راهب ابو غضب الفصل السابع وثمانون 87 - بقلم Zahra

راهب ابو غضب

بقلم زهراء الحسناوي

،،،،،،،،،،،،،،،،،،،،،،
لارا

احبك جداً كما قالها يوماً
نزار
ولكني ياسيدي
ككل امراة
في هذا الكوكب
تغار
اغار من قميصك....
الذي يقبل صدرك ...
وعطرك ....
من ذلك النسيم
الذي يمطر
بالندى خدك
من الطير ان غازلك
بتغريده
من نظراتٍ نساءٍ
وقحةٍ
ترواد مشاعرك
من المرٱة اذا نظرت
إليها
اغار واغار واغار ❤️
،،،،،،،،،،،،،،،،،،،،،،،،،،،،،،،،،،،،،

عود هم كولو الشعر منحرف 😁
حتى نجيكم بالتفگ

،،،،،،،،،،،،،،،،،،،،،،،،،،،،،،،،،،،،،،

لارا،، فتحت الباب واني ادعي اشوفه كلشي مابي
رغم صوت الشباب التصيح بأسم راهب
هلشي خلاني افقد اعصابي اتمنى اطلع
اشوفه

انهارت اعصابي وصرت بس اصرخ بصوت عالي بأسمه
يوميه اشوف حوادث اغتيال لناس ابرياء مالهم ذنب
تغتالهم احزاب ومنظمات ارهابيه

شي بداخلي يمنعني اطلع مااريد اشوفه سابح بدمه اذا مات راهب اموت وراه
اتهسترت وفصلت عن كلشي انفتح الباب فجأة

احس روحي ردتلي من شفته واكف فوك راسي
اشوف شفايفه تتحرك بس مااكدر اسمعه راسي حار وصدري صار نار نفس الاحساس الحسيت بي من مات ابوي وتعرضت للذبحه الصدريه

كانه جاي احلم راهب كاعد كدامي مابي شي
اتحولت من نوبه البكاء الحاده لنوبه ضحك بجنون
شمرت روحي حضنته بقوه ورجعت بتعدت عنه بنفس السرعه اريد اتاكد هو لو جاي احلم

صرت مثل المخبله يحجي وياي مااكدر اجاوبه فاصله
تركني ودخل للبيت يركض جاب عباتي بسرعه شمرها على راسي حاوطني بثنين ادي وكومني
مااعرف شوكت طلعنه وشوكت دخلني لبيت ام قاسم

اشوف خبصه مال عالم وهوسه بس ماجاي استوعب شي مثل الجان تحت الصدمه
اتلگني نسوان بيت ام قاسم وساره دخلني للبيت بس عيوني تتحرك والم بصدري موطبيعي

ام قاسم جابت ماي غسلت وجهي جرت اديه غسلتهن تقره ايات وتنفخ بوجهي

بعد مده من الوقت هدئت وانتبهت اكثر
نهضت من مكاني اريد اطلع لزمتني ام قاسم

ام قاسم،، اكعدي خاله الدنيا مگلوبه بره الشرطه تارسه الشارع
وزلمتج جابج هنا بين مايرجع

لارا،، بجيت خاله اتركيني بس اشوفه خاف بي شي والله گلبي راح يسكت

ساره،، اسم الله لارا صدكي مابي شي يعني لو راهب متاذي تشوفينه هيج ساكتين؟؟

وبعدين بعينج شفتي جابج لهنا وكلشي مابي
انكتبله عمر جديد

لارا،، لسه مامفتهمه الصار شنو وشبي راهب وشنو هذا الرمي الصار

وره ساعه اختفه صوت سياره الشرطه
ماكدرت اتحمل اكثر كمت عدلت عباتي وطاعت متجاهله صوت ام قاسم

فتحت الباب وطلعت زلم هواي واكفين اباب بيتنه فتحت عيوني على وسعهن واني اشوف سياره راهب الجام متكسر من جهة وحده بابها مفتوح
بس راعيها ماهو
رجف جسمي وبجيت بصوت عالي عيوني ادور علي بين الوجوه

