رواية عهد بحب كاذب الفصل الخامس والعشرون 25 - بقلم مريم احمد

كانت واقفة لوحدها في الخطوبة بعد ما سارة راحت تشوف سحر وداليا راحت تكلم أمهم. اتفاجئت لما سمعت صوت بيقولها: "عقبال خطوبتنا." وبالفعل مكنش حد غيره، هو يوسف. ابتسمت بسخرية واتكلمت وهي بتقول: "عهد: دا على أساس إني مجنونة عشان أوافق أتخطبلك ولا إيه؟ ضحك وقالها: "يوسف: لا، إن جيتي للحق فأنا اللي مجنون." هزت دماغها وقالتله: "عهد: طب كويس إنك عارف يا بشمهندس."

ومشيت راحت لسارة بعد ما أقنعت نفسها إن سحر بأسئلتها وتطفلها أحسن بكتير من إنها تتكلم مع اللي اسمه يوسف دا. مسك التليفون وبعتلها رسالة على الواتساب بيقول فيها: "يوسف: كلها مسألة وقت مش أكتر، كدا كدا هتبقي خطيبتي ها." بس هي مخدتش بالها من التليفون أصلًا. راحله محمد وهو بيقوله: "محمد: أمك بتنادي عليك بقالها ساعة." هز يوسف دماغه يمين وشمال وقال له: "يوسف: مخدتش بالي." هز محمد دماغه وقال له:

"محمد: طيب روح شوفها كانت عايزة إيه." ومشوا راحوا لطربيزة العيلة. عند عهد وسارة، كانوا هما الاتنين حرفيًا هيتجننوا ويخلصوا من أسئلة سحر، واللي زاد بقى إن داليا كمان كانت بتتسال معاهم. "سحر: عندك كام سنة؟ ردت عليها داليا بسؤال وهي بتقولها: "داليا: طنط، هو حضرتك موظفة؟ استغربت سحر وقالت لها: "سحر: وإنتي بتسألي ليه؟ هزت داليا دماغها بلامبالاة وقالت لها:

"داليا: أبدًا، أصل حضرتك عمالة تسألينا أسئلة متتسألش غير واحنا بنعمل البطاقة تقريبًا." حاولوا سارة وعهد إنهم ميضحكوش على منظر سحر والضيق اللي ظهر على تعابير وشها. جه وقت البوفيه. اتكلمت سارة وهي بتقول لهم: "سارة: طب يلا يا جماعة عشان أنا جوعت الصراحة." وقاموا هما التلاتة يروحوا عند البوفيه. كانت داليا بتتكلم مع سارة عن سحر وهي بتسألها مين دي.

وعهد كانت واقفة بعيد عنهم بشوية صغيرين لأنها كانت ماسكة تليفونها ومخدتش بالها إنهم مشيوا شوية. سمعته وهو بيقولها: "يوسف: مش حلو الأكل ولا إيه؟ مردتش عليه، وهو قال لها: "يوسف: أطلبلك أكل دليفري طيب." مردتش عليه، وهو قال لها بهزار: "يوسف: إنتي اتخرستي ولا إيه؟ كلمته ضايقته جدًا واتكلمت وهي بتقول له: "عهد: اسمع، لو فاكر باللي بتقوله ده إنك كدا ظريف وأنا هوافق، يبقى تنسى خالص، ماشي؟

أنا استحالة أصلًا أخليك تيجي تكلم أبويا." ابتسم واتكلم بسخرية على كلامها وهو بيقول لها: "يوسف: ومين قالك أصلًا إني عايز أعرف رأيك ولا قرارك؟ أنا أصلًا مكلم أبوكي من أسبوع واتفق معايا إني هاجي أنا وأهلي يوم الجمعة اللي هو بعد بكرة يعني." اتصدمت عهد ومعرفتش ترد عليه وهي مش مستوعبة إزاي أبوها مقالهاش، وهو مشي لما جت سارة وداليا. اتكلمت سارة بزهول وهي بتشاور على الطبق اللي في إيد عهد: "سارة: إيه ده يا عهد؟

معقولة كل دا ومحطتيش أي حاجة عشان تاكلي؟ بس عهد كانت بتفكر ليه أبوها مقالهاش ومردتش عليهم، ودا خلاهم يستغربوا جدًا. "داليا: عهد، إنتي كويسة؟ قالت سؤالها وهزت كتف عهد، ودا خلى عهد تفوق أخيرًا من تفكيرها. اتكلمت عهد وهي بتقول لداليا: "عهد: داليا، أنا عايزة أمشي." استغربت داليا وقالت لها: "داليا: هو فيه إيه؟ اتضايقت عهد جدًا وقالت لها: "عهد: سمعتي أنا قولت إيه؟ عايزة تفضلي هنا إنتي حرة، بس أنا همشي."

