رواية راهب ابو غضب الفصل التاسع وستون 69 - بقلم Zahra_Alhussnawy

مساء الورد بنات اعذروني اتاخرت بالنشر
تدرون ايام زيارة وخدمة اباعبدالله الحسين

مقبوله زيارتكم وخدمتكم انشاءالله

،،،،،،،،

راهب ابو غضب

بقلم زهراء الحسناوي

بنات النجمه النجمه 😂

،،،،،،،،،،

لارا،،ضليت كاعدة بمكاني ورافعه راسي لااخذ ولاانطي
عرفته من ملامحه انو بقمة غضبه
والله احس حتئ امعائي رجفت من الخوف

ماحسيت غير جرني من زندي گومني علئ حيلي هي گومه وهي دفعه مرتين دفعني بقوة لمن دخلني للمطبخ
حتئ نفسي ضاگ من الخوف

سد الباب مال المطبخ بقوة لمن انكسرت الجامه

راهب،،شگلت?

موويااج شحجيييت?

لارا،،و والله نسيت والله
ماحسيت غير براجدي فر خدي احسه خدر

راهب،،هذا حتئ تذكرين كلامي مرة ثانيه حيوانه طالعه ورجليج طالعات وزرورج مبينات لو نازعة.. وطالعتله اشرفلج مووووو?

اباوعله وجها غدة احمر وعيونه حمر يخوفن عرفت صعد عندة السكر بس رغم حالته واني اشوفه ثاير ومحترگ دمه

عطت مااتحملت

هوووو اني صدگ حيووانه لان ضاله يمك مخليني مكفخههه
تدرري شنووو ?
صوجي رجعت لان كلت اتغير بس ابو طبع مايغيرر طبعه اكو مثلل ينطبق عليكككك

حجيت هلكلمه واتندمت لابيه اعدل سالفتي ولابيه ارگع الحجايه واسدها لان افتهم قصدي ضيگ عيونه وسالني

راهب،،قصدج المثل ذيل الجلب ماينعدل مو?

لارا،،سكتت
يمه الطباخ بجهته والجدورة علي دفر الطباخ لمن وكعن الجدورة واطشر الاكل
عمتي سمعت اجت گوة تمشي

راد يرجع يضربني ركضت ختلت ورة عمتي

الحجيه ،،كافي يمه ولكم والله شهرتونه بنص الوادم يوميه ومسوين مهرجان بالعرك والطلايب

لارا،،احتار شيسوي هرج البيت هرج عمتي گالت عوفي يهدئ بس اني روحي شايطه

افرفح بالحجي بس بدون دموع دمعتي شاطت

عمتي اخذتني الغرفتها گالت عوفي من تشوفي عصبي
وهم صفت ويه ابنها اتگلي عندة سكر اذا مات منو النه ?واني مالي غيرة اسكتي واتجفي الشر

بس وين اسكت انعميت من القهر كمت علئ حيلي الباب مال الغرفه مفتوح گتلها مو طالعه من فطر الگااع وكلسااع كافخني والله اروح لهللي ويحلم ارجعله

راهب،،واللله التحلفين بي طلقتين برجلج اكسرج واگعدج اهنا فوگ شينج كواة عيننج

لارا،،دفع الباب بيدة وضل واگف مادخل للغرفه

راهب،يمه اني طالع لو تسمعن الدنيا تحترگ بررة التطلع منجن اگلب الدنيااا مفهوووم

لارا،،عمتي ضربت علئ صدرها وهو ولاحتئ سمع منها طلع مثل الاعصار مانسمع غير رگع البيبان

ركضت وراه ادري راح يتعارك باوعت من زرف الباب اشوفه يدگ باب الجيران بقوة
طلع ابوهم اوياه نفس الولد ابو الطيور

راهب ماقصر گام يعد ويصف عليهم وابوهم مبين رجال هادئ مومال مشاكل حتئ ابنه من راد يحجي دفعه للبيت ماخلئ يسولف ويه راهب

