تعاال بصدري اضمك ياحبيبي اشبيك
بلكي بصدري اخفف هايه وناتك
احسك انته بيه واني عايش بيك
واحس دگات گلبي اتحاجي دگاتك
اذا تذبل عيونك فدوة الك هالعين
واخذ عيوني الك وانطيني مالاتك
،،،،،،،،،،
راهب ابو غضب ج2
////بقلم زهراء الحسناوي/////
،،،،،،،،
لارا،،قبل العقد مال السيد بيومين راهب انطانه خبر جهزنه كلشي
اتفقنه العصر يجيب السيد يعقدلنه
الساعه ب1الظهر رحت للصالون اجرت بدله
حفتلي الابنيه وسوتلي تسريحه بسيطه ومكياج خفيف رسمت عيوني برز لونهن جرتهن ب ايلاينر صارن عبالك رسمت العيون الناعسه كلش حلوات
الساعه 2ونص رجعنه جابنه محمد لگيتهم جاايين
كاعدين بالاستقبال بس عمتي وفطومه بالصالة يم امي
عمتي وفاطمه هلهلن وطشن جكليت كعدت ع الكرسي ماعازمين اي احد بس بيناتنه
اجه رافد باسني براسي گال گومي يم الباب السيد حيعقد الكم
گلبي احسه يريد يطلع من سرعة دكاته خوف ورهبه كانه اول مرة اتزوج راهب
عقدلنه السيد اتعالت اصوات الهلاهل شويه ودخلو اخوتي وياهم راهب ضليت خجلانه ومدنگه مااكدر ارفع راسي استحي
سجئ حضرت ميز وسوت الكيك رتبته
اجه كعد يمي بس ريحة عطرة ترست خشمي
عبالك يسبح بالعطر
طلب من عمتي تنطي علبة مال الحلقات
اخذها منها طلع الحلقه مديت ايدي ترعش
حسيت بي ضغطها بيدة
بعدها لبسته حلقته
راهب، ،اكلكم ترة المرة وصارت حلالي
اريد احجي وياها وحدنه
محمد،،تررة هسه انبطل هههههه
راهب،،فاتك السوم ابو جاسم ترة هسه اخذها وياي
لارا،،اسمع وميته خجل راح كدامي للاستقبال ومحمد ورافد گعدو يم عمتي اخذت شال امي خليته علئ متني لان البدله ظهرها فضيحه بس صدرها عادي
استحيت من اخواني
گمت رجليه وحدة اطگ بالثانيه بمجرد مافتحت باب الاستقبال انجرت ايدي بقوة
كلشي مافهمت غير اني بحضنه وجاي يطبع قبلاته الملهوفه على وجهي
ردت ابعده بس اتخردلت وضعت بيدة صرت ابادله بكل حب
ابتعد مني حط گصته علئ گصتي
راهب،،واخير رجعتيلي
لارا،،مامصدكه
راهب،،ليش اني مصدگ?
لارا وربج مااتحمل اكثر العرس نسوي بعد عرس محمد وفاطمه واذا نعرس سوة بعد احسن
لارا،،ابتعدت عنه لااا فدوة خليها ورة عرس محمد اريد اجهز نفسي
راهب، ،هذا هو بويه يجرالج التردي هو تالي انضل مسموط عمنه بسبب هلعرس
لارا،،رااااهب
راهب،،شكو?
لارا،،ليش تگول مسموط عمنه اكيد قصدك بابا
راهب،،هسه اني جبت طاري ابوج?
لوگلت عمنه
ترة مااسمحلج تحجين علئ عمي حبيبي
لارا،،باوعتله صفح هسه صار عمك حبيبك?
