رواية ابي والغزلان للكاتبة ريام هادي (REEM) الفصل الخامس وسبعون 75 - بقلم الناشر آدم العربي

#رواية_أبي_والغزلان_الجزءالثاني
#للكاتبة___REEM___ريام_هادي
#البارت_الواحد_والثلاثون

لتكول ألزمن غدار ويخون
زمانك ماغدر وانته أغدرتني
لجلك حاربت كل أهلي والكون
كلت ماريد غيرك يل عفتني
ولا يحتاج أكلك طبعك أتخون
تعرف نفسك أنته أشكد خنتني
حبيتك صدك حب طفل مجنون
وانطيتك حياتي وموتتني 💔

غزل : كعدت من النوم تيهت اني وين من كثر منايمه بعمق بقيت اباوع وافتح واسد بعيني لحد مصحيت وتذكرت اني بلسويد گلبي انخمش لان وحدي ولا احد اعرفه بس فيصل الي لهسه مااعرف شلون راح تكون حياتي وياه باوعت الجنط محطوطه سحبت وحده منهن وفتحتها وطلعت ملابس بيت تراكسود هسه احنا شهر الثامن ٢٠١٤ واخذت منشفه اريد اسبح واصحصح طلعت من الغرفه صحت فيصل فيصل محد يجاوب الظاهر وحدي بلشقه بقيت ادور وافتح كل باب مسدود واستكشف الشقه حلوو اثاثها كلش والوانها متناسقه بس يحتاج شويه تنظيف تطلع لوز اباوع الحمام يخبل بس هذا شلون ينفتح الدوش اول مره اشوف هيج بقيت ادوس ومره يجي حار يصمط ومره بارد كوه ساويته فاتر ودخلت سبحت جنت تعبانه بشكل موطبيعي كملت حمامي وطلعت وبدلت ومشطت شعري اباوع منين ابدي ياربي

دخلت اكو غرفه ثانيه اباوع مبين ملابس فيصل وغراضه زين ليش مخلاني ويااه بنفس الغرفه شويه وانفتحت الباب مديت راسي شفته يحط شغلات على الميز
فيصل : واخيراً كعدتي شنو هذا النوم
غزل : اي والله جنت حيل تعبانه من شوكت نايمه
فيصل : من البارحه من وصلنا
غزل : حيييل هلكد نمت
فيصل : شعبالج وهسه ساعه ١٠ الصبح جبت شغلات حتى نتريك كلت اكعدج اذا لكيتج نايمه
غزل : كعدت وسبحت
فيصل : حمام الهنا
غزل : الله يهنيك
فيصل : شبيج واكفه وتفركين بيدج محتاجه شى
غزل : لا بس مرتبكه لان اول يوم
فيصل : تتعلمين تعالي اكلي يله

غزل : هو صب الجاي وحضر كلشي لان اني مااندل اي شى بلشقه
وبدينا ناكل وسط هدوء تام وكتله
اريدك ادليني غراض الشقه حتى بعد اني اهتم بيها وبكلشي
فيصل : عادي ادليج بس تره مو شرط من اول يوم تشوفيني انتي شكد نظيفه ومرتبه وعود شوفني اني شكد زوجه مناسبه الك
غزل : نزلت الجاي من حلكي جنت اشرب ضجت من حجايته وكتله
مااريد اشوفك بس لان اضوج اعيش بمكان مااندل بيه شى مثل الاطرش بلزفه
فيصل : مااشي كملي وادليج بس عندي جم نقطه لازم من الاول تلتزمين بيهم

غزل : شنو
فيصل : اول شى اطب واطلع بكيفي مو وين صرت وين جنت وهاي سوالف النسوان التوجع الگلب مالج دخل بيه نهائياً ومو من حقج تسأليني
غزل : حطيت ايدