رواية #وكر الأشتر الفصل السادس عشر 16 - بقلم الكاتبه سمو العراق

البارت السادس عشر
رواية.. وكر الاشتر
بقلمي. نور سمو العراق

💔💔💔💔💔💔💔💔💔💔💔

‏أحب يا الله هؤلاء البُسطاء، الذين يقدمون كلماتهم الطيّبه و رائحة المسك تفوح من أفعالهم الشجيّة، هؤلاء الذين لا يحملون في قلوبهم الضغينه، يبعثون السرور لمن حولهم دون أنتظار أي جزاء، لا يغضبهم قلّة السؤال و يضعون الأعذار قبل سماعها، هؤلاء يا رحيم أجعلهم في جَنَّات النعيم.💔
• موجوع قلبي | ⌯

...............................
جيهان

كل البنات غريزيا مراهقات وكبار وصغار وبكل مراحل العمر يحبن المديح والكلام الحلو

وخصوصا من الاب لازم نسمع هيج كلام حتى ما ندور من شخص بخارج نطاق البيت يكول النه كلام حلو ويعطف علينا

وترا الوحده بينا متحتاج اكثر من هالكلمات انتي حلوه حيل انتي ذكيه انتي قويه انتي بطله انتي شاطره هاي كلمات تعزز الثقه بالنفس رغم بساطتها

نفسيا كلام الاب الايجابي يعزز الثقه بالنفس بشكلٍ كبير بس للاسف ابويه حيل عدم شخصيتي من بعد ما تعرضت للحادث دمرني دمار نفسي جان حيل يقرف مني لهذا السبب حسيت نفسي داخل قوقعه ما اكدر اطلع منها

ما اتذكر بيوم من الايام ابويه سأل عني او اني يا صف ولا اتذكر بيوم اخذني للطبيب وعالجني ولا سالني عن صحتي ولا شجعني على دراستي وقدملي دعم معنوي

جانت امي سوده عليه دكوله انطيني فلوس اجيبلها ملابس للمدرسه يردها بعصبيه.. اكعدي واسكتي منين اجيب ابوك لو انهب بطليها وانجبي شراح تفيد الدراسه اول وتالي تتزوج والراتب يحظنه العزيز

ولا فد يوم بجيت وحسيته مقدر مشاعري ويعرف بظروفي ولا حاس بيه جان مجرد ما يسمعني ابجي واتولول يظل يعيط عليه.. كافي بت الكلب كافي شكد تبجين واذا احتركتي طبج مرض ظلي عنسي على گلبي منو يشيل همج غيري

واكثر عقده نفسيه وهي الي اثرت بيه وبشخصيتي هي مشاكل امي وابويه وعرايكهم وزعلهم بحيث صرت اخاف ينجمعون سوه والخفت منه صار اخر شي كتلها ودمرنه وياه

والي خلاني اتعلق بكريم هو عاطفته وحنيته عليه من زمان وهو هيج يميزني او يمكن اني حبيته من دون سابق انذار شفت بيه حنية ما شفتها بأبوية

شفته عكس ابويه تماما نظيف وياكل بترتيب واناقه مرتب ريحته دائما حلوه  اضافره مقرضه ونظيفه وبيض يهتم بنفسه حنين على اخته مو مثل ابويه كتل عمتي واحذ ورثها

صرت ما اشوف غيره حتى من اطلع بالشارع احس ماكو زلم بس هو رجال بحبيته بكل جوارحي وطاقتي واعرف مستحيل اتزوجه لان اني اعرف اذا كلت احبه يكولون انتي وين وهو وين فرق السما عن الارض هو تعبان عن نفسه وانتي اصلا دافنه نفسج

ما اعرف شبيه اليوم حيل مشتاقه اله ومن اجانه ذاك اليوم سيطر اكثر على تفكيري واحسه هو منقذي من ابويه اني اذا ما تزوجته مراح اتزوج غيره احبه مو بيدي والله مو بيدي كل ما احاول انساه الگة روحي احبه واعشقه اكثر صار مثل الهواء بالنسبه اليه

انذكرت امي قبل لا تموت واني نايمة على رجلها وهي تمسح على راسي كالت بمرح وحب.. نسوي العمليه لجيجي الحلوه وتتزوج التتمناه وغصبا عن الكل وازفج بيدي واحلى عروس

تخيلت نفسي واني ابتسم لابسه بدله بيضه وكريم لازمني ومبتسم تخمست اسوي العمليه واحبه ويحبني واكون متحرره من قيود العمليه

لان اني ابد ممحسسته ان اني احبه ابد بس اشوفه استحي وادنك وما احجي وارتبك واسمي عمو واريد بس انهزم وهو ما يعرف اني اسوي هيج لان احس روحي ضعيفه ومحلوه وما اريد يشوفني بهيج وضع وهو عباله اني استحي منه واريد انهزم

دخلت افيان عبالك اعصار كالت.. جيهااان صدك تحبين عمو كريم كبر حتى كبر اذا تحبي شكو تصيحين عمو من عمه لعماج

باوعتلها مستغربه بعدها حجيت استنكر الموضوع... لا ما احبه

تخصرت وتباوعلي بنظره بس الله يستر منها معاجبها الموضوع كالت.. دنجبي جذابه انتي اعترفتي كلتي احببه روحي اعترفيله كليله احبك يا سيد الرجال

اردفت بعدم اهتمام... عادي حبي كريم قبلنه نصير نسابيه بس هاي حنينه ما احبها هي وكحلتها جنها فرعون باخر ايامه مدري شلون حتحملها بس مالج شغل المهم عمج كريم دگيله ناعم

رديت عليها بانزعاج... اهوو وخري مني مراهقه مستهتره

هزت ايدها ،،، ههه انوب مراهقه ولج المراهقات يحبن يعشكن واني كل شي ماكو مشاعري ثلاجه من وره ابوج ولج انتي شلون حبيتيلج زلمة ابوج كرهني بكل الزلم ولو هو مو رجال

سديت حلكها.. ولج انلصمي لا يجي ويسمعج شكد متخافين

بعدت ايدي من حلكها وجرت نفس... لا والله احجي صدك بس تدرين جيهان حيل مشتاقه السولين ما ادري ليش اليوم گلبي يرف عليها بس كون بخير ورجلها ما ظالمها مثل ابوي

دمعت عيوني وكتمت عبرتي .. واني هماتين حيل محتاجه الها اريد اشكيلها وتسمعني وتحس بيه اريد اشوفها هي بخير رجلها زين وياها لو معذبها ما اعرف احس حيل ظالمها

جاوبتني وهي تهدي بيه.. لا تخافين سولين تربيتي محد يندگ بيها ولسانها شطوله يمه شكد صلفه شكد جانت تكتل بيه بس اني هم جنت اكتلها

ضربتها على ايدها بقهر.. جنتي خبيثه وياها شفتي شلون راحت من عدنا وظلينه نتحسر عليها وبحاجتها

جاوبت بقرف.. دكافي كافي عوفي ضميري ما خذله غفوه

تنهدت وجاوبتها.. احس اريد ابجي مدري شبيه گلبي احسه مقفوص

لزمتني من خدودي وهي تغير الجو.. حبيبي الحلوو لج انتي تجننين شنو لون العيون الحلو گومي احفج اله اطلعج تچتلين چتل يچبيدي

ضربتها على ايدها بانزعاج.. ايع شكد اضوج من هاي مصطلحاتج منين تجيبيهن

جرت نفس وزفرته.. شسوي غير مرافگة العجايز والمزوجات احف واهلس بيهن وانظف بشره وين الخايسه تجيني تعلمت بس شسوي العيشه تريد يجيجي خيه

ابتسمت عليها وشويه ودخل ابويه جان جو بارد وممطر وبيتنا مكشوف ميتين برد ونفط ماكو يستلم نفط ويبيعه وكاتلنه البرد شوكت ما نجي كل وحده بطانيتها وكاعده

اجه كال بكل عصبيه... وين صندوك الطماطة بنات النعال بنات الزماااااال طلعن الطمامة لا اشعل الخلفجن كح..

ردت عليه افيان بعصبيه... شمرته بالزباله كطن وشمرته بالزباله

هو تخبل ظل يلطم على صدره ويصيح بصوت عالي جمع امة محمد علينه... بوووووويه بووووويه صندوگ طماطه جايبه بتلث الالف تشمرنه بالزباله اليوم اسويجن طماطه

لطمت على وجهي واني ابجي.. عزااا بعينج افيان صخام الصخمج افيان ولج شلون تشمري متعرفي انتي

هو راح يركض يجيب الصونده وافيان قفلت الغرفه اجه يركض وهو يفلش بالباب بكل قوته ويضرب الباب بالصونده ... بنات الزمال افتحن الباب افتحن البااااب لا بالقران اكسره

افيان بعصبيه.. ادري هي طماطه وخاست شنسويلها هسه لو جايب صندوك خيار بيها باب وجواب على الاقل نسوي طرشي

جاوبها بغضب... جااا ما سويتي الطماطة معجون يالشاطرة

تفلش الباب تفلش حسيت الغرفه حتوكع علينه كد ما يضرب قووي لزمت افيان واني ارجف وابجي لج افتحي الباب خلينه ننكتل ولا توكع الغرفه ونموت عزا بعينج

جاوبتني بقلق وردت عليه... لج انتظري هسه يدك ويروح شنسويله

ظل يصيح... بسيطه بسيطه ظلن بالغرفه هسه اعرف شلون اطلعجن

شويه وما نحس غير المبرده اشتغلت علينه والجو بارد انصدمنه شلون خبيث شغل المبرده وايرها برا وترسها مي والجو باردحيل وهي هاي الغرفه ماخذه رطوبه وتنز مي تموت برد صارت وبطانياتنه خفيفات ما يدفن ظلينه نرجف من البرد والمبرده سحبت برودة الجو برا كله احس عيوني جمدت وخشمي صار ثلج

وامين المسكين ظل يعاطس من البرد هذا ناوي يقلتنا ويجي واحد ويكولي بطرانه تفكرين بكريم هو غير اريد بس اخلص من الظيم

ظلينه ساعه على هالوضع انوب الكهرباء ما طفت ظليت اعاطس واكح بردت حيل كلتلها.. افيان شلون نظل هيج

راحت فتحت الباب وصاحت عليه.. اكلك انطيك فلوس صندوك الطماطه وتطلفي المبرده خطيه امين مات من البرد

هو اجاها يركض كلها..جيبي

راحت جابت خمسه وانطته كلتله... هاك وزياده الفين

اخذ الخمسه وهو يبوسها الحمدلله والشكر رزقكم بالسماء وانتم متدرون هيج حق الله يكول

طفه المبرده وطلع واحنه ظلينه كاعدين صافنين هذا من كل عقله انوب صار يطمع بفلوس افيان خطيه سوده عليه نهار كله مكسور ظهرها على الحفافه وتنظف وحتى شيره تسوي وهو يجي ياخذهن على الحاظر واذا موجود بالبيت ياخذ فلوس من النسوان قبل لا يدخلن خاف ينطنهن لافيان ومتنطيهم اله

شوكت نخلص ما اعرف والله مصيبه و وكع على راسنا امي جانت ويانه محاسين هسه زاد الحمل وافيان طفله تحملت اكثر من طاقتها

.......................

