ولا زلت في حبل الغرام اتجوّد!. الفصل الخامس والعشرون 25 - بقلم الرنيد

. .. .

part 25
_

...
وصلت لباب بيت مزنه وهي تتلفت بخوف ودقت الباب بتخبط وسرعه..
بدت تدقه وهي تتلفت وتلهث بسبب الركض الي ركضته انفتح الباب وكان جابر الي فتح الباب قال بصدمه: ملاك؟
ملاك دفته ودخلت بسرعه وقفلت الباب وهي تستند عليه وتلهث وصدرها يعلوا ويهبط...
وخرت الشماغ عنها وطلع أيهم وقال بصدمه: ملاك!
جابر: اش بِك ملاك اش الي سويتيه!
أيهم بعصبيه: شفت يابويه قُلتَ لَك خلي ناخدها ونرجع لمكه قُلتَ لَك عيونها معمي عليهااا يابويه عاااميها الأنتقام! ..

ملاك رمت الشماغ ووخرت الثوب وانفاسها متسارعه وماردت عليهم، جلست وهي ترجف ودموعها تجمعت في محاجر عيونها أيهم ناظر ابوه
وتقدم منها جلس بجنبها وقال بخوف: ممكن تفسير للي سويتيه تراكي مررره خوفتينا لاتنكشفين من الصباح صاحيه عليهم بالحرايق انتي انجنيتي ولا ايش!؟
ملاك كتمت فمها تمنع شهقاتها ودموعها تنزل بغزاره
تقدم جابر بخوف وهزها على الخفيف بخوف: حبيبتي ملاك اش فيكي يابابا؟
ملاك ناظرتهم وبلعت ريقها بصعوبه وقالت بصوت باكي: عرف كل شي!.
أيهم بخوف: مين هوا؟
ملاك ناظرته وزمت شفايفها ودموعها تنزل
أيهم هزها بقهرر: تكلمييي اشش الهرجه مين الي عرف ميين؟؟
ملاك غمضت عيونها ببكاء: جواد كشفني!
ارتخت يدين أيهم وناظرها بصدمه وجابر مسك راسه بصدمه اكبر..
ملاك بكت اكثر وهي تضم راسها لرجولها وتبكي
جابر بعصبيه: كممم مره قُلتَ لِك لا تتهورين كممم مره!! من اربع سنوات وانتي معيشتني في رُعب عليكي كل ليلة استنى خبر انهم كشفوكي واليوم انكشفتي انتي اتهبلتي ولا ايششش؟؟؟

ملاك ناظرته ببكاء: لا تلومني!! .. انتو ما تحسون بالي في قلبييي ماتحسون
أيهم: حاسين فيكي وكم مره قولنا لك تعالي معانا وسيبي كل شي وراكي بس انتي ماتفهين؟؟
ملاك بصراخ دفته: مااافهمم؟؟ مااافهممم يوم اني ابي اخذ حق امي وابوي صرت ما أفهم؟؟؟!!!.. انت عااايش بحضن امك وابوك وتحت ظلالهم ولاتدري بالي احس فييه، من عشررر سنوات وانا هنااا اشوف قاتل امي و قاتل ابوي اشوفه متهني ولا على بااااله من عشر سنوات وانا عااايشه في تمثيليه ضيعت نص عمررري!. عشرر سنوات وانا محرومه من ابسط الأشياء كلـــــــــه عشاااان اخذ بثااري منهم، والحين يوم قربت اوصل للي ابي تقول اني ما افهم؟؟؟ انتتت الي ماتفهم الوجع الي في قلبي انت الي ما تفهم ولا تحس بربع الشعور الي بخفايا صدري انت الييي ما مر علييك يوم بدون امكك وابوك شلون تفهم حجم المعااناه الي اناا فيييها علمني شلوننن بتفهم؟؟؟ ..
جابر وقف بسرعه وسحبها: الحيين بنطلع من هنا قبل يذبحوننا.
ملاك نفضت يدها منه بقوه: ماني رايحه مكان ولاني طالعه من ذي الديره لين اطلع بروح جرراح...
جابر بعصبيه: ارببعه سنوات وانا ساييير وراكي وماشي ورااا افكاارك ومجاريكي في افكارك عشاان تاخدين ثارك بسسس انه يصير الموضوع فيه خطر على حياتك ماحسمح لك أبداً..
ملاك بحده: خذ عيالك واطلع من هنا مالك شغل فيني انا ماني طالعه من هنا لين اخذ بثاااري!!
أيهم بعصبيه دفها : هالصوت ما يتوجه لأبويه الي من سنوات وهوا يساعدك هدااا ابوكيي لا تنسين..
ملاك صدت وجههاا وجلست وهي ترتجف.
جابر جلس بجنبها وقال بحنيه: انا حاسس فيكي يابويه
وحاس في كل شي تمرين فيه لكن لازم نطلع من هنا دحييين قبل يجونا.
ملاك بلعت ريقها وقالت: مااحد بيجينا
جابر: كيف؟
ملاك خذت نفس عميق: ماح احد يعرف غير جواد وجواد شفت له حل
أيهم بخوف جلس عندها: لا يكووون دبحتيييه!؟؟
ملاك ناظرته بصمت وجابر بعصبيه دفها: تكلميي؟؟؟
ملاك هزت راسها بالرفض وقالت بهدوء: ما قتلته.
جابر زفر براحه وقال: اجل ايش سويتي فيه!؟
غمضت عيونها وهي ترجف...

#فلاش باك...

سحبت السلاح بسرعه وصوبته عليه
ملاك بحده ولكنه قويه: دامك كشفتني ياجواد ماله داعي تعيش..

صرخ صقر بكل صوته من الي صار...
انفجرت الكاميرا وماعاد يشوف شي رمى الاب توب وصرخ: الحقوووو جوووااااد
طلعوا كل الي في بيت الشعر ومنهم الشيوخ الي خافوا على جواد وصقر شرح لهم ان المجهول صوب السلاح للكاميرا ومايدري وش بيسوي في جواد..

تقدمت ملاك من جواد الي بين الوعي ولا وعي وهو تحت تأثير الصدمه جلست بجنبه وناظرت وجهه وهمست: سامحني..
رفعت يدها بسرعه وكتمت على نفسه بالمنديل الي في يدها ماكانت من جواد اي مقاومه كان لازال مصدوم لين طاح مغمى عليه بدت تسحبه شوي شوي لين وصلت للجبل وبصعوبه حملته على ضهرها وهي تطلع بصعوبه وتبكي من وجع ضهرها وثقل جواد وصلت للكهف ودخلته مددته على الفراش الي كان للعنود وربطت يديه ورجليه وخلت اللاصق على فمه وناظرته وهي تلهث بتعب ودموعها تنزل، نزلت لجبينه وقبلته وهي تبكي وقالت بهمس: لزوم اخذ بثاري معاد اقدر اتحمل اكثر وانت اكثر واحد يعيق طريقي انت لازم تبقى هنا لين اخلص شغلي مع ابوك.
وقفت وناظرته شوي وطلعت سمعت صراخ الرجال ينادون بأسمه دخلت بخوف للكهف وانتظرت كثير وهي تسمعهم ينادونه بلعت ريقها وهي ترجف ومر وقت كثير وهي في الكهف ولازالت تسمع اصواتهم وهم يدورون على جواد وصوت السلاح واضح بسبب عصبية واحد من اخوانه اطلق في الجو كم رصاصه بقهررر وهو يصارخ...
انتظرت لين اختفى الصوت وتسللت بسرعه تركض للديره
#باك

أيهم: غبيييه انتي غبييه لييه تطلعين في الليل؟
ملاك ناظرته: انا ابغى اطلع عشان جواد يجي ابيييه يبعد عنهم وعني عشان اقدر اتحرك براحتي جرااح بيموت اليوم قبل بكرره لااازم اذبحه!!! ما اقدر اتهنى بعيشتي لين اقتله وارتاح بعدها بنهج معاكم لمكه وبترك كل شي خلفي..
جابر كان يناظرها بصمت وهي توترت من نظراته
جابر بهدوء: لييه خايفه من جواد هدا اكثر من الباقين
ملاك برجفه: ماني خايفه منه ولا من غيره
جابر صر على اسنانه: اجل لييش كل هدا الي سويتيه؟
ملاك ماردت ووقفت
دخلت لداخل وجلست في الصاله ودموعها تنزل
تقدمت ام أيهم لها وضمتها، من بداية الحوار وهي تسمع لهم لكنها ماحبت تطلع بكت ملاك بين يديها وقالت بوجع: احسس اني اموت كل ما تذكرت ان جراح عاايش امووت!.
ام أيهم بحزن مسكت وجهها وهي تمسح دموعها: قلت لك انتي وابوكي جابر خلونا نعلم الشرطه وهي تتصرف
ملاك هزت راسها بالرفض: مستحيل مستحيل جراح بيموت على يدي انا على يدي انااا.
ام أيهم رفعت شعر ملاك وهي تهديها وجمدت يديها وهي تناظر عنق ملاك رفعت عيونها بصدمه لملاك وهمست: اش دا؟
ملاك عقدت حواجبها بين دموعها: وش؟
ام أيهم مررت اناملها على عنق ملاك وقالت بحده : دي اييش يااا ملاك؟!
بلعت ريقها ونزلت شعرها واحمر وجهها وقالت بهمس: تراني متزوجه اذا نسيتي
ام أيهم بعصبيه: متجووزه ايييش ياااغبييه ناااسيه داا ميين؟؟ هووا اجبرك صح؟؟؟
ملاك هزت راسها بالرفض: ما اجبرني على شي
ام أيهم بجنون: ملاااك ايش الي ما اجبرك على شيي انتي بعقلك من جدك تتكلمين؟
ملاك بعصبيه يخالطها خجل قالت: اووو وبعدين وش صاار يعني تراني ما كفرت
وقفت وسحبتها ام أيهم: ما كفرتي صح بس ترى ادا ناسيه افكرك هداا ولد جرااح.
ملاك بدموع: ادري فكي يدي
ام أيهم فكت يدها وهي تناظرها بصدمه..
دخلت ملاك وهي تبكي وخذت لها عبايه من اغراض غرام وطلعت بدون ماترد عليهم لحقها جابر ومسك يدها: بكره بنسافر مكه وانتي معانا غصبب عنك
ملاك ناظرته ببرود: يوم اطلّع روح جراح بطلع معك..
نفضت يدها وراحت عنه بينما جابر واقف بحيره وهو يناظر عنادها وحدتها في الكلام ودخل للبيت وهو يفكر في حل ما يخسر فيه ملاك..

رجعت للبيت ودخلت بدون ماحد يحس عليها وتوجهت لغرفتها دخلت وشالت العبايه وركضت للسرير وهي تبكي بكل صوتها وهي تتذكر صدمة جواد والخذلان الي شافته في عيونه: سامحني سامحني.

____________

"مسفر"

حرك جفونه وهو يسمع صوت ويشم رايحه غريبه فتح عيونه وعقد حواجبه بنعاس جلس وهو يتلفت حوله يستوعب المكان..
كان الضو شغال وريحة شي غريب ماليه المكان رفع راسه وهو مكشر وجهه من النوم الي متملكه شاف ود تطلع من باب الغرفه وفي يدها المكنسه وتكح مسح وجهه وقال بصوت ثقيل من النوم: وش تسوين؟
ود ناظرته وابتسمت لأول مره يشوف ابتسامتها تقدمت منه وجلست بجنبه: نظفت الغرفه كلها وغسلت جدرانها وأرضيتها ورجعت الفراش فيها يوم خلصت الحين صارت تجنن.
عقد حواجبه: الساعه كم؟
ود رفعت كتوفها وبذات الأبتسامه: ماادري نمت لي كفايتي ويوم فتحت عيوني قررت ارتب بيتنا.
سكت مسفر شوي يستوعب كلمة بيتنا ثم ابتسم بخفه وقال: كان صحيتيني اساعدك!
ود بأبتسامه: لا انت وراك شغل الصباح والحين يلا ادخل كمل نومك في الغرفه صارت جاهزه وأغراضنا فيها خل اغسل الصاله ذي بعدين ماشاء الله ما انكتمت من الغبره؟ طلعتها كلها هنا هههههه
ضحك مسفر بخفه وهو يشوف نشاطها والسعاده على وجهها: الا كتمتيني مير شسوي امري لله!؟
ود مسكت يده وقالت بأبتسامه: اجل انهج نيم في الغرفه.
ناظرها مسفر وناظر يده لثواني واومئ ووقف وود تناظره ومبتسمه. اخذ بطانيته ونفضها من الغبره الي طلعت عليه ودخل للغرفه وابتسم وهو يشوفها فعلاً نظيفه ومرتبة تنهد براحه وانسدح مايدري كم الساعه الحين..
سمعها تكح وواضح من الغبار وقف وطلع لها شافها تغطي شعرها بطرحتها وتلم الفرش كامل على جنب وتغسل الجهه الثانيه ابتسم وتقدم يساعدها: هاتي المكنسه بغسل من ذي الجهه.
جاء من خلفها بيسحب المكنسه والتفتت ود واصتدمت بصدره رفعت راسها والتقت عيونهم.
نزلت راسها بخجل وابتعدت عنه ابتسم بخفه واخذ المكنسه منها وبدأ يغسل ارضية الصاله. وود تمسح الجدار بأبتسامه وكل شوي تناظر مسفر الي منشغل يغسل وعلى وجهها ابتسامه خجوله...

رمى المكنسه بعد ما خلص ومسك ضهره: اااخ ضهري!
ضحكت وتقدمت منه: كسول ولا شف كيف هي صغيره.
ابتسم مسفر من ضحكتها وبدأ يساعدها ينشف الأرض بقطة قماش كانت ماخذتها من المطبخ بعد ما خلصوا ساعدها وبدأو يفرشون الصاله وود اخذت كم تكايه وبدت ترتب جلسه ارضيه في الصاله الصغيره وهي مبتسمه براحه..
دخلت للمطبخ اخذت سفره غسلتها زين وبدت تنفضها وطلعت للصاله وفرشتها ناظرت الصاله بأبتسامه وامتلت عيونها دموع وهي تشوف ترتيبها الي ياما تمنت ترتب كذا في بيت أهلها لكن ما كانت تقدر والسبب ابوها الي من ابسط الأشياء حارمهم ومتسلط على كل شي مايبي يشوف جلسه ولا يبي يشوف سفره ولا فنجال ولا شي!! ..

رفعت راسها لمسفر الي طلع من الغرفه وكان في يده ملابس ودخل للحمام" وانتو بكرامه" ابتسمت بخفه ودخلت للمطبخ ناظرته كان فيه صحون وكم غرض بس انهم مو مناسبين كثير لكنها برغم كل شي انبسطت فيهم وبدت تجمعهم في جهه وتغسل الجهه الثانيه ومن بعدها بدت تغسل الصحون وتمسح الغبره الي على الدرج الصغييير وهي تحس بسعاده لكل شي حولها..
طلع مسفر بعد ما تروش ولبس له ثوب دخل للمطبخ وابتسم وهو يشوفها شاده حيلها في الشغل قال: قاعد اسمع اذان الفجر انا بطلع ادور على المسجد واصلي فيه.
اومئت ود وهي تنظف: وانا بنهج اصلي بعد
اومئ وطلع وهي وقفت تسكر الباب خلفه دخلت للمطبخ خلصت ترتيبه وغسلت ارضيته وهي تستنشق ريحة النظافة براااحه تسكن فؤادها ابتسمت بخفه وتوجهت تزهب القهوه على النار وكثرت هيلها ولحسن حظها كانت الأغراض موجوده في المطبخ...
طلعت من المطبخ وللحين القهوه على النار دخلت الغرفه وفتحت الشنطه طلعت لها فستان كانت وضحى جايبته لها فستان اقل مايقال عنه بسيط لكنه انيق وحلو كان بللون البني بدوائر بيض صغار متوزعه على الفستان كامل كان طويل ومخصر والاكمام كانت للنص وفيها شريط صغير يرتبط في النهايه كان ضيق من الصدر ووسيع من تحت الخصر وهادئ اخذته وخذت كم غرض ثاني وطلعت للحمام "وانتو بكرامه"
تروشت بعد يوم شاق ومتعب ولكن لعل اليوم هذا الي بيبدأ ومع صوت الأذان يبدأ لهم يوم جديد وحياة جديده...
طلعت وهي تنشف شعرها ولابسه فستانها وريحتها منعشه ابتسمت وهي تغمض عيونها وتستنشق ريحة القهوه الي عبت البيت توجهت للمطبخ وقفلت الغاز وطلعت القهوه وجهزتها وجهزت فنجالين وطلعتهم على السفره في صحن صغير وابتسمت وهي تتأمل بيتها! .. تلتها ضحكه صغيره ضحكة راحه وضحكة سعاده..
دخلت للغرفه وفرشت عبايتها وخذت لها جلّال ولبسته وتغطت فيه ووقفت تصلي الفجر وصدرها منشرح...

بعد ماخلصت صلاتها جلست وهي ترفع يدينها وتدعي الله بهمس وفي داخلها ضجيج واصوات عاليه كلها مناجية لله عز وجل مسحت وجهها وابتسمت..
ووقفت مره ثانيه وهي تصلي" صلاة الإستخارة" لما طلبته من الله كانت ناوية نقدم على شي لكنها خايفه ومتوتره وتبي تطلب من الله ان يدلها للصواب..
بعد ما خلصت تصلي ابتسمت وهي تحس براحه كبيره للي تفكر فيه وهذا اكبر دليل على ان الي بتسويه صحيح.
وقفت وشالت الجلّال وطوت العبايه ودخلتهم للشنطه واخذت المشط وبدت ترتب شعرها زين...

سمعت صوت الباب يندق خفق قلبها وابتسمت بخجل وطلعت من الغرفه وقفت على الباب وقالت بصوت خافت: من؟
مسفر ببرد: هذا انا.
فتحت الباب ودخل وهو يرجف من البرد ولكنه سكن اول مادخل والتفت لها بتفاجأ وهو يشوف كل شي حوله ابتسمت ود بخجل من نظراته وقفلت الباب.
مسفر نزل يديه الي كان ضامهم من البرد وناظر القهوه الي على السفره ورفع نظره لها وهو يشوفها في طله لأول مره يشوفها فيها.
سمع صوتها الخجول: تعال ادفى بجيب جمر تدفي يديك
دخلت بسرعه للمطبخ هاربه من نظراته وهو تقدم وجلس في الجلسه وقرب التكايه منه ورفع نظراته لباب المطبخ الي واضح امامه وابتسم غصب عنه لنظافته ناظرها واضحه امامه وهي تنقل الجمر للمبخره الصغيره الموجودة كانت تدور على شي ابتسمت وهي تاخد العلبه وتبخر وطلعت للصاله ومدتها له
ابتسم واخذها وتركها جنبها وهو يدفي يديه..
جلست ود على جنب وصبت القهوه ومدت له الفنجال اخذه مسفر وعلى وجهه ابتسامه خفيفه..
كانت تفرك يديها وواضح عليها التوتر ابتسم وناظرها: فيك شي؟
ود خذت نفس وناظرته: تبقى دقايق وتشرق الشمس
عقد حواجبه ونزل الفنجال: اييه؟
ود بتوتر ناظرته وهي تفرك يديها:مدري كيف اقول لك بس احنا تعرضنا لظلم انا وياك ومابقى لنا الا بعضنا وانا.. انا.. انا يعني ودي لو نبقى متفاهمين ونبدأ حياة جديده ونقول لعل الي صار خيرة لنا خلنا نتعاون ونبني لنا حياة من اول وجديد، مع شروق الشمس تشرق لنا حياة، ودي اسولف معك يعني وزي كذا مدري شلون افهمـ...
مسفر ابتسم: فهمت عليك
ود بخجل: وش قولك؟
مسفر سكت شوي وناظر المكان وكيف غيرته ورتبته وكيف استقبلته من المسجد وتوترها وخجلها ابتسم وقال بهدوء: زين اقربي وش فيك بعيده هالون!
ناظرته وقربت بخجل وصارت قريب منه وجالسه بجنبه..
مد يده ومسك يدها وحس برجفتها بلع ريقه وقال بعد ما رتب كلامه: انا وياك صحيح تعرضنا لظلم وظلم كبير ويهد الحيل... مير مثل ماقلتي نقول لعلها خيرة ولا حنا موقفين حياتنا ولا مضيعين اعمارنا الحقيقه مهما طال الزمن بيجي يوم وتظهر وبرائتنا الكل بيدري فيها والله بياخذ حقنا وربك كريم وانتي ان كانك تشوفين فيني الرجال الي يسعدك ويقدرك فيشهد الله اني مااخيب ظنك فيني بأذن الله وان كانك تشوفين غيره فقولي لي وو الله مايصيبك مني ضر لين تظهر الحقيقه وتعودين لأهلك معززه مكرمه وانا والله العظيم اني اقولها صادق لو الظروف غير الظروف وعرفتك اني لخطبك لي بنت مافيك قصور مؤدبه ومتربية ومؤمنه وسنعه وكل الصفات فيك
نزلت راسها بخجل ووجها تورد ابتسم وهو يحس بتوتر لكنه مصمم يرسي على بر: وش قولك انتي ؟ انتي معي في كل الظروف؟ نساند بعضنا ونبدأ حياة جديده ويدينا شاده على بعض؟
ود هزت راسها بخجل وهمست: انا بساعدك بالي تبي..
ابتسم وقرب بهدوء وباس جبينها وقال: الله يقدرني اكون عند حسن ظنك فيني.
ود رفعت راسها وقالت بغصه: تكفى لاعد تحملني السبب بنظراتك.
مسفر بأبتسامه: اسف
ود قربت بخجل وضمته وهي ترجف بلع ريقه ورفع يديه وهو يشد عليها بأبتسامه حنونه يشوفها تايهه مثله وتدور امان ومالهم امان الا بعضهم...
ابتعدت وهي تمسح دموعها وابتسمت: ذوق القهوه!
مسفر ابتسم: زينه بالحيل!
ابتسمت وناظرته وطالت النظرات بينهم نزلت نظرها بخجل وصبت له قهوه مره ثانيه وخذت فنجانها وهي تشرب بهدوء..
لين وقف مسفر وقال بأبتسامه: انا بطلع افتح البقاله اكيد الشمس اشرقت
ابتسمت ود واومئت وهو فتح الباب وطلع لها وود ضمت يديها لصدرها بسعاده وخجل وهي تتذكره وتتذكر ابتسامته..
طلع مسفر وفتح باب البقاله مع شروق الشمس وابتسم وهو يناظر الشارع الفاضي والي كان عكس شوارعهم الترابيه تماماً استند على الباب واخذ نفس عميق وهو يذكر الله ويطلب من الله يخفف الشوق الي في قلبه لأهله..
دخل للبقاله وناظرها كانت كبيره وكل شي فيها ابتسم وبدأ يرتب بعض البضايع وغيره..
لين سمع صوت: يالله صبحه بالخير
التفت مسفر بأبتسامه من عرف الصوت: صبحك بالنور عمي كيف حالك اليوم؟
ابو رامي بأبتسامه ابويّه: الحمدلله بخير ياولدي انت وش حالك؟
مسفر: يسلم حالك الحمدلله
ابو رامي بأبتسامه هادئه: الرجال يمدحونك في المسجد وكلامك طيب وعلمك طيب!
مسفر بأبتسامه: الله يسلمك ويسلمهم.
ابو رامي: الله يسعدك ياولدي انا قلت اسير عليك وشوفك.
مسفر: الله يحييك مكانك وحلالك
ابو رامي ابتسم له وتقدم منه ومد له مبلغ وقال: هذا وانا ابوك مقدم من راتبك تاخذ حرمتك وتطلعون تاخذون لكم نواقص البيت واحتياجاتكم وام رامي بتجي بعد شوي ومعها الفطور تقول تبي تتعرف على حرمتك وانا وياك بنفطر اليوم هنا
مسفر ابتسم بأمتنان: الله يبيض وجهك ياعمي والله مدري وش اقول لك بيض الله وجهك.
ابو رامي بأبتسامه: ما سويت شي وانا ابوك ماسويت شي
تقدم وباس راسه وهو ممتن لهذا الشخص كل الأمتنان الفضل له بعد الله على الراحه الي يحس فيها مسفر حالياً...

_______...

"عيال الشيخ"

كانوا للحين يدورون على جواد وهم في حالة غضب وخوف على اخوهم وصقر اكثر واحد خايف ومنهار على جواد لأنه شاف الي صار كان خاايف حيل عليه لا يكون ذبحه المجهول...
نمر بعصبيه: وييين ممكن يكون؟؟
صقر وهو يبكي بخوف على جواد: مدري مدري تكفون لايصيبه شي واضح ان الرجال ناوي عليه .
عناد بقهر: قلت ان جواد انصدم؟ يعني ممكن يكون الفاعل معروف؟
نمر عض يده بعصبيه: ممكن ليه لا؟ لكن والله لو اشوفه ان يندم والله لو يصيب جواد شي والله..

شافوا سيارة تدخل وكانوا معودين بالشيخ جراح
ركضوا له يتطمنون عليه
حمد بقهر:مو راضي يقعد في المستشفى اول ما صحى قال يبي يرجع الحين باقي له كم ابره ومغذيه لزوم ياخذهم وين جواد خل يسويهم له؟
نمر ناظر اخوانه
وهم توتروا والشيخ جراح طلع من الموتر بتعب وناظر عياله
حمد توتر: وين جواد؟
انتبه على وجه صقر وهو يصد عنهم
حمد صرخ بخوف: جووواد ويييينه؟
الشيخ جراح بتعب وخوف: اخوكم وينه؟
نمر اخذ نفس وقال: طلع يدور على الفاعل وماعود للحين
طاح الشيخ جراح وسندوه عياله قال برجفه: اخوكم وش صابه؟!
حمد برجفه وخوف مسك صقر وهزه: وششش صاببه يا صقر علمنيييي
صقر بغصه: شفته في كاميرا المراقبه تواجه مع المجهول ويوم شافه انهار وطاح على الأرض
حمد بجنون صرخ: منن الفاااعل؟
صقر: مدري كان معطينا ضهره مانشوفه واخذ سلاح جواد وصوبه عليه ومن بعدها فجّر الكاميرا وماادري وش سوا فيه
حمد مسك راسه بصدمه ودموعه تنزل بخوف على اخوه.
جراح بصراخ: اخووووكم دورووووه والله لو يصيبه شيي...
كان ينتفض من التعب والخوف وعياله ساندينه..
حمد صد عنهم وهو عاض شفته ودموعه تنزل وهو خااايف على جواد وعينه على كل شي حوله يدور على طيف لجواد..
اخذوا الشيخ جراح ودخلوه للبيت بسبب تعبه وانهياره والحريم عرفوا عن اختفاء جواد والكل صار في حالة رعب وخوف عليه ويبكون عليه كلهم واهل الديره طلعوا مع عيال الشيخ يدورون عليه في كل مكان..

____

"ملاك"

طلعت من الغرفه وهي لابسه عباية غرام الكتف وهي تبي تعرف اي خبر وهل رجع جراح من المستشفى ولا لا..
طلعت للصاله وشافت الحريم يبكون وخايفين بلعت ريقها وناظرتهم ككل وانتبهت عليها غلا الي من القهر وقفت وتوجهت لها: انتتيييي وش مطلعك بعد
غرور التفتت لملاك ووقفت بعصبيه وتقدمت منها وصرخت: كلـــــــــه منك يا وجه النحسسس انتي وامك وابوك مامنكم الا البلاء والمصايبب
غلا ببكاء: الله ياخذ روحككك اشغلتي الشيخ جواد عنني بيوم زوااجنا الله ياخذك
غرور رفعت يدها بتهديد في وجه ملاك الي تناظرهم ببرود: اقسم بالله لو يصيب ولدي شي يا وجه النحسسس من يوم عرفك وهو في مصايب والله لااذبحك ولا اقول مهبوله فاااهمه..
ملاك بتمثيل للخوف: جواد وينه انا خايفه ماابغى اقعد عندكم وينه جواد وييينه
غلا بغبنه رفعت يدها وجت بتضربها كف وقفتها صرخه هزت البيييت كله: نزلـــــــــــي يدك
رفعت ملاك راسها بصدمه وهي تشوف جواد واقف وتقدم وثوبه كله تراب ارتجفت اوصالها وحست ان نهايتها قربت انفضح امرها وانتهاء!!! والحين بيذبحها قدامهم كلهم نزلت دموعها وهي ترجف
شهقت غرور بفرحه وركضت لولدها: انت بخيير يمه انت بخيرر وين كنت وش صار؟
جواد وعينه على ملاك الي منزله راسها وتبكي بخوف وترجف قال بوجع: لا ماني بخير يمه ماني بخير
غرور تحسست وجهه: وش صابك وين كنت
دفها جواد عنه وتقدم من ملاك ومسك يدها بقوه وعنف وسحبها معه متجاهل نداء امه له وتوجه لغرفتهم وملاك تحاول تحرر يدها منه وهي تبكي بخوف وفتح الباب ودخل وبكل قوته رماها على الأرض وقفل الباب والتفت لها وصدره يرتفع ويهبط بسرعه تخوف وعينه عليها وهي طايحه على الأرض تبكي بصمت وماسكه يدها
جواد بحرق صرخ: مــــــــن انتييي ؟؟؟؟

رفعت راسها وناظرته ودموعها تنزل
ج

واد شد راسه ودموعه نزلت بغبنه وحرقة قلب: ووششش الي صاار انا كنت في كابوس صح؟؟! انا الحين في كابوس؟؟؟ تكلممميي لا تجننيني!!.. صح انتي ماتدرين انا وش اقول الحين!.. انتي ماتدرين وش اقول صح؟. انتي تعبانه وماتفهمين صح؟ تكفيــــن قولييي ايي!!! ...

ملاك عضت شفتها وهي تبكي
سحبها جواد بعنف ووقفها قدامه ومسك وجهها بيديه الراجفه وبرجاء : قولي لي انك تعبانه وماتدرين وش صار قولي تكفييين قوولي شي!.
ملاك غمضت عيونها وهي تبكي
جواد بوجع ودموعه مغرقه وجهه: لا تسكتييين قوليييي شيي علمييني اي شيي قوليييي لا تسكتيييين لاتحرقين قلبي قووولي..
ملاك نفضته وصرخت: وششش اقوووول وش تبي تسمع مني؟
جواد ناظرها وهز راسها بالرفض : انتي ماتتكلمين كذا
لهجتك تكون دايم خفيفه ورقيقه ما تتكلمين كذا حبيبتي ادري فيها رقيقه ارق من النسمه ما تتكلم كذا
ملاك ناظرته بصدمه ودموعها تنزل وهي تشوف انهياره ورجفته
جواد قرب ومسح على وجهها وهو لازال يرجف: انتي كنتي نايمه هنا صح حبيبي؟ انا تخيل لي الي شفته هناك علميني؟
ملاك بعصبيه دفته: لا ماتخيل لك انا الي شفتني
جواد ضحك بين دموعه وقرب منها: لا لا انا كنت احلم اصلاً هذاك الكهف مدري وش وداني له فتحت عيوني لقيتني مربط بس قدرت افك نفسي وبعدين انتي وش بيجيب لك كل ذيك الأدوات انتي ما تدرين بأي شي منهم انتي انا اعرفك اعر...
ملاك دفته وصرخت: لا هذي انا انا الي اسوي كل هذا انا الي احرق وانا الي وقفت بوجهك وانا الي اخذتك لكهفييي اناااااا. انتتت ماتعرفني ولا تعرف عني شييي
جواد هز راسه بالرفض وهو يضحك ويرجف: لا يروحي لا انتي ماتسوينها انتي انتي
تثاقل لسانه وماعرف وش يقول وهو يطيح على ركبه ودموعه تنزل ويبكي ورفع يده وصار يضرب الأرض بحرقة قلب.. وهو يصرخ
ارتدت ملاك على وراها وهي تبكي وتشوف انهياره رفع راسه وناظرها ووقف قرب منها وقال برجفه وهو للحين مو مصدق شي مسك يديها وهو يرتجف وقال برجاء: ملاك!.. ملاك قولي مو انا وانا بصدقك قولي مو انا وعد لصدقك وعد قولي قولي يالله
ملاك ناظرته بحده ودفت يده: اصحى على نفسك اصحى هذا هي انا ملاك الي واقفه قدامك واقفه قداامك هذي انا الي من اربع سنوات احـ..
رفع يده وسكر فمها وهز راسه بالرفض: لا تقولين شي انتي ماتسوين كل هذا انتي ملاك! ملاك حبيبتي وبنت قلبي انتي روحي وعمري وقلبي ماتسوين شي مثل هذا اصلاً انتي تعبانه وانا بعالجك وتصيرين بخير ونكمل حياتنا مثل ماحن انتي تحبيني وانا احبك اييه احبببك احبك اكثر مـــــن اي بشر هنا اكثر من الدنيا وما فيها حبيتك رغم انف قبيلتي ورغم انف كل العادات وكل شي هنا حولي اخذتك لأني احبك وانتي تحبيني اييه انتي تحبيني كل مره تقولينها واشوفها في عيونك انتي تحبيني انا متأكد انتي تحبيني
ملاك دفته وسحبت يديها وقالت بحرقة قلب ومكابره : انا ما احبك انت ولد جرااح الي ذبح امي وابوي انا ما احبك ولا في يوم حبيتك انت كنت مجرد لعبه بالنسبه لي مجرد خطه!!!
دفها بقوه وصرخ بحرقه: اسكتـــــــــــي اسكتـــــــــــي انتييي تحبييني وانااا احبك الي صاررر بيننا مووو قليييل موو قليل والي صاارر اليوم مجرررد كاابووس كاابووووس
ملاك ارتطمت في الجدار وبكت وصرخت بعصبيه: لا اناا ماااا أحبـــــــــك الييي بيني وبينكم حـــــــــــــرب

جواد ارتخت يديه بضعف ودموعه تنزل وعينه عليها همس بوجع: طيحي الراء وضميني تكفيين..
نزلت دموعها وهي تناظره بصدمه من ضعفه وانهلاك حاله طاح على الأرض وهو يبكي بحرقة قلب ويشد على راسه والوجع الي بقلبه كبير
بقت واقفه وهي تناظره بصدمه ودموعها تنساب على خدها... ماتوقعت ضعفه ماتوقعت انهياره ماتوقعت ابد كلامه توقعت يحي ويذبحها على طول لكن جواد مااستوعب الي صار ولا يدري هو وش يسوي ولا وش يتصرف..
جلست على الأرض وهي تضم رجولها لصدرها وهي ترجف وعينها عليه...
مرت اكثر من عشر دقايق وهم على نفس وضعهم لين قالت برجفه: بتروح تعلم ابوك؟ رح علمه وخله يذبحني والحق بأمي وأبوي وحتى لو علمته صدقني ماني طالعه من الدنيا ذي الا وانا ماخذه روحه معي

رفع جواد راسه وناظرها وهمس : علميني كل شي، الحين بتعلميني كل شي!
ملاك ناظرته وبلعت ريقها: ابي منك امان
جواد صرخ بقهر وعروقه بارزه: علميييني كـــــل شيي

ملاك برجفه: اول شي ابي منك امان
جواد بوجع: انتي في امان الله وفي وجهي
ملاك ناظرته: مابتعلم علي؟
جواد بعدم صبر ووجع: تكلمــــــــــي!!!

ملاك بلعت ريقها: وش تبي تعرف
جواد ناظرها: كل شي كل شي ابي اعرفه، بداية ذي اللعبه وذي التمثيليه
ملاك ناظرته وزمت شفايفها ودموعها تنزل

#فلاش باك..
قبل عشر سنوات..
في مكه..
كانت الهنوف جالسه في الصاله تذاكر لملاك وتضحك معها على مواقفها في المدرسه..
دخل خلف ووجهه متكدر واسود جلس جنبهم وهو سرحان مد يده وهو يبعثر شعر ملاك الي ضحكت وجلست في حضنه وهي تبوس خده
الهنوف ناظرته سرحان جلست جنبه ومدت كفها لكفه وشدت عليه: عسى ماشر يابعد حيي وش فيه وجهك هالون!!؟
خلف تنهد بحزن وباس خد ملاك: ادخلي يا بابا لغرفتك
ملاك ناظرت وجيههم وخافت عليهم طلعت من الصاله لغرفتها وبقت على الباب تسمع لهم.
خلف تقدم وضم الهنوف بحزن:ابوي توفى!.

الهنوف شهقت بحزن وشدت عليه: إنا لله وإنا إليه راجعون..
خلف بوجع: إنا لله وإنا إليه راجعون.. إنا لله وإنا إليه راجعون..
الهنوف ببكاء: وخالتي مزنه وش صار عليها؟
خلف بلع ريقه: مدري خايفن عليها ودي انهج لهم واخذها
الهنوف برعب مسكته: لا وين تنهج والله ما تعود.
خلف بحزن: مااقدر اترك امي بدون سند ولا احد عندها باخذها تجي معانا هنيا.
الهنوف شدت على يده: بنهج معاك
خلف بلع ريقه وقال: مستحيل اخذك
الهنوف بدموع: اجل انت بتنهج. لحالك ويذبحونك وابقى لحالي؟ مستحيل والله ما تتحرك الا وانا معاك خلف مااقدر اتركك لحالك ماقدر!..
خلف بغصه: هنوف ملاك مايصيير تبقى لحالها
الهنوف: نخليها عند جابر وزوجته لين نرجع!
خلف برجاء: هنوف تكفين اقعدي هنا انا ماادري ارجع ولا لا ابقي انتي مع بنتنا واذا كنت لحالي بقدر اني ادخل واخذ امي بسرعه ونطلع ونجيكم!
هنوف بخوف: ماني متطمنه مستحيل اتركك خلف تكفى افهمني!
خلف مسك وجهها: عشان ملوكه خليك عندها.
الهنوف بلعت ريقها وهزت راسها بالرفض: قلت لك لا ماني تاركتك ياننهج مع بعض يانقعد هنيا مع بعض
خلف: وش الي نقعد مااقدر اترك امي لحالها!
الهنوف برجاء: اجل خذني معك!
خلف غمض عيونه بحزن: هنوف تكفيييين افهمين هرجي لو يقضبونا بيذبحونااا افهميي
الهنوف بحده: فاهمه وعارفه كل شي عشان كذا انت مابتنهج لأي مكان الا وانا معاك لو انذبحنا ننذبح مع بعض وان عشنا نعيش مع بعض! ..

خلف بنفاذ صبر: وملاك!
بلعت ريقها: تبقى مع جابر هنيا
خلف تنهد: بنتك راسها ايبس من راسك مابتتركنا ننهج وهي لا!.
الهنوف بوجع: مابنعلمها بشي بنقول بننهج لأي مول ولا شي بنجيب كذبه وتبقى مع جابر لين نرجع.
خلف تنهد: ناديها اجل خل اعلمها ابي ننهج اليوم لأمي!
الهنوف:زين وخلي كلامنا واحد تدري بنتك فطينه وتلقطها وهي طايره.
خلف تنهد: على من طالعه بالله!؟
ناظرته الهنوف وابتسمت بخفه وصدت بوجهها
ملاك طلعت والدموع على وجهها: بنهج معاكم!
رفعوا روسهم لها بصدمه: ملاك
ملاك ببكاء: ماني تاركتكم تنهجون لحالكم لديرة جدي مو انتو كل مره تقولون لي ان فيها اشرار ومايصير تروحون بيذبحونكم شنوح الحين بتنهجون لهم؟
خلف ناظر الهنوف واشر لها تتصرف
الهنوف تنهدت: ملاك يا ماما لازم ناخذ جدتك من هناك
مابقى لها احد مايصير يتركها بابا
ملاك بغصه: واذا شافوكم وانذبحتوا؟
خلف وقف وقرب منها جلس على مستوها وباس خدها: وش هالكلام لا تتكلمين كلام اكبر منك.. زين؟
الهنوف قربت وشدت على يدها: ماما ملوكه بتبقين عند بابا جابر ناخذ جدتك ونعوّد هنيا.
ملاك صاحت : واذا ذبحوكم!؟
خلف ضمها: لا يابابا مايقدرون
ملاك: بنهج معكم والله والله ما اقعد هنيا واذا تركتوني عند بابا جابر والله لألحقكم واهرب منه!
الهنوف بحده: ملاك وش هالكلام؟؟؟
ملاك بوزت: ماني تاركتكم تنهجون لحالكم لديرة جدي.
خلف تنهد: ملاك يا بابا انا ادري اني ما اكلم الحين طفله غبيه انا اكلم بنتي انا والهنوف بنتنا الذكيه الي تفهم الكلام وتدرسه وتدري وش المقصد منه حنا يا بابا لو شافونا بيذبحونا عشان كذا بناخذ امي بدون مايحسون ونرجع لك، واذا شافونا وانتي معنا الوجع لنا بيكون اكبر مانبي ناخذك ويصيبك شي!
ملاك: وانا مابي يصيبكم شي
خلف: ما بيصيبنا شي إن شاء الله.
الهنوف ابتسمت بهدوء: بتقعدين عند بابا جابر لين نعوّد من الديره وجدتك معنا وتنبسطين يوم تشوفينا وهي تفرح فيك..
ملاك بوزت ودموعها تنزل: والله والله ما اترككم تنهجون لحالكم والله والله.
تأففت الهنوف وناظرت خلف: والحين؟
خلف غمض عيونه ثم ناظر ملاك وقال: ملاكي حبيبي "بنت قلبي" بتقعدين عند ابوك جابر واحنا خمس ساعات وحنا عندك وش فيك صرتي ما تفهمين
ملاك صرخت في وجهه وهي تبكي: والله ماتنهجون الا وانا معاكم واذا ذبحونا يذبحونا كلنا
شهقت الهنوف وقفلت فمها: مو قلنا بلاشش هالكلام الي بيزعلنا!؟
ملاك دفت امها وهي تبكي: ادري ان في شرير في الديره والقصص الي تجيبينهم لي قبل النوم ادري انهم انتو وادري ان البطل الي انقذ الأميره من الوحش هو بابا انا ماني غبيه ياماما ماني غبيه وادري ان الوحش يبي يقتلكم لأنكم تحبون بعض وانحشتوا منه والحين اذا بتنهجون انا بنهج معاكم وماني قاعده هنيا لو تقولون وش ماتقولون... واذا انحشتوا مني ونهجتوا لهم انا ابلحقكم وربي ما تنهجون بدوني!..
تأفف خلف ووقف: تفاهمي مع نسختك!
طلع من البيت والهنوف ناظرت ملاك وهمست:ملاكي افهمي مانقدر يا امي انتي مالك ذنب تنهجين معانا ويصيبك شي.
ملاك ما ردت وهي مبوزه وعاقده حواجبها..
تنهدت الهنوف ووقفت تدخل الغرفه ناظرت ملاك مكان امها وما تكلمت وهي للحين مبوزه بزعل..

راح خلف لجابر وعلمه عن عناد ملاك تنهد جابر وقال: خلها تجينا غصب عنها الموضوع خطير ولا يصيب البنت شي حرام!
خلف بضيق: مااقدر انت تدري فيها بتلحقنا البنت عنيده عنيده
جابر: اش حتسوي؟
خلف جلس وهو يفكر: مدري خايف يصيبها شي اذا رحنا
جابر بتوتر: يا خويه انا خايف عليك انتا وحرمتك ليه تروح لدي الديره؟
خلف: يا جابر مااقدر اترك امي والله ما اقدر لازم اخذها معي هنيا.
جابر بخوف: قلبي مش متطمن!
خلف بلع ريقه: حتى انا مير مااقدر اترك امي ما اقدر.
عم الصمت لثواني لين نطق خلف بأستعجال: باخذ ملاك معانا!
جابر ناظره
خلف هز راسه: باخذها وحتى لو فرضنا وقضبونا مابيضرونها!
جابر عقد حواجبه: واييش الي يمنع انهم مايضرونها؟
خلف ضيق عيونه: لأن البنت فيها ضمور
جابر فتح عيونه: بسم الله تفاول على بنتك انت؟
خلف هز راسه بالرفض: بنكذب بنقول كذا لجل لو حصل وصار شي بنتي مايصيبها ضرر
جابر: خلف ليه تدخل نفسك بمشاكل ياخويه خل بنتك وحرمتك هنا ورح جيب امك دي وخلصنا
خلف زفر: لو بنتي وحرمتي مثل البشر يقولون تم كان خليتهم لكن كل وحده اعند من الثانيه ماخذين الطبع نفسه
جابر تنهد: الله يعين انا خايف عليكم والله.
خلف زفر: حتى انا لكن ما اقدر اترك امي.. جابر امنتك الله ان صابني شي بنتي في امانتك امنتك الله لا تتركها انت لي اخ من سنين وواثق فيك اكثر من نفسي تكفى ان صابنا شي البنت في امانتك تكفى
جابر بخوف: خلف ماتبطل الحركات هذي اش قُلنا ان شاء الله ماحيصيبكم شي وترجعون بالسلامه انتا وحرمتك وبنتك..
خلف اومئ: ان شاء الله
وقف: انا استأذنك بنهج اعلمهم لجل يمدينا نمسك خط
اومئ جابر وضم خلف: اسئلك بالله خلك حذر وانتبه على حالك وعلى بنتك وحرمتك
خلف: ان شاء الله يا خوك ان شاء الله...

راح خلف عنه وجابر يناظره بخوف وقلبه مش متطمن..

دخل خلف البيت ولقي ملاك والهنوف يتناقرون وملاك تحلف ان تروح معهم والهنوف تحلف ان تبقى تنهد وقال: ملاك بتجي معانا
الهنوف ناظرته: هاه؟
خلف قرب وجلس عند ملاك ومسك كتوفها وقال: بتنهج ملاك معانا ولكن بشرط
ملاك ابتسمت: موافقه
خلف: الشرط انك ماتتكلمين ولا تقولين شي لين نطلع من الديره

الهنوف عقدت حواجبها: شنوح؟
خلف بلع ريقه: بنقول لأمي ان البنت فيها ضمور يعني تعبانه وان طلعنا من الديره علمنا امي الصدق وان ماطلعنا على الأقل نضمن ان بنتنا مايصيبها شي
الهنوف بأعتراض: مابيصير شي من هذا كله احنا بننهج وناخذ امك ونرجع مكه
خلف تنهد: ان شاء الله ولكن لزوم ناخذ حذرنا لكل شي.. ها ملاك موافقه
ملاك بخوف: يعني بيذبحونكم؟
خلف هز راسه بالرفض: لا يا بابا بس مهما صار انتي بتبقين تمثلين وحتى لو صار لنا شي بنتنا نبيها قويه وماتعلمهم لين يجي جابر وياخذك وتكملين حياتك وتدرسين وتتخرجين وتحققين حلمك يا بابا زين؟
ملاك بكت بخوف: ما ابغى يصير فيكم شي
ضمها خلف: مابيصير شي يا بابا مابيصير شي
اهم شي خليك قويه ولا تعلمين احد انتي ذكيه وادري بتنجحين.
الهنوف بدموع: خلف تكفى لاتخوف البنت مابيصير شي بناخذ خالتي مزنه ونطلع..
خلف تنهد وهز راسه وقرب وهمس بأذن ملاك

" انتي قويه تقدرين انتي خلف وانتي الهنوف وانتي حبهم "
سمعته الهنوف وشدت على كتفه بخوف ودموعها تنزل..
ملاك هزت راسها وهي خايفه..

ومر الوقت وتحركوا للديره وكل واحد منهم في قلبه خوف ولكن خلف ما يقدر يترك امه بدون احد هناك...

# باك

كانت تبكي وهي تناظر صدمة جواد وهو عاقد حواجبه ودموعه على وجهه
ملاك برجفه واسنانها تصفق ببعض: شفت... شفت.. كمية... الوجع... الي انا.... عشته؟ ... بعد ما عرف بابا جابر بالي صار جاء وحاول ياخذني بس امي مزنه رفضت وقالت البنت مهبوله وتبقى عندي اهتم فيها وقتها انهار وهو يبكي على ابوي وحاول كثير ياخذني عشان ما اتعب وانا اعيش حالة ماهي حالتي لكنها رفضت .. كنت اكرهها اكرهها واحملها سبب موتهم هي الي ما قبلت تطلع معهم لو انها طلعت كنا رجعنا لمكه وعشت حياتي بحضنهم لكنها رفضتتت لين جاء ابوك وذبحهممم؟؟؟!! ... * دخلت في موجة بكاء وهي تضم نفسها وجواد للحين يناظرها بدون كلام *
رفعت راسها وناظرته: مرت ست سنوات وصار عمري 14 وبابا جابر كل شهر وكل مره يجي يحاول ياخذني معه ماكانت تقبل عشت ست سنوات في حالة صدمه من موت امي وابوي ماكنت اتكلم ماكنت اسولف وحتى كنت ابلل نفسي في كل وقت واعملها على نفسي عشت ست سنوات وانا في حالة الا وعيي كل ماغمضت عيني شفت راس امي وراس ابوي
* سكتت وشهقاتها تعلى تحاول تاخذ نفس وتتكلم ودمعتها بطرف عينها وماترمش * عشت ست سنوات وامي مزنه تحركني مثل الدميه ماكان مني اي ردة فعل توكلني هي تشربني هي تغسلني تلبسني تسويهم كلهم كنت في حالة صدمه.... من المشهد..... الي صار.... قدامي!..
*رفعت يديها الراجفه قدام وجهها*عشت ست سنوات وانا في حالة رعب وكل ماجاء بابا جابر كان يحاول يطلعني من الرعب الي اعيشه كنت اخاف حتى من ظلي! .. اخويا ايهم كل ماجاء كان يبكي عندي ويترجاني اكلمه كنا متعلقين ببعضنا من واحنا عيال سنه لأنه اخوي ماكان عندي اصدقاء غيره وهو ماكان يلعب مع احد غيري وكل مره يجي طول الست سنوات يبكي ويترجاني اسولف معه اكلمه بس ما كنت اقدر كنت اخاف من كل شي
رفعت راسها وناظرته: لين قدر ابوي جابر انه يطلعني من الي انا فيه ووعدني انه يساعدني انتقم لأمي وابوي وقتها بديت ارجع لوضعي بديت اتكلم معه بديت اطلع كل شي في خاطري وعدني انه يساعدني بالي ابي ومر الوقت وبديت اخطط لكل شي ومافي بالي الا شي واحد ابوك الكابوس ابي ملاحقني من صغري " الوحش " الي اخذ مني امي وابوي ... وبديت انا اخطط وانفذ وأبوي جابر يساعدني بكـــــــــل شي ابيه المهم اني ارجع لوضعي وما ادخل بحالة الرعب من جديد وقتها الرعب انمحى من حياتي صرت اخاطر واحرق اشياء واسوي اشياء مايسويها اكبر مني لكني مات قلبي مع موت امي وابوي ولمدة أربع سنوات وانا انتقم من ابوك و قبل توصل انت للديره انا احرقت المخزن الشرقي دخلت لغرفتي وقفلت الباب عشان امي مزنه ماتدري اني طلعت وطلعت وقتها من الدريشه ورحت احرقه ورجعت للبيت ودخلت من الدريشه نفسها ولقيت الباب شوي وينكسر كان صوت مسفر وهو يحاول يكسر الباب خفت انكشف وبلعت لي لعبه عشان ابعد الشبهات عني..

ويوم وصلت ورحنا لبيتكم بعدها في الليل خالتي رحمه طلعتني من بين الحريم خوف من أني افشلهم وطلعتني للحوش ومر وقت وطلعوا البنات الصغار عشان يخوفوني في البدايه كنت اطقطق لين شفت ظل شخص والي هو انت وقتها بديت ابكي وارتجف وانت وقتها جيت لي وكلمتني وسئلتني كثير، وقتها حتى انت دخلت في مخططي وكنت ابي احرق قلب ابوك عليك... اليوم الثاني شفتك جالس مع عيال اهل الديره وجيت لكم عشان وقتها كنت ابيك انت بعد تتأكد اني مهبوله!.. ويوم رجعني مسفر للبيت دخلت للبيت وقلدت اني نمت ودتني امي مزنه لغرفتي وطلعت هي لبيت خالتي رحمه وقتها انا طلعت من دريشتي وأحرقت المخزن الشامي الي كان كل الحصاد الخاص في جراح فيه! .. كنت ابي احرق قلبه على كل شي حوله مثل ما احرق قلبي طول السنين الي فاتت! ورجعت ما كني سويت شي وكملت نومي وسمعت الباب انفتح ودخلت امي مزنه تشوفني وبعدها طلعت! ...
...
وفي الليل طلعت للجبل في الليل كنت ابي اجهز لي اغراض الحريق الي بسويه لكن اخوك فاهد شافني ولحقنيي وقتها انا حلفت لأحرق قلب ابوك فيه وجيت من خلفه وضربته على راسه وجدعته من على الجبل!...
نار تشب في صدري كل مره كل مااجتمعت خالتي رحمه مع امي مزنه يتقطع قلبي من سوالفهم عن امي وابوي..... خلف قال خلف سوا الهنوف كانت والهنوف تسوي، يزيد الحقد بقلبي على ابوك وعلى كل الي ساكتين له...
*ابتسمت بخفه وهي تتذكر* ومره انت جبت لنا الغداء للبيت وفتحت لك انا وقتها كنت اقول لك انت صديقي؟ كنت اجدبها معك ابيك تتيقن اني مجنونه! لأني اسمع منهم عن ذكاك وخفت تكشفني!..
وقتها قررت اعرف عنك كل شي وكل تحركاتك وكيف يكون تفكيرك تدري وش سويت؟ جبت لك دميه صغيره!، ذي الدميه فيها جهاز تنصت صغير كنت اسمعك وانت تسولف واعرف انت وش تقول!.
وفعلاً سمعتك تقول وانت في مجلس ابوك ان عندك طريقه تقضب فيها الفاعل وطلعت مع ابوك لبرا وعلمته عن موضوع الكاميرات!... وبعد سمعتك تسولف للدميه عني! وكانك تسولف لي وقتها انا غيرت الخطه وصرت انت الهدف صرت ناويه اتقرب منك وتكون ضمن خطتي واقدر من خلالك اوصل للي ابغى!.. من خلالك

بعدها بفتره بيتكم انحرق مو انا الي احرقته الي احرقه كان ولد عم العنود هي الي علمتني!..
اليوم الثاني اتهمتوا مسفر انه الي احرقه وكان ابوك بيذبحه وقتها كنت شوي وأموت من الخوف عليه تذكرت ابوي امي والي صار لقيت نفسي ركضت من بين النااس قبل تنتبهون علي وطلعت بنزين من سياراتكم وإحرقت جدران البيت عشان ابعد التهمه عن مسفر . ورجعت اركض للساحه سممعت صوت ابوك وهو يقول اذبحه وقتها انهرت وانا اصارخ وابكي ومشهد امي وأبوي ماراح من بين عيوني!!!..
مر الوقت وانت واقف مع مسفر ولا قبلت عليه بالظلم بعدها انت وقفت مع مسفر ورجعت له دكانته الاولى والثانيه وابوك طلع الكل من الحوش بهذاك اليوم انا وقتها كنت ورى شجره كنت خايفه يوم شفت وجه ابوك رجعت لي كل المشاهد من شفت وجهه! بعدها ابوك رماك على الأرض وكان معصب منك واخوك فاهد قال عنك "سفيه" وطردك ابوك من البيت بهذاك اليوم وانا لحقتك ورحت للجبل وراك وقتها كنت ابي اشغل تفكيرك اكثر بعد ما عرفت انك تفكر فيني وقتها انت طردتني وانا رجعت للديره وبقيت انتظرك لين شفتك راجع للديره ورحت لباب بيتنا وقعدت ابكي عنده كل الي في بالي اني الخبط لك افكارك فيني وبعدها صار موقف البقاله تتذكر؟ صادق وقتها كان مستفز وكل كلامه لي سوقي كان يبي يستغل اني مهبوله ومسك يدي وانت جيت وقتها ماتحملت كلامه وعلمتك عنه لكني كذبت هو ماقال اني ادخل معه لكن حركاته معي كانت وسخه فايستاهل ! .. وانت ماقصرت ضربته لين عض الأرض وقتها اصريت اني اكمل الي اخطط له والي هو انت!...
بعدها ابوك طلبنا لمجلسه دخلنا وكنت اشوف نظراته لي خفت! اي والله اني خفت وحسيت بالحقد والكره لهالأنسان الي واقف قدامي طردك وطرد امي مزنه من المجلس وبقى هو وفاهد وقتها قال لأخوك يافاهد شف هالوجه انت توحيه؟ هذا وجه الهنوف! كان يشبهني بأمي واخوك يقول له الهنوف خانتك وجاها الي تستاهله ومدري وش وقتها كنت اتمنى لو اذبحهم اتمنى لو اخذ بثاري وابوك بكل حقاره ودنائة مد يده لوجهي!
ويوم دفيته قال لأخوك ناظر نفس حركاتها!! في كل مره يذكرني في أمي وانا اتمنى لو اذبحه في ذيك اللحظه* بكت بقهر وصدت بوجهها ثم قالت *... تتذكر؟ في الليل جيتنا انت ومسفر تودونا لبيت خالتي رحمه وقتها فتحت لك الباب وشفتك كيف سرحت في وجهي شفت كيف كنت تتأملني وقتها وقتها ناديتك باسمك ابيك تصحى على نفسك لكن شفتك سرحان اكثر من قبل غصب عني انحرجت غصب عني وضح علي الخجل من نظراتك غصب عني ضحكت بخجل من نظراتك مدري هو خجل ولا فرحه اني بديت اسيطر على تفكيرك وانك غصب عنك تسرح فيني! ...
وقتها كنت ابي اسولف معك افهمك بديت اسئل اشياء تافهه مثل ليه انت طويل وغيره بس كنت ابغاك تسولف وافهمك *بغصه * وقتها امي مزنه كل شوي كانت تقرصني خايفه علي منك ومن جرائتي وتقدمي منك لكني وقتها صرخت ابغى الفت انتباهك وهذا الي صار انت التفت لي وشفت حنانك علي
*بلعت ريقها وهي تشوفه يناظرها بخذلان*
وقتها اصريت اني ابقى معك عشان عرفت انك بديت تميل لي..
*ماقدرت تكمل وهي تشوف نظراته لها خذت نفس*
لا تناظرني كذا هذا الصدق، وقتها امي مزنه بغت تضربني وانت منعتها وانا جيت لك كنت مصره اني امشي معك ابغاك تتعلق فيني اكثر!... وديتني للبقاله وقلت خذي الي تبين كنت ملاحظه نظراتك علي وادري انك تتأملني!..
ومر الوقت ودريت بأنك بتتزوج حسيت ان خطتي كلها بتتلاشى اذا انت تزوجت لكني ما استسلمت وحلفت يمين ان اوصل لجراح من خلال ولده..
تبسم جواد بوجع وناظرها بخذلان : ياقو كلامك!!!
ملاك بلعت ريقها وكملت كلامها: وقتها انا شفتك بالشارع وانت كنت متغير وشفت انك تحاول تصدد مني عصبت وجدعت عبايتي ورحت لبيتنا وقتها قعدت ابكي مدري ليه لكني حسيت ان كل شي اخطط له بيفشل!!... لكن ماطال الوقت وسمعت الباب يندق وكنت انت جبت لي حلويات وقتها عرفت اني ماشيه صح وكل شي تمام!..*بلعت ريقها وقالت* ومره سمعتك تقول للدميـة اشتقت لك! ..
ومره سمعتك تهرج مع نفسك حسبتك مجنون او فيك شي كنت تكلم نفسك وتسئل عمرك ثم تجاوب كنت تقول انت تحبها ياجواد ثم تعود تقول لا هي مجرد شفقه! كنت اسمع كل حوار تقوله قريب من الدميه!..

بعدها بذيك الليله قررت اطلع واحرق شي يحرق قلب جراح ووصلت للجبل وشفته جاي وفي يده بنزين وشفتك وراه وقتها تخبيت قريب منكم وبديت اسمع كلامه ومن بعدها الحوار الي صار بينكم وتهديده انه بيحرقني!... وقتها شفت انفعالك وكيف خفت علي قررت اني انزل ابوك من عينك واخلي بينكم مشاكل واستغل هذي الكلمه الي قالها.. قررت احرق بيتنا وحرق شوك على قبر ابوي لجل تتهم الشيخ جراح! وتقول انه هو وتصير بينكم نزاعات ومنها انا اتقرب منك اكثر وقتها احرقت البيت ودخلت من الدريشه بسرعه وبقيت فيه عشان تصدق ان الشيخ جراح متقصدني انا!..
*شافت نظرات الصدمه في عيونه الدامعه تنهدت وفركت يديها* وقتها كان كل شي معي الشيخ جراح ارسل سماهر تاخذ امي مزنه تساعد الحريم فأنا استغليت ذا الشي وأحرقت البيت وبجنبه كم بيت لكن ماكان شي كبير... *بغصة* جاء مسفر وخاطر بحياته عشان يطلعني من النار.. وقتها تعبت وبديت انخنق لان النار قربت مني وجاني كم حرق خفيف!.. وطلعني مسفر من الدريشه وبعدها نقلونا لبيت الطبيب وبعدها انت جيت سئلتني من احرق قلت لك مدري وكنت ابكي واقول لك لاتتركني وانت سئلتني مره ثانيه وبعدها قلت رجال دفني للبيت واحرقه كنت ابيك تشك اكثر في ابوك وفي نفس الوقت ابيك تخاف علي وتاخذني قريب منكم وهذا الي كنت ابيه اني ادخل بيت الشيـخ!..
جواد بوجع قال: غلطت يوم قلت عنك "ملاك" وكل الي حولي " بشر " انتي مو ملاك انتي شيطان!!

ماردت ملاك وكملت كلامها: مره سمعتك من الدمية وانت تقول انك اشتقت لي وبعدها جيت ودقيت باب البيت وانا كنت انتظرك فتحت لك الباب وانت دخلت *بتوتر* وقتها انت ضميتني وقلت اشتقت لك اول مره احس بتوتر في قربك غصب عني توترت وخجلت *نزلت دموعها* وقتها ضميتني كانت اول مره احد يضمني بذيك الطريقه غصب عني سكنت بين يديك *رفعت يدها ومسحت دموعها بقوه وكملت كلامها* بديت احس بأشياء غريبة تتحرك في داخلي اشياء مدري وش هي بس كل ما تذكرتك او سمعت اسمك احس في ذا الشي وايام زواجك كنت مقهوره مدري ليه! كنت ضايقه وقررت اني اخرب هالزواج بس ماعرفت كيف؟ سمعت ان كل معونة الزواج في المخزن الشمالي *ابتسمت على جنب * رحت وأحرقته كامل! .. كنت ابي احرق قلب جراح وأوقف الزواج.. المخزن الثاني كان كله غاز وقتها انا ماكنت ابي احرقه بس ابي اسبب رعب وخوف لجراح وعياله قطرت قطرات متباعده بنزين لين المخزن عشان النار تكون بطيئة... ماكانت النية افجر الديرة النيه كانت ازرع الرعب في قلوب اهل الديره لاتسئلني ليش؟ لان الجواب واضح الجواب ياجواد اني اكره كل فرد في هذي الديرة لأنهم شهدوا موت ابووي وامي*بحرقة قلب* ابوووي كاان يترجاهم يتكلمون يقولون شي بس كااانوووا ساكتين كان يقول لهم جمله للحين اتذكرها يقول اليوم فينا بكره فيكم!!!! *شهقت ببكاء وهي تغطي وجهها ومن بعدها رفعت راسها وقالت بقهر*حتى جدتي مزنه! كنت اتعمد من سنين اني اعذبها وازعجها واعنيها كنت احاول اني اعاندها واتعبها معي كنت في كل مره تعلمني شي اليوم الثاني اجيها واقلد اني مااتذكره ابيها تتعذب!!! لأني كنت احملها سبب موت امي وأبوي لو انها طلعت مع ابوي الي ترجاها الي بكاء بين يديها يترجاها تطلع معه قبل يجيه الشيخ ورجاله لكنها تعانده وأخرت امي وابوي لين انذبحوا بدم بارد!!! والي كان يزيد كرهي لها وحقدي عليها انها كانت تروح لبيت الشيخ جراح تخدمهم حتى بعد ما ذبحووا ولدهــا!!!. .. قول عني الي تبي قول قاسية قلب قول ظالمة قوووول الي تبي لا انت ولا احد يقدر يحس بالي في قلبي!!! ثمان سنوات عايشه في نعيم وجنه في حضن امي وابوي وفجأه كل هذا يختفي وبأبشع طريقه اغلا اثنين على قلبي ماااتو قدام عيوني رؤسهم انقطعت قدااامي مييين يقدر يتحمل هذا كله؟؟؟... ماحد يقدر يتحمله لكن قلبي تحمله عشرر سنوات وانا في كوابيس متواصله ماتنتهي!! كل يوم ينعاد لي مشهد ذبح امي وأبوي!!!...

*مسحت دموعها بقوه وعنف وناظرته* خل اكمل لك الي خططت له طول هذي المده هه خل اعلمك خططي الي وصفتها انت يا حضرة الشيخ بالشيطانية!! ..
هههههه اكيد شيطانية عشان انت وأبوك واخوانك وكل ديرة الفلس ذي انتو الملائكة!!...

خذت نفس وقالت: بعدها رحتوا تدورون الفاعل الي احرق المخزن وقتها انا وصلت لسطح البيت الي سكنتونا فيه وقتها ما اكتفيت في اني احرق قلب ابوك المجرم بالمخزن وبس قررت احرق كل بيوته الي توه بانيهم ومن ضمنهم البيت الي حنا ساكنين فيه لكن حاولت اخفف النار منه عشان جدتي ما تتأذى مهما كان ما ابيها تنحرق بديت اصب بنزين على البيوت من فوق السطح بدون ما ينتبه علي احد لكن مدري شلون شفتوني كنتوا مقبلين على البيت كلكم وقتها قلت ان دخلت البيت بتعرفون وان بقيت بتكشفون وان انحشت بلف من ورى الديره واعود احرق البيوت واخلع الثوب وانط للبيت الي جدتي فيه نطيت بسرعه وانتو تركضون وراي مريت من جنب بنت والشيخ هادي وهم يتهاوشون تعديتهم وطلعت من الديره ولفيت مثل ما خططت للجهه الثانيه ورجعت للبيوت وأحرقتها ونطيت للحوش ودخلت بسرعه للغرفه!...
وقتها زادت النار وللأمانه خفت، خفت على نفسي وخفت على جدتي! .. بديت ابكي بخوف وفجأة شفتك دخلت وجيت تضمني وبعدها جاء اخوك حمد وصرخ عليك توخر عني وقتها انت قمت ورحتوا لأمي مزنه ويوم شفتها طايحه هنا من جد خفت عليها مابي اقتلها مابي اصير قاتله جدتي!!...
طلعتني وصرخ علي حمد اروح للحريم هنا صرخت مو ناقصه ضغط نفسي اكثر جلست على الأرض ابكـ...

*قاطعها جواد بسخريه ووجع ودمعته على خده من الخذلان كيف انها لعبت فيه واستهزئت بكل ذرة شعور قدمه لها: على اساس انك مانتي قاتله انتي ذبحتي روحين في المخزن اثنين رجال كانوا في المخزن انتي ذبحتيهم يابريئه انتي قاااتله..

ملاك بصراخ وبكاء: ذووول اكثر اثنين يستاهلون الموووت ذول الأثنين اكثر اثنين كنت اتمنى اقتلهم تدري منهم؟؟ ذول الأثنين هم نفسهم الي اوقفوا ورى امي وابوي ماسكين سيفين، سيفين يااااجواد وبلحظه دمروا لي كل حياتي في لحظه انهوا سعادتي في لحظه ارتفعت سيوفهم وطاحت روس امي وابووووي ذول هم نفسهم القتله الي ذبحوا امي وابوي بدووون اي ســـــــــــــــــــبب!!!!...
*شدت على راسها وهي تبكي بوجع بينما جواد ساكت وفي كل لحظه يتلقى صدمه اكبر من الي قبلها رفعت راسها له وقالت مكملة كلامها ببكاء : بعدها انت اخذتني بيتكم لكني كنت ميته خوف على امي مزنه كنت خايفه يكون صابها شي كنت مرعوبه لااكون انا ذبحتها!! بديت انهار وكنت اصرخ برعب كنت خايفه اني ذبحتها كنت ادفك واصرخ عليك ابيها! وامك زادتها علي وذكرتني بموت امي وابوي قالت الله ياخذ روحك مثل ما اخذ روح امك وأبوك! .. طحت ابكي على الأرض وماكنت احس بشي غير جملتها الي تتكرر على مسامعي وفجأه حسيت فيك تضمني وجملتها بدت تتلاشى وماصرت اسمع الا همساتك لي وكلامك! كنت تقول لي بطريقه طفوليه بأنك البطل جواد بتحميني من الأشرار!!
رفعت راسي وصرت اناظرك بضياع ماادري اذا فعلاً انت بطل! وبتحميني من ابوك من اهلك من ديرتك!؟ معقول تكون مختلف عنهم؟ سمعتك تقول ناظري الغرفه غرفتي انا وياك بنمليها العاب ومدري وش غصب عني زاد بكاي يوم التمست الحنيه في صوتك الي فاقدتها من زمان! ..

*عضت شفتها بدموع* تتذكر يوم صار الي صار بمسفر؟ كنت واقفه بغرفتك على الدريشه شفتهم يوم دخلوه وهم يسحبونه وشفتهم يوم طلعونه من المجلس مغطى بدمه شفتهم يوم سحبوك للمخزن وشفت الشيخ جراح وهو يجيك والسوط في يده ومن بعدها شفتك طلعت وانت داخل البيت وشفتك يوم دخلت علي الغرفه وبعدها جيت لي وضميتني وصرت تبكي لأول مره اشوف رجال يبكي بعد مابكى ابوي خلف لاول مره احد ينهار عندي صرت ابكي معك وجع على مسفر والي يتعرض له وانا مدري وش كانت تهمته!! وقتها انت قلت لي وجودي هو الشي الوحيد الي مصبرك على انك تقعد في الديره صدقتك وحسيت فيك لكن كل ما اتذكر امي وأبوي اكرهك من كره ابوك واقول انت مثلهم ماتختلف عنهم! ... وتتذكر يوم اخذتني من بيت الطبيب للمزرعه ذيك وبقيت انا وياك فيها كنت خايفه تموت امي مزنه بسببي كنت خايفه! .. قلت لي لامن زعلتي جيني!.*ابتسمت بهدوء * شتتني!! اكثر ما انا كنت ابي اشتتك!.. قلتها لك انا مره احبك *ناظرته* تتذكر؟
صد جواد بوجهه وللحين الوجع الي بصدره كبير!..

كملت كلامها وقالت بهدوء: كنت اعنيها!.. اعني اني احبك مو لانك الشيخ جواد بن جراح لا احبك لانك انسان! لانك فهمت الحزن الي في قلبي ولا شي غير كذا.. *ابتسمت بسخرية *جاء حمد وقال ان زوجة الطبيب انهجت لأمك وعلمتها انك اخذتني لبرا الديره وخايفه الشيطان يلعب فيك!!.. بعدها قال حمد انت انهبلت مالقيت غير ذي تحبها!... انا بوقتها انصدمت وربي انصدمت وفي نفس الوقت انبسطت اني وصلت للي ابي وانك طحت في حبي لدرجة انك علمت اخوك!!.. جاء يوم زواجك وكنت جالسه معهم اناظرهم وهم يرتبون غرفتك وكنت اتظاهر بالفرحه لك وانا في داخلي مقهوره لأن فكرة ان حرمة ثانية تجي اكيد بتبعدك عني وكل خخطي بتروح..*بلعت ريقها وقالت بصعوبه* جتني زوجة اخوك وضربتني لاني كنت بغرفتك من الوجع بكيت وهالبكيه كنت احاول احبسها كثير تجمعت علي كل الأوجاع امي مزنه الي خايفه عليها لا اكون سبب موتها وزواجك، وكل ماتذكرت اني في بيت قاتل امي وابوي وماصدقت انه جاني شي يخليني ابكي طلعت اركض من البيت مابي اقعد فيه دقيقه احس دم امي وابوي معبي المكان! والي زاد خوفي اني بدون مااحس طلعت قدام الرجال وشفتهم يناظروني! ركضت وانا ابكي بخوف بقهر اني طلعت هالون قدامهم!! رحت لبيتنا الي كنت احس فيه بالأمان ابي احس فيه بطيف امي وطيف ابوي الي تتكلم عنه امي مزنه على طول مع خالتي رحمه كنت احاول اشوف لهم طيف صغير بس يصبر قلبي الي شقا في بعدهم عني!!.. وبعدها انت جيت لي في كل مرره كنت انت الي تشوف ضعفيييي؟؟؟ ليييه؟؟ كل مره انت الي تجيني في أصعب اللحظات ليييه!؟ قعدت انا وياك وقت لين انت مدري وش صار فيك بديت تتكلم عن الي في خاطرك علمتني كل شعورك تجاهي وتجاه الي يصير معك في الديره قلت لي بالحرف الواحد
ودي اغمض عيوني وافتحها ألقى كل شي تبدل، انا مدري ان كنتي بتفقهين هرجي هذا؟! ، مير والله ما عد لي قدره اكتم الي بقلبي اكثر من هالون، بقول كل شي في خاطري! ... أنا احس اني ضايع، ضايع كثييير في احاسيس تراودني ما كنت اتخيل ان بيوم بتجيني، يوم علمني ابوي انه محير لي اربع حريم، ماكان عندي اي معارضه ما كنت مهتم! .. كنت اقول بخاطري اهم شي يا جواد انت حققت الي تبي درست الدراسات الي تبيها، .. خلهم يسوون الي يبون يزوجونك الي يبون مهيب مشكله المهم انت حققت كل الي جال بخاطرك في يوم.! ... لين قابلتك!!.. كل مبدئ كنت ماشي عليه تبدل!... كل شي في حياتي تغير!.. كل تفكيري صار محصور عليك انتي!... ماعدت ابيهم ماعدت ابي أعرس بالي اختارهم الشيخ! ... ماعاد لي خاطر في أي شي الا فيك!.... " تنهد وقال": يجني احساس غريييب يوم افكر فيك، احيان اقول يا جواد هذي اطهر من الطهر لا تفكر فيها وهي موب حلالك!!! ... كل يوم وفي كل وقت ما صرت افكر الا في بنت قلبي! ... في ملاكي!. وفي نهاية كل تفكير اقول ابيها! .. بتزوجها!. "غمض عيونه" أبي اتزوجك! ابي لامن حضنتك ما يجيني تأنيب الضمير بعدها ودي اشوفك في كل وقت قدام عيني ودي لامن صحيت اشوفك عندي، ودي بشغلااات كثير مير وش يحققها!؟... ابوي حدني على شي ما كنت ابي ولا ابي اسويه خلاني احط نفسي بموقف انا في غنى عنه... اتمنى لو افتح عيوني القى الزواج هذا بكبره تبدل ودي اشوفك العروس ملاك مب غلا!... انا متلخبط متلخبط حييل.. انا تايه وسط الأيام ومستوحشها
وتايه مابين ودّي وما ودّي... انا يا بنت قلبي أخاف اصب كلّي في أرض ماهي بأرضي ويكون حصادي حساايف!.. ماعدت قادر اني ارسى على بر! كل كلمه انت قلتها انحفرت في قلبي ولاقدرت انساها قلت لي انتي فاهمه علي؟ وقتها خفت انك تشوف التأثر الي بعيوني غمضت ومثلت اني نايمه! لكنك زدت من توتر يوم حسيت فيك تسحبني لحضنك وتنيمني على رجلك وقتها لقيت نفسي احاوط ركبتك بيدي ودي احس بالأمان اكثر انااا قااهرني ياجواد اني مااحس بالأمان الا معك هذا الشي بيجلطني بيجنني!!!! ليييه؟ وقتها انت تركتني وطلعت من البيت حسيت بريحتك تغزي كل احساسي فتحت عيوني لقيت شماغك تحت راسي والشماغ الثاني غطيت جسمي فيه بقيت على حالي بس اشم بريحتك الي تخللت لأعمق نقطه فيني! .. لين حسيت بخطوات وماكان الا انت رجعت لي من جديد وجيت ورفعت راسي وخليتني بحضنك من جديد وقتها انا مدري وش صار بعد لأني نمت من جد حسيت بالأمان في قربك اكثثر!!! وهذا شي انت ممكن ماتستوعب وش كثر يألمني اني احس بالأمان مع ابن الي ذبح امي وابوي هذا شي بحد ذاته يعوور ياجواد يوجع!!... المهم انت بعد فتره صحيتني ورجعتني لبيتكم ودخلت بين الحريم كنت اشوف جدتي تعبانه لكنها تتحامل على عمرها لجل تحضر زواج الشيخ جواد هه! مرت نص ساعه وسمعت صراخ قوي بأسم الشيخ فاهد وبين لجة الحريم وخوفهم شفت وحده تطلع وهي تركض والدم مغطيها سحبت اقرب عبايه ولحقتها بعرف منهي ويوم انتبهت انها العنود وسمعت صراخ بأن فاهد انذبح فهمت انها الي ذبحته على طول وقبل اسمع منها أي شي عطيتها الحق لأني متأكده ان اخوك يستاهل ركضت وراها وشفتها تتخبط برى الديرة ماتدري وين تروح جيت من وراها وضربتها على راسها واخذتها بصعوبة للكهف ربطتها وتأكدت انها بخير ورجعت للبيت سمعت الكل يقول انها ذبحته وصار الي صار كله من لجة وغيره شفتكم تطلعونه ودمه مغطيه لحقتكم ووقفت بين الحريم وانا امتع نظري بأنهيار جراح وعياله واشفي ولو قليل القليل من غليلي!.. بقيت طول الليل في بيتكم لين الفجر طلعت وركضت برا الديره فيه صخره كبييير في اسفل الجبل قد جلست عليها انت مره ذي الصخره وراها في كيس واغراضي فيه ومن ورا الكييس صخره بعد يغطيه ذا الكيس دايم اخلي فيه ثوب وشماغ اخذتهم وركضت بدون ماينتبهون لي الرجال ولانهم مايتجرأون يمشون من طريق الكهف كانت هذي نقطة ايجابيه تساعدني كثير وصلت ولبست الثوب والشماغ وتلثمت ووقفت فوق الجبل من الجهه الثانيه ناظرت الجميع وهم يعودون للديره وقتها اتذكر اني قلت جمله تشرح حالي ومعاناتي قلت للحين ما حسيت بربع الي أحسه يا جراح والله ان تذوق اليـوم هذا، العذاب بأنواعه والله إن تذوق من نفس الكاس الي شربتني والله ان اخذ بثاري منك وعلى سنيني الي ضاعت ! وكنت افكر اني احرق قلبه اكثر لين شفت مخزن الغاز وتذكرت انه نقله لكني ادري وين نقله * سكتت وهي تتذكر وش قالت *

" تحسب أنك بكذا بتمنعني أني احرقه!؟ والله ان اوصل له لو انه في حضنك يا قاتل ابوي! ...."

.... وبعدها دخلت للكهف اتطمن على العنود وعاهدت نفسي اني ما اتركها لأبوك يذبحها وإني بساعدها دام ثارنا واحد!..

ويوم اتعبت امي مزنه وودوها بيت الطبيب انا رحت لبيتنا وقفلت الباب كنت ابي ابكي براحتي انا وقتها حسيت اني بفقد امي مره ثانيه لأول مره احس اني احبها يوم عرفت اني بخسرها وبسببي!.. ومثل كل مره انت جيت لي مدري شلون دخلت وانا مقفله الباب!؟ ويوم شفتك حسيت بقهر ليييه في كل مره انهار وابكي تكون انت جنبي لييه؟؟ وقتها صرخت عليك وقلت اطلع من عندي ما ابغى اشوفك وخرر عني! لكنك ماتركتني بقيت عندي لين هديت ووقتها قلت اضيع الموضوع قلت ان الكل يكرهني وشي زي كذا!
لكنك مثل كل مره بعد قلت كلام ضيعني اكثر انا مدري انت شلون تصف الكلام وترتبه! وتخليه يوصل لأعمق نقطه بقلبي! وقتها ماقدرت اسكت اكثر وبكيت كنت ابي افضفض لك قلت امي مزنه بتموت! شفت نظراتك لي واستوعبت اني قلت امي ماقلت يمه الي بالعاده اقولها بعدها رقعت الموضوع وقلت ان الحريم يقولون كذا مرررات كثير مرت علي وكنت بنفضح قدامك لكني كنت اتراجع واحاول ارقع الموضوع..
*بغصه* في كل مره كنت اضعف واوشك على اني انفضح قدامك كل ماقلت لي شي تتورد خدودي نبضاتي تتسارع غصب عني كل هذا!! *ضحكت ببكاء* وقتها قلت لي فهمتي وش قلت؟ كنت احس ان مافي احن من قلبك وطيبتك ولا اصفى من نيّتك لين اتذكر اسمك ولقبك والقاني اكرهك!..
سمعتك تقول بتوديها لمستشفى *بكت* ماتتخيل فرحتي بذيك اللحظه وقد ايش انت كبرت في عيني وقد ايش زاد حبي لك!! *ابتسمت بين دموعها* كنت اشوف لهفتك وعيونك وكنت اشوف غيرتك علي يوم طلعنا وانا كاشفه كنت اشوف شلون تخبيني وراك عشان مايشوفوني كنت اشوف كل شي والاحظ كل شي واحس بكل شي احس بعيونك وبشعورك الاحظ دقات الباب الثلاث الي تميزك ويفز قلبي ليا سمعتها اشوف نظراتك لي وخوفك علي وهذا الشي يوجعني اكثر ما انه يبسطني !..
يوم وديناها قعدت عندها لين انت جيت شفت وجهك مرهق وتعبان *نزلت راسها وعضت شفتها * ماقدرت اتركك ماقدرت اخليك تمنيت اني احضنك وتمنيت اني مااترك يدك قلبي كان يدق مدري شلون اشرح لك حالي كنت اشوفك كنك شي من اشيائي! شي يخصني شي لي انا ماياخذه احد غيري ولا يقرب منه احد غيري! ..
تركت امي مزنه الي نايمه وقربت منك وانت مغمض عيونك كنت احس بأحساس غريب مدري شلون اعبر لك عنه شي مدري كييف بس انه كله ينطق انك لي وهذا لحاله يكفيني! ...
*ابتسمت بين دموعها *جيت بسحبك لي فتحت عيونك وقلت فيك شي؟ وقتها مدري شلون بس كنت اناظر كل شي في وجهك عيونك، وخشمك! كل شي فيك كان عاجبني ولأول مره ادقق فيك النظر لذي الدرجه لأول مره افكر هالتفكير! نمت على رجولي وبقيت كل الوقت اتأملك والعب بشعرك متناسيه كل شي حولي!..

