رواية راهب ابو غضب الفصل السابع وأربعون 47 - بقلم Zahra_Alhussnawy

اشعر انني اريد ان اقول لك فقط احبك
ومن ثم ابكي
ابكي لانها تعبر عن الكثير
ولانها تختصر الكثير
ولأن الاطفال حين يعجزون عن التعبير يبكون
ويرددون كلمه واحدة غير مفهومه ومبهمه

لارا،رجف گلبي موحب وانما مااحبيت اسمعها من شخص غير راهب
مجاي اگدر اشيله من بالي لااني ناسيته ومكمله حياتي ولااني الراجعتله وناسيه كلشي

صرراع بين كرامتي وگلبي
واحد اقوئ من الثاني
كل مايحن گلبي كرامتي توگفه عد حدة وتذكرة باانتقامه وبطعناته. وضربه تخلي غصب عنه يقسئ

كلام همام خلاني اغير نظرتي اله ماصرت اشوفه ك صديق لذالك فضلت الابتعاد احسن اله والي
لان اني نفسي موفاهمه روحي ولافاهمه شنو اريد بالضبط
راهب خلاني عاجزة تماما حتئ لو مفكرة ارجعله مجرد من اتذكر ضربه اتراجع

ثاني يوم داومت اتعمدت ابقئ بالقاعه مااريد اطلع واشوفه

انتهت المحاضرة الثالثه واني بعدني علئ گعدتي اجت بسمه حاولت وياي حتئ نروح للنادي گتلها مالي خلگ خليني هيج مرتاحه

وره كم دقيقه رفعت راسي اتفاجئت بدخول همام للقاعه اكو كم بنيه اباوعلهن صافنات علي من دخل وهو ماشاءالله هيبه بكل معنئ الكلمه

وكف فوگ راسي حط ادي ع الرحله دنگت
همام،،هذا جوابج?

لارا،،همام منا بنات رجاءا

همام،،جاوبي

لارا،،گلبي صار يدگ سريع ارتبكت مااعرف شجاوب والبنات يباوعلي مااريد كلمه تجيني واني ماناقصه مشاكل

طول سكوتي الساني انعگد

همام،،هذا هو وصل جوابج

لارا، ،تركني وطلع. اتحسه راح ينفجر من العصبيه
صارلي 4اشهر من اتعرفت علئ همام اول مرة اشوفه هيج عصبي

كمل اليوم ماشفته ابد
مرن يومين وهو لايتصل ولاحتئ اشوفه بالكليه
من صدگ افتقدته ك صديق افضفضله بنهاية اليوم الاشياء التغثني
كان متفهم ويشرحني بدون مااحجي كانه دارسني دراسه مفصله

مرتين اتصلت ميجاوب
دخلت علئ بروفايله ناشر مقاطع مال هوسات واهازيج عراقيه لمناسبات مختلفه
ومن ضمنهن قصيدة المرتضئ حرب
كاتب جواها

روحي درب مامسحوگ
وبس المثلي يندلني

اكو صوره اله لابس زي عربي يلوگله اليشوفه يگول عمرة جبير مومال طالب مرحلة رابعه

دزيتله رساله

موعلئ اساس اصدقاء?

بسرعه طلع عندي مرئي يطلعلي جاري الكتابه
بس ماكو كلام يوصلني عرفت يكتب ومتردد يدز كلامه

اخر شي دز

همام،،شتردين لارا?

لارا،،اريد اشوف همام اليضحك دائما

همام،هذا هو يجرالج التردي

لارا،،وليش تحجيها من ورة خشمك?

همام،،لارا اذا تعزيني خليني ساكت مااريد احجي وتالي اخسرج

لارا،،اوك براحتك

همام ،اي اشلونج?

لارا،،بخير الحمدالله انته اشلونك?

همام،،اذا تردين اجاملج راح اگلج زين

لارا،،مااحب المجامله

همام،موزين ابد

لارا،،جريت نفس موناويه اخسرة حلوة صداقتنه
گتله ماافيدك

همام،،وحدج اخذتي هذا القرار وگلتي ماافيدك?
شمدريج باليفيدني انتي?

لارا،،بعدك شاب الف وحدة تتمناك

همام،،واني اتمنئ بس وحدة الي هي انتي ماريد الالف

لارا،،،هم انحرجت مااعرف اجاوبه

همام،،ضلي ساكته احسن

لارا،،ليش ماتجي للدوام مثل قبل?

