ولا زلت في حبل الغرام اتجوّد!. الفصل السادس عشر 16 - بقلم الرنيد

..
ابتعدوا عن البيوت شوي وناظروا لجهة بيوت الشيخ الي انحرقت
صقر: لا تعليـق الصراحه !
جواد اومئ وهو ساكت!.
التفتوا للي جايهم وهو يمشي بخطوات واضح العصبيه فيها
حمد وقف عندهم وقال بحده: جواد بكلمك بماضوع خاص!.
صقر فهم وقال: انا برجع...
حمد اومئ: مشكور
صقر: العفو..
مشى صقر عنهم وهو يناظرهم ثم يعود يناظر طريـقه...
جواد بهدوء: ماضوع وش؟
حمد وهو ما يناظره مشى عنه: تعـــــال!
مشى جواد خلفه وهو مستغرب عصبيته الي واضحه..
طلع خلف حمد لين صاروا برا الديره وجواد مستغرب عصبيـة حمـد..
وصلوا لتحت الجبل والتفت حمد وعيونه تتطاير منها الشرار مسك جواد من ياقته وقال بعصبيـة: وش تحسب نفسك تسوي ياجواد؟
جواد تفاجأ من حركته: وخر وش فيك!؟
حمد وهو يكاد ينفجر من العصبيه صرخ بقهر: تحسب ما فهمت يا جواد تحسبني غبي ولا وش!؟؟؟؟

جواد دفه عنه بقهر: قلت لك انفهق!
حمد وهو يتنفس بسرعه من العصبيه: جواد اقسم بمن أحل القسم ان ما شلت ذا الغباء وحركات المراهقين من راسك لأشيله لك انا!
.. هذا الي ناقص يا جواد هذا الي ناقص!!!!! ...
جواد بحده: تكلم عدل وعلمني وش بلاك!
حمـد وهو معصب: بنت خلف!.. وش سالفتك معها
جواد سكت شوي ثم قال: مامن سالفه
حمد صرخ: لا تكــــــــــذب!
جواد بعصبيه: قلت لك ما من سالفه ليه مُصّر على ان فيه شي؟.. وليه تزمر الحين كني اصغر عيالك!.؟
حمد وهو يحس ان عقله بيجن من العصبيه والقهر: جواد ! جواد! جواد! يرحم امك تكلم علمني لا تخلي الشكوك تذبحني انت وش سالفتك مع بنت خلف بنت خلف؟ يا جواد بنت خلف!؟

جواد صد بوجهه عنه: قلت لك مامن سالفه تبي تصدق صدقت ماتبي هذا كيفك!

حمد: جواد ماني مهبول عشان اصدقك تراني فاهمك فاهمك زين!
جواد بنرفزه: الحين هذي سالفتك مناديني لجل هالشي!؟
حمد ناظره بحده: اجل ليه تنهج لها وتدخل النار واول ما طاحت عينك عليها ركضت لها تلمها لصدرك! .. ليه تاخذها لبيتنا لا وبعد لغرفتك!؟ ليه ما نهجت لمزنه قبل؟.. زين تقول انها مهبولة ورحت لها اول مير ليه تضمها ليه تبوس راسها؟؟؟؟؟ جواد استوعب الي تسويه!
جواد نزل راسه وقال بهدوء: ما من شي بيني وبينها وانت قاعد تتوهم!..
حمد: لا ما اتوهم انا شفتك بعيني شفت نظراتك يا جواد!
جواد بعصبيه: اجل لازم تعدل وتكشف على نظرك لأنك قاعد تشوف شي ما صار!
حمد بعصبيه اكثر: اذا انا بعدل نظري لزوم تعدل عقـلك وتشوف وش بلاه صايرن ما يحكم الأمور ولا يفقها يا جواد!
جواد: عقلي يفقه الأمور وقاعد اقول لك ما من شي وانت مُصّر انك تدبسني بشي مهوب فيني!...

حمد وهو مقهور منه : زين! زين!.. دامك ماتبي تعترف خل اقول لك شي خله بأذنك ولا تنساه... الي قاعد تسويه حركات مراهقين حتى هادي يستحي يسويها...
واسمعني زين اول شي وقبل كل شي لزوم تعرف ان انت محير لك اربع حريم وزواجك بعد يومين!.. ولا يمكن انك تتراجع بزواجك من واحده منهم، لأن لاهو من عاداتنا ولا سلومنا يا شيخ جواد! ... ثاني شي انت لزوم تركز وتفكر بالوضع الي حنّا فيه وتفهم ان في احد ناوي لنا ومتقصد لنا من اربع سنين .. والقبايل كلت وجيهنا؛ عيال الشيخ جراح 12 وللحين ما هم عارفين شلون يقضبون المسؤل عن كل هالفوضى من اربع سنوات، وحرق مخازنا والحين بيوت الشيخ الي توه بانيهم! وانت هنا تعشق وتنغرم يا جواد!؟ ... ثالث شي هذي الي انت طايح بحبها بنت خلف والهنوف... خلف والهنوووف الي طيحوا وجه ابوك الشيخ جراح بالتراب بين العربان بيوم زواجه.... الي خلوا سيرته علكه بلسان الي يسوى والي ما يسوى يا جواد، .. قالوا حرمة الشيخ انهزمت مع ولد عمها!!!... بنت الي احرقوا قلب ابوك وذبحهم بدون ما يرف له جفن يا جواد! ..
وفوووق هذا كله البنت مهبوله... مهبوله!! يااااجواد مابها ذرة عقل! شلون طحت بحبها شلون فهمني انا بديت اجن منك ومن حركاتك يا جواد! كل شوي طالع لنا بمصيبه جديده واحنا نغطي عليك واليوم وشلون اغطي ذي المصيبه يا جواد! ..
جواد كانت انفاسه متسارعه وهو يسمع كلام حمـــد الي جاه كأنه صفعه تصحيه للواقع الي يعيشه! ..
جواد برجفه: ما يهمني شي
حمد مسكه من ياقته بقوه: وش الي مايهمك؟.. يعني تعترف انك تحبها! .. تعترف ان الي قلته كله صحيح !
جواد صد بوجهه بضيق..
حمد بعصبيه صار يهزه: وش الي ما يهمك يا جواد لا تجنني!!!؟؟؟ انت تعترف بالييي قلته انتت تحبهااا يا جواد؟؟!!!
جواد دفه بعصبيه وقال بصراخ: ايـــــــــــــه احبـــــهاااا!!....
ارتد على وراه ووقف بصدمه : جواد!!
جواد وهو يرجف ومغبون: ايـــــــه احبها احبها يا حمد احبهاا...مايهمني بنت منهي ولا يهمني انها ناقصه ولا يهمني شي انا احبها كذا مثل ما هي احبها.... شلون مدري؟؟ لا تسئلني شلون حبيتها لا تسئلني شلون طحت بحب وحده بمثل وضعها انا مدري مدري يا حمد مدري...
طاح على الأرض وهو يرجف غطا بيديه وجهه بضيق

حمد واقف بصدمه ويناظره وهو على الأرض!..
هز راسه بضياع: مدري وشلون حبيتها ورب البيت مدري! كذا بين ليلة وضحاها لقيت حالي مغرم وطايح على وجهي في درب هواها..
حمد صد بوجهه وبلع ريقه وهو مو مستوعب أبداً ولا يبي يستوعـب! .... همس بضيق يحتل قلبه: مستحيل يا جواد مستحيل الي تقوله..
جواد وقف على حيلـة وقال: ماهوب مستحيل!.. هذا الواقع وهذا الي عشته! هذا الي صار انا أحب ملاك بنت خلف والهنوف!... بنت الي انهزمت من ابوي لجل لا تاخذه.... بنت الي ذبـحها ابوي وذبح زوجها معها!!... حبيت بنت ناقصة عقل ومهبوله!.. على قولكم... انهج علم ابوي... انهج علم اخواني.... انهج علم أهل الديره كلها... انهج يا حمد انهج وقل لهم مير ورب البيت ماني تاركها ورب البيت لو يا خذني ابوي لنفس الساحه الي ذبح امها وابوها فيها ماني تاركها! ."بضعـــــف" . انا ابيها!! ابيها
لا تسئلني شلون ياحمد انا بنفسي مدري انا ابيها وخلاص ابيها واحبها ياحمد انا مدري وش يجيني لا شفتها "برجفه" احس ان كل ضلع فيني يذوب في قربها منطوقها! ، شكلها، وجهها، عيونها ياحمد عيونها!! كل شي فيها يجذبني يا حمد ماني قادر اني اصبر اكثر... دامك عرفت انهج وعلم ابوي وكاد ان خطوتك ذي تقربها مني! ..
حمد هز راسها وهو ماهو قادر أبداً يصدق الي يقوله جواد: منت صاحي ورب البيت منت صاحي!..
جواد بلع ريقه: والله اني صاحي واصحى منكم جميع...
حمد صد عنه ومشى بخطوات تحمل كل معاني الصدمه والأنكسار! اخوه جواد بيكسر ابوه وبيكسر ضهره بعد! متوكد لو عرف الشيخ جراح ما بيعديها بيعّيّش جواد اسوء الأيام وأمر الليالي! ....
جواد كان يناظره وهو مبتعد عنه ويمشي ولا حتى التفت له رفع راسه للسماء وتنهد بضيق وقال بغصه: يااارب..
نزل راسه وناظر يا قته الي من كثر ما شدها حمد تناثرت جميع زراير ثوبه! ....
زفر وشد على عيونه بقوه من الصداع إلي داهمه من الهم والضيق...
لف للديره وهو يمشي بخطوات بطيئه والشمس ضاربه في وجهه صار وقت الظهر الحين والشمـس تحرق كل شي بهالوقت.... سرح بتفكيره لحمـد يفكر وش ممكن انه يسوي بعد ما عرف بسر جواد وفي نفس الوقت تذكر المخازن وسالفتهم تنهد بضيق وناظر للبيوت الي حرقت فرك جبينه يخفف الصداع ورجع ماشي لبيتهم وهو يبي يروح يشوف حال ملاك واذا صحت ولا لا.!

"غيداء"

