يسعد مساؤكم....ممنونة جدا للكلمات الطيبة...اتمنى تسوون متابعة للحساب ...تمنياتي لكم بمتابعة ممتعة
همس ليل
احيانا رغم معرفتنا ان مانفعله خطأ ولكن نتمادى في خطأنا وتبقى الرغبة الداخلية في الفوز واثبات الافضلية هو حافز يدفعنا لتجاوز كل الخطوط...
جنت ادري الي سويته مو صحيح بس حتى اثبت للاخرين اني قادرة اسوي اي شي ....
كعدت على صوت المنبه بستة الا ربع باوعت لنور بعده نايمة ...
رجعت باوعت لموبايلي مثل واحد فاقد الذاكرة...
شنو الموضوع هسة دنيا صبح لو مغرب لو شنو
معقولة على نومتي من البارحة ...
كمزت من فراشي ورحت على نور اهز بيها
_لج نور اكعدي...نور
كعدت مخروعة ...شبيج شصار
_البارحة كعدت اني لو على نومتي
عدلت نفسها وهية تدفع بيدي الي جنت اهزها بيها
_خبلة مكعدتني بفزة حتى تسأليني هالسؤال الغبي
_اتحجي عاد
_اي على نومتج من البارحة
_عزة...كمزت من مكاني...كلشي مامحضرة ليش ماكعدوني
فتحت الكنتور اكلب شراح البس
_شكد كعدتج عبالك ميتة ...اتكولين هسة اكعد وترجعين تنامين
_شلبس هسة
_كنتورج مليان
ماجاوبتها...نزلت على السريع غسلت وداصعد
كعدت ماما
_صباح الخير...شنو هالنوم ياامي اكو واحد ينام ١١ ساعة
_غير محد كعدني...
كملت صعدتي بدلت على السريع وتريكت وطلعت ركض حتى الحك على الخط...
بيومها توقعت هبة راح تجي كاشخة ولابسة احسن مايكون ...وفعلا مثل ماتوقعت...
من فتت لغرفتنا العطر يكفخ...واللبس توب مال هبة
ام حيدر باعتلي تك عين من كعدت ورة ميزي
ميزها بصفي...
_لج باعي شلابسة وانتي جاية بهذا لبسج
_شبي لبسي مو قاصر وعملي...
والعبرة مو بالبس
اني دائما احب البس بنطلون وقميص وسترة احسه اكثر عملي وينفع بالشغل...
وحذاء فلات ...مو طويلة حيل طولي مايتجاوز ١٦٠
يعني متوسطة ...
شكلي عادي يعني بشرة سمرة فاتح عيون سودة
بس المهم خشمي حلو مرتب...
يعني بالترتيب والمكياج اطلع حلوة....
مااخلي مكياج طوخ احس مايلوكلي ...
دائما اكتفي الاينر على عيني وحمرة خفيفة...
ما انفتح الموضوع من جديد احنة شهر ١٢ وبهالوقت اتكون عدنا تصفيات للحسابات ومطابقات
نكون كلش مشغولين....والنوب عبير هواي تأخذ اجازات حتى اتجهز...
واني اشتغل بمكانها...جنت احب شغلي رغم متعب
مر اسبوع نادرا ما اطلع من الغرفة...
ومن اطلع يصير مرتي من يم غرفته...
واشوف غرفته ماتخلى ...
خوب هبة صارت ام بيت يوميا اتجيب ريوك ومن نسوي جاي تاخذ حصته لغرفته...
واني احب اسوي كهوة الظهر جانت اتكولي زيدي
رغم اعرف راح توديله فنجان جنت ازيد...
ام حيدر...شبيج انتي تسويلها على الجاهز..
هاجر...العبرة بالاخير ام حيدر صبر
_نفسي اعرف شيدور ابالج...
_مايدور شي بس اريد اكمل شغلي
_ما تايهة عنج ...يعني معقولة قبلتي التحدي
وكاعدة بمكانج وعايفتها ترسم.براحتها
_ام حيدوري لو ماعرفج زين جان كلتي داتحرضيني
عموما كلمتي وحدة العبرة بالاخير...
رجعت لمكاني وفنجاني بيدي...
