چنت اباوعلك
اذا ذكرو وطن
مابي امان 💔
،،،،،،،،،،،،،،،،،،،،
راهب ابو غضب ج2
///////بقلم زهراء الحسناوي ////////
مساءالخير بنات اعتذر ع التاخير واطلب منكم بس هليومين لان والله المحوله كل شويه وانفجرت وحرگت حتئ الاجهزة والراوتر
انشأئالله اعوضكم باليوم بارتين بدل انتضاركم
هسه اجه خالي عندة مودم فعلت علي ونشرت البارت صرنه تشريب من الحر 😥
بدون شبكه كاعدين مثل اليتامه 😂
،،،،،،،،،،،
راهب،،لاراااااا
لارا،،طلعت وره امي ومحمد امي فاتحه باب البيت اسمعها اتگله
سعاد،،االلله ياخذك فضحتنه شتسوي جاااي
روح منا لااتصل بالشرطه تجي تاخذك
راهب،،هههههاي گليلي اقبض علئ روحي من اروح
لارا،،مديت راسي وجان اشوف راهب گوة واگف يترنح بيدة بطل والايد الثانيه لازم سلاح شافني راد يجي دفعه محمد ارتجه ع السيارة اختل توازنه
راهب،،وخررررر
لارا،،دفع محمد واجه بااتجاهي يمشي محمد لزمه من يده
صرخ بصوت عالي
راهب،،لارااا بس احجي وياج ولج شنووو من بشررر انتي گلبج مااايحن ?
بس انطييني فررصه ااسمعيني بيهااا وكلشي ماااريد
محمد،،رررروح منا لا امدك مدود بالقررران
راهب،،ااحجي وياهاا واروح
لارا،،رجع للسيارة رگع البطل بالگاع اتكسر
فتح باب السيارة عله صوت المسجل بكل صوته
دوة الاغنيه بالشارع وهو يغني وياها ويطوطح
راهب،،اسمعيهااا بلكت الله يهددديج
منوو اليگدر ?
علئ افراگك
علئ افراگك منو اليگدر ?
واذا گلبك گدر ينسئ
اني گلبي مايگدر
ولافد يووم راح انساك
حبيبي ومگدر ابلياك
واذا كتلك حبيبي انته
يوگف گلبي واتصور
لارا،،اسمع وومختنگه اريد ابجي بس اصبر روحي واجبرها ع القسوة
الناس تباوع علي وهو فاصل يدافع ويه محمد تالي شفت سيارة قاسم وگفت نزل مفزوع قفل سيارة راهب وجرة السيارته نتر ايد قاسم ورجع يعيط
راهب،،تحضرينييييي ?
ولج اااني راااهب تحضريني لاراااااا
قاسم،،كااافي ولك فضحت روووحك اصحئ
لارا،،هو اضخم من قاسم كل مايجرة ينتر ايد قاسم ويرجع محمد راد يضربه قاسم رفع ايدة يمنعه
قاسم،،مد ايدك وشوف النسوان شتجيب ?
محمد،،اخذذذة هذاا السگط فوگ عملته جااي يهدد
الساقط
لارا،،كانه ماكو كدامه كل هاي الهوسه وهو عينه مني لازمه قاسم يمنعه يوصل للباب
راهب،،عبالج اخللليج تتهنين ويه غيرررري?
ضلي يم امج گاعدة احسسسن الج اخليج تنسلين شعرج شيب ومااانطيج
لوترجعين لوتموووتين يم اممممج
سعاد،،همم عوزي ارجعهااا الك ابوو العرگ
لارا،،دفع قاسم بقوئ واجه بسرعه ل امي محمد بلحظه صار گدامه ادي علئ صدر راهب گوة يبعدة
راهب،،ابووو العرگ موووو ?
اشررررب بس مابايگ وعايش بفلوس يتاااامة بنت ابووو الحماااام
يگولون ابوووج مااات وهوو يصيح كششش عااااع للطيور خلف الله علئ ابوووي تتمتعين وتبذخين بحلاله اسنننين
لارا،،امي سكتت ماحجت بس تشتم بعمي بصوت ناصي التفتت عليها گتلها لتشتمي رجال ميت
سعاد،،دوولي انتي كله من وررراج
لارا،،ردت اگلها منو الرفض يسال عنه من خطبني غيرج همج الفلوس بس سكتت رجعت اباوع علئ راهب
قاسم يرزل بي وهو فاصل گوة دفعه للسيارة مالته وترك سيارة راهب ابابنه
اخذة قاسم وراح
،،،،،،
قاسم،،وللللك كااافي اصحئ اشبيك اتخبللللت
راهب،،نزلني خل ارجع
قاسم،،ولك انتبه الرووحك شوووف شصاير بيككك?
راهب،،روووحي يمهااا منوو گالك عنددي رووح?
قاسم،موهيج خويه موهيج لاتنزل روحك اكثر المايريدني مااريدة لو ينصب ذهببب مااريدة ولااطخ راااسي اله
كاافي اتلوم بروحك قوي نفسك وعيش لوحدك
انته من البداية اذيتها وشوف اشلون جاي تدفع ثمن اذيتك الها
راهب،،استاهل كل التسوي بيه استاهله
قاسم،،مرجع راسه لورة مغمض ويهذي بااسمها كرهتها وكرهت قسوة گلبها
انسان منتهي ومدمر اگبالها وهي مثل الحجر لاحنت ولارف كلبها
صح اذاها بس اتاذه بعدين اكثر منها شهور وهو يتوسل بيها
رافض فكرة يتركها اكثر مايقتنع قافل عليها
اخذته للشقه دخلته للحمام فتحت علي الماي ماتركته لمن حسيته انتبه
اخذتله ملابس وطلعت جبت عشه ورجعت لگيته طالع متمدد ع القنفه ويحش جگاير
اخذتها منه خليتها بالمنفضه خزرني
اگعد اتعشه
راهب،،مااشتهي
قاسم،،راهب كافي اصحئ علئ نفسك رب الخلقها خلق غيرها
راهب،،بس گلبي وروحي يمها وعيوني ماتشوف غيرها
قاسم،،دمعتي عزيزة بس من شفته نزلت دمعته دار وجها حط ذراعه علئ عيونه مثل طفل فاگد امه
گتله كافي بعد اخوك اگعد اكل اني اعرفك سبع اول تالي تبجي علئ مرة?
راهب،،اذيتها اهواي قاسم
ولك من اذكر ضربي الها بالحزام روحي تطلع
من اذكر اشلون جنت اهينها اكره روحي
من اذكر اشلون ربطتها بالدرج واشلون سلمتني ثقتها مرة ثانيه وخنتها ولك ماذابحني غير نظرة عيونها من فاتت غزل تمشي وراي
كرهت روحي كانه اتگلي ماكفاك طعنات بظهري
كانه اتگلي هاي الثقه الانطيتها الك
ولك ماااستاهلها اااني مااستاهلهااا
قاسم،،مووكت عتب بس اهواي نصحتك ماسمعت مني استمريت اتعذبها وانته تحبها
عبالك ماادري بيك تحبها ?
ابسط شي بيك عيونك فاضحاتك
راهب،،راحت بعد
قاسم،،وداعتك اذا مكتوب ترجعلك ماتصير الغيرك
راهب،،هه اتصير الغيري?
غير اوسدها الغبرة ولااشوفها تروح الواحد ثاني
قاسم،،ههههه يالله يالمجرم اكعد اتعشه ابتليت بيك خو ماابتليت
قاسم،،اكل لكمتين ونام صاير مثل مجنون ليلي
علئ ساعه يتخبل بسبب افراگ لارا
واني الطايح بيها سارة مخلصتها تتزعل وتحلف وثاني يوم تدفع كفارة
،،،،،
لارا،صعدت الغرفتي ادثرت بالغطه وغصيت بالبجي
ماجاي اگدددر اسامحه
خلللي ينچوي بنااارة الحرگني بيهااا
بقيت للفجر گاعدة ثاني يوم رحت للدوام خليت كحله اخفف بيها اثر النفخ الجوة عيوني من اثر البجي
ثاني محاضرة اخذنه عمار طول المحاضرة يشرح وعينه مني مااهتميتله
واصلا بالي مويمه
ونزل من عيني بعد اهانته الي گدام الطلاب
عمار،،گومي لارا اشرحي للطلاب شنو جنت احجي
لارا،،بقيت صافنه بوجها ماامنتبه جنت
ردت احجي مااگدر دنگت
عمار،،اطلعي برة
لارا،،رفعت راسي فجاة اله
اباوعله ماشر ع الباب رجع زمخ بيه
عمار،،اطلعيي كملللي صفنتج برة
لارا،،صار يتعمد يهيني اخذت كتبي وطلعت اركض العبرة خانگتني
منين الكاها بعد ولله كرهت روحي
احس كل الطلاب يضحكون عليه
رحت للحمام بجيت لمن تعبت
كرهت حتئ الكليه غسلت طلعت
مشيت بالممر صار بوجهي همام ضيگ عيونه وصلت يمه ردت اعبر لزمني من ايدي
باوعت علئ ايدة خزرته بعدها بسرعه
همام،،منو ياج?
لارا،،تركته ردت اعبر وگف گدامي
همام،،احجي ترة خلص صبري
لارا،،بس ابتعد عني اني اصير احسن
حجيتها واني ابعدة من كدامي
رحت گعدت بالحديقه لحگني
همام،،وحگ الحمزة ابو احزامين
اذا ماحجيتي راح اعرف بطريقتي ومن اعرف اهجم الكليه هجم
لارا،،اختنكت ماگدرت احجي بس دموعي تجري
همام،ماكافي ضعف?