كانت جالسه وسرحانه وهي تتذكر كلام ام العنود الي علمتهم بسالفة خلف والهنوف وسالفة بنتهم...
وفي قلبها مشاعر كثيييره ومتلخبطه ماتدري توصفها خوف ولا حزن ولا حيره من الي يصير ولا وش تسميها؟!...
هديل كانت تناظر اغراضهم هي وآمال وانتبهوا لغيداء الي سرحانه وجالسه على السرير ومغطيه رجولها باللحاف وماهي حولهم أبداً!...
هديل بهمس: علامها!؟
آمال: مدري والله وضعها ماش مو عاجبني من امس ووضعها غريب وهذا غير انها طلعت تصارخ تقول شافت الحرامي مدري وشو! انهبلت ما عد فيها عقل..
هديل ضحكت بخفه وقالت بهمس: تدرين ان هذي اكيد اكيد ديرة احلامها كلها اكشن وحريق ومصايب وقتل هههه
آمال هزت راسها بيأس وضحكت..
هديل التفتت لغيداء الي للحيـن سرحانه قالت بضحكه: غيدووو حبيبي!! ياااهوو...
ماردت عليها وهي مو منتبهه لها
آمال ضحكت: والله انها تخطط لمصيبه..
هديل وقفت وتركت الفستان الي بيدها وراحت لغيداء جلست على طرف السرير ومدت يدها لكتف غيداء وهزتها على الخفيف: بنت!
فزت والتفتت لها: بسم الله وش؟
هديل ابتسمت: وش فيك.
تعدلت غيداء بجلستها: مافيني شي
هديل: لا بالله ان فيك شي والحين علميني!.
غيداء تنهدت: يختي قاعده افكر شلون كذا يعني شلون ذبح ذي الي اسمها هنوف وولد عمها وربي ماني مستوعبه... خلاص يارجال البنت ماتبيك وتبي ولد عمها فكنا وخلها تتزوجه وتعيش حياتها ليه يذبحهم حرام عليه والله العظيم حرام وباطل بعد..!!
هديل تنهدت بحزن: صادقه والله قطعوا قلبي قصتهم مره تحزن يعني وشو ذنبهم غير انهم حبوا بعض!

غيداء عضت شفتها بحزن وهي تفكر ارتخت ملامحها وقالت بحماس: اوخص اوخص.. جاتني فكره بنت سته وستين ذكـي!
هديل ضحكت: بسم الله وش قلب حالك وبدله.

غيداء ضيقت عيونها وهي تفكر وتكمل الخطه براسها..
هديل: وش فيك!؟
غيداء ابتسمت بطفاقه: انا قررت اعرف خفايا هالديره كلها!.. واعرف قصصهم واحد واحد ومن خلال هالشي بطلع الي يحرق بيوتهم من اربع سنين! مثل ما قالت ام العنود مدري شسمها! .. وبعد بصور كل شي اشوفه او اي شي اسمعه وبعدها بسوي فلم وثائقي على اليوتيوب ويصير عندي متابعين والناس يعرفوني اني مكتشفة وتصير عندي جوايز ويمه يمه على جمال افكارك يا غيداء! والله ان الي مستقبل باهر في التحقيق والتحري...
آمال ببرود وهي ترتب اغراضهم: ومن بعدها الشيخ هذا مدري وش اسمه يا خذك للساحه الي ذبح فيها ذول الأثنين ويذبحك مثلهم وتصيرين اول مطفوقه تموت بسبب طفاقتها! ...
غيداء بخوف: اعوذ بالله منك ومن الفاظك!..
هديل: وهي صادقه وش فيك انتي انهبلتي زود كنا في البيت ياله ياله متحملين هبالتك تجين الحين تزودينها هنا لا والله بيذبحك ابوي قبل يذبحك شيخ ديرتهم! ...

غيداء كشرت: ماحد يعلمكم بشي أبداً... ناس الشغف عندهم ميييت!
هديل وقفت ورجعت لآمال: الا قولي الطفاقه ميته عندنا وعندك كلها.
غيداء صدت عنهم وهي تكمل تفكيره وتخطط شلون بتعرف قصصهم كلهم! ...
وهديل ناظرتها وهزت راسها بيأس وابتسمت بخفيف وهي ترجع ترتب اغراضهم..

____
" ود "
كانت جالسه بحوش بيتهم وفي يدها الورقه هذي المره المليون او اكثر وهي تفتحها وتقرأ الي فيها من يوم صار الي صار وهي مو مستوعبه أبداً الي قرأته رجعت لمسفر الفساتين مير ما قدرت ترجع الورقه للحين وهي محتفظه فيها وماهي مصدقه ان مسفر ممكن انه يكتب مثل كذا او يكون من هالنوع! ..
دخل ابوها وقال: بنهج اصلي وانتو لا تطبخون اليوم بتغداء ببيت الشيخ وانتو انهجوا بعد لبيت الشيخ الخير واجد هناك!
فزت برعب لدخوله المفاجأ وخبت الورقه خلف ضهره بأرتباك..
قال وهو مضيق عيونه بشك: علامك وش تخشين وراك؟
هزت راسها برعب: ولا شي يبه ولا شي
قال بعصبيه: قلت وش تخشين وراك
بكت بضعف وهي ضعيفه جدا في مثل هذي المواقف: مافي شي يبه تكفى!
تقدم منها بعصبيه وسحبها من يدها بقوه لين وقفت وسحب يدها بعصبيه وشاف الورقه الي طوتها خلفها سحبها من يدها بقوه وود طاحت على الأرض وهي تبكي بأنهيار..
فتح الورقه وهو يشوف الي فيها..
بكت بنحيب وهي تستعد للموت!! بعد ما يقرأ الي فيها!..
رفع راسه لها وقال: وش مكتوب فيها؟
ودّ وهي تبكي هزت رأسها بالرفض... بضعف كبيير.

صرخ بصوته وهو يشوف انهيارها: صــــــــــلاح !!

