راهب ابو غضب الفصل الخامس وثمانون 85 - بقلم Zahra

راهب ابو غضب

للكاتبه زهراء الحسناوي

..............................................

شعلامه الشيب مابطل وكاحاتي؟؟

استخف من اوصل الحضنج ❤️

................................................

لارا كعدت يمه شال ايدي حطها بشعره
اعرفه يرتاح من امسد على راسه

راهب،، تعبان

لارا،، تقربت منه اكثر وكل شويه ادنك ابوسه بشعره واسحب نفس ترس روحي
لازم ايدي ومغمض بقيت يمه ماطلعت لمن ثگلت نومته ودار وجها للجهة الثانيه يالله تركته وطلعت نزلت يم البنات

احلام واختها زينه تصرفاتهن صارت وياي
بس مااعرف ليش ابقى مبتعده عنهن يمكن لان طبعي ماانسئ الاذيه بسرعه ف ابقى بعيده منهن

صح مامقصره وياهن بس علاقتي بيهن مومثل علاقتي بفاطمه

مرت الايام وراهب على وضعه ويوميه الصبح يروح للمقبره يم عمتي يبدل ملابس الدوام ويطلع اول مايمر بيها ياخذ قران بيده ومناك يطلع للدوام

زرع نبگه يمها وبنه فوگ القبر سقفيه كلش كبيره عن الشمس بالصيف وعن المطر بالشته

سأل الساده عن الاشياء الازم تتسوه للميت وفعلا دفع رد مظالم واهواي اشياء سوه بثوابها يكول شسوي احس روحي مقصر لان جابتها تعب بتعب في سبيل توفرلنه طلباتنه واحنه زغار

بيوم الاربعين انگلب الشارع گلاب بالناس لان الي مااجه بالفاتحه اجه بالاربعين يستحون من راهب لان من ماتت عمتي ماجو اخذو بخاطره

ف ذبح ذبايح بثوابها وام قاسم واخواتها نسوان كبار واخت عمتي واحلام وزهره كلهن محزمات ويطبخن ثاني يوم كلنه اخذونه للمقبره
شبعنه بجي بس راهب ماوصل يمنه لمن كملنه وصعدنه بالسيارات يالله راح كعد يمها تاخر بالنص ساعه يالله اجه

اربعين يوم وراهب وضعه انگلب تماما
اكثر وقته ياخذ سجاده وقران ويختلي بغرفتنه يصلي ويقره قران يهدي لعمتي

جانت تتمنى تشوفه هيج قبل لاتموت
اكثر عركاتهم جانت قبل ع المشروب لان تستحرم حتى مرات اطرده من البيت تريده يتوب ويبطل بس سبحان الله موتها كان سبب تركه للشرب

اربع شهور مرت على وفاة عمتي اني حتئ انام يمه بالدشداشه السوده وحفافه ماحافه وجهي شواربي ينحلف بيهن وحواجبي بحث اخر
لان هذا حزنهم ماكو حفافه لدورة السنه وهم نبقئ لابسين اسود سنه كامله

حتى ساره من اجت ضلت تحجي عليه تكلي ع الاقل رتبي روحج بغرفتج خطيه هو نفسيته تعبانه وانوب يلكاج جنج بومه مكابلته

ضليت محتاره فشله امه ميته واني البس الوان حتى لو بغرفتي بس شفتها صعبه
عندي سيت نوم واحد اسود والباقيات كلهن الوان

اجت ساره يمي العصريات كالت خل احفلج كتلها بس شيلي شواربي فشله خاف ابوسه وشواربي ينغزنه من كد ماثخان ضلت ساره تضحك

حفيت وجهي وتركت حواجبي حسيت اكو فرق وجهي صار ناعم

من ماتت عمتي صفيت وحدي بالبيت راهب يطلع من الصبح للدوام يخليني وحدي واخاف ف اكثر الوقت لو ساره تجي يمي لو ام قاسم العصريات ومرات اني اروح يمهم لان همه علاقه قديمه تحسهم اكثر من اهل

