رواية راقت لي الفصل الثاني 2 - بقلم ملك محمود

د

=دي ضوابط الخطوبه...عارف لما تتجوزها مش هتلاقي حد يحبك قدها وهيا اكيد بتحبك بس مش عايزه تغضب ربنا

-بس أنا خطيبها ، تبل ريقي بكلمه حتي

=انت لسه غريب عنها بردو...المهم لسه مصمم تفركش

-هو لو الموضوع كدا انا همسك فيها بإيدي وسناني بس ماتحسسنيش اني كيس جوافه في حياتها

=كفايه أنها محسساك بأنك حاجه

-عندك حق ، أما اروح اكلمها وأحاول اغلس عليها

=والله هيا الي هتفكرشها مش انت

بضحك: هروح اغلس بردو

كل مايعجبني بوست أعملها فيه منشن فترد عليا بأيموشن ورد ، حتي مابتردش بقلب أحمر حتي ، أنزلها بوستس تروح معدلالي الأخطاء الاملائيه وتسيب المضمون ، دا ايه جلد الذات دا ، بس عمري ماكنت مضايق الا ووقفت جنبي وساعات بحس بخوفها عليا بس مش دايما

-عمال أرن عليك من امبارح مابتردش ليه

=يعني ارد وانا مع خطيبتي يا أسلام

-طب ما انا ببقي مع خطيبتي وبرد عليك عادي

=كنا بنتفسح وكدا ومكناش فاضيين

بضحك: ليه كنتو بتعملو ايه

-الجو الرومانسي كان واخدنا حبتين

=ياسيدي ياسيدي

-ياعم ما انت خاطب ، إحنا هنعملهم ع بعض

=وحياتك انا بنسي اني خاطب ساعات

-يابختي بخطيبتي بقي

=اه والله يابختك

أنا من حقي اكون ذي صاحبي دا ، ما الدنيا حلوه أهي ، امال هيا مقفلاها عليا ليه ، ما انا الي أخترتها ، بس مكنتش اعرف انها بالتقيد دا ، هتعمل ايه يا اسلام ، بس انا بحبها ومن حقي أتحب واحس بالحب دا ، أووف

-عايز أقولك حاجه

=اتفضل

سكت شويه '

-نورهان أنا مش قادر أكمل معاكي

=ليه.. انا عملت ايه

-ماعملتيش بس انتي مش بتحبيني ، دا احنا حتي مبنتخانقش الا كل فين وفين

بحزن: أنا مرتحالك ، وانت ماتعرفش الي في قلبي عشان تحكم عليا

-بس في حاجات كتير ناقصه في علاقتنا ، انتي حتي مش مدياني فرصه اقرب منك للدرجه الي هيا ، أنا بحبك بس انا محتاج اعيش الأيام دي كأنها اجمل ايام حياتي

=في الحلال هنعيشها...لو غضبت ربنا ممكن يحرمك مني أو انا أتحرم منك

-مابقتش قادر أستحمل برود ردك وقله لهفتك واختصارك لكل شئ ، أنا هاجي أخد حاجتي في الوقت الي هتحدديه

سكتت ييجي دقيقه

بتنهيده: ماشي ، انا متاكده أن ربنا هيعوضني خير ، تعالي خد حاجتك بكرا

-أنا اسف

=لا عادي ، انت كنت محترم معايا طول الوقت وعمرك مازعلتني وعارفه انك استحملت ، وانا هجيب الموضوع من ناحيتي قدام أهلي

-اسف للمره التانيه ، سلام

=أستني !

-إيه

=خلاص سلام ، ماعرفش ليه قولتلك استني ، انا أسفه سلام

وهيا بتقفل الفون حسيت بصوت عياطها ، اديلنا مع بعض اكتر من ٣ شهور بضغط ع نفسي ومستحمل بعدها وكلامها المحدود وكسوفها الدايم وحاجات كتير ، أتشيكت ولبست وجه تاني يوم ، من كتر خنقتي وحزني كان باين ع وشي ، أنا مش عايز اسيبها بس مش عارف ايه الي بعمله دا !

وصلت لبيتها !..ابوها الي فتحلي

اتكلمت معاه شويه وهيا كانت في اوضتها ، خليت أبوها يدخل يجيبها ، فطلعت وهيا معاها كل حاجتي الي جبتهالها ، لما شوفت الحاجه من بعيد لقيت جوابات كنت ببعتهالها وماكنتش بترد عليها وفكرتها رمتها ، دي حتي محتفظه بمحفظتي القديمه الي نسيتها هنا قبل كدا وقولتلها انا اساسا هشتري واحده غيرها !..

-أدخلي يا نورهان عشان ننهي الموضوع

بحزن: حاضر يابابا