راهب،،هسه شجاب ابوج بالنص خلينه فرحانين
لارا،،بعدها طلعنه يمهم گعدنه شويه وراحو ماقبلو يضلون لليل
مرت الايام واني وراهب احلئ مايكون صار انسان ثاني اتمنئ بس يقترب موعد العرس واروح يمه
امي من البدايه اتفقت ويه عمتي الزواج. مال محمد وفاطمه بشهر الرابع يكون فات على وفاة مهند سنة وكم شهر
وفعلا ماضل غير ايام للعرس صادف كورونا محتله الساحه بس بعدها مامنتشرة كلش بالعراق بس نسمع بالاخبار وع اليتيوب انو الصين اهواي راحو ضحاية الهذا المرض الله يكفينه الشر
الاسبوع اليجي عرس محمد جهزنه كلشي بس اتفقنه منعزم لان بداية المرض كانت الناس مرعوبه الدرجه كلش جبيرة وممنوع تجمعات
ف الثلاثاء صادف حنه فاطمه يم اهلها حتئ ثاني يوم نسوي حنه لمحمد والخميس العرس
بيوم الحنه رحنه من الصبح وقبلها اشتريت فستان اسود عجبني هذا اللون لان الفستان روعه
عمتي هم ماعزمت غير بس ام قاسم وكم وحدة من جاراتها
العصر اخذنه راهب للصالون طول الطريق عينه بالمرايه عمتي يمه كاعدة كل شويه وگالتله عينك علئ دربك لاتموتنه
وهو خربان ضحك مكضيها يدز بوسات بالهوئ ويغمز
وصلنه للصالون وهو راح قبل ميروح وصانه الف وصيه لطلعن بين مااجي
لفن نفسجن غطن وجوهجن يبووو يمشي ويوصي
جهزنه فطومه طلعت اتخبل ابدلتها الوردي
واني مكياج طوخته هلمرة خاصتا الحمرة حمرة حتئ تبرز ويه الاسود
ساعتين ورجعلنه اتصل بعمتي لبسنه فاطمه غشوه خاصه بالبدلات
واني لبست شالي وعباتي وطلعت مرجع السيارة لورة عن الشارع حتئ محد يشوفنه
صعدنه وهو رجع عدل المرايه ابتسم وعض شفته
خررب اذوب من يسوي هيج حركات
شغل اغنيه
اريد اتزوج وافرح
واودع هلعزوبيه
واسوي عرس لاماصار
الخاطر هاي الابنيه
يغني وياه ويطگ اصبع والحجيه اخذها الواهس تهوس وتهلهل
وصلنه للبيت نزلنه فطومه دخلناها للصاله وهو واخواني كعدو بالاستقبال
بدت الحنه واني وسارة خبصنه الجو خبص طبعا اني فرحانه العرسي ههههه
اخوات فاطمه ماحضرن ابد ولسه مااعرف شنو السبب لان ماسئلت فاطمه
رحت للمطبخ اجيب كاسات ماي
انفتح باب المطبخ ودخل راهب
باوع الجهة الباب الي يكون بجهة الصاله راح سدة واقترب مني
طوق خصري بثنين ادي
هو مندمج يبوس واني عيني علئ باب المطبخ خاف يجي واحد من اخواني
تالي دفعته كوة وانهزمت اسمعه يدردم وراي
بليل اني وفطومه جهزنه جنطها وعمتي مكابلتنه وتبجي خطيه صعب عليها افراگ بنتها
گتلها عمه عليش تبجين اني راح اجي بمكانها
عمتي وفاطمه ضحكن عليه
بليل نايمين اتصل
راهب،،تعاي يمي
لارا،،ما مااجي
راهب،،تجين لواجي اسحلج
لارا،،عزاا رااهب فشله اشلون اطلع?
راهب،،زلمتج ولج موصاحبج انه وخايفه ومستحيه
ياالله تعاي راح احسب للخمسه الگاج يمي اذا مااجيتي تدرين شنو اكدر اسوي
لارا،،سدة قبل مااحجي بسرعه مغصتني معدتي خرب
باوعت الروحي لابسه اتراك شكلي يضحك
عدلت كفشتي لايخترع نص الليل ويلغي العرس
فتحت الباب علئ كيف وطلعت لكيته فاتح باب غرفته باوعلي اشرلي تعاي وهو مبتسم وصلت يمه الخوف زاد
درت وجهي ردت ارجع بس ماحسيت غير حط ايدة علئ رگبتي من ورة لزمني حيل رجعني دخلني للغرفه وسد الباب
راهب،،كل ضنج تنهزمين?