*عضت شفتها بخجل* بعدها صحيتك وانت قمت وكنت بتطلع تجيب لي اكل مير ما كنت ابي افارقك طلعت بسالفة جهاز تخطيط القلب وانا بس كنت ابيك تاخذني معك!..
*بغصه* اول ما رحنا انا وياك للمكان هذاك وشفت الأمهات مع اطفالهم *شهقت ببكاء* رجعت لي كل الذكريات مع امي في مكه كانت تطلعني كل يووم للمرجيحه العب فيها وكل جمعه كنا نطلع انا وأمي وابوي *ابتسمت بحنين* ضحكت ابوي وابتسامة امي للحين بقلبي للحين ما قدرت انساها لهجتهم المختلفه عن اهل مكه يد ابوي الي ماكانت تفارق يد امي ، بناجرها! ، ضحكتهم ونظراتهم لبعض كل ذول للحين مانسيتهم، كل يوم كانوا ينامون بجنبي ابوي على اليمين وامي على يساري كانت تقول "خلف لاتعودها على الدلع" وابوي يضحك ويقول "حقها تتدلع ذي ملاك ذي بنت قلبي!!!!" *انهارت تبكي * الاسم الي انت جيت وسميتني هو الأسم الي يرجعني لأبوي وكلامه لأبتسامته وضحكته، انت ياجواد!! *رفعت راسها ومسحت دموعها وهي تاخذ نفس* يوم انهرت ورجعت لي الذكريات انت كنت حاضني لصدرك وبعدها انت نزلت من السياره وانا استوعبت وش الي سويته وخفت انك تكشفني كنت متوتره ونزلت لك وانا احاول اني امسك نفسي وما ابكي وطيف اهلي حولي وذكرياتهم قابلتني بأبتسامه ومشيتني لين المرجيحه..
*بخجل* كنت استهبل عليك بخصوص الجوال يوم قلت ان جوادي فيه..*ناظرته ساكت وساهي ومارد عليها هي تحس بالي فيه الحين تدري بصدمته لكنها ماتدري وش تسوي! *.. بعد مارجعنا للديرة انت دخلتني للغرفه لكني تذكرت العنود الي من يوم رحنا وهي بغير اكل على طول وقفت ورحت للمطبخ اخذت اكل وكان طلوعي سهل لان مافيه احد وعلى طول رحت واخذت الثوب والشماغ ورحت لها.. *سكتت وهي تتذكر *
#فلاش باك..

كانت العنود للحين صاحيه النوم مجافيها وماقدرت تنام بسبب غرابة المكان حولها وكمية الأغراض الي قدام عيونها وهي ميته خوف
فزت من شافت الي دخل وواضح انه كان يركض من تنفسه السريع وهو متلثم ما تشوف منه شي وهو توه يجيها من المرة الأولى كان في يده اكل قرب وشال عنها اللاصق من فمها وبدأ يأكلها وهو للحين يتنفس بسرعه!
العنود بخوف: تكفى فكني من انت؟
رفع نظره لها وهو يشوفها من تحت النظارات لكنها ما تشوف شكله العنود: انا انحشت من ظلمهم لي وسجنهم ما ابغى انسجن مره ثانيه تكفى اتركني!
انا خاطرت بحياتي وطعنت الشيخ فاهد لجل افتك من ظلمه لي وسجنه لي من سبعه شهور تكفى لا تسجني انت بعد فكني وخلني انحاش لأهلي تكفى انا تعبت وتعذبت طول ذي الشهور لا يكون هذا هو مصيري بعد كل التعب

جمدت مكانها من سمعت صوته وهو يقول : انا ما سجنتك هِنا الا لجل احميك منهم هم في كل مكان يدورونك ولو شافوا لك ابسط اثر بتنذبحين يا العنود!

فتحت عيونها بصدمه وهي تناظر اليد الي ارتفعت وشال الشماغ من على وجهه شهقت بصدمه اكبر وهي تشوف الي قدامها وهزت راسها بالرفض اكثر من مره وهي مو مصدقه الي تشوفه عيونها
ملاك بأبتسامه هادئه: مو بس انتي خاطرتي بحياتك عشان تاخذين ثارك منهم حتى انا
هزت راسها بالرفض وهي ماتبي تصدق الي تشوفه قدامها
ملاك بتمعن لعيونها المصدومه: لا تنصدمين! هذي هي الحياه هِنا يا قاتل يا مقتول او اخذ بالثار!..
احمدي ربك اني شفتك قبل يذبحونك وجبتك هنا انا اعتبرتك امانه عندي وحميتك منهم وعلى استعداد احميك لين اتأكد ان اهلك طلعوا من الديره واطلعك لهم!

كانت موعها تنزل بغزاره وهي تناظر بعدم تصديق وجسمها يرتجف برعب نطقت بهمس وصدمه: المخازن!؟
اومئت" ملاك " بأبتسامه تحدي: انا الي احرقها من اربع سنين!
شهقت بصدمه ودموعها تنزل وعينها عليها

ملاك بهدوء: انا الي احرق قلب الشيخ على كل حلاله وامواله انا الي احرق قلب الشيخ على سمعته وعلى عياله انا الي باخذ روح الشيخ بيديّ ذول انا بذبحه واخذ ثاري!

سندت راسها بصدمه على جدار الكهف وهي تشاهق ببكاء وعدم تصديق

تنهدت ملاك وقالت: لا تنصدمين توك ما عرفتي شي انا احرقت كل شي يخص الشيخ انا اسري بين صفوفهم كما يسري الدم في اجسادهم ولا يحسون فيني انا احرقت بيت الشيخ مره وحده يوم كانوا بيذبحون مسفر لكن المره الأولى مب انا
العنود بهمس مصدوم: ولد عمي الي احرقه!
ابتسمت ملاك بخفه: ليه؟
العنود بدموع ووجع من الي تشوفه قدامها: لأنه يحبني
نطقت ملاك بأبتسامه لانها تذكرت امها وأبوها : وانتي ما تحبينه؟
العنود هزت راسها بالرفض وهي صدعت من الصدمه
جلست ملاك على الأرض وناظرتها: غبيه!
العنود ناظرتها بدموع: انا كنت احب الشيخ فاهد
ملاك بحقد وقهر: الشيخ جراح وعياله ما ينحبون ولا يحبون هم خونه غدارين!
العنود اومئت: كنت..
اومئت ملاك وناظرتها: الحين تطمني انتي هنا في امان والله ما يصيبك شي وانا اول ما اتأكد ان ابوك طلع من الديره بطلعك له ابشري بسعدك

العنود بغصه وهي تناظر بحزن عميق: ما يتملكك خوف؟
ملاك بأبتسامه حزن: الخوف اندفن من حياتي من سنين وما بقى في هالقلب إلا الكره والحقد والقسوه على الشيخ جراح وكل من له صله فيه وبجرايمه

نزلت العنود راسها وهي تبكي بصدمه من الي شافته وبعمرها ما توقعته ولا تخيلت! اكبر صدمه تلقتها في حياتها هي هذي هذي المره هي اقوى صدمه صارت لها في حياتها شلون كذا هم يدورون الفاعل من سنين وهو وسطهم هم يدورون الفاعل وهو واقف معاهم يبتسم على غبائهم هم يدورون طريقه يلقونه وهو امام عيونهم! ملاك طول عمرها قدامهم ولا شكو فيها مجرد شك!!!..

نطقت ملاك بهدوء: بكره اجيب لك ولدك
العنود بأستعجال: لا لا مابيه مابي اي شي يذكرني فيه
وفي الي عشته معه ما ابغاه

ملاك : زين تراه ولدك!
العنود صرخت ببكاء: مـــــــا بـــــــــيه!!
تنهدت ملاك: زين زين!

العنود سكتت وهي تتنفس بسرعه من انفعالها وصدت وجهها وهي تبكي بصمت ثم همست: فاهد مات؟

ملاك بهدوء : لا سمعت أنه حي!
تنهدت العنود
وسمعتها تقول: كنتي تبينه يموت؟
هزت راسها بلا: مابيه يموت ابيه يتذكرني كل ماحس بالوجع
ملاك بسخرية:ايه ادري لو كنتي تبينه يموت كنتي طعنتيه بقلبه
العنود سكتت
وقفت وتلثمت بالشماغ: ما ودي اتركك لحالك مير مقدر اتأخر اكثر وإن شاء الله باكر اجيك
اومئت العنود وهي تناظر الأجهزه الي حولها وودها لو تسئل عنهم!..

نزلت من الكهف بعد ما تطمنت على العنود ولمحت ضو جاي صوبها وقفت خلف صخره وهي عاقده حواجبها من يتجرأ يجي هنا سمعت همس يقرب وكان صوت تعرفه زين صوت الشيخ هادي! : قسم بالله ما اكمل يا بنت اقول لك جنن جنن
غيداء بحده: ما بقى كثير خلنا نكمل تكفى!
هادي: يااااارب فكني منها ياااارب

صرخوا الأثنين برعب من الحجر الي ارتمت عندهم
وركض هادي بكل سرعته وهو يسحب غيداء وراه وصدموا في جواد وطاحوا وصرخوا الإثنين

#باك
ضحكت ملاك بغصه: وقتها انتظرت لين رجعتوا للبيت ورجعت بعدكم بفتره بسيطه..
واليوم الي بعده دخل ولد صغير ينادي ام العنود لأن اهلها بيرجعون لديرتهم و.
سكتت من نظرات جواد لها وهو مصدوم وهز راسه بعدم تصديق
خذت نفس وقالت: اييه العنود انا الي هربتها وقتها طلعت ولأني مهبوله ماحد يسئل وين جايه ووين رايحه على طول ركضت لها وعلمتها...

#فلاش باك

"ملاك "
طلعت تركض للجبل بعد ما سمعت خبر إن أهل العنود طلعوا من الديره وهي تتلفت يمين يسار لاحد ينتبه عليـها وصلت للكهف ودخلت بسرعه وشالت الشماغ عنها
فزت العنود: وش فيه
ملاك بأبتسامه: جاك الفرج!
العنود ارتجفت: وش؟
ملاك بذات الأبتسامة: اهلك طلعوا من الديره والحين بتوقفين معي وبندور طريقه اطلعك فيها وتلقينهم في ديرتكم
العنود بكت بفرحه: يديني بفكهم
تقدمت ملاك وفكت يديها وارتدن على وراها من العنود الي حضنتها بفرحه وبكاء: جعل ربي ينولك الي ببالك ياقلبي جعل ربي يعينك ويوفقك ويعينك على اخذ حقك
ملاك بأبتسامه: خوفتيني وخري
العنود ابتعدت وهي تمسك خدودها وتهمس بلطف وحنان: تدري انك داهيه! وشلون كل هذا وبهالعمر الصغير
ملاك بأبتسامه حزن: رحم الله الي خلفوني ورثوا لي العقل

ابتسمت العنود: اذا وصلت لديرتنا بساعدك بالي اقدر عليه
ملاك اومئت بالرفض: لا ما يحتاج انتي كوني بخير بعيد عن هالعيله وإن شآء الله ثاري باخذه بيدي بس ابي منك ما تعلمين احد من ساعدك ولا كيف هربتي هذي اكبر مساعده ممكن تقدمينها لي
العنود بحنان وهي تناظر كل ملامح وجهها: من عيوني وربي قلبي يتقطع كل ما فكرت وشلون كانت هذي السنين طويله عليك!
ملاك بأبتسامه: لا تفكرين فيني انا بخير
العنود بلعت ريقها وقالت: فيني فضول اعرف شي!

ناظرها : وش؟

العنود: (مزنه ) تدري؟
بأبتسامه هزت راسها بالرفض: ماحد يدري غيرك وغير الي اخذهم ربي.
العنود نزلت دموعها: ليـه كل هذا!
ملاك شدت على يدها: اذا قالها ربي وحققت الي ببالي بجيك يوم واعلمك كل شي.
العنود: وعد؟
اومئت: وعد
العنود تقدمت وضمتها بحزن: خليك على حذر
اومئت: ابشري، وانتي بعد، وانتبهي لا تعلمين احد عني بتخربين كل شي سويته طول السنين!
العنود: من عيوني، طيب كيف بنطلع ما بينتبهون؟
ملاك: لا ما بينتبهون على شي بيت الشيخ جراح قايم حريم ورجال
العنود بترقب: فاهد صار له شي؟
ملاك: لا لكن الوكاد ان عروس الشيخ جواد بتوصل اليوم
اومئت العنود: الشيخ جواد مختلف عنهم
ملاك بمكابره وبرود: لا ما يختلف هو ابنهم ومهما تظاهر بالطيبه بيجي يوم ويحن العود لأصله بيجي يوم ويصير مثلهم
العنود: بس انا اشوفه مختلف عنهم
ملاك صدت : صدقيني كلهم مثل بعضهم
العنود بترقب: ما بيكون من ضمن الي منهم الثار؟
ملاك بأبتسامه غموض: لو وقف بوجهي بيكون من ضمنهم
العنود تنهدت: طيب شلون نطلع من هنا؟
سكتت شوي وهي تفكر وابتسمت بأتساع: عندي خطه
العنود: وش
ملاك برفعة حاجب: الخطـه هي (جواد بالعاده يخلي موتره مفتوح وكذا مره فتحته وكان مفتوح انتي بتنتظرين لين الناس تنام وبنزلين من الجبل وبتروحين على طول لموتر جواد وتدخلينه انتي تعرفينه؟
العنود: من وين اعرفه بالله!؟
ملاك ضحكت:صحيح زين هو عبارة عن جمس اسود اكيد تدرين عيال الشيخ وين يوقفون موتراتهم؟ وكلهم بيض عدا موتره اسود وانتي على طول بتدخلين فيه والباقي علي بنطلع من الديره على طريقتي وبوقفها على طريقتي ويوم يوقف الموتر انتي على طول بتنزلين وتكملين طريقك زين )
العنود بتوتر: لا لا ما ظنتي تنجح
ملاك ناظرت الكهف: بتنجح الوكاد انها بتنجح
ناظرت العنود المكان الي تناظره وقالت: هذول وش؟
ضحكت ملاك: ذول الي يخافون منهم ويحسبونهم جن
العنود ناظرت الأجهزه الكبيره والصوتيات
قالت بصدمه: من وين جاك كل ذول؟
ملاك بأبتسامه تنهدت: من الي عسى ربي ما يحرمني منه ويديمه تاج على راسي
العنود بصدمه: من؟
ملاك: بعدين اعلمك الحين لازم ارجع انا
العنود: طيب انا بستنى هنا وعلى الوقت بنفذ الخطه
اومئت: اي جديد بعلمك مع السلامه
العنود: لحظه
ناظرتها ملاك ووقفت العنود وقربت تضمها: ربي يحفظك ما بنسى جميلك طول ما انا عايشه
ملاك: ذكرتيني بسئلك؟
العنود: وش؟
ملاك: من الي ساعدك
العنود ابتسمت: غيداء!
ملاك ضحكت بصدمه: عندي احساس والله، البارح جايه هي والشيخ هادي بيكتشفون الكهف
العنود بصدمه: لا!
ملاك: ههههه هذا الي صار... يعني اقدر استفيد منها؟
العنود: ما اتوقع البنت مطفوقه لا تخرب عليك كل شي
ملاك: بشوف بشوف يلا مع السلامه
العنود بأبتسامه حنان: ربي يحفظك ويوفقك.

رجعت تجلس على الفراش الي بطرف الكهف وهي تناظر الأجهزه والصوتيات: والله داهيه! ..
نزلت ملاك وشالت الثوب والشماغ ولبست عبايتها بسرعه وراحت لبيت الشيخ وقفت على الباب والتفتت تناظر الي حولها شافت رحمه جايه بوزت وكشرت وجهها ويوم جت لها قالت ان مزنه ماترد عليها.!

وفي الليل في بيت رحمه بعد ما طلع مسفر ناظرت اهله كلهم يبكون ابتسمت بخفه وصار وقت انها تنفذ خطتها ناظرتهم يبكون مسكت راسها بقوه وهي تصرخ من وجعه الي داهمها 'تمثيل'
وقفت ضحى بسرعه لها: بسم الله عليك وش فيك
ملاك شدت على راسها: يعورني يعورني
ضمتها وضحى وهي تسمي عليها ووقفت وهي تدور لها شي يسكن ألمها اما ملاك بقت تضرب راسها بوجع وهي تبكي وكلهم خافوا عليها والتموا حولها بينما مزنه كانت نايمه او نقول فاقده وعيها من وجعها... ومو عارفه وش فيها ملاك
رحمه طلعت ملاك للمجلس والبنات معها وبدوا يهدونها ووضحى تخلط اعشاب مسكنه للصداع
اما ملاك كانت تصر على اسنانه وتضرب راسها وتبكي بوجع مصطنع! ..

غمضت عيونها تدّعي النوم وجلسوا حولها بحزن
وضحى: الله يشفيها يارب وش صابها
رحمه بحزن: مدري مدري الله يشفيها
وضحى تنهدت وانسدحت بجنب ملاك: بننام عندها لا تصحى وتتعب بعد
رحمه اومئت: زين ماتسوون
دخلت بنت رحمه الثانيه: يمه
رحمه ناظرتها: وش فيك
جلست بحماس : قبل شوي جتني بنت عفراء وقالت ان الشيخ جواد كان معصب!
رحمه عقدت حواجبها: معصب من وشو؟
بنت رحمه: تقول ان الشيخه غرور قالت يدخل على عروسته اهلها بيجون الصباح مير مايبيها!!!
رحمه شهقت: وش الي مايبيها زوجته هي!
بنت رحمه رفعت كتوفها: مدري هي قالت كذا والوكاد ان الشيخ جواد ماجازت له ذي الحرمه!
واستمر كلامهم لين فرشوا لهم البطانيات وناموا حولها
وهي تسمع كلامهم..
ناظرت الي حولها كلهم نيام شدت على راسها وهي تبكي من وجعه هزت وضحى على الخفيف متعمده ماتصحيها و وضحى نايمه ومو حولها بكت اكثر عشان تروح لجواد ووجهها مغرق دموع وراحت لزهور وهي تحركها لكنها نايمه وقفت وهي تمسك راسها وتطلع من الغرفه وهي تبكي دخلت لمزنه وشافتها نايمه طلعت تبكي في الصاله وهي تحس راسها كل ماله زاد صداعه اكثر صرخت بوجع مصطنع ووقفت بجنون وهي تضرب راسها بوجع خوف من احد يراقبها من البنات! وطلعت للحوش وهي تبكي وتشد على راسها همست بوجع: يمه... يمه...
نطقت بثقل ووجع: جواد!
وقفت وهي تشد على راسها وتبكي وفتحت باب البيت وطلعت في الشارع تبكي وتشد على راسها وتصرخ بوجع.. وفي بالها جواد لازم توصل له
شافت العنود داخله للديره اشرت لها بسرعه وهي تبكي وتصارخ وأشرت لها على موتر جواد ركضت العنود بسرعه لموتره ودخلت وتخبت وهي ترتجف وتشوف ملاك تصارخ وتمسك راسها! ..

..
..
..

فتح باب موتره ودخلها وركب وحرك بكل سرعة عنده طالع من الديره الي صحت كلها على بكاء ملاك..

سحبها له وهو يضمها بقوه وعينه على الطريق وجسمه يرجف بخوف عليها كان صوت بكاها يقطع قلبه صوت بكاها يدخل لأعمق نقطه في قلبه كأنه سهم!

كان يسوق بسرعه كبيره ورجفته اكبر ومو قادر يركز من الخوف عليها حس فيها تدفه ناظرها ورجع نظره بسرعه للطريق يتفادى السيارات ورجع نظره له شافها ماسكه فمها وفهم انها بترجع!!!!

كانت تدقه تبيه يوقف هداء السرعه ووقف على جنب وفتحت ملاك الباب وطلعت تركض فتح الباب ونزل يركض خلفها بخوف عليها
رفعت العنود راسها وبلعت ريقها وهي تشوف ملاك تركض وجواد يركض خلفها وقفت بسرعه وطلعت من الموتر وهي تضم عبايتها عليها وتركض بكل سرعتها مبتعده عن الموتر وماهي الا ثواني وشافت الموتر تحرك ومشوا تنهدت وهمست: ربي يحفظك يا ملاك ربي يحفظك ..
بدت تمشي بخوف وهي تشد العبايه عليها..
ناظرت حولها وتبسمت من عرفت المنطقه مابقى الا قليل وتوصل لديرتها!
بدت تمشي العنود وهي بتسمه بأمتنان لملاك الي طلعتها من الديره الحين صارت بعيد عن قيود فاهد الحين تحررت من كل قيوده وظلمه الحين اخيرا استنشقت هواء الحريه....
وقفت وهي تناظر ديرتها الي مضويه نزلت دموعها ورفعت يدها لفمها وهي تبكي مو مصدقه انها وصلت لديرتها اخيرا بعد كل التعب وكل العناء الي واجهته. الحين راح كل التعب من شافت ديرة اهلها، ركضت بكل قوتها وهي تبكي وتنادي بصوتها: يااااشيــــــــــــخ هزززاع يــــــــــــــــــــــــــبه..

..
#بــــــــــاك

ناظرت جواد الي عينه عليها ودمعته بطرف عينه والصدمه واضحه عليه..
بلعت ريقها وقالت: وصلنا للمستشفى وكنت لازلت في تمثيليتي لين دخلتوا علي وسمعت الدكتور يقول ان كل شي سليم وقتها حسيت اني رميت نفسي في مصيبه
وانك بتشك فيني بديت ارتجف من الخوف ان كل الي خططت له ينتهي بسبب غبائي انا كيف ماحسبت حساب هالشي وقتها كنت انت ضامني لصدرك وقلت لي بسم الله عليك ليه ترجفين...
بعدها سمعت الدكتور يقول لك ان ممكن اكون مسحوره وقتها جازت لي الفكره لازم امثل اني مسحوره وشغلت انت قرآن ومثلت لكنك قلت انك مشغل قرآن من قبل عندي وماصار شي هنا من جد توترت وعصبت منك وحسيت ودي اذبحك انهارت اعصابي مابيك تكشفني في وقت مو وقته ابداً بديت اصارخ بعصبيه وابي اضربك لين جاء الدكتور وقيدني حسيت اني بجن ماابيك تدري وتكشفني ابي اوصل لهدفي!!.
لين ضربت لي أبره ومدري وش صار بعدها!؟
_

_________..

"راجح"
كان جالس في حوش بيتهم وسرحان للحين النوم مجافيه مو قادر ينام وكل ماغمضت عينه من الأساس جايته الكوابيس وكلها عن مسفر الي يبكي ويتحسب عليه شد على راسه ووقف بضيق وناظر حوش بيتهم وتنهد بتعب وده لو يروح لأبوصلاح ويعترف له بكل شي لكنه خايف خايف كثير ومتردد تنهد بضيق مره ثانيه وغمض عيونه وهو يشد على يده واخيرا قرر انه يتخذ القرار الصح ويتوجه لأبو صلاح يعلمه كل شي والي يصير يصير ماعد يقدر يتحمّل اكثر من كذا تأنيب الضمير يموته على البطيئ طلع من البيت بأستعجال قبل يغير رأيه ويتراجع توجه لبيت ابو صلاح ودق الباب بأستمرار وكأنه يقتل افكاره انه ينحاش بصوت الباب الي انفتح وناظره ابو صلاح بعصبيه: وكسررر يكسر يديك وراك تدق هالون؟
راجح بلع ريقه: انا اعتذر منك السموحه
ابو صلاح بحده: وش تبي؟.
راجح بلع ريقه بصعوبة: فيه موضوع ابيك فيه
ابو صلاح بتكشيره: وش تبي!؟
راجح ناظر حواليه وتطمن ان فيه ناس يمشون مايقدر يستفرد فيه ابو صلاح: الموضوع بخصوص مسفر!
ابو صلاح بعصبيه: قطع يقطع لسانك انت وطاريه انقلع لعن الله ذا الوجه مابي اسمع عنه اي شي
راجح بتوتر: لزوم اعلمك عنه الموضوع يخصه هو وبنتك موضوع ضروري!
ابو صلاح بحده: قلت لك ماني سامع عنهم شي وانفهق من قدامي!
راجح بقهر صرخ : انا الييي كتبـــــــــــت الرسالـــــــــه مببب مسفرررر..
بهتت ملامح ابو صلاح والي مارين التفتو لراجح بصدمه
راجح برجفه: انتو ظلمتوهم ومو مسفر الي كنت الرساله انا الي كتبتها!! وماكتبتها عن قصد يشهد الله اني في لحظة غباء مني كتبتها جت بنتك لمسفر وطلبت فستان و.........
"بدأ بشرح لهم كل شي وصلاح طلع من البيت وهجم عليه يضربه واجتمعوا الرجال يفكونهم عن بعضهم وابو صلاح في حالة صدمه ومستند على الجدار وهو يناظر ابنه الي يضرب في راجح والرجال يفكونهم عن بعض..

______...

" الشيخ هزاع "

ناظر العنود الي جالسه بصمت وجواد الصغير بحضنها وامها تتقهوى وبتار ساكت قال ببرود: اليوم ابتصرف مع فاهد
رفعت راسها بسرعه وناظرته
الشيخ هزاع شد على يده: لا اسمع منك كلمه وحده انا بتصرف معاه ووالله ان اوجعهم بالي يكرهون!
العنود ناظرت بتار الي صار على اسنانه وابوه حالف مايطلع من البيت بعدما عرف بالسالفه يدري بولده

العنود بلعت ريقها وغمضت عيونها تتذكر الي جاها من فاهد همست: سوي الي تبيه يا شيخ.
الشيخ هزاع وقف وقال بحده: بتار تعال معي
وقف بتار وخطواته واضح عليها العصبيه وطلعوا من البيت تقدمت ام العنود وضمت بنتها وهمست: حسبي الله ونعم الوكيل فيهم كل هذا يطلع منهم
غمضت عيونها ونزلت دموعها وشدت ولدها لصدرها..
وراسها على صدر امها..

_____
"الشيخ جراح "
كانوا جالسين في المجلس الي اصبح اثراً بعد عين السواد مغطيه من كل الجهات..
ارتاحت قلوبهم بعد ماشافوا جواد يمشي وطمنهم انه بخير ودخل للبيت بسرعه تركوه لين يجي هو بنفسه يكلمهم بكل شي صار معه...

الشيخ جراح بتعب واضح عليه: اجل دام جواد عرف عنه وشاف وجهه الوكاد بيجي الحين يعلمنا عنه وبتنتهي كل ذي الفوضى بينتهي كل هالعب الي من اربع سنين ...
فاهد: صادق يا الشيخ وو الله ان ينال عقابه بأبشع طريقه
اومئ الشيخ جراح: ايييه والله ان يتمنى الموت ومايلاقيه .
حمد كان سرحان وفكره عند جواد وشو له يدخل للبيت قبل يجيهم؟.. ليه يدخل للبيت قبل يعلمهم من الفاعل والمفترض انه جاهم اول شي وقال هو فلان الي يحرق!
كانت تدور في بالي صقر نفس الأسئله لأن الوضع مُريب...
رفع صقر راسه يسمع الشيخ جراح الي يتكلم مع عياله حول الفاعل وكيف بيعاقبه ومن ذا الكلام!
شد على يده وهو يتذكر خوفه على جواد ورعبه من ان يصيبه شي تنهد براحه انه بخير وسند راسه على ورى يفكر في جواد وتصرفات جواد!...

____
"جواد"
جلس على السرير وراسه بين يديه وملاك جالسه على الأرض وضامه رجولها لصدرها والصمت سيد المكان افكار تعصف فيهم وهواجيس طويله مالها نهايه...
كانت تسمع تنهيدات تطلع من صدره بعد موجة انهيار مر فيها.

سمعت همسه الكسير وهو يقول: ‏كنت اظنك غير يامقوى عمَاي..

رفعت نظرها له وقالت: كفى معاتب.. لاتعاتبني على شي اقوى مني ومنك تبيني اسامح؟ تبيني اغفر؟ زين! رجع لي امي وابوي رجع لي سنيني الي راحت تقدر؟

جواد: اكتشفت ان مقولة لاتطّول ثوب هقواتك وتعثر به صحيحه!..
ملاك وقفت وتقدمت منه وجلست على السرير بجنبه وهمست بغصه ‏: " ترا وعد المحبّه دين " .
رفع راسه وناظرها بوجع وابتسم بسخرية: ليه هو بقى فيها محبه؟
ملاك ناظرته: بتعلم علي؟
تنهد وصد بوجهه ملاك ابتسمت: كنت اقول الحب كذبه والهوى دقه قديمه مير فكرت فيها وقلت امي وابوي ماتوا عشانهم يحبون بعض والوكاد ان مصير الي يحب الموت! ..
جواد ناظرها وميل راسه وهمس: شلون قدرتي؟
ملاك ابتسمت وناظرته وماردت
جواد: قدرتي تلعبين فيني!
ملاك صدت وجهها عنه
جواد بوجع: ليه؟ ليه سلمتي لي نفسك؟!
ملاك ناظرته وماردت
جواد بغصه: لانك تبيني ولا خطه جديده؟
ملاك بلعت ريقها وهمست: خطه...
غمض عيونه بقهر وضحك بوجع ونزلت دموعه: في ذي بعد!
ملاك شدت على يديها وقالت: اضطريت، وماتتخيل وش كثر كان صعب علي..
جواد بقهر: اسكتي لاتتكلمين
ملاك ابتسمت بحزن: تتخيل كمية الوجع ابوي خلاني امثل سنوات عشان عيال الشيخ مايقربون مني وصرت زوجة ولد الشيخ
جواد ارتجف فكه ويحس بوجع في قلبه ونزل راسه وهو يحس انه منقرف من نفسه كيف لعبت فيه وعليه واستخفت بمشاعره همس: وش الي اجبرك تكونين لي؟
ملاك ابتسمت بحزن ورجعت بذاكرتها وهي تكلمه..
#فلاش باك..
في الفندق..
انسدحت على السرير وحست بشي تحتها اخذته وكان جوال جواد قلبته بين يديها بأستغراب ثم ابتسمت وخطر ببالها شي وقفت بسرعه وسمعت المويه في الحمام رجعت للسرير وفتحت الجوال ودخلت رقم جابر الي حافظته عن قلب وكان عندها جوال في الكهف وتعلمت كثير فيه وكانت ترسل له كل مره يجيب شي لها، كتبت رقم جابر ورسلت له " انا ملاك وش الوضع عندك وش يقول جراح؟! "
رد عليها بسرعه" يقول انه بيطلقك من جواد دامه مادخل عليك وبيزوجك لرجال من رجال الديره "
كتبت " طيب، لاعد ترسل هذا جوال جواد "
حذفت الرسايل وغمضت عيونها وهي تفكر تنهدت بضيق ومالها الا انها تصير زوجته فعلاً عشان لو رجعوا ما يصير الي خطط له جراح!.

#باك.
جواد ضحك بحرقة قلب وناظرها بوجع: عشان كذا قال لي صقر انه مستغرب ليه في كل مره تضبط معي، وعشان كذا كنتي الصباح تبكين وخامةً عمرك!، كنتي مشمئزة مني؟ عشان ولد جراح قرب منك؟
ملاك هزت راسها بالرفض...
جواد هز راسه بالموافقه: الا هذا هو وش بقى بعد؟ باقي شي خططتي له ومدري عنه؟ باقي شعور فيني استهزئتي فيه؟ قربي منك الحين يخليك تشمئزين مني؟
هزت راسها بالرفض بصمت..
جواد وقف وناظرها وضرب صدره بحرقه: اذا صعب عليك رد الجمايل على الأقل لا تنسينها، انا طالع الحين وانادي لك جابر ياخذك وماعد ابي اشوفك تطلعين من ذي الديره الحين..
ملاك ناظرته وماردت
جواد وانفاسه متسارعه ويحس انه بيبكي مره ثانيه من الوجع والقهر الي بصدره ضرب على قلبه وقال بحرقه : الله يبلاك بالي بلاني..
ناظرته ونزلت دموعها ورمشت اكثر من مره
جواد همس بوجع: انا ماني مثلك ولاني معلم عليك الحين تطلعين من ذي الديره ومعد ابي اسمع حتى اسمك.!.....‏أنا اللي لو عفت والله ‏لو تاقف ع حد الهدب م تلمحك عيني...
ملاك وقفت وتقدمت منه بقوه وتحدي وابتسمت بسخرية: ماتهمني لا انت ولا عشره من امثالك انا قد قلتها من قبل انت ولد جراح ومهما تظاهرت بالطيبه بيجي يوم ويحن العود
جواد شد على ذراعها بقوه وهمس ببحه: انا لو اتصرف بطبع ابوي كان الحين وديتك بيدي للساحه وخليتهم يذبحونك وسلمتك للشيخ جراح لكني انا جواد، جواد الي مايمثل إلا نفسه وبخليك تروحين وماني معلم عنك لجل الأيام الماضيه ولجل النبض الي نبض لك ولا انتي ماتستاهلين!
ملاك ابتسمت وهمست: حسبت اني ليا علمتك بالي تحمله قلبي طول السنين وعلمتك بجرحيِ الندي بيجيني منك الضماد بس مادريت إن الضماد الي منك أقسى من الجرح الندي...حسبتك بتعطيني الحق وبتشوف الوجع الي عشته بس ماعطيتن!..
جواد ناظرها بحده: ما هو خطاي الي عشتيه طول السنين هذي! .. خطاي إني عطيتك قلب ما باعك ولا خلاك تركتيه ينزف بوسط الطريق ورحتي مصخيةً به .
والحين بتطلعين الحين انتي وابوك جابر وماعد ابي اشوف لك زول!.
ملاك اومئت: ابشر ابطلع لكن اسمعها مني كلمة ورب البيت ‏حتى و إن حاولت جاهدًا عشان تنساني بتجيبك مخيّلتك لي على أي حال ومثل ما علقت الهنوف بقلب الأب ماهو سهل تطلع بنتها من قلب ولده! ..
اقفت عنه وجت بتطلع سحبها بقوه وناظرها بحده
ملاك انتظرته يقول شي
بلع ريقه وقال: بتنهجين بذي السهوله
تبسمت ملاك وقالت: تهقى؟
هز راسه بالرفض: وحدة مثلك ماعد اثق فيها؟
ضحكت وقربت منه وهمست: صرت تعرفني!
جواد هز راسه: انتي قلتيها من قبل انا ما أعرفك الأصح اني مااثق فيك
اومئت: كله واحد ومعك حق لاتثق لان من سابع المستحيلات اني اطلع بذي السهوله ابوك بيموت! بيموت حتى لو راح راسي هذا..
جواد طال صمته وهو يناظرها ابتسمت بخفه: رح علمه عشان تحميه لأن صدقني والي خلقك ماني طالعه من ذي الديره لين اخذ حقي..
جواد شد على ذراعها وهمس: اجل ماانتي طالعه من هنيا لين اخذك انا بيدي واطلعك من ذي الديره ماني سامح لك تأذين ابوي واكون مساعد لك!
ملاك ابتسمت: ايوه كذا ابيك تطلع على حقيقتك ترى عادي العمر مره اكشف عمرك هذاني كشفت عمري لك وعلمتك بالي في بالي علمني بالي في بالك قول انا بوقف في وجهك وبمنعك تأذين ابوي! قولها!..
جواد هز راسه: بقولها وش الي يمنعن؟
ملاك تنهدت: مايمنعك شي انت ولد جراح!.

___
"حمد"
دخل للبيت بيشوف جواد ماقدر يصبر اكثر
وصل للصاله وشاف جمانه جالسه وسرحانه وواضح انها تخطط لشي عقد حواجبه ومايبي يقابلها بعد ما سوت سواتها مع الضيفة! .. تخطاها ووهي وقفت بسرعه ومسكت ذراعه: شيخ حمد!
التفت لها ونفض يده منها: لاتهرجين معاي انا مابقيتك هنيا الا شفقة بك ولا مالي في خاطر يابنت سالم..
جمانه بغصه: كله منها شنوح يا شيخ تاخذها شنوووح تحرق قلبي
حمد بحده: ابسط عقاب لك انا ماكنت افكر فيها ولا ابيها مير انتي بتصرفاتك حديتيني اخذها
جمانه برجاء: تكفى تكفى خلها وانا بتعدل وعد وعد
حمد هز راسه: ماني متخلي عنها البنت صارت لي ولا انتي ولاعشر مثلك تثني كلمتي من جبتك زوجةً لي وانا اقول تعدلي ياجمانه تعدلي يبنت سالم مير ماتفقهين الهرج كرهتيني في حياتي بهرجك وأثرتي على نور صارت تشابهك في الطبع في كثير احيان تسوي حركاتك..
جمانه بدموع: اوعد..
حمد: جمانه انفهقي من قدام عيني لا تحديني على شي يأذيك!
جمانه بقهر: الله يبلاها بالمر...
شدها حمد بحده من ذراعها وقال: اقسم بمن احل القسم ان ماتركتي البنت عنك ان يصيبك بلا..
جمانه نفضت يدها ببكاء وركضت لغرفتها زفر حمد ومسح وجهه وهو ضايقةً به الوسيعه ناظر الصاله كانت فاضيه تنهد وراح متوجه لغرفة جواد بيشوفه...

_
" غيداء "
ملت وطفشت في الغرفه وهي تسمع عمتها زوجة عمها معصبه على هديل من هذاك اليوم وهي ماغير تصارخ عليها وتهزئها شلون توافق على حمد وهي تشوف حياتهم كيف ووضع ديرتهم وهديل كانت خايفه ومتردده مير كل ماتذكرت جمانه اصرت انها تحرق قلبها على زوجها وتاخذه منها جمانه استحقرتها واهانتها وطعنت في شرفها وقالت بتعطيها واحد من الصبيان الي عند حمد !.. حلفت ان تاخذ حمد منها وتهبلها زود هبالها! ..
وقف غيداء بطفش منهم ومن الحال مابقى لها لا لابتوت ولا شي يسليها غير جوالها وطفشت منه طلعت من الغرفه وهي تمشي بتملل في البيت الكبير والواسع والطفش واضح عليها شافت حمد يمشي بلعت ريقها ونادته بهدوء: حمد!
التفت حمد وعقد حواجبه يوم شافها تقدمت منه غيداء وابتسمت بخفه: انا غيداء اخت صقر واخت هديل...
اومئ حمد وما عرف وش يقول
غيداء: معليش اسئلك!
حمد عاقد حواجبه: سمي؟
غيداء بتوتر: ليه تبي اختي هديل؟ وانت متزوج ثنتين!
ابتسم حمد بخفه وقال: هذا سؤال؟
غيداء: اتوقع
حمد ابتسم: يمكن الله كاتب لي نصيب معها!
غيداء ميلت فمها وهزت راسها ..

دخل هادي وهو عاقد حواجبه بعد ما صرخ عليه الشيخ جراح ينهج ينادي على جواد الي ابطى عليهم وزادت تعقيدة حواجبه اكثر وهو يشوف حمد وغيداء واقفين تقدم منهم وتحنحن
التفتت غيداء له وابتسمت بهدوء وحمد ناظرهم بصمت
هادي: ابوي يقول يبي جواد وينه يجي يعلمهم عن الفاعل والوكاد ابوي معصب بالحيل وشوي وينحرق في مكانه من العصبيه..
تنهد حمد: انا مدري شنوحه جواد ابطى ولا طلع! المفترض انه جانا وقال عن الفاعل لجل يتأدب مير دخل للبيت
هادي بتوتر: تدري يمكن انه مجروح ودخل يداوي جرحه يمكن ان فيه بلا ويبينا ما نخاف عليه
حمد فتح عيونه بقوه: اييي بالله انا وشلون مافكرت فيها!!! ..
غيداء كانت واقفه تسمعهم بصمت
وحمد مشى بسرعه متوجه لغرفة جواد...
هادي التفت لغيداء: شعندك واقفه معاه؟
غيداء تنهدت: بسئله ليه خطب اختي هديل..
عقد حواجبه هادي وقال: وانتي وش عليك فيهم؟
غيداء رفعت حاجب: ابد
هادي صد عنها وهو ينتظر طلوع جواد
غيداء بهدوء: سمعت من اختي اننا بنرجع بيتنا
التفت لها هادي وحس بشي غريب يتحرك بداخل صدره
غيداء ابتسمت بعبط: بتشتاق لي؟
هادي صد: وشنوحه اشتاق لك؟
غيداء ابتسمت: عشاني بشتاق لك!
عض خده من داخل يكتم احساسه وتوتره...
غيداء تنهدت: يلا باي
مشت عنه وهو رفع راسه وناظرها وهي تبتعد عنه راجعه للغرفه...
_
"جواد"
كان للحين واقف وعينه عليها بحده سمع الباب يندق ترك يدها وتوجه للباب وفتحه بدون ما يسئل شاف حمد واقف امامه اردف حمد بسرعه: جواد! .. وش نوحك ابطيت؟ تعال علمنا وش السالفه الشيخ جراح ينتظر ومعه الرجال يبون يعرفون منهو؟
تنهد جواد وقال: ماشفت وجهه
فتحت عيونها بصدمه وهي تسمع كلامه
حمد عقد حواجبه: شلون ماشفت وجهه؟
جواد شد على يده: ماشفت وجهه
حمد مسكه من ياقته وقال بحده: ترى صقر علمنا انك طحت مصدوم علمنا من هووو قبل يجيك الضر من ابوي
جواد غمض عيونه بضعف ونزل راسه
حمد: وش فيك!!!؟
جواد ناظر عيون حمد وطاحت دموعه
وحمد مصدوم منه همس: جواد! وشنوحك؟
جواد هز راسه بالرفض..
وجاء بيدخل الغرفه مسكه حمد بقوه وكنه بدأ يفهم اول شي صدمة جواد ثاني شي توجهه لغرفته قبلهم!؟؟ هذا يعني ان الفاعل هو......؟؟..
ناظره بأستفهام وصدمه: جواد هي؟؟
جواد غمض عيونه بقوه وشد على يديه
حمد فتح عيونه بصدمه ودف جواد ودخل للغرفه والشرار يتطاير من عيونه وزادت صدمته وهو يشوفها واقفه بكل شموخ ومكتفه يديها وتناظرهم بكل تحدي!!

همس حمد بصدمه: كـ.. كيف؟
جواد قفل الباب وناظر حمد: مابتعلم عليها! هي بتطلع من ذي الديره ومعد ابي اشوف وجهها..
حمد بصراخ: بكيييفك هووو؟؟؟ والله العظيم ان تاخذ جزاها وان تطلع معاي الحين للشيخ!
جواد وقف قدامه: لا.... البنت بتطلع من الديره
حمد دف جواد عنه وقال بصراخ: انتتتت معد بككك عقل وشلووون تطلع من الديره اصلاً وشلون هييي الي سوت كل هذا وهي مهبوله وشششش العلم؟؟؟
ملاك ببرود وهي تحس ان كل شي انتهى خلاص وقرب الأنتقام : ماني مهبوله كنت العب فيكم واحد واحد...
حمد فتح عيونه بصدمه وانقض عليها ودفه جواد وصرخ: لا تقرب منهــــــــــــا!!!
حمد هجم على جواد وبدأ يضربه بكل قوته وهو يصرخ عليه: اصحى على عمرررك، اصحى على عمرررك ياجواد!!!! فتح عيوونك!!! كمممم مره قلت لك ذيي بنت خلف والهنوف؟؟؟ كممممم مره؟؟؟؟
ماكانت من جواد أي حركه ولا دافع عن عمره وكان بس يتلقى الضربات من حمد وهو متأكد انه يستاهلها كلها...
ملاك لاحظت عنف حمد على جواد وارتجفت كان منظر جواد امامها وهو ينضرب يوجعها لكنها ماحاولت تبعد حمد عنه والتفتت للباب بسرعه مستغله انشغالهم وفتحته وركضت طالعه لبرا حمد رفع راسه على صوت الباب وجواد صرخ بوجع: بتذبـــــــــــح ابوووووي!
وقف حمد بصدمه وركض بكل سرعته لاحقها وجواد وقف وهو يطلع خلفهم ...

__
"الشيخ جراح"
كان للحين في المجلس وينتظر جواد يجيه وبجنبه فاهد وباقي عياله رفع راسه للي دخل المجلس ووقف بتفاجأ وهو يشوف الشيخ هزاع وبجنبه ولده بتار وواضح عليهم العصبيه وكان بجنب بتار رجال شايب واقف معهم..
الشيخ جراح واقف وبجنبه فاهد الي وقف وبلع ريقه بتفاجأ من وجودهم!
الشيخ هزاع شد على عصاه: مابترحبون فينا؟
الشيخ جراح بأرتباك: حياك الله يا شيخ هزاع حياك الله تفضل!
الشيخ هزاع ابتسم بسخرية: ما لنا مكان بعد اليوم في دارك يا جراح!
غمض عيونه وعرف ان هزاع يدري بكل شي : وش العلم ي هزاع؟
الشيخ هزاع: العلم ان الخوّي صار يغدر خويه والرجال الوافيه قلّت واصبح وجودها نادر!
الشيخ جراح رفع راسه وهو يشد على عصاه
الشيخ هزاع بحده: عطيتكم بنتي امانه صنتوا الأمانه ولا يافاهد؟
فاهد بلع ريقه وناظره وماعرف وش يقول
الشيخ هزاع: فاااهد ماكنت تستحي يوم اسئلك عن بنتي وتقول انها بخير؟؟؟
فاهد: ماجاها مني الأ..
بتار بمقاطعه وعصبيه: الا الضرر والمصايب يا فاهد تحسسسب ما وراها رجال الا والله ان وراها الي يربونك ويربون امثالك بنتنا ماهييي لعبه عندك ولا جاريه لجل تسجنها وتعذبها!
كان الي في المجلس في حالة صدمه ومنهم أهل صقر
الشيخ هزاع: عطيناك بنتنا واحنا واثقين انك رجال لكنك سجنتها وعنفتها طول ذي المده ..
ابو هديل شد على يده بخوف على بنته وناظر ابوه واخوانه!
الشيخ هزاع: تحسبنااااا ما بنعررف ولا وششش؟؟؟
فاهد وهو يحس برجفه تملكته وشد على يده وقال: صلِّ على النبي وخل اعلمك!
هزاع بصراخ هز المجلس: مااااعد ابي منك تعلمنيييي شي العلم وصلني...
مسح وجهه فاهد وقال: خل افهمك بنتك الـ...
هزاع بمقاطعه: قلت لا تعلمني شي الي ابيه وصلني والحين علي الحرام ان حق بنتي بينوخذ من عيونكم ياجراح ويا فاهد..
جراح بحده: لا تهدد يا هزاع وانت بمجلسنا
هزاع بسخرية: بتذبحني؟؟ بتذبحني مثل ماذبح ولدك فاهد ابن ذا المسكين!
اشر على الشايب الي كان واقف معهم
فاهد فتح عيونه بقوه وهو يشوف الشايب!
هزاع: ذا الرجال الي واقف امامكم انذبح ولده لكل دم بارد لجل انه جاء وقال باخذ حقي من الحصاد طول عمره وهو يشتغل عند جراح ويوم جاء، بيطلب حقه ذبحه فااهد!
اختل توازن جد صقر وهو مصدوم من كل شي وعياله سندوه وهم مصدومين مثله وصقر فاتح عيونه على الأخر بخوف!..
الشيخ هزاع مكمل كلامه: والله عز وجل حرم قتل النفس بغير حق وقال في مُحكم كتابه:
(وَلَا تَقْتُلُوا النَّفْسَ الَّتِي حَرَّمَ اللهُ إِلَّا بِالْحَقِّ وَمَنْ قُتِلَ مَظْلُومًا فَقَدْ جَعَلْنَا لِوَلِيِّهِ سُلْطَانًا فَلَا يُسْرِفْ فِي الْقَتْلِ إِنَّهُ كَانَ مَنْصُورًا)

وهذا ابوه جايكم ياخذ حق ولده
انتفض جراح بعصبيه وصرخ: تخسى يا هززززاع وتعقببب والله ان اليد الي تنمد على فاااهد تنقطع والي يرشه بمويه نرششه بالدم! وخل الدم ياصل للركب...

الشيخ هزاع ابتسم بسخرية: هذا حق ولده اما حق بنتنا فحن بناخذه الله عز وجل يقول:
(فَإِمْسَاكٌ بِمَعْرُوفٍ أَوْ تَسْرِيحٌ بِإِحْسَانٍ وَلَا يَحِلُّ لَكُمْ أَنْ تَأْخُذُوا مِمَّا آَتَيْتُمُوهُنَّ شَيْئًا إِلَّا أَنْ يَخَافَا أَلَّا يُقِيمَا حُدُودَ اللهِ فَإِنْ خِفْتُمْ أَلَّا يُقِيمَا حُدُودَ اللهِ فَلَا جُنَاحَ عَلَيْهِمَا فِيمَا افْتَدَتْ بِهِ تِلْكَ حُدُودُ اللهِ فَلَا تَعْتَدُوهَا وَمَنْ يَتَعَدَّ حُدُودَ اللهِ فَأُولَئِكَ هُمُ الظَّالِـمُونَ)

الله عز وجل ترك للحرمه حقها في حفظ كرامتها وفي حفظ حقوقها فمن انت يا فااهد لجل تتعدى حدود الله بنتنا جاها الضرر منك والله العظيم ان ناخذ حقها اليوم قبل بكره! ..
الشيخ جراح بعصبيه: تخسى وتعقب يا هزاع اقسم بالله ان ماطلعت انت وهالي معك ان دمك مسفوح
بتار انتفض بعصبيه وجاء بيهجم عليه مسكه هزاع بحده وأشر له بعيونه يهدئ...

_في الحوش _
طلعت ملاك تركض لبرا البيت وحمد وقف يوم شافها تطلع من البيت وجواد وقف والتفت للمجلس عقد حواجبه وهو يشوف تجمع رجال تقدم بخوف وحمد معه ودخلوا للمجلس وكانت الصدمه انهم شافوا هزاع واقف امام جراح وعرفوا ان كل شي صار مكشوف!..

ركضت بكل سرعتها ومشهد امها وابوها ينعاد قدامها ضحكاتهم في مسامعها وطيفهم حولها ركضت للجبل بكل سرعتها ودخلت الكهف وبكل جنون بدت ترمي كل شي حولها وهي تبحث عن شي واحد فقط!

اخذته بين يديها وناظرته وهي تبكي وكل ذكرياتها مع اهلها تنعاد فتحت المسدس وطلعت بسرعه وهي ناويه على جراح وهي تبكي بكل صوتها...

___
هزاع شد ولده ورجعه لمكانه وقال: تسويها يا جراح تسويها ماهي غريبة عليك!
جراح بعصبيه: ايييه اسووويها ووالله ان تنذبح انت والي معك..

فاهد كان يناظر فيهم بصدمه وصوت العنود يرن في أذنه وهي تتوعد تعلم اهلها "والله ان يوصل العلم لأبوي" " والله ان ارد لك الصاع صاعين " " البادي اظلم في جميع المبادي"
الشيخ جراح بصراخ وحده: اطلع من حيث جيت يا هززززاع
فاهد اخذ نفس وقال: هذا انا قدامك يا شيخ هزاع خذ حقك وش تبي!
جراح التفت لفاهد وصرخ في وجهه: انت اقطع حسسسك لا اسمع صووووتك!
التفت لهزااع: وانت اطلع من هنيا قبل اذبحك ووالله ان اسويها!
هزاع ضحك بسخرية وناظر ولده بتار الي ماسك نفسه بالقوه!

هزاع ببرود: انا طالع لكن ولدك بيطلع معنا
جراح بحده وتهديد: اعلى مابخيلك اركبه!... عززااام هاات سلاحي.
ابتسم هزاع بهدوء وهو يناظر جراح الي اعمته العصبيه وينتفض
جواد فتح عيونه وهو يسمع صوت سيارات الشرطه وصوت المايك: الي في الداخل سلموا انفسكم البيت محاصر
جراح رفع راسه بصدمه لهزاع وفاهد كان في حالة صدمه وجمود
هزاع اشر بيده على برا بسخرية..

تكرر الصوت: سلموا انفسكم البيت محاصر ان كان معاكم سلاح نزلونه!

دخلوا عساكر وفي يديهم الأسلحه وتقدموا من هزاع الي رفع يده وأشر على فاهد: هذا هو الي ذبح الرجال
تقدموا منه وفي لحظات كان مكلبش تقدموا عيال الشيخ بحميه لجل أخوهم ولكن الشرطه رفعت السلاح عليهم: اي واحد يتحرك او يحاول يمنع الأمن من شغله بيتعاقب..
طاح جراح على الأرض بصدمه وهو يشوفهم يجرون فاهد معهم بقوه وهو عينه على هزاع يوم وصل عند هزاع قال: قول لها مبروك عليها خذت حقها!
هزاع مارد عليه وسحبوه العساكر بقوه لبرا..
طلع الشيخ هزاع وصرخ جراح: هززززااااع
التفت هزاع له
وقال جراح بأنهيار: ليييييه ليييييه ياااا هززااااع لييييه تدخلهم لييييييه
هزاع شد على يده وقال: عهدك انتهى يا جراح وهذا ردي على الي تعرضت بنتي له.
طلع من المجلس وطلع بتار وجراح حس بثقل يده اليسار من هول الي طاح فيه هزاع دخل السلطات في الديره وفي ذي القضايا يعني من اليوم انفتح عليه باب مايتقفل وبيحققوا في كل شي صار من قبل
كانوا عياله ملتمين حوله ويرشونه بالمويه وهو يرتجف بشكل ملاحظ...

مرت دقايق وطلعت الشرطه ومعهم فاهد لبرا الديره والكل في حالة صدمه ويتكلمون عن الي صار
والشيخ جراح لازال في حالة انهيار على فاهد ويدري ان مابيده شي دام الموضوع وصل للشرطه وعياله حوله خايفين عليه وعلى فاهد..
رفعوا روسهم على الي دخلت وصرخت: جررررراااااح
غمض جواد عيونه ونزلت دموعه وصد وجهه...
كل الي في المجلس ناظروها واقفه وعينها على جراح صرخت: يااااذباااح ابويييي ياااا ذباااح اميييي
صقر ناظر جواد بصدمه
جراح رفع نظره لها وهمس بهذيان: الهنوف!

ملاك وقفت بوسط المجلس والكل عينه عليها قالت: ماتشوف انه صاار الوقت ياجراح ان حق الهنوف وخلف يرجع
عيال الشيخ وقفوا بصدمه وهم يناظرون المهبوله واقفه قدامهم
ملاك ضحكت بسخرية: لا تنصدمون انا ماااني مهبوله عشررر سنوات عااايشه بحياه غييير حياتي عايششه بشخصيه ماهيب شخصيتيي!! عشااان وش تتوقعون؟
صقر فتح فمه بصدمه وناظر جواد..
الي وقف وتقدم منها وقال برجفه: تعالي معي
دفته ملاك وصرخت: عشاااااان اخذ حق امي وأبوي الي انذبحوووو بدم باااارد!!.. واليوووم صاار وقته الييوووم حقي وحق امي وأبوي باااخذه..

طاح صقر بصدمه وعينه على جواد الي وجهه اسود ويحاول يطلعها لكن قوته منهزه ومو قادر حتى يوقف بأستقامه.. قال بضعف: ملاك اطلعي مابي لك ضر
ملاك دفته وصرخت في وجهه: انت وخررر عني مالك شغل فيني...
ارتد جواد على وراه وهو يناظرها بصدمه...
وقف جراح وهو يقرب منها ملاك ناظرته بحده وقربت له وصارت واقفه امامه بكل قوه وشجاعه...
جراح برجفه: هنوف!؟
ملاك صرت على اسنانها وقالت: ايه هذي انا جسد الهنوف وروح خلف.
جراح ميل راسه وهو يتأمل وجهها بلع ريقه وهمس: انتي بنت الهنوف!
ملاك اومئت: وبنت خلف
جراح هز راسه: ايه ايه بنت الهنوف وخلف
جواد قرب بخوف من ابوه ووقف امام وجهه وهمس لها: اذبحيني قبل ابوي
ملاك: ماذبحني قبل يذبح امي وابوي!
جراح دف جواد عنه وهو يناظرها وتقدم وصار مقابل لها: اجل من سنين وانتي تمثلين!؟
ملاك تقدمت منه وصارت قريب منه حيل وعينها بعينه بحده وتحدي قالت بحقد: متخيل وش كثر كنت محتاجة سنين لين وصلت لهلجرائة بأني اوقف قدام قاتل أهلي!..
جراح شد على عصاه وهمس: وش تبين انتي بعد!
ملاك بهمس حاد: روحك!
ضحك شوي ثم اعتلت ضحكته في المجلس
وملاك شاده على المسدس تحت العبايه..
وجواد لمح يدها فتح عيونه وقرب بسرعه منها ومسك ذراعها وقال بهمس: لا تغلطي!
ملاك رفعت نظرها له ونزلت دموعها وهمست: جواد! .. جواد هذا ذبح امي وابوي كون منصف!!!
جواد عض شفته وقال بغصه: ملاك تكفين!
جراح دف جواد بقوه عنها لين طاح
وصرخ عليه: لا تتدخل يا جواد خلها تقول الي تبيه
رفع جواد جسده من الأرض وتلمس خشمه الي نزل منه الدم ورفع راسه لأبوه وناظر ملاك وهز راسه بالرفض برجاء.

ملاك ناظرة جراح وقالت: بسئلك سؤال واحد! ما يأنبك ضميرك؟
جراح بصوت رخيم: مايأنبني مير قلبي يوجعني!
ملاك ابتسمت بسخرية: لجل؟
جراح بهمس: لجل الهنوف

تحركوا عيال الشيخ بسرعه أول مافهموا انها ناوية على ابوهم وحاوطوها من وراها وهمس حمد بحده من خلفها: ان كان عندك سلاح نزليه!
ملاك ابتسمت بسخرية وناظرتهم حولها وناظرة جراح قدامها وجواد وقف وتقدم ومسك يدها وقال: ماعندها شي غير الكلام وخروا بتطلع..
ملاك صرخت: وبعدين معااااك انت لا عندي شي و انا باخذ حقي وحق اهلي!!
جراح بحده: جواد وخر عنها وانتي والله ان تنهجين لأبوك يابنت خلف.
ملاك: اعلى ما بخيلك اركبه يا ذباح اهلي! ماعد يهمني لو تذبحني الحين انا يكفيني الوجع الي جاك طول الأربع سنوات احرقت قلبك قبل احرق مخازنك واحرق رجالك واحرق موتراتك واحرق كل شي يخصك فأتوقع هذا شي اوجعك وموتك بالبطيئ وايي لا أنسى تراني الي جدعت ابنك فاهد من الجبل وكنت ناويه انه يموت بس ما صار للأسف! .. وانا الي ساعدت العنود تهرب منكم وتعوّد لأهلها

جراح رفع يده وهبطت على خد ملاك وطيحتها على الارض فتح جواد عيونه ومسك ابوه الي كان ناوي يكمل عليها ضحكت ملاك وارتفعت وشدت على المسدس تحت عبايتها ويدها الثانيه على خدها ناظرت جواد وقالت بدموع وهي مبتسمه: ليه ماسكه؟ خله يكمل الي بداه..
جواد برجفه: ملاك اطلعي
جراح انتفض وصرخ: اجل انتي اليييي تحرقييين انتي الي جدعتي فاااهد!!! انتييي الي تسببتين بكل المصااايب
ملاك هزت راسها: اييه انا اييه انا الي سويت كل هذا وانا الي احرقت مجلسك واحرقت كل شي عشان احرق قلبك مثل ما احرقت قلبي على امي وابوووي...
تقدم جراح منها وهو ناوي عليها وجواد حاول يمسكه وملاك شدت على المسدس بقوه تنتظره يتقدم منها
واصبعها على الزناد وجسمها يرتجف وعينها عليه بحده والكف واضح على خدها ودموعها تنزل..
وجواد منكسر من منظرها ويعز عليه يشوفها بهالموقف ويشوف نفسه بذا الموقف بين ابوه وزوجته!! ..
جراح رفع يده بتهديد: والله ان اندمك على الي تسوينه والله ان احرقك حيييه!!

صرخ جابر بأعلى صوته: مـــــــــــــلاااك الأمن بياخذ حــــــــــقك!!!
دخلوا رجال الشرطه وصرخوا على جراح يسلم نفسه
فتحت عيونها بصدمه مستحيل تسمح لهم ياخذونه قبل تاخذ حقها مستحيل تسمح رفعت يدها وجواد دفها بكل قوته وطاحت وطاح المسدس اخذه بسرعه والعساكر انتبهوا له وعلى طول اعتقلوه واعتقلوا جراح الي في حاله هذيان وانهيار ويصرخ بكل صوته
عيال الشيخ كانوا رهن الأعتقال كلهم للتحقيق عدا هادي لصغر سنه وجواد كان مُعتقل معهم ومكلبشينه وجابر ماسك ملاك بكل قوته وهي تصرخ بأنهيار تبي تذبح جراح وجابر يحاول انه يقفل فمها لايسمعونا الشرطه ويعتقلوها بسبب الفاضها وتصريحها بالقتل... وفي نفس الوقت منصدم ان جواد انقذها واخذ السلاح منها واعتقلوه هو لو انهم شافوا السلاح معها كانت الحين معتقله بعد! ..
كانت عين جواد عليها وهي منهاره وتصرخ وتبكي...
سحبوه معاهم وطلعوا من المجلس وسيارات الشرطه معبية المكان والكل في حالة صدمه ورعب من الي صار..
طلع جابر وهو يجر ملاك الي تصرخ بكل صوتها تبيه يتركها وهو الي اتصل في الشرطه وعلمهم ان جراح قاتل وشرح لهم القصه كاملةً مايبي يخسرها بعد كل ذي السنين بيخلي القانون هو الي ياخذ حقها تحركة كل سيارات الشرطه طالعه من الديره وعين جواد على ملاك الي منهاره بين يدين جابر غمض عيونه واسند راسه على وراه ونزلت دمعه من عينه...

___
بعد مرور يومين
الديره قايمه قاعده والجميع في حالة صدمه الى الأن من الي صار ورجال الإمن معبين الديره من يومين تأهباً لأي حركة ممكن تصير من القبائل ولكن ولا وحده من القبائل تحركت ولا افتعلت فوضى وهذي كانت اكبر ضربه تلقاها جراح بأن كل القبايل تخلوا عنه يوم احتاجهم وما كان هذا الشي الا بسبب افعاله معهم طيلة السنوات الماضيه والي كانت اغلاطه تفوق بشده محاسنه الشيخ جراح بن فارع صار مرمي بين اربع جدران وكل القبايل تدري بذا الشي ومع ذلك ما تحركت والسبب ايضاً انهم كانوا في تخوف من السلطات والي كان جراح يخوفهم منهم من سنين لجل لا يدخلونهم بينهم والي ماكان يبي من ورى هالشي الا ان مصلحته ما تنمس بضرر ومصلحة عائلته ومكانتهم!..

فاهد أيضاً كان مسجون بسبب القتل..
وعيال الشيخ كانوا لازالوا تحت التحقيق المستمر والي طلع من هالتحقيق ان جواد اعترف وأقر ان ابوه ذبح خلف والهنوف في النهاية هذا هو الحق وشهادة الحق هو مُلزم يقولها لو كانت على حساب عائلته ونفسه بعد... جواد التزم المنهج الصحيح واتخذ قرار قول الحق ولو كان على حساب ابوه..

حمد أيضاً اعترف ان ابوه ذبح خلف والهنوف
وعيال الشيخ ككل اعترفوا بعد ماشافوا جواد اعترف وباقي العيال وايضاً جراح اعترف على نفسه انه ذبحهم وبدأ يصرخ يفكونه يبي يقتل ملاك وهذا الشي ادانه اكثر! ..

تم الإفراج عن عيال الشيخ بعد اكتمال التحقيق..
وطلعوا متوجهين للديره وعلامات الأسى تكسوهم!
وصلوا وتوجهوا لبيتهم على طول بضيق وحزن وهم يفكرون وشلون يطلعون ابوهم واخوهم من ذي المصيبه والحريم كانوا في حالة حزن وبكى وصياح...

" في بيت الشعر "
كانوا اهل صقر واقفين واغراضهم معهم تكلم ابو هديل وقال بحده: وينه حمد ذا بكلمه
صقر و الحزن واضح عليه على خوي عمره جواد: داخل ياعمي وش تبي فيه؟
ابو هديل بعصبيه: وششش ابي فيه؟؟. ذا سؤال بالله؟ بعلمه ان مالنا بنات للزواج وحنا مانزوج قتله!
صقر غمض عيونه وهمس: عمي ماهو وقته الحين الرجال في مصيبه مهوب وقته تكفى!
جد صقر وهو ضايق من توجدهم ولاهو قادر يبقى اكثر: نادوا الحريم خل نطلع من ذي الديره...
صقر قال: انتوا ارجعوا انا ماني تارك جواد في ذي المصيبه
ابو صقر بعصبيه: انت اول واحد بتطلع تبي تدبس عمرك بمصيبه بعد!!! .
صقر: قلت ماني طالع خويي عمري يحتاج وقفتي معه ماني تاركه في امس حاجته لي!
جد صقر بحده: لا بتطلع رضيت ولا غصب عنك وذي الأشكال ماتخاويها..
صقر صرخ: جواد ماله دخل جواد طول عمره معي ماني تاركه لو يكلفني الي يكلفني...
طلع صقر من بيت الشعر وهو ينتفض وعينه تدور جواد وهو يحس بكمية الوجع الي يعيشه جواد وكمية التعب فمستحيل يتركه!

"غيداء"
كانت تشوفهم يلبسون عباياتهم وهي ساكته من يومين وهي مصدومه شلون طلعت المجنونه مو مجنونه..

هديل بهدوء: غيداء بنطلع!
غيداء فزت ووقفت وطلعت معهم وهي تناظر الحريم في الصاله يبكون وفي جو جداً كئيب نزل جواد من الدرج وبجنبه حمد وهادي..
رفعت غيداء راسها وناظرت هادي الي كان واضح على وجهه الصياح لأنه احمر اوجعها قلبها عليه ورفع راسه والتقت عيونهم وصد بوجهه...
حمد التفت لهادي وصرخ عليه: قلت لك لاتصيييح انت رجاااال الشيخ جراح بيطلع من هالسجن وبيطلع فاااهد. هادي نزل من الدرج بسرعه وهو يبكي وطلع من البيت غيداء طلعت تركض وراه وشنطتها على ضهرها
حمد نزل من الدرج وصرخ: وانتوووو لييه تصيحوون ليييه؟؟؟!!.
نزل جواد من الدرج وطلع من البيت وما تكلم
حمد بحده: اقسم بالله اشوف حرمه تصيح مااا مااات ابوووي مااا مااات ...
فهده تضرب راسها: وش بقى وش بقى دامهم خذوه وش بقى!!
التفت بحده لها وصرخ: انتتتيي اسكتييي لا تتكلمين الفقِيـــــــــــه!! مااابي احد يتكلـــــــــــم لا تتكلمووون!!

هديل بهدوء: يمه خل نطلع تأخرنا!
حمد التفت لها
وهي طلعت وتجر شنطتها وراها وطلعت امها وباقي الحريم..
طلع حمد بسرعه وهو يشوف ابو صقر وجده واقفين في الحوش قال بتفاجأ: وين بتنهجون انتو بعد؟!
ابو هديل تكلم: ماعد له داعي وجودنا كثر الله خيركم بننهج وبنقول لك ما عندنا بنات للزواج وحنا مانزوج ناس ما تخاف الله في حريمها!
هديل التفتت وناظرة حمد الي قال بهدوء: بيض الله وجيهكم!!
بلعت ريقها وطلعت بسرعه من الحوش...

" خلف البيت"

غيداء وقفت بسرعه وقالت: هاادي
التفت لها بتفاجأ ومسح دموعه: وش عندك
غيداء تقدمت منه وهي تفرك يديها بتوتر: انا من جد زعلت على الي صار..
هادي زم شفايفه لا يبكي وصد وجهه
قربت غيداء وقالت بغصه: احنا بنمشي الحين
التفت لها: وين بتنهجون؟
غيداء رفعت كتوفها بزعل: بيتنا
هادي ناظرها بصمت وهو مقطب حواجبه
غيداء مسحت دموعها الي نزلت وقالت بأبتسامه: انا قضيت هنا اجمل الأيام وبالذات معاك يا هادي مره شكراً وصدقني مستحيل انساك انت من جد مافي اطيب من قلبك
هادي نزلت دموعه
غيداء بأبتسامه ودموعها تنزل: ليه تبكي انت رجال وولد شيخ وو
هادي بحزن: الشيخ راح! وبنروح كلنا وراه!
غيداء زمت شفايفها وقالت: مدري وش اقول لك بس لازم كل واحد ياخذ حقه يا هادي!
هادي مسح دموعه ومارد
غيداء رفعت شعرها وهي تهوي على وجهها: اوك على العموم انا جيت اودعك قبل امشي من هنا واقول لك تسامحني على كل شي وانت اطيب قلب شفته وما بنساك ابداا..
هادي بلع ريقه ويحس بغصه ما وده هي بعد تروح..
غيداء تقدمت منه وقالت بتردد: عادي احضنك؟
صد بوجهه يخفي دموعه الي نزلت
رفعت يدها وقالت: اوك اسفه انا بمشي استودعتك الله
لفت عنه بحزن ووقفها صوته: غيداء
التفتت له وسحبها لحضنه وضمها وبكاء نزلت دموعها وضمته وهي تبكي معه..
هادي بحزن : بشتاق لك يا المهبوله!
غيداء ابتسمت بين دموعها وابتعدت عنه وهي تمسح دموعها: وانا بعد يا المطفوق!
هادي قال بغصه: لا تنسيني وادعي لي شوفيني كيف صرت ابوي واخوي راحوا ومدري وش نهايتهم
غيداء بحنان مسحت دموعه وقالت: لا تزعل عمرك خليك على يقين ان الله ما يضيع حق احد ابوك وأخوك غلطوا ولازم يتحاسبون انت مالك ذنب.
هادي برجفه اهتزت شفايفه وقال: انتي مو فاهمه شي اذا راح ابوي كلنا بنروح سمعتنا راحت مكانتنا راحت حتى حريم اخواني امس ابائهم جاايين ياخذونهم!! كلنا بنضيع!
غيداء قربت منه وضمته وقالت: خلك قوي وبدأ حياة جديده العمر قدامك كمل دراستك وابني احلامك..
هادي ابتعد عنها ومسح دموعه واخذ نفس وصد بوجهه عنها غيداء خذت نفس وقالت: انا تأخرت لازم امشي!
اومئ بحزن
غيداء ابتسمت وقالت: هادي!
ناظرها
غيداء مدت يدها ليده وقالت: رقمي كتبته في الجوال ابي عطيتك لاصار عندك رقم دق علي بنتظرك..
ناظرها شوي ثم اومئ
ابتسمت ورفعت يدها تودعه ومشت بسرعه عنه ودموعها تنزل..
اختفت من قدام عيونه ركض يلحقها بيشوفها

تحركت سياراتهم وطلعت غيداء براسها وهي تبكي بصمت وعينها على هادي الي دموعه تنزل ورفع يده يودعها والحزن ياكل قلبه!

صقر تقدم من جواد وشد على يده وقال: انا معك يا خوي ماني مخليك
جواد رفع راسه وناظره لمده ثم اخذ نفس وابتعد عنه..
حمد صرخ: ويننهاااا قسم بالله ان اربيها وينهاا
جواد التفت لحمد الي طلع من البيت وجاء بيلحقه مسكه صقر وقال: راحت
جواد رفع راسه له وهمس: وين؟
صقر رفع كتوفه: مع جابر اخذها البارح بالقوه وطلعوا من الديره
جواد اومئ بصمت ومشى عنه لحقه صقر ومسك ذراعه: جواد ودك تتكلم؟
جواد هز راسه بالرفض: مابقى شي اتكلم فيه.
صقر تنهد وسحب جواد وضمه وهو يربت على كتفه..

_مر اسبوع..
وبعد اكتمال التحقيق وثبتت التهمه على جراح وفاهد طلع الحكم من المحكمه وتجمعوا عيال الشيخ كلهم
وهم يسمعون القاضي يقول:

يقول الله عز وجل :
وَلَكُمْ فِي الْقِصَاصِ حَيَاةٌ يَا أُولِي الْأَلْبَابِ لَعَلَّكُمْ تَتَّقُونَ..
اقدم المدعوا جراح بن فارع آل فارع يحمل الجنسية السعودية على قتل خلف بن "" "" آل "" "" والذي يحمل الجنسية السعودية أيضاً وقتل الهنوف بنت خلف آل "" "" سعودية الجنسية.. وذلك عن طريق قطع رأسيهما بسيفين تجبراً وعدواناً...
وبفضل من الله عز وجل وبعد عشر سنوات من الحادثة التي غُيّبت عن السلطات إلا ان السلطات قد تمكنت من القبض على الجاني المذكور والذي كان ينوي بأن يقتل ابنتهما أيضاً، وقد توصل التحقيق معه ومع بعض ممن شهد الحادثه بثبوت التهمة عليه وبعد إحالته الى المحكمة العامة صدر بحقه صك شرعي يقضي بثبوت مانسب إليه شرعاً والحكم عليه بالقتل قصاصاً..
وسيتم تنفيذ الحكم بعد ثلاثة ايامٍ من يومنا هذا..
... والله الموفق ...

طاحوا عيال الشيخ في حالة صياح وعدم تصديق للي صار..

والوجع زاد عليهم بعد سماع القاضي يتكلم مجدداً

يقول الله عز وجل :
وَلَكُمْ فِي الْقِصَاصِ حَيَاةٌ يَا أُولِي الْأَلْبَابِ لَعَلَّكُمْ تَتَّقُونَ..
اقدم المدعوا فاهد بن جراح بن فارع آل فارع يحمل الجنسية السعودية على قتل بن "" "" آل """ سعودي الجنسية.. وذلك عن طريق الرصاص
وبفضل من الله عز وجل قد تمكنت السلطات من القبض على الجاني المذكور وقد توصل التحقيق معه بثبوت التهمة عليه وبعد إحالته الى المحكمة العامة صدر بحقه صك شرعي يقضي بثبوت مانسب إليه شرعاً والحكم عليه بالقتل قصاصاً..
وسيتم تنفيذ الحكم بعد ثلاثة ايامٍ من يومنا هذا..
... والله الموفق ...

حمد طاح يبكي بوجع واخوانه مثله وجواد كان اكثرهم حزن لكنه مابكى كان في حالة صدمه من كل شي كان خايف عليهم من ذا اليوم وهذا هو جاء كم مر من وقت وهو يقول يا فاهد قدم الديه وصوم وادعي الله يغفر لك لكنه وصل للي كان خايف منه جواد..

____
انتشر الخبر بين كل القبايل ووصل للشيخ هزاع
الي علم العنود عن خبر فاهد..
ما وضحت قدامهم اي ردة فعل وطلعت لغرفتها بكل هدوء وقفلت الباب واستندت عليه ورفعت يدها لفمها وانهارت تبكي وطاحت على الأرض وهي تبكي

___.
توجهوا شيوخ القبايل من اخوان جراح وغيرهم وتوجهوا للديرة لعيال الشيخ الي كانوا مثل الضايعين ما يدرون وش يسوون..
تقدم الشيخ حمود وقال: السلام عليكم يا رجال
وقفوا عيال الشيخ وهم يردون السلام
الشيخ حمود برزانه وهيبه: جيناكم اليوم ورجولنا على رجولكم وكتوفنا سند لكم يا عيال جراح بننهج معك كلنا لأهل الدم ونعطيهم الي يبون ويتنازلون عن الدم
عساف: وش تقول انت؟
الشيخ حمود: افااا!!! يا عساف..
عساف مسح وجهه: ما ظنتي يقبلون!
الشيخ حمود ضرب صدره: حنا لكم ننهج كلنا ونجرب وإن شاء الله يتنازلون.. بننقسم نصفين الي يجي معانا بننهج لأهل المقتول لعلهم يتنازلون ويعفون عن فاهد
والنصف الثاني ينهج لمكه لأهل الدم ويطلبهم..

عساف وكأنه جاه بصيص أمل: اجل حنا معك والشيخ جواد بينهج لمكه زوجته من أهل الدم!
جواد شد على يده ومارد
صقر شد على كتفه يصبره ويسانده
بدأو الشيوخ يتكلمون حول الموضوع والي مابقى لهم وقت كثير الحكم بيتنفذ بعد ثلاث ايام ومابقى لهم وقت وانطلقوا جاهات ومشايخ ومعهم حريم واطفال متوجهين لديرة الرجال الي ذبحه فاهد وكانوا مالين الشعيب والجبال الي هناك من كثرهم والشيوخ طلبوا يقابلون ابو المقتول لكنه رفض حاولوا معاه لكنه ماقبل حتى يناقشهم ومع ذلك ما يئسوا ورابطوا عند بيته بخيامهم وفي كل مره يحاولون فيه...
وبالمثل تحركت جاهه كبيره وبمشايخ كبار متوجهين لمكه ومعهم جواد..

" بيت جابر"
كانت ملاك جالسه وسرحانه ومن يومين وهي تصارع الذكريات الي هبت بوجهها من وصلت لهنا وبجنبها أم أيهم جالسه عندها ولا فارقتها دقيقه وحده
دخل جابر وجلس ووجهه متكدر قال: ملاك
رفعت راسها وناظرته
جابر: المشايخ جايين في الطريق لهنا
ملاك تكتفت وهي تنتظره يكمل كلامه
جابر: بيطلبون منك العفو وتتنازلين عن الدم
ابتسمت بسخرية وتلتها ضحكه مصدومه واعتلت ضحكتها وصارت تضحك بقوه وام أيهم خافت عليها شدت على كتوفها وهي تسمي عليها ملاك وخرتها عنها ووقفت وأشرت على صدرها: من عشر سنوات وأنا احاول اذبحه ويوم جاه حقه وطلع بحقه القصاص يبوني اتنازل؟؟؟
من جدهم ذولييي ولا يستهبلون!!!؟؟
جابر تقدم منها وشد على اكتافها: القرار بيدك ولا احد جابرك على شي وانا معك وانا الي بتكلم معاهم وانا الي بواجههم انتي بس علميني وش تبين
ملاك بحده وحقد وصدرها يعلوا ويهبط: حتى باب البيت ما بينفتح لهم باب البيت ما بينفتح لعديمين الأنسانيه انذبحت امي وانذبح ابوي وهم يتفرجون فيهم ويوم انعكس الوضع صاروا جاهات ووساطات قبلية!!؟!.
جابر كان يشوف رجفتها وانهيارها النفسي تقدم منها وضمها وهو يهديا: ما بيصير الا الي تبغين انتي بالغه راشده والقرار بيدك يابويه.
غمضت عيونها وهي تحتمي فيه وكل خلية في جسدهت ترتجف..

___
وصلوا الرجال ووقفوا على. باب بيت جابر الي بعد صعوبه لقوه وطلع جابر وعطاهم من الأخير مافيه تنازل عن الدم لو يجمعون كنوز الدنيا تحت رجولهم ودخل وقفل الباب في وجيهم لكنهم بعد ما يئسوا وجمعوا كل الرجال ووقفوا على الباب يطلبونهم...
بينما جواد متنحي عنهم ولا طلع منه أي كلمه ماله حق يطلبها تتنازل عن دم ابوه وهذا حكم الله!..
كانوا يكلمونه ويحاولون يقنعونه يكلمها بما انه زوجها لكنه ماكان يرد عليهم وفقط جالس مكانه وصقر جنبه يسانده..

____

" في السجن"
وصل الخبر لجراح وكذلك لفاهد والي كانوا بنفس السجن مع كم سجين..
انهار جراح وصار يصرخ ويكسر وفي حالة رعب من الموت دخلوا عساكر وخذوه
وطاح فاهد على الأرض ودموعه تنزل وهو يبكي بضعف: ياااا رب سامحني يااارب سامحني ياااا رب اغفر لي يااا رب لا تاخذ روحي الا وانت راضي عني يااا الله ياا الله يااا رب سامحني يااا الله يااا الله
تقدم منه واحد من المساجين وهو يهديه ويصبره وقف فاهد وهو يترنح وجسمه مو قادر يشيله...
توجه للحمام وانتو بكرامه وتوضى وهو يبكي برهبه وخوف من لقاء الله وهو محمل بالمعاصي..
وطلع واخذ له سجاده وبدأ يصلي وهو يبكي وطاح على السجاده يدعي الله يغفر له ولا ياخذ روحه الا وهو راضي عنه...

وكان في فرق شاسع ما بين حالته وحالة ابوه الي عطوه مهدئ لجل لا يفقد عقله..
بينما فاهد على سجادته يطلب من الله المغفره والمصحف بين يديه...

_

اليوم الثاني..

قد بدأ العد التنازلي والرجال الى الأن واقفين عند باب اصحاب الدم ولكن ما من أي استجابه..
ابو المقتول كان يطلع يعلمهم انه مستحيل يقبل أي ديه في ولده
بينما ملاك وجابر مافتحوا الباب من الأساس ولا قبلوا الكلام مع أي طرف...

" العنود"
كانت منسدحه في فراشها وولدها عند امها من البارح وهي رافضه تفتح...
غمضت عيونها وهي تتذكر كل الأحداث بينها وبين فاهد من بداية زواجهم لين اخر موقف بينهم وهو غرقان بدمه وقفت وهي تشد على راسها الي مصدع
وفتحت دولابها خذت لها لبس وغيرت ملابسها وخذت عبايتها ولبستها وطلعت من الغرفه نازله للصاله شافت امها وابوها قالت بهدوء: يبه!.
رفع راسه وعقد حواجبه: عنود
خذت نفس وقالت: يبه لو سمحت ابيك تاخذني لفاهد
وقف بصدمه: نعم؟؟
العنود بلعت ريقها: يبه لو سمحت ابيه يطلقني وديني له.
هزاع ناظرها شوي ثم اومئ: زين اوديك له دامك تبين ذا الشي
خذت ولدها وطلعت بدون كلام متوجه لموتر ابوها
ناظر ام العنود الي هزت راسها بحيره تنهد وطلع متوجه لها دخل موتره وقال: متأكده
اومئت: اي..
حرك بهدوء متوجه للسجن!
بينما العنود تحاول تتمالك عمرها لا تنهار قدام ابوها ولا تضعف...

