رواية #وكر الأشتر الفصل الثامن وستون 68 - بقلم الكاتبه سمو العراق

بارت ١٧
رواية .. وكر الاشتر
بقلمي .. نور سمو العراق

💔💔💔💔💔💔💔💔💔💔💔💔💔💔

ولك حنيتلك يل ماتحس بيه
وبعدها اسوالفك تلجمني ليليه
صرت بعدك صور ومعلگة بحيطان
وغير اتراب هجرك مايمر بيه
رحت بس ذكرياتك ماخذتها وياك
وغيري استوطنوك واني منفيه
حسن ابن الديوانيه

سولين

من الانسان يكون سند من انتي ما تخافين من كل شي لان اكو اسد بظهرج يوكف بوجهه كل واحد يحاربج ويطلع حقج من عيون الكل

من فجأة تحسين انتي خسرتي هذا السند خسرتي كل هالرجوله وقوة الشخصيه والكلمة لماشيه هنا انتي تنكسرين الف كسره

اني ضكت الكسره مرتين وضكت خسران السند مرتين مره من امي سندي ضيعوها عني وخلوني اعاني شهور وليالي خلوني بجيت عليها دم

والكسره الثانيه وفقدان السند مره ثانية من طلگني الاشتر حسيت نفسي تايهه اني تعلمت على دلاله تعلمت على حنيته وتعلمت على حبه اليه انصدمت بيه وحسيت بالفقد من كسرني وتركني طلكني كدامهم كلهم

بس لحد الان يساعدنه لحد الان موجود بطريقي لحد الان يحل مشاكلي ومشاكل اخواتي واهلي اني شلون اجازيهه شلون احاول انساها شلون اخلي كبريائي ينساه ويتخلى عنه اصعب شعور دا اعيشه

اني حبيت كل شي منه حبيت حنيته حبه وعطفه ولطفه اليه حبيت كل شي بيه حسيت بيه ابويه وعوضني عن حنان ابويه عوضني عن كل شي

جنت اباوعله كاعد يدخن ابد ما خله عيني بعينه اببد مباوعلي جان عادم وجودي جان عادمني اصلا مو بس عادم وجودي احس گلبي يرجف احس روحي تتكسر تكسر

اراقب تحركاته اراقب سوالفه عصبيته عنفه وعنفوانه كل شي شلون يدخن بشراهه وكل شويه وباوع الحارث وكان حارث عدوه اللدود

جنت ارجف ومشاعري ترجف وين جنت و وين صرت جنت اتدلل عليه جنت اتعصب واحجي  وانهار جان يضحك عليه ويهديني ويجاوبني ببرود

قررت من امي ترجع اراسله اتشكر منه على كل شي سواه وياي اتقرب منه وارجع المياه المجاريها الي يحب يضحي اني احبه لازم اضحي وانقذ حبي تجاهه لان اني مو عبالكم مؤدبه وفقيره لا هم طغيت وتخبلت وغلطت وغلطة كلفتني هواي ونزلتني من عينه بس والله يظل اعز انسان سكن گلبي

واني اصلا والله من غلطت مجنت بوعيي لان والله متعصبه ومنهاره ومتدمره نفسيا والله صعب يكولون امج عايشه وهو الشاهد على معناتي وعلى مأساتي تجاه امي

بس والله اني يعني مو اغتصبني ما حجيت شي صدك زعلت بس بعدين من عرفته مغيب عن الوعي عذرته هو ليش ما يعذر يعني بس هو عنده كرامة واني ما عندي

صرت كدامه شلت ابني لعبته بسته جنت اريد الفت انتباهه بس هو ابد ولا رفع عينه عليه احس روحي حايط ماكو هيج انسان يعني كل الكلام الي جان يكوله اليه طلع جذب كل كلامة رياء وخدعه

بلعت ريكي وحفظت باقي كرامتي وكعدت انتظر وياهم على احر من الجمر

اجت افيان اخذت ابراهيم مني وهي تلعب بيه وتضحك وياه مشت من كدامه وهو رفع عيونه الها كلها .. افيان جيبي ابراهيم خليني اشووفه

ابتسمت واجت عليه انطته اله هو طفى جكارته وبوسه بخدوده ويلعب بيه ويحجي وياه

غصه بداخل صدري شلون هيج يعني ليش اصلا يعني من جنت اني شايلته حتى ما اهتم لابراهيم يعني حتى لابنه بحضني ما يحن عليه

بس من اخذته افيان حن عليه واخذه منها شلوون صعبه يعني قصده ابني وعندج ما اريده اييي هذا قصده

مسحت طرف عيني دموعي مدا اسيطر عليها منا امي ومصيبتها ومنا الاشتر وكره وحقده تجاهي

شهكت بصوت مسموع واني اصلا ادري وصلت المسامعه بس هو خبيث ولا اهتم الي ولا حتى دار وجهه اليه

اجت عمتي عليه وحضنتني كالت وهي تهدي بيه .. يعمه يروحي شبيج ليش تبجين هاي امج وراح ترجع الج

شهكت مره ثانيه ورجفت ..ما اكدر اصبر والله احس گلبي ديتكطع

وكف وعدل سترته وصاح على افيان كلها .. تعاي بوويه اخذي دخلي جوه لا يتمرض

اخذته منه وهو طلع برا ظل واكف وحت وراه مسيره مو مخيره كلبي يرجف عليه اني شبيه ليش هذا الخبال تجاهه ماكو وحده مثلي ما عندها كرامه ليش هيج دا اسوي بنفسي ليش دا ارجف عليه ليش هيج ياربي ليش

وكفت وراه مباشرًا هو جان واكف بباب الشارع دار وجهه ديدخل صرت بوجهه من باوعلي بسرعه شتت نظره وابتعد بسرعه مشه بنص المنطقه وسوه روحة ديخابر واني اقسم بالله وجلاله ان هو جذاب ومديتصل بس يريد يتهرب مني

دخلت جوه واني اداري فشلتي وبخت نفسي بغضب .. كافي يا حقييره يا زماله كافي احفظي مي وجهج وتكدرين كل شي تسوين انتي مو شويه حتى ترين بالقليل انتي هووواي سولين لا تسوين بروحج هيج

رديت على نفسي .. ما اكدر والله ما اكدر هو ابويه الروحي عشت وياه سوالف حلوه وقبلت حتى بسلبياته وكل شي يجي منه

جنت بشخصيتين عبالك عندي ازدواج بالشخصيه مدا اعرف شبيه تخبلت ساعه ابرر النفسي وساعه ابرر اله

واخير شي بعد صراع بين عقلي وقلبي قررت اعتذر منه كدام الكل وهسه بس يدخل اعتذر واني الممنونه

دخل هو وبانزعاج وقلة صبر رجع خابر وهو يكول.. عايد شسالفه وين صرت تاخرت

خالي جان كاعد ويهز برجله متعصب ويكرط باضافره و وكف وهو يكول .. اني رايح مستحيل اظل هنا وبعد الي سويته لايار ونكرت جميلي ورادت بناتها

اشتر مجاوبه وجان منقرف منه بعدها كله .. براحتك

خالي طلع من البيت متعصب ويدردم واني وكفت كدام الكل وحجيت بصوت عالي ... اشتررر

حارث جان اول واحد يباوعلي ولونه مخطوف وهم كلهم اقل ردة فعل منه

قفل موبايله وباوعلي بغرور كال .. تفضليي

بلعت ريكي وتنفست بصعوبه .. اشترر اني اعتذر منك كدام الكل الكلام الي طلع مني والله مجان عن قصد ابد ما اقصد الاساءة الك ابد والله بس ما اعرف جنت منهاره ومتعصبه اصلا اني بحياتي مراح الكة انسان مثلك وهاي اني اعتذر الك كدام الكل

جاوبني ببرود وهو يكول .. معذوره

جنت اباوع للعيون ناس حاقده وناس متعاطفه وناس ما تريدنه نتصالح بس من بعد كلمته هو نهى كل شي وحتى ما انطه مجال للمعاتب

اسناني وحده تطك بالثانيه والحسره متكسره بگلبي سكتت محجيت شي ولا زدت على كلامي بعد هو انطاني كلمة وحده خرسني بيها

بس حسيت بفشله وحسيت بحزن مستحيل اول مره اعيشه

اندك الباب وفرفحت روحييي شتميت ريحة امي وعطرها وروحها ايي والله اجت امي واني اسمع صوت عايد وهو يكول .. صفاء على كيفك نزلها لا توكع

......................

جيهان

ضجت حيل من تصرفات سولين ومن انهيارها وخبالها على الاشتر والأدهى من هيج هو لابسها وممعترف بيها ولا مقلد الها جانت عبالك مثل المجنونه عليه وهو بارد من ناحيتها

هذا الشي حييل قهرني وخلاني بصراحه اكره الاشتر خطيه ليش هيج يعاملها هسه هي غلطت بس مو مال هيج يعاملها والله خطيه

اعتذرت اله كدام الكل بس هو خبيث حسسها ابد ما مهتم لاعتذارها ولا مهتم لآي كلمة حجتها بحقه شكد صعب هذا الشعور الي دتعيشه اختي

ظلينه كاعدين وما نشوف الا امي وصلت طرنه مثل الحمام فرينه من مكانه محتارين منو توصل قبل الثانيه

فتحنه الباب وشفناها هزيييله عيونها طالعه وظاله جلد وعظم و وجهه شاحب اصفر كاعده بعربانه مال مقعدين

من شفناها تلاثتنه انهرنه انهيار مو طبيعي نبجي ونصرخ سولين حالتها خاصه جانت مرعووووبه وعبالك موقف امي رجع عليها ظلت تصررخ ولازكة روحها بالحايط وترافس برجليها

واني وافيان حضنه امي ونبجي ونصرخ وهي حاضنتنه ولامتنه باديها رفعت ايدها وهي تكول .. يمه سولين تعالي يروح امج تعااي ولج لا تعذبيني وهيج تصرخين

وكأن ثنينهن انعاد عليهن موقف القتل والي صار بالماضي ثنينهن شاهدات على جريمة عامر وثنينهن تاذن ودفعن الثمن غالي

جابتها عمتي الها هي جانت ترجف وتصرخ وتمشي بحذر حتى مشي ما تكدر تمشي وعيونه متعلقه بعيون امي

امي بجت وهي تكول .. تعاي ولج يمه تعاي لحد الان منظر عيون براسي ما يروح من بالي شفتج اني شفتج شلون تخبلتي عليه كلت بنيتي ماتت مجان هامني جرحي وسوالف ابوج جان هامني حركة كلبج عليه يبعد امج

وصلت عند امي ونزلت على الكاع تبوس بيدها ولازمة رجليها .. يمه يروحي والله مدا اصدك ما اصدك انتي عايشه اشوفج واحضنج واني لجنت اتحسر على تراب من كبرج ... لا يمه اسمه عليج من الگبر اسم الله

مسحت امي على شعرها وتبوس براسها .. كافي يروحي هاي اني يمكم استكن يمه لا يوكف كلبجن فدوه اروح الجن

حضنت امين تبوس بيه وتضمه الصدرها وهو خطيه يبجي ويدنك على رجلها ويبوسها

جان يوم علينه بألف يوم بس من بين الحزن وذكريات الماضي جنه بفرحة ما نكدر شلون نوصفها مثل العصافير ورجعنه لعش امنه نبوسها ونحضنها ما نريد نبتعد عنها

بجيت بصمت كريم جان مو هنا مشاف الفرحة الي احنه بيها بس اني مو مثله ومستحيل اكون مثله بسرعه اتصلت بيه وخبرته عن امي اول ما اجاني صوته بجيت بفرحة .. كريم امي وصلت امي اجت واخيرا كريم مدا اصدك واخيرا رجعنا لحضن امي

جاوبني بفرحة وهو يكول .. الف مبرووك يروحي الف مبرووك ان شاء الله يارب الله يطول بعمرها ويخليها خيمة على راسكم وعد عليه بس ارجع اذبح خروف على سلامتها وان شاء الله اعزم الكل حتى اشتر وبلكي  اصالحهم

رديت عليه بضحكة .. الحمدلله يارب شكرا لك متقصر يله اني رايحة لماما مدا استوعب الي صار والله مدا استوعب فعلا هاي الرحمة الي نزلت من رب العالمين الف الحمدلله والشكر

رجعت عند امي جنه كلنه ملتمين وكاعدين يمها نبوسها ونبجي ونحضنها

سولين جانت نايمه بحضنها كلتلها .. ماما تدرين اني صار عندي ولد ههه ماما يخبل يشبهج

ضحكت امي وهي تكول .. اي يعمري ادري كالي الاشتر جيبي خلي اشووفه يعمري صرت بيبي بجال بناتي يله جيهانه شدي حيلج نريد طفل

ابتسمت ونزلت راسي .. يعني دريتي بيه تزوجت كريم ؟

جرت نفس وزفرته وكالت .. شلون ما ادري اني متابعه اخباركم اول باول اشتر فدوه لعينه ما قصر كل شي جان يوصلي عنجن جانت روحي هايمة عندجن والله ما اصدك والله رجعت وتكحلت عيوني بشوفتجن

افيان ركضت جابت الها ابراهيم وهي شالته تبوس بيه وتحضنه وتلاعبه

بعدها باوعت على تسواهن وهي تكول .. ما قصرتي خيه الله يوفقج ويسعدج تطلبيني عمره وحجه اني نذرت نذر الج بس ارجع لبناتي زيارتج على حسابي

نفخت تسواهن الدخان من شفايفها وهي تكول .. خيه بعد روحي ما سويت شي صدك بناتج برابيك وما يكعدن مع احتراماتي الج كح .. بس شسوي جنت وياهن وياهن خاصه افيان تطلك عشر زلم ولا تكعد راحة

ضحكت امي وحضنت افيان كالت .. لا افيان معدله ماكو منها اشتر يمدح بيها ويكول هي شالت اخوتها من بعد ما تزوجت سولين

افيان نطت من مكانها وهي تكول ... اي بالقران ماما صرت احف واهلس مكسور ظهري نهار كله وهنه مخلصاتها يتمعشكن وينوحن مثل الفزاعات وصرت ابيع خلطات شني من خلطات مستعجلات على التبيض ماكو هيج

باستها امي وحضنتها .. يبعد امج ما خليتي بيتي ناقص وبحاجة ابوجن الكلب انوب بانيته كل شي وصلي لاشتر جنت اضحك واتمنى اشوفج وانتي قايده العصابه

سولين ضحكت وهي تكول .. صدك ماما والله افيان زعيم العصابه

هزت ايدها افيان وهي تكول.. شلون عصابه ما ينطلع بيهن لباب الحمام ربج اجتن تسواهن وعانتني على الحياة الا على اخواتي من زمان مودعه ورايحة للجنه

كملت بضحكة وهي تكول .. اني مثل ابوي ضامنه الجنه هيج حق الله يكول هههه

ضحكنه عليها وفعلا افيان بيها رس من عامر وكل شويه وكتلتها تسواهن ابد ما يترافكن اببد انوب كل شويه وتكافشن وتسواهن حالفه اذا عرست افيان وخلصت منها تركص بطرگ الداخليات

للصبح ظلينه كاعدين ما مصدكين بامنه عشنه وياها احلى شعور ما نريد ننام ونطير على رواحنه هيج لحظات حلوه واحنه بكنف امي وبعطفها وحبها النه

.................

افيان

من بعد ما اجت امي جان حارث واكف خرب يومة يطير العقل من الراس ماكو هيج شخص تافهه بعني احنه وين وهو محتار بسولين هسه كون سولين تقبل بيه وتفضها بس عزا لا نسيبي وين يروح

وجانت كوثر ضايجة متخبله شلون تشوف اهتمام حارث بسولين وهذا السي خبلها واحسها ندمانه لان رجعت امي

ما اعرف ليش اني شكيت بيها هي الي راسله الرسائل لجيهان وخبرتها عن امي وغايتها تخرب بين كريم و جيهان وطبعا هي ما قصرت خربت بينهم

الحمدلله شويه الجبيره عاقله لا سولين الغبيره جفصت جفصه دمرت الاول والتالي وسودنت نسيبي عليها والله لابسها لبسه انقهرت عليها وشويه صرت ضد نسيبي

اجت كوثر كعدت يمي وهي تكول .. شكد مكروه حارث بس يباوعلي ويتغزل بيه ييع لعبت نفسي يعني من كل عقله اقبل بيه شنو هذا الزباله حتى واحد يقبل بيه

رفعت حاجب بسخريه ... امممم جااا ياهو جان يركض وراه قبل شو احسج عياره ههههه

بلعت ريكها وكذبت كلامي كالت ... لا مستحيل اني ابد ما حبيته يمكن لحظة طيش بس مو معقوله اتزوج واحد ما عنده شخصيه مثل حارث

هزيت راسي بقبول اايد كلامها اريد بس افتك منها ومن سوالفها الماصخة

كملت كلامها وهي تكول .. هو شكد يتحرش بيه وبين حبه اليه وحتى كال اني ما حبيت وحده بكدج وحتى سولين جانت مجرد حب عابر وانتي الحب الحقيقي

ضحكت .. اي وتعقيبا على كلامج جان يكول سولين لو تزوج عشره وتتطلك اتزوجها بس على العموم احنه ابد ما نريد منه يتزوج اختي لان بصراحة مو مال نخسر نسيبنا

جاوبت برفض ... بس هو ما يريد يرجعها الاشتر يعني بصراحة كلمتها حييل قاسيه وجرحته والله ما اعرف شلون سولت الها نفسها وخلتها غلطت عليه لعد واحد مثل الاشتر ينغلط عليه والله لو عندي أدللة دلال اعيشه ملك بس الظاهر اختج جانت منتظره الفرصه حتى تتخلص منه وترجع الحارث

رفعت حاجب .. حارث بيش الكيلو وهسه انتي تقارنين نسيبنا الكفوو بحارث مع احتراماتي الحارث شجاب الثرى على الثريه

عفتها ورحت هاي شبيها شكد خبله وتافهه ماكو هيج وحده حقوده وغيوره بحيث تريد سولين تخسر من الصفحات وتريد تطبق عليها هذا المثل الي اسمه لا حظت برجيلها ولا اخذت سيد علي

بس تولي لا ان شاء الله سولين ترجع للاشتر لان مو مال يعوفون ابنهم برهومة هيج متشتت

رحت كعدت يم امي ممصدكة والله ابد ممصدكة شلون هيج يارب شنو هالرحمة الحلوه الف الحمدلله والشكر الك يارب

...................

سولين

من بعد ما رجعت امي واستقرينه جانت امي بس كاعده متتخرك احنه نحاول وياها ونساعدها وخالتي تسواهن تسبحها وتلبسها لان احنه ناعمات ما نكدر نشيلها وندخلها لحمام

جانت خاله تسواهن حيل حبابه وياها تحب امي وصارن صاحبات هي صح خاله تسواهن عصبيه بس اببد ما تتعصب على امي وتحبها وتحترمها

واكثر عصبيتها ويه اختي افيان هي وافيان مثل الفار والبزون وحده ما تطيق الثانية وهماتين وحده ما تتخله عن الثانيه

اجيت كعدت يم افيان واني ضايجة رجعت للجامعه بس مدا اكدر اتخطاه بحياتي

كلتلها .. افيان ساعديني اني مدا اكدر اتحمل يعني شلون احنه نظل هيج زعلانين اني مو اعتذرت منه كدام الكل بعد شسوي اكثر من هيج

جاوبتني وهي تكول .. تدرين شنو مشكلتج انتي مشكلتج هوايه تلحين ومدامج هيج ما عندج صبر وتخلين الامور طبيعية مستحيل يصير براسج خيير

باوعتلها بحيره .. ما ادري مو بيدي احس نفسي مسحوره احس نفسي مو طبيعيه ممعقوله اني هيج احبه لج والله ما جنت هيج واني من زمان كتله ما احبك بس هسه شبيه ما اعرف دا انجن اتخبل والله تخبلت

جرت نفس وزفرته كالت .. تدرين شنو الان داراج وقدرج واحترمج رجعج لجامعتج وعشتي وياه ايام حلوه ومره شي اكيد تتخبلين عليه بس انتي غلطتي من تجاوزتي عليه هسه اني مراح الومج لان الحاله الي جنه احنه بيها حالة تعبانه مو بوعينه