طلع صلاح من البيت: ســّم يُـبه!
ابو صلاح: شف وش مكتوب في الورقه تعرفني ما اقدر اقرأ
صلاح وهو يعدل شماغه: ورقه وش!
ابو صلاح: مدري لقيتها مع اختك الرفلا وخافت مني يوم شفتها شف بالله وش المكتوب! ..
صلاح سحب الورقه وعينه على ودّ بحده فتحها وهو يقرأ المكتوب وتوسعت عيونه بقوه وهو يقرأ

("هذا فستانك ولا تترددين في أي وقت جي وخذي الي تبين لو تطلبين عيوني ما تغلا عليك ") : اخـو صالح!!
ابو صلاح بحده: وش المكتوب!
صلاح بعصبيه انقض عليها وهو يسحبها من شعرها وضرب فيها بكل وحشيه..
ابو صلاح اول ما فهم ان في الموضوع شرفه هجم عليها وهو يضربها بوحشيه أكثر من ابنه وهي تصارخ بكل صوتها...
وطلعت امها وهي تصرخ وتحاول تفكهم عنها وطلعت اختها بعد وهي تصارخ وتبكي...
واعتلى صوتهم مالي الديره وابو صلاح يسحب في ودّ بشعرها ويسحلها في الحوش ويضرب فيها ويرفس بطنها!...
دخل صلاح للبيت وهو يرتجف من العصبيه ودمه فايير على الأخر سحب السلاح وطلع وهو يرفعه عليها: وخر يبه خل نغسل شرفنناااا..
صرخت امها بأنهيــار: لااااااا يااا صلاح لاااااا اختك يااا صلاااح اختتتتك
ابو صلاح بعصبيه ابتعد عنها وهي مرميه على الأرض والدم مغرقها من الضرب: انطن السلاح انا اذبحها بيدي انااااا اغسسل شرفي بيدي انااا!!
ام ودّ بأنهيار فتحت باب البيت وطلعت وهي تصرخ بكل صوتها: يااااااشيييييخ الحــــــــق عليييينا يااااشيخ انا في وجههك يااا شيخ...

كانوا الرجال كلهم مع الشيخ جراح متوجهيـن للمسجد يصلون الظهر سمعوا الصراخ والتفتوا وكانت تصارخ على باب بيتهم وتضرب وجهها...
الشيخ جراح بصراخ: وش فيك يااا مــــــــره!!
ام صلاح بصياح: بيذبحون بنتي انا في وجهك يا شيخ انا في وجهك...
تقدم الشيخ بكل عصبيه وهو يدف الباب ويدخل شاف ابو صلاح مصوب السلاح على الي مرميه في الأرض والدم مغطي وجهها! صرخ بحده: ابوو صلااح!!
رفع ابو صلاح راسه وهو يرتجف من العصبيه: يااا شيخ لا تمنعن خل اغسل العار الي جابتوه لي!!
الشيخ جراح بحده: انزل سلاحك لعن الله ذا الوجه يا الرخمه!
نزل سلاحه وهو مغبون!
صلاح بعصبيه: يا شيخ جابت لنا العار يا شيخ!
الشيخ جراح بعصبيه: اقطع قطع الله صوتك!! يا الرخمه هذي عرضك وشرفك!! وش السالفه يا الرخمه؟
ابو صلاح وهو يلهث والدم محتقن بوجهه: يا شيخ هالـ"""" جايبه لنا العار ومقضيتها عشق وغرام ومراسيل!! .
الشيخ جراح بحده: علمني وش السالفه؟
صلاح بقهر تقدم ومد الورقه للشيخ: ناظر يا شيخ ناظر..
اخذها الشيخ جراح بعصبيه وفتحها وهو يقرأ المكتوب

"هذا فستانك ولا تترددين في أي وقت جي وخذي الي تبين لو تطلبين عيوني ما تغلا عليك ") عقد حواجبه: منهو الي مرسلها؟
صلاح بغبنه وحرقة قلب صرخ : مدرييي يا شيخ مدري!!
الشيخ جراح بحده: اقطع صوتك لا ترفعه بوجودي لا يلعن الله هالوجه!
سكت صلاح وهو يشد على يده ودموعه نزلت من حرقة القلب الي حس فيها ان اخته تطعن في ظهرهم وتحب وتعشق!.
الشيخ جراح بحده: وانتي فزي سود الله وجهك فزيي
وقفت وهي تشاهق وبالكاد تقدر توقف همست بضعف: انا في وجهك ي شيخ والله مالي ذنب والله
الشيخ جراح بحده: قلت فزي
وقفت ودّ وهي ترتجف وتبكي وكل مكان في جسدها يألمها
الشيخ جراح مد لها الورقه: من الي مرسلها لك؟..
ودّ وهي منهاره: والله مالي ذنب ي شيخ والله مالي ذنب.
الشيخ جراح بعصبيه ضربها كف قدام كل اهلها: قلت من الي مرسل لك الورقه هذا الي ناقص بديرتنا الدشاااره!!! .
ودّ طاحت على الأرض من قوة الكف الي جاها من الشيخ جراح!...
ازرّق وجهها وهي تحس النفس اختفى عندها! ...
الشيخ جراح بعصبيه: قلت لك من الي مرسل لك الورقه..
ودّ رفعت راسها وشعرها صار لاصق بوجهها من الدم الي مغطيه قالت بصوت يالله ينسمع وفيه من الوجع الكثير: والله العظيم يا شيخ مالي ذنب انا في وجهك!
الشيخ جراح بصراخ: قلت من الي مرسل لك الورقـه!!؟؟
ودّ غمضت عيونها بأنهيار وقالت بصوت مخنوق ومبحوح: مســـفر! ..
اختفى صوتها من بكاها الي زاد يوم حست برجل تركلها في بطنها بكل وحشيه وسمعت صراخ اخوها وانهياره وهو يتوعد في مسفر والشيخ جراح بكل عصبيه ضربه كف خلاه يسكن مكانه وسحب ودّ من شعرها بكل عصبيه وهو يقول: غطوهاااا..
ركضت اختها وهي منهاره وتبكي بوجع على اختها الي ما توقعت أبداً انها تسوي هالسواه! ..
جت لهم وغطت اختها بالعبايه وهي والشيخ جراح سحبها وراه وهو يطلع من البيت وابوها واخوها بعدها وهم ناكسين روسهم بين أهل الديره بكل قهر وخزي!