سولين

شفته جاب مدري منو ودخله عليه واني انهارت اعصابي متت من القهر صدك ما يستحي هذا انوب يريده يظل يمي عشرة ايام اني جنت متوقعه امه اخته عمته تجي بس مو يجيب رجال ويجيني ظليت الطم

حصلتلي كفخه من على وجهي حيل انهضمت عفتهم ورحت واني دخلت بنوبة بكاء فضيعه واتلمس بخدي من ضربني

شهكت واني حاضنه نفسي وارجف وابجي دا اتصنع القوه بس مد اكدر اسوي شي انوب جابلي اخوه هسه يطلع نفسه وهماتين بس المصايب واني اتحمل رفس وضرب وتجوي

مسحت دموعي بباطن كفي واباوع للغرفه اقل ما يقال عنها فضيعه عبالك گبر احس نفسي مدفونه بالحياة تفتقر الكل شي الدفا الاطمئنان مجبوره اعيش بيها وكأنها نفس الغرفه الشفتها بالحلم

براكين من الالم اجتاحت صدري جان الم يعذبني حتى الاعماق وينعاد عليه بذكريات اليمة تنهال عليه مثل سوط من نيران

غمرت الكآبة صدري بمجرد ما شفت اخوه دخل بيتنه واني اتذكر امي وشلون انغدرت وانقتلت مظلومه من اقرب الناس الها الي هو ابويه  بسبب كلام الناس ودخول اطراف بحياتنا

دارت الافكار ببالي ممكن هذا يغدر بيه يمكن يعتدي عليه
ويقذفني بتهمه تخلي اخوه يقتلني مثل امي

ممكن يسكر ويدخل اصدقائة ويعتدون عليه وتصير عليه سمعه محلوه وتتدهور نفسيتي وانقتل بدم بارد واتلوث وأكون منسيه مثل امي وينغلق ملفي

الف فكرة عانقت دماغي واستحوذت على تفكيري وين اروح وين انطي وجهي ثقه ما عندي بإي رجال بالدنيا طردته لا فاد اخوه الكلب صار ضدي الاشتر صار ضدي

كرهت الاشتر كره مضاعف فوك كرهي اله شلون يخليني ببيت وحدي ويه اخو وين المنطق هذا ما عنده غيره خنزير الله مسخه لا قلب ولا مشاعر

حسيت بي استوطن الغرفه من شفته غزاني الألم باوعتله بقهر وخذلان حسيت گلبي تگطع حرفيا جنت اهمس بيني وبين نفسي .. لا تدخل طرف ثالث لا تكتلني ما اريد شخص ثالث منافق مثل ابو سعدون لا تصير مثل ابويه لا تامن

اتقرب مني وهو يقبض على جسمي بأحكام كال.. شبيج ليش هيج انتي خبله

جان جسمي كله يرتعش بهيستريا فضيعه والدموع ماليه وجهي... ليش جبت اخووك ليش باجر اموت باجر كل شي يصير ما اسامحك اكون ذنب بركبتك ليش هيج تسوي بيه والله ما سويتلك شي والله

تقرب مني واحتظن وجهي الناعم بجفوف اديه ضاع وجهي باديه مسح وجهي من الدموع ورد عليه بهدوء... ليش تبجين والله ميسويلج شي و وعد اذا فات من باب غرفتج اكسر رجله

شهكت من البجي وگلبي يرجف.. بب باج باجر العالم تحجي عليه وانت تصدكهم والله عيب عيب اخوك داخل وطالع من لبيت اخذني وياك حباب اخذني وياك.. ( لزمت اديه بتوسل وحجيتها)

لزم اديه حيل وعصرهن رد عليه .. ولج منووو اليحجي والله ما رايد روحه الي يطري اسمج على لسانه هاي المنطقه كلها انتي تاج على راسها وكلها تروحلج فدوه ليحجي يجني على نفسه صدگيني

نزلت عيوني واني ابجي ... اذا انت ما يهمك الحجي اني يهمني وبعدين ما عندي ثقه باخوك شلون تأمنه عليه

جر نفس وزفره كال.. بعدين تغيرين نظرتج عنه والله هو تربيتي ما يوم غدرني رغم شكد حاولوا يغروا بس جان حزام بظهري وابد ما طاح

هزيت راسي برفض.. احزام الك مو الي سندك مو سندي ينتمي الك مو الي

رد عليه بهدوء...بس انتي تنتمين الي

صفنت بوجهه دا اريد افهم شيكول ليكون عباله حاله من حال سيارته وهي مالكني عقلي ميعرف يفسر

رد عليه بسرعه لان عرفني فهمت عكس تجاة الجاذبيه كال... يعني شي خاص بيه واي شي يخصني مستحيل اخلي اي شخص حتى لو جان اخوي من امي وابوي يضره  او يتقرب منه فهمتي

عقدت حواجبي مستهزئة.. يعني شنو سجلتني باسمك

ضحك كال .. هه اي صرتي سولين الاشتر مو سولين عامر

جاوبته بعدم اهتمام.. ما تغير شي نفس الظيم

رد عليه... تأدبي

سكتت مجاوبته وبعدها انهديت .. شووف اخوووك اببد ابببد لا يتقرب مني ولا يحجي ويايه ولا يطلب اي شي خلي يعتبر نفسه مأجر غرفه بالبيت يعني حاله حال الجيران وهااا ترا اني مو حيه لا عبالك بس ما اثق وانت تعرف من اجيت لحد الان مشفت شي حلو وبس المصايب وعالم كلها منحطه لهذا السبب خلي بعيد عني

حط ايده على راسه وهو يفركة بوجع.. دخت ياربي دخت ولج اتمنى افتح حلكج واطلع المسجل البالعته عندج قابليه للكلام مو طبيعيه

جاوبته بحزن .. محروك گلبي والراشدي لحد الان اذاني تون منه

تقرب مني وهو يبوسني بشغف.. عمي وهاي بوسه واعتذر

كورت ايدي وضربته على صدره واني امسح شفايفي... لا تبوووووس لا تبوووووس لا تبوووس اعتذر بالكلام من غير بوس كول العفو كول ان شاء الله تنكسر ايدي اذا بعد مديتها عليج كول بعد ما اعيدها بس لا تبوس