زعلت داليا من أسلوبها في الكلام معاها، وبصت لسارة وسارة بصتلها بمعنى "معلش"، وقالت لعهد: "سارة: خلاص يا عهد، بس خليكي شوية عشان ندى متزعلش." اتكلمت عهد بضيق وهي بتقول لها: "عهد: معلش، بس أنا فعلًا عايزة أمشي." بصت لداليا وقالت لها: "عهد: هتفضلي؟ هزت داليا دماغها بمعنى لأ، ومشيت هي وعهد. وسارة رجعت تاني لطربيزة أهلها، بس اتنهدت بضيق لما لاقت سحر موجودة. اتكلمت سحر وهي بتقول لها: "سحر: أومال فين عهد؟

"سارة: مشيت هي وداليا." اتكلم محمد باستغراب وقال: "محمد: هي داليا كانت هنا؟ هزت سارة دماغها وقالت له: "سارة: أيوا." عدى وقت مش قليل، كانت عهد وداليا وصلوا البيت. وأول هالة شافتهم قالت لهم: "هالة: إيه دا؟ سيف كان لسه هيروح يجيبكوا!! اتكلمت عهد وهي بتقولها: "عهد: هو بابا رجع؟ هزت هالة دماغها وقالت لها: "هالة: أيوا، في البلكونة هو وسيف." مشيت عهد للبلكونة، وهالة بصت لداليا باستغراب وهي بتقولها: "هالة: هو فيه إيه؟

هزت داليا دماغها يمين وشمال بعدم معرفة وقالت لها بزعل: "داليا: معرفش بجد، واتعصب عليا أصلًا." طبطبت هالة على كتفها وقالت لها: "هالة: حقك عليا أنا يا بنتي." في البلكونة، اتكلمت عهد وهي بتقول لأبوها مع مراعاة إنها تتكلم بأدب عشان ميزعلش منها: "عهد: بابا، هو ليه حضرتك مقولتليش إن يوسف اتفق معاك على معاد؟ اتكلم صادق بزهول وهو بيقولها: "صادق: هي أمك مقالتلكيش؟ خلص سؤاله وبص لسيف، وهي اتفاجئت إن أمها عارفة، واللي

فاجأها أكتر إن كلام سيف: "سيف: أنا المفروض قولتلها، وهي قالتلي هتقولها." ابتسمت عهد وقالت لهم: "عهد: واو، بجد مش مصدقة إن كلكم تبقوا عارفين وأنا لأ!!! استغرب صادق وقالها: "صادق: فيه إيه يا عهد؟ أنا وأخوكي ديما في الشغل، وأمك تلاقيها نسيت عادي." سكتت عهد ومتكلمتش، وسيف قالها: "سيف: إنتي مضايقة؟ هزت عهد دماغها وقالت له: "عهد: أيوا يا سيف." رد عليها صادق وهو بيقولها: "صادق: ليه يا بنتي؟

دا بني آدم ناجح في حياته، وألف مين يتمنى إنها تعيش ربع العيشة اللي هتعيشيها دي، كفاية إنك مش هتبقي شايلة هم القرش زيي أنا وأمك." "عهد: ألف واحدة غيري بس مش أنا يا بابا، كان لازم تقولولي." زعل سيف عليها، وصادق اتكلم وهو بيقولها: "صادق: يعني كنت عايزني أرفض من قبل حتى ما يجوا ونتكلم؟ دي أي أصول؟ دا رحيم اللي محدش فينا كان طايق فكرة إنه يخطب بنت عمك، جه هو وأهله." رد سيف وهو بيقول: "سيف: خلاص يا عهد، متزعليش."

هزت عهد دماغها وقالت له: "عهد: يعني إنتوا هتبقوا مبسوطين لما يجوا يعني؟ تمام، أنا بقى مش هخرج، وابقى بلغوهم رفضي، عن إذنكم." قالت كلامها ومشيت في اتجاه أوضتها. وسيف قال لصادق: "سيف: زعلت؟ "صادق: عشان مش عارفة مصلحتها. أنا لو مش متأكد إنه بيحبها استحالة كنت وافقت أصلًا." عند يوسف، كان واقف هو ومحمد بيتكلموا. "محمد: مش فاهم، يعني إنت ناوي تقولهم إمتى إنك رايح تخطب؟ يعني يوميها؟

"يوسف: أكيد مش يوميها، يعني بس في نفس الوقت أنا متأكد إن أمي مش بتحبها وإنها مش هتوافق، فعشان كدا مقولتش لحد." كمل بتهديد وهو بيقول: "يوسف: ومحدش يعرف يا محمد غيرك، عشان لو عرفت إن حد عرف هتبقى إنت و... قاطعه محمد كلامه وهو بيقول له: "محمد: يا عم مش هقول لحد، اسكت بقى." هز يوسف دماغه بمعنى ماشي. في أوضة عهد، كانت داليا قاعدة معاها وهي بتقول لها: "داليا: يا عهد، فيه إيه؟ ما تتكلمي!! ردت عليها عهد وهي

الدموع في عيونها وبتقولها: "عهد: إنتي كنتي عارفة إن يوسف جاي بعد بكرة يتقدملي؟ اتصدمت داليا وقالت لها: "داليا: نعممم؟ هو يوسف هيتقدملك يا عهد؟ استغربت عهد، بس هزت دماغها بمعنى أيوا، وقالت لها: "عهد: وكلهم كانوا عارفين ومقالوليش." اتكلمت داليا وهي بتسألها وبتقولها: "داليا: هو إنتي مش موافقة؟ هزت عهد دماغها بنفي وقالت لها: "عهد: إنتي بجد بتسألي؟ أكيد لأ." ابتسمت داليا وقالت لها:

"داليا: خلاص يا عهد، متزعليش، يعني أصلًا أحسن، دا بني آدم مغرور." هزت عهد دماغها وقالت لها بتوعد: "عهد: وأنا بقى هرفض و...