلتت للمستشفى وبدت المراجعين تجي والتهي منا لحد ما تجي وقت الاستراحه اطلع بره لو اكل الي لفه لو اشرب جاي لو گهوه مرات اتصل على البنات نسولف وبعده ارجع للشغل..

خلص الدوام رحت الحضانه أخذ عز اول ما دخلت تلگاني عزوز يمشي اجه الي شلته ضليت ابوس بي لحد ما شبعت صارت روحي بعزوز كل ما اشتاق لأبو اضل اشم بي عبالك بي عطره وهو نسخه من ابو بكُلشِ يشبه أخذته وبعده رجعت للبيت...

دخلت جوه لگيت عمتي خطيه دتغسل المواعين ذبيت غراضي بدلت واجيت اخذتهم منه كملته عنه جانت هيه طابخه المرگه واني عليه التمن خلصت كُلشِ دخلت سدن هم بدلت واجت تساعدني صبينه الغده وگعدنه وعزوز بحضني ياكل خلصنه لمينه المواعين حتى اغسلهم طبعاً احنه غدانه كله بالمطبخ ف نضل بي لهناك وجان تگول عمتي...

..اگول خاله شهد تصل عليه اشتر وگال بعد لتتصلون عليه منا لمن اني اتصل انتو خابروا لان عدهم انذار ما اعرف شنو ف حيقطعون الشبكه...

شهد:اني سمعته جان يوگع الماعون مني گلبي وگع..

.. الله الله شبيج خاله

شهد:لعد ليش ما گال الي؟

..هو گال ما تصلت عليه لان ادري بيه تخاف وخاف يضل باله وتضل كل ساعه متصل ف ما اشغل باله

شهد:تمام،رجعت اكمل المواعين وبالي يسولف ليش ما تصل عليه حتى لو عاد يطمني خو ما اضل هيج ...استمر الوقت يمشي واني مدري شبيه اروح واجي صار الليل اتصل ماكو خدمه بعدين گلت عادي يجوز بس اليوم بأجر يتصل حاولت اطمئن روحي بماكو شي...

عده يوم وثنين وتلاثه وهم ماكو اي تلفون منه اني هنا الخوف بده يشتغل عندي صارت سولتي بالتلفون كل ما يرن اركض عليه عبالي هو،بعده عده سبوع نفس الوضع واني هم نفس حالي بالي يضرب أخماس باسداس وماكو اي خبر عنه..

تعبت نفسيتي حيل وتمرضت من التفكير والانتظار وهو ماكو حتى ابني هملته وثنيناتنه تمرضنه الصخونه ما فكتنه اخذت اجازه حتى ارتاح بس يا راحه من بعده...

طلبت مني عمتي اروح لاهلي شويه اغير جو والهي تفكيري ما حجيت شي رحت الهم وهم نفس الشي وزاد وضعي ونمت بالفراش يمكن هناك اشوه من اشوف مكان انام على مخدته أحسه موجود هنا كُلشِ ماكو وبس عزوز حتى هو سوده عليه روحه رايحه...

مرت3 ايام اگدر اگول صحيت شويه احسن من قبل وحتى اجازتي خلصت وديت عزوز للحضانه وطلبت يديرون بالهم عليه ورحت للدوام مشه اليوم ،قريب ما ما اطلع جان يدگ تلفوني ما نتبهت منو فتحت تصال وإذا صوته حسيت روحي رجعتلي تجمعت الدموع بعيني وحجيت بصوت تعبان..

شهد:اشتر هذا انت؟

اشتر:اني يبعد عافيتي

شهد:وين رحت عني اشتر ليش گطعت اخبارك عني ليششش،ما تحملت أكثر صرت ابجي اكثر.

