رواية راهب ابو غضب الفصل الثلاثون 30 - بقلم Zahra_Alhussnawy

هناك بعض الأشياء التي لا تنسى.. مهما اعتذروا
ومهما شعرو بغلطهم.. ومهما ارادو تلافيه.. سيظل ذلك الغلط كجرح لايلتئم.. ستظل صورة الخيبة التي اعتلت وجهك ذات يوم تذكرك بالأشخاص الذين راهن على وفائهم فخانوك.. وستذكرك بالأشخاص
الذين اعطيتهم سكينا ليحمو ظهرك.. فطعنوك غدراً
وستذكرك بحب لم يبقى منه الآن سوى ذكراه
أشياء عديدة لاتنسى صدقوني. كتلك اليد التي انتظرت منها أن ترافقك لباقي العمر فأفلتت يدك
منذ أول عثرة.. كتلك الرسالة التي ارسلتها في لحظة عجز وبقيت تنتظر جوابها إلى الآن.. كدمعة ظلم ذرفت دموعها.. أو ككسرة قلب عاثت فيك فساداً
هذه الأشياء صدقوني مهما حدث لايجبرها اعتذار

راهب،،حضر الجفن مالتك ياگواد
والله لنبشك نبش لوتشرد لسابع ارض هم اطلعك

لارا،،ذاك بسرعه سدة وراهب بدون لاسؤال ولاجواب مااحس غير جرني من شعري قربني من وجها

تحس راح ينفجر من العصبيه

راهب،،لارتتتته مووووو??

لارا،،عيوني غرغرت بالدموع لازم راسي ويعت بشعري احسه اتگطع بيدة

گتله و والله  مااعرفه انطيني م مجال افهمك

للاسف  فقد ايد لازم شعري والايد الثانيه نزل على وجهي راجديات  رفعت ايدي ضربها نزلتها
رجع ضربني علئ خدي وكل ضربه احس راسي ينتفخ من الهبطه علئ ساعه اوگع

راهب،،ااااحجي منووو هذاا ?

لارا،،اتنفس گوة نفسي اختنگ من الخوف گتله وا والله مااعرفه  جنت  اريد احجيلك

راهب،،والله لنعل ابووج لابوووو اليوم الفكررت بي اخذللي وحدة بدون اخلاق

لارا،،علئ صوت صياحه انفضحت وكلها اجت تركض جان مايشوف كدامه غيري اني وبس
امه اجت تركض المرة مخترعه وخايفه جرتني منه لزم ايدها نترها وسحلني ورة ظهرة يمنعها توصلني

جنت بيدة مثل الخرگه بس اشوفهم مااسمعهم احس اصواتهم بعيدة
كنت ادافع عن نفسي بس مايسمعني ولاانطاني فرصه احجي

احلام،،ولللج الله ياخذج شمسوييه يمعزاايه من اجيتي ماجبتي غير المصاايب وياااج

زهرة،،ابوها منووو راح تهجم بيتنه الله لاينطيج

ام احلام،،ولجن بسجججن خل نفتهممم

راهب،،اطلعن لااحرگهااا ومحمد اطلللللعن

لارا،، صار عندي خفقان احس گلبي علئ سرعة دگاته يريد يطلع من حلگي

مثل الحرارة تطلع من اذني وصدري احترگ مديت ايدي افرك بصدري رجع عليه دفعني وكعت علئ طرف الجربايه ماجنت متوقعه راح يدفعني والجربايه بيها مربعات حديد

صار اصبع ايدي بين المربعات ذبيت ثگل جسمي كله علئ اصبعي
حسيته طگ مدري انكسر بس ماياذيني لان الخوف اكبر من الوجع صرت لويذبحني هم من الرهبه مااحس بشي

دفع امه واخواته طلعهن برة قفل الباب ورجع

ام احلام،،وللك يممه علئ بختتتك خل نفهم السالفه استهدوو بالرحمن

راهب،،احجي ولج هووو هذااا الرفضتيني امس الخاااطرة?