لارا،،رفعت عيني بعينه عيني مغوشه
همام،شوكت تصيرين قويه?
لارا دموعج ماتفيدج ولاتحميج الناس وكحه تحب اليتواكح وياها احنه عايشين بين ذياب اذا مادافعتي عن روحج تنوكلين صدكيني
من شفتج لليوم دمعتج بعينج مامليتي?
لارا،،تعبت همام كانه الكل كاره وجودي
همام،،منو يگول?
لارا،،شوف حتئ استاذي يتفنن يبجيني
همام،،ادري هذا الساقط عينه منج ماارتاح اذا ماافگس عينه
لارا،،باوعتله بصدمه شمدريك?
همام،،گتلج كلشي ادري عنج
ياالله گومي كافي بجي جاهل انتي كل مااشوفج تنعين عوزج ملايه وتشبعين لطم
لارا،،گتله عوفني خليني اهنا
همام،گومي لتعاندين
وبعدين موزين راح اصرف دم گلبي عليج واعزمج علئ لفة فلافل
لارا،،ضحكت گتله لو عازمني علئ دجاجه شيصير بيك
همام،،غير انجلط
لارا،،اخذني للنادي جاب لفات وعصاير واجه گعد گدامي مااعرف اكل گدام احد واصلا طردة استاذ عمار ماراحت من بالي
همام،،اكلي
لارا،،والله مااشتهي
همام،،موصوجج صوجي خسرت 1000
لارا،،ابتسمت ابوفليس
همام،،سجلي هذا اليوم يمج حتئ ينذكر ومينعاد
لارا،،صدگ خلاني انسئ حزني بسوالفه
شويه واترخص
انتهئ الدوام وطلعت وگفت انتظر الخط
وگفت سيارة يمي اخر موديل
نزل الجامه شفته همام ابتسمت گتله خوفتني
همام ،تعاي اوصلج بطريقي لتضلين واكفه بنص الشارع
لارا،،شكرا حيجي الخط
راد يكمل كلامه اجه صاحب الخط ابتسمت بوجه همام وصعدت
رجعت للبيت صبيتلي غدة اتغديت
نادرا نلتم علئ سفررة وحدة كل واحد ياكل بالوقت اليعجبه
كملت غسلت ماعوني وصعدت نزلت سلة بيها ملابسي خليتهن بالغساله غسلتهن
اتذكرت حمودي ابن رافد والله مشتاقتله لابيه اروح اشوفه امي مانعتني ولابيهم يجون لان رافد مستحيل يطخ راسه مرة ثانيه ويرجع للبيت بعد كلام امي
كملت الملابس شريتهن ورجعت للغرفه اتصلت بسجئ فتحتلي خط خجلانه منها عبالي تعاتبني لو تكون زعلانه بسبب امي
بس بالعكس فاجئني كلامها
سجئ،،والله بذاته للتتصلين لتگولين اسأل عن اخوي ومرته لو عن حمودي عود عمته تهي بهي
لارا،،هههههه والله خجلانه منج ومستحيه اتصل بعد الصار
سجئ،،انتي ام رافد?
لارا،،لا
سجئ،،خلص لعد عليش محمله نفسج الذنب
لارا،،انتي انسانه وردة سجاوي
سجئ،،والله گلبي حاس يجي يوم عمتي بنفسها تجي تطلب مني اعيش يمها وكولي گالتها
لارا،،اللله يسمع منج يااارب
ضلينه نسولف وكل شويه حمودي يحط حلكه يم الموبايل يعيط ويفززنه
دزتلي صورته ع الفايبر گالت هاي الصورة من قلب الحدث
مسويتله شوربه تمن حمرة حاط الطاسه بحضنه واملغط روحه يغط ايدة ويلطعها
تالي گتلها روحي وكلي ابنج مبين طاكته المجاعه
خربت ضحك بعد ماانتهئ الاتصال
اتمددت بفراشي روحي اتلوب
لازمه الموبايل وعيني بي
مشاعر بداخلي متناقضه
واصلن من يوم طلاگي صرت كل تصرفاتي متناقضه موبس مشاعري
مالگيت روحي غير دخلت علئ حسابه رفعت الحضر
ورة ساعة دزلي
راهب،،ليش رفعتي ماخليتي ?
لارا،،بقيت ساكته بس گلبي يدگ سريع
راهب،،ماتحجين ?
لارا،،شحجي ?
ليش انته خليت شي ينگال بالسويته البارحه
راهب،،وشسويت بالله ست لارا?