اشتر:ادري والله ادري گطعت عنكم بس مو بايدي والله مو بايدي هسه عوفج من هذا كله وسمعيني زين الووو شهد وياي مستعجل بسرعه؟

شهد:وياك بس شكو خوفتني؟

اشتر:سمعي هسه بسرعه وره ما تخلصين تلفونج تغلقي فهمتي تغلقي من الرئيسي وطلعين بسرعه وره ما تغلقين التلفون رح تلگين تكسي اڤيو صفره سايقه ابو گشوه تعرفي مو ؟

شهد:يي اعرفه

اشتر:سمعي تسوين نفسج عادي وكانو داتاجرين تكسي وتبينين طبيعي لترتبكين شهد فتهمتي لترتبكين لان أقل غلطه نروح بيه تمام

شهد:اشتر حباب لتخوفني ما اگدر والله

اشتر:شهد ادري بيج انتِ گده سمعيني زين كافي يعيني لتبجين بس تصعدين التكسي هو يعرف وين يوديج تمام؟

شهد:تمام،اشتر وعزوز؟

اشتر:شبي؟

شهد:بالحضانه!

اشتر:شنووو خرب ام.....استغفر الله شوفي هسه غلقي واني اشوف ابو گشوه وسوي مثل ما گتلج تمام شهد اعتمد عليج ؟

شهد:تمام الله وياك ...غلقته من عنده وسويت مثل ما طلب من عندي غلقت الجهاز وأخذت الجنطه مالتي وطلعت بره المستشفى ضليت ادور على تكسي نفس المواصفات جان تطبگ السياره رحت عليه ودنگت باوعت عليه مو هو أبو گشوه اني اعرفه شكله درت وجهي جان اسمع صوته همس...ولج تعالي هنا

درت وجهي وعگدت حواجبي جان يحجي من بين سنونه.. تعالي بسرعه صعدي اني فقار

شهد:يااا هذا انت

ابو گشوه:لا خالته بسرعه

شهد:بسرعه فتحت السياره وصعدت وهو مشه،وين رايحين؟

باوع عليه بالمرايه ماكو ما رد سكتت وبعد ما حجيت بس شنو ميته خوف اباوع لاديه يرجفن احس النفس اليطلع من عندي يرجف بالي يمه شنو الي صار الي مخلي هيج خايف نوب ابني شلون يا ربي حجيت،لعد وابني شلون...هم ما رد

..مو دا احجي وياك دا اگول اريد ابني انت شنو متسمع بس الي يعجبك،حجه وهو صاك على سنونه

..مو مراقبين يالإسلام مراقبين

شهد:دب الخوف بداخلي،شنو دخيلك ربي ابني اريد ابني وديني لابني دا اگول وديني لابني ،مشه بسرعه خلتني اسكت ضليت ملزمه بالجنطه،هاي شبيك على كيفك ليش تمشي سريع ...هم ما رد يا ربي هذا رح يكتلني بسكوته سكتت وضلينه نمشي منا لحد ما وصلنه گبال الحضانه حجه...

..بسرعه تنزلين تجيبن ابنج وتجين بدون اي صوت وهاا لاتبينين اي شي سوي نفسج طبيعي لترتبكين خوش ..

شهد:هزيت راسي بيي ونزلت بسرعه اخذت ابني وصعدت سوده عليه روحه رايحه من الصخونه ما بي حيل ،ضليت حاضنته وطول ما نمشي اني ادعي بگلبي يسهله علينه ضلينه ندخل بفروع واني هيج لازمه گلبي وگفت السياره فجأه دار وجه عليه جان يگول...

..نزلي!

شهد:وين؟

..بالسياره الگبالنه ومن دون ليش

شهد:بس..

..بسرعه

شهد:نزلت بسرعه وصعدت بالسياره الثانيه وهم نفس للبس حتى ما دار وجه بسرعه مشه صرت ارجف من الخوف عبالك بفلم رعب وحاضنه ابني على گلبي حيل وهم مشه بسرعه على شويه واعيط بي منا لحد ما وگفنه گبال عماره بيه شقق حجه من دون ميدور وجه ...