شوية ودخلت هبة عصبية...هاي شنو هاجر شمخلية بالكهوة....
باوعت عليها براءة....شمخلية
_ذوكيها
رفعت الفنجان اذوكها وراسا تفلته...هاي شنو
رحت يم مكان الدلة كلبت بالعلب...
_يا هاي ملح عبالي الشكر
_وانتي يمتى تخلين شكر للكهوة
_ليش تعرفين شلون اسويها
سكتت بس احسها تريد اطك
_حبي مرات ما احبها مرة احليها شوي ومرات استخدم حليب ومرات مبيض مال كهوة
_اكو واحد مايعرف الملح من الشكر
_صوج ام حيدر لهتني بالحجي وما انتبهت
باوعت لام حيدر وهية تباوع علينا وبعينها نظرة تساؤل
ام حيدر....هبة بس لا انطيتي لاستاذ خالد منها
مشت هبة وكعدت ورة ميزها وهية حيل ضايجة
هبة...اي شكد عيب صرت بنص هدومي
ام حيدر...يا...وشكال
هبة...ما حجى الولد بس كال خاف متوهمة وحاطة ملح...طبعا بعد ماغص بيها
اني ضحكت....خطية داتخيل مظهره اكيد ظل محرج لا يكدر يتفلها ولا يكدر يبلعها
باوعت علية هبة بغضب....كيفتي انتي
هاجر...عليش اكيف...جان كلتيله مو اني سويتها
دنكت على السجل كدامها بدون ماتجاوبني واحسها بودها تركعني بيه
رجعت لميزي وام حيدر تباوع علية بس ماحجي
ومن طلعت هبة...
ام حيدر...اثاريج مو هينة
رفعت راسي باستفهام...شتقصدين
_تعرفين...جنتي متقصدة تخلين الملح
_لا ليش هيج تصورين
_العلب بيدج مخليتها وانتي يوميا تسوين الكهوة مامعقولة تيهتي
هزيت جتفي ...مامقصودة...
ورجعت اكتب وبداخلي احجي خلي تستلم ومو تريد تتباهى كدامه
طبعا بالبيت نفس المنوال واول ايام نور ظلت تلح وتسأل كتلها نسيت الموضوع ومو يمي...
ومن شافتني ماغيرت من لبسي شي عبالها غضيت النظر فبطلت ما كامت تلح علية...
بالاسبوع الثاني...مريت من يم غرفته من رحت غسلت كلاصي سمعت صوته صاحني...
دخلت عليه جان وحده كاعد ورة مكتبه الي يصير مقابيل الباب...وكدامه كومة اوراق...
_صباح الخير استاذ..
_صباح النور ست هاجر مو
_اي نعم ...محتاج شي
_صراحة دائما اشوفج تمرين منة بس ما تصبحين
_عذرني استاذ...الصبح اشوفك مشغول كلش..
واني بعد ما اطلع من غرفتي لذلك مايصير مجال اصبح
_عموما ست احنة عائلة وحدة بالقسم فجنت حاب اتعرف على الكل..
_نتشرف استاذ...من رخصتك
طلعت من يمه واني مبتسمة...خلاص عرفت نوعه
جان اختبار مني هالشي...
اريد اعرف من النوع الي ينتبه فقط للناس الي تهتم بيه ويكتفي بيهم...
لو يحب الشخص البعيد عن اهتمامه...
يعني مثل مانكول يحب هو يركض ورة البنية مو العكس....
رحت للغرفة...
هاجر...عبير احط طلقة براسج اذا كلتي ما خلصتي تجهيز
عبير...لا والله هاجر بعد...ادري تعبتج وياي اخدمج يوم عرسج يارب
هاجر....يلا قريبا لعد
هبة راسا رفعت راسها....اكو شي واحنة ماندري
هزيت جتفي...من يعلم...
ام حيدر ابتسمت.....شو اليوم ماكو ريوك للاستاذ
هبة....مالي مزاج
دنكت على السجل واني مبتسمة واعرف تحذر منها اكيد
شوية ورفعت راسي...اكول صدك اشو احنة سوينة عزومة وداعية لعمتنا السابقة(بالدوائر بعضهم يسمون رئيس القسم عم)
وخطية استاذ خالد مغلسين عليه
كلهم تفاجؤا بحجايتي...
