تحميل رواية ابن ابي بقلم الكاتبة الصغيرة pdf

قوم ي ماجد بسرعة انا بولد

ماجد : سيبيني انام شوية ي سلمي

سلمى : يخرب بيتك تنام ايه قوم انا بولد

اتفزع ماجد من النوم وقام بسرعه من على السرير وهو بيدور حوالين نفسه.

ماجد : بتولدي طب اعمل ايه اعمل ايه انا دلوقتي

سلمى : انت بتعمل ايه يا ابن العبيطه خذني دلوقتي على المستشفى انا هموت

ماجد : حاضر حاضر

اخذها ماجد على المستشفى بسرعه وهي بتصرخ وهو مش عارف يعمل لها ايه. اخذوها الممرضين على الترولي ودخلوا بيها وهي كانت بتصرخ.

سلمى : عمري ما هسامحك ابدا يا ماجد

ماجد : وانا عملت ايه

سلمى : انت السبب في اللي انا فيه انت انا مش هسامحك ابدا

ماجد : ايه اللي انتي بتقوليه ده يا حبيبتي

سلمى : امشي من قدامي حالا ي ماجد

كانت ماسكه ماجد وبتخنقه وكان هو مكنش قادر يتنفس ومصدوم من حالتها. دخلوها لاوضه العمليات عشان تولد بسرعه وهو فضل واقف بره ومتوتر وكان على اعصابه. طلعت بعد فتره من اوضه العمليات وكانت ممرضه شايله له طفل.

الممرضه : الف مبروك يا فندم جالك ولد زي القمر

ماجد : الله يبارك فيكي هاتي كده انا عاوزه اشتاله

عرفته الممرضه ازاي يشيلوا وهو كان فرحان قوي بيه ومش مصدق انه ابنه.

ماجد : طب وسلمى عامله ايه

الممرضه : هي كويسه دلوقتي هنطلعها اوضه عاديه وهتقدر تشوفها بعدين بس هي دلوقتي نايمه من المخدر

ماجد : شكرا

اخذوا سلمى على اوضه عاديه وهي مكنش حاسه بالدنيا لانها كانت تحت تاثير المخدر وماجد دخل لها الاوضه وكان هو شايل الولد وحطه جنبها.

ماجد : انا مش مصدق ان انا بقى ليا ابن منك انتي ده اكبر نعمه في حياتي ولازم احافظ عليها قدرني يا رب ان اربيه تربيه كويسه وما احرمهوش من اي حاجه ابدا

بعد ساعات فاقت سلمى من المخدر وبصت حواليها لقت ماجد قاعد على كرسي وابنها على السرير جنبها. بصيت له وعينيها دمعت اول ما شافته وجت لسه تتعدل حست بالم. سمع ماجد الصوت وراح لها بسرعه.

ماجد : عاوزه ايه يا حبيبتي

سلمى : عاوزه اشتاله

عدلها ماجد وحطه في ايدها وهي كانت مبسوطه قوي وهي شايلاه وماجد كان بيبص لهم بكل حب. مكنش عارف هيعمل ايه دلوقتي.

ماجد : طب هو انا دلوقتي هعمل ايه

سلمى : تعمل ايه يعني اقعد معانا وابقى اسال الدكتور هقدر اخرج امتى

ماجد : حاضر

قعد ماجد معاهم في الاوضه وخرج للدكتور بره بعدها وسالوا هتقدر تخرج امتى والدكتور قال له انها ممكن تخرج في اليوم اللي بعده. دخل ماجد الاوضه ثاني ولقاها نايمه وجنبها البيبي. قرب منها عشان يصحيها لكن هي ما فاقتش. استغرب قوي من كده وحاول بكل الطرق انه يصحيها.

ماجد : سلمى حبيبتي قومي يلا بطلي كسل

مردتش سلمى عليه وهو خاف من كده. نده على الدكتور بسرعه والدكتور طلب منه انه يخرج بره. خرج فعلا وبعد فتره خرج الدكتور وملامحه حزينه.

