رواية راهب ابو غضب الفصل السابع وثلاثون 37 - بقلم Zahra_Alhussnawy

راهب، ،باجر عيد والگلوب تتصافئ بالعيد
اذا اتحبيني والي خاطر يمج عيديتي تسامحيني

لارا،،تركني وطلع گعدت جسمي يرعش
اجتني رساله منه

راهب،،نسيت اگلج اذا گلبج حن اريد اشوفج باجر بهذا السيت

لارا،،بقيت صافنه ع الرساله وبگلبي اگول هو اني اوگف يمه بهدومي اگوم اختض انوب يريد البسله هيج لبس

ثاني يوم صبح العيد گعدنه من وكت نزل لابس دشداشه بيجي لاف الغترة لفه خليجيه
بدون وعي فتحت حلگي
هيبه وشخصيه بكل معنئ الكلمه

اتلاحگت روحي درت وجهي
اجه جر راسي گدام اهله باسني

راهب،،المفروض انتي تعيديني
بس ياالله ميخالف انتي الجبيرة
ايامج سعيدة ام بيتي

لارا،،عايدته من بعيد گتله ايامك سعيدة مد ايده گال سلمي
وبوسيني مو اتشمرين الحجايه من بعيد

مديت ايدي صافحته جرني ردت ابوسه بخدة
التفت فجاة اجت البوسه بشفايفه گدامهم

ردت اطگها بجيه ضرغام يصيح موگدامنه خاال
وهو يضحك ويغمزلي يگله توني حسيت اكو عيد

بدو يجون جيران الحجيه يعيدوها ومن ضمنهم ام قاسم عرفنه منها اتحدد موعد العرس بعد عشر ايام
سارة مااجت لان امها يجوها خطار يتحمدولها ع السلامه بعد رجعتها من ايران ورحلة علاجها
اتصلت بيها عايدتها وعايدت اهلي
اتمنيت اروح بس راهب گال اخذج ورة العيد
،،،،،،،،،،

سارة

اتحدد موعد الزواج وگلبي من الفرح صاير يدگ طبول واخيرا راح يجمعنه بيت واحد اتمنئ اگابله واگعد
حمدت الله وشكرته الف مرة انو حصلت علئ الشخص الحبيته طول. عمري واندعيت الكل ابنيه تنجمع بالشخص الي امتلك گلبها

باجر عيد متت قهر لان ماراح اروح البيت عمتي واكحل عيني بشوفته لان ماما رجعت من السفر وناس تجي تشوفها

بليل كاعدة بغرفتي مخليه صورته خلفيه اربعه وعشرين ساعه مكابلتها لو گدامي هو بالحقيقه جان صااح كااافي ورمتي وجهي من بوساتج

اجاني اشعار ع الفيس دخلت شفته ناشر صورته
لابس بنطرون اسود وقميص ابيض كاعد بالسيارة فاتح الباب ومخلي رجل بالگاع
الصورة كلش حلوة اشتغلت التعليقات واكثرهن بنات هاي التگله منور وذيج تتغزل بهيبته وشخصيته
اوحدة اتگله فديت الطول الحلو
وهو يجاوبها موبحلاة عيونج

احس الدخان صار يطلع من راسي لويمي املخهن وحتئ هو اعضه علئ حرگة گلبي

دخلتله ع الخاص

قاسم احذف الصورة

قاسم،،هله بختيبتي اليوم داخله حاميه الله يستر

سارة،،قويسم شيل الصورة لااشيل روحي واطگها بالگاع

قاسم،،اشتعلت صفحة ابو الصورة غير افهم شكو?

سارة،،احذذذف الصورة

قاسم،،شكووو

سارة، ،گتلك احذذف الصورة

قاسم،،غير افهمم شكوو

سارة،،حتخلصهاا شكووو وشكوو
بعد هوس علئ حضي وارگص علئ انشقاقات الصف النسوي

قاسم،،غير افهم شكو ياحبيبتي
شو الصبح جنج العافيه كلشي مابيج واذكر من اتصلت بيج جانت الاجواء بيناتنه ورديه
اكيد اتحسبين الايام حتئ ننجمع بعشنه الزوجي

سارة،،هسه اتگلي شكو اباالك?