وهم راهب تبهذل بسببي لان باله يمي من اضل وحدي

بليل بدلت وتعطرت رتبت نفسي وانتضرته هسه يجي وهسه يجي وللساعه ب3الفجر يالله رجع

صادف خميس وثاني يوم جمعه ماكو دوام يعني عادي يتاخر بس هاي اول مره هيج يتأخر بعد وفاة الحجيه
عقلي صار ياخذ وينطي كل اشويه اكول خاف رجع لسوالفه اكيد كاعد ويه جماعته بكعده بيها شرب ونسوان

صرت احمس بروحي حمس شيجيبه حتى اتعارك وياه
وصدك من سمعت صوت سيارته اتحضرت للطلابه

نسيت لبسي ونسيت التحضيرات عقلي قفل فرد قفله

اول مادخل للغرفه خزرته رفع حاجبه

راهب،، ياربي دخيلك لسه كاعده؟؟

لارا،، اي غير متانيه زلمتي المايكول عندي مره وحدها بالبيت يعبر عليها حرامي لو تحترك وحدها لو غضب ينزل على راسها

احجي بحركه واعصابي فايره
راح للميز حط السويج والموبايل وعينه مني

راهب،، صوتج

لارا،، اني محتركه روحي وهو يكلي صوتج
تركته ورحت للكنتور فتحت الباب من عصبيتي بعد مااحس بااعصابي فقدت جريت دشداشتي السوده ام الردانات تركته وراي وطلعت نزلت جوه

نزعت السيت ردت امزكه بالحمام بس تركته اريد امزكه كدامه حتى احرك روحه

لبست الدشداشه وصعدت لكيته فاتح دكم قميصه وكاعد ع الجربايه منزل رجلي بالكاع
وكفت كدامه حطيت ايدي بالسيت مال النوم شكيته وشمرته بالكاع

اني طايحضني انتظرك وارتب روحي
انت المفروض انتطرك واني لابسه كونيه

يباعلي عاكد حاجبه ولاجن احجي وياه
باوع للسيت ورجع باوعلي

راهب،، مبين اليوم طابگات كلش

لارا،، شنو همه؟؟

راهب،، سوادينج

ليش شكيتي؟؟

لارا،،معليك

حجيتها واني افتح بالكنتور مااعرف شسوي بس من اتعصب اضل افتر كدامه مااعرف شسوي

راهب،، احجي عدل لاحلگج يلحگ الثوب

لارا،، تركت سولتي الصارت بالكنتور توجهت للسرير شلت الغطه ودخلت للفراش

راهب،، اكعدي احجي وياج

لارا، جاوبته واني جوه الغطه اريدد انطمر

ولااهتم تركني واسمعه يفتر بالغرفه يبدل
شويه وشال الغطه اتمدد يمي بس انطاني ظهره

هذا حال راهب من ابدي العركه اني مستحيل يتنازل ويراضي لذلك يتركني وينام يخليني اكل بروحي اكل

ومن يحس نفسه هو الغلطان لا هو اليبادر ويرضيني
للخمسه الفجر اني كل شويه والتفت الجهته اريد اخنگه من كد ما اعصابي تفور فكره انو جان سهران ويه بنات مسيطره على دماغي

الصبح كعد وجهه ثكيل انوب هو الزعلان
سويت ريوك مااتريك سبح بدل وطلع اخذ بيده القران عرفت راح للمقبره

رجع الساعه ب10اتصل بي قاسم كاله معزوم يم نقيب فلان ع الغده شويه وطلع مارجع لل3العصر

خلص اليوم وهو المتجاهلني خلاني اندم على العركه لان يوميه يخلص الوقت وين مايشوفني يحضني لو يبوسني
ولان واحد زعلان ع الثاني حسيت بالندم لان حتى لو مجرد يوم واحد زعلانين افتقدت اهتمامه وحنيته

بليل قررت اكسر الزعل بيناتنه
بس ماعندي سيت نوم اسود هو واحد ومن طنكرت شكيته بساعه عصبيه

حرت شلبس تالي سبحت ولبست ثوب ربع ردن اسود يوصل للركبه
فتحت شعري ورشيت معطر ربع ساعه وسمعت صوت سيارته باوعت للساعه توها صايره ب11