ماجد : في ايه الدكتور هي مش بترد عليا ليه

الدكتور : للاسف البقاء لله

صدم ماجد من الخبر ومكنش عارف ينطق باي حاجه. وقع على الارض من الصدمه والدكتور بص له بحزن.

ماجد : ازاي دي كانت كويسه دلوقتي وفرحانه بابننا

الدكتور : هي جاتلها ساكته قلبيه لان كله وظائفها كويسه والقلب هو اللي واقف

ماجد : يعني اعمل ايه انا دلوقت اعمل ايه يا ربي انا على ما صدقت ان انا افرح وقولت خلاص ان البيبي اللي اتحرمنا منه السنين دي كلها عوضتنا بيه اخسرها هي

الدكتور : شد حيلك وخليك قوي عشان الطفل

ماجد : انا مش هقدر اربيه ابدا انا مش هعرف اكون له الاب والام مع بعض انا مش قد المسؤوليه

الدكتور : لا هتقدر انت قد المسؤوليه وهتعرف تربيه وهيطلع احسن دكتور

ماجد : لو سمحت يا دكتور اشوفها اخر مره بس

الدكتور : اتفضل ادخل بس ما تتاخرش

دخل ماجد الاوضه وكان وشها متغطي. رفع الغطاء من على وشها واول ما شافها مقدرش يمسك نفسه وانهار من العياط وهو مش عارف هيعمل ايه في السنين الجايه ولا فعلا هيقدر يكون اب كويس وقد المسؤوليه ويربي ابنه ولا لا وده اللي هنعرفه في بقيت الاحداث.

بعد مرور 4 سنين كان واقف في المطبخ وبيحضر الفطار لحد ما دخل عليه ابنه جاسر الصغير بغضب.

ماجد بضحك: ماله ابني الحلو زعلان ليه؟

جاسر: لاني مش عاوز اروح الحضانة النهاردة.

ماجد: ليه ي حبيبي؟

جاسر: لان العيال بيفضلوا يتريقوا عليا بسبب حرف الثين اللي عندي.

ماجد: تعال ي حبيبي.

شاله ماجد وقعدوا على رخامة المطبخ ومسك وشه الصغير بإيده.

ماجد: هو دا اللي مزعلك؟

جاسر: أيوه. الكل مش بيحبني.

ماجد: بص ي جاسر ي حبيبي، أنا هقول كلام أنا عارف إنك مش هتفهمه دلوقتي، بس لما تكبر هتفهم أنا كنت أقصد إيه.

جاسر: لا أنا كبير وهفهمك.

ماجد: الناس طول عمرهم مبيحبوش اللي أحسن منهم، يعني طول ما أنت شاطر ومتفوق في دراستك عدد كبير أوي من اللي معاك هيحقدوا عليك، مع إنك معملتش حاجة لهم، بس باعتبار إنهم شايفينك أحسن منهم دا كافي للحقد اللي جواهم. ولما تنهي دراستك هتقابل كتير بردوا في حياتك هيحقدوا عليك بسبب إنك اشتغلت وحالتك كويسة. أنا بقولك الكلام دا عشان تفهم إن الناس دايما الحقد جواهم، فانت يا تخاف من دا يا تاخدوا سلم جديد عشان تنجح. اوعي يهمك من أي حد بيتريق عليك لأنه بيبقى متغاظ منك لأنك أحسن منه، فاهمني؟

جاسر: أيوه أنا فهمتك.

ضحك ماجد على ابنه الصغير اللي عامل نفسه راجل كبير. هو عارف إنه مفهمش حاجة أبدًا، بس في يوم هيفهم كلامه دا وياعالم هو هيكون موجود ولا لأ.

ماجد: طب يلا عشان تروح الحضانة.

جاسر: أيوه أنا هروح ومش هيهمني منهم لأني أحسن منهم.

ماجد: اوعي تتكبر وتقول كدة، هو مش بالكلام اثبت لهم إنك أحسن منهم لما تبقى دكتور قد الدنيا.

