رواية عمياء وسط الذئاب الفصل الثالث والستون 63 - بقلم محمد طه

_ميري _الباشا حدد لنا هدف من الفريق بتاع نور. ولازم نصفيه بسرعة وبهدوء. _سهيله _مين فيهم؟ _ميري _سمر والتنفيذ النهارده. _سهيله بثقة _أنا جاهزة.. ولو عايزاني أروح أنفذ لوحدي.. موافقة. _ميري بسخرية _سهيلة لوحدها.. عايزة تروح تقف قدام سمر؟ _سهيله بثقة _وأقف قدام عشرة زيها.. ولو قدراتك ضعفت يا ميري.. فأنا قدراتي لسه بخيرها. (وتاخد نفس من السيجارة بغل) _عند جده نور (علي ونهلة من خارج البيت) _نهله

_ما تفهمني يا علي إنت رايح فين؟ _علي _رايح أدور على سمر.. ومش هرجع إلا لما أوصلها. _نهله _هوا عنوان هتسأل عليه لحد ما توصل ليه.. أنا عارفة وإنت عارف ومتأكد إنك مش هتعرف توصلها. _علي بإصرار _هحاول وإن شاء الله هوصلها. خدي التلفون ده خليه معاكي. وأنا كل وقت والتاني هكلمك. _نهله _ولو جدتي سألتني عليك؟ _علي بعد تفكير _قوليلها نزل يدور على شغل. _نهله بخوف _علي.. هيا نور ممكن يكون حصل لها حاجة؟ _علي

_إن شاء الله نور هتبقى كويسة.. وهترجع لنا بالسلامة. _في المستشفى (غرفة المديرة) _الدكتورة بعصبية _لازم أوصل لسمر.. هيا الحل الوحيد اللي قدامي. _أم محمد _سمر دي عشان نوصلها محتاجين معجزة. وبعدين يا دكتورة احتمال كبير.. إنها تكون ما تعرفش حاجة. وبعدين إحنا ليه مقدمين الشر.. مش يمكن يكون الدكتور بيعمل لها العملية دلوقتي.. وكل حاجة ماشية تمام. _الدكتورة _يارب.. يارب يا أم محمد.. يارب ظننا يخيب.. ونور تبقى كويسة.

بس أنا هفضل قلقانة عليها.. لحد ما أطمن عليها. (وتتصل بعلي) (ونهلة ترد عليها) _نهله بلهفة _أيوه يا دكتورة وصلتي لنور؟ _الدكتورة _اطمني يا نهلة.. إن شاء الله نور هتبقى بخير. اديني علي عايزاه. _نهله بصوت واطي _علي.. نزل يدور على سمر. _الدكتورة بعصبية _نزل يدور عليها فين بس.. إحنا لو نعرف هيا فين.. كنت نزلت دورت عليها بنفسي. إنما إحنا لا نعرف هيا من محافظة إيه أو بتشتغل إيه. _نهله

_والله يا دكتورة قولت له إنه مش هيعرف يوصلها.. وهوا أصر وقال مش هيرجع غير لما يوصلها. _الدكتورة _طيب هوا معاه تلفون؟ _نهله _لأ.. بس هوا قال كل وقت والتاني هيتصل. _الدكتورة _لما يتصل تقولي له الدكتورة بتقول لك يا ترجع.. يا تروح للدكتورة المستشفى.. وتأكدي عليه. _نهله _حاضر يا دكتورة.. وحضرتك لو عرفتي.. أي حاجة عن نور ابقي طمنيني. _الدكتورة _حاضر يا نهلة.. وحاولي ما تخليش جدتك تحس بحاجة. (وتقفل السكة مع نهله) _الدكتورة

_بقولك إيه يا أم محمد.. روحي ابعتيلي شاكر بسرعة. _أم محمد بتردد _شاكر.. وحضرتك عايزة شاكر ليه؟ _الدكتورة بهدوء _أم محمد أنا عارفة إنك عايزة تبعدي شاكر.. عن أي مشاكل.. بس هو الوحيد اللي هيقدر يساعدني. _أم محمد بقلق _هوه حضرتك ناوية على إيه؟ _الدكتورة _هسافر أنا وشاكر على ألمانيا. _أم محمد بعدم استيعاب _وهتدوروا عليهم إزاي في ألمانيا؟ _الدكتورة _هنا هيكون دور شاكر. هنراجع الكاميرات اللي في المطار اللي نزلوا فيه..

وهنمشي في كل طريق مشيوا فيه.. لحد ما نوصلهم وإن شاء الله هنوصلهم. _عند النادي اللي بتدرب فيه سمر _سمر خلصت التدريب وخرجت من النادي.. وبحكم إنها ساكنة قريب من النادي.. ف بتمشي من النادي لحد البيت.. وف نص الطريق.. وف شارع جانبي سمر بتعدي منه.. تتفاجئ سمر بميري قدامها.. تبص وراها تلاقي سهيلة. تركن سمر الشنطة اللي شايلاها على جنب.. وتستعد للاثنين. _ميري تطلع سيجارة وتولعها.. وتشاور لسهيلة بالتعامل مع سمر.

ويبدأوا الاتنين سمر وسهيلة يضربوا بعض. فضلوا يضربوا بعض حوالي نص ساعة.. لحد ما سمر أتمكنت من سهيلة.. وضربتها ضربة قوية وقعتها على الأرض. وبدأت سمر تقرب منها عشان تخلص عليها. ميري تخلص السيجارة وتطلع مطوة بسرعة.. وترميها بقوة على سمر.. تيجي المطوة في ضهر سمر.. بين كتفها والعمود الفقري. وبسرعة سمر تبص لميري. وف نفس الوقت سهيلة تقوم من ورا سمر.. وتدوس على المطوة تدخلها كلها في سمر. وسمر تصرخ وتلف بسرعة لسهيلة.

وتضربها بقوة في وشها. وتقرر سمر إنها تجري وتهرب منهم. وفضلوا يطاردوها حوالي ساعة. وهما بيطاردوها سمر طلعت التلفون بسرعة وصورتهم. وبعدين قدرت تهرب منهم. وقوتها بدأت تضعف من كتر الدم اللي نزفته. وبدأت تطلع التلفون وتتصل بسمير. لكن تلفون سمير غير متاح. _وبدأت تكلم نفسها _يعني يا سمير وقت ما أحتاجك مش هلاقيك. إنت كل ما بتحتاجني بتلاقيني. وعمري ما اتأخرت عنك. إيه يا سمر هوا سمير في الشارع اللي وراكي.

دا في ألمانيا هيساعدك إزاي بس. وبعدين هما مين دول.. وعايزين مني إيه. وبعدين أنا هروح فين دلوقتي. أكيد هيبقوا عارفين النادي.. وعارفين البيت. آه آه آه والمطوة اللي في ضهري دي هطلعها إزاي. _المقر الرئيسي للباشا الكبير _الباشا الكبير _حمدلله على السلامة يا نور.