اكيد هسه يكول عني خبله لان اني الخلقت المشكله واني الهسه مجهزه نفسي اله واني الممنونه

شويه ودخل للغرفه شافني ودار وجها ولا كأن اني كدامه
ترك سويجه ع الميز راح للزاويه اخذ الخاولي وطلع

عرفت نزل يسبح ماتحملت فتحت الباب ونزلت وراه
ضليت افتر بالمطبخ حضرت ماعون فواكه دقايق وطلع ينشف بشعره بالخاولي باوعلي ودار وجها يريد يصعد

استوقفته اساله

جوعان اسويلك عشه؟؟

راهب،، متعشي مااريد

لارا،، بتصرفاته يخليني اندم لان زعلت علي
اخذت ماعون الفاكهة بيدي وصعدت لكيته يمشط كدام المرايه رش معطر واني اباوعله

تركني واكفه وراح للسرير رفع الغطه تمدد ونام
خليت الماوعون ع الميز طفيت الضوه وفتحت گلوب النوم رحت يمه رفعت الغطه ودحست روحي بظهره

مديت ايدي حضنته
همست بأسمه بصوت ناصي

راهب،، اتركيني انام

لارا،، صدك اختنكت ابتعدت درت وجهي انطيته طهري وهمست خانكتني العبره
مو صوجك صوجي ردت اراضيك

راهب،، كافي اريد انام

لارا،، وصلت حدها دفعت الغطه ونهضت اريد احجي مااكدر خانكتني العبره
رحت للكنتور اريد اطلع فراش

راهب،، وين تردين؟؟

لارا،، معليك

حجيتها واني اطلع بالفراش ماحسيت غير اندفعت للكنتور شوكت نهض واجه يمي بدون مااسمعه دنك يحجي بصوت هادئ

راهب،، جا منو العلي؟؟

لارا،، وخر راهب خليني انزل انام جوه

راهب،، حتى تبطلين ماتزعلين وادورين عركات نص الليل من ارجع

لارا،، معليه بيك عسا ماتبات يمهن

راهب،، منو هنه؟؟

لارا،، الجنت يمهن البارحه سهران

لزم ايدي دارني لجهته وجهي مقابيل وجها

راهب،، ماعندي غيرج ماكو شي اسمه هنه اكو انتي وبس

لارا،، بجيت دفعته
انت ابد ماتفكر بيه ولاتخاف عليه لو تحبني جان كلت وحدها وتخاف قبل جانت عمتي ساده عني الوحشه هسه منو يسد عني وحشتها؟؟

راهب،، اششش كافي ام دميعه
وروح امي صارت شغله طارئه بالشغل واضطرينه اني وقاسم وهشام نبقئ لوقت متاخر طول مااشتغل بالي يمج
ماصدكت اكمل وارجع مشتاقلج تالي لكيتج محضره العركه
الف مره كايلج مااحب تصير مشاكل بينه اذا ضجتي من تصرفي اكعدي وياي وافهمي السبب وبعدين احكمي مو اني جاي تعبان والف حسبه براسي تالي تتلكيني بالمشاكل
تعبان لارا بالقران تعبان لاتصيرين انتي والوكت ضدي

لارا،، لمني لصدره واني ابجي
راهب من عشاق الشاعر علي المنصوري اربعه وعشرين ساعه يسمع اشعاره

دفن وجها بركبتي ماتحملت حاوطت رگبته بثنين اديه رجع گلبي يدك بقوه
مجرد قربه مني وانفاسه تخليني اذوب بين ادي
صرت ارجف مااعرف برد لو من لمساته
ولاكان صارلنه سنين متزوجين كل مره يلمسني احس هاي اول مره
صار يهمس بأذني كلمات قصيدة الليلة الحمراء للشاعر علي المنصوري

دكات گلبي عبرت الالف بسبب كلامه ردت اوكع مد ايده حاوط خصري مثبت ظهري لااوگع

سند كصته على كصتي
بده يطبع قبلاته بلهفة وحب
رجفت بخجل سيطر عليه

ابتعد مني ببطء عيونه بعيوني الذبلانه
تفاجئت بنفسي اجذبه الي من جديد وهلمره اني القبلته بشوق ولاكأن ليله وحده نمت بعيده عن حضنه