ام حيدر...يلا رتبي عزومة
هاجر...لا حبي اني ذكرتكم انتي مسؤولة شعبتنا
رتبي بين الشعب وعلينا الاكل
هبة...اني افتر على البقية اذا تريدون واتفق وياهم
ثول شكد خفيفة اثكلي بابة...حجيتها بكلبي
ام حيدر...خوش اتفقي كل وحدة شجيب
وانتي هاجر شجيبين...
هاجر....اجيب دولمة وطرشي...
وفعلا هبة افترت على الكل واتفقت وياهم وخلال يومين رتبت كلشي
وخلال هاليومين كمت من افوت اصبح عليه حتى لو اكو احد ويكون سلامي موجه لكل من في الغرفة
اتفقت وية ماما تسويلي الدولمة وهية هم تسوي طرشي...
وبيومها رتبنا الاكل بوحدة من الغرف واني وياهم
بس قبل مايجون طلعت من الغرفة...
ب١٢ الظهر صاحولنا وجان كل الحاضر ...
احنة بينا خمسة وعشرين نفر منهم ثمانية ولد والباقي نسوان...
والولد ستة منهم مزوجين.. رحبت ست سحر بيه
سحر....شرفتنا استاذ خالد...وان شاء الله اتكون واحد من عائلتنا احنة هنا نحسب نفسنا عائلة وحدة
وبوجودك ووجود الباقين ان شاء الله ننهض بالقسم
وهكذا من هالكلام...
خالد...اتشكر منكم لهذا الاستقبال واتمنى تحسبوني اخوكم واي.شيء تحتاجون اني حاظر ...
اباوع للبنات كاشخات عبالك عدهم مناسبة...
خوب هبة نافخة نفسها الي يكول هية صاحبة العزومة...
بلشوا ياخذون من الاكل...واكو اخذوا وانسحبوا خاصة الكبار بالعمر...
ولد من القسم اسمه علي مامزوج يطلع عمره نهاية العشرينات...
_عاشت ايدجن...بس اكيد الطبخ للنسوان امهات البيوت..
والبنات اووي وموي مستحيل وحدة منهن تعرف تطبخ
راسا اعترضن البنات وضلن يحلفن احنة طبخنا
وصار شقة
علي ...كل وحدة اتكول شطبخت
وفعلا كلمن كالت شطابخة...
علي...بقت الدولمة منو مسويها
ام حيدر....هاجر والطرشي هم صنع بيتي
علي...صدك عاشت ايدج تخبل
هاجر...عاشت ايد ماما...اني لا اعرف اطبخ ولا اوصل يم الطباخ...عدا من اسوي جاي وكهوة
ضحك علي....على الاقل تباهي مثلهن
هاجر...قابل اكذب ...ماكو داعي
وحدة من الكبار كالت...دنمشي سوكج
هاجر...ليش الي يجيني همه بطنه شو السوك لعد مليان مطاعم
جاوبت وحدة خباثة وهية هم خفيفة...
لعد شنو همه اغلبهم يفكرون ابطنهم...
غلست سويت نفسي ماسمعتها...
هذا كله وهو كاعد يستمع بدون تعليق
ترخصت وطلعت...
مر كم يوم واني افكر بطريقة اندك بيها بيه بصورة مو مباشرة....
لحد يوم فتت شفته يفرك كصته بيده ..
من الباب....صباح الخير استاذ
راسا نزل ايده...صباح النور ست هاجر
_خيرك استاذ عندك صداع
_اي والله ماديفكني
_هسة ادزلك بريستول وفنجان كهوة راسا ترتاح
_اكون ممنون منج
رحت سويت كهوة وخليت شريط بريستول
هاجر....هبة بلا زحمة...وديها لاستاذ خالد
باوعت علية متفاجأة....ليش مو انتي توديها
هاجر...ما احب هاي الشغلات وهو راسه يوجعه
وانتي دائما توديها
هاي كيفت كامت اخذت الصينية توديها
ام حيدر...راح تخبليني....بس متأكدة وراج شي
غمزتلها ورجعت لمكاني...
