رواية عمياء وسط الذئاب الفصل السبعون 70 - بقلم محمد طه

_الباشا بغضب _المفروض قبل ما كنت تسمع لكلامها المقنع جداً.. كنت تعملها إختبار وتتأكد.. إن العملية اللي اتعملتلها.. هيا العملية اللي أمرنا بيها. _فهد بصدمة _مستحيل.. مستحيل يكون الدكتور.. عمل عملية غير اللي أمرنا بيها. وبعدين أنا ملاحظتش عليها حاجة غريبة. _الباشا بتحذير _البت دي خطر وهي عميا.. فما بالك لو فتحت وشافت النور! _فهد _أنا هختبرها مرة واتنين وتلاتة.. لحد ما أتأكد إنها عميا. _الباشا _وقت إختبارك ليها فات..

وإحنا مش عايزين نخليها تحس إن إحنا شاكين في حاجة.. ولآخر مرة بحذرك، إحنا بنتعامل مع قنبلة. _فهد _أوعدك يا باشا إن الغلطة دي مش هتتكرر تاني.. بس إحنا لازم نختبرها ونتأكد إنها عميا. _الباشا _أنا اللي هختبرها بنفسي. (في غرفة العمليات) _نور بدموع في سرها تفتكر الكلام.. اللي الباشا قالوا عن سمير. (سمير أخد حقنة وحاجة من الاتنين.. يا إما هيموت يا إما هيعيش اللي باقي من عمره.. عبيط مجنون يعني) _نور بدموع

_إن شاء الله سمير مش هيموت.. والنبي يا رب أحفظه والنبي يا رب.. أنا متأكدة إن سمير شجاع وعنده إرادة.. ومش هيستسلم للموت بسهولة.. كمل معايا يا سمير.. ومتسبنيش وسط الذيابة لوحدي.. ما تسبنيش وسطيهم لوحدي. (وتبدأ نور تتحكم في أعصابها وتفكر) _الدكتور اللي عملي العملية.. أكيد هو اللي حضّر لهم الحقنة.. اللي سمير أخدها.. ولو كان مش هو اللي حضّرها.. أكيد الدكتور ده هيبقى عنده حل.. يبقى الدكتور ده مش لازم يموت..

ولازم أعمل المستحيل عشان الدكتور ده يعيش.. يلا يا سمير.. أنت عليك الخطوة الأولى.. قاوم وما تموتش.. وأنا عليا الخطوة التانية وهعالجك.. يارب يارب يارب يارب. (سجن النساء) _هبه _أخيراً يا بت يا تيحا هخرج للدنيا.. ياااااه أخيراً! _تيحا _يا بختك يا معلمة.. عقبالي أنا كمان.. بقولك إيه يا معلمة.. لما هتخرجي من هنا ناويه على إيه؟ _هبه بتنهيدة _ناوية على كتير أوي يا بت يا تيحا.. طلعالك يا عميا.. أنا وعدتك إني مش هسيبك. _تيحا

_ما بلاش يا معلمة وسيبك منها.. البت العميا دي مش سهلة ومش لوحدها. _هبه بغضب _بت يا تيحا ما تخلينيش.. أطلع الغل اللي جوايا للبت العميا دي فيكي. _تيحا _أنا خايفة عليكي.. طب حتى اصبري لما أطلع.. عشان أبقى معاكي.. وما تبقيش لوحدك. _هبه بكرة وغل _وأنا مش عايزة حد معايا.. عشان أستمتع باللي هعمله فيها.. وبعدين دي بالنسبة لي طفلة.. هي بس استغفلتني.. وأنا اديتلها الأمان بسرعة.. خدعتني بمكرها المستخبي ورا برائتها.