تقريبا الساعه ب2بليل نزلت سبحت كملت وطلعت لكيته بوجهي كرص خشمي ودخل للحمام اعشق كل تفاصيله
قبل مايسد الباب كال حضريلي شي سريع اكله جعت

حجاها وسد الباب دخلت للمطبخ عشانه مخلمة لحم
حميت ماعون بسرعه حضرتله اكله ع الميز شويه وطلع

كتله حضره الاستاذ الزعلان قبل شويه من سألتك كتلك متعشي لو لا كتلي اي
شو هسه جعت؟؟
احجي رافعه حاجبي ومتخوصره

راهب،،ليش انتي خليتي طاقة عندي؟

لارا،، حجاها بضحكه وغمز

درت وجهي عنه همست منحرف

راهب،، هو منو المنحرف السحبني يبوس بيه فاصل مايدري بروحه؟؟

لارا،، صعدت الحراره الراسي راااهب

ضحك بصوت عالي ورجع ياكل

لارا،، والله متصيرلك جاره دوم لسانك نازل ع الترابي
لا والنوب حتى الشعر مالته كله انحراف

راهب،، غير وضعج كله تخربط بيدي وانتي تسمعين الشعر

لارا،، فتحت عيوني على وسعهن عزاا يمعوود اسكتت

راهب،، سامعه بالاخير شنو يگول؟؟

لارا،، درت وجهي مااريد اسمع كافي

تركته وطلعت شارده السانه عباره عن كلام مشفر اسمعه يضحك بصوت عالي يصيح جبانه

بداخلي افرح من اشوفه يضحك اكول الحمدالله ع الاقل رجع شويه مثل قبل
بذني الاربع شهور ادمرت نفسيتي ونفسيته
واخيرا كدر شويه يتحسن وضعه
سبحان الله الينزل الصبر قبل البلاء

مرت الايام والوضع نفسه راهب من يروح للدوام ابقى وحدي العصر تجي يمي ساره لو ام قاسم واذا عدهم خفاره تبات ساره يمي شويه راده عني الوحشه

راهب اقترح على محمد وفاطمه ينتقلون يعيشون يمنه بس محمد رفض لان دوامه بغداد ومتعلم مايكدر يجي للنجف

من يكون راهب بالخفاره اقفل البيبان كلهن لان اخاف وحتى اليدك الباب ماافتحله منا لمن اشوفه بالكامرات يالله اطمن اذا شخص قريب

بيوم كنه بليل اني وساره كاعدين نسولف بغرفتي
من اجت شفتها مبوزه سالتها اشبيج اليوم؟؟
بس لامتعاركه انتي وقويسم؟؟

ساره،، هو تكافشنه قبل لايطلع واجيتج

لارا،، يااا ليش ولج؟؟

ساره.. اليوم حضي الاغبر كالي كومي رتبي الكنتور
كمت رتبته وطلعت الملابس والغراض حطيتهن ع السرير

ومن ضمن الاغراض كان موجود البوم الصور وهم بي صور عرسنه

لارا،، اي

ساره،، داارتب بالملابس التفتت على صوته كاعد ع السرير ولازم الالبوم بيده يگلب بالصور

اني بفتره الخطوبه شفتيني انتي اشلون ضعفت وجهي كلش ضعف لان تفكير وقلق شي طبيعي لكل بنيه مخطوبه ومايفصلها عن يوم عرسها غير كم يوم

درت وجهي دااكمل الملابس سمعته يكول

قاسم،، ايباااه والله جنت مظلوم وماادري بروحي

ساره،، وكفت متخوصره رفعت حاجبي
سالته عليش يمه مظلوم؟؟

قاسم،، شايفه روحج اشلون بالعرس جنتي جنج فطيسه

ساره،، توجهتله بعصبيه ردت اخذ الالبوم بعده عني يضحك

قاسم،، خرب بغيرتك قاسم ماخذ هيكل عظمي ومكيف نايم على وجهه نيوم جفي مكيف بالهيكل العنده