جاسر: أنا عاوز أكون دكتور، بس إزاي؟

ماجد: سهلة، إنك تتجدعن في دراستك وانت هتوصل للي انت عاوزه.

جاسر: بابا أنا عاوز أبقى زيك لما أكبر، أنت حنين أوي، عاوز أكون كدة لما أكبر.

ماجد: لا، أنت هتبقى أحسن مني.

جاسر وهو بيحضنه: أنا بحبك أوووي ي بابا.

طلع من حضنه وبعدها نط من على الرخامة وهو بياخد شنطته وبيقول: استنى كدة بقى عشان متأخرش.

ماجد: طيب خد يلا السندوتشات دول وكولهم كلهم.

أخده ماجد من إيده وركبه الباص اللي هيوديه الحضانة، وبعدها رجع وقعد قدام صورتها.

ماجد: وحشتيني أوي ي سلمي، سبتيني في أكتر وقت أنا محتاجلك فيه، وسبتي ليا أجمل هدية منك، أنا ربيته كويس، بس هو لسة في الحضانة، معني دا إن المشوار لسة قدامي طويل، وإن اللي جاي أصعب.

بعد مرور 21 سنة كانوا في حفل تخرج كلية الطب. كان قاعد ومتوتر جداً لأن دوره هو اللي جاي وهيطلع يلقي كلمة.

ماجد: أنت متوتر ليه؟

جاسر: مش عارف ي بابا، إزاي هقف قدام دا كله وهتكلم؟

ماجد: وفيها إيه؟ أنت دكتور وطبيعي كدة، اوعي تتوتر من حاجة أو تخاف، أنا معاك هنا اهو، بصلي وأنت بتتكلم واتطمن.

جاسر: بجد أنا مش عارف من غيرك كنت هعمل إيه.

ماجد: بطل كلام أنت واطلع يلا، دورك جه.

قام جاسر ومسك إيد ماجد وباسها وطلع على المسرح. كان ماجد مش مصدق إنه كسب في التحدي وقدر يربيه. وقف جاسر في المكان المخصص.

جاسر: شكراً لكم سيداتي وسادتي على الحضور، أنا بجد متوتر أوي من وجودي هنا، لأن الوقوف هنا للأعظم. أنا هتكلم النهاردة عن شخص واحد بس وهو يعني العالم بالنسبة ليا، الشخص اللي كان واقف جمبي لليوم دا وماسك في إيدي دايماً، سندني في أوقات ضعفي وكان بيقويني. الشخص دا يبقى (والدي). والدي اللي رباني من صغري وكان معايا خطوة بخطوة، اللي لما كنت بتعب كان هو بيسهر جمبي الليالي، والدي اللي فضلني عن حياته كلها وضحي بسعادته عشاني أنا وبس، اللي كان دايماً بيشجعني عشان أبص لقدام وأخلي الماضي ورا ضهري، هو السبب الحقيقي ورا وقوفي في المكان دا دلوقتي، من غيره مكنتش هتقدم ولا خطوة. أنا عاوز أشكر ه وأقوله (شكراً على وقوفك جمبي وتشجيعك ليا، وإنك في حياتي، إنت أثبتلي وأثبت للكل إن مش بس الأم هي اللي بتربي وبتحافظ على أولادها، لأنك إنت كنت الاتنين مع بعض، عمرك ما قصرت في حقي أبداً ولا حسستني بعدم وجود الأم، شكراً ليك بجد).

نزل جاسر من على المسرح وراح لماجد اللي واقف ودموعه على خده ومش مصدق كلام ابنه. حضنه جاسر بسرعة وهو دموعه بتنزل وماجد بادله الحضن والكل سقف لهم وكانوا متأثرين بالمنظر دا.

ماجد بعد عن جاسر وقال: أنا دلوقتي اتأكدت إني ربيت راجل، راجل أقدر أعتمد عليه في كل الأوقات، ولو ميلت هيسندني. اتأكدت دلوقتي إني كسبت التحدي وكل اللي كانوا بيشككوا فيا هما اللي خسروا.