رد عليه ببراءه.. شسوووي ما اعرف غير هاي الطريقه

تعصبت ... تعاقبني تبوس وتعتذر تبوس مو سالفه هاي

رجع باسني مره ثانيه.. هاي اعتذر عن البوسه الاولى

عطت بيه بعصبيه... اكرهك

رد عليه وهو يعض شفته كال بحالميه.. أعطنِي قُبلة عن طريق الخطأ " ثمُ أعتذر بقبله اُخرى

جاوبته.. شعنده نزار قباني اليوم

ابتسم و راح فتح الباب ورجع باوعلي كال... راح اشتاقلج

رمشت بعيوني ممستوعبه وضعه وگلبي يدگ بسرعه بسرعه لا مستحيل ما يأثر بيه مستحيل ادري بيه جذاب وشهد على جريمة ابويه ضد امي وما سوه شي گلبي حيطلع من مكانه وبخاطري أساله ابويه ليش قتلها بس خايفه اخاف من الجواب رغم عندي ثقه بأمي بس ما اثق بابويه ويمكن يألف تهمه باطلة ضد امي ...

باوعتلهم من الشباك شفته كاعد هو واخو مثل الصگور الحره ويحجون باندماج يدل على مدى قوة علاقتهم

عفتهم ورحت باوعت الوجهي بالمرايه الموجوده بباب الكنتور الي مفلش ونص الجامه مكسوره صفنت ... حقييير الله يكسر ايدك ان شاء الله مطبوعه اصابعه بخدي شلون جابني براشدي طير عقلي هاي ايده لو يضرب بيها كافر يسلم

مسحت على خدي وتمددت على الجربايه بملل صايره من اضوج انام وهذا انسب حل حاليا

.......................

جاستن

بعد ما رجعنه كريم ديلتحق ويرتب بملابسه وديحضرهن اول ما دخلت غرفته كعدت على الجربايه وتمددت

كال بعصبيه.. خربت الفراش اكعد عدل ولا عندك ترتيب

ضحكت واني ادخن.. دكافي يمعود عوف الأناقة والترتيب كول الصدك عجبتك ايو

من دون ميباوعلي وهو يعلك سترته وتنهد.. خوش بنيه مبيها شي

جاوبته.. احسها مناسبه الك دارسه ومثقفه ومن عائلة محترمة

رد عليه .. اي وكدر اخلص من حنان وبلاويها واحتمال ادا تزوجت اطلع ببيت الوحدي ما اكدر اعاشرها هاي

هزيت راسي بقبول... زين ميخالف ليش ما نكول لابويه عليها ويطلگها

ضحك كال.. ما اعتقد يطلگها هاي داهيه تطلع من زروف المنخل هسه تگوله هو يتحارش بيه وتطلع نفسها شريفه عفيفه

كعدت بهمه... زين انت ليش ما سجلتها مو جانت تتصل بيك

نفخ بضجر... لك اعرف صوتها ودلعها ومياعتها بس ما دكول منو اني تظل تراوغ وتكول تعرفني بس ما اكدر اكولك لا تكون مبادلني اخاف تفضحني وترجع تبدل الخط وهيج مشتغلتني احظرها وترجع من غير خط فخليني اتزوج واستقر حتى تبعد عني

جاوبته..افضل حل وهم البنيه احسها حبابه توكل وبيها الخير

رد عليه.. الله كريم

اندك الباب ودخلت كوثر وهي تبتسم كالت وهي توجهه كلامها لكريم... بابا يريدك بالاستقبال

عقد حواجبه.. خيير ان شاء الله شكو

ضحكت.. كل خيير كل خيير

خلت وراحت واحنه رحنه وراها رحنه لكيت ابوي كاعد وهو لابس دشداشته وعركشينته ويسبح من دخلنه ابتسم بفخر وهو يكول.. هلا بولدي شلونكم يابه

تقرب منه كريم وباس ايده واني كذلك كعدنه وهو يضحك و وجهه مستبشر بالخير كال والضحه ماليه وجهه.. صدك الي سمعته

عقد حاجبه كريم بتساؤل.. شنو شسمعت

ابتسم كال... كوثر حاجتني وكالت صديقتها خوش بنيه واني هم اعرفها وانت مبدئيا موافق بيها بويه هاي ساعة السعد يوم اشوفك عريسوتقر عيني بيك بويه شاب گلبي واني ما شفت واحد منكم عريس

حنان انصكعت وكفت وكعدت بنفس اللحظه و وجهها صار اصفر وعيونها تشنطت هي وكحلتها

ام حسن كالت بفرحة... صدك والله ايـــــــــو شلون بنيه حليوه ومؤدبه ومثقفه ودارسه تلوگ الكريم واهلها خوش ناس ابو كريم زين ما اختاريت

ابويه رد عليه بلهفه.. هااا بويه كريم شگلت فرحني بويه لا تكسر بيه

جر نفس وزفره كله.. اني راح التحق وانت يابه اسال عن اهلها واذا خوش ماس خلي تروح ام حسن من يوافقون ان شاء الله اني من ارجع من شغلي اروح وتم الخطوبه

هلهلت عمتي ام حسن وهي فرحانه و وكفت وهي تبوس بيه..كللللوش جبناها مجهزه هي وشهادتها كلللوش والله حبيتها هالبنيه

ضحك عليه وهي كل شويه وباسته وتبارك اله وحنان لزمت راسها كالت.. كالت راسي راح اموت صعد الضغط مدري شبيه

خلت وراحت و وكوثر ميته من الفرح وخابرت صديقتها وانطتها هبر باجر تروح هي وعمتي وابوي يسال عنهم ومن يرجع كريم نخطب

......................