لارا،،الساني معگود اريد اجاوبه مايطلع صوتي هزيت راسي بمعنئ لاااا
اول مرة اشوفه بهاي الحالة

راهب،،ااادري تكرهيني ادرري اذذيتج بس مواطعنيني هلطعننه هاااي
ولللج حقيرررة جنت ناوي افتتتتح صفحه جديدة وياج ونعوف الحقد ونعوووف كلشي تااالي طلعتي ساااقطه نفس ابوووج بنتتت الكلب

لارا،،نزع احزامه وصار يجلدني بي
العجيب لاصرخت ولاصحت متبنجه جوة ايدة وهو بدون رحمه يضرب

اخذتني الرجفه وغمضت اسمع بس صوت طبع الحزام علئ جلدي

حسيت بروحي جاي انازع وهاي لحظاتي الاخيرة
متمددة علئ صفحتي الجهته وجهي صاير للجها الواگف بيها
ردت بس يتوقف وينتبه الحالتي الساني ثگل
رفعت وجهي علئ كيف وبدل ماتجي ضربة الحزام علئ جسمي اجت علئ وجهي من جهة الحديدة

بعدها كلشي مادريت رحت بضلام دامس
اسمع صريخ وهوسه بس ماجاي افرزن الاصوات

كل الاعرفه اني ميته وصرت اسمعهم بس مااشوفهم

بعد فترة حسيت برودة علئ وجهي كفيله تسحبني من الظلمه الجنت بيها فتحت عيني بثكل وشهگت مثل الجان غركان وطلعو بااخر لحظة
ركزت بالوجوة اني بحضن الحجيه گاعدة بالگاع مخليتني بحضنها

وتذب ماي بارد علئ وجهي
درت وجهي باوعتله گاعد بالگاع لزم راسه بين ادي

ويباوعلي بحقد وكره يمكن لو ماامه جان اني هسه ميته

راهب،،احجي ولج منو هذاا

ام احلام،،كااافي ولك يممه كافي شفتهمتت منها انته ?
لارا،،لزمت بثوبها حيل صار وجهي بصدرها ضميت روحي خايفه يرجع يضربني حلگي مااكدر افتحه والساني ماينطق حرف يرجف

نهض من مكانه وگف كدامي

راهب،،وحگ من نزل القران علئ محمد مااعوفج اذا ماتحجين منو هذا الساقط
اذا مااذبحكم اثنينكم مااتسمئ راهب

ام احلام،،بسكك يممه بسك
ااانه ادري  المتهم يبقئ بريئ منا لمن تثبت ادانته جااا غيرر انته نقييب وشايف وعايف ومستجوب وادم جااا هي هيج گالوهااا

راهب،،هذااااا عررضي يممه تعررفين شنوو عرضي?
يعني يمم عرضي ماافكرر. گدامج هسسه غضب الله راااهب مونقييب

لارا،،اباوعله اشلون يفرفح ويضرب بيدة علئ راسه ومن رهبتي اتمنئ ادخل بين ضلوع الحجيه

ام احلام،،استهدي برحمانك وليدي ترة كلشي مامفتهمين

لارا،،وبلحظه جرني من حضن امه حتئ هي شهكت مامتوقعه حركته

طلع من الغرفه واني ساعه اخطي خطوة واني واگفه وساعه يسحلني بالگاع مدري اشلون نزلت الدرج سحل

كلهن نزلن وراي ماسمعت بس الحجيه تصيح وتلطم واخواته يصيحن ربيها من جديد

شمرني جوة الدرج لميت رجليه واني ارعش اريد ادافع عن نفسي بس ماكو قوة ولاحيل ولاحتئ السان يحجي

زمخ بريحانه كالها انطططيني شااالج

نزعت شالها انطته الخالها وهي هم ترجف

كعد كدامي ركبه ونص جر اديه اثنينهن ربطهن بطرف الشال وضبط الشدة علئ ايدي حيييل
لزم الطرف الثاني ربطه بحديد المحجر مال الدرج