لارا،،كل الهوسه السويتها وفرجت علينه العالم
وبعدك اتگول شمسوي?
راهب،،خلي ابالج يوميه انوب اجي ادكلكم طبل اباب البيت
لارا،،ضوجني گتله ماعندي مانع اشتكي عليك
راهب،،ايباااه ام المانع تردين اجيبلج?
لارا،،شنو ?
راهب،،مانع
لارا،،رااااهب
راهب،،عيونه وگلبه انتي هم صدگ شتسوين بالمانع ولج علئ لوعت گلبي متحلف من ترجعين وتجين يمي مااقبل غير بنص درزن اطفال اريد اترس البيت زعاطيط
لارا،،ولايجوز من سوالفه كتله ابو طبع مستحيل يغير طبعه منحرف
راهب،،والله دارسج وحافظج وكلاواتج ذني بطليهن
اتحبيني واتموتين بيه عليش شالعه صفحة الخلفني?
لارا،،ردت انرفزة گتله واثق من نفسك كلش
هاي قبل جنت عميه واحبك علئ عماي امشي وراك
راهب،،وهسه ?
لارا،،هسه فتحت وشفتك ماتفيدني
راهب،،ليش اتمسلتين بالحجي
شامبو اني وصرت غير صالح للاستعمال لو صرت اكسباير
بطلي سوالفج لارا وخل انطيها الج من الاخير حجاية حطيها ترس اذنج
گلبي داگ رجلة عليج فد نووب فهمتي شحجي
يعني لو يطلع جلول من گبرررة هم ارجعج الحضني ارجعج
لارا،،ماكافي تحجي علي مات وماخلص منك
راهب،،هذا عمي حبيبي معليج بينه اصلا كل شويه اترحمله وانتي من يمج اگلبيها بكرك
لارا،،دمعت عيوني گتله حرام عليك اتشتمه
راهب،،هسه اني گلت شتمته?
لوگلت اترحملة بطريقه خاصه بحيث اخلي الجماعه اهناك يشيلو شيول علئ روسهم
لارا،،اختنگت لان متاكدة صدگ يشتم ابوي
گتله والله اتندمت رفعت الحظر عنك
راهب،،ارجعي احظريني وشوفي شسوي
لارا.. سكتت ماحجيت
راهب.. الخوينسه
تدرين ثقي بالله بمجرد ماتحجين وياي گلبي يفرح
شسويتيلي انتي ?
تدرين شتمنئ?
بس اخليج بحضني وانام وابو فاضل كلشي مااسوي بس اشم عطرج واغفه
مشتاق العطرج مشتاق الكلشي بيج
والله ماانام اذا مااذكر الليله الگضيناها سوة هي المصبرتني
من اذكر همساتج بااسمي وعيونج الذبلانه وانتي بحضني اتمنئ اطير واوصل يمج
ولج مخبل مجنون مسودن بيج شتسميني سميني ااااحبج ااااحبج ااااحبج يااامة الاسلاااام اموووت علئ ربببببج
لارا،،دگات گلبي احسهن يضربن بقوة ايدي ترجف
مااگدر حتئ اكتب واجاوبه
اجتني محادثه ثانيه من همام ارتبكت عبالك راهب جاي يشوفني
دزلي
همام،،صديقتي كاعدة ?
لارا،،اي كاعدة
همام،،خو مابعدج ضايجه وتبجين ?
راهب،،شو خنستي?
لارا،،ضليت محتارة اجاوب منو?
جاوبت راهب
مخانسه بس مااعرف شحجي
راهب،،اهاا
همام،،خو مجاي اعطلج عن شي?
لارا،،اديه وجسمي يرجفن وبلحظة شكيت همام يعرف راهب
دزلي راهب كلمة خلتني ارجف
راهب،،ويامن تحجين وهلگد تتاخرين ياالله تجاوبين?
لارا،،كتبتله صديقتي
راهب،،اهاا وشنو اسمها ?
لارا،،الارتباك صار فول مااعرف ليش كتبتله بسمه
همام،،لارا اذا مشغوله اخذي راحتج
بس حبيت اطمن عليج لان طردج عمار
وعيونج اذا تردين اقلعه من كل الجامعه
لارا،،دزلي راهب صوريلي المحادثه مال صديقتج
صادف همام وراهب دزو رسائلهم بنفس اللحظه
كتبت بسرعه
همام فدوة اتركه معليك بي واصلا اني الغلطانه
دزيتها واجتني رساله خلتني اجمد بمكاني
راهب،،منو همام وشجااي يصيرر?
لارا،،بلعت ريگي بخوف انتبهت ع الرساله بدل ماادزها الهمام دزيتها الراهب
بسرعه لطمت علئ وجهي
عزااا العزااج لارااا
يتتبع، ،،،قرائه ممتعه
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!