.. الطابق الثاني شقه رقم 6

شهد:اخذت الجنطه وابني ونزلت وصلت گبال العماره درت وجهي السياره ما هيه ختفت ضليت اباوع منا ومنا ماكو احد ضليت مثل التايه اروح لو لا عبالك واحد مضيع أمه ختنگت اريد ابجي يا ربي اني وين بالاخير قررت اروح وشيصير خلي يصير رحت وتجهت للعماره الگال عليه وجسمي كله يرجف...

دخلت وصلت المصعد الكهربائي دخلته ونسدت الباب باوعت دست الزر الطابق الثاني وأيدي ترجف خوف على ضعف وصلت نفتحت الباب خايفه اروح لو لا اتقدم خطوه بعدين أتراجع قويت روحي ومشيت وصلت شقه رقم 6 باوعت على الباب مديت ايدي ادگ الجرس رن مره والثانية جان ينفتح الباب وإذا وحده من هذني الافريقيات حجت بالإنكليزي...
..You are welcome

شهد:دخلت الشقه اباوع كُلش كبيره للاثاث البيه يجنن بس محد جنن عقلي من شفته طالع من المطبخ ويحجي ويه الخدامه...منو اجه؟

اشتر:رفع رأسه وباوع عليه..شهد؟

شهد:من دون ما احجي ركضت اله وذبيت نفسي بحضنه ابجي بشهكه وهو حاضني اني وعزوز ويهدي بيه بعدين ما ادري شنو صار حسيت روحي ماعت صرت خفيفه سلهمت عيوني ما دري شبيه اسمع صوته بس ما اعرف شنو يگول عباك طرت...

اشتر:هااا ها هااا شهد شو باعيلي على كيفج شو شهد ،تعاليي ريتا أخذي عز،اجت ريتا اخذت عز مني واني شايل شهد بايدي الثاني مايعه روحه بسرعه شلته وخليته على القنفه فتحت شاله ورفعت رجليه ليفوگ ،وصحت ريتااااا ماي بسرعه ضليت اضرب على خده ماكو اي جواب...

بهلا الأثناء ندگ الجرس اجت تركض فتحت الباب صحت بيه الماي بسرعه خطيه هيه بعد متعرف شنو تسوي ومناك عز يبجي فتحته وراحت تركض للمطبخ دخلت امي وسدن مصدومات بالي صاير بسرعه راحت سدن للطبخ يم عز وامي اجت يمي...

..شكو يمه شنو الصاير خيركم؟

اشتر:ماكو شي بس شهد صار عده هبوط بالضغط يمكن واغمه عليه..

..يا سوده عليه بسرعه ملحه شي خلي تأكله تصحه

اشتر: هسه الخدامه تجي

..يا ولك عدك خدامه شتسوي وياه

اشتر:يمه نلعب محلقوه شأسوي وياه غير خدامه ،شو گومي شوفيه وين صارت ...ولج ريتا بسرعه

درت وجهي على شهد اضرب على خده ،اجت ريتا بيده ماي وعصير الليمون ذبيت عليه الماي عكمشت وجه ،شو شوده حبيبتي شو گعدي شهد بويه شو گعدي...

شهد:فتحت عيوني بثگل بس راسي أحس الدنيا دور بيه سمعت صوته معقوله هو لو اتخيل بعدين تذكرت يي هو حجيت،اشتتتر هذا انت؟

اشتر:يي اني اشتر

شهد:وضحت الصورة عندي وإذا هو لگيته مخيم عليه وبعيونه القلق واضح رفعت ايدي اريد اصدك هو يمي خليته على خده دمعت عيوني،ليش سويت هيج بيه ليش عفتني ،سكتت وتذكرت عزوز ماهو بسرعه گمت خليت رجلي على الگاع لزمتني الدوخه وهو بسرعه سندني.

..عزوز وينه ابني وين ابنييي..طلعت عمتي وسدن على صوتي وبيده عزوز گعدت على القنفه وكلي ارجف ما ادري شبيه ابجي حيل هو شافني وصار يبجي حيل متنحس اجت سدن جابته عندي أخذه اشتر منه ما قبل يريدني اني أخذته من عنده... وگتله

..حباب اخذني الغرفه اريد انام ما بيه حيل احجي

اشتر: بس شربي هذا الليمون

شهد:ما اريد اي شي بس انام

اشتر:تمام امشي ويايه اخذني بوحده من الغرف فتح الباب ودخلت حتى ما شفته نمت وخليت ابني وضميت لحضني وغمضت عيوني سمعت صوت الباب عرفته طلع بعده ما حسيت بسرعه نمت...

اشتر:طلعت من الغرفه لگيت امي گاعده على القنفه ومبينه تنتظرني تريد تعرف واول ما شافتني حجت
..اشتر يمه احجي ليش جبتنه لهذا البيت شكو؟

اشتر:يمه سالفه لشغلين بالج بيه بعدين گعدتنه هنا مؤقته بعدين نرجع..

..امي زين شنو الصار وليش صار الك عشرة أيام مختفي ولا نسمع اخبارك مرتك حلگه نشف بس تريد تسمع خبر عنك منا لحد ما وگعت بالفراش هيه وابنك عاد طمنه گول النه اول تالي هيج يصير وياك ما جنت هيج تسوي اذا ترد يومين متتصل مو عشره لاهنا ولا هناك ..

اشتر:حقكم والله بس شنو اسوي قابل بايدي وأنتِ گلتيه اول مره هيج يصير،هسه عوفكم من هذا كله گومي نتغده اني كُلش جعت...

..وانت هذا الهامك الاكل، الوادم كاتله روحه عليك وانت تفكر بالاكل..

اشتر:ها حجيه تغارين صارت وادم؟

..شنو قصدك ولك اغار...

اشتر:لا سلامتج حجيه يله ريتا صبي الغده،طبعا ادري بيه مو قصده بس اني حبيت اغير من جو التوتر الي صاير ادري الي سويته صعب بس ما باليد حيلة صبينه الغده وگعدنه ناكل بس بالي ضل يمه خلصت بسرعه ورحت اله.

فتحت الباب لگيته نايمه والوجه باهت رحت يمه خليت راسي على شعره سحبت نفس وزفرته لو ودي احبس عطره وما اخلي يطلع من روحي ضليت صافن عليهم منا لحد ما حسيت غير احد يضرب على وجهي فتحت عيوني وواذاعزوز يباوعلي ويضحك درت وجهي عليه تباوعلي وتبتسم ...

..شلون صرتي يالعافيه؟

شهد:احسن

اشتر:جوعانه تأكلين شي ما أكلتي من الصبح لي هسه؟

شهد:لا ما أشتهي

اشتر:لخاطري اليوم هواي تعبتي

شهد:تمام،گمت وياه اجه هو شال عزوز ورحنه للمطبخ باوعت الساعه بال9بالليل حيل من شوكت نايمه جان البيت هدوء ماكو احد، غسلت وجهي وگعدت على الكرسي..
.
اشتر:شنو حابه تاكلين؟

شهد:بكيفك اصلا ما أشتهي بس لخاطرك اكل

اشتر:ما دام الخاطري ف تأكلين الي رح اسوي كله حتى لو مو طيب

شهد:بتسمت،تمام

ضل يفتح بالبيبان مال الكاومنتر مبين يندل كُلشِ ومو اول مره جاي ضل ييطبخ عرفته حيسوي شوربه من العدس السلگه خلص وصبه بطاسه وخله گدامي ..