ماذبحني غير احجايته من التفت الهم وكالهم

راهب،،هاااي تبقئ مررربوطه مثل الجلبببه اهنااا اليرووح واليرجع اريدة يتتتفل عليهااا

لارا،،اديه مرفوعه للمحجر ومخليه راسي بينهن اتمنيت ميته ولاهلموقف
دموعي تجري واناشغ مثل الطفل اريد بس واحد ينكسر خاطرة عليه ويخلصني ماكو حتئ الحجيه كاعدة بعيد عني تلطم علئ رجليها خافت منه من سمعته حلف يذبحني اذا وحدة فتحت الربطه مال ايدي

گعد گدامي ع الزوليه والبيت صنته اذا تذب الابرة ينسمع صوتها
بس الحجيه كل شويه ولطمت وبجت وهو ولايمه ولاجنها امه ويسمع توسلاتها

بقيت علئ گعدتي اكثر من ساعتين
انفتح الباب ودخل ضرغام من شافني فتح عيونه

ضرغام،،هاي  شكو

لارا،،محد جاوبه اتقرب مني حتئ يحل ايدي زمخ بي

راهب،،عووفهااا

ضرغام،،بس خطيه خاالي موهيج

لارا،،كعد يمي جر ايدي حلها ادنيت لورة من شفته نهض بسرعه واجه علئ ضرغام زنگة من ياخته وضربه راجدي

وكف متفاجئ. بردة فعل خاله بس ماحجه كلمه غير

ضرغام،،رحم الله والديك خالي

لارا،،اجت الحجيه هي وفاطمه گومني والحجيه ماسكتت كل شويه وگالت

ام احلام،،ولكم يممه نافخه علييينه حيييه
كل شوويه وصارت اطلابه

احلام،،لاوالله موحية من اجت بنت العار انهجم البيت

لارا،،اخذني للغرفه مال الحجيه اسحل بروحي سحل دخلني وطلعن قفلن الباب من برة
ماادري شنو صار وراي بس اسمع صوته گلب البيت گلاب نزل دوسه ونص بالغلط والفشار

وكل شويه يضرب الباب يريد يكسرة

گعدت بلگاع لامه رجليه الصدري واختض مثل السعفه
ماكو شي ابالي غير الوم روحي لان ماحجيتله حتئ مايصير الصار هسه

انتبهت ل اصبعي وارم صاير شكبرة من شفته ياالله حسيت بالوجع بس الوجع موطبيعي احس ايدي مگصوصه بقيت لازمتها اخاف اطخ الاصبع لان وارم

ل 2بليل يالله هدئ صوت عياطه والكل سكتو بس ماهدئ الالم بقيت گاعدة واعض بيدي الثانيه من الوجع
انفتح الباب فزيت عبالي هو بس ارتاحيت من شفتها الحجيه وفاطمه

دخلن وقفلن الباب من جوة
اول مااگعدت عمتي يمي خليت راسي بحضنها وبجيت من كل گلبي بس حتئ بجيتي بدون صوت كاتمتها خايفه يسمعني ويرجع يجلدني مرة ثانيه

ام احلام،،سودة بوجهي يعمه شو دگعدي خل افهم منج السالفه ترة اني لسه مثل الاطرش بالزفه

لارا،،گوة گعدت جسمي اوجهي يونن من الالم بس جنت لازم احجيلهن
حجيت كلشي صار واشلون موبايلي يخلص رصيد وشحن بدون مااستخدمه واشلون اسمع احد يدخل للغرفه واني نايمه ومن اكعد الگه الجهاز متغير مكانه
ختمتها بريحانه من اسمعها تحجي بصوت ناصي بالحمام مرات اشوفها تضم شي بين الملابس ومرات بملابسها الابستهن
جنت احجي ولازمه ايدي ألم فضيع