لارا،،عفيه راهب احجي شتريد عيب لتگعد فاطمه
اني احجي وهو لازمني من ايدي متوجه للسرير
كعدني وكعد يمي
عيونه مركزة علئ شفايفي اتخربط وضعي
دگات گلبي زادت
باسني غمضت عيوني وبادلته ضعت وياه وضعت بلمساته وهمساته وهو يهمس بااسمي بصوت ذايب
فزينه علئ صوت دگت الباب طفرنه اثنينه مثل الحرامية
هو راح فتح الباب انصدمت ومتت خجل من شفتها عمتي
الحجيه، ،سودة بوجهي خانس ع الفرخه نص الليل شكو?
تعاي يمه شجابج مااتگليلي ?
ترة ابني واعرفه مايكعد راحه ياالله امشي جدامي
وانته كض روحك واصبر للعرس
راهب،،هههههههاي والله حجيه هادمة اللذات انتي
بس همزين نقذتيها لوباقيه شويه مااضمن روحي
الحجيه، ،هو من دشيت غرفة اختك وماشفتها موجودة عرفتك حاصر البت يمك
لارا،،متت متت خجل وهو يضحك
رجعت للغرفه وعمتي تضحك گالت اذا صاحلج لاترحين تركضين
هزيت راسي واني خجلانه تالي عافتنه وطلعت
اجتني رساله منه
راهب،،گطعت علينه ام اللحظه الحجيه
بيوم العرس اخذج للفندق واليدگ الباب اجنزة ومحمد
لارا،،صدك ضحكت ومبين يحجي بحركه
ثاني يوم رجعنه البغداد لان باجر الزفه لازم نحضر نفسنه
بيوم الزفه كعدنه من الصبح لان هم ياالله نطلع للنجف
محمد راح حلق ورجع امي تهلهل واني وسجئ صدك اجواء الفرح حلوة ماينشبع منها
بعد صلاة الظهر طلعو للنجف كم سيارة ماعازمين اهواي جماعة محمد ينعدون ع الاصابع اني مارحت لان نجهز للعشه
للمغرب رجعو دخلو السيارة مال الزفه للبيت
واني صرت عجوز عرب ركضت جبت الماي وحضرت الدجاجه والسجينه حتئ نذبحها جوة رجل فطومه
خطيه مبينه خايفه دخلناهم هي وعمتي ومحمد لازمها
اتعشت العالم وراحت بعدها زفيناهم الغرفتهم
انتهئ. زواج محمد وفطومه واثنينهم يخبلون
بيوم سالت فاطمه علئ احلام وزهرة وشعجب ماحضرن عرسها
فاجئني كلامها گالت ريحانه مسويه غلط نفس قبل وهلمرة ابوها لازمها مجنزها كتل وحابسها بالغرفه بس ينطوها الاكل من الباب
واحلام ماتگدر اتعوف البيت محترگ من المشاكل وتجي تحضر العرس وزهرة رجلها انذار عندة وماگدرة تجي وبنفس الوقت هنه الاثنين ماقابلات على زواجي من محمد بسبب خلافنة القديم
اتعجبت علئ وكاحة ريحانه كل ذاك الضرب من ضرغام وماتابت وخطيه حتئ اخوها رجع نقل دوامه للبصرة في سبيل تبقئ كدام عينه
بعد اسبوع راهب اتصل گال
راهب،، حضري نفسج الاسبوع الجاي العرس لان كورونا طشت بالعراق واهواي مصابين
لارا،،عااا وتريدنه هسه انعرس لاهوسه ولاشي مثل وحدة زعلانه وراديها لاعيني لا عود كم يوم وتخلص كورونا وبعدها يتم العرس
راهب،،چا اسمعيني زين
وحگ ابو فاضل راح انتظرج بس هلشهر لان اگول خطيه اريدها تفرح
بس بعدها لو ننصاب اني وياج هم راح يتم العرس
لو اعرف اعرس عليج بغرفة الحجر الصحي
لارا،،متت ضحك وهو يحجي بحرگه
وفعلا يوم بعد يوم المرض ينتشر وراهب كل مايتصل يگلي ها شگال البهلول مو گلنه خل نفضها من زمان
تالي استسلمت وحددنه موعد العرس بشهر الرابع
ماعزمنه ولاواحد فقط اهلي واهله
