قرب مصعب منها وباسها من شفايفها، وملك استجابت معاه.
لكن فجأة بعد عنها مصعب بسرعة.
مصعب: أنا آسف أوي، أنا اللي عملته غلط وده كده لعب بمشاعرك، أنا بجد آسف.
ملك بحزن: أنا نفسي أداوي جرحك يا مصعب.
مصعب بتنهيدة طويلة: أنا غلطت كتير، مش خديجة بس. وأصلاً مفيش حد يقدر يداوي قلبي غير اللي ساكنه قلبي. يا ملك، واديها بتتخطب أهي.
ملك: ما تحاول تعالج قلبك وأنا جنبك وهحاول معاك.
مصعب: انتي تعبتي أوي معايا، وكله مش هيجيب فايدة. أنا هفضل بحبها.
حست ملك بنغزة في قلبها.
بعد الحفلة دخل مصعب وخديجة والجد وملك البيت.
خديجة: مصعب معلش ممكن نقعد مع بعض؟ عايزة أتكلم معاك.
مصعب: حاضر، اطلعي غيري وأنا هغير وأنزل أستناكي.
هزت خديجة راسها وطلعت.
أما ملك والجد.
الجد: تعالي يا ملك نقعد ندردش مع بعض.
ملك: ماشي يا جدو.
قعدت ملك وجنبها الجد.
الجد: مالك يا بنتي وشك حزين كده ليه وشاحب وعينك باين فيها الوجع؟
نزلت ملك راسها في الأرض وهي بتحاول تتمالك دموعها: أبداً يا جدو، أنا كويسة.
الجد بحزن عليها: بتحبي مصعب يا بنتي؟
بصتله ملك وهي بتبكي ودموعها بتنزل بغزارة: ليه يا جدو القلب بيحب حد مبيحبوش؟ ليه كلنا نفضل موجوعين؟ مصعب بيحب خديجة وهي مش عايزاه، وهي بتحب مصعب بس شايفة فرق سنهم عائق. وأنا بحب مصعب بس هو شايفني صاحبته. وعز بيحبني بس أنا شايفاه صديق ليه. كلنا قلبنا واجعنا، ليه بنحب ناس مش مختارانا؟ ليه حبيت واحد بحاول أعالج قلبه بقالي كام سنة وأول ما يشوف حبيبته يرجع لنقطة الصفر وكل اللي عملته الكام سنة دول راح هدر؟ يا جدو أنا قلبي واجعني أوي أوي.
الجد: ياااه يا ملك، كل ده. عايزك تفهمي يا بنتي إن قلبك مش بإيديك عشان تحبي حد اختارك وإنتي اختاراه. وخديجة كمان مش وحشة يا بنتي، ده زي ما إنتي قعدتي معاه تلات سنين هي قعدت معاه العمر كله وحرمت نفسها من الجواز عشانه. من الآخر كلكم مظلومين يا بنتي.
ملك ببكي وهي بتشاور على قلبها: طب وقلبي يا جدو؟
الجد: جربي قربي من عز، وإنتي عارفة إنه بيحبك، مش يمكن يداوي جرحك.
ملك بحزن: محدش هيقدر يا جدو، ده مصعب احتل قلبي.
الجد: أنا عارف إنك كنتي السند لمصعب خلال التلات سنين، بس اللي في قلب مصعب لخديجة عشق. السنين مش هداوي قلبه زي ما إنتي كنتي فاكرة.
ملك بحزن: طب وأنا اللي حاسة بيه من ناحيته ده إيه بس؟
الجد: بتحبيه، مش هنكر ده، بس لازم تعالجي قلبك.
هزت ملك راسها بحزن.
عند خديجة ومصعب، طلعوا قعدوا في الجنينة.
مصعب وهو بيحاول يبقى بيتكلم عادي: إيه يا ديجا؟
خديجة: أنا عايزة أعرف حاجة واحدة بس، وإنت ابني وأنا من حقي أعرف.
غمض مصعب عينه بعصبية بسبب كلامها وتفكيرها.
خديجة: إنت وملك بتحبوا بعض ومرتبطين صح؟
مصعب بصدمة: ليه بتسألي السؤال ده؟
خديجة: هو أنا مش من حقي أعرف؟
بصلها مصعب في عينيها بعشق ورد: إنتي من حقك تعرفي أي حاجة يا ديجا.
خديجة: طب قولي.
مصعب: لا مش مرتبطين.
خديجة بتوتر: بس إنت بو. وسكتت بخجل.
مصعب: بوستها، عارف. بس مش عارف عملت كده إزاي. وبعدين اعتذرت منها.
خديجة: أوعى تلعب بمشاعرها يا مصعب.
مصعب: مقدرش. ملك دي كل حاجة ليا، اللي كانت سند ليا، اللي وقفت جنبي وحاولت تعالج وجع قلبي، وكمان حبتني للأسف. وبقى هي كمان قلبها موجوع ورغم كده بتحاول تخليني أنا كويس.
خديجة بحزن وهي بتبصاله وبتتأمله: محدش بيختار اللي هو عايزه يا مصعب.
وقامت وقفت وبوسته على راسه ودخلت وسابته.
غمض مصعب عينه بحزن على حاله وحال الجميع: ليه ليه بجد؟ ليه؟ أنا عايز إجابة، ليه بيحصل معانا كده؟ ليه كلنا موجوعين؟
ملك من وراه: مين كلكم دول؟
مصعب بحب: تعالي اقعدي يا حبيبي، متقفشيش.
قعدت جنبه ملك وهي حاسة بغصة وجع في قلبها بسبب الكلمة اللي معناها حبيب وهي مش حبيبة للأسف.
ملك: هو إحنا هنرجع إيطاليا إمتى؟
مصعب: هنقعد مع جدو أسبوع بعدين هنسافر.
ملك بحزن ونطقت بشرود: وأنا هستحمل أسبوع.
مصعب: إزاي؟ مش فاهم.
ملك: ها، لا ولا حاجة. أنا عايزة أنام.
مصعب: تمام، تصبحي على خير.
دخلت ملك وهو قام وراها ودخل، طلع غرفة جدو.
مصعب: ممكن أتكلم معاك؟
الجد: طبعاً يا حفيدي.
قرب مصعب من سرير جدو وقعد جنبه.
مصعب بتوهان: أنا مش عارف أعمل إيه، قولي أعمل إيه.
الجد بتفهم: اعمل اللي هتحس إنه هيريحك ويرضيك ويرضي كل الأطراف.
مصعب: بس اللي هيرضيني مش هيرضي كل الأطراف.
الجد: طب قولي إيه هو اللي هيرضيك.
مصعب: اللي هيرضيني هو وووو