واحد من الجوارين كال ادخلي لبيتج خويه مابي شي هسه راحو للمركز اخذو هذا العار
الحمدالله الله ستر

دخلت لبيتي وعيني للسياره لحكتني ام قاسم حجت عليه لان تركتهم واجيت وراهب خلاني يمهم

كتلها خاله مااتحمل اريد اشوفه يالله يرتاح گلبي

كل الفهمته من نسوان الجوارين راهب تعرض لمحاوله اغتيال من قبل شخصين واحد انهزم والثاني راهب مصوبه برجله

مرت ساعتين اتصل بيه راهب جاوبته مختنكه من كثر البجي
سالني وين انتي كتله رجعت البيتي
فهمني انو هو راجع وياه جماعته الضباط
وقاسم

ماصدكت شوكت يجي واكحل عيوني بشوفته
دخل العالم للاستقبال دقايق واجه من جهة باب المطبخ فتحه ودخل

نسيت ساره وام قاسم وحضنته ابجي مثل الطفله الفرحانه بشوفة ابوها
دنك باس راسي وعينه ل ام قاسم

راهب،، صوتكم خطار بالاستقبال
ساره خويه حضري جاي وماي

لارا،، لازم ايدي ويحجي رجع باسني براسي وطلع
ماتحملت رحت كعدت اباب الاستقبال من جهة الصاله اسمع واحد سأله
كاله ربك ستر وشايل مسدسك بحزامك جان كتلوك

راهب،، هو اني دائما من اطلع مسدسي اخذه وياي
گلبي حاس راح يصير هيج شي

لارا،، رجعو سالو اشلون انتبهت عليهم؟؟

راهب،، توني رجعت من يم هشام طفيت السياره بدون مالتفت لجهة الباب فتحته وضليت كاعد اريد اخذ موبايلي وشلت مسدسي حتئ انزل
رفعت راسي شفت دراجه ناريه بيها اثنين صاعدين واحد بقه بمكانه والثاني نزل الجهتي بيده قامه

اول ماشفته جريت بابي سديته وقفلت السياره

الگواد دج الباب بالقامه ربك ابتعدت جان اجت الضربه بخاصرتي
من شفته هذا جايني جتال مابيها مجال سحبت اقسام ورميت

ابو الدراجه انهزم من شافني عندي مسدس وهذا البيده القامه (اداة حادة تشبه السكين سامه تستخدم في الحروب)

راد ينهزم فتحت الباب ورميت جوه رجله بس من ابتعد صوبته لان لو تاركه جان رجع مره ثانيه

لارا،، سمعت واحد منهم يگله اذبح فدوه لوجه الله تعالى على سلامتك واحمد ربك واشكره اجاك بقامه موبمسدس

راهب،، لا لو جايني بمسدس يكتلني مابيها مجال

لارا،، اسمع وابوس ايدي واحطها على كصتي راهب انكتبله عمر جديد اليوم

بعدها راحن ام قاسم وساره
سمعت اصوات الزلم يترخصون لان تاخر الوقت
ضليت واكفه اباب الاستقبال انتضرتهم يرحون فد مره يالله ادخل يمه

دقايق وتاكدت ماكو احد بالاستقبال اسمعه يقفل اباب المدخل
فتحت الباب وركضتله
والله لو اكتب كتب عن هاي اللحظه ماراح اكدر اشرحها

حضنته بكل قوتي بادلني حضنتي احس روحي انرفعت من الارض حضني وشالني خشمه برگبتي

ابجي بدون صوت اشهك بالبجي
نزلني واحتضن وجهي بيدي الاثنين

راهب،، كافي بويه لاتبجين موزين عليج
هلتشوفيني جدامج مابيه شي

لارا،، مسحت دموعي
ورجعت حضنته

لو صاير بيك شي اموت والله
شسوي بدنيا مابيها راهب؟؟

جر حسره ولمني الحضنه بقوة

راهب،، تدرين بالله العظيم
اول ماصوبت الاول تركته وردت الحگ ابو الدراجه

بس من سمعت صوتج تفرفحين تركت كلشي واجيتج
دين ماضل براسي اباوعلج فاقده بس عيونج تتحرك

لارا،، راهب تدري انت شنو بالنسبه الي؟؟

همس شنو؟؟

انت تصعد وتنزل ويه هذا احجي واشر على انفاسي

راهب،، هيج تحبيني؟؟

لارا،، اكثر من ماتتصور

كعد ع القنفه كعدني يمه لازم ايدي
سحبني نيمني على رجله وهو ضل كاعد ايده فوك راسي

سالته منو ذوله وشنو يردون منك؟؟

راهب،، الصوبته اليوم عنده اخ اكبر منه جان يبيع حبوب كبسله ع الشباب والمراهقين والحبوب اليبيعها ممنوعه تخلي الياخذها يفقد فد مره بحيث يقتل ومايدري بنفسه الحبوب اسمها كرستال

اجتني عنه اخباريه شهر نفتر وراه من مكان المكان تالي لزمناه والقاضي حكمه كم سنه لان طلعت اهواي علي دعاوي

اخو الزغير الي راد يقتلني من انحكم ذاك هذا اجه ياخذ بثاره مني على ابو اني السبب بسجن اخو الجبير

المصيبه انصدمت من عرفت عمره 17سنه

من اجاني راد يدجني ضلمه الدنيا وملثم ماشفته زين بس من صوبته وخرت الشماغ عن وجهة شواربه توهن خاطات

ضيع روحه بسبب اخو خذته الدوله احداث لان قاصر

لارا، خو ماينعدم بعده زغير

راهب،، لا الاحداث ماينحكمون اعدام
حكمهم من 10سنوات ل15سنه

لارا،، هو نفسه العبر علينه مو؟؟

راهب،، اكيد ماكو غيره

لارا،،بعدها دخل سبح كعدتله اباب الحمام
موبيدي اخاف من اني طفله اخاف اطلع وحدي للحمام اذا مااكعد امي وياي

لمن كبرت يالله شويه تشجعت بس بقت الخوفه نفسها من كلشي اخاف من ابسط الاشياء
مره صرصر ابتله على عمره صار جواي

خبصت روحي خبص حتى راهب بوقتها كالي

هذا صرصر وهيج فحطتي لو داعشي فايت للبيت جان شسويتي؟؟

خو ابو بريص اتكرهب اذا شفته كدامي
راهب بالبدايه خبلته كل مااعيط يجي يركض حسباله اتكهربت بس من يعرف سبب العيطه ابو بريص يضل خازرني يروح وهو يدردم

يسميني بزر نستله مايعه

ثاني يوم اهلي من سمعو كلهم اجو
من وصلو فاطمه ظلت حاضنه راهب تبجي
تكله احس طريق بغداد صار شطوله تمنين اطير واوصل يمك

خطيه اجت شايطه حلكها يابس من خوفها على اخوها الوحيد

ثاني يوم اهلي راحو بس محمد وفاطمه ضلو لان فاطمه جانت مقرره تروح لدكتوره اسمها

شميم بالنجف عدها مستشفى اهلي يسمو مستشفى الحياة
الدكتوره اقترحت عليها تسوي اطفال انابيب

من حجتلي فاطمه كتلها خاف موزين عليج لتستعجلين وانتضري شويه

فاطمه،، لارا تره راح يصير عمري اربعين مو شويه
اتمنى يصير عندي طفل يترس حضني
احس نفسي كبرت واخاف بعد مايصير عندي

لارا،، خطت وجها بثنين اديها وبجت
اتقربت يمها بست متنها

كولي يالله فطومه كله رزق بيد الله
وداعتج. يصير عندج وتملين وكولي لارا گالت

فاطمه،، الله يسمع منج

لارا،، وفعلا وره يومين راحت فاطمه للدكتوره بس اتفقت وياها تستمر على العلاج شهرين يكبرون المبايض وبعدين يسون العمليه

