رواية عشق ارسلان الفصل الثامن والعشرون 28 - بقلم حليمه عدادي

فاتت دقائق من الصمت وحياة بصالة بصدمة والدموع في عينيها. أرسلان قرب منها ومسك وشها بين إيديه بحنان ومسح دموعها. أرسلان: ليه الدموع دي؟ إنتي معرفتنيش ولا إضايقتي لأني مقولتلكيش. حياة: أنا أقدر أعرفك حتى لو غيرت شكلك كله، أنا بعرفك من همسة. لكن ليه خبيت عليا؟ ليه سيبتني أتوجع. أرسلان: كنت عايز أعملهالك مفاجأة، مكنش قصدي أوجعك. حياة: ميهمنيش حاجة، المهم عندي إني شوفتك قدامي بخير. شدها لحضنه وضمها بحب.

أرسلان: لو طلبتي روحي هدهالك، أنا آسف لو زعلتك في يوم. حياة: أنا مقدرش أزعل منك، إنت كل حاجة ليا. أرسلان مسح دموعها وكمل بهزار: إنتي بنت عيوطة. قعد قدامها على ركبه وطلع علبة من جيب بدلته. فتحها. بصت جوا العلبه. كان جواها خاتم رقيق وحلو اوي. أرسلان: حياة، تقبلي تتجوزني وتكملي حياتك معايا. حياة بدموع الفرح: أيوه، أيوه موافقه طبعاً.

نزلت دموعها بفرحة. الكل سقفلهم وانطلقت الألعاب النارية في السماء. مسك أرسلان الخاتم ولبسهولها وباس إيدها وراسها وهي ذايبة من الإحراج. أريان: أنا عجزت وأنا مستني فرحي، عايز اتجوز بقى. أرسلان: خلصنا كل التجهيزات، بكره إن شاء الله هنعمل فرحنا سوى. أريان: أخيراً، أنا استنيت كثير. قعدت العيلة كلها في جو من السعادة والفرح لحد ما الليل جه. بعدها كل واحد راح لبيته. ***

أسيل: أول مرة أشوف السعادة على وشك، ربنا يسعد قلبك ياحبيبتي وأشوفك دائما مبسوطة. حياة بحب: أرسلان هو سبب سعادتي، إنتي عارفه أنا كنت عايشة في جحيم، لكن لما شوفته حسيت إني لقيت ملجأي. هو بالنسبالي أبويا وأخويا وسندي في الحياة. أسيل: أنا كنت بشوف أرسلان دايماً، لكن عمر ما خطر على بالي إنك تبقي مراته، صدفة جميلة. حياة: إنت وأريان كنتوا بتحبوا بعض، لكن محدش فيكم اعترف للثاني بمشاعره.

أسيل: أنا كنت عارفه إنه بيحبني بسبب غيرته عليا. حياة: أنا اتأخرت، هخرج مع أرسلان بالليل. أسيل: علشان كدا مرضتيش تروحي مع عمر. حياة: تعالي علشان تختارى لي فستان مناسب. بعد مدة من البحث عن فستان. أسيل: دا مناسب وهيطلع حلو أوي عليكي. كان الفستان أحمر، ضيق من الخصر وطبقته الشيفون تنزل بوسع، وحجاب أبيض. حطت ملمع لشفايفها. حياة: ها، إيه رأيك. أسيل: ماشاء الله، طالعة زي القمر.

وكملت بهزار: هتروحي لوحدك وإنت زي القمر كدا مش خايفة حد يخطفك. حياة: ماتخافيش، أرسلان هو اللي هيجي ياخذني، مع السلامه أنا همشي، هو مستنيني. حياة خرجت لقيته مستنيها جوا العربية. ولما شافها نزل وبصلها بحب. قرب منها وباس خدودها. حياة بخجل: أرسلان، الناس بتبصلنا. أرسلان بحب: طالعة قمر، شكلك زي الأميرات، مش مهم الناس. أعمل إيه، كل مابشوفك بنسى نفسي. فتحلها باب العربية. ركبت حياة واتحركوا للمكان اللي هيروحوه. ***

وصلوا قدام البحر، نزلوا وقعدوا في مكان هادي. أرسلان: ليه طلبتي إننا نيجي هنا؟ كنت عايز اخذك لمكان أحلى. حياة: دا أجمل مكان، لأن مافيهوش حد، مش عايزة أي بنت تبصلك. أرسلان: حتى لو بصولي بنات العالم كله، أنا مش شايف غيرك إنتي وبس اللي مالية عيني وجوا قلبي. حطت رأسها على كتفه، ضمها لحضنه. أرسلان: حياة، أنا عايزك تجيبيلي أربع بنات ويكونوا كلهم شبهك. حياة: إيه؟ أربع بنات؟ إنت شايفني أرنبة علشان أخلف كل دول.

أرسلان: أنا كبرت لوحدي، علشان كدا عايز يكون عندي عيال كتير. حياة بحب: من النهاردة أنا معاك، إن شاء الله هيكون عندنا ولاد، إنسي اللي فات. أرسلان: أنا بنسى العالم كله وأنا معاكي. حياة: أنا عايزة أمسك إيدك ونتمشى سوى لحد الليل ما ييجي. أرسلان: اليوم كله ليكي، إنتي تطلبي وأنا انفذ. حياة: اممم، إيه رأيك نتسابق واللي يفوز ينفذ طلب. أرسلان بمكر: إنتي متأكده؟ أين كان الطلب. حياة: أيوه، يلابينا نبدأ.

استعدوا للسباق. جه علشان يجري، لكن حياة صرخت بألم. رجعلها قعد علشان يشوف فيها إيه. لكن حياة زقته وكملت جري وهي بتضحك بصوت عالي. حياة: أنا اللي فوزت، يلا نفذ طلبي. أرسلان بحنق: دا إسمه غش، إنتي زقتيني وجريتي. حياة: محدش قالك تصدقني، يلا بسرعة نفذ طلبي. أرسلان: طيب يا أميرتي، إيه هو طلبك. حياة: عايزة علبة شوكولاته.

مسكت إيده زي الأطفال والابتسامة على وشها. أرسلان اشتري لها علبة شوكولاته وبعدين قعدوا وبدأ يأكلها الشوكولاته في بوءها وهي حاسة بالإحراج. أرسلان: إنتي مكسوفة ليه؟ إنتي مراتي، عايزك تأكليني حتة شوكولاتة بإيدك الحلوة دي. مسكت واحدة وحطتها في بوءه، أكلها وباس إيدها. حياة: أرسلان، سيب العربية هنا، هنروح للبيت مشي. أرسلان: خلينا نروح ناكل حاجة في أي مكان.

قعدوا يتمشوا، بعدها راحوا للمطعم، طلب لها الأكل اللي بتحبه وقعد يأكلها بإيدوا بكل حب. *** أسيل كانت قاعدة على المرجيحة جنب النهر وأريان قاعد جنبها. أسيل: اول مرة شوفتك فيها لما كنت متعصب عليا، هي دي أول مرة تشوفني فيها. أريان: أنا حبيتك من تلات سنين. أسيل بصتله بصدمة.

أريان كمل كلامه: أول مهمة ليا هنا، كنت بدور على شغل علشان محدش يشك فيا، دخلت المكتبة وشوفتك هناك ومن ساعتها منستش نظرة عينيك اللي سحرتني. كنت كل يوم اقعد جنب المكتبة علشان أشوفك. كنت بتعصب لما أشوف راجل داخل يشتري حاجة. لكن لأني كنت في مهمة كنت ببعد عنك علشان متكونيش نقطة ضعفي. أسيل: أنا مكنتش أعرف معنى الحب لحد ماشوفتك، كنت بحب عصبيتك وإهتمامك بيا وغيرتك عليا.

أريان: أنا لما بدأت اشتغل قررت إني مش هحب ولا أسمح لأي بنت إنها تدخل قلبي، لأن شغلي صعب وحطيت قوانين. لكن لما شوفتك كسرتي كل القوانين. *** الدنيا ظلمت وأرسلان وحياة لسه بيتمشوا لحد ما حياة تعبت. حياة: أنا تعبت أوي، خلينا نقعد شوية. أرسلان: تعالي نقعد. حياة، أنا عايز أسألك سؤال، إيه هو الإسم اللي حابه تناديني بيه؟ أرسلان ولا رماح. حياة: أنا حبيت أرسلان اللي بيبيع الخشب، مش القائد رماح. أرسلان هو حبيبي.

أرسلان: قلب أرسلان. إنتي الوحيدة اللي حبتني وماهمهاش كل وشي. حياة بحب: أنا حبيت قلبك الحنين وروحك الجميلة. أرسلان: إتأخر الوقت، يلا نروح، بكره هنبدأ تجهيزات الفرح. حياة: أنا تعبت شويه. أرسلان شالها بين إيديه. شهقت حياة: إنت بتعمل إيه؟ نزلني يا مجنون، الناس بتبص علينا. أرسلان: أنا مستعد إني أشيلك طول عمري ومش هتعب. حياة: كل يوم بحبك أكتر من اليوم اللي قبله. وصلوا للعربية وروحوا البيت.

وصل قدام البيت جت علشان تنزل لكن رجعت تاني. حياة: كنت بتمنى إن أهل القرية كلهم يحضروا فرحنا. أرسلان: القاعة صغيرة، مش هتكفي الكل. حياة: حبيبي، تصبح على خير. مسك إيدها وباسها بحب. أرسلان: ليلة سعيدة. دخلت البيت، كانوا كلهم نايمين. دخلت أوضتها ومددت على سريرها، كانت مبسوطة أوي. الصبح بدري فاقت حياة على أصوات عالية جاية من برا. طلعت من أوضتها علشان تشوف في إيه. ولما خرجت بصت قدامها بصدمة من اللي شافته.