الشيخ جراح بعصبيه صرخ بكل صوته: مســـــــــــــــــــــــــــــــــفر! ..

الشيخ جراح بعصبيه: فاهد!! عسااف!!
فاهد وعساف: سـّم يا شيخ
الشيخ جراح: جيبوه للمجلس.. وانتي تحركي لعنة الله عليك!
رماها وطاحت على الأرض وهي ما تقدر توقف ونص فاقده للوعي...
مشى الشيخ فاهد وعساف متوجهين لبيت ابو مسفر...
وابو صلاح اخذ ودّ من الأرض وهو يسحبها خلفه متوجه لمجلس الشيخ بعد الشيخ ورجال الديره كلهم يتهامسون من الي صار.. أهل صقر كانوا في صدمه كبيره كبيره جداً من الي يصير مو مستوعبين أبداً...
جواد كان قلبه يرجف من الخوف: وش صاير احد يفهمني!
راجح كان يرتجف برعب: مدري يا شيخ مدري..
واحد من أهل الديره بصدمه: مسفر وبنت ابو صلاح الظاهر مسوين الشينه!!
جواد بصدمه: اعقب اقطع الهرج وش تقول انت!!

كل واحد صار يحلل من عنده وش الي صار وناس يقولون انهم ارتكبوا الفاحشه ومنهم الي يزيد في الكلام...
وجواد ماهو مصدق ابد الي يقولونه مسفر مستحيل تجي منه العيبه!!
طلع هادي وهو يرتجف من بيت الشيخ وقال: الشيخ جراح يبي كل أهل الديره في المجلس! .
بلع جواد ريقه وهو ميت خوف على مسفر! من الي بيجيه...
وماهي الا دقايق واقبلوا الشيخ فاهد والشيخ عساف وفي وسطهم مسفر الي ما يدري وش صاير ويمشي بصعوبه بسبب الحروق الي برجوله... كان يشوف أهل الديره كلهم يناظرونه بقرف وحقد ارتجف قلبه بخوف وهو ما يدري وش صاير!! ..
مايدري وش يدور حوله ولا يعرف ليه كل أهل الديره صاروا بمجلس الشيخ وليه يسحبونه للمجلس وليه الناس تناظره بكل حقد وقرف واشمئزاز وصل للمجلس ودخل هو والشيخ فاهد والشيخ عساف واول مادخل هجم عليه صلاح وهو يخنقه ويصرخ بكل قهر ويبكي من حرقة القلب الي يحس فيها!! .
جواد فزع بسرعه ودف صلاح عنه وصرخ: انثبر مكانك!!!
الشيخ جراح بعصبيه: صلااااح اقضب مكانك لا العن خيرك!!
صلاح وقف وهو يتنفس بسرعه كبيره ويلهث بعصبيه ودموعه تنزل بكل حقد وقهر....
مسفر كان جسمه كله يرجف وهو يشوف الموقف الي طاح فيه ولا يعرف وش السبب.. قال برجفه: يا شيخ وش صاير...
ما امداه يكمل كلامه الا وطاح على الأرض بقوه من الضربه الي جاته من الشيخ جراح صرخ بوجع من رجوله الي تدمرت من الوجع....
الشيخ جراح نزل عليه يضرب فيه بكل وحشيه وسحب العصاء حقته وصار يضربه فيها في كل مكان بجسمه.. والكل يناظرونهم بخوف وتوتر وابو مسفر طايح على الأرض يناظر ابنه بعجز.. واهل صقر في حالة صدمه كبيره ماهم مصدقين ابد ابد...
مسفر صار يكح بقوه والدم يطلع من فمه رفعه الشيخ جراح بعصبيه ووقفه قدام الجميع وقال وهو ماسكه من ورا رقبه وقال بصراخ: اقسم بمن احل القسم ان سمعت ان واحدً جايبن لديرتنا الدشاره ان ينذبح سااامعييين...
مسفر ودموعه تنزل بوجع ودمه يطلع من فمه: وش سويت يا شيخ علمني وشني مسوي!؟
الشيخ جراح دفه بقوه وطاح على وجهه وصرخ بوجع وشهقاته تزداد من الوجع الي يحس فيه...
توجه الشيخ جراح لودّ الي في زاوية المجلس خلف الرجال تبكي برعب كبير وقلبها شوي ويتوقف من الخوف... سحبها بكل عصبيه وهي تبكي وتترجاه...
وتترجاء ابوها واخوها...
رماها في وسط المجلس بجنب مسفر الي يلتوي من الوجع ويأن بشكل يقطع القلب...

صرخت بوجع وقالت: والله العظيم يا شيخ مالي ذنب اقسم بالله هو الي مرسلها انا مالي ذنب...

مسفر كان يكح بقوه والدم يطلع من فمه...
الشيخ جراح بعصبيه: هااات السووط يااا حمـد

حمد بلع ريقه برجفه وناظر اخوانه بخوف

الشيخ جراح بعصبيه: قلتت هااات السوط يا حممد
راح حمد بسرعه وهو يجيب السوط..
ورجال الديره كلهم واقفين في المجلس ويناظرون وقلوبهم ترتجف بخوف ورعب من الي يصير...
مسفر برجاء: يااا شيخ فهمني وشنييي مسووي يااا شيخ ماااسويت شي يااااشيخ تكفى هذي المره الثانيه وانت تظلمني يا شيخ تكفـى...
صرخ بكل صووته بوجع من السوط الي طبع على جسده...
ومن بعده اعتلت صرخت ودّ الي ضربها الشيخ فيـه...