ضلت فاطمه يمي اسبوع راهب حجه ويه محمد كاله ليش ماتجي تعيش هنا الك الطابق الجوه واحنه الفوك انقل دوامك هنا

بالبدايه محمد ماقبل بس بعدين اقتنع لان فاطمه كالت اذا سويت عمليه مايصير ارجع البغداد طريق طويل ف ابقى بيت اهلي

رجعت فاطمه هي ومحمد لبغداد اخذت كومه علاجات مال شهرين وهي قبل هلمده هم شهرين تاخذ علاج من دكتورتها ابغداد

مر شهر علئ سالفه اغتيال راهب
كنت بالمطبخ ردت اسوي غده راهب كال اليوم جمعه رايح اشوي سمج بثواب امي وابوي

راح ساعه ورجع جايب الغده اول ماكفخت خشمي الريحه دخت لعبت نفسي
واني هم صار كم يوم مالي خلگ وجهي شاحب لونه

واخلص اليوم كله نعسانه
احس روحي بس اريد اشم عطر راهب
الدرجة مرات من يطلع اخذ قميصه لو دشداشته اضل اشم بيها

راهب كلش نضيف ونضامي ومرتب
بالشته رغم برودة الجو يسبح من الصبح قبل مايروح للدوام اضل احجي علي اكله لف شي على اذنك لاتتمرض

يكلي من اصعد بالسياره اشغل تدفئه
يرجع من الدوام يسبح واربعه وعشرين ساعه
يلمع لمع غير عطره الياخذ الروح

صارت روحي بعطره
مره وداني لهلي كعد بالاستقبال
من راح اجت سجئ مرت رافد
اتكلي عطر رجلج ترس الاستقبال ترس
ادري يسبح بي خو مايسبح بي؟؟

من شميت ريحة السمج شافني اشلون لعبة نفسي
تركته ورحت للحمام احس ذبيت شكو شي بمعدتي

خطيه اجن يركض كعد يمي اشرتله بمعنى روح ماقبل بقى يمي لمن كملت
غسلت وطلعت

راهب،، شبيج اليوم؟؟

لارا،، مااعرف بس احتمال مستبرده

راهب،، ليش مو احتمال اكو قاسم صغير بالطريق

لارا،، رفعت راسي قاسم صغير شنو؟؟

ضحك

راهب،، ابني قويسم

لارا،، باوعتله صفح عود صدك تحجي

راهب،، اذا معترضه ع الاسم عادي اني اصلا جاي على بالي اسمي مزعل على اسم جدي

لارا،، فتحت عيوني انووب مزعل؟؟
يمعود تره ادري بروحي موحامل لتبني امال ع الفاضي بس يمكن مستبرده لو العشه مال البارحه اذه معدتي

راهب، وروح امي حامل

لارا،، يااا انوب متاكد

العصر اصر ياخذني للمختبر حتى احلل
اكو احساس بداخلي يكلي ماكو حمل

بعد السوته بيه غزل بيوم الشربتني اعشاب وطرحتني طفلي
خفت ليكون رحمي تاذه بسبب الاعشاب

ربع ساعه وطلع التحليل لان كان ازدحام هواي ناس ينتظرون دورهم

من صاح بأسمي نهض راهب اخذ الورقه
المحلل كاله حامل

راهب اتسعت ضحكته حسبالك كان متاكد ميه بالميه من حملي

ضليت ارمش بعيوني مامصدكه

اقترب مني عينه بالتحليل

راهب،، هاا شكال البهلول؟؟

لارا،، من فرحتي صافنه بوجهة عيوني دمعت
اخذنه الورقه وطلعنه للسياره اول ماصعدت التفتلي

