ورحمت أمك لندمك على اللي عملته دا.
هبعتك ليها بس الصبر يا بنت الصر’مة.
– أنا آسف، بس صاحبة التليفون دا القطر فرمها. الله يكون في عونك ويصبرك. تقريبا مفيش منها حاجة.
صلاح اتصدم ورجع خطوة لورا. التليفون وقع من إيده والرجالة اللي خارجة من الصوان مراقبينه. أما هو فانفصل عن العالم خالص. كل الصدمات بتيجي ورا بعض.
بقي كل اللي بيدور في دماغه: إزاي دا؟ أنا لسه مخلصتش حق أمي؟ لسه مخدتش حقها منها وناري مبردتتش. كل دا بيحصل ليه؟ إشمعنا أنا اللي بيحصلي كدا؟ ما كنا عايشين مرتاحين. كل اللي حصل لينا دا بسبب دخول اللي مايتسموش سيد كارثة في حياتنا. وأكيد فدوة كانت مشتركة معاه في كل حاجة، مهي متعرفش تعمل كدا لوحدها.
أنا هتجنن. مبقتش عارف أعمل إيه؟ يا رب بقي أنا تعبت. كل دا ذنب تمارة وأختها اللي اتبليت عليهم. فين أرضيكم يا بنات فتحية عشان أركع تحت رجليكم تسامحوني على اللي حصل، يمكن ربنا يرضى عني. بس اللي انكسر مبيتصلحش. وأنا كسرت فيكم حاجات كتير أنا وأختي، وخصوصا البنت التانية جوري. كسرنا ثقتها في نفسها. يا رب ارضي عني. أنا والله ما ناقص إختبار تاني. يا رب ارضي عني وارحمني بقي.
صلاح وقفته بقت مش متزنة وجسمه بدأ يرتخي ويطوح يمين وشمال.
الرجالة أخدت بالها منه وجروا عليه سندوه.
صلاح بص لهم وبص السما وغاب عن الوعي نهائي.
……….
فجأة قطع كلامهم الباب اللي خبط واتفتح ودخل منه اللي عصب نوح وخلى ودانه تحمر.
نوح قام مرة واحدة وقال:
– إنت إيه اللي جابك هنا تاني؟
الدكتور نفخ بضيق وقال:
– والله أنا جاي أشوف شغلي يا نوح بيه. مش بلعب هنا. هي شغلانة زي الزفت أصلاً.
قرب من تمارة. بس قبل ما يلمسها لقي نوح ماسك إيده وعينه بتطق شرار. بص له بغضب وقال:
– هو أنا أذنت ليك تدخل؟ لأ، وكمان جاي بكل بجاحة تقرب منها. مش شايفني قاعد قدامك ولا أنا قرطاس جوافة.
الدكتور ضحك بسماجة وقال:
– على فكرة اسمها ترمس الجوافة مش بتتحط في قرطاس.
لينا وجوري ضحكوا بصوت عالي. تمارة ابتسمت بضعف، لكن صدر منها صوت. نوح انتبه ليه.
نوح رفع حاجبه وقال:
– إخلص شوف عاوز تعمل إيه وأنا هعمله.
الدكتور استغفر في سره وقال:
– هشيل المحلول ليها. اتفضل شيله.
نوح قرب من تمارة ومسك إيديها وبص في عينيها جامد. سرح ونسي الوضع كله ومعملش اعتبار لمركزه.
تمارة خدودها احمرت ودورت وشها الناحية التانية. ونوح كان لسه تايه وهيمد إيده ويدور وشها تاني ليه، لكن ذكية نبهته وقالت:
– أي يا نوح، الدكتور وراه حالات تانية. يا رب نخلص عشان الموضوع بقى أوفر ومكشوف للكل.
نوح اتحمحم وقال:
– احمم.
وبص للدكتور وقال:
– تعال اقف جنبي هنا قولي أعمل إيه.
الدكتور اتقدم خطوة وفصل الكالون. وخطى مكانها من غير ما يلمس إيد تمارة. وميل على ودن نوح وقال:
– على فكرة إحنا كمان بنعرف نحب وبنغير على اللي بنحبهم. متأكد إن قصتك هتبقى فيها شبه من قصتي عشان كدا أنا عاذرك يا نوح. أينعم رخمت عليك، بس دا كان جزء بسيط من اللي حماتي وابنها عملوه فيا. فـ بالتوفيق يا بطل، وأجمد إنت لسه في أول الطريق.
الدكتور اتعدل في وقفته وكان ماشي. نوح بص عليه وابتسم بجنب وقال:
– متخافش عليا يا دكتور.
إن كنت إنت حبيب فـ أنا عم الحبيبة.
وإن كان واجهتك صعبات في حبك فـ أنا مش هسمح لـ دا يحصل.
ولو كان حماك وأخو المدام طلعوا عينك فـ إنت متعرفنيش أنا نوح التوبي. أنا الكينج يعني محدش يأثر عليا إلا هي وبس.
الدكتور ابتسم وخرج وهو بيقول:
– دا إنت هتشوف أيام أسود من قرن الخروف.
قال نوح التوبي:
– هتشوف نوح التوبي هيقدر يعمل إيه.
نوح رجع لقي جوري ساعدت تمارة إنها تقعد تاني نص قاعدة. كان هيقرب منها بس ذكية سبقته وقالت بحنان:
– إنتي كويسة يا تمارة؟
تمارة هزت راسها بإيجاب وقالت باحترام:
– أيوة، شكرا لحضرتك يا ذكية هانم.
ذكية لسه هترد عليها لكن لينا سبقتها وقالت:
– اسمها نانا. أنا اتفقت معاها على كدا خلاص.