جواد شد على يده ودموعه تجمعت بعيونه...
مسفر كان يشهق بوجع ويحس روحه بتطلع من الوجع اما ودّ اغمى عليها من الوجع..
جد صقر ماقدر يتحمل اكثر وتوجه له ومسك يده: طالبك يا شيخ طالبك
الشيخ جراح بصراخ: والله لأذبحهم والله يبون يبدون الشينه هم بديرتنا هم يبون يبدون الدشااااره!!!
الشيخ هزاع تقدم وبحده سحب السوط من يد الشيخ جراح ورماه على الأرض: والله ما تمد يدك عليهم اكثر يكفي جاهم الي يأدبهم الله وهو رب العباد جعل الجلد للي يزني مب الي يرسل رساله يا شيخ جراااح..
الشيخ جراح بعصبيه وهو ينتفض: الرساله تجي بعدهت الفاحشه!!
الشيخ هزاع بعصبيه: لا تحكم قبل يصير شي وقبل تتوكد!!... هالمره خلهم في وجهيي
الشيخ جراح بعصبيه: والله والله ان ينذبحون..
الشيخ هزاع بحده: اجل جعل مقابلتك حرام علي وعلى الشيوخ ووالله ان تصير حربك معي مهوب معهم انا قلت لك هم في وجهي تفهمممم؟؟؟!!

الشيخ جراح مفض يده بعصبيه وناظرهم وهم مرميين على الأرض ومسفر يئن بوجعع وصوته مالي المجلس...
اجتمعوا الشيوخ حول الشيخ جراح وهم يطلبونه هالمره...
قال بحده: بتركهم مير والله ما يطلعون من هالمجلس الا وهم مملكين وينقلعون من الديره مابي شوفتهم..

الشيخ هزاع: زين راضين.... تعال املك لهم..
تقدم الإمام وهو يرتجف وجلس بوسط المجلـس
تقدم الشيخ جراح وهو يوقف مسفر بعصبيه وقال: تعال يا مسود الوجه تعال..
رماه بقوه على الأرض بجنب الإمام ومسفر كان منكسرر منكسررر حيل ويحس ما عد فيه حيل يتحمل الظلم اكثر فهم الموضوع من كلام الشيخ ان احد متهمه انه مسوي الفاحشه وهو بريئ بريئ ماله ذنب...
شاف وجه ابو صلاح قدامه فتح عيونه بصعوبه وهو يناظره!!! وش يسوي ابو صلاح قدامه.. التفت لوراه يشوف البنت الي مرميه على الأرض!!! منهي هالبنت هذي بنت ابو صلاااح!!! .. امتلى قلبه بالحقد وصرخ: هذيييي تبلتتتني والله العظيم تتبلاني والله والله مااخذها والله ..
صرخ بوجع من الشيخ جراح الي ضربه بقوه على ضهره؛: اقطع صوتــــــــــــــك..
جواد تقدم برجفه: يا شيخ خلنا نسمع له يمكن انه يقول الصدق..
الشيخ جراح بعصبيه لف وبدون وعي منه رفع السوط وضرب جواد بعصبيه وصرخ: انـــــــــــــــــــــــت بالذاااات لاا تتدخل..!!!!
غمض عيوووونه بقوه من الوجع الي داهمه وسكت وكتم وجعه وهو يناظر مسفر الي حالته يرثى لها...
الشيخ جراح بعصبيه: املك لهـــــــــم
الإمام برجفه: مد يدك ليده يا بو صلاح
ابو صلاح بعصبيه وحقد سحب يد مسفر وهو يضغط عليها بقوه..
الإمام: ردد وراي زوجتك ابنتي واذكر اسمها...
ابو صلاح برجفه قهر وانكسار: زوجتك ابنتي ودّ على سنة الله ورسوله..
الإمام ناظر مسفر الي مو حولهم أبداً وهو شبه فاقد وعيه: قل وانا قبلت بها زوجة على سنة الله ورسوله...
مسفر كان يغمض عيونه وهو يحس انه بيموت من الوجع
الشيخ جراح ضربه بقوه على ظهره وفز مسفر وصرخ بوجععع وهو يبكي بحرقه
الشيخ جراح: ردد ورررااااه
مسفر تكلم والدم يطلع من فمه وهو يبكي بوجع: وش اقول! وش اقول...
نزلت دموع جواد وهو يعض شفته بقوه لين حس بطعم الدم وهو يناظر مسفر الشاب الي ما تجاوز عمر التاسعة عشر وهو يتعرض لموقف مثل هذا!!...
الإمام: قل وانا قبلت بها زوجة على سنة الله ورسوله!..
مسفر شهق بوجع وناظر ابوه الي واقف ودموعه مغرقه وجهه ميل راسه برجاء: يبه مالي ذنب.!!
الشيخ جراح بعصبيه: ردد يالـ###.
مسفر بوجع قال: قبلت بها زوجة على سنة الله ورسوله...
الإمام سكت ولا تكلم عن مهر ولا عن شي وهم في وضع مثل هذا! ..
ابو صلاح نفض يده من يد مسفر ووقف وقال: انا متبرين منها امامكم جميع ولا هي بنتي ولا تشرفني!..
الشيخ جراح هز راسه: كفوا يابو صلاح كفو
ناظر ابو مسفر بحده الي قال بغصه وهو يناظر ولده بأنكسار: كسرت ظهري يابوك كسرت ظهري
مسفر برجاء: يبـه تكفى لا

ابو مسفر بقهر: وانا متبرين منه دنيا وآخره امامكم جميع لا هو ولدي ولا يشرفني
مسفر بأنهيار: يبــــــــــــه لاااا يبه لا تذبحني يبببه تكفــــــــــى..!!!!