براها سمعت صوته من دخل للغرفة يسلم جاوبت بدون ما ارفع راسي...
ام حيدر...تفضل استاذ
خالد...ممنون...هاي الصينية...مشكورة ست هاجر
باوعت عليه...تدلل استاذ...شلون صار الصداع
خالد...لا الحمد لله...منو مسوي الكهوة
ام حيدر...هاي اختصاص هاجر
خالد ...عاشت ايدج ست
ام حيدر...اذا تحب استاذ يومية يجيك فنجان الظهر
هاجر دائما تنقذنا بيه من سطرة الارقام
خالد...خاف اثكل عليكم
باوعت علية ام حيدر بمعنى جاوبيه
هاجر...لا استاذ تدلل ماراح يفرق فنجان اضافي
شفته عقج وجه...شكر لكم وطلع
ام حيدر...شبيج مثل الدبش
هاجر...شسويله...
كام هبة او ام حيدر توديله وهو يرجع الفنجان
خالد...ليش دائما افوت مالكى بس انتو بالغرفة
ام حيدر...لا استاذ تصدف...هبة ايكون عدها شغل بغير غرفة...وعبير مجازة
خالد...شو هواي اجايزها
ام حيدر....استاذ اجهز زواجها قريب...
خطيبها مهندس اياد
خالد..احنة نهاية سنة لعد شوكت اتطابق سجلها
ام حيدر...هاجر داتطابق بيه
التفت علية...وسجلج ست هاجر
هاجر...استاذ ماكو مشكلة الدوام طويل واشتغل بالسجلين...
خالد...لا ميصير هيج...اكو ناس اشوفها تفتر طول اليوم...
وناس كاعدة من الصبح للظهر تشتغل
راح انسب لكم بنية وياكم...
عافنا وطلع...
هاجر....جان جاوبتي ام حيدر...وين نخليها
ام حيدر...خلي يجيب وحدة بعد شكو بيها
هاجر...اهووو...مالنا خلك للغوة...من يزيد العدد تصير القال والقلت
_قابل شكوله
_اني اكوله من رخصتج
طلعت ورحت على غرفته...
دكيت الباب ودخلت
_استاذ من رخصتك ممكن احجي وياك
_تفضلي ست هاجر...استريحي
_لا مو مال كعدة...بس ردت اكول لحضرتك
مانحتاج بنية بعد ويانة...
الشغل ماشي واذا تحب جيك السجلات
_ست علمودكم...اشوفكم طول اليوم تشتغلون
واكو ناس كاعدة
_هو غير جايين هنا للشغل....رجاء استاذ لا تجيب احد
_زين ليش انطيني سبب
دنكت مترددة بس جنت اريد افهمه راح انطي حجاية خاصة
_بينا الحجي بلازحمة...من يزيد العدد دكثر مشاكل نقل الحجي واني ماحب هذا الجو
صفن علية شوية...
_اوكي ست بس اذا لكيت اي تقصير انسبلكم وحدة
حسيت العبارة الاخيرة كاله حتى مايبين رضخ لطلبي
تبسمت له....شكر جزيلا استاذ
رجعت لغرفتي...
ام حيدر...ها شكال
_ما راح يجيب احد
بقيت الاعبه من بعيد لان اشوف البنات ذابات نفسهن حيل عليه يتحججن حتى يطبله...
ويمه يتموعن وشقة وضحك...وهو ولد اكيد يجاريهن
بس اني اكتفي صباح الخير...
وابتسامة لطيفة من يرجع الفنجان....
علي دائما يمر على كل الغرف يصبح ويشاقة
هو من النوع الي يحب يذب حجي...
اليوم فتت الصبح ماصبحت ...
ومن اجى علي يصبح عزمته على فنجان كهوة الظهر
ومادزيت لخالد...
ردت اشوف اكو من جانبه اهتمام حتى ابدي خطوة جديدة...
طبعا هبة مازالت تهتم بيه وتتقرب...
ومرة طلبت يوصلها بطريقه على اساس رايحة لبيت اختها...