"فاهد"
كان جالس على سجادته ويحس براحه غير عن اليوم الأول وهو من البارح ما فارق سجادته وطول وقته يدعي الله يغفر له يبي يقابل الله وهو متخلص من الذنوب الي على كاهله غمض عيونه وسند راسه على الجدار وهو يدعي الله في سره وبين دعاه طرت له العنود وبان له وجهها ضغط على عيونه بقوه وقلبه يرجف بشوق لها يتمنى لو يشوفها قبل يموت يتمنى لو تسامحه مشتاق لها والشوق الي بصدره كبيره وده لو يشوف ولده ويضمهم لصدره لو لدقيقه! ..
تنهد ومن السهر المتواصل نام وهو ضام المصحف لصدره..

__

جواد..
كان ساند راسه على جدار بيت جابر وفي يده عصاء صغيره يرسم على الأرض وهو سرحان ومايتكلم مع احد عنده..
صقر كان جالس بجنبه وملاحظ تغير جواد والصدمه الي رسمت علاماتها على وجهه..
عض شفته ويحس بغصه كبيره وحزن على جواد وخايف عليه يفقد عقله ولا يصيبه شي من الصدمه الي تعرض لها وفاجعته في ابوه واخوه وزوجته الي يحبها ويموت في طاريها..
كان يسمع تنهيدات جواد وراسه سانده على الجدار وعينه ثابته على الفراغ والي تلقاه مو سهل أبداً...
ناظر ثوبه الي صار لونه بني بعد ما كان ابيض وشماغه الي على كتفه بأهمال...
سمع انين جواد رفع نظره لوجه كان مغمض عيونه ولاحظ دمعه نزلت على خده تحفر طريقها بلع ريقه صقر وما عرف وش يسوي هذا حال جواد ما يدري ينعيه في أبوه وأخوه ولا في صدمته وفاجعته في قلبه!.. سمع شهقت جواد وتنهيدته ودموعه الي نزلت من جديد ورفع شماغه يغطي وجهه وللحين ساند راسه على الجدار ومايل بجسمه عض شفته بقوه يحاول ما يضعف ويبقى قوي لجل يسنده...
مد يده وشد على كتف جواد وقال بصوت راجف: جواد صلِّ على النبي يا رجال ماتستاهل تكفى
رفع جواد كفه وضرب صدره بخنقه ودموعه تنزل وشماغه يغطي وجهه.
نزلت دموع صقر غصب عنه وتقدم يضم جواد لكن جواد نفضه عنه ووقف مبتعد عنه ويمشي بخطوات مو ثابته مشى جواد مبتعد عن الرجال ودخل بشارع ثاني وصار يمشي بدون وجهه ودموعه تحجب عنه الرؤيه وقلبه يعتصر بألم..
يحس انه بيجن في أي لحظه تلقى فاجعه كبيره في قلبه وفي ابوه وفي اخوه وكلهم بوقت واحد يمشي بدون وجهه ولا هدف حتى حذيانه مايدري وينهم؟

يمشي من شارع ويدخل في الثاني جلس على الأرض بتعب وشهقاته تعلى وراسه بين يديه ويبكي بضعف وتعب هد حيله
صقر وقف وركض يدور على جواد الي اختفى من بينهم وهو خايف عليه

جواد سند راسه على الجدار وهمس بوجع: يااارب.. يااارب
غمض عيونه بقوه ودموعه مغرقه وجهه شد على راسه ويضربه في الجدار بوجع وهو يتخيلهم ينذبحون
...
صقر انتبه عليه وركض بسرعه له وجلس عنده وقال بعصبيه: جوووواد خلااااص اصحى على نفسك جووواااد
جواد بوجع ودموعه تنزل: قلبي يوجعني حييل يا صقر
صقر نزلت دموعه وتقدم منه وضمه بقوه وهو يبكي معه ويسمي عليه وصوت جواد يقطع قلبه
مرت عشر دقايق وهو ضام لجواد الي همس: احبها يا صقر.
صقر ابتعد عنه وناظره يمسح دموعه: جواد
جواد مسح دموعه بعنف ورفع راسه ياخذ نفس وضرب صدره: شبت نار بذا يا صقر شبت نار!.
تنهد صقر
جواد اخذ نفس عميق وقال وهو يهز راسه: ماحد تضرر غيري!.
صقر شد على كتفه: اذكر الله انت ماتدري وش انت تقول الحين اذكر الله
جواد ضحك بسخرية: ادري ادري وش اقول ابوي غلط وبياخذ جزاه اللهم لا اعتراض فاهد غلط وبياخذ جزاه اللهم لا اعتراض " ارتجف صوته" مير انا وش غلطت؟ وش سويت لجل اتجازى هالون؟
صقر: استغفر يا خوك واذكر الله
جواد بهمس: لا إله إلا الله، لا إله إلا الله
صقر وقف ومد يده وشد جواد ووقفه وسنده: خل نرجع واذكر الله لا تقعد تهوجس اذكر الله
جواد مسح وجهه واثار الدموع ومشى معه....
راجعين لبيت جابر...

__
"فاهد"

عقد حواجبه بنعاس وهو يسمع احد يصحيه
السجين: ياخوي اصحى
فتح عيونه وناظره بصمت
السجين: العسكري يبيك
عقد حواجبه ومسح وجهه وترك المصحف على جنب ووقف وتقدم بلبس السجن وقرب من الباب
سمع العسكري يقول: معاك زياره تعال
فاهد تنهد: ماودي اشوف احد
العسكري: مصرين يشوفونك
فاهد سند راسه على الباب وقال: خلهم يروحون مابي اشوف احد
العسكري اومئ وراح للعنود دخل وقال: السجين رافض يقابل احد..
شدت ولدها لصدرها وقالت بغصه: قول له ولدك يبي يشوفك تكفى
تنهد العسكري ورجع لفاهد شافه جالس على سجادته بعد ماتوضى مرة ثانيه قال: تعال هنا
رفع فاهد نظره له وتنهد ووقف وتقدم من الباب: قلت لك مابي اشوف احد
العسكري: ولدك يبي يشوفك!
فاهد ارتجف صوته وقال: ولدي؟
العسكري اومئ: تطلع؟
اومئ فاهد بلهفه واضحه عليه
فتح العسكري الباب ومسك ذراعه ومشى معاه للمكان المخصص فتح له الباب ودخله وقفل الباب التفت فاهد وارتجف قلبه للي واقفه ومعها ولدها..
نزلت دموعها ومدت يدها ورفعت النقاب عن وجهها وبان له وجهها المغرق دمع
فاهد تقدم بخطوات بطيئه وراجفه: ليه جيتي؟
العنود صدت بوجهها ودموعها تنزل وهي تشوف شكله
فاهد تقدم منها وصار واقف قريب حيل منها رفع يديه ولف وجهها له وناظر دموعها وهمس برجفه: ذي الدموع لجلي؟
العنود شهقت ببكاء وزاد صياحها
فاهد ببحه قال: شنوح جايه؟
العنود بصوت كله بكاء رفعت جواد وقالت برجفه: للحين ما أذنت بأذن ولدنا
نزلت دموعه وعينه عليها
العنود بدموع مدت جواد له اخذه فاهد وهو يرجف وجلس على الكرسي بضعف ما قدر يوقف اكثر والعنود صدت وهي تكتم شهقاتها بيدها..
رفعه لفمه وباس جبينه وتقدم من اذنه وقال بصوت راجف: الله اكبر.... الله اكبر... اشهد ان لا إله إلا الله.. اشهد ان لا إله إلا الله..

كانت دموعها تنزل وهي تسمعه يكمل الأذان في اذن جواد الصغير وتسمع الرجفه بصوته تسمع نبرته الضعيفه الي ماقد سمعتها من قبل...
التفتت له وهي تشوفه ضام لجواد لصدره
فاهد ابتسم وهو يناظر وجهه الصغير وقال: انتبه على امك وخلي بالك منها لا تزعلها ولاتصير قاسي عليها مثل ابوك لا تضايقها ولا تبكي عيونها يكفيها الي جاها من ابوك... جواد يبه ابيك لامن كبرت تدري وش كثر احبها مابيك تزعلها ولاتصير قاسي عليها..ولا تشبهني ولا تشوفني قدوةً لك مثل ما انا شفت ابوي قدوةً لي! .. ابعتبر هذا وداعي لك يبوك
العنود تقدمت وشالت جواد وعين فاهد عليها تركته على الكرسي الثاني والتفتت لفاهد وقالت بغصه: وانا مالي وداع؟
فاهد وقف وابتسم بتعب وقرب منها ومد يده لخدها بلع ريقه وهمس: يشهد الله انك انقى شي في حياتي واصفى شي في عمري والنقطة البيضاء بصفحاتي السوداء يشهد الله ما نبض قلبي لغيرك ودعتك الله يا اطهر ذنوبي.
سحبها لحضنه وضمها بقوه وسمع بكاها على كتفه تنهد وغمض عيونه وقال: مشكوره لأنك جيتي مشكوره
العنود بوجع: ليه يا فاهد ليه تسوي كل ذا ليه تذبح قلبي الي حبك ليه
فاهد غمض عيونه ونزلت دموعه
العنود شدت عليه وقالت بصياح: ليه تسوي فيني كذا وليه تسوي في عمرك هالون لييه؟
فاهد مارد وما يدري وش يقول
العنود ابتعدت عنه وناظرته وقالت بحرقة قلب: حسبت انتقامي بيفرحني لكنه ذبحني!! ذبحني يافاهد
طاحت على الأرض وهي تبكي بأنهيار
جلس على الأرض وضمها وهو يبكي بتعب ووجع وهمس: سامحيني!
العنود ابتعدت عنه وناظرت وجهه وقالت: الله يسامحك يا فاهد الله يسامحك... الله يسـ.. امـحــــ.. ك
ارتخت بين يديه وطاح جسدها فتح عيونه بخوف ورعب وصرخ: ياااا عسكــــــــــــــــــري
انفتح الباب واخذوها بسرعه للأسعاف وجاء بيطلع مسكوه العساكر ومنعوه وهزاع صرخ: وش سويـــــــــت فيهااااا..
كان فاهد خاايف عليها ويرجف..
دخل العسكري واخذ الولد وطلعوا ورجعوا فاهد لمكانه وهو يترجاهم يعلمونه وش فيها...

طمنوا هزاع انها بخير وبس اغمى عليها من الضغط النفسي الي تتعرض له..
اخذها هزاع وطلع ومعه جواد بين يديه..
كان فاهد يصرخ يترجاهم يعلمونه وش فيها
تقدم العسكري ورحم حاله وقال: لا تخاف هي بخير بس اغمى عليها
فاهد برجاء: تكفى قول الصدق!!
العسكري: هذا الصدق الحمدلله هي بخير..
تنهد فاهد وجلس على الأرض وسند راسه على الباب...

من وقت رجوع الشيخ هزاع لبيته والعنود ماتكلم احد وتعبانه وحرارتها مرتفعه وتهذي باسم فاهد..
عصب الشيخ هزاع من قلب بنته الرهيف والي بعد كل الي جاها منه تعبت يوم عرفت انه بيموت...
طلع من الغرفه وهو معصب وراح لمجلسه وهو شاد على يده بقهر..

___
_اليوم التالي...

عند بيت اهل المقتول..
كانوا لازالوا واقفين عند باب بيته وينادونه وينخونه..
لين طلع هو وعياله وهم ناوين يوضعون حد
وقف وبجنبه عياله والشيوخ اصطفوا صف واحد وتكلم الشيخ سعود: حنا طالت اعماركم اقبلنا عليـكم..
قبيلة آل فارع وقبيلة آل ___ وقبيلة آل-----. صليتوا على رسول الله ... وااا الدنيا بلاوي والدنيا مشاكل لكنها تختلف وعلومها تختلف جيناكم وقد تحملنا بلا مالنا فيه واتعبنا و طالبين من الله عز وجل ثم منكم العفو في رقبة ولدكم

ابو المقتول: الله يحييكم ويطول في اعماركم وانت غالي والي معك غاليين، وانا تشاورت انا وعيالي ولدنا راح والله يرحمه ويغفر له وقد جف قبره عساه روضه من رياض الجنة اللهم امين.. ولدنا انذبح بدمً بارد ولا خافوا الله فيه! ولا فيني ولا في اخوانه وما نقول غير حسبنا الله ونعم الوكيل وحنا ما نبي شي غير شرع الله وشرع الله يقول القصاص..
الشيخ ناجي بمقاطعه: يا طويلين الأعمار اذكر الله الله
يقول (وَمَنْ أَحْيَاهَا فَكَأَنَّمَا أَحْيَا النَّاسَ جَمِيعاً...) والرجال راح وعسى الله يرحمه انا في ذا الوجه احب رجولك، ذا ماقف والرجال تبان في الماقف الصعب تكفى يااابو تكفى..
ابو المقتول: ولدنا هو الي تحت التراب والوجع فينا انتو ماتحسون بالوجع لو انكم تحسون بالي نحسه كان ما قلتوا تنازل..
الشيخ هزاع من الخلف تكلم: ولدك راح الله يرحمه ويغفر له..
الكل التفت للشيخ هزاع الي تقدم وقال: السلام عليكم يا رجال
الجميع: وعليكم السلام ورحمة الله وبركاته..

الشيخ هزاع تقدم من ابو المقتول وشد على كتفه: الله يرحمه ويغفر له ويسكنه فسيح جناته اللهم آمين... يا ابو سليم انا جيتك وقلت لك انا معك والحرقه الي في قلبك والغبنه على ولدك والله ان تاخذ حقك وهذا هو حقك الرجال انسجن وثبت عليه الي سواه والله يقول القصاص ويقول ( فَمَنْ عُفِيَ لَهُ مِنْ أَخِيهِ شَيْءٌ فَاتِّبَاعٌ بِالْـمَعْرُوفِ وَأَدَاءٌ إِلَيْهِ بِإِحْسَانٍ ذَلِكَ تَخْفِيفٌ مِنْ رَبِّكُمْ وَرَحْمَةٌ فَمَنِ اعْتَدَى بَعْدَ ذَلِكَ فَلَهُ عَذَابٌ أَلِيمٌ)...
يابو سليم انت تعرفني مع الحق وواقف معه
ابو المقتول: مابك قصور يا شيخ هزاع
الشيخ هزاع: اجل انت رجال ولكل رجال منا ماقف ومثل ما قال ذا الماقف الي تبان فيه النفوس حنا ما نجبرك على شي وندري بالي في قلبك من حرقة ووجع وما جيتك لجل انه زوج بنتي ولا لجل انه ولد صديق قديم وانتو تدرون وش جانا منه مير يشهد الله لو انه رجال ثاني بنفس ماقفه كان وقفنا كلنا معه حنا طالبينك يااا بو طالبينك تعفي عنه ولك الي تبي والله لو تاصل من المليون للثلاثين مليون ان تبشر بها..
عساف: بيض الله وجهك يا شيخ هزاع
ابو المقتول: والله يا شيخ هزاع لو تنطين انا وعيالي حايل بأرضها ومكه وجبالها وجده وبحارها والله ما تسوى دم ولدنا مير نقولها قدامكم جميع يشهد الله انا عفينا عنه لوجه الله الكريم...
صرخوا الرجال كلهم: بيــــــــــض الله وجهــــــــــــك بيض الله وجهــــــــــــــك
كانوا يرمون شماغاتهم عليه وعلى عياله والشيخ هزاع تقدم وباس راسه وهو يشد على كتفه وتقدموا الشيوخ وهم يسلمون عليه ويشكرونه...

__
عساف كان يرجف بفرحه وتوجهوا للسجن ومنعوهم من الدخول لين تتم جميع الإجراءات....

ماكانوا يدرون كيف يوصلون العلم للي في مكه فقرروا ينتظرون طلوع فاهد ياخذونه وينهجون لمكه..
_
"مكه"
كانوا للحين عند الباب ولا احد طلع لهم ولا تكلم معهم وتاركينهم على الباب..
كانوا ينادونهم ولكن ما من مجيب...

مرت ساعات وهم في خوف ما بقي الا يوم واحد على القصاص وما من تجاوب!.

طلع جابر وبجنبه أيهم وهم يناظرون الجمع الي عند الباب صرخ الشيخ ناجي بصوت عالي: حنا في وجهك!.. تعال اهرج معنا مثل الرجاجيل..
تقدم جابر ووقف امامهم وأيهم يناظرهم بكره وحقد..

الشيخ ناجي: قل لا إله إلا الله وخلنا نكلمك مثل الرجاجيل..
جابر: لا إله إلا الله لكن ما فيها هرج ولا حاجه الموضوع خالص وتوكلوا على الله.
الشيخ ناجي: خل اكلمك صلِّ على النبي
جابر: عليه افضل الصلاة والسلام، قلنا لكم ما فيه هرج ولا شي القصاص بعد بكره وتوكلوا على الله لا تزعجون خلق الله.
الشيخ ناجي: حنا مبليين وجيناكم مبليين وماكذا يلاقون المبلي افا والله افا!
جابر: ايوووه اسمع انا اعلمك
الشيخ ناجي بمقاطعه: خلني اعلمك
جابر: خلصت كلامك؟
الشيخ ناجي: خلني اعلمك!
جابر مسك يده : قول لا إله إلا الله، مانبغى الا شرع الله
وعلي الحرام ما ناخذ الا شرع الله، بأمر رب العالمين،
ماناخذ الا شرع الله، والله يستر عليكم
الشيخ ناجي: مافيها كلام مير خلنا نهرج مع صاحبة الدم خلنا نهرج معها وكاد انها تقبل!
جابر: قل لا إله إلا الله
الشيخ ناجي: لا إله إلا الله
جابر: ها والله لو تقعدوا هنا خمسة سنوات وفوقها عشره ماتقابلكم ولا تتنازل عن الدم.
الشيخ ناجي سكت وماعرف وش يقول..
وحمد صد بوجهه وهو شاد على يده بقوه..
الشيخ ناجي: جيناكم حنا والعرب والقبايل ماليه شرعانكم ذا الأستقبال؟
جابر: مافيها كلام والله لو انك جايب حايل بالي فيها ما نتنازل عن الدم وما نبي الا شرع الله وذي القبايل الي معك وقفت تتفرج على دمهم وهو يسيل على الأرض، وماقالوا يا كافي والحين جايين تطالبون بالتنازل؟! .. ها والله لو انكم تنهجون على قولكم للقبايل الصدق وتعلمونهم بالي صار والله ما ياقفون معكم والله ان يوقفون بوجيهم! ...
الشيخ ناجي: اذكر الله وخل نعلمك
جابر: مابقى فيها كلام لا تعلمني ولا اعلمك شرع الله يتنفذ رضيت ولا أبيت والبنت ما تبي الا شرع الله ودم امها وابوها ما يروح! ... توكلوا على الله ما عندكم الا التعب والشموس... تعال ادخل يا أيهم.. وانتو يا عساكر تصرفوا معاهم تراهم ازعجونا وازعجوا اهل الحي
مشى تاركهم ودخل وصفق الباب في وجيههم ورجال الأمن الي كانوا موجودين منعوا تواجدهم بعد وتوجهوا لسياراتهم وهم يتكلمون عن جابر الي ما أحترم تواجدهم عند بيته...
رفع نظره للبيت نظرة اخيره لعله يلمح طيف لها..
صقر انتبه عليه وسحبه معه طالعين من الحي.. وراجعين لديارهم!..

___

" اليوم المُنتظر "
فرحوا لخبر الإفراج عن فاهد ولكن كانوا في حالة حزن على ابوهم الي بيتم تنفيذ الحكم عليه..
وكان الجميع في الساحه والدموع مغرقه وجييههم وينتظرون متى يطلع ابوهم لساحة القصاص..

كانت واقفه وهي ترجف والي بعد صعوبه قبلوا انهم يسمحون لها تحضر والي هو ممنوع اساساً ولكن بعد صعوبه قبلوا بتواجدها ما كان احد منتبه عليها وهي واقفه تبي تشوف الحق ينتصر تبي تشوف الظلم ينتهي تبي تشوف حق امها وابوها وحق سنينها الي ضاعت يرجع! ..

وماهي الا دقايق ودخلوا عسكريين ومعهم جراح الي كانوا يسحبونه لداخل الساحه وعليه هالة سوداء تحيط به وكأنها ذنوبه ومنظره يقشعر له البدن...
صد جواد بوجهه وما قدر يناظر وعيال الشيخ كلهم صدوا بوجيهم ما يبون يشوفونه ينذبح! ..
ودموعهم تشرح حالهم
عكسها تماماً واقفه بكل شموخ وثبات وعينه عليه وما فارقته دقيقه من دخوله لين جلسوه وهو يصرخ وضربوا له مهدئ لجل لا يفقد اعصابه ويُمنع عنه القصاص! ..
ارتخى جسده وقصوا ياقته ومغطين عيونه لا يشوف شي..
وقف السياف خلفه تماماً.
وبدأ العسكري يقرأ البيان...

ملاك " ضحكات امها وأبوها نظراتهم لبعضهم صوت ابوها وهو يناديها ابتسامة امها وهي تذاكر لها ضحكتها وهي تلعب وهم يدفونها بالمرجيحه ....

وفجأه..
مزنه ارتمت عند رجوله برجاء: ياشيخ الله يطول بعمرك ياشيخ اعفو عنهم ولك الي تبي ياشيخ لاتوجع قلبي بولدي
خلف بقهر صرخ: يمه لاتترجينه يمه لاتذلين نفسك
مزنه تبكي: ياشيخ ابوس رجولك ياشيخ
انهارت تبكي عند رجوله
الشيخ جراح: خذوها من عندي خذوووها
كتفها اثتين من الرجال ورموها بجنب ملاك الي واقفه وتناظر امها وابوها
خلف انخنق بالعبره وهو يشوف امه تذل نفسها صرخ: يمــــــــــــــــــه ارفعي راسك يمه لاتبكيــــــن يمــــه
الهنوف كانت عينها على بنتها ودموعها مغرقه وجهها
الشيخ جراح قرب منهم ونزل لمستوى الهنوف وبوجع همس لها: كسرتي ضهري بفعلك وعقابك مو سهل الا اذا تبين تتراجعين وتروحين الحين لبيتي هذي اخر فرصه لك
الهنوف بشموخ: تخسسسسسي وتعقب
الشيخ جراح سحب غطاها عنها وكشفها قدام الناس كلهم وتناثر شعرها حولها
صرخ خلف وهو يحاول يفك نفسه : ياااااانذل غطيها غطيييييهااااا يااااااانذل فكني انا اربيك فكنننننييي
الشيخ جراح شد شعرها وقال بفحيح: بتجين معي ولااذبحك واذبح خلف
الهنوف تحاول توخره رفعت راسها له بقوه وبكل جرائة تفلت على وجهه وصرخت بأعلى صوتها: مايشرفني اخذكككك ولاتشرفني انا زوجي خلف ولد عمي وعزوتي ولو تذبحني ماااخـــــــــــذك
الشيخ جراح وقف وضربها برجله على بطنها بكل قوته وهو يحس بقهر العالم كله فيه
وخلف صرخ بأعلى صوته: اترررركهـــــــــــــــــــــا كانك رجال تعال لي انا فكهااااااا
الشيخ جراح بدأ يضربها على بطنها وهي تصرخ بوجع
غمض خلف عيونه وهو يبكي بقلة حيله ويحاول يفك نفسه: فكووووني فكوننني الله يجعلها بوجيهكم فكوووني
الكل كان يشاهد بصمت متأثرين لكن مو قادرين يسوون شي ومالهم حق يتكلمون مهما كان هذا الشيخ جراح
خلف بوجع وهو يصرخ: ليه ساااكتين ليييييه ترضونها يضرب حرمه ترضووونها؟؟! اليوم فينا باكر فيـــــــــكم
الشيخ جراح لف عليه بكره و راح متوجه له وبدأ يضرب فيه بكل قهر وحقد
ملاك كانت واقفه مع مزنه الي منهاره وتترجاء عيال الشيخ واخوانه ركضت ملاك لوسط الساحه وضمت امها الي مرميه على الأرض وتبكي
ساعدتها تجلس وهي تبكي وتمسح دموع امها
الهنوف قربت من اذنها وهي تحس روحها بتطلع من الوجع وهمست لها " لا ياخذونك لا يضرونا فيك انتي قويه وتقدرين " بعدها ابتسمت لها والدم يطلع من فمها وقالت بصوت يله ينسمع: خذي الأساور الي بيدي خذيهم والبسيهم خذيهم
ملاك راحت لخلف امها ونزلت ليدها الي مربوطه فكت رباط امها وطلعت الأساور ولبستهم في يدها وكانو كبار كثير على يدها الهنوف ناظرتها وضمتها لها وبكت وهي تودعها: يارب استودعتك بنتي يارب
ملاك كانت دموعها تنزل وعينها على ابوها الي ينضرب بكل قسوه ووحشيه..

لف الشيخ جراح شافها ضامه لها راح لها وسحبها بقوه منها ودف ملاك ورماها بعيد عنهم وطاحت البناجر منها
عند امها ولعبتها بالجهه الثانيه وقفت وركضت لأبوها الي شبه واعي
ضمته وهي تبكي
خلف ببكاء وقلة حيلة قرب من اذنها وهمس لها " تكفيين يا بنت قلبي لا يضرونا فيك تكفين انتي قويه وتقدرين تقدرين " وقال وعينه على السماء: يااارب ياااارب استودعتك بنتي يارب يامن لاتضيع ودائعه استودعتك بنتي احميها يااارب

الشيخ جراح راح لها وسحبها ورماها مره ثانيه وصرخ للسياف الي واقف: اذبحهمممممم
الهنوف بكت بقوه ولفت لخلف الي كان يناظرها والدم ينزل من فمه

صرخت مزنه بقوه: لاااااتكفــــــــــى ياشيخ لااااااا
الشيخ جراح بصراخ: اذبحهمممم
وقف سياف ورا خلف وواحد ورا الهنوف
وفي لحظه ارتفع السيف والكل لف وجهه لايشوفون
الا وحده ملاك واقفه بصدمه مكانها وهي تشوف الدم انتشر بكل مكان صرخت بأعلى صوتها: مــــــــــــــــــــامـــــــــــــــا بـــــــــــــــــابــــــــــــــا

فتحت عيونها بقوه وهي تشوف يد السياف ارتفعت وماهي الا لحظات وانتشر دم جراح في كل مكان..
انتفض كل جسدها وارتجفت اوصالها وصابتها رجفه قويه طيحتها على الأرض وهي تصرخ بكل صوتها وتبكي بأنهيار سحبها جابر بالقوه وطلعها وهي تبكي بنحيـب وخووف ورعب وفرحه! كل شعور يخالطها ...

كان تبكي وترتجف طلع جابر وتوجه لسيارته الي كانت أم أيهم وأيهم وغرام فيها نزل أيهم بسرعه وتوجه لها وهو يضمها قوته يهديها وبكاها مالي المكان..
دخلوها للسياره وتحرك جابر بكل سرعته طالع من هالمكان ومن كل شي يتعلق فيه ناوي يبعد ملاك عن كل الرعب الي عاشته طيلة هذي السنين..
تاركين خلفهم آلام السنين وجع الأيام ومر الدقايق واللحظات تاركين خلفهم قلب ينزف وجع فراقها ووجع فاجعته في ابوه...
تحقق لملاك مرادها وخذت حقها من جراح الي راح من الدنيا مُحمل بالأثقال، محمل بالظلم، بدماء الأبرياء، بمال اليتيم و و و....
وحققت العنود انتقامها وأوجعت فاهد وخلته يصحى على عمره ولكن برغم الي حصل معها الا ان فكرة انه تاب لينت قلبها وبطبيعة أي انثى حملت في يوم مشاعر صافية رقيقه! سامحته . الا ان الرجوع لفاهد صعب ولا يمكن انها تقبل فيه..