قاسم،،بالرضا وبالخوف بس انتي ابالي وماكو احد غيرج بس فهميني شكو?

سارة،،هسه اتشيل الصورة

قاسم،،هاي صورة وطلعت جذورج الشريرة لومعلق شتسوين?

سارة،،ايباااه علئ اساس مامجاوبهن
فدوووه الطولك الحلو وانته مجاوبها موبحلاة عيونج

اانته وين شايف عيونها حتئ تتغزل بيها ابو النسوان

قاسم،،ترة هي كلمة التنگال جاوبت الابنيه ماكتلها جاي اخطبج

سارة،،بنظري گتلهاا

قاسم،،هااا

سارة،،الطم?
يالله روح شيل الصورة

قاسم، ،مااشيلها وتعليقي واني حر
وبعدين الدستور يكفل للمواطن حرية التعبير

سارة،،هسه تحذفها

قاسم،،فشله قبل ساعه خليتها
وبعدين اذا ماسكتي اخذها عليج لان الشرع محلل ثلاث ورباع واني رجال خير متدين مااترك فرض من فروض الدين ومطبقهن بالحرف الواحد

سارة،،اليسمعك مايگول ضام البطل جوة الجربايه ابو الدين وبعدين صوم عدل ياالله تحجي بالدين

قاسم،،اشبي اصيامي ولج?

سارة،،ل 12واتضل اتفك بحلكك عبالك عصفور هافي بمصيادة
وبعدين مابيك حيل اتكمل صيامك للمغرب بس بيك حيل تاخذ مرة ثانيه?
قاسم،،المهم النيه معليج بالصوم
واذا يبقئ هيج السانج اخذهن كلهن فوكج

سارة،،ابو الشرع شيل الصورة من شالو اجنازتي كون

قاسم،،لش حبيبتي تدعين علئ روحج وباجر عيد مافكرتي شصير بيه اذا انتي اتموتين?

سارة،،مايصير بيك شي عندك ثلاث ورباع غيري

قاسم،،صح ذكرتيني

سارة،،يعني مالك نية تشيل الصورة?

قاسم،،الي نيه اگضي العمر كله وياج ،نيتي من افتح عيني الصبح اشوفج اكبالي
صدگيني احبج انتي روحي وحياتي وقارب يسافر بيه لاجمل شواطئ
واوعدج من هاللحظه حتئ الفيس راح احذفه مااريدج تفقدين الثقه بيه

سارة،،شيل الصورة وبعدين احذف الفيس

قاسم،،طيح الله صبغج عبالي اتكول لتحذفه
صار ساعه سحلت روحي بالغزل وانتي قافله ع الصورة الگشرة

سارة،،شيل الصورة احسن الك

قاسم،،شلتها الصورة المهجومه من انهجمت علئ راسج كون

سارة،احبك حبيبي

قاسم،،خبله والكعبه

،،،،،،،،،،،
لارا،،انتهئ العيد واقترب موعد زواج سارة وقاسم اليوم ثلاثاء باجر الحنه والخميس الزفه

راهب اخذنه اني وفاطمه الشارع الروان فاطمه گالت ملابس بي كلها راقيه وحلوة
عجبني فستان بنفسجي قصير للفخذ حصر ع الجسم
وبي فيكة تتشكل فوگة تخلي يبين منفوش
كلش مرتب اخذت حذاء وجنطه وكم شغله
فاطمه اخذت فستان محجبات لون شذري
راهب قبل مندخل للمحل انطانه كل وحدة ثلث ورقات لان فاطمه گالت شارع الروان معروف غالي ملابسه كلها غاليه واني اصلان ماردت اخذهن عندي افلوس لان ماصارفتهن لاطالعه ولاماشيه وين اصرفهن

كملنه وطلعنه راهب ينتضرنه اباب المحل لان بس بنات مادخل ويانه

ثاني يوم صادف الحنه وام سارة سوتها بالقاعه لان عازمه اهواي نسوان
الظهر سبحت وسرحت شعري خليت مكياج خفيف
جريت عيوني بالكحله رسمتهن برز لونهن ويه سواد الكحل

باوعت الروحي بنظرة رضا ردت البس حجابي
حتئ نروح المرة عازمه ع الساعه 3 ونص وهسه ب 3

سمعت صوت موبايلي شفته راهب يتصل جاوبته

راهب،،اذا كملتي اطلعي راح اوصل للبيت

لارا،،ماادري بي طالع كتله اوك

راهب،،خو لبسج مومعرين?