نص ساعه مستمرة المعارة اباب الجيران وكلها التمت علئ حس رويهب حتئ قاسم طلع يركض گوة جابه للبيت وهو يهد وينفلت يريد يتعارك

بيومها للمغرب اجت ناس كلش اهواي والعرفته الرجال ابو الولد جايب شيخهم واخوته وجاي يعتذر

اني بالمطبخ اسوي جاي واركض اوگف يم باب الاستقبال اتصنت علئ سوالفهم

عمتي كاعدة بالصاله وراي تحجي علئ كيف اتگلي

الحجيه،،لو مااطالعه جان ماوصلنه الهلمواصيل حتئ انوب قبل لاتسوين شي اتذكرين كلام زلمتج

لارا،،مازعلت منها بس ضجت لان اني ماعريانه بالشارع
اني لابسه اتراك ابيتي وماخذة راحتي ابيتي شمدريني هيج راح يصير وانوب هي الدزتني اغسل الديباج وهسه تانبني علئ طلعتي

رجعت للمطبخ خليت القوري علئ صفحه النار بين مايخدر ورجعت اتصنت اسمع راهب يفرفح

راهب،،يااابه ترضوها انه اصعد ع السطح واباووع العرررضكم???

الرجال،،اكيد مانرضه والغلط عدنه وحگك علينه والتفصلة احنئ بخدمتك

راهب،،خادم ربك حجي وهلمرة الخاطر وجوهكم الطيبه وصلت السالفه لهنا بس مرة الثانيه ثق بمحمد اذا شفته ع السطح وعينه علئ بيتي اجي اطب البيتكم واشمرة من السطح
لان مو بس سطحكم مسلط علئ،بيتي
لا مسلط علئ اهواي بيوت والناس تريد تاخذ راحتها
بسبب ابنكم حابسين نسوانه مانخليهن يطلعن للطارمه

لارا،،بعد ماالطرفين هدئو كملت الجاي صبيته وحضرت الصينيه بس وجهي مغندب دخل للمطبخ ياخذ الجاي مدنگه اشتغل حتئ مارفعت راسي وباوعتله راد ياخذ الصينيه گال بصوت ناصي

راهب،،ارتاحيتي??

لارا،،اخذ الصينيه وطلع يقصد من صارت العركه بسببي يعني من اتعارك ارتاحيت

شويه والناس راحت صعدت الغرفتي جريت الجنطه گمت اشيل بالملابس واحط بالجنطه وفعلا مقررة اروح لهلي مااضل

شويه ودخل شافني الم بالملابس ماحجئ شي
وسكوته قهرني اكثر
گتله وديني لهلي

راهب،، الصبح اخذج

لارا،،لاهسسسه

راهب،،گلللتتت الصبح يعني الصبحح

لارا،،سكتت ماحجيت كملت لم هدومي سديت الجنطه

راهب،،اجازتج طويله اخذي الملابس الشتويه وياج

لارا،،دمي فار ادردم بالحجي ماخليت شي ماحجيته هو ولايمه اتمدد دار وجها ونام

هم فرشت ونمت بالگاع بس لان محترگه اعصابي مانمت
ضليت اتگلب للفجر تالي تعبت وغفيت ماادري بروحي ماگعدت غير الشمس عاليه طفرت من مكاني اباوع الغرفه فارغه وراهب ماموجود

ردت اطلع الباب مقفول رجعت ادور علئ موبايلي الموبايل ماكو گلبت الغرفه مالگيته

عرفته ماخذ موبايلي وقفل. الغرفه خاف اتصل ب اهلي يجون ياخذوني

لاساعه ولاساعتين محبوسه بالغرفه للساعه 11الصبح ياالله فتحلي الباب راجع من وكت

ليش قفلت البااب?

راهب،،بكيفي

لارا،،جيب موبايلي حتئ محمد يجي ياخذني

راهب،،ماعندي مرة تروح

لارا،،سد الباب وانتجه يباوعلي هادئ مجتف ادي
ينرفزني برودة

رجعت طلبت منه ينطيني موبايلي

راهب،،نسيته بالدوام

لارا،،هه خوش فلم والله هسه انزل اتصل من موبايل عمتي
حلوة هاي يضربني ويريدني اضل يمه يكفخ بيه

راهب،،غصبا عليج تدرين بيه عصبي وگتلج لااطلعين اكو كلب ابن كلب ع السطح بس لوتخافين مني صدك جان ذكرتي كلامي وماطلعتي
ابسط شي يصورج وينشرج ع الفيس ترضيها انتي?

لارا،،گلت نسسيت

راهب صووتج

لارا،،سكتت اجه يمي راد يجر راسي يبوسه دفعت ايدة

راهب،،رجعت لبست الجينكو

لارا،،والله اروح لهلي

راهب،،موبكيفج

لارا،،جريت عباتي ردت اطلع لزمني دفعني ع الباب راد يبوسني وخرت عنه ودفعته گوة كاتم ضحكته

راهب،،صايرة وكحه

لارا،،وخر اريد اطلع

راهب،،ماكو طلعه

لارا،،هو اتريدني اضل حتئ اتكفخ بيه

راهب،،لو مااحبج جان ماانحرگت اعصابي عليج
تدرين بيه اغار من النفس التاخذي
مو انوب اشوفج هيج لابسه وهذا الساقط يباوعلج من فوگ
بالعباس روحي شاطت لو يمي احرگ عشيرته يمكن افرغ الشاجور براسه وهم مايبرد گلبي

لارا،،كملت?
يالله وديني لهلي

ضل صافن بوجهي ماحجه طلع وسد الباب وراه

يومين ماعندي موبايل اخذه مني وقافل باب البيت من يطلع يمكن لونحترگ محد يدري بينه

ثالث يوم رجع من الدوام واني اسوي غدة بالمطبخ دخل شافني ابتسم وكال السلام عليكم ماجاوبت

عاف موبايله وباكيت الجكاير والسويج علئ ميز الطعام وصعد للغرفه

دااأگلب بالتمن سمعت صوت موبايله اجت رساله صار عندي فضول اقراها ماادري ليش
اتقربت اخذته فتحت الرمز رقم غريب مكتوب

لان احبك هيج تعاملني ?

احس دمي صعد الراسي بعد مااشوف گلبي لكشني
حسيت هاي بنيه تركت الموبايل ورجعت اگلب بالتمن

رجع اجا اتصال من نفس الرقم اخذت الجهاز بيدي ردت افتح خط واتاكد منها بنيه لو ولد ماحسيت غير انجر الموبايل من ايدي

ماحجيت رجعت احضر بالاكل بس بالي يم الرقم
رجع اجا اتصال ومتاكدة من نفس الرقم اخذ الموبايل ودخل للاستقبال
سد الباب وراه احس دخان طلع من راسي بس مااگدر احجي وياه

كملت الغدة طلع هو اجه يتغدة انطيتهم الصينيه هو وعمتي ورجعت للمطبخ مااشتهي سويت جاي كملو غدة اخذت الصينيه ودزيتلهم جاي

صرت اراقب كل تصرفاته انتبهله اشلون من يتصل بي هذا الرقم يرتبك ويختلي بالغرفه وحدة

قبل كم يوم گال اني ابات برة

انمغصت بطني مجرد الفكرة اخاف احجيها خايفه اتكون غزل رجعت الحياته او يمكن موغزل غيرها

بيومها راح المغرب يبات يم صديقه صادف خميس وثاني يوم عطله عندة وصديقه مسوي طبگ للامام الحسين عليه السلام طابخ تمن وقيمه وراهب يبات يمه يسهرون ع القيمه يطبخوها