اشتر:هاج هاي الشوربه شربيه شويه تدفيج واني أوكل عزوز

شهد:أخذته من عنده اكلت خاشوگه والثاني والله طلعت طيبه منا لحد ما خلصته رفعت راسي باوعتله،شوف مو لانو جوعانه بس هيه طيبه

اشتر: بالعافيه

شهد: الله يعافيك

اشتر:مراح تساليني شنو الي صار؟

شهد:مو مهم شنو الي صار المهم انت گبال عيني كُلش كافي ماريد من الدنيا اي شي المهم وجودك يمي يغنيني عن كنوز الدنيا وما بيه...

اشتر: واني هذا الي مخليني متمسك بيج وللموت

شهد: والله على هل هبطات العايشته موت بحد ذاته ...

اشتر:شنو تبسمرين؟

شهد:الحليم تكفيه الاشاره...

گعدت الصبح على صوت امير وهو مخبوص يخابر مدري شبي احجي ويا ماكو ميرد راح على الكنتور فتحه طلع فلوس خلاهم بجيبه قبل ليطل لزمت أيده...

ايلاف:امير شبيك شكو شصاير؟

امير:باوع عليه ضل صافن بس عيونه حمر حجه بصوت هامس،امي ماتت

ايلاف:ششنو ماتت،عافني وراح ما صدگت الخبر اله من تصلت على ميسم...

ايلاف:الووو ميسم خير شنو الي صار سمعت امير يخابر سيف صحيح الخبر؟

ميسم: يي صح

ايلاف:حجيت بصدمه،وشلون توفتت؟

ميسم:يي خيه اثر جلطه بالدماغ

ايلاف: الله يرحمه،وعمتج وين هسه؟

ميسم:راحت ويه سيف لبيتهم ومناك يرحون للمستشفى يطلعون شهادة وفاة وبعدين يغسلوله ويدفنوه...

ايلاف:اها تمام لعد اني اروح اشوف رافد بالكي ياخذني يم غنى خطيه خاف شو شنو يصير بيه وهيه حامل الله وياج باي ...

بدلت ملابسي وتصلت على رافد گال جايج نتضرته دگ عليه طلعت صعدت وياه سألته گال راحت لبيت اهله وصلني لبيت عيالي وراح دخلت واني لازمه بيدي ابني واسمع صوت صياح غنى وخالته وبجهم دخلت باب هذا الباب الي طلعت منه واني حالفه ما ادخله بس اليوم هواي أمور تغيرن واوله الجان السبب بطلوعي من هذا البيت...

دخلت ليجوه شفت غنى خطيه تكسر الخاطر تبجي على أمه وملخه شعره لو اخته الي تلطم بنص النسوان بس محد نزل دموعي غير حالت غنى شلون تبجي بحرگع وتضرب على صدره منا لحد ما تخربطت وگعت رگضت اله بسرعه خليته بحضني ابعد الشعر عن وجه ودموعي تجري على حاله متستاهل رغم الي سوته أمه بيه بس كسرته اليوم عليه كُلش كبيره...

صحت واجيت اصيح واحد من الولد يجي يساعدني نشيله لان متگدر تگوم شويه ودخل ايسر حاله مو احسن من حاله عيونه حمر وجه مطعون احمر مهما كان والي سوته تبقه ام وصعب نكرانه اجيت وياه ساعدته وديناه للغرفه بسرعه شكلت اله مغذي لان صار عده هبوط وموزين على الطفله تتاذه ضلت نايمه طلعت من يمه ومن بعده نصبوا الجادر بره وبدأت الوادم تجي وبيت عمهم اجوا والبنات البيت نترس وادم...

الليل صار وابني ما ادري بي وين رحت طلعت بره وجان اشوف امير بيده تَمام وجاي بتجاهي بس عبالك مو هو وجه مبين الحزن عليه بشكل مو طبيعي عيونه حمر والسواد طاغي عليه وصل يمي باوع عليه حجيت...

..البقيه بحياتك،هز رأسه ونطاني تَمام وراح بعده ما شفته منا الثاني يوم بالفاتحه يالله بين لگيت واگف على الحايط لازم رأسه عرفته صعد ضغطه بسرعه عصرت ليمون ودزيت جاهل صغير يودي اله وصل يمه رفع رأسه وباوع بتجاهي وأخذه من الطفل وشربه وبعده رجع بره...

دخلت جوه ورحت يم غنى نفس وضعه تصحه تگعد تبجي وتلطم منا لحد ما توگع بحيث ايده صارت زرگه من الابر الاضربه اله بالاخير حسين ما قبل تضل گال أخذه للبيت اذا تضل هنا شو شنو يصير بيه وصُدك أخذه وراح مشت الايام وخلصت الفاتحه والوضع نفس ما هو امير حيل تاذه على وفات أمه بحيث شكل عنده سكر ويوميه متخربط واگع...

تماشت الايام وتعودنه على الوضع منا لحد ما اجه يوم الاربعين ونعاد نفس اليوم من جديد وكانو توه ميته بس الي زاد الوضع سوء هو غنى والولاده المبكره الي صارت عده كل احنه دخلنه أنذر بيومه بحيث عفنه الفاتحه ورحنه للمستشفى كله مخبوصه عليه حسين أمير ايسر اني وميسم وسيف كل احنه موجودين لهناك وجان تجي شهد هي ورجله هم ضلينه ننتضل مقابل صالت العمليات وحسين كل ساعه وعاط بوحده من الممرضات ويهدئون بي الولد منا لحد ما طلعت الدكتوره وطمنتنه عن وضعه الحمدلله ولدت بسلامه بس الطفله كُلش ضعيفه وضعه تعبان...

حسين حيل تأثر من سمع الخبر وما قبل يشوفه اله من تصحى غنى يالله...

غنى:فتحت عيوني بالم واني اتذكر الي صار صحت بصوت مبحوح ،بنتي اغيد بنتي وينه بنتي،درت وجهي ..حسين وين بنتنه وينه؟

ميسم: حبيبتي ما بيه شي بنتج بس شويه وضعه تعبان وخله بالخدج بين متصير زين لتخافين..

غنى:اكيد؟

ايلاف:يي حبيبي اكيد ليش نكذب عليج.

غنى:درت وجهي عليه،حسين ليش متغد شفت بنتنه؟

حسين:لا نتضرتج حتى اني وياج نروح نشوفه سوه

غنى:تمام

ايلاف:مر سبوع وطلعت غنى من المستشفى بس ضلت بته بالمستشفى يوميه مرت عمو تبات يمه والصبح حسين هو الي يظل بعد ما تعلق بيه حيل صار وين ما يروح يسولف بيه ويصوره ويراويه لغنى وهاي تگعد تبجي تريد تشوف...

مشت الايام وصارت بسمله زينه وطلعت من المستشفى جانت فرحت غنى بيه مو طبيعيه عبالك شايله طير وتحامي عليه خاف يطير من عده طبعاً بعد ولادة غنى خلاه تنسه وفات أمه وتلتهي بنته ومن بعده كلمن رجع لوضعه الطبيعي تمشي لأيام وميسم طلع بيه ولد ودتحضل للطفل لان على اي ساعه تولد ...

مرت سنه على وفات ام امير لكن امير ضل الحزن مرافقه على أمه وشايل ذنب موتته رغم كل الي صار بس يحمل نفسه المسؤوليه شگد حجيت وياه وسولفت انو هذا قضاء الله وقدره ولازم نكون راضين بي بس ماكو اي نتيجه...

الى أن صرت ما الح عليه وبعد ما احجي لو أتوسل بي انو ينسه بعد بكيفه لا هو الي قابل يقتنع ولا الي راضي يسمع مني ف اني خليته على مزاجه الى أن حس على نفسه أو خلي نگول وعه على حاله وتصرفاته الي ديسويه رغم كل هذا جنت محترمه قراره وأبد ما حجيت أو غثيته بكلمه بالعكس اترحمله وما جبت طاريه بشي موزين رغم هواي اذتني بس اگول اكو رب هو الي يأخذ حقي منه...