الشيخ جراح بعصبيه: الحين تطلعون من الديره وان شفتكم تدخلونها والله ان تنذبحون والله!!!
مسفر شد شعره بأنهيار وهو يصرخ بقهر

جواد بصراخ وهو مو قادر يتحمل : وشششش تسووون انتوووو ..... ذووول عيالــــــــكم!!! شوووفهم اول اسممعووا منهم!!!
الشيخ جراح بعصبيه: فاااااهد!
فاهد: سـّم ياالـشيخ!
الشيخ جراح: خذ جوواد من هنا..
جواد بحده: ماااني وغد عندكم تاخذوني وتودوني والله العظيم ما اطلع من هنا وان طلع مسفر ورب البيت ان اطلع انا من الديره والي يصير يصير!!
الشيخ جراح رفع يده وخلا الكل ينصدم من الكف الي وجهه لجواد بكل عصبيه وصرخ: خذووووووه يا فااهد

عساف ونمر وسناد وعناد كتفوا جواد وهم يطلعونه تحت صدمة الجميع من الي يصير...
والشيخ جراح امرهم يرمون مسفر وودّ برا الديره...
مسفر كان يتنفس بصعوبه وهو يحاول ياخذ نفس ويشاهق بقوه...
حس فيهم يحملونه ويطلعون من المجلس اغمى عليه بين يديهم وطلعوا من البيت وهم يحملون ودّ ومسفر واعتلى صياح الحريم الي كانوا برا.. وهم يشوفون عيالهم كأنهم جثث!! ..
رحـمه: ياااااوجع قلبك يااااا رحمه انذبح ولدك

ام ودّ كانت تصيح بكل صوتها وهي تثر التراب عليها وتضرب وجهها وتندب وتصيح
وبنات رحمه واخت ودّ وحريم الديره يحاولون يهدونهم والكل يصيح بأنهيار...
طلع الشيخ جراح وصرخ بعصبيـه: اقطعـــــــــي صوتك انتي وياها!!!!..
رحمه: يااا شيخ ليه تذبحهم لييييه وش سوااة ولدي كل مره تطيح برراسه!!
الشيخ جراح بحده: ولدك جاب العار له وللبنت الي معه ومن اليوم ورايح والله ثم والله مالهم مكان بهالديره والله!!!
ام ودّ كانت تبكي بأنهيار وهي تلطم وجهها وتصيح...
دخل الشيخ جراح للمجلس....

كان واقف وسط الرجال وعيونه للحين معلقه على المكان الي انضرب فيه خوي عمره وصديق طفولته واقرب الناس اليه... بسببه صار كل هذا لمسفر هو الي كتب الورقه الي يتكلمون عنها هو الي سوا كل هذا والي تعاقب هو مسفر حس روحه تطلع منه بدأت دموعه تنزل وشهقاته تعلى والكل انتبه له وناظروه وهو يطيح على الأرض يصيح بكل صوته على خوي عمره الي انتهت حياته وتدمرت بسببه بسبب رساله كتبها بكل طيش وغباء بسبب هالرساله مسفر صار منبوذ! وتدمر تدمرررر حملوه شي فوق عمره!!! ..
التفوا الرجال حوله وهم يهدونه وهم يحسبونه منهار عشان الي صار بصديقه ما يدرون ان راجح يصارع الوجع لأنه السبب بالي صار لخويه......
.......

...............

وقفوا بالشعيب ورموا مسفر وودّ فيه ومشوا عنهم
راجعين للديره تاركين خلفهم قلبين بريئين مالهم ذنب بكل الي صار... وحملوهم اوجاع للسنين كلها اوجااع اكبر من اعمارهم اوجاع الي بعمر الخمسين ما يقدر يتحملها... وحملوهم وهم بعمر الزهور مسفر بعمر 19 و ودّ بعمر 16 سنه......
وكان هذا هو اقسى شي سواه الشيخ جراح بعد قتله للهنوف وخلف اليوم انهى حياة مسفر وودّ بسبب قرراته الظالمه... حكم عليهم بدون ما يسمع منهم بدون ما يتحرى الحقيقه بدون ما يعرف شي... اخذ الموضوع بعين الرؤيه واعتمد على ما سمع وأول شي شافه...

تركوا هالجسدين مرميين يغطيهم الدم...

في بيت الشيخ جراح كان جواد في مخزن القدور ومقفلين عليه الباب وهو يصرخ بكل صوته وهو منخار نفسياً من الي صار : ياااا شيـــــــــــــــــخ جرررااااح اقســــــــم بمن رفع سبع سماوات وبسط سبع سماوات ما أعرس اقســم بالله!!!! ...

انفتح الباب بقوه ودخل الشيخ جراح وفي يده السوط وسكر الباب
وجواد وقف وهو يناظره بتحدي: اقسم بالله ان اطيح وجهك بين العربان وما اخذها!...
تقدم الشيخ جراح منه وهو يحرك السوط في يده!
جواد ناظر يده وقال بعصبيه: ورب البيت لو تذبحني ما اخذها!
رفع السوط بكل عصبيه واستقر على ضهر جواد الي التفت واستقبل الوجع في ضهره وكتم صرخته ووجعه..
الشيخ جراح بحده: اجل جاي تتحداني يا جواد!؟
جواد رفع راسه وناظره: والي سواك اني ما اخذها! إلا ترجع مسفر والبنت للديره وتتركونه في حاله والا ورب البيت الحرام ماني ماخذ الحرمه ذي وان تتفشل بين العربان وتطيح كلمتك بينهم ويسّود وجهك يا شيخ جراح!....
الشيخ جراح سحبه من ياقته بقوه وهو يخنقه وفحيح: جاي تتحدانني ي جووواد !!!