مارجع غير للخمسه الفجر حسيت بي دخل للغرفه
اني يوميه افرش بالگاع وانام لان زعلانه بس اليوم نمت ع السرير لان هو ماكو حسيت بي حضني سويت روحي نايمه لان صدگ مشتاقه الحضنه وعطرة

تعبان بسرعه غفه اني هم غفيت وياه كعدت فازة لان عمتي لازم انطيها ريوگ حتئ تاخذ علاجها
گمت لميت شعري انتبهت موبايل راهب مشتعل ضوه بس صامت اخذت الجهاز الساعه ب 7الصبح ونفس الرقم يتصل بي

اخذت الجهاز وطلعت علئ كيف قبل مايسمعني دخلت للغرفه مالتي اني وفاطمه وسديت الباب بس گلبي احسه راح يطلع من حلگي يدگ سريع خوف علئ ارتباك مااعرف ليش

فتحت خط بدون صوت خليت الجهاز علئ اذني
انصدمت من سمعته صوت بنيه

البنيه،،اوووف واخيرا فتحت خط والله شلعت گلبي

لارا،،منوو انتي??

لارا،،بسرعه انسد الخط بوجهي رجعت اتصلت مغلق كل مااتصل مغلق اعصابي كلها ترجف ودموعي مااسيطر عليهن وحدهن يجرن

انفتح الباب ودخل راهب سحب الموبايل من ايدي
مااتحملت انفجرت بي

اكووول كل مايتصل بيك هذا الرقم تختتتل وحدك بالغررفه

راهب،،صوتج

لارا،،لاصوتج ولاشييي هسسسه توديني لهلي وامرح واسرح بكيفففك

راهب،،كافي لاراا صووتج

لارا،،گعدت بالگاع خليت اديه علئ عيوني وانفجرت بجي
گعد كدامي جر ايدي وباس راسي دفعته

كافي وخر يوميه عندك وحدة جديدة اذا ماتارسه عينك شكوو مخليني يمك??

راهب،،والله تارسه عيني وگلبي وروحي بس اسكتي

لارا،،مااضل وديني لهلي

راهب،،استغفر الله السانج مكوك علئ هلكلمه گلت ماكو روحه يعني لو تموتين مااطلعين منا

لارا،،منوو هاي??

راهب،،وحدة

لارا،،ادري وحدددة منو هيي?

راهب،،لارا بس بهاي اعذريني مااگدر اگول منو هي

لارا،،ضليت صافنه گتله هذا هو لتحجي واني اعرف اشلون اتصل بمحمد يجي ياخذني
ردت اگوم جرني گعدني بحضنه

راهب،هاي مرت صاحبي

لارا،،احس واحد كفخني علئ عيوني
شنووو???

رااهب تباوع علئ مررت صاحبك??

راهب،،طاحض تفكيرج ولج صاحبي اخوي ومرته اختي حالها من حال فاطمه
اتقبليها انتي اباوع علئ عرضي??

لارا،،رراهب لتخبلني لعد شكوو تخابرك

راهب،،قبل اسبوع صار يتصل بيه رقم غريب جاوبت اريد اعرفها منو كل مااجاوب اسالها مااتگول هي منو والمصيبه تعرفني كلش زين تعرف حتئ شنو لابس اليوم اويامن طالع

فكر ماضل عندي من كالت اني ماخذة الرقم من موبايل زوجي شفتك وياه وانعجبت بيك

كل ماارفضها ترجع تتصل لو ادز رساله حضرتها رجعت اتصلت من غير رقم
البارحه دزتلي رساله كالت اليوم تعرف منو اني
ماكنت متصورها مرت نقيب ميثم صاحبي
دائما اروح يمه تصرفاتها طبيعيه عبايتها وحجابها وكلامها كله موزون وحتئ ماارفع عيني لان معتبرها اختي

بس البارحه بليل من جنه نطبخ قيمه گتله ميثم اريد افوت للحمام الرجال لان معتبرني اخو دلاني بطريق الحمام بداخل البيت وطلع يم العالم الجاي تطبخ