سولين

اليوم العزيز يديح مدري وين يروح انوب يطل عشر ايام هو اكيد شوف وين يطمس عصابه شي قابل يروح الجزر المالديف والله يا الله

شفته كاعد بالحوش بصف عود الكهرباء وينظف بسلاحة مقابيله طاوله خشب والمسدس مفسخه وبخاخات ثنين وفرشه مثل مال اسنان وكاعد ينظف بيها وكل شويه ورش من الماده الموجوده ويفرك اجزاء المسدس بالفرشه

طلعت هو رفع عيونه باوعلي ورجع مركز بشغله من دون ما يحجي ويايه

وكفت مقابيله... بعدك مرايح ؟

رد عليه ببرود...لا منتظر حجي اديب اودعه

جاوبته باستهزاء... شنو بعد ما ترجع عاد اكتب بيه وصيه خو ما اظل سنين منتظرتك ومضيعه شبابي

باوعلي بنظره حاده كال.. لا تخافين راجعلج

باوعت للمسدس.. شدتسوي ناوي تقتل منووو؟

رد بغرور... اعتقد هذا الشي ميخصج تمام بنيتي

رديت عليه بسخريه... وليش ما يخصني مو عشتو زوجي

ضحك باستهزاء كال.. وشمحصل من الزواج ظال بطرگ السمعه

غيرت الموضوع .. اخوك وين ؟

رد عليه... عنده شغل

جاوبته باستفزاز.. شنو ارهابي مووو

رد عليه بغضب... شلون هسه افلش راسج بالمسدس

باوعتله بنص عين... ميصير واحد يتشاقه يعني كله عندك تفليش وتدمير

جاوبني بخبث...تسكتين مني لا اگوم ابوسج

رديت بغضب... ساكته

كمل تنظيف السلاح وهو يسحب اقسام بس موجهه على المطبخ يعني مو عليه كتله ... احب اجرب السلاح بس ما اعرف

سالني .. اعلمج

هزيت راسي بقبول

كال تعالي اكعدي يمي

تقربت منه وكعدت بس شويه بعيد منه حط ايده وره ظهري كمزت من مكاني... هاي شنووو شو لطشت بيه

رد ببراءة.. جااا شلون اعلمج ؟ غير هيج شبيج

سكتت لزم ايدي وهو يتحسسها سايرته وانطيته مجال كال.. منو تسحبين اقسام ومنا تضغطين على الزناد وباعي هذا السهم تكدرين منا تخلي ينقفل ما يرمي وبالوسط من تخلي يرمي طلقه طلقه وهنا السهم من يصير على جهة اليمين يصير رمي عشوائي افتهمتي

هزيت راسي ... اي اي فهمت سهل

لرم خصري وهو يتحسسه بسخافه كال ... ايي حيل سهل

نزلت ايده من خصري وخزرته كتله.. بله اجرب لوحدي

لزمت السلاح وهيئته وبعدها وجهته عليه كتله... الإقناع مع تهديد السلاح مو معناتها افرض رأيي عليك بسرعه طلگني

ضحك كال.. علمته رمايه فلما اشتد ساعده رماني

رديت عليه.. تؤتؤ تؤ ترى مدا افرض رأي عليك بس دا اقنعك تطلك واذا ما طلكت مخك حيكون لازك بالسكف وانت بكيفك ما اجبرك اني ولا دا أفرض رأيي عليك

سحب المسدس مني بحركة سريعه ما استوعبت الا المسدس بيده كال ببرود ... تؤ تؤ تؤ السلاح خطر بيد الاطفال يضر بالصحه

بلعت ريكي بخوف.. ترا دا اتشاقه وياك

رد عليه بنفس البرود .. اي عادي فاهم هرموناتج

فتحت عيوني مصدومة من كلامه وعفته ورحت وهو بعدها انتظر حجي اديب ودعه وراح من دون ما يجي يسال عني او يودعني

اوووي طبه طوووب عساس حموت من الاهتمام عليه بس اموت واعرف وين راح وشعنده يظل عشرة ايام هو خلي يروح اني ما اهتم ابد اصلا احسن لان من يجي اخاف وتنشد اعصابي من وراه وحركاته مو راحه

..................

رنا

رحت البيت جدو كهلان كالت كوثر تعالي ضروري دنروح نخطب الكريم وتعالي شوفي العروس ويانه

تحمست كولش احب سوالف العرسان واروح اشوف العروس وانطي رأيي بيها مع العلم كوثر دزتلي صور البنيه جانت حلوه وشكلها لطيف

لبست بنطرون اسود وقميص طويل سمائي وشال بيجي وحذاء بيجي وصلني حارث ورجع

اول ما دخلت لكيت كوثو والحجيه ام حسن محضرات نفسهن وجاستن يلبس بساعته باوعلي وصوفر كال... اوووويلي اول مره اشوفج حلوه

جاوبته بغضب.. خاب دروح اني رمز الانوثه والجمال والدسومة جني زلابيه لا بالقران جني دليميه بالقوزي

عض شفته بذوبان ... بشرفي صدك

كشرت عن ملامحي وخليت ودرت وجهي خلينه وصعدنه بالسياره وهو وصلنه كالت كوثر... أبويه سأل عنهم كلها الجوارين تحمد بيهم يكولون اخلاق وادب وخوش ناس مثقفين ودارسين منو وارجعوا

وصلنه نزلنا عند بيتهم ما شاء الله بيتهم تترأسه حديقه كبيره مزينه باجمل وانواع الورود وبالوسط نافورة على شكل سمكه شي حلو وراقي

دخلنه للاستقبال جان دزاين حلو وراقي يدل على رقي اصحاب البيت واناقتهم وذوقهم الحلو بالاثاث

طلعت الام جانت لابسه تراك بنفسجي وشعرها رافعته ليفوك ونافخه شفايفها وخدودها وشعرها اصفر نوعا ما المره حلوه ومهتمه بروحها ولابسه حجل برجلها