(وتطلع سيجارة وتولعها) _بقولك إيه يا تيحا سيبك من حوار البت العميا ده.. وخلينا في الحوار بتاعنا اللي هنا. _تيحا بعدم فهم _الحوار بتاعنا اللي هنا.. اللي هو إيه يا معلمة؟ _هبه _افتحي مخك معايا يا تيحا.. هوا أنا هخرج من هنا من غير ما أعلم على البت كوثر.. دا أنا ناوية ألعب لها في وشها. _تيحا بتحذير _قصدك ناوية ما تخرجيش من هنا.. إنتي فاكرة لما هتلعبي لها في وشها.. هتخرجي كده عادي أكن ما فيش حاجة حصلت..

اسمعيها من تيحا اللي بتحبك وخايفة عليكي.. بلاش تعملي أي مشاكل هنا عشان تخرجي من هنا. _هبه بنظرة شر _تيحا.. تعرفيلي رقم زنزانة الانفرادي.. اللي متلقحة فيها اللي ما تتسمى كوثر.. والنهاردة قبل بكرة.. وتعرفيلي مين الشويشة النبطشية الليلة. (مكتب مدير السجن) _المدير _ها يا نورة أخبار مهمتك إيه؟ _الظابط نورة _كل حاجة ماشية تمام.. زي ما مخططين ليها. _المدير _لسه برضه مش عايزة حد معاكي يساعدك؟ _الظابط نورة

_يا أفندم القضية دي تخصني.. وإن شاء الله هخلصها لوحدي.. وبعدين هوا حضرتك شاكك في قدراتي ولا إيه.. ولا حضرتك مش واثق فيا؟ _المدير _طبعاً واثق فيكي ومقدر تعبك ومجهودك.. أنا بس عايز أريحك وأشيل عنك شوية.. وأخلي حد يساعدك. _الظابط نورة _المساعد ربنا.. وأنا لو احتاجت مساعدة هبلغ حضرتك.. آه كنت هنسى.. يا ريت حضرتك.. ما تخرجيش كوثر من الانفرادي لحد هبه ما تخرج.. وشدد الحراسة اليومين الجايين دول. _المدير بضحك

_ما تيجي تقعدي مكاني وتدي إنتي التعليمات.. وأنا أقوم أتنكر في زي الشاويش مكانك. (في المستشفى) (غرفة سمير) (سمر بدموع وهي باصة على سمير) _سمر _أوعدك يا سمير إني مش هسيب اللي عمل فيك كده.. مش هسيبه لو كان مين.. ما أبقاش سمر إن ما جبت لك حقك.. وانتقمت لك من اللي آذاك. _وفجأة سمير بدأ يعيط زي الطفل.. وبدأ يكسر كل حاجة قدامه في الغرفة.. وسمر مش عارفة توقفه.. _سمير بقى أشبه بالمجنون اللي محبوس جوه طفل صغير..

والدكتورة جات بسرعة عطتله حقنة مهدئة.. وبعد ما بدأ يهدأ استسلم للنوم. _سمر بخوف وقلق _أنا خايفة على سمير أوي يا دكتورة. _الدكتورة _كلنا خايفين عليه.. بس أنا مش هسيبه.. مش هسيبه إلا لما يرجع زي الأول وأحسن.. كل المطلوب منك يا سمر إنك تستحمليه.. وتتعاملي معاه كأنك بتتعاملي مع طفل. (المقر الرئيسي للباشا الكبير) (إتصال تلفوني مع الباشا) _الباشا _إنت متأكد؟ _المتصل _متأكد يا باشا سمير في المستشفى. _الباشا

_عينك ما تنزلش من على المستشفى.. وإنتظر مني تعليمات. (الباشا يقفل السكة) _الباشا في سره _إزاي سمير عاش بعد الحقنة اللي أخدها.. كده يا إما الدكتور ما حضرش الحقنة المطلوبة.. يا إما سهيلة ما عطتلوش الحقنة.. يا إما الواد ده لسه له عمر. _ويقوم الباشا يروح عند نور.. ويدخل ويقفل الباب وراه.. ونور كانت قاعدة على السرير وبتبكي.. والباشا فضل يبصلها حوالي 10 دقايق. _الباشا _حمد الله على سلامة رجوع النور لعنيكي يا نور...