الظهر اجى علي صار حجي وضحك وعبير موجودة وهبة وام حيدر
دخل هو وسلم...شو اليوم ناسيني
ام حيدر...ليش خيرك استاذ
خالد...ماكو كهوتي
هبة...استاذ الظاهر اذا ما اذكرك اني محد.يذكرك
رفعت راسي متفاجا من جراءتها
خالد...الظاهر هيج
التفت عليه...شفته يباوع علية بنظرة غريبة
علي..والله مبخوت مداريك ريوك وكهوة...واحنة شامرنة فوك محد يذكرنا
خالد...لعد هاي شنو الي كدامك
علي...حاسدني على هالفنجان...خلفلله على هاجر
بس لو ترضى بية
كاللها من باب شقة...احنة نعرف هذا شقاه وية الكل
ام حيدر....فضها انتة واتقدم واحنة نقنعها
صار ضحك بس شفته مثل الضاج
خالد...شربت كهوتك تفضل على شغلك
هبة...استاذ اجيبلك فنجان
نتر بيها...لا ما اريد كملوا شغلكم
كلهم تفاجؤا...من طلع خليت هبة تطلع لان ضاجت من نترته وسويت كهوة
ام حيدر...هاي لمن
هاجر...لاستاذ خالد عيب وكف وماكلناله تفضل
ماجاوبت جانت ضايجة من اسلوبه
رحت لغرفته جان مدنك يوقع خليت الصينية كدامه
رفع راسه لي
_هاي شنو
_رشوة
رفع تك حاجب
_شنو
_صراحة اليوم ماعندي خط بالرجعة
واريد اطلع من وكت
_شلون ترجعين لعد...
_كيات...ماعرف اخذ تاكسي
_وين بيتكم.
_بالسيدية
_اني اوصلج بطريقي
_شكر استاذ ما اريد اكلفك
_ماكو تكلفة احسن ماترجعين وحدج
_مو استاذ...سكتت
_عادي ست اني داشوف ناس توصل ناس احنة دائرة وحدة..واذا اكو بنية وياج جيبها وتصير مسالة عادية
طلعت مبتسمة...اليوم ماكو بالخط بس اني وبعد بنية
وصار مدة ابو الخط عنده شغلة...اليوم كتله اروح احنة نرجع وحدنا...
ومن خلص الدوام طلعت اني والبنية...هية مرة جبيرة...
كعدت يمه واني ليورة...بيتهم بالبياع ذبها...
وجان طول الطريق ساكت ومشغل اغاني
من نزلت البنية نصى صوت المسجل..
_تعذرني استاذ لان بقيت كاعدة ليورة...
تعرف الناس...
_عادي ماكو مشكلة...
عرفيني عن نفسج...يعني لحد مانوصل احسن ماكاعدين وساكتين بهالازدحام
__صار شهرين لحضرتك ويانة ماعرفتنا لسة
_المعرفة السطحية اي...بس الجانب الثاني من حياتج
_اي جانب تقصد ...ماعندي شي ضامته
_ قصدج ماكو شي ظاهرته...اكو غموض حولج
_مافهمت قصدك
_لا فهمتي...انتي اذكى من هيج
_لا صدك مافهمت ستقصد
_يعني محد يعرف عنج شي بالقسم...
بعيدة عن الكل ومعزولة...ماتحبين تتباهين بنفسج
رغم شخصيتج بارزة ولج بصمة بالقسم...
بس ضمن حدود الشغل
باوعت من الجامة...وانتو تموتون على شي اسمه غامض مايصير ماتعرفون كلشي...حجيتها بگلبي
_مايفيدك الي تريد تعرفه صدكني
_ليش باوع علية بالمراية
_هو هيج
_ماعندج ثقة بالاخرين
_مع احترامي بس لسة ماشفت اكو ناس كد الثقة
_الايام تثبتلج اذا كد الثقة لو لا
_لعد خليها للايام حتى تعرف كلشي...
وصلت هنا بلا زحمة عليك
شكر جزيلا تعبتك وياي...
_الله معاج
مشيت واني بداخلي فرحانة كدرت اثير اهتمامه
بقى لازم احتفظ بهالشي وابدي خطوة جديدة...
وللحكاية تكملة
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!