كالت... اهلا وسهلا تفضلوا داده تفضلوا زارتنا البركه

كعدنه على التخم وهي راحت جابت عصير وكيك وحلويات واجت ظيفتنا كالت.. اعذروني عن التقصير بس والله الخدامه مالتي سفرتها واني تعبانه مد اكدر اشتغل

ردت عليها بيبي ام حسن كلتلها... لا كلج خير وبركة نعمة من الله

كعدت وهي تتنهد .. خدامتي شلون بنيه نظيفه وحبابه وامينه هي من بنغلادشيه بس سوده حيييل وابني يخاف منها يكول ماما تخوف ما احبه لهذا السبب اني مردتها اخاف على ابني ينرعب منها

بيبي ام حسن جاملتها... يااا كلش معطبه

جاوبت وهي تتنعوص... اي والله سوووده حيل

بعدها حجت بيبي ام حسن كلتلها .. تدرين يا خاله احنه جايين على بنتج آيات حمدت بيها كوثر وانتم اكيد تعرفون كريم ولد تشهد اله الوادم اخلاق وادب وهو مهندس ومتمكن وان شاء الله الي بي خير يتقدم

ردت على بيبي كالت... اي كالت ايـــــــــو كولش زين ومثقف وهماتين هي دائما تحمد بكوثر

ام حسن ابتسم .. بلا امر عليج يصيحلها نشوفها

وكفت وهي تمشي على كيف جنها وحده منعسه راحت شويه ودخلت وايو وراها

انصدمت من شفت ايـــــــــو جانت لابسه فستان صوف اسود بينصل لحد الركبه وهاينك وردانه طوال وشعرها رافعته من كدام بف والبقيه منزلته وبارمته بشكل حلو وانيق ولابسه تراجي عراض ستيل مدري فضي ومخليه مكياج طووخ وحمره مارونيه مخمليه ولابسه عدسات لونهن رمادي حلوووه حيل ما شاء الله

سلمت علينا العطر يفوح منها وابتسمت بهدوء وكعدت وام حسن تصلي وتسمي عليها... يمه فدووه يمه شنو هالجمال ما اظمن كريم على هيج جمال

جانت تبتسم وتنزل راسها وامها تبتسم وتباوعلها

كالت ام حسن .. شتامرون احنه حاظرين

جاوبت امها.. ان شاء الله ما عليكم امر بس هذا الشي يحجون بيه الرياجيل بينهم واحنه نتشرف بيكم

كعدت يمها واني اكرصها... يمه شنو هالجمال ولج منين مشتريه هاي العدسات

ردت ببتسامه.. من تركيا

رديت عليها... هااا اي خوش عود من ترحون ادز بيدكم هههه

ضحك كالت... ان شاء الله

كوثر اخذتها وظلت تاخذ وياها صور كلتلها .. حدزهم الكريم

هي جاوبتها بصوت دلوع وتريد تسحب الموبايل منها... لااا عفيه عيب لا كوثر ما اقبل

فريت شفايفي شكد عياره هسه يطلعن متفقات ويرغبن بالولد بيها

ردت كوثر... لا شبيج والنبي اكوله دزيتهن من دون علمها شبيج قابل شنو اكوله هي تدري وهماتين اشوفج لبابا ومرة بابا حنان

ابتسمت .. خرب هسه حنان تنجلط تصير بيها سكته قلبيه

بعدها خلينه وطلعنه واخذن موعد من يجي كريم من دوامه يشوف ايو جعلني ايو وام ايو على هالظيم أبو ايو ما يريد مره مخلصه علوم سياسيه لسانها بطول لسان البرلمانيات ههههه

رجعنه للبيت وحنان صاعد الضغط تريد تموت شاده راسها وتون عياره صاعده الغيره مو الضغط ما اعرف سوالف النسوان

.........................

صفاء

بعد ما راح الاشتر ظليت بالبيت بس ما ادخل بس باليل اخاف منها خبله حيل ولسانها طويل عاد تكفيت شرها

دخلت باليل اثار انتباهي باب غرفتها مفتوح شويه وينبعث منه ضوه مثل ضوه النار اثار فضولي بس خوفي منها خلاني اكنسل كل شي واسلك طريقي الغرفتي

لكن استوقفني صوتها وهي تناجي ربها بدموع وحزن وكفت استمع الها وقادتني وياها الطريق للاستقامه والصلاة بعد ما اجتازيت حدود الله بالعصيه والطغيان

حسيتها دكولي الله يغفر لكل مذنب ويغفر لكل تائب والحمدالله ربي رزقني بنفس لوامة ما اكدر على العصيان ودائما يخلي بطريقي ناس صالحين مثل حجي اديب ويمكن هاي البنيه طريق للهدايه

جان دعائها حلو وهي تردد وتبجي .. اللهم إني أمسيت أشهدك أني أحبك، اللهم إني أعوذ بك من هشاشة الروح وإيمان الهوى وزيغ ألسنتنا حين نخاطبك.

يارب اني اعلن توبتي ورضيت بالقدر واغفر لامي واجعلها من الاولياء والصالحين نور قبرها واجعله روضه من رياض الجنه ولا تجعله حفرة من حفر النار

ياربي ابد ما قنطت من رحمتك وتوفيقك فياربي اغفرلي اخاف بيوم من الايام جزعت وقنطت وحزنت انت اعلم بحالي وانت المستعان

يارب فرج عني واجعل المكان الي اني بيه امن وامان وريح گلبي وانطيني الشجاعه والقوه وياربي خلصني من الوجوه الحاسده والمنافقه والخبيثه يارب من ارادني بسوء فارده

باوعت عليها شفتها كاعده وهي لابسه ثوبها وحجابها وهزيله حيل وشمعه مخليتها بصحن كدامها وتدعي ربها وتبجي والغرفه ضلمها ومحاوطها فقط نور الشمعه كالت بنحيب ..رب اعوذ بك من شر الناس ومكرهم
وخبثهم وغدرهم رب توكلت عليك