راهب،، بالخير ام قاسم
موكتلج حامل ماصدكتي
المفروض تكتفين بسوناري

لارا،، ضحكت من كل گلبي ايدي على بطني مامصدكه واخيرا راح اصير ام

راهب خلص الطريق كله ام قاسم ما ام ماقسم

التفتتله كتله وقاسم هم ناوي يسمي ابنه راهب؟؟

راهب،، اكيد بس لايصير عند العار اول خلفته بنيه ويضربني بوري

لارا،، ضليت اضحك علي
بعدنه بالطريق اتصل بقاسم يبشره

احس الدنيه ماسايعته من فرحته
جاب الطريق كله تحس حتى گلبه يضحك من كثر مافرحان

طش خبر حملي والكل اجه يبارك
بليل راهب طلع ويه قاسم و اجت ساره يمي حجيتلها عن سالفة الاتفاق بينه وبين قاسم على أسماء اولادهم

ضلت صافنه بوجهي

ساره،، يعني قويسم يريد يسمي ابني راهب مو؟؟

لارا،، ضحكت وهزيت راسي بمعنى اي

ساره،، ومن يصير عمره سنتين ثلاثه اركض وراه اصيحله تعال يمه رهوبي لو رويهب
واسودن ابني من اسمه مو؟؟

لارا،، يااا شوف هاي غير اسم راهب كلش حلو احلى من اسم رجلج

ساره،، ولج هو رجلج بس اسمه عباره عن ترهيب وتخويف
اذا سميتو ابنكم قاسم بيها مجال ادلعي قويسم قسوم قوقو

لارا،، غصيت من الضحك قوقو انوب؟؟

ساره،، والله ارحم من رهوبي ولج خاف انوب ابني يتسودن اذا وعه وهو اسمه راهب
بس يالله انشاءالله اول حملي بنت

ومنا لمن احبل بولي العهد يكون ابو ناسي السالفه

لارا،، شكلها يضحك كتلها تره قاسم حالف يسمي اول طفل على اسم صاحبه

وحتى اذا اجته بنت يسميها رهيبه

مبينه صدكت سالفتي من فتحت عيونها على وسعهن
نهضت من يمي بعصبيه مصدكه السالفه

ساره،، اخليهم ابطني ولاجيبهم ع الدنيه وهمه اسمائهم كلها ارهاب ب ارهاب
انوب عليه رهيبه والله يالله
واصير اني ام رهيبه
رهيبه الرهبتك قاسم على هلدگه هاي

لارا، متت ضحك عليها ماتحملت اكثر جرت موبايلها اتصلت بقاسم
اول ماكال الو انهدت بي فرد هده
حلفتله اذا سمه ابنه راهب تاخد ابنها وتشرد

من رجع راهب بليل انتبهتله عيونه حمر دم سألته كتله حسيتك متاكد من حملي؟؟ جر حسره تحسها طالعه من روحه اعرف فرحته نقصه لان عمتي ماموجوده وتفرح باول طفل لوحيدها

راهب،، قبل فتره من رحت ل امي كتلها يمه بجاه بختج عند الله كون انرزق بطفل
لارا امي بختها جبير من زمان

من جنت اوكع بشده تجي هي على بالي
بس اكول بجاه بخت امي تنحل السالفه

امي بخيته تشور اذا واحد غثها تشور بي

بجتني هاي القصيده 💔
تخليت عيشه راهب وامه واخواته من كان صغير
الله يرحمج حجيه

https://www.youtube.com/watch?v=mXn6isNO41I

مره رجعت سكران كلش من شافتني
احتركت روحها طردتني ماخلتني حتى افوت للبيت

كالت بيتي مليان ملائكه لان نضيف لاتجي جايب شياطينك وجاي

لان حركت روحها طحت بمرضه هدت حيلي هد

لارا،، يحجي ومخنوگ الدمعه بطرف عينه

راهب،، من جنت زغير جنت ارجع من المدرسه انتبه لاديها محتركه مجويات اسألها يمه بشنو انجويتي؟؟

تتحجج بالدهن مال الطاوه من اتگلي تكول يطفر عليه الدهن
ماجنت ادري اديها محتركه من نار التنور والخبز للعالم