لزمت ايدها .. زين اني هسه اراسله اكتبله رسائل اعتذر منه وهيج اسولف وياه ونضحك شويه وبعدين اعاتبه ويعاتبني

ردت عليها بعدم قبول.. لج لا ولج لبسي مو مال هاي السوالف هسه يكول هاي ميته عليه تريد تموت فإذا سويتي هيج راح يعاند بالزايد وراح يطغى

جاوبتها .. زين شلون اني ما اكدر اصبر اكثر من هيج

افيان بغضب .. شبيج سولين ترا سحلتي كرامتج زياده عن اللزوم هو صح نسيبي وكفو واحبه بس ترا مصختيها شصار عليج هي هيج هسه انتم بينكم ولد ترا مو معقوله هيج احسج فقدتي حتى شخصيتج وبعدين هو مو معقوله يعني يعوف ابنه هيج متشتت اكيد بس مجرد درس الج مستحيل يتخلى عنج

سكتت مجاوبتها خليتها راحت وفتحت موبايلي دخلت على الواتساب مالته شفت ناشر صورة نسر مدري شنو مفهمت شي

بعدها ما اعرف شلون بالغلط اتصلت واني ماعت روحي ما عرفت شلون اتصرف ظليت الطم عزاااا عزااا يبووو. هسه يكول ميته عليه هسه يكول حتتخبل عليه هسه شلون ياربي شلون والله مدا اصدك ماكو خاصيه تحذف الرسائل والاتصالات الي تكون بالغلط

ظليت محتاره وظليت انتظره فتره كلت هسه يكول ليش متصله او يشوف الاتصال او كل شي يسوي مية الف فكره اجت براسي بس انتظرت اكثر من اللازم وهو لا اتصل ولا كال هاي ليش تحارشت بيه

بحيث شكيت بنفسي ممتصله تدوهنت كولش قررت اعوفه هالفتره وانتبه الدراستي وابني ونفسي وامي لان حيل هملت نفسي بالفتره الاخيره

كعدت الصبح سمعت امي تخابر بيه وهي تكول .. يعني شنووو انتم اعتقلتوا علاء والممرضات والسستر الي وياه يعني هم سبب الي صار الي

كملت كلامها وهي تكول.. حسبي الله ونعم الوكيل يارب ليش هيج ليش والله الظلم ظلمات يوم القيمة فدوه ابو ابراهيم اني بشاربك حقي اريده تاخذه منهم ذول عذبوني ودمروني وشوهوها السمعتي اريد حتى عامر يتحاسب وكل واحد دخل بخطيتي وعذبني وخله الناس تحجي عني و وصلني لهذا الحال اريده يتعاقب

ركضت يمها بسرعه وكعدت فتحت الصوت وكعدت اتسمع بحماس رد عليها وهو يكول ..ام امين حقج يرجعلج ان شاء الله هم هسه تم اعتقالهم كلهم وان شاء الله راح ياخذونهم للطب العدلي حتى يتم فحصهم اذا كانوا مرضى نفسيين او يتناولون المخدرات والكحول وان شاء الله انطيج علم بكل المستجدات ومن يصير يوم المرافعه انطيج خبر

ردت عليه امي وهي تكول .. فدوه الكلبك ابو ابراهيم اني بصراحة ما اعرف شلون اجازيك انت جنت سند لبناتي وابني وما ضيعت حقي وحقهم وجمعتني بيهم ولميت شملي وخلصتني من عامر النذل وخليت تسواهن بطريقي اني ما اعرف شلون اجازيج

كرصتها وشاورتها كليله .. ارجعلك سولين

ضربتني على ايدي وغلست عن كلامي وطلبي منها

تشكر منها وقفل الخط باوعتلها بخيبة امل .. ليش ما كلتيله مثل ما كتلج جانت فرصه حتى نستغل الوضع

ردت عليه.. لا هو يرجعج من كيفه هو لحد الان ما فتح موضوع وياي اصبري ولا تستعجلين

عفت امي ورحت كلت خلي اسويلي حلاوه بجدر مخسوف راسلته كتلت هلاو اشتر شلونك كولش اشكرك على موقفك ويه ماما
ربي يوفقك ويسعدك وجدا اسفه عن كل شي بدر مني