تركتها ومشيت لغرفتي واني افكر بيها البنيه مهمومه ومبينه مغدوره من البشر تبجي وتنوح وتريد الله يخلصها من خبث البشر

استغربت واحد مثل حال اخويه متشتت محد ينطي مره الا الي يعرفه هاي البنيه منين جابها مبين عليها اصيله مو تافهه وسافله وين لگاها خطيه حسيت بيها مظلومه اهلها وين عنها ليش هيج زوجوها وتبهذلت لان احنه اصلا حتى مكان ما عدنا من مكان المكان

سرت بداخلي حفنه ايمانيه و وكفت ورحت توضيت واني اصلي واصلا ما اعرف يا فرض اصلي لان بحياتي كلها مراكع ولا ركعه وحده بس اعرف اصول الدين وأركان الايمان وحتى اعرف كيفية الصلاة حجي اديب علمني بس ما مصلي

ممت على الجربايه بعد ما صليت واني احس بعبق ايماني زار روحي وتجلى بصدري فعلا الصلاة راحه واول مره احس انام واني مرتاح وفرحان واحس منتعش وامري متيسر

كعدت الصبح مديت راسي من الباب اخاف منها خاف طالعه من دون حجاب وتهجم عليه انوب جفجيرها شكبره

تحمحمت واني اصيح .. احد موجود هنا اطلع محد موجود

مجان اكو اي رد خليت وطلعت برا غسلت وكلت خلي اطلع بسرعه اتريگ برا

طلعت من غرفتها جنها داعشيه لابسه حجاب اسود منزلته على عيونها ومصعدته لحد حلكها وانتبهت عليها كل ما تشوفني تسوي هاي الحركه ليش ما اعرف

فاتت من يمي كلتلها بقلق .. صباح الخير

ردت وهي تخشن صوتها مثل لبوه مفترسه ... صباح النور

دخلت للمطبخ بعد ما طلعت واني لبست قمصلتي وللفاف وجاي اطلع اندك الباب رحت فتحته .. جانن تلث بنات وحده كصيره وسمينه جنها دعبله و وحده ناعمة وضعيفه و وحده طويله خشنه

كالن .. مرة الاشتر موجوده

نزلت راسي .. اي اي موجوده تفظلن

دخلن وهن يبسبسن حسيت بيه شي كعدن بالحوش واني رحت الها بالمطبخ جانت تسوي جاي دكيت الباب باوعتلي بشراسه وعقدت حواجبها

ارتبكت وبلعت ريكي.. ها هاي بنات اجن يردنج

استغربت .. انوووب منو ذن انت شلون تدخل ناس بكيفك هذا الجنت خايفه منه شعرفك على المنطقه وتدخل بكيفك

جاوبتها ... اندري غير يكولن صاحباتج

باوعت من الشباك شافتهن باوعتلي بقرف... اني اصاحب هيج شكولات قل اعرذ برب الناس

عافتني وراحت واني فاهي عليها الله يساعدني شيخلص العشرة ايام الله يساعد الاشتر عليها عصبيه حييل وما تتفاهم بس شو احسها حبابه لازم تتروض وهي المشكله ما عندها ثقه حتى واحد يكدر ياخذ وينطي وياها يعني بس اباوعلها خزرتني عبالك كاتل ابوها

صحت عليها .. محتاجه شي

ردت وهي تتهرب مني... لااا شكرا

عفتها وخليت وطلعت هو اول ما اكعد اطلع اجي بس انام وهذا حالي وياها وكل يوم يخابر اخويه وانطي كل المستجدات

....

سولين

تخبلت من دخل الصراصير عليه هو الضاهر ما يعرفن وما يعرف هن شنو او يمكن ما شايفهن ضجت حيل هذا الجنت خايفه منه

سلمت عليهن وكعدت وهن يضحكن وعينهن عليه كالن... يمه هذا منو الحليوه ابو طول حلو

جاوبتن .. حمايه اخو زوجي

ضربتني مياده على ظهري ... عمي بعد شتردين جا مثلي حتى بعد ما اخلف طكيتيلج رجل

لزمت اديها بتوسل.. اخذي العباس عليج

ضحكت ذيج ام حواجب شيطانيه كالت.. هههه لا بالعافيه جبتلج هديه درزن استكاين بمناسبة زواجج

استغربت حجيت بگلبي ... شنو متزوجة شايله ببيت يله هم نعمه جاوبتها.. حبيبي تسلمين مقصرتي

شوشو ضحكت كالت.. واني جبتلج صندوگ بيبسي

كتمت ضحكتي گوه يربي شنو طالعه من المستشفى شكووو بس يله هاي اول مره واحد يباركلي بزواجي حتى الاشتر بنفسه مباركلي

ازهار كالت.. اني جبتلج شحاطه ام الورد

تشكرت منهن وسويتلهن جاي خرب جايات من الصبح يباركلي

كالن .. بس شو انتي مو مثل سالي عني انتي وين وسالي وين

وكفت بعصبيه ونزعت حجابي خليت ايدي على خصري.. ليش بله ليش شبيه عيني اني وين وجالي وين بشنو احسن مني عوزي طول عوزي رجل

جاوبت ميادة بضحكة... ههههه ولج غير ما شايفتها تطك بالگاع جنها بقلاوه الشعر شنو الطول شنو البياض تكتل من تفوت كلها تسلج( ينزل لعابها )

لعبت نفسي من الوصف وجاوبت بثقه... بس هو اختارني وعافها معناها اني احلى وبيه شي يجذب وبعدين تعالن هي صاحبته لو شنو

ردن .. شمدرينه

كعدت متعصبه هزن بدني انوب يكولن شمدرينه

مياده كالت... اكولج شوشو سوادي ابو گرعه صارحني بحبه لج غير متت يجننن يخبل

شوشو ردت عليها...ياااا ولج بس لا سوادي اخو دوحي

مياده بذوبان... ايييي لج يموت صح اكرع بس فد شي

غمتها... امداج امده فركج لج هذا واحد ساقط وهتلي ويشرب وابو ملاهي وما عنده سالفه ما بيها حظ وجان حتى يشرب مخدرات