ذكية ضحكت وقالت:
– آه منك إنت يا ضغننة يا شقية.
نوح قعد على سريره تاني وحط إيده على جرحه ومش بيتكلم.
كمال دخل فجأة ولمح نوح اللي شاور ليه بدماغه. حركة هو فهمها. أدى الأكل ليهم وقال:
– بالهنا على قلبكم.
قعد جنب نوح وقال:
– في إيه؟
نوح فرد كفه لـ كمال لقي الجرح بتاعه فتح. لسه هيتكلم لقي نوح بيقول:
– مسمعش صوتك. مش عاوز حد يحس بحاجة. إحنا هنخرج بهدوء من هنا نخيط الجرح تاني.
كمال هز رأسه بإيجاب وسند نوح عشان يخرج. لكن ذكية لاحظت وقالت بقلق:
– إنتوا رايحين فين؟
نوح ابتسم وقال:
– أنا بس زهقت زي ما إنتي شايفة. همشي شوية وارجع. متقلقيش.
ذكية بقلق:
– بس إنت لسه تعبان يا نوح.
نوح ابتسم وقال:
– متقلقيش يا نانا. أنا بس همشي عشر دقايق وارجع.
دولت في البيت قاعدة على الكنبة وحاطة إيدها على بطنها وبتقول:
– كنزي السمين. إنت الوحيد اللي هتخليني أكوش على كل حاجة. ومش بس كدا هتخليني كمان أذل بنات فتحية وأكسر هنيهم. وخصوصا مقصوفة الرقبة الكبيرة تمارة.
أيمن دخل وقعد على أول كرسي وحط إيده على دماغه وهو بيقول في نفسه:
– برضوا مش هيأس وهفضل أدور عليكم لحد ما ألقاكم. يا ترى حالكم إيه بعد فتحية؟ يا ترى الدنيا عملت فيكم إيه؟ عايشين إزاي؟ واكلين وإلا جعانين؟
فاق على صوت دولت وهي بتقول:
– برضوا ملقتهومش؟
أيمن هز رأسه بالنفي وقال:
– لأ ملقتهومش، بس هفضل أدور عليهم لحد ما أرجعهم لحضني. يمكن أقدر أعوضهم على اللي حصل زمان. أعوضهم حنان الأب اللي معرفوش عنه حاجة غير في المسلسلات.
دولت بود مصطنع:
– بإذن الله تلاقيهم يا أيمن. وأنا أوعدك هقيد ليهم صوابعي العشرة شمع. ومش بس كدا هشيلهم من على الأرض شيل. متزعلش إنت نفسك بس يا أخويا. تحب أجهزلك الغدا؟
أيمن هز رأسه بالنفي وقال:
– لأ مليش نفس. هدخل أريح شوية يمكن أعرف أفكر وأوصل لمكانهم.
دولت في سرها:
– يا رب يكونوا ماتوا وإلا ولعوا بجاز وسخ. أهم يحصلوا أمهم برضوا.
كمال مسند نوح وقال:
– ناوي على إيه يا كينج؟
نوح ابتسم بـ خبث وقال:
– ناوي آخد خطوة جد يا برنس. لأ ومش بس كدا. تؤ تؤ، دا هتأهل للجواز على طول.
كمال وقف وقال:
– إنت بتقول إيه؟ دا إنت مدشش وهي هي بتفرفر جوه.
نوح ضحك وقال:
– مهو مش أنا اللي هعمل. ذكية حبيبة قلبي هي اللي هتعمل كل حاجة. يعني مش هيعدي الأسبوع دا وتمارة هتبقى مراتي يا برنس.
كمال بخبث:
– وأهو اللي كنت بتاخده منها في الحرام تاخده في الحلال يا كينج.
نوح بص له بصدمة وجمع قوته وضربة بكوع رجله تحت الحزام وقال بعصبية:
– كمال متنساش نفسك وتحط حدود في موضوع تمارة دا بالذات.
كمال حس أنه زودها فعلا وهز رأسه بإيجاب واعتذر.
نوح دخل للدكتور بعصبية وقال:
– لملم الجرح دا واكتبلي أنا وهي على خروج. اخلص ومش عاوز نقاش في الموضوع دا.
أظن أن الأوان إننا نرجع مصر دلوقتي. ابنك متصاب وإنتي حتى مفكرتيش تتصلي تطمني عليه؟
وهيبة ردت ببرود وقالت:
– ما الأخبار طمنتنه عليه وقالوا الرصاصة في كتفه يا علاء. متكبرش الموضوع.
علاء:
– إنتي إيه بتكرهي ابنك كدا؟ عندك فتور منه ليه؟ أفهم.
وهيبة بعصبية:
– مش بكره، بس مش قادرة أتعامل معاه من ساعة ما اختار أمك وفضل معاها في مصر. أنا اتحايلت عليه يجي معانا وهو مرضيش. يبقى خلي جدته تنفعه.
علاء بحاجب مرفوع:
– وإنتي إيه مشكلتك مع أمي بقي؟
معنديش مشكلة معاها سوي إنها ست بلدي وعايشة في بيئة متناسبناش.
علاء هز رأسه بالنفي وقال:
– أمي ست بلدي. طب ما تبصي لنفسك. دا أنا جايبك من ورا الجاموسة. خلاصة المكان، هننزل مصر على أول الأسبوع يعني هتنزل مصر. فجهزي شنطك.
وهيبة في نفسها:
– ماشي يا علاء. إن ما وريتك و خليتك تجبني هنا تاني مبقاش أنا وهيبة.