رواية عمياء وسط الذئاب الفصل الثالث والسبعون 73 - بقلم محمد طه

سهيله بقلق: ميري فيه إيه؟ ميري: الباشا أمر بتصفيتك والتنفيذ الليله. سهيله: (تبتسم وتطلع سيجارة وتولعها) قولتلك مليون مره يا ميري إنتي ما بتعرفيش تمثلي. (تأخذ نفس من السيجارة) طيب أقولك على سر. ميري: قولي. سهيله: لأ مش هقولك دلوقتي.. هقولك وأنا بطلع ف الروح. ميري: بعد الشر عليكي. إن شاء الله روحي زي ما سبقتك وجات الدنيا الأول.. هتسبقك وهتخرج من الدنيا الأول.. يلا قومي معايا. سهيله: على فين؟

ميري: الباشا عايزنا عشان هيراجع خطة تصفية هبة. *** المقر الرئيسي للباشا الكبير الباشا: دلوقتي يا نور أنا أقدر أقولك إيه المطلوب منك بالظبط.. لأنك خلاص بقيتي واحد مننا. نور: وإيه بقي هوا المطلوب مني؟ الباشا: المطلوب منك هوا عقلك يا نور.. المطلوب منك يا نور أفكار جديدة.. وطرق جديدة وناس جديدة.. المطلوب منك يا نور توفير الأمان.. لأصحاب المتعة الجنسية. نور (في سرها) : الله يخرب بيتك.. دا أنته شيطان.

الباشا: وفيه حاجة مهمة كمان يا نور. نور: هوا لسه فيه تاني؟ الباشا: فيه تاني وتالت ورابع.. بس مفيش مشكلة نشتغل الأول على اللي قولتهولك.. طبعاً فهد هيكون معاكي.. وهيبقي معاكي كمان.. البنتين اللي استقبلوكي ف المطار.. بالاضافة للدكتور اللي إنتي اخترتيه يكون معاكي.. فيه أي أسئلة عايزة تسأليها؟

نور: الأسئلة اللي عندي.. إجاباتها مش هتكون صريحة.. بس أنا عندي استفسار بسيط واتمنى يكون الرد مقنع.. أنا المفروض إني أذيتك.. كشفت ناس كانت شغالة معاك.. واتسببت ف موت ناس.. ووقفتلك مكان اللي هوا المستشفى.. يعني المفروض إنك تأذيني.. مش هوا أنته تشغلني معاك؟ الباشا: من الغباء يا نور.. إن الواحد يشوف عدوه ذكي.. ويفكر إنو يتخلص منو.. ودا أول درس هعلمهولك يا نور.. لو قابلتي عدو ذكي.. حاولي تصاحبيه وتخليه ف صفك. نور

(في سرها) : دا أنا اللي هعلمك دروس عمرك ما هتنساها. *** سجن النساء مكتب المدير نوره: عرفت معلومة خلتني ما بقتش عارفة حاجة خالص. المدير: معلومة إيه؟ نوره: اللي اتسببت ف دخول هبة السجن بنت عميا.. والبنت العميا دي مش موجودة ف القضية نهائياً. المدير: طيب إنتي متأكدة من المعلومة دي؟ نوره: متأكدة يا أفندم.. مع إن نفسي المعلومة تكون غلط.. لأن المعلومة دي خلتني ما بقتش فاهمة حاجة خالص.

المدير: لو عايزة تفهمي يبقي تروحي المكان.. اللي اتقبض على هبة فيه.. لازم تروحي المستشفى وهناك هتفهمي كل حاجة. نوره: فعلاً يا أفندم هوه دا الحل الوحيد.. بس أنا هتجنن.. إزاي بنت عميا.. تتسبب ف القبض على المعلمة هبة. المدير: يا خبر بفلوس ولما هتروحي المستشفى هيبقي ببلاش.. المهم دلوقتي هتروحي المستشفى بصفتك إيه.. ظابط ولا شاويش ولا بعد الشر مريضة؟

نوره: المعلومات اللي عايزة أعرفها.. مش هعرف أوصلها .. غير وأنا حضرت الظابط نوره.. الشرطة النسائية. *** في المستشفى مكتب المديرة نوره: حضرتك الدكتورة سناء؟ الدكتورة: أيوه أنا الدكتورة سناء.. خير ومين حضرتك؟ نوره: أنا نوره.. ظابط من الشرطة النسائية. الدكتورة: أهلاً بحضرتك يا افندم.. خير. نوره: هتعب حضرتك معايا يا دكتورة وترجعلي بالذاكرة شوية.. وتفتكري لما بلغتي عن شبكة منافية للآداب.. واتقبض على بنت اسمها هبة؟

الدكتورة: اه حضرتك أنا فاكرة.. دي حاجة ما تتنسيش. نوره: هبة ف السجن قالت لبنت قريبة منها جداً.. إن اللي اتسببت ف دخولها السجن بنت عميا. (الدكتورة بدأت تقلق منها.. وافتكرت لما حامد جا أخد نور وقالهم إنو من المخابرات) الدكتورة (بقلق) : هوه مش حضرتك القضية خلصت.. وهبة اتسجنت والموضوع فات عليه سنين؟ (نوره حسّت إن الدكتورة بدأت تقلق منها.. طلعتلها الكارنيه بتاعها عشان تطمنلها)

نوره: دا الكارنيه بتاعي وتقدري تتصلي بالشرطة.. وتتأكدي إني ظابط ف الشرطة النسائية.. اطمني يا دكتورة أنا وجودي هنا.. عشان أحمي البنت العميا دي من شر هبة.. وهبة خلاص أيام وهتخرج من السجن.. وأول حاجة هتعملها إنها هتأذي البنت العميا.. اللي اتسببت ف دخولها السجن. *** المقر الرئيسي للباشا الكبير (الباشا ونور تكمل حديثهم) نور: أقنعتني يا باشا.. وعلى رأي المثل.. عدوك الناصح ولا صاحبك الغبي. (وتقول ف سرها) وانت طلعت غبي.

الباشا: وفيه مثل كمان يا نور بيقول.. اللي يحضر العفريت يصرفه.. وأنا زي ما حضرتك أقدر بسهولة جداً أصرفك. (نور تكتفي برسم ابتسامة بريئة) الباشا: على فكرة يا نور.. إنتي نسبة الذكاء عندك مش النسبة.. اللي أخاف أو أقلق منها.. لأني بكل سهولة قدرت أخدعك.. وبما إنك خلاص اشتغلتي معانا وبقيتي مننا.. هقولك على سر. نور (باهتمام) : سر إيه؟ الباشا: فيه واحد من أصحابك بيشتغل معايا……