لارا،،ها

راهب،،مادام صار بيها ها يعني السالفه مليوصه انتظريني اجيت

لارا،،سدة بقيت افتر ردت اطلع جبه البسها فوگ الفستان

انخبصت وضاعت الجبه من گدامي
انفتح الباب ودخل جمدت بمكاني واني اشوف نظراته تتفحصني من فوك لجوة بلعت ريگي وعيوني بعيونه سد الباب
واجه يتقدم ب اتجاهي بكل هدوء

اتراجعت خطوتين لورة لطشت بالكنتور وهو عيونه علية والربكني اكثر من شفت عيونه اشلون تتفحص لبسي

راهب،،تردين ترحين هيج?

لارا،،ل لا ااي مو ردت البس جبه فوگه

راهب،،وجدام النسوان اتذبين الجبه واتضلين هيج مو?

لارا،،هزيت راسي بمعنئ اي

راهب،،اني مشتعله صفحتي بحصرة اشوفج تلبسيلي هيج لبس عبالك حرام وجدام النسوان حلال?
لارا،،رفع وجهي ب اصابيعه دكات گلبي فضحتني

راهب،،شنو من گلب عندج?
تشوفيني محترگ وبيدج الماي مايحن گلبج واطفيني?

لارا،،بقيت ساكته ونفسي سريع من يكون قريب مني اتيه الحجي وينعكد الساني
اقترب بكل هدوء طبع قبلاته

تهت وياه بعالمه بادلته بدون وعي ماصحينه اثنينه غير علئ دگة الباب طفرنه

فاطمه،،ياالله يمعودين خلصت الحنه

لارا،اباوعله يمسح بگصته يسب ويلعن بالحظ
اتقرب يم اذني حجه بصوت ناصي

راهب،،مابيها مجال بعد بليل اريدج كلج الي

لارا،،رجعت معدتي مغصتني بسبب كلامه
راهب،،ولج حني عاد قاسم راح يخلف واني بعدني اتوسل

لارا،،ابتسمت جر راسي باسه سحب نفس بقوة
راهب،،ياالله بويه البسي شي فوگ الطرگاعه اللابستها خل نمشي گبل لااحبسج وانعل ابو قاسم لابو سارة وياه

لارا،،ضحكت وهو طلع لبست جبه خفيفه وفوكها العبايه
نزلت لكيت عمتي وفاطمه ينتظرني عمتي وجها موراحه تضحك وتغمز خلتني غديت ماي من الخجل

اخذنه للقاعه نزلنه وهو راح
دخلنه شفت اهوواي نسوان ماكو مكان نگعد
بس بعدها العروس بالصالون
شويه وجابن سارة ام قاسم وامها
طالعه اتخبل بالبدله رحت يمها بوستها
من دخلت ذبيت الجبه والحجاب والعبايه انطيتهن العمتي رگصت گدامها وهي تضحك گتلها فكيت ديني

للعصر يالله رجعنه وراهب ماشفته ملتهي بالتحضيرات ويه قاسم
بليل اجه سبح بسرعه بدل لبس دشداشه
ورجع للحنه

ام راهب،،گومن البسن اعبيجن انروح يم ام قاسم

فاطمه، ،يمه منين نطلع ماتشوفين السيارات سادة الشارع والزلم شكثرها

الحجيه،،البسن اعبيجن واطلعن وراي نمشي بصف الحايط محد يشوفنه وبعدين ماراح نركص بالشارع شو لابسين عباياتنه ومدنگين اكيد هسه جاراتنه راحن واني بعدني فشله من ام قاسم

لارا،،لبسنه عباياتنه وطلعنه وراها زلم واكفه اباب بيتهم ومن ضمنهم راهب بس شافنه اجه بسرعه

راهب،،شطلعجن?