ساره،، احس روحي عطبت وهو صنفني تصنيف
مديت ايدي كتله جيبه لا احركه هسه

شو هذا خربان ضحك لزم ايدي كعدني يمه ومستمر يتمهزل

قاسم،، بشرفج لو رايح لابو المختبر جايب الهيكل مالته اليشرح علي للطلاب بدالج مو احسن؟؟

ساره،، صدك ماتحملت نهضت جريت الالبوم وركعته بالحايط وهو مستمر بنوبه الضحك مالته

قاسم،، ولج خبلتي اعصابج والله ماكو احسن من الاعظام يسون التشريب دسم

ساره،، اي موكدامك طلي دوخر عني

جرني الحضنه يبوس والضحكه لازمته

قاسم،، وداعتج جنت فرحان لدرجه حتئ لو عظام مامنتبه ومكيف احبج يافطيستي

ساره،، صدك ضجت وضليت مغندبه جرني راد يحضني دفعته

قاسم،، اشبيج گلبتي خلقتج جنج بزونه خاينها العتوي

بس هو موصوجج صوجي اني اتشاقه وياج

ساره،، والله زعلت منه تالي انكلبت السالفه عركه تركني وراح

لارا،، هي تحجي واني اريد اصبر روحي مااكدر تالي طكيتها ضحكه دمغتني على راسي بعدها

حسيت اكو حركه بالسطح احس گلبي سكت من الخوف نزلنه اني وساره وحده خاتله بظهر الثانيه
الحركه قويه فوك حسبالك الباب مال السطح يندفع

رادت ساره تصعد جريتها واني ارعش كتلها خل ننزل حتئ اذا حرامي نفتح الباب ونشرد
لان مايكدر يفتح باب السطح راهب قافله بقفلين كبار

اني طبعي جبانه كلش بهيج سوالف لااراديا افقد السيطره على نفسي هلشي موبيدي
ساره عكسي تماما ماتخاف

نزلنه للاستقبال راهب مخلي بي الشاشات الخاصه بالكامرات ماشفنه شي
وره تقريبا دقيقتين تفاجئنا بشخص ملثم نزل من علئ السياج مال السطح جات لنص الطارمه

صرت اطكهن اصوات بعلو صوتي وساره همزين من نزلنه بيدها موبايلها اتصلت بقاسم
انوب المصيبه يحاول يفتح الباب مامهتم للصايح

رفع راسه لجهة الكامره وطلع سجينه يحطها على ركبته بمعنى الذبح

هي دقايق وصعد من نفس المكان واختفئ
الموبايل مال ساره احترك حرك بااتصال راهب وقاسم وره اقل النص ساعه سمعنه صوت الدوريه مال الشرطه
كل هذا واحنه مافاتحين الباب نخاف اني نهارت اعصابي بس ساره قويه تحاول تخليني اهدئ

من اتصل بيها قاسم طمنها يالله فتحت باب المدخل
مااعرف اشلون دخلو للبيت ولااعرف شوكت ساره مخليه عبايه على راسي

فقدت سن يطك بسن وشكل الرجال مايروح من بالي
الشرطه ترست الطارمه
وراهب دخل للبيت حتى قاسم ضل بالباب مادخل ساره واكفه كدامه لابسه عبايتها

الجيران كلها التمت ترسو الطارمه

واني اخذني راهب على صفحه جسمي يرجف
مطوقني بثنين ادي اريد ادخل النص گلبه من الخوف

دموعي تجري يحاول يفهم مني مااكدر احجي
اتلفت احس راح يطلعلي من اي مكان. هو والسجينه بيده

وره شويه يالله هدئت ومن سألونه اني وساره حجينه الشفناه

وهم شغلو تسجيل الكامرات مامبين منه شي بس عيونه ولابس كفوف سود

راهب كال هذا مو حرامي لو حرامي جان من سمع صوتجن انهزم بس هذا عنده غايه بالتخويف ورساله راد يوصلها الي اني تحديدا