فاجئني ردة فعل فاطمه

فاطمه،،عررفتهااا والله

جنت حتئ اني شاكه بس گلت بعدها طفله يمكن اني مشتبها واستحيت احجي خاف امها تزعل

ام احلام،،اصخااام الصخم وجهج امل
كل هلمصايب من ورة زعطوطه خلت خالها زين ماذبح مرررته الله يكسر رگبتها بهليل

انه اريد اگوم افهم السالفه اليوم اهجم الحوش علئ راسها وراس امها الماعرفت تربيها

فاطمه،،يمه اكعدددي الصبح حققي مو هسه الوادم ناامت

ام احلام،،ميلللي عنييي وروح ضياااء ماانام اذا ماانبش السالفه اليوم گومي ويياي

لارا،اخذت فاطمه وطلعت گمت علئ حيلي لكنتور الحجيه بي مرايه انصدمت بوجهي من الخوف ماحسيت بالوجع بس من شفته اخترعت
شفتي وارمة

بس اكثر شي عيني اجت الضربه عليها البياض صاير احمر منجمع بي الدم

وجوة عيني وارمه منفوخه من ضربه الحديدة
مارجعن غير ورة ساعه

بهذا الوكت انتهيت من الوجع اتمنيت اذبح روحي حتئ ارتاح ماينحمل ابد

من رجعت الحجيه وفاطمه شافني الحجيه ركضت صاحت الضرغام
جابتلي عبايه وحجاب لبستهن واني گاعدة مابيه حتئ انهض
اجه ضرغام سندني من جها وفاطمه من الجها الثانيه

عرفته منطيهم السويج مال سيارته حتئ ياخذوني للمستشفئ

اخذوني الحجيه وضرغام وفاطمه خطيه ماقبلت اله تجي وياي والطريق كله لازمة ايدها من قوة الالم العندي
انقهرت علئ روحي وصرت ماابجي من الوجع بس ابجي علئ الشخص الي مايثق بيه واتهمني بدون مايتفاهم وياي عكس امه واخته مصدگات ابرائتي

وصلنه للمستشفئ دخلنه للطوارئ الدكتورة من شافتني شهگت گالت مااگدر اسوي اي شي اذا مااتقدم بلاغ مبينه متعرضه للتعنيف

اني بس اريد اتخلص من الالم وهي تريد تفتح محضر گعدت بالگاع مااگدر اوگف بس دموعي تجري

نص ساعه واحنه كاعدين وجف ايدي صار مثل النفاخه سمعت صوته عبالي يتهيالي بس من شفته دخل هو وقاسم اتاكدت منه هو

ضرغام مبين زعلان من خاله من شافه دار وجها وهو. صار يحجي ويه الدكتورة طلع هويته وشوفها للدكتورة والشرطي
سكتو ماحجو شي

گومتني فاطمه وضرغام حولوني القسم الاشعه
طلع كسر بالعظم
بعدها الدكتور گال لازم انجبر العظم بس بالبدايه لازم نسحبه

دخل هو وياي وفاطمه
عمتي وضرغام ماخلوهم يدخلون
گعدت بس روحي اتلوب خايفه
الدكتور گعد گبالي راد يلزم ايدي ماخليته

الدكتور،،بابا مدي ايدج بس اشوفها حتئ ترتاحين من الوجع
وبعدها اصبها الج وانطيج مسكن حتئ اتنامين مرتاحه

لارا،،الوجع مايوجع غير راعيه اباوعله يحجي بهدوئ واني اتمنئ اگلب المستشفئ بالصايح من الالم

راد يلزمها رجعت سحبتها خايفه ماحسيت غير وگف گدامي لزم ايدي حيل بحيث الدكتور مسيطر جر راسي حضنه وهو واگف ايدي الثانيه لازمه طرف العبايه حاطتها بحلگي اعض بيها

بلحظه جر الاصبع بدون وعي صرخت صرخة احس بلعومي انجرح منها
اسمع الدكتور ايگول عفيه بالسباعيه خلصنه الجزء الاصعب مابقئ شي