اتفاجئت من طلعت لگيتها بالباب مبتسمه دنگت ردت اعبر
صارت كدامي تمنعني اتگلي صارلك اسبوع مدوخني
اتراجعت مرتبك وخايف مو منها بس من صاحبي اذا دخل وشاف مرته واكفه وياي لاول مرة بحياتي اخاف هيج

كتلها يعني انتي التتصلين بيه?
ضحكت بصوت ناصي كالت اي
دفعتها وطلعت شارد وبعد مادخلت للبيت كل مااشوف ميثم يباوعلي ياخذني العرگ من راسي الساسي اگول خاف يكتشف رقمي عد مرته وساعتها اخسر صاحبي واخوي

ماصدگت ايكملون واجيت مهزوم

اما بالنسبه الكلامج من گلتي تباوع المرت صاحبك
مو اني التدنه عيني علئ عرضي
صح اشرب وصح مسوي شغلات حرام بگد شعر راسي
بس مستحيل اباوع المرت اخوي

الله شاهد اليوم قررت اغير رقمي وحلفت بعد مااوصل البيت ميثم نهائيا
رجال كامل مكمل والكمال لله وحدة بس مرته استغفر الله
ولج يحبها حب ماصاير شنو تطلب وشتريد موفرلها ليش هيج تطعن بي ماادري لا ونوب عافتها كلها واجتني

بيوم  الشفت هذا العار يباوعلج من السطح انعميت من شفتج بالموبايل لان رابط الكامرة علئ جهازي

لارا اعذريني من افقد بالقران افقد من حبي الج
روحي تشتعل من اشوف واحد يباوع الطولج

لارا،،اليحب يأذي حبيبه??
انته ايدك والضرب ماتتفاهم الحياة الزوجية مو افراش وضرب واهانه هيج الحياة ماتمشي اذا ماكو تفاهم بيناتنه

اني تعبت راهب والله تعبت

راد يجرني الحضنه گمت من مكاني طلعت من الغرفه
صار كم يوم كل واحد من عدنه ينام بغرفه وحدة يوميه بليل يجي يدگ الباب بس يلگاه مقفول

احبه واحترمه وعيوني ماتشوف غيرة هذا غير غيرتي العميه علي
وهم اعرف يحبني بس الحب وحدة مايكفي اذا ماكو احترام

سارة رجعت حبلت مرة ثانيه ورغم الدكتورة منعتها سنه لازم ماكو حمل بس هي ماااخذت نصيحة دكتورتها وحبلت وهم مات الطفل ابطنها ورجعت سوت كورتاج مرة ثانيه وماصار سنه من سوت اول كورتاج
قاسم اتخبل من عرف بيها تاركه حبوب منع الحمل وزعل وياها فترة بس لان يحبها زعل عليها مايريد تتاذه بسببه

فاطمه شغلها الشاغل الحمل  تركت الدكتورات ومقررة بعد ماتنتهب فترة كورونا  تسوي طفل انابيب ومحمد ماعندة اي اعتراض يكول شنو اليسعدها اسوي واني الممنون

احلام طول فترة اصابة امها مااجت يمنه اتخاف من كورونا خاتله ابيتها ضرغام راد يجي مرتين بس منعو عيالها زوجها كلش يخاف من الاصابه لان امه وابو كبار بالعمر

الئ هنا تنتهي يوميات راهب والحياة مستمرة
والحياة الزوجيه ماتخلئ من المشاكل

هذا السطر من لارا

حتئ من اريد اقبل عذر مااشوف ترضئ جروحي
وساعتها راح ادخل حرب مابين روحي وروحي 💔

الله يساعدك حضرة الرائد 😅

موگد الزعل هسه اني ليش ازعل 😂😂

حتئ اني ضجت علئ زعلكم شوكت تتصافون ماادري

بنات انتن هم اخواتها انصحوها وهو هم خطيه اعتذر
ويارب يتصالحون

قرائه ممتعه