مياده بزعل... ياااا عزا لا شوشو لا طيح الله حظج لا عفيه طيرتي واهسي خرب بيج لاااا

شوشو بعصبيه.. هو شنو طيرت واهسج اكولها مو راحه وهتلي ويشرب مخدرات دكول طيرتي واهسي عساه دوم طاير واهسج شسويلج

نفخت بضجر وبعدها خلن وراحن يبووو ولا ارتاحيت الهن مدري شلونهن انوب حشا خلقة الله لاعبات بوجهن لعب داكات شامات وتاتو وهاي مياده كل شويه وانرفع شالها من صدرها وطلع الوشم واني كل شويه وجريت شالها وغطيتها

انوب متقبل دكول.. دعوفي لا تغطي يمعوده خلي الشباب تستمتع باجر اموت المن يظل للدود

رديت عليها.. حرام باجر الله يحاسبج مو يستاهل وتطلعيله صدرج ما تتحملين غير الذنوب وما يركض وراج بس الهتلي والطالعه عينه لا عبالج يجيج شريف

شو هاي ظلت تضحك معجبها الكلام وخلت وراحت ويييع روحه بلا رده وهذا اخو الاستر لازم احذره ما يدخلهن مره ثانيه معايزه مشاكل اني

بس هاليام مرتاحه المخبل البربري مموجود واني منتعشه واعصابي مرتاحه ومن انام اترس دبة المي اروا واسد الباب حفاظا على سلامتي

.....................

جيهان

جنت دا انظف وافيان تحف وترجع ليوره انوب تطورت صارت تصبغ وتميش واني ملتزمة بشغل البيت من صارت تحجي ويايه وتقنعني حسيت شويه صار عندي امل ولازم اوكف على رجليه

انوب هي مصره الا تحف حواجبي واني ما اقبل ما احب دكول انتي تجننين بيضه حيل ذهبيه وعيونج صفر ومعانيج تجنن ناعمه اذا تهتمين بروحج تطلعين تموتين لان انتي احلى وحده بينه

بس اني مقبلت خاطري مكسور ما اريد بالي عند امي وعند سولين ومسيطره عليه كآبة هالفترة كولش قويه بحيث اريد اصرخ اريد اطلع

قبل احسن جنت اطلع ويه سولين من تروح لبيت جدو كهلان او ماما تاخذنه للسوك للامام الكاظم عليه السلام بس هسه ابد مطالعه صار كومه صار عندي ملل فضيع وروتين مجحف كرهت روحي شوكت واحد يشوف حياته اذا هو مدفون بالحياة والعمر يركض

كملت تنظيف البيت هو حتى من ننظفه ما يطلع وجهه يلعب النفس محفر و واكع الصبغ مالته واللبخ بس ميخالف خو ما انام على القذاره

كعدت على الدرج واني الزم ظهري بوجع انكسرت كسر انوب من تمطر نغرك لازم نكرف المي نشمره بالشارع بحيث احس فقراتي تتكسر وتهيج اوجاعي

كملت افيان واجت كعدت بصفي وهو يترفع اديها وتنشطهن بتعب كالت... يمه انكسر ظهري كل وحده وجهها بي طن شعر احرث مو احف الله وكيلج دمشن سون ليزر خرب غيرتجن

ضحكت... يسون ليزر بعد منين نحصل فلوس

تنهدت... اي والله الحمدلله اليوم جمعت خمسين الف باعي راح انطي لابوي عشره خاف يحجي وهاي الاربعين اظمها اسويلج عمليه حتى تتزوج كريم يحلووو( حجتها بمرح وهي تكرص خدي)

ضحكت ولزمت ايدها.. لا ما اقبل هذا تعبج وظهرج مكسور اجمعيهن وادرسي بلكي الله تدخلين جامعه عاد مصرف الج احسن

تنهدت .. صدك تحجين طر بالجامعه انتي حاليا محتاجه العمليه واني ممحتاجتهم ولا يهمش عود اذا تزوجتي عمر كريم وادخل جامعه اشتريلي ملابس من جيب زوجج هههه

هزيت راسي باسى واني ابتسم عليها .. والله عندج احلام

اندك الباب وهي كمزت من مكانها جنه كاعدين على ثالث بايه كمزت من ثالث درجه للارض مثل الطفله هي اصلا طفله ههه

فتحت الباب وهي تضحك.. هلا برناوي رجلج طالت علينه محتاجج عامر يكسرها الج ههههه

رنا دخلت وهي تضحك... دنجبي انتي وعامر ههههه

سلمت علينه وكعدت ظلينه نسولف كالت لكيت تعيين قريب منكم راح اتعين واذا هاي اجيبلجن موبايل صرصور نتواصل حتى انر عليجن كل يوم

ظلينه نسولف ونضحك وكل شويه نلتفتت للباب اخاف يجي ابويه كالت رنا .. يله خليني أروح اتاخرت

بسناها ودتطلع دارت وجهها علينه وحجت بحماس... ياااا صدك نسيت اكلجن الخميس خطوبة كريم ابن جدي كهلان لج خطيبته تجنن

حسيت الدنيا كلها تفلشت على راسي حسيت من الهبطه گلبي طلع من صدري وارتعش جسمي بقوووه

نهاية البارت ... يتبع

كونوا انتم كونوا بخير... احبكم 💔

نور سمو العراق

لا تنسن التصويت حتى تنرفع الروايه اذا تشوفون تستحق ارفعوها واذا لا عوفوها😉

عندي عتب وياكم على كريم 😌ترا هو ممواعد جيهان بشي ولا يعرف بحبها اببد فكري بمنطقيه بعيدا عن العاطفه😗