بيوم الحنه سوينها هي حنه وهي زفه
اجرت بدله بيضه اباوعلها فرحانه لان اول مرة البسها واني فرحانه وفرحتي ماسايعتني
جانت فترة حضر طلعنه من بغداد للنجف علئ هويته حتئ اهلي محد اجه وياي امي كالت انتي رايحه العمامج موالغريب
ف بس عمتي وفاطمه رجعن ويانه بسيارة الزفه والحلو كلنه لابسين كمامات وكفوف
وصلنه للبيت المغرب لگينه سارة وام قاسم وزهرة واحلام بس ريحانه ماموجودة والغريب زهرة واحلام اتلگني بسلام حلو عكس قبل بداخلي گلت سبحانه مقلب القلوب
دخلنه لجوة وراهب راح يم جماعته عازم كم واحد قليلين
للساعه عشرة صار موعد الزفه ردت اتقيئ من الخوفه ولا كأن جنت مرتة
اليشوفني يگول اول مرة يزفوها الراهب بس والله احس نفسي مرعوبه
صعدت للغرفه اخذتني عمتي اتفاجئت بيها اتخبل كله مجهزة جديد ذوقه كلش حلو
گعدت وگلبي يركض ركض من الخوف
عمتي طلعت وفطومه عدلت مكياجي
شويه وسمعت صوت هلاهل معناتها زفو
فاطمه،،هههههه اشبيج وجهج انخطف
لارا،،حموت فاطمه ولاكان متزوجين قبل
انفتح الباب ودخل راهب وصدگ شوفته ترهب
فاطمه. باركتله باس راسها وگالها
لو نحترگ اهنا لحد ادگ الباب وگولي لمج هم
لارا،،فاطمه ضحكت وطلعت يمون عليها لان اصغر منها
بقيت مدنكه من سمعت صوت طگه القفل مال الباب ارتعد جسمي من الخوف رفعت راسي باوعتله
نزع سترته علكها واجه يمي مبتسم
گعد بصفي اخذ ايدي رفعها باس باطنها
بعدها عشنه دوامه من الحب واللهفه
اتندمت بگد شعر راسي علئ السنين التركته بيهن
شگدحاولنه نبتعد بس حبنه يرجعنه النفس النقطه
مرت الايام واني وراهب عايشين بسعادة ماتنوصف رغم اتغير وصار يضحك ومرح بس ابقئ اخاف منه واهابه
بيوم عرفت منه بالصدفه انو غزل رجعت النفس شغلها استغربت هاي الانسانه بعد ماالله هداها رجعت النفس مستنقع الرذيله مرة ثانيه
اتاكدت انو عمرة ذيل الجلب ماينعدل
غيرتي علئ راهب زادت ثاني شهر الزواجنه انتقل للنجف واترفع برتبه رائد
صار كل مايتاخر شوويه مايرجع للبيت نار الغيرة تاكلني ومن يجي انزل وياه تحقيق وين جنت اويامن جنت
وياها موو?
راهب،،هي منو?
لارا،،غزل
راهب،،استغفر الله وشجاب انعال علئ بالج هسه?
يابه وداعتج الف غزل ماتغريني لان تارسه گلبي وعيني انتي
لارا،،اي اضحك عليه بسوالفك
راهب،،ههههه ولج والله زلم مشوربه بزمخه مني كلها تتراجف وانتي بگد كف ايدي وماگادرلج
لارا،بعدها يعرف بكلماته اشلون يكسر الزعل
مر علئ زواجنه اربع اشهر ونص
قاسم اترفع ويه راهب واثنينهم انتقلو للنجف
سارة،،حبلت شهرين ومات ابطنها بسبب داء القطط
كلنه اتاذينه عليها لان كانت كلش فرحانه بحملها ومن مات الطفل اتاذت
فطومه ماصار حمل راجعت مرة هي من ذاتها محمد گالها بعدنه عرسان بس هي اتخاف اتگول دااكبر خاف بعد ميصير عندي اطفال
اما اشلون عرف راهب بنشر الروايه ف بفترة زواج فاطمه بتت يمهم وتركت موبايلي ع الشحن
من رحت اخذة شفته بيد راهب يگلب بي
ومبين من عيونه ضايج
نهض من مكانه وجهلي الشاشه گال
راهب،،ناشرة قصتج?