همام ،ماضل شي وماراح تشوفيني ابد

لارا،،شنو قصدك ?

همام،،ماكو شي مهم
اخذي راحتج لارا

لارا،،تركني ونهئ المحادثه
اتمنيت نبقئ هيج اصدقاء بس هاي لعنتي دائما اخسر الاحبهم
وخاصتا ثقتي دائما انصدم بالشخص الاقدمها اله

ثاني يوم صادف جمعه ضليت نايمه
الساعه ب 4محمد گال حضرن روحجن اخذجن للامام الكاظم عليه السلام

صدگ فرحت لان ماطالعه حدي للكليه وبس
لبست بنطرون وفوگه تيشيرت طويل لفيت حجابي ولبست حذاء افلات

امي لكيتها طالعه گاعدة بالسيارة تنتظرني
اخذت عبايه وياي لان الينطوهن بالامام اكبار اضل اتعثر بيهن

اني وامي دخلنه من جها ومحمد من الجها الثانيه
ردت اشكي همي وحدي بعيد عن امي
رحت گعدت يم الشباك لزمته وبجيت

گتله ياالله بحق صاحب المكان عندك
تشيل حب راهب من گلبي اطلعه نهائيا وتخليني انساه

صرت اناشغ بالبجي گوة احجي
اتمتم بكلام بيني وبين نفسي
كملت الدعاء لگيت الساني يلهج  بااسم الله طول ماجنت گاعدة الساني لااراديا يردد اسم الله
ياالله ياالله ياالله

طلعت برة واني اردد الاسم باوعت اكو مرة كاعدة ويمها كم مريه يحجن وياها
عبالي عائله تزور
رحت گعدت قريبه عليهن

المرة صايرة گبالي كل شويه ترفع راسها تباوعلي
بيدها قلم اورقه
كل ماترفع راسها تباوعلي بقهر ادنگ اتهز راسها بااسئ كانه مقهوره عليه
اخر شي اشرتلي بمعنئ تعاي

گمت كعدت كدامها

ابتسمت بوجهي ابتسامه تريح النفس وجها فره مثل منگول من اهل الله مبين عليها انسانه خيرة

سالتني

المرة،،شسمج خاله?

لارا،،دنگت گتلها لارا

المرة،،اسم امج

لارا،،سعاد

لارا،،فتحت ورقه بيضه مابيها خطوط كتبت اسمي واسم امي رجعت سالتني انطيتها مواليدي

كل ماتكتب ارقام وحروف متقاطعه تهز براسها بقهر
طلعت من كل حرف من اسمي حرف ثاني

اخر شي اتكونت كلمه من اسمي واسم امي ومواليدي

شالت الورقه خلتها گدامي گالت اقري

مكتوب جوة الاسماء

عمل شيطاني بفعل البشر

كزبر جلدي گتلها ش شنو هاي خاله?

المرة،،خاله اكو وحدة من المايخافن الله عينها علئ زلمتج وهي المسويتلج العمل بااثر منج

لارا،،و وشنو الاثر?

المرة،،شال من ملابسج ماخوذ منج بدون ماتدرين

لارا،،اتذكرت الشال اللبسته بيوم عقدي اني وراهب
من دخلنه اني وياه للاستقبال جرة مني وشمرة من دخلن غزل والمرة الثانيه الي جانت المفروض اتكون عمتي بعد مالگيته شگد دورت بس اختفه

اي اكيد غزل منو غيرها

المرة،،اي يخاله ماخذة هدمه من اهديماتج مسويتلج بيها عمل شيطاني الله يكفينه شرها
وهلعمل دافنته بالمقبرة
مخليه حياتج معلعله تحجين شي وتسوين عكسه
مثل منگول متناقضه بااتخاذ قراراتج ومامرتاحه ابد

بس اسالج سؤال

انتي شمسويه لبو فاضل وهلگد واكفلج?

لارا،،ارتعد جسمي رجفت واخذني العرگ
گتلها ش شنو يعني?

المرة،،جاي اشوفه فدوة لسمه واگفلج بهواي مواقف ومخلصج من مشاكل
الدرجة اليضلمج اليوم ثاني يوم يسطرة العباس

بجيت مااتحملت كلامها اكبر من استيعابي
منو اني حتئ يوگفلي سيد شباب اهل الجنه العباس فدوة ل اسمه
رجعت سالتني گالت ماجاوبتيني علئ سؤالي شمسويه وهيج واكفلج بالشدات?

حجيت من بين دموعي جسمي كزبر
گتلها من اروح ل لكربلاء وازور
اول ماازور الامام الحسين عليه السلام
ابتسم من اشوف ضريحه تحسين الحسين گلبه بارد ومن تحجين وياه ماتخافين تحجين براحتج ومبتسمه
بس من اروح ازور الامام العباس ازورة مدنگه وخايفه كانه جاي يشوفني
اخاف منه وابقه مدنگه مااگدر ارفع راسي
احبه كلش واخاف منه كلش لان العباس بالحگ مايتفاهم من هذا سمو ابو راس الحار
حتئ من جنت طفله واسمع من اهلي بمعركة الطف
اكو جانت عدنه صور للامامين شفايفهم مفطرة من العطش
جنت طفله فهمي علئ گدي
اترس الگلاص ماي واخلي يم الصورة ع الميز
كانه يباوعولي
احجي وياهم بصوت ناصي

اگلهم جبتلكم ماي اشربو واذا متگدرون اتشربون گدامي اني حطلع واشربو وراي

مرات اجي الگه الكلاص نصه مي افرح واخبص البيت اگلهم شربو بعد مايعطشون
ابوي يگلي بابا والله اني شربته
اگله لا همه شربو لتجذب عليه

صرت احلم بيهم اهواي
كبرت واني اهابهم

المرة،،اسمعي يمه امهات الردة والمايخافن الله اهواي
ويهجمن بيوت غيرهن
اني من زمان اتعلمت شغل الطلاسم من امي العلويه

ماناخذ افلوس لان ناذرين ادينه لوجه الله تعالئ

ماراح انطيج بخور ومن هاي السوالف
راح انطيج علاج اقوة من كلشي

اكتبي سورة  (ماجئتم به السحر أن الله سيبطله ان الله لايصلح عمل المفسدين )صدق الله العظيم
ماكو علاج احسن من كلام الله اكتبيها ييمه وشيليها حرز بصدرج وراح ترتاحين انشاءالله
ماعدنه غير الله واهل بيته نستنجد بيهم من اليسون اعمال السوء الله يكفينه شرهن
بس طريقج طويل بنيتي راح اتعبين وتصادفج اهواي عثرات
خلي ايمانج بالله قوي وانشاءالله تتجاوزيهن

لارا،،جريت حسرة گتلها خاله يعني اكو بعد عثرات اكثر من الشفتهن ?
المرة،،گولي يالله بنيتي ربج مايسد باب اذا مايفتح باب وبعدين جل جلاله يگدر بعضمته يقول  للشي كن فيكون يعني بدل ذني العثرات الشفتيهن راح يخلي بدربج السعادة انتي بس اتفائلي مويگولون
تفائلو بالخير تجدوه

لارا،،ونعم بالله
ارتاحيت بكلامي وياها امي جوة بالامام تصلي لهلها ولبوي
طلعت امي كتلها اني حروح للحمامات اغسل وارجع خليتها تگعد تنتظرني بين ميخلص محمد يضل يصلي لبوي ويهديها اله

رحت للحمام دخلت من ردت اطلع انضربت بمرة بس الصدمني من شفتها

غزل

غزل،،اشلونج لارا?

لارا،، لابسه ملابس مال عاملات النظافه اتذكرت راهب گال تشتغل بالتنظيف بالامام الكاظم عليه السلام
غمضت عيوني بتعب گتلها سؤال

ضميرج مرتاح?

جرتني علئ صفحه حتئ النسوان ماتسمعنه
دموعها بعينها شالت طرف حجابها مسحت وجها

غزل،،لاوالله مامرتاح

لارا،،شالي عندج مو?
فتحت عيونها متفاجئه ماتعرف تحجي
دنگت غمضت وهزت راسها بمعنئ اي

گتلها مااذيتج بشي رغم انتي كتلتي طفلي مافكرتي يمكن اموت وياه بااعشابج الجبتيهن
بالعكس صرت ابجي وياج من مات ابنج

وغير كل هذا اطلعين مسويتلي عمل

غزل،،والله هلشي صار من زمان من يوم العقد مالتكم جنت احبه مااتحمل انطي الوحدة غيري
اول شخص واخر شخص لمسني راهب
فتحت عيني علئ عيشه وصخه لاام لااب لااخ يسندني ويحميني انولدت واني صفر بالحياة مالي احد
حبيت راهب حب بس الله يعلم بي ماانكر جان يمي وباله يمج وادري يحبج مايحبني مجرد نزوة لوعلاقه عابرة اني بحياته اهواي حاولت وياه بس مافاد بقه متمسك بيج مالگيت حل غير اتبع طريق الشيطان نسيت الله وعقابه

سامحيني لارا امانة الله ورسوله تسامحيني
طلگت الدنيه من يوم الطلگني راهب
ونذرت روحي وخدمتي لهل البيت عليهم السلام في سبيل يشفعولي بيوم الحساب

لارا،،تحجي وتبجي جريت نفس طلع من روحي انقهرت عليها شگد اذتني بعدني اتمنالها راحة البال
وفعلا اتاكدت من كلام المرة بخصوص الشال وطلع كلامها صحيح وبنفس الوقت الصدفه جمعتني بغزل كانه الله سبحانه وتعالئ دزلي اشارة علئ صحة كلامها

تركتها وطلعت لگيت امي ومحمد مكملين وامي من بعيد الوادم سمعتها وهي تصيح نمتي بالحمام خو مانمتي خلتني اتفشل الزلم تباوع
محمد كالها روحي صيحي بالسماعه بعد

رجعنه للبيت بعد مااتعشينه محمد عشانه بمطعم
موبايلي تركته من طلعت مابيه حيل اضل حايرة بي بالامانات

لگيت 12مكالمه من راهب
ورسالتين

راهب(بس گولي الو خل ارتاح)
(والله عطشان علئ صوتج ارحميني وجاوبي
هاي بدل مااني ازعل واعاقب تالي انتي تزعلين ?
والله احبج واغار عليج ومااسمح ال اي شخص كائن من يكون يتجرأ ينظرلج نظرة وحدة )

رجعت تعبانه مابيه حيل حتئ الروحي وضل كلام المرة يفتر براسي
ماادري ليش زاد حقدي علئ راهب لان هو الدخلها الحياتنه جابها علئ اساس خالته
قارني بيها ونزلني المستواها
صح تابت
بس بعديش?
بعد مادمرت الكل

الاحد داومت من وقت صارت بيه خوفه لايرزلني استاذ عمار لان من يوم الرفضته شاد وياي
مااعرف شنو غايته بس المهم گدرت اوقفه عند حدة

مااريد احمل خطية زوجته اتحمل يهيني ولااتحمل دعوة منها بظهر الغيب عليه ادمرني بدموعها اكثر من. مااني مدمرة

انتهت المحاضرة مال التصميم وطلعت للنادي اتريگ اجه عصام وبسمه گعدنه كلنه نتريگ سوة

مر همام وياه شاب ثاني كعدو گدامنه رفعت راسي صارت عيني بعينه غمض بتعب ودار وجها

عصام راح واحنه ضلينه
بسمه،،ولج هاي ندئ كاتله روحها علئ هذا الشاب وهو ولامعبرها

لارا،،ياندئ،?

بسمه،،طالبه بمرحلتنه هم جديدة زحفت لمن اتگشطت اركبها خطيه وهو ولامعبرها هههههه

لارا،،ههههه ضحكت وباوعتله خزرني ودار وجها
راح الشاب واجت بنيه ضلت تحجي وهي واگفه تالي جرت الكرسي وگعدت

بسمه، ،ابن الحلال بذكرئ هاي ندئ والله لزكة الرجال شارد وهي لاطشه فرد لطشه ولاتستحي

لارا،،اباوعله ولامعبرها طول ماجانت تحجي عينه الجهتي
اشرتله بعيوني عليها گوة كاتمه ضحكتي
رفع حاجبه بااستهزاء

اتصنعت الابتسامه واشرتله علئ حلگي بمعنئ ابتسم بوجه الابنيه  خطيه
اباوعله فلتت منه ضحكة بطرف شفته

الابنيه مستمرة تحجي وهو ساكت واصلا مامهتم الها
شويه واترخص منها گام مر من يمنه كفخنه عطرة

بسمه،،خرررب يمكن سبحان بالعطر

لارا،،العبرة خنگتني نفس عطر راهب
ااخ ياراهب خليتني متناقضه بتفكيري بيك ساعه اكرهك وساعه احن صرت مااندل راسي من رجليه بحبك

انتهئ الدوام رجعت للبيت انتهئ النهار واني مخلصته بين نوم وقرايه بليل صعدت الغرفتي بعد ماكملت غسل المواعين

حبيت اتشاقه ويه همام مااريدة يزعل مني
كتبتله
ليش مغلس علئ ندواي ?

تأخر بالرد بعدها ظهر عندي مرئي
دزلي
همام،،اشم ريحة غيرة بسؤالج

لارا،،بسرعه تندمت اخذها بغير نظرة
ردت اجاوب دزلي

همام،،لتسكتين ترة اشاقه

لارا،،لا بس دا ادور علئ جواب مناسب

همام،ماجاوبتي علئ سؤالي ذاك انوب تردين تجاوبين علئ هذا

لارا،،عرفت يقصد من طلب ايدي

همام،،الي يوم انجلط من وراج

لارا،،ابتسمت كتبتله ليش?

همام،اهواي تسكتين

لارا،،اتذكرت راهب من يسميني الخوينسه
بقيت ماجاوبت الدمعه بعيني ليش جاي اقارن كل تصرفاته بتصرفات راهب?

همام،،هم سكتت اااخ الله خليها سكته لااحجي حجاية تهد الجبال

لارا،،صدك ليش هيج ويه الابنيه مبينه معجبه كلش

همام،،خوش لفتي السالفه
المهم راح اگلج شغله
لوعلئ گص رگبتي مااضحك علئ اعراض الناس
لان كلشي ولا العرض ويجي يوم كما تدين تدان ومثل ماضحكت علئ بنت الناس يجي يوم ينضحك علئ عرضي ربج مايحارب بحجار
بيوتنه كلنه من جام مثل مااشمر بيتها يجي يوم انتظر تنشمر الحجارة علئ بيتي وتهدمه

لذالك كلشي ولااعراض العالم

لارا،،عجبني كلامه وكبر بعيني گتله كون كل الشباب مثل تفكيرك جان الدنيه بخير

همام،اي كليلي شو ناصبه ع الابنيه?

لارا،،لاوالله ماناصبه بس مبينه تحبك
اذا خوش بنيه مابيها شي اذا اتقدمت الها

همام،،صدگ تحجين?

لارا،،والله

همام،،وگلبي?

لارا،،اشبي

همام،،عمرة مراح يكون الها
بيه طبيعه اذا اريد شي لازم احصله
وخاصتا بالحب اكون اولااكون

لارا،،اووو اليوم صاير نزار القباني

همام،،هو اليشوف عيونج بعد حتئ مايوجد دربه

لارا،،خجلني بكلامه ماجاوبت گتله تصبح علئ خير

همام،،الخير يبدي من اصبح بوجهج
باي

لارا،،ثاني يوم داومت قبل ماادخل للقاعه شفته من بعيد
اجه بااتجاهي يمشي عينه مني ايده بجيبه ومبتسم
ارتبكت تالي عبر من يمي وراح للقسم مالته

اباوع البنات يردن ياكلنه بعيونهن من صدگ شكد مااوصف شخصيته ماانطيها حقها
سبورت
كشخه
هيبه
مرح
شخصيه قويه
كل المواصفات التتمناها اي بنيه منجمعه بي

بس ابد ماباوعتله بنظره اكثر من نظرتي اله كصديق
بس ردت اوصل الفكرة عن شخصيته لااكثر

بنهاية الدوام طلعت شفته واگف بالممر مال  الجامعه يريد يطلع بعيد عني بمسافه بعيدة

وگفت اباب الجامعه انتظر الخط
وگفت سيارة عاليه رفعت راسي انصدمت ثگل الساني وارتعد جسمي

ر راهب?

نزل بسرعه من سيارته اجه بتجاهي جرني من ايدي

راهب،،امشي ويااي

لارا،،عوفني لاالم عليك كل الجامعه والله
شنوو يووميه جاي ومجرجرني وراك كدام الطلاب ?
مسدسه بحزامه مد ايدة جرة خلا بخاصرتي

راهب،،وعلللي واصله حدها
اهنا اكتلج واكتل روحي وياج اصعدي ولتختبرين صبري

لارا،،التفتت للجها الموجود بيها همام واگف ملتفت علينه يباوع الجهتنه من شاف المسدس اتحرك بااتجاهنه

بس راهب بسرعه فتح الباب ودفعني
اول ماصعد شخط السيارة بينه
باوعت بالمرايه الجانبيه شفته طلع يركض من باب الجامعه

يتبع،،،،قرائه ممتعه

نسينه الراحه من يوم الفگدناك
ونسينه ارواحنه بس ما نسيناك
رحت والخير كله راح وياك
عرفنه بقيمتك لمن خسرناك 💔