مسفر وود الجميع عرف ببرائتهم وطهارتهم ولكن ما عرفوا أي طريقه توصلهم لهم وبدت النار تكوي قلوب اهلهم الي تبروا عنهم بكل قسوه بينما مسفر وود في اجمل ايام حياتهم بعيد عن الظلم بعيد عن الوحشيه
مسفر في دكانه وود في البيت وكل ليله يطلعون يستكشفون مكان جديد متناسين الماضي الموجع ومساندين بعضهم برغم صغر سنهم ووجود أبو رامي وأم رامي بجنبهم كان دافع قوي لهم يكملون الحياه..

وتظنون انت الجميع قد نال حقه وانظلم الطيب الحنون ؟
لا جواد ما انظلم جواد حقه بيجيه ومضاعف...

# بعد اربع سنوات

في بيت خلف والهنوف سابقاً..
تغير تماماً عن الماضي وصار بديكورات جديده وجميله
كانت واقفه ببجامتها ورافعه شعرها بأهمال وتسوي الفطور صرخت: جوووود ماما يلا تعالي فطورك جاهز

دخلت طفله بعمر الثلاث سنوات وثلاثه اشهر ببجامه مشابه لبجامة امها تماماً وشعرها بنفس الحركه وملامحها تأسر القلب بجمالها ورقتها: ماما
التفتت لها وضحكت بحب وهي تشوف وجهها: يااا عيون الماما يا روحها يا قلبها انتي تعالي لحضنييي
فتحت يديها وركضت لها وهي تضمها صارت تعض خدودها وهي تصرخ بحب: ما اقدر اتحمل انا مقدررررر
بااكلك..
اعتلت ضحكاتها وقالت: ماما خلاثث جوعانه..
ابتعدت عنها وقالت: انا الي جوعانه باكلك يمم يممم
ضحكت وركضت للصاله وهي تركض وراها وتضحكها لين اخذتها ورفعتها لفوق وهي تنططها وتبوس خدودها
جلست على الكنب الي في الصاله وخلتها في حضنها وتنهدت بحب وهي تضمها: الله لا يحرمني منك ياجود
جود: ماما يلا نفطر جوعانه!
ملاك ابتسمت: من عييووووني عيووني ذول لك تبينهم؟
ضحكت جود وهزت راسها بالرفض
وقفت واخذتها للمطبخ وجلستها على كرسيها المخصص وقدمت لها الأكل وبدت توكلها وهي مبتسمه وتناظرها
وجود تلعب بالأكل وتضحك وترجع تاكل مره ثانيه..
وقفت ملاك وخذت جود وراحت تغسل وجهها ويديها وطلعت من المطبخ متوجهه للغرفه دخلت وطلعت ملابس لجود وبدت تغير لها وتمشط شعرها
وجود تلعب بدميه صغيره وملاك تضحكها بين فتره وفتره..
وقفتها قدامها وقالت بتمثيل: يمهه وششس ذااا الزيين
مسكت قلبها وطاحت: ادوووخ ادوووخ انا وش ذاا الزين يابنت قلبي؟؟!
ضحكت جود بفرحه وهي تدور

ابتسمت ملاك ولمعت عيونها بالدموع وصدت بوجهها وهي تتذكره وجملته الي صارت تستخدمها كثير عند بنتهم!

فركت عيونها بقوه وقالت بابتسامة: يلا يا حلوتي الجميله بننهج لبيت بابا جابر..
جود صفقت بفرحه: وحالوا أيهم !
ملاك اومئت: شطووره وحالتوا عراام ههههه
جود ركضت بفرحه للدولاب وهي تفتحه تساعد امها تاخذ ملابسها اخذت ملاك اغراضها بأبتسامه وغيرت ملابسها ولبست عبايتها ونقابها وخذت بنتها وطلعوا من البيت وقفلته وتوجهت لبيت جابر الي بجنب بيتها تماماً..
فتحت الباب بالمفتاح الي معها ودخلت: السلام عليكم
جابر بفرحه: هلا هلا وعليكم السلام تعالي تعالي
نطت جود وراحت تركض له وضمها بقوه وهو يبوس خدودها وملاك تقدمت وباست راسه وراس ام أيهم وجلست تتقهوى معهم..
نزل أيهم بأستعجال وهو يصرخ على غرام: قسم بالله تتأخرين دقيقه حتركك ومشي عليكي
غرام بقهر وهي تلبس شنطة المدرسه: اوف منك اوف
أيهم ابتسم: هلا هلا من الي عندنا من دا الصباح
جود نطت له وهي تتعلق فيه وهو حضنها وباسها
ضحكت ملاك: على طول شافت حالو أيهم سابتك يابويه
ضحك جابر: ايوا دي مصلحيه تدور مصلحتها
أيهم جلس بجنب ملاك وهو حاضن جود: بنت اُختي سيبوها لاحد يزعلها اديها عيوني
جود كشرت: ما ابغى عيونك ولا عيون ماما من الصباح تدوني عيونكم!
ضحك جابر بصخب وقال: بسم الله عليها ملسونه مثل امها
أيهم ضحك: الله يستر بس لا تمثل علينا شي الحين
ضحكت ملاك وضمت جود لها
أم أيهم: الله يحفظها يارب ويخليها ليكي يا يروحي
ملاك ابتسمت: ويخليك لنا..
غرام رفعت حاجب: اشوفك ما قلت شي صارت جود عنك
ايهم ضرب جبهته: اوووف تأخرت على الجامعه
ضحكت غرام بتشفي فيه وطلعت بعده وضحكت ملاك وهي تضم جود
جابر ابتسم: ها يابويه وش قولتي ما تبغي تخلصي دراستك؟
ملاك: وين يبه ترى صار عمري 22 وين اخلص دراسه تكفى بعدين انا الحمدلله اقدر اكتب واقرأ واتحدث اللغة الانجليزية بس ما عندي شهادات وهذا مو مهم المهم اقدر افيد نفسي وبنتي في المستقبل..
ام ايهم: لا تضغط عليها سيبها براحتها
جابر تنهد: انا سايبها براحتها لو اني مش سايبها كان ما سمحت لها تسكن وحدها ببيت أهلها الله يرحمهم
ملاك ابتسمت: انا مو وحدي عندي بنت قلبي وبعدين قلت لك ابي يكون لي خصوصياتي واعيش انا وبنتي ببيت ابوي الله يرحمه..
جابر اومئ: نشوف اخرتها معاك فين
ضحكت ملاك وأم أيهم فتحت يديها لجود الي نطت لها بسرعه وهي تسولف معها ضحكت ام أيهم: بسم الله عليها الله يحرسها بعينه التي لا تنام.
جابر كان يسمع لسوالف جود وهي تجمع مابين لهجة ملاك ولهجتهم ويضحك مع سوالفها لهم..
سرحت ملاك بتفكيرها وهي تفكر في جواد ياترى وش هو حاله من ثلاث سنوات وش هو حاله بعدها؟ .. تزوج ولا للحين معه غلا وبس! صار عنده عيال؟ ولو عرف عن بنتهم وش بيسوي..
تنهدت وغمضت عيونها وهي تتذكر تعبها بعد موضوع الأعدام ويوم اسعفوها قالوا انها حامل والجنين معرض للخطر حاول جابر انها تنزله لكنها رفضت يمكن يكون هو الأمل الي يربطها بجواد يمكن يكون هو الأمل الي يخليها تتذكر جواد وحب جواد وابتسامة جواد حنية جواد لمسات جواد كلماته نظراته...
فتحت عيونها على ام أيهم الي قالت بخوف: ملاك ليه تبكين؟
ملاك رفعت يدها بصدمه لخدها وحست بدموعها مسحتهم بسرعه وقالت: ولا شي ما فيني شي
جابر بجديه: بابا تحتاجين الدكتوره تبين نرجع لها؟
تنهدت ملاك: لا يبه ما احتاج الدكتوره النفسية خلاص صرت بخير الحمدلله...
جابر: صار لك سنه مارحتي لها
ملاك ابتسمت: لا ني ماعد احتاجها خلاص تحسنت الحمدلله وبعدين الي عنده جود يحتاج دكتوره هي الدواء بكبره...
ابتسم جابر بحنية وهو يناظرها...

__
"جواد"
تغير كثير عن قبل من ثلاث سنوات وهو غارق في شغله..
بعد ماصار موضوع الأعدام جاء ابو غلا وأخذها غصب عنها ورفض ان بنته تبقى مع جواد وجواد ما أهتم ابداً فيها ولا قال خلها..
طلع فاهد وبعد شهور تخطوا الصدمه والحزن ويدرون ان هذا مصير ابوهم فاهد رجع لكل صاحب حق حقه ورجع الدكاكين وغيرهم ووزع الورث بينه وبين اخوانه.. وكل منهم بدأ حياته هادي دخل مع جواد ورفض انه يفارقه ودخل بكل نصيبه من الورث معه وجواد دخل في شغل مع صقر وبدأو يوسعون شغلهم ومشروعهم الجاي مستشفى كبير ولازالوا يعملون عليه...

الى الأن ملاك غصة في قلبه لكنه مو قادر يخطي خطوة لها ولا يبعدها من باله تماما كحالة اخوه فاهد.. الي بين فتره وفتره ينهج يزور ولده ويرجع للديره...

كان لسان حال جواد يتسائل ويقول شلون يقطعني بسيف البُعد قطاع الوصال، وانا لو اقطع عرق قلبيّ ما قطعت وصاله! ..

واحيان يتذكر الي جاها وكيف انها ضيعت طفولتها لجل تاخذ بثار امها وابوها ويرجه يقول ‏ودعتك الله لو على قلبي اخطيت ‏وحاربتني من دون ذنب وخطيه السهر صار هو الدرب الوحيد الي يدله جواد ويقول درُوبك يالسهر ماوصّلتني ديرة المرقاد
‏وانا بالي جريدٍ للغرام وورق هوجاسَه

عاف كل شي في بعدها وبعد ضحكاتها عنه صار الليل والهاجوس والقهوه اقرب القريبين له احيان يقول فمان الله وأنت اول قصيده وأخرالابيات واحيان من شوقه لها يلقا عمره صار في ابواب مكه ثم يعود لدياره واحيان يقول .‏اللي خذلنّا ما نعيّد الرجا فيه
‏لو هو بـ جنب أكتافنا ما نشوفه.. لكنه يكذب على عمره لاهو الي قدر يسلى في بعدها ولاهو الي قدر ينهج لها
عينه على الجوال وصورتها ما تفارق عيونه جالسه على المرجيه بأبتسامتها يتذكر تفاصيلهم الصغيره ضحكاتها ونظراتها حتى الكذب الي كانت تكذب عليه يتذكره ويحن له يحن لأستعباطها عليه واستغبائها يحن لكل شي
وقف من على المكتب وتوجه لغرفته توجه لدولابه وناظر اغراضها الي من اربع سنين ما شالها تنهد
وتوجه لصندوق صغير فتحه وشاف الدميه الصغيره والي كان بطنها مخروم لانه طلع الجهاز الي فيها ابتسم وهو يناظرها ونزل يده واخذ الأسواره والخاتم الي ما امداه حتى يلبسها قرأ الجمله الي مكتوبه وهمس: اييي بالله اني صادق...
غمض عيونه وهو يبوس اسمها المنحوت على الخاتم..
تنهد ووقف قفل الصندوق واخذه معه ومثل كل مره من اربع سنوات كل ما حس انه اشتاق لها اخذ موتره وتوجه لمكه...

بعد ساعات
وقف في وسط مكه ونزل وهو يغمض عيونه واستنشق له هواها وهمس: كل ما اشتقت لك جيت اتنفس الهواء الي تتنفسينه وش هو حالك يا بنت قلبي؟..
اشتقتي لي مثل ما انا اشتقت لك حنيتي لأيامنا ولا نسيتيني؟ كيف صار شكلك تغيرتي ولا للحين صار عمرك 22 وانا 32 لكن قلبي قلب طفل متعلق بأمه قلبي تعلق فيك ولا نسيتك اشتقت لك يا بنت قلبي اشتقت لك والله..

تنهد ودخل موتره ناوي يطلع من مكه مثل كل مره..

"ملاك"
ملاك: ييي جود خلاص يا ماما خلاص وش قلت لك خذي حلاوى واحد مو كل ذول!! بعدين هذا حقي خير ليه تاخذينه
جود بوزت وقالت: ابيهم كلهم كلهم وهذا حقي انا
ملاك تنهد وجلست لمستواها وهي منحرجه من الناس الي في البقاله كلهم يناظرونها هي وبنتها
ملاك بهمس: قلت لك ذي الحلاوى حقتي اووف ما تفهمين خذي لك الثانيه شوفي وااو حلوه بالحليب
جود: وووع ما ابيها ابي هذي شوكولاتة
ملاك بنرفزه: جووود هذي لي
جود اهتزت شفايفها بتبكي وقالت: بابا بيجي وبياخذهم لي كلهم
ملاك ابتسمت بحنين وتجمعت دموعها: خليه يجي وبياخذ لنا كلنا
جود بوزت: ماما متى بيجي انتي كل يوم تقولين بيجي ابيه وينه
ملاك رفعت كتوفها بدموع: حتى انا ابيه بس مدري وينه
جود رمت الحلاوى عليها: لا تصيحين خذيهم
ضحكت ملاك بين دموعها وخذتهم: شكراً يا حلوه
جود ما ردت وملاك ضحكت وهي تجمع الحلاوى..
ملاك شافت جود مبوزه ضحكت وبدت تلاعبها متجاهله الجميع

وقف موتره وقرر ينزل ياخذ له مويه قبل يمسك خط راجع للديره دخل للبقاله واخذ مويه وحاسب العامل وجاء بيطلع سمع صوت ضحكة طفله ابتسم لا إرادي ورجع بخطوه للورى وطل براسه يشوف شاف حرمه معطيته ظهرها وتلاعب طفله كل الجمال فيها رجف قلبه وابتسم وهو يناظرها...
جود ضربت ملاك بضحكه وخذت الحلاوى وهي تضحك وملاك وقفت وهي ترجع الحلاوى الي طاحت على الأرض بسبب فوضى جود.
رفعت جود راسها بأبتسامه وتلاشت ابتسامتها
جواد تلاشت ابتسامته وخاف لا يكون خوفها بسرعه مشى طالع من البقاله صرخت جود بفرحه: بـــــــــــــابـــــــــا
ملاك التفتت لها: بسم الله وش فيك
جود بفرحه رمت كل الي في يدها وركض ملاك شهقت ولحقتها وقفها الهندي: خيييير مافي يطلع الا لما يرتب هذا
ملاك بخوف: بنتي طلعت وخرررر
الهندي: مااافي يطلع الا لما يرتب فوضى

جود طلعت تركض وهي تصرخ بفرحه طفوليه: باااابااا
كانت تدور الوجه الي تشوفه في الصور وتوريها امها وتقول هذا بابا كانت تدوره بين الوجيه

توجه جواد للموتر وفتحه وهو يتذكر ابتسامة البنت ابتسم غصب عنه وهو يذكر الله عليها وعلى جمالها بفستانها الوردي سمع صوت طفولي يقول بفرحه: باااابااا
التفت لخلفه وتلاشت ابتسامته وهو يشوف نفس البنت
جود قربت منه وهي مبتسمه جلس جواد لمستواها وهو يتامل وجهها نطت بسرعه لحضنه وهي تضمه لقا نفسه يشد عليها وقلبه يدق بسرعه
سمعها تصيح وهي تضمه: بااابااا
وخرها عنه وهو يمسح دموعها: بسم الله عليك انتي ضايعه يا بابا؟
جود ودموعها تنزل رجعت تضمه: بابا انا استناك كل يووم كل يووم انا وماما.
ارتجف جواد وقال: حبيبي وش فيك وين ماما اوديك لها انتي ضايعه؟ لا تخافين زين؟
جود مسكت وجهه بفرحه بكفوفها الصغيره وقالت: ماما تقول انك بتجي وبتجيب لما حلاوى كثييير
ابتسم لا شعورياً لكلامها ولكفوفها الصغيرة على خدوده

طلعت ملاك وهي تبكي بخوف وتدور عليها تلفتت يمين ويسار وما شافتها حست قلبها بيوقف من الخوف وصارت تبكي وتسئل الناس عنها لفت وجهها ولمحتها شهقت بفرحه وركضت بسرعه..
وقف جواد وهو مبتسم وهو شايلها وفتح موتره وطلع عصير ومده لها وهو مبتسم وهي فرحانه فيه سمع صوت خلا كل شريان في قلبه يتفجر ودقات قلبه تتسارع كأنها طبول معركه...
: جوووود
جود التفتت وشهقت بفرحه: مااامــــااا بابا جااااء
ملاك تقدمت بقوه وسحبتها من الرجال الي معطيها ضهره وصرخت: تبيييي تخطف بنتي انت؟؟؟؟
رجوله رفضت انها تلتفت وقلبه خفقانه بيفجر صدره..
جود: ماما بااابا جاااء
ملاك بحده: جوود اسكتي بابا قلت لك بعدين يجي
اخيرا التفت وطاحت عينه بعينه وشهقت ملاك وارتخت يديها ونزلت جود بفرحه وهي تتوجه لجواد وتضمه
جواد اختل توازنه واستند على الموتر وهو يشوفها واقفه قدامه وعيونها الي يميزها من بين مليون وصوتها ونطقها لحرف الجيم الي يهز قلبه ويزلزل كيانه!...
ملاك بصدمه: جواد؟
غمض عيونه بقوه وتأكد انها هي من اسمه ومن نطقها...
جود تصفق بيديها بفرحه: بابا. بابا بابا...
جواد كان فكه يرتجف وعينه عليها..
ملاك نزلت دموعها وتتمنى لو ترتمي بحضنه تتمنى لو تبكي وتشكي له حبه... تتمنى ووتمنى لكن نظرته لها كانت غريبه ما كانت الأوله!..
نزل نظره لجود الي تصفق بيديها بفرحه
ورفع نظره لملاك برجاء بتساؤل يتمنى الي بباله صحيح يتمنى ان الي تناديه بابا يكون فعلاً ابوها...
ملاك ارتجفت وهي تشوفه سحبت يد جود وقالت تتصنع القوه: جود حبيبتي بابا في البيت خلينا نروح له..
فتح عيونه بصدمه وهز راسه بالرفض..
جود بصراخ: لااااا هذا بابا
ملاك صرخت عليها: جووود اسكتي قلت لك بابا في البيت يستنانا لا نتأخر..
جود صاحت وهي تمد يديها لجواد الي واقف بصدمه قال بسرعه: تزوجتي؟
ملاك وقفت وبلعت ريقها والتفتت له وهزت راسها بالموافقه
هز راسه بالرفض بصدمه وحس بسكاكين تخترق قلبه!..
غمضت عيونها وركضت مبتعده عنه وتحاول تسيطر على جود الي تصرخ عليه وتناديه...
وملاك تبكي بقوه وأخيراً وصلت لبيتها دخلت وقفلت الباب وطاحت تبكي بأتهبار وجود تبكي وتضربها تبي ابوها...

جلس بصدمه وسند راسه على الدركسون ودموعه تنزل
يعني شلون تزوجت وخلفت!!!
بدون شعور منه لقاء نفسه يدق على صقر الي رد عليه: هلا جواد
جواد بحرقه: تزوووجت يا صقر تزوجتتت
صقر عقد حواجبه: بسم الله وش فيك انت
جواد بصراخ ووجهه احمر: شفتتتهااا شفتتتها تزوحت وعايشه حياتها ولا كأن فيه شي وانا الي من اربع سنوات متعذببب متعذببب وهي ولا على بالهااا
صقر بتفاجأ: صلِّ على النبي وفهمني مافهمت ولا شي
جواد يضرب الدركسون بغبنه وقلبه يوجعه: شفت ملاك شفتها ومعها بنت وقالت لي انها تزوجت..
صقر بصدمه: وش تقول انت علمني كل شي بالتفصيل
بدأ يشرح لها جواد كل شي
صرخ صقر بقهر: انتتتت غببيييي انتت غببييي كل مره تمشي عليك بفهم انت ليه لا صرت عندها تصير اغبى انسااان اولاً البنت تقول انك ابوها ثاني شي متى يمديها تتزوج وتخلف بنت صارت تتكلم ثالث شي انت للحين ما طلقتهااا يا غبي شلون تتزوج فهمنييييي
جواد سكنت جوارحه ورمش اكثر من مره
صقر بقهر: اقسم بالله لو انك عندي الحين كان صفقتك والله..
جواد همس بصدمه: شــــ.. شـ..لون بنتي؟
صقر عض يده: اسئل عمرك ولاتبيني اذكرك بأتصالك لي انا وحمد
غمض عيونه بقوه وسند راسه على ورى يستوعب
وصقر قال: رح يا ذكي قبل تلعب فيك مره ثانيه شف وش الموضوع..
قفل في وجهه وهو مغبون منه شلون يضعف ويتوقف عقله عن التفكير لا من صار الموضوع يتعلق بملاك!..

جواد بلع ريقه اكثر من مره ويوم استوعب الي يصير حرك موتره بكل سرعه متوجه لبيت جابر الي كان قريب وقف ونزل متوجه للبيت وقف على الباب وضربه بكل قوته وهو يصرخ بكل صوته
فتح أيهم بصدمه وقال: جوواد
دفه جواد وهو يناديها: ملاااااااك ملاااااك
مسكه ايهم يمنعه يدخل: وين بتدخل انتتت؟؟؟
طلع جابر ووقف بصدمه وهو يشوف جواد
جواد بصراخ: وييين ملاااااااك وبنتيييي ويننهممم؟؟
جابر بحده: جواد اطلع ماعندنا لك شي
جواد بصراخ: اقسسسم بالله ان ما خليتوها تطلع لي والله لبلغ عليكم واقول مخفين بنتي عني من سنييين..
جابر بلع ريقه لان فعلاً معه حق وممكن ان جواد يستغلها ويرد حق ابوه خاف من الفكره وقال: ملاك ماهي هنا
جواد: وينها؟؟ هااه ويننها قبل شوي شايفها وين راحت يعني وين بتختفي
أيهم بعصبيه: مالك شغل في اختي وانقلع من هنا
جواد جاء بيهجم عليه وقفه جابر: ملاك في بيتها
ارتخى جواد وهو يتنفس بسرعه: شلون!
جابر اشر بيده على البيت: هذا بيتها هي وبنتها فيه
أيهم ضرب الجدار بقهر وهو يناظر ابوه
جواد ارتجف وتوجه على طول للبيت وقف على الباب وهو يرتجف ورفع يديه ودق الباب

غمضت عيونها بقوه اول ما سمعت الدقات الثلاث وطاحت دموعها اكثر..
جواد استند على الباب بضعف وقال برجفه: ملاك!!
جود بفرحه: باااابااا
جواد نزلت دموعه وهو يسمع الصوت الصغير
ركضت جود للباب تحاول تفتحه وهي تناديه: بابا
جواد ببكاء: يا عيون بابا
جود برجاء صاحت: ماما افتحي الباب حررام بابا برا
ملاك زاد بكاها وجواد ساند راسه على الباب ودموعه تنزل وجود تحاول تفتحه له وملاك طايحه تبكي...
ركضت جود تجيب الكرسي وقربته وهي تبكي وقالت بطفوليه: لا تخاف يا بابا انا افتح لك الباب تدخل عندنا
لا تخاف من الشارع يا بابا انا افتح لك الحين...
صعدت من عليه ومدت يدها وفتحت الباب ونزلت من الكرسي بفرحه وفتحت يديها له دخل جواد وسحبها لحضنه وهو يضمها ويبكي وهي تصيح معه ابتعدت عنه وهي تمسح دموعه: لا تصيح يا بابا دخلتك هذا انت صرت عندنا خلاص لا تصيح.. وماما تصيح!!
مسح جواد دموعه وتقدم من ملاك الي طايحه على الأرض تبكي قرب برجفه وهو على ركبه وصل عندها ومد يده وهمس برجفه: بنت قلبي!
رفعت راسها وناظرته
جواد هز راسه برجاء
زاد بكاها وقربت منه وارتمت في حضنه وهو ضمها بكل قوته وهو يبوس راسها وكتفها ويشدها له وجود ركضت لهم ونطت عليهم وهي تضمهم
ابتعد جواد عن ملاك وضم جود وهو يبوسها وناظر ملاك برجفه: ليه ما علمتيني؟
ملاك زمت شفايفها بعبره: خفت
جواد بغصه: شلون تحملتي كل هذا لحالك؟
ملاك نزلت دموعها
جواد: ملاك
ملاك شهقت ببكاء وقالت: لا تتركنا يا جواد..
جواد سحبها لصدره وهو يضمها ويضم جود الي تبكي وتضحك بفرحه ابتعدت عنهم وقالت وهي تنط وتصفق: يلا يلا بابا بيجيب لي حلاوى وانتي لا نننن
ملاك مسحت دموعها وقالت: انقلعي بيجيب لي انا
جود تخصرت: لاااا انتي تقولي بابا يوم يجي بياخذ لي حلاوى
ملاك تخصرت مثلها ودموعها تنزل وتحس بفرحه تحل قلبها: كان ياخذ لي من قبل تجين..
جواد كان يناظرهم مو مستوعب أبداً الي يصير قدامه...
ضحكت ملاك وهي تمسح دموعها وقربت منه وضمته وهي ماتبي تبعد عنه ماتبي تبرر له ولاتبي تسمع منه تبرير
جود بوزت وضربت ملاك: وخررري هذا بابا
ملاك ابتسمت: تراي بنته من قبلك
ضحك جواد بتفاجأ من ذول الثنتين وقال: ياويل قلبي صدق دام صار عندي ثنتين
جود مسكت قلبها: ادوخ ادوخ
فتح عيونه بصدمه وضحكت ملاك وقالت بخجل: كل ما لبستها شي اسوي حركتك عشان تنبسط بلبسها
جواد سحبهم الثنتين لحضنه وضمهم بقوه وهمس: ايي والله ادوخ يا بعد حيي جعلني ما انحرم..

جود: يلاا نطلع ابي حلاوى
ملاك كشرت: مابتخليني اضمه دقيقه!؟؟
جواد ضحك وكأن كل سعادة العالم تجمعت بقلبه وقف وقال: نطلع نطلع تعالوا..
جود وقفت وهي تصفق بفرحه وتشرح له وش تبي تسوي وملاك لبست نقابها وطلعت معه وجابر كان واقف على الباب وشهد كل الي صار انسحب بهدوء تاركهم...
دخلت ملاك للموتر وجود بحضنها وجواد دخل لمكانه وقفل الباب وناظرهم وهو للحين مو مستوعب.
ضحك بفرحه وهو يشوفهم قدامه

وحرك الموتر متوجه للبقاله وقف ونزلت جود تركض ودخلت ملاك ودخل جواد خلفهم ويده في جيبه تقدم من ملاك الي تناظر جود تنقي الحلاوى وقرب منها لدرجه قريبه
ملاك ارتبكت: جواد في ناس
جواد برجفه: ما يهموني
ملاك ارتجفت وهي متوتره من قربه مد يده لكفها ورفعها ودخل الأسواره بيدها ودخل الخاتم وقال بهمس مبحوح: اقري الي مكتوب فيها!
ملاك ناظرت عيونه وبلعت ريقها وهمست: قريته في عيونك قبل اربع سنوات.
ابتسم وقال: اجل اقريه مره ثانيه فيها عشان تتأكدين
رفعت يدها وهي تناظر الأسواره والجمله الي مكتوب فيها
جواد وهو يناظر عيونها قال بصوت مبحوح: ولازلت في حبل غرامك اتجود!
ملاك ابتسمت وهمست: وش يعني اتجود
ضحك جواد وقال: بتستعبطين؟
ملاك ضحكت وقربت تضمه وفزوا من صرخة العامل عليهم ان بنتهم سوت فوضى وفتحت الحلاوى كلهم.
ضحك جواد وهو يروح له يحاسبه عليهم ويده بيد ملاك ..

النهـــــــــاية...