لارا،،مابييها مجال انكر لان محادثه استاذ علي الفتلاوي كلها يمه وبعدها ست زهراء اخته كملت
گتله بس محد يعرفك
راهب،،اشلووون محد يعرفني والقصه واصله فووگ المليوون
اشلون تتصرفين من كيفج بدون ماتاخذين رأي وياج
لارا،،والله محد يعرفك ولايعرفني لان اتغيرت الاسماء واهواي شغلات خفتها الكاتبه حتئ محد يعرفنه
راهب،،ولج يامحد يعرفنه وامه محمدد كلها متابعتها تحجين صدك انتي
خلي تحذفها لااشتكي عليها وعلئ اخوها بالعباس اكلبها عليكم
لارا،،صدگ ضجت كتله خلص راح اطلب تنحذف الروايه وعرس ماكو
ضلينه اسبوع مانتحاجئ الئ ان استسلم من قراها واتاكد الشخصيات هويتها الحقيقيه صعب التعرف عليها
قاسم ماعندة علم بموضوع النشر وحتئ صورته اخذتها من موبايل راهب دزيتها للكاتبه بعد فترة ياالله لگينه شبيه اله
بس راهب لاكلش بي شبه من ملازم مصطفئ علاء
بس رهوبي اضخم صاحب متون اعراض وعضلات فديته 😍
لهنا وتنتهي قصتنه اشكر الست زهراء واخوها استاذ علي لان انطو الروايه حقها ماكنت اضن راح توصل هيج نسبه من المشاهدات
اشكركم علئ تعليقاتكم الحلوة صح اكو غلط بس عذرتكم لان اعصابكم مشدودة ويه الروايه ومنفعلين وياها
اشكركم جزيل الشكر مرة ثانيه
وحبيت انطيكم عنوان السيد الي رحتله لان ست زهراء طلبت مني هلشي گالت اهواي بنات دخللي خاص يطلبن عنوان السيد ف راح انطيكم العنوان لوجه الله تعالئ عله كم وحدة مثل حالتي تخلص من السحر واعمال ااشيطان والمايخافن من الله الي كل همهن يهجمن بيوت غيرهن
اسمه سيد علي بيته مقابيل الامام زيد ابن علي عليه السلام
وللتاكد منه نفسه لولا راح انطيكم شبه للرجال قريب الدرجه موطبيعيه ومن تشوفو راح تتاكدون من كلامي
اول مارحتله ضليت صافنه گتله محمد باع السيد يشبه منو??
محمد،،ولج يشبه ممثل بس ماجاي اذكر اسمه
لارا،،حتئ اني مااذكر اسمه بس اذكر دورة بمسلسل بيت الطين مثل شخصية شيخ عجاج
هذا الشبه كلللش قريب للسيد
اتمنئ من الله واهل البيت الشفاء الكل شخص وكل بنيه من السحر واصحاب السحر
الكاتبه زهراء الحسناوي
الئ هنا تنتهي رواية راهب ابو غضب
اشكر كل متابعاتي الوردة فديتجن يعمري
واشكرجن علئ تعليقاتجن الحلوة لو ماانتن مانرفعت الروايه ولااشتهرت اوصلت الهل مستوئ
😍😍😘
اتمنئ اتكونون استمتعتو بقرائه الروايه
بس عندي طلب اخير 😂
اني وابو حسين متراهنين
قبل مااكلكم الرهن اكو كم بنيه مامصدگات علي اخوي
يابه والقران علاوي اخوي
اليگول اشلون هو فتلاوي وانتي حسناويه
عشيرتنه فتله بس جدنه حسن يصيحوله حسناوي
بس ردت اطلب منكم متابعه الحسابي الثاني
لان اتراهنه ياحساب يصعد راح ياخذة
واني هذا الحساب مااگدر ارجعه اله
user08167105
وشغله ثانيه التريد روايه حلوة تقراها خل تقرة الرهن الجارح تلگوها بحسابي اقروها وصوتولها كلش حلوة كتابات ابو حسين بعد 😍
الئ اللقاء بروايه جديدة 😍
دمتم في امان الله وحفضه ورعايته
بس تعالو اسمعو وياي هاي الاغنيه خل نفرح بعرس اكثر عنوديه شفتهم بحياتي
وتردون الصدك الاغنيه تسوي واهس للرگص 😂😂😂
النهاااايه
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!