جواد ووجهه صار احمر وهو يحس الهواء بدأ يختفي!
الشيخ جراح بحده: جاااي تتحداننني يا جـــــــــواااد!!
دفه بعصبيه وطاح جواد وهو يكح بقوه ووجهه مخنوق...
الشيخ جراح جلس عنده ورفع راسه بعصبيه: تتحداني!
جواد صر على اسنانه وناظره: قلت لك كلامي!
الشيخ جراح دفه بعصبيه وقال: بتاخذها طرق عن خشمك!!! باكر الأربعاء ومن بعده الخميس بتاخذها غصب عن خشممك يا جواد! ..
جواد وهو يناظره بحده: ورب البيت ما اخذها وان ارفضها قدام العرب كلها!
الشيخ جراح انقض عليه وهو يخنقه بيده وهو معصب منه: قلـــــــــــــــــت بتاااخذهاااااا طررق عن خشمك

انفتح الباب ودخل فاهد ووخر ابوه بسرعه من على جواد وقال بهمس يهديه: ي شيخ العرب برى يا شيخ هذا ولدك وشيخ والمعرس!!! تبي العرب تاكل وجهك؟؟!! .. مسفر اخذ الي جاه وخلاص غلق الموضوع يا شيخ جراح..
الشيخ جراح وهو ينتفض من العصبيه: يتحداني يا فاهد يتحداني
فاهد ناظر جواد بضيق: يا شيخ اسفهه اسفهه وخلك منه والله ما يطلع في يده شي من بعد شورك..
جواد رفع راسه وقال: والله ما اخذها الا ترجع مسفر للديره!
فاهد بحده وهو يبي جواد يسكت: جووواد!!!
جواد ناظره بحده: انت لا تتكلم.... وش رايك اعلم الشيخ هزاع بالي تسويه ببنته يا شيخ فاهد!!
فاهد تقدم عليه وهو يلكمه على وجهه بعصبيه: تخســـــى يالرخمه!!
جواد وقف وضحك بسخريه والدم يطلع من فمه: ياليتها انفجرت فيني الطياره ولا جابتني لكم!
يا ليتني مت في لندن ولا رجعت لكم... يا ليتني مت وانا ببطن امي ولا انولد بينكم!!! ..
يا ليت ويا ليت ويا ليت!
الشيخ جراح طلع من عنده وهو يحس انه بيذبحه اذا طول عنده

فاهد بقهر: جواد اقضب لسانك اقضب لسانك..
جواد مشى عنه وهو منهار نفسياً وروحه تصرخ بوجع من الي صار..
طلع من المخزن وعلى طول دخل البيت وهو مايبي يشوف احد ولا يبي يسمع احد ولا. يبي حتى يتنفس هوى الديره! ..
دخل للبيت وصعد الدرج بكل سرعته متخطي الحريم الي كلهم جالسين في الصاله وكلهم في حالة صدمه ورعب بعد الي صار مع مسفر وودّ....
كانت خطواته كلها مستعجله وصل لباب غرفته وفتحه بكل قوته وشاف ملاك واقفه على الدريشه والتفتت له اول ما فتح الباب ابتسمت له بخفه وهو سكر الباب وركض لها وهو يسحبها لحضنه ويضمها بكل قوته وطاحت دموعه وانهار وهو يبكي بوجع من الي صار يتذكر وجه مسفر صراخ مسفر وجع مسفر يشوف الظلم الي صار ويشوف الصدق في عيون مسفرر... سمعها تبكي مع بكاه وشدها له اكثر وهو يكتم صياحه وهو يتوعد انه ما يسكت عن الي صار...!
السكوت طال وابوه كل ما له تمادى اكثر واكثر..
ابتعد عنها وقال بهمس: وجودك الي مصبرني على اني اقعد هنا!
ملاك ناظرته ولا ردت...
ابتعد عنها ووقف وقال: لا تطلعيـن من هنا لين اعوّد..
ملاك: يمه مزنه وينها؟
جواد ناظرها وبهدوء : بخير
ملاك هزت راسها بالرفض: مابي اقعد هنا ابي يمه مزنه!
جواد هز راسه والغصه متملكته من كل شي يدور حوله..
ملاك وقفت: ابي يمه مزنه مابي اقعد هنا مابي انام ويمه مزنه ماهيب معي..
جواد بهدوء نزل راسه: تعالي بوديك لها...
ملاك مشت عنده وناظره لا عباه ولا شي تنهد وتوجه لدولابه وفتحه وطلع لها فروته وغطاها فيها وقال: خليها عليك
ملاك بوزت: حرّ!
جواد اومئ وهو مو قادر يتكلم...
طلعت ملاك معه وهي متغطيه بفروته..
وطلعوا من البيت موديها لبيت الطبيب عند مزنه!...

وهو ساكت ولا تكلم ماوده يقول شي ولا له نفس يتكلم الي صار اليوم اقوى من أنه يتكلم..و اقوى من أنه يتخطاه بسرعه...

ناظر رجال الشيخ جراح مالين الديره مانعين احد يطلع او يروح لمسفر وودّ الي مرميين بالوادي! ...

بتهمه ما احد منهم سواها ولا له فيها! ..

..
.

_ انتهاء

_رأيكم؟

😔😔

"دموعي خلصوا وانا اكتب هالبارت"