انتظرت يفتح الرسائل يجاوب بس هو ابد لا فتح الرسائل ولا حتى شافهن احس ديحلربني حرب نفسيه صرت اتمنى يراسلني اتمنى يحجي كلمة حتى لو يحجي ويعاتبني ويرزلني اريده بس يجاوب ماكوو

اجت افيان وحجيت الها عن الموضوع ضحكت عليه كالت .. ذكرتيني بهذا المقطع مال اموت بالشتيمه هسه من كلتي حتى لو يرزلني تذكرتج مدري ليش هههههه

كشرت عن ملامحي عزااا شكد حقيره هاي مو مال تواسيني شلت ابراهيم وابتعدت عنها بسته وحضنته يربي احسه يشبه ابوو هو يمكن ميشبهه بس اني من كثر ما الح احسه يشبهه هسه يشبهه ما يشبهه بس خلي نرجع مو حتى حمضنه

ضجت حيل وكل سويه اتفقده اذا دخل على الرسائل وشافهن او لا وهو ابد حتى ما باوع بيهن رغم هو متصل  ليش هيج خبيث بس لا شافله شووفه

بجيت مقهوره على نفسي فكرت أني لأي هوايه وصلت روحي شكد مقهوره على سولين بس والله محد شاف اشتر بعيوني ما اكدر اتخطاه ابد ما اكدر

........................

صفاء

جنت كاعد اني وعايد وسالي الاشتر عنده موعد بالطب العدلي لان هم رادو ياخذون ولد تحسين هناك يسوولهم فحص كامل لان هم ادعوا الجنون وهم مجرمين يعني شي اكيد لازم الهم فحص كامل هناك والادله تتصدر مناك

جانت سالي تتواصل بالموبايل وتكتب سريع كالت .. هذا حساب يراسل بيه ما اعرف لمنو بس اثار فضولي لان كل شويه ديراسل ويريد احجي وياه

جاوبها عايد بعدم اهتمام وهو يكول .. جاوبي

هزت راسها بقبول وظلت تكتب من كل كلمة تكتبها هي تحتد ملامحها اكثر حسيت بيهد حست بنشوه وخبث وانتصرت على شي مزعوم بداخلها

عدلت شعرها وشمرت موبايلها وهي تكول .. شنو الاشتر شو تأخر

جاوبتها بعدم معرفه .. والله ما اعرف هسه يجي هو عنده شغل ويه ولد ساهر

جرت نفس وزفرته وتضحك مدري شبيها قلقتني سألتها بفضول .. شنو مكلتيلي منو هذا الي يريد يحجي وياج ولو فضول

ضحكت وهي تكول .. ههههه لا ماكو شي طلعت صديقه قديمة

سكتت مجاوبتها بعدها كالت ... سولين ما رجعت للاشتر

جاوبتها ... لا بعدهم والله ان شاء الله يرجعون

صحكت بسخريه وهي تكول .. بصراحة وحده مثلها همجيه ابد ما تلوگ للاشتر هو وين وهي وين شكد ما حاول يسويها ادميه بس هي تظل همجيه طالعه لابوها

رفعت ايدي كدام وجهها .. لا هنا وحدج صدك جذب حتى لو مهما كان بينهم تظل مرة اخوي وما اقبل اي واحد يحجي عليها

رفعت حاجب وهي تكول ... على شنو ترا ما حجيت غير الحقيقه وحده حتى ما عندها احترامات اصلا ما ادري شلون تزوجهه اشتر ولا تليق بيه ابد

عايد وكف وهو لازم موبايله طلع برا وهو يخابر وهي باوعتلي وبثت سمها كالت وهي تضحك وتفح بغضب ... وين اكو مره تكول الرجلها انت نعال ما تسوه

فتحت عيوني مصدوم هاي شلوون عرفت لاااااا انلاصت اشتر كلش جان حذر ما تدري سالي شلون ورطه

نهاية البارت .. يتبع

كونوا انتم كونوا بخير ... احبكم 💔

لا تنسوا التصويت والمشاركة بكم نكتمل ❤️

نور سمو العراق ك

.................