الحجيه،،يمه سويلنه درب خل انفوت

راهب،،امشن وراي ودنگن روسجن وحطن اعبيجن من جهة الزلم

لارا،،فات هو واحنه وراه مدنگين دخلنه للبيت يالله راح مخلين بردة بنص الكراج كدام المطبخ حتئ ماينشافن لان الزلم بالحديقه

بدة مولد مال الشباب اتمنيت اشوف راهب اشلون يركص بس استحيت اگوم وياهن اتراكضن للسطح البنات واني وفاطمه بقينه مارجعنه غير لمن انتهت الحفله ب11

صعدت الغرفتي اخذت ملابس سبحت ورجعت
اتذكرت سالفه راهب من گال اليوم مابيها مجال خفت وركضت قفلة الباب ورجعت قفلت الموبايل خاف يتصل

ب12سمعت دگات خفيفة ع الباب بقيت ساكته وجسمي يرجف خايفه مرة مرتين ابتعد من حس بيه مسويه هلشي متعمدة

ثاني يوم صادف الزفه لبسنه لبس مستور ورحنه البيت ام قاسم انتظرنه يجيبون العروس
اجت الزفه دخل قاسم طالع شخصيه بالقاط الاسود
الابتسامه شاگه حلكة يسلم ع النسوان لازم سارة بيدة هي وبدلتها مامبين شي منها مغطيها بالجادر

گعدها ع الكرسي راد يطلع وگفت امه گدامه تهوس باس راسها وايدها وطلع
رحت اتقربت يم سارة رفعت البركع عن وجها انصدمت من شفتها ترعش وتختض مثل السعفه الوجه لونه مخطوف
همست بصوت ناصي

سارة،،لارا راح اموت من الخوف

لارا،،ردت ابعد الخوف عنها كتلها هاي منو تحجي بالخوف?
موعلئ اساس انتي تاخذي واطلعين لهله ?

سارة،،لا من صارت صدك لاراح اخذة ولاياخذني

لارا،،ههههههه حتئ يكتلج

سارة،،لتخوفيني

لارا،،وين راح الحب سويرة المفروض تفرحين واخيرا راح تنجمعون

سارة،،موبيدي لارا ميته خوف

لارا،،جبت قران صغير محطوط ع الرف خليته بحضنها گتلها اقري حتئ يرتاح كلبج ويروح الخوف

فتحته وصارت تقرة شويه هدئت
اتعشت العالم واني ويه البنات ننقل اكل للنسوان

كملو وصار وقت الزفه سمعنه صوت الرمي اشتعل وضجت هوسات الزلم هلهلت النسوان
عدلت بدلت سارة وگذلتها لزمت ايدي ترجف

دخل قاسم باسها براسها عدل الغشوة علئ وجها اجت امه بيدها جنطه اخذتها للسيارة اخذ سارة وطلع للفندق اخذهم راهب زفو جماعته بس الزلم راحت وام قاسم واخواتها وعمتي وام سارة راحن وياهم بس البنات ماقبلو يرحن

رجعنه للبيت اني وفاطمه
ل 12هم نفس الحاله يجي يدگ الباب واني قافلته

ثاني يوم كعدت الصبح اتفاجئت بعمتي من گالت راهب التحق

وهو بعد يومين وتنتهي اجازته

رجعت للغرفه فتحت الجهاز اجتني رساله باوعت للوقت دازها البارحه بليل

راهب،،قافله الباب مو?

ورة نص ساعه يمكن ضهر عندة متصل بسرعه اتصل ارتبكت وخفت اجاوبه
اخر شي جاوبت اجاني صوته اليرعد

راهب،،اقفلي الباب مرة ثانيه وشوفي اشلون اشلعه

لارا،،سدة بوجهي قبل مااحجي تركته يهدئ مارجعت اتصلت
مر اسبوع وماكو بيناتنه لارساله ولااتصال ادري زعلان

من نزل مجاز اتفاجئت يضحك ويتشاقه يمكن نسه الزعل

مرت الايام وراهب ماكف عن محاولاته حتئ يرضيني
بس مااعرف ليش جنت نافرة منه من يبعد اشتاقله ومن يرجع ويحاول اسامحه اكرها من اذكر الصار