انتهيت بس عيوني تتحرك والعرگ اخذني

بدة يصب بجف ايدي كمل وانطاني مسكنات وضربوني ابرة هم مسكن
گاله الدكتور عينها متاذيه اخذها باجر للدكتور الاختصاص ينطيها علاج
دخل ضرغام گومني هو وفاطمه وهو بقه منتظر ياخذ الوصفه من الدكتور

طلعت صار قاسم بوجهي مبين يريد ينفجر بس نظرته نظرة عطف علئ حالتي

طلعنه من المستشفئ اخذ السويج من ضرغام گاله روح ويه قاسم اني راح ارجعهم

صعدت اني وفاطمه بالورة مااگدر ابقئ گاعدة
مددت خليت راسي بحضنها والحجيه كعدت يمه

ماحجه ابد بس سرعته جنونيه حتئ امه خافت
گالتله راح تگلبنه لاتمشي حيل بس هو ولاجن يسمعها

وصلنه للبيت نزلنه وگفت سيارة قاسم احنه دخلنه وهو ضل واگف برة
سمعت بس صوت ضربه مااعرف منو ضرب منو طلع ضرغام يركض زمخ بي راهب حتئ يدخل

رجع سالته بيبيته اشبيهم?

ضرغام،،قاسم نايم علئ صدر خالي يتعاركون

لارا،،الحجيه اخترعت رادت تطلع جرها ضرغام گالها عوفيهم بيبي سالفه بينهم مالنه دخل بيهم
بهاي اللحظه الحقد الشلته بگلبي علئ راهب كفيل انو لواشوفه سابح بدمه مايهمني ولايرف گلبي اله تركتهم وطبيت جوة گوة اشوف دربي المسكن اشتغل مفعوله اريد بس انام

دخلت الغرفة الحجيه جريت مخدة نمت بالگاع بدون فراش بس اتغطيت بالعبايه

ماحسيت علئ روحي بعد غير گعدت علئ الم قوي فزيت الشمس طالعه گعدت شفت الحجيه نايمه يمي

وخرت البطانيه مغطيني واني نايمه بس باقيه بدون افراش يمكن ماهونن يگعدني من شافني نايمه

رفعت ثوبي واني اشوف طبعات الحزام صايرات خيوط زرگ ومن يضرب بحديدة الحزام الضربه تصير اقوة فيصير الجلد بنفسجي غامق

كفيت ارداناتي هم نفس الاثار ماگدرت انهض اريد اشوف وجهي اشلون صاير لان البارحه الورم موكلش

استندت بيدي الثانيه وگمت اول ماوگفت لزمتني الدوخه انتجيت ع الحايط
وصلت للمرايه وجان اشوف وجهي مگلوب گلاب وعيني فد مرة مچبدة دم وجواها اثر ازرگ كلش بسرعه بجيت

هذا حدي وياه اعوفه قبل ماياخذ روحي
شنو ذنبي اتحمل كل هل ضرب والخاطر منو?

بهاي اللحظه كل الاجه ابالي انهزم منه لو شيصير خل ايصير المهم اخلص روحي

دورت علئ موبايل الحجيه مالگيته يمها

فتحت الباب وطلعت الساعه تقريبا7الصبح كلها نايمه

گوة مشيت متوجها للحمام اسحل بروحي علئ ساعه اوگع

باوعت للدرج اتذكرت البارحه من ربطني
جريت حسرة طلعت من روحي بعد وبعد شنو لازم اشوف منك ياراهب

كملت طريقي للحمام اتفاجئت بوجودة واگف گدامي مقرب اذنه للباب

جحضت عيوني خفت صارت مجرد شوفته ترعبني

رفع ايدة بمعنئ لاتتحركين والايد الثانيه رفعها الوجها سوالي حركه ب اصبعه وهو مخلي علئ شفايفه بمعنئ لاتحجين شي

عرفته جاي يتصنت للشخص الموجود داخل الحمام