جابت ميسم الطفل الرابع وسموا زين جانت فرحت جهاله بيومه متنوصف وهمه يستقبلون اخوهم الجديد وشلون محاوطي من كل الجهات...

صوفي:مومااا اتس بيوتفل.

ميسم:يا عمري انت الحلو

ازل:مومااا شوتت ياكل تبس؟

ميسم:لا حبيبتي مو هسه بعد من يكبر

غزل:مومااا؟

ميسم:ها حبي

غزل:هاي ثون طلعت من بطنج؟

ميسم:هاك ستلم ،حبي سولي عمليه وطلعوه

صوفي:هااا نعني مو من حلگج؟

ميسم:ضحكت على حجيهم لا امي مو من حلگي يله شو گوموا شوفوا ابوكم اجه گوموا خرب يومكم شگد يسألون...اجه صوفي يم الطفل عود يشاوره

صوفي: شوف زيوني اني لايح اشوف بابا شنو جاب واجيبهم اني وياك ناكلهم OK؟

ميسم:واكِ ماما اوكِ روح يالله،بس اريد اشوف شلون راح اگضيه وياكم...

مرت الايام وبيوم صادف عيد ميلاد امير قررت اسوي اله مفاجاه واغير من المود مالته شويه رتبت الصاله وأجهزته الكيكه رحت بدلت وتمكيجت وعدلت نفسي وتمتم يركض على الكيكه يريد ياكل الكريم واني اركض وراه اريد ادبدله قنعته بس يجي بابا أنطي قتنع وكملت كُلشِ سمعت صوت هورن عرفت اجه وگفت وره الباب اني وتمتم حتى نفاجئه فتح الباب ونصدم بالنفاخات وجان نطلع اني وتمتم ونغني happy birthday to you وهو يباوع عليه ويضحك...

ايلاف:كل عام انت بالف خير

امير:هاي شنو المفاجأة الحلوه...

ايلاف:هاي تمتم سواه حلو مو تمتم؟هز رأسه بيي

امير:اخخخ فديت تمتم حبيبي يتذكر عيد ميلاد بابا واجه شاله

تَمام: بابا اريد اكل كيكه

امير:هههههه حبيبي هسه تعال وين السچينه؟

ايلاف:هاي بس اوگف لحظه، علگت الشمعه ...تمنه امنيه بالاول!

امير:باوع عليه وعيونه تسولف قبل شفايفه اجه يمي وحاوطني بايده وبده يلقي كلمات الي حسيتهم اغنيه تداعب مسامعي...

كل عام وانتِ امنيتي..

كل عام وانتِ نهاية مسيرتي..

كل عام وانتِ حبُ الأزلي..

كل عام وانتِ مفري في زحامي..

كل عام وانتِ سندي عند نهياري

كل عام وانتِ اجمل ما خلقه الله ملاك بهيأتِ انساني..

.. بعد شعري من على وجهي،خجلت منه وحسيت وجناتي احمرت رغم مو اول مره يتغزل لكن الخجل دوم يهزمني نزلت راسي اشتت نظري عنه لكن ما خلاني انزل راسي رفعه ولتقت نظراتنه مره ثانيه وهو يتفحص كل سانتيم بوجهي توقف محط أنظار على عيوني وكأنوا يگول ...غارق انا بالليل عينيكِ

..ثم أكمل جملته الشهيره ( احبج هوه ريتي)..

الى هنا وتنتهي الصفحه الاخيره من قصه وقد كانت صدفة أن شاء الله استمتعتوا بيه وتونسته من خلالها اللقاكم بقصه جديد مع السلامه

دمتم برعاية الله وحفظه

غدير عبدالله