مر شهرين علئ زواج سارة وقاسم واني وراهب علئ نفس وضعنه حتئ الحجيه وفاطمه صارن يضوجن من يشوفنه يتوسل ويحاول اسامحه

ماضل غير عشر ايام علئ عيد الاضحئ اتفاجئت بكلام عمتي

الحجيه،،بنيتي لارا صارلج اربع اشهر عدنه وانتي وزلمتج نفس وضعكم كل واحد نايم بكتر
كافي ييمه ترة العمر يركض ركض وباجر نندم علئ ايام الزعل
الصار اعتبرو درس الكم اثنينكم افتحو صفحه جديدة علئ حب الله ابدوها

وهذا العيد الجبير جاي ماضل شي وخلو الزعل يولي واتركو كلشي ورة الله

لارا،،اهواي ضلت تقنعني وفعلا اقتنعت خلص لازم انطي زواجنه فرصه راهب اتغير واصار احسن بهواي من قبل حتئ صلاته ماكاطعها يعني اتغير للافضل

گتلها هذا هو عمه من ينزل مجاز يصير خير
جرتني باستني وهي تندعي الله يصفي الكلوب

الحجيه،، العصر اخذج للصالون رتبي روحج باجر يجي خل يفرح اوليدي من يشوف مريته تنتظره

لارا،،وفعلا العصر اخذتني بتكسي للصالون
شعري السواد واصل للنص
يعني الميش صاير بالطرف
گتلها سوي دانتيل طوخي الشكار بالطرف

كملت شعري طلع كلش حلو
حفتلي وسوتلي تنظيف بشره
عمتي كاعدة تصلي علئ محمد وام الصالون تضحك عليها اتكول مبينه عمتج فقيرة وتحبج

كملنه ورجعنه الطريق كله كل شويه وگالت غطي وجهي يلمع

ثاني يوم العصر الحجيه كالت زلمتج جاي بالطريق واصل الحلة

گومي وياي گمت وياها دخلتني الغرفتها طلعت علاگه جبيرة فتحتها واتفاجئت بالجايبته
طلعت منها سيت نوم ابيض قصير
وسيتات نوم اشكال والوان اتسعت عيوني
گتلها عمه شنو ذني?

الحجيه،،ذني صگارات الزلم

لارا،،ضحكت

الحجيه،،يمه هذا السيت الابيض البسي اليوم
صيري سباعيه اكسبي زلمتج ابدل واكشخ واتعطر وانعل ابو الزعل شحصلنه من الزعل غير القهر

الله بعضمته ويسامح منو احنه حتئ مانسامح ونغفر
گومي بنيتي اسبحي واترتبي حتئ من يجي زلمتج تتلگي بضحكة حلوة من يشوفها يروح التعب
ترة المرة الزينه هي الي تعرف اشلون تخلي رجلها مايستغنئ عنها

لارا،،مقتنعه ومامقتنعه خايفه واكبر خوفي انو انطي فرصه ويرجع يكسرني يمكن ساعتها اموت

سويت مثل ماگالتلي الحجيه سبحت ورتبت نفسي لبست اتراك وردي ضرغام راح لهله لان عطله
گال اسبوعين وارجع

صارت الساعه ب5سمعت صوت سيارته برة لوتني بطني واتملكني الخوف مرة ثانيه
دخل بالزي العسكري اول ماشافني ابتسم سلم ع الحجيه وعلئ فاطمه وعينه مني

راهب،،اشلونج بويه

لارا،،زينه كلتها واني مدنگه

رحت للمطبخ سويتله جاي لان گال متغدي بالطريق اريد بس جاي
اخذتله استكان ورحت اباوع الحجيه تبسبس وياه
راد يوگع الاستكان من ايدي لمن وصلت اباوع  للاستكان ربعه بي. جاي من كد ماايدي ترجف خلص بالطريق

راهب مبتسم ويمسح بوجها
شرب الجاي وصعد للغرفه كال راح اناملي ساعه

رحت يم الحجيه جرتني من ايدي

الحجيه،،بنيتي حضريلج جنطه زغيرة حطيلج كم شغله من الجبتهن الج

لارا،،ليش عمه??

الحجيه،،اليوم انتي عروس بنيتي وراح اوليدي يحجز غرفه بالفندق

لارا،،ردت اتخربط مجرد الفكرة ترعبني
مااعرف اشلون حضرت الجنطه وخليت بيها الشغلات. الاحتاجهن

للمغرب گعد دخل للحمام سبح وطلع
طلع الخاولي علئ متونه باوعلي وغمز

صعد بدل ورجع لابس بنطرون وقميص
العطر يهف لازم السحه والسويج بيد والايد الثانيه لازم موبايله

اني لبست فستان بيجي قصير ورتبت نفسي ماطوخت مكياج مااحب الطوخ
لبست حجاب وعباتي وكعدت يم الحجيه انتظرة

راهب،،يالله انروح

لارا،،گمت ورجليه وحدة اطگ بالثانيه اتقدم خطوة واتمنئ ارجع خطوتين لورة

طلعنه والحجيه ذبت ورانه ماي وتقرة ايات عبالك دازتنه للحرب
طول الطريق لازم ايدي والايد الثانيه يسوق
وصلنه الفندق مبين من شكله راقي

نزل ونزلت وراه بقيت واكفه علئ صفحه وهو يحجي ويه الولد انطا المفتاح والرقم اشرلي بمعنئ تعاي مشه واني وراه
وصلنه للغرفه دخلنه جانت كلش حلوة صدك مال عرسان حطيت الجنطه ع الجربايه ذبيت عباتي ونزعت حجابي بارتباك
صار وراي حضني من ظهري

راهب،،مامصدگ احس روحي بحلم مااريد اصحئ منه

لارا،،دارني علي يباوع بوجهي ويتامل تفاصيلي
احسه مامصدك

راهب،،انه نازل اجيب عشه لان ماناوي اطلع اليوم لو تحترگ العشيرة هم مااطلع واطفيها
عاد اجيب عشه لايكتلنه الجوع

لارا،،ابتسمتله گرص خدي وطلع

طلعت السيت ومترددة لان استحي البسه كان فاضح
حتئ الحجيه كارثه مثل ابنها
اخر شي استجمعت قوتي ودخلت لبسته

انفتح الباب ودخل راهب ترك الاكل علئ صفحه واجه بااتجاهي وبدون مقدمات لمني لصدرة

تجرّأت وتفرّدت ، بعثرتني وتبعثرت
لمَسَتني وتلمّست ، قشعَرتني وتقشعَرَت
قبّلتها فتقبّلت ، فقبّلَتني وتجمّدَت
حدّقتلي وضحِكَت ، لمعَت عينيها ، خجلَت
خانتني يداي فانفرَدَت ، رأت ذالك فارتمَت
حضنتها واحتضنَت ، عصرتُها حتّى اكتفَت
حملتُها "أنزلني" صرَخَت ،أنزلتها عادت و قفزَت
ركضتُ أبتعد عنها فخلفي ركضَت
صرخَت تُنادي"توقف"،توقفتُ لها
ضحِكَت وهربَت
جلستُ حزيناً أُخادعُها فرجعَت
نظرتُ إليها و كأنني بائساً فحزِنَت
لمعت عينيها من الدمع ، صدّقت
ضحكْتُ عالياً ، "أرجعتكِ سريعاً" ، انصدَمَت
شتمَتني محبّةً ، وغضباً ابتَسَمت
فردَت شعرُها ، تألّقَـت
جُنِنتُ لتألّقها ، خادعتُها ثانيةً وبئِسْـت
عادَت بشعرِها تطمئن ، ما إن أحتُضنت

تلك المجنونة ، أعضائي عَشقت
طفلتي ، الكبيرةُ مع غيري والعقل البَحت
نبضي وشريان دمي وعقلي المتثبّت
معلّمتي في الحُب ، فدونها ضائع انا ومتشتّت
أضحَكت عقلي فرحاً ، بفرح قلبي المُتبهّت
فقد استجمعتلي قلباً من بقايا قلبي المُتفتّت

انتبهنه للساعه صارت 2ونص بليل سبح وطلع واني هم سبحت طلعت لكيته مجهز الاكل
فرحانه وبداخلي ادعي الله يديم هاي الفرحه
اتمنيت حياتنه اتكون عاديه مابيها مشاكل بين اهلي واهله دعيت الله تتصافه الكلوب ويتركون الزعل علئ صفحه يمكن كلشي راح يصير حلو من يتراضون

راهب،،يالله مرتي همي ايدج كملي عشه
تعشينه يسوي لفات صغار وينطيني وكل شويه يجر ايدي يبوسها احس الفرحة ماسايعته

نام وفتح ايدة صاحلي تعاي
رحت اتوسدت اذراعه ضمني الصدرة حيل اتحسه يريد يدخلني بين اضلوعه

راهب،،وعلي اعز من روحي انتي اتمنئ افتح صدري وضمج يم گلبي

لارا،،اوعدني ماتتخلئ عني

راهب،،اكو واحد يتخلئ عن روحه?
لارا،،باوعتله صفح كتله اهواي حجيتها قبل

راهب،،اتخليت عنج?

رغم كلشي صار ماتركتج جبتج گدام عيني صح ابعاد ك زوجين بس مجرد شوفتج ابيتي وحدر اجناحي عندي هذا الشي يسوة الدنيه

لارا،،ثاني يوم الصبح رجعنه للبيت اتلگتنه الحجيه بالهلاهل والجكليت اتگول صدك عرسان
محضرات الاكل هي وفاطمه عبالك اكو عزيمه

للظهر جاي نتغدة دگ موبايله باوع للرقم وتركه بصفه بدون ميجاوب

مرة مرتين انعاد الاتصال تالي غلقه

الحجيه،،جاوب يايمه خاف ذوله ربعك بالدوام

راهب،،عوفيهم حجيه

لارا،،كمل غدة قبلنه اباوعله وجها مبين ضاج من صاحب الاتصال گلت خاف متعارك هو وقاسم وهيج ضايج

دخل للاستقبال وسد الباب اني وفاطمه نغسل بالمواعين انفتح الباب وطلع الوجه احمر دم شراينه بارزة عبالك يريد ينفجر

جر السويج من الميز اخذ موبايلاته راد يطلع

الحجيه، ،شكو يمه خير شصاير?

راهب،،حجيه شغله ضروريه لازم اطلع البغداد
خاف اتاخر لايضل بالكم
راد يطلع من باب المطبخ صاحلي
جرني الحضنه باسني بقوة بدون ولاكلمه

طلع والخنگه احتلت صدري دخيلك ربي البارحه كلشي ماكو شنو صار وخلئ هيج انكلبت احواله

بليل انتظرته ل12ماكو اتصل بي جهازة مغلق
تالي عمتي من خوفها اتصلت بقاسم گالها هذا يمي بالشقه مالتنه اجه تعبان غلق جهازة ونام ليضل بالكم

من اطمنت علي يالله ارتاح گلبي
رحت هلمرة نمت بفراشه اشتم عطرة دمعت عيوني اشفت منه غير بس البارحه

ثاني يوم اتصل بعمتي كالها التحقت لايضل بالكم استغربت ليش مااتصل بيه?
اتصلت اني يطلعلي مغلق زادت حيرتي وخوفي
اسبوع وراهب ماكو لااتصال ولامكالمه ليش وشكو محد يعرف السبب
احس روحي اتمرضت عشت بقلق نفسي اريد اعرف السبب
اتذكر كلامة بيوم الاخذني للفندق معقولة كله كذب؟؟

سابع يوم جنت گاعدة بالحديقه يم الحجيه العصر
بيدها سجينه صغيرة تشلع بالحشيش الطالع ويه الورد مضيع شوفته

انفتح الباب ودخل راهب الوجه تعبان احس گلبي فز قبل عيوني طفرت من مكاني مشتاقتله اريد بس اشمر روحي بحضنه رحت ب اتجاها مسرعه خطواتي

فجأة ثكلن رجليه وكلشي افتر داير مدايري مثل صفعه قويه اجت علئ وجهي الساني ثگل
وعيوني متشخصه ع الواگفه وراه

همست بصوت يرجف
غ غزل