لارا،، حجاها وبجه ماتحمل صرت ابجي وياه

مسح دموعه وكمل كلامه

جنت اتمنى من تحبلين نجي نبشرها

لارا،، لزمت ايده بستها كتله باجر نروح اني وياك الها سوه

راهب،، هاي جيتي منها ماكدرت اصبر الباجر اخذت قاسم ورحتلها

لارا،، تفاجئت بي ماكدر يصبر الباجر رايحلها المغرب

ثاني يوم اخذني للدكتوره جيكت وضعي اصلا ماجنت منتبها لنفسي فايتتني الشهريه لان كانت بوقتها سالفه الولد الراد يقتل راهب وبعدها خوفي المستمر وتفكيري وقلقي على راهب ماخلاني افكر بالشهريه ابد

من حسبت اخر موعد الها كانت فايتتني فوگ موعدها بهواي من اخذتلي الدكتوره سونر

كالت بعدلج اسبوع وتكملين اول شهرين
انطتني مثبتات وفيتامينات اخذتهم وطلعت

وره اسبوعين تقريبا اجت فاطمه علمود موعد موعد عمليتها كانت لازمه گلبها من الخوف
ماتخاف من العمليه
بس تخاف من فشلها

اخذها محمد للدكتوره اتحدد موعد عمليتها
صرفت كومه فلوس بين علاجات وبين المبلغ السلمته للمستشفى

اجرولها العمليه ونجحت كان المفروض يكونون تؤام بهيج عمليات بس البيوض كلهن فشلن اله وحده وبس هذا امر الله ولاعتراض على امره كلشي بي صالح
حبلت بطفله بعدها حاليا بنهاية شهر الرابع
وفاطمه ياهو اليروح للسوك توصي يشتري البتها قراصات تضمهن منا لمن تجيب

راهب يضحك عليها مرات يگلها على كثر القراصات الجمعتيهن البتج هسه تطلع گرعه

اني اخذت سونر وعلى گوله راهب طلع بيه قويسم صغير ساره تگلي يردون يسمون اولادنه على اسمائهم حتى الاولاد يعيدون امجاد الاباء وسوالفهم

عمتي الحجيه بعدلها كم يوم تمر سنه كامله على رحيلها اصعب موقف يتعرضله الانسان هو فقد انسان عزيز عليه الدرجه حتى لو تمر سنين على وفاته تحسه بعده عايش وياك

فطومه من حبلت لحد الان كاعده يمي

احنه الاثنين اخذنه الطابق الجوة لان موزينه علينه صعدة الدرج هي اخذت غرفة عمتي
واني اخذت الغرفه البصف غرفتها

محمد نشلع گلبه مسوي طريق بغداد روحه رده

من كثر مايروح ويرجع
مرات يضل يومين يمها
وبعدها يرجع لبغداد
مايكدر يبقى يمها لان يستحي من راهب

لهنا تنتهي قصتنه اشكركم على تعليقاتكم الحلوه وحماسكم
اتمنى تندعولي ربي يگومني بالسلامه اني وطفلي

وتندعون الفطومه الله يتمم حملها

ولتنسون ساره بدعائكم
دائما اندعيلها الله يرزقها برويهب صغير
ولو تدري بيه هيج اندعيلها تذبحني الف مره ومايبرد گلبها ههههه

زهراء الحسناوي
مساء الخير بنات نزلت البارت مثل ماوعدتكم ❤️
احتمال اخذ ريست فتره طويله لان ايدي اليوم كلش اذتني ورجعت الاعصاب تخدر

الكتابه جداً مؤذية ايدي فد مره
وانوب عيوني قريبا حلبس 😎

من ارجع باذن الله حبدي بتنزل قصه جديده
ب احداث وسرد يختلف عن التعوتو علي
القصه جدا مشوقه احتمال تحبوها اكثر من حبكم لباقي قصصي
اسمها سبع شداد 🌹🌹🌹🌹