وره ساعه راحت الشرطه وراهب وقاسم بقو بالبيت وبيت ام قاسم كلهم اجو بس الجوارين الباقين راحو

لمن هدئ الوضع اترخصو همه هم وقاسم هم كاله اني راجع للدوام ابقى اليوم انته هنا وفعلا راح وراهب ضل يمي
خلص الليل اتصالات كل شويه واحد من جماعته يتصل بي

نايمه بصفه لامني لحضنه وايده لازم بيها الموبايل
كل شوية يتصل بواحد

الليل كله كل ساعه افز مرعوبه وراهب يسمي بسم الله لان خلصتها اتحلم بالشخص العبر علينه

ثاني يوم صادف اجازته ماطلع اجو جماعته وضلو يحجون بسالفة الحرامي
صرت حتى بعز النهار اخاف حتى للتواليت تكرمون اخاف اروح

انوب الوضع صار صعب بالزايد لا اكدر ابقى وحدي ولا راهب يكدر يتركني ويطلع
خطيه ضل محتار

العصر راد يطلع يشتري جكاير كمشت بايده كتله رجلي على رجلك ماابقئ وحدي
وفعلا اخذني وياه بقيت بالسياره وهو نزل للسوبر ماركت تسوك كم شغله

بليل ردت انام ماكدرت عيني على راهب مدري شبيه
بقيت صافنه على وجها
وكل شويه اتقرب ابوسه بخده گلبي مامرتاح

كال باجر اروح للدوام صار يومين مامداوم
قنعني ماكو شي وقبل لايروح يخلي قاسم يجيب مرته يمي لو اني اروح يمهم خطيه حتى همه مامرتاحين

بعدها اقترح يحجي ويه محمد يجيب امي تبقى يمي صح مشلوله بس ع الاقل صوتها يرد عني الوحشه

ثاني يوم راح الصبح للدوام قفلت البيبان كلها وكعدت لان اخاف
ماصدكت شوكت يرجع راهب واامن

بليل وره العشه تعشينه كال رايح يم هشام عدنه شغله تخص الشغل مالتنه مااتأخر ساعه وارجع

سألته قاسم يروح وياك؟؟

كال لا قاسم يريد ياخذ امه يرحون يم اخته ابنها واكع من الدرج ويردون يشوفو
انوب المصيبه اكيد ساره رايحه وياهم

والشغله اليريد يروحلها راهب ضروريه لان كلساع هشام يتصل بي وينك وين صرت ليش تاخرت

يجاوبه راهب نص ساعه يمك مااتأخر

تالي طمني ماكو شي خله وراح
كال ساعه وارجع والساعه صارت ساعتين وثلاثه وهو ماكو

للساعه ب10سمعت صوت سيارته
فتحت البرده مال غرفتي من فوك شفت ضوه بالباب
نزلت ع الدرج بعدني توني خليت رجلي على اخر درجه

جان مااسمع غير صوت الرمي ردت اوكع
بدون وعي الساني يردد اسمه

اريد اطلع مابالي شي غير راهب
بس رجليه جمدت من الخوف غصب عني كعدت
خطوتين ماكدرت اتحرك

كلشي صار بدقايق
هدء صوت الرمي وصرت مااسمع غير اصوات عاليه بالشارع

ردت بس رجليه يعينني حتى انهض مااكدر
تالي سندت روحي بيده الباب وكمت امشي بجسم يختض
گلبي والساني يرددن

سترك ربي كلشي ولا راهب

يتتتبع

مساء الورد والياسمين عليكم غوالي
البارت بعد بي تكمله للاحداث

اذا كملت كتابه التكمله انزل البارت
واذا ماكملت ف باجر بليل انزله باذن الله
لان اكو هواي شغلات لازم اكتبها ❤️

اكو كاتبه مبتدئه حابه ادعمون قصصها
هي صديقتي واكثر من اختي
الورده كوثر اتمنى ادعموها بنجمه او تعليق
اسم روايتها
كأننا لم نحترق
❤️❤️❤️❤️❤️

Kawther-mohammedاذكر

المستخدم
😁
😁
😁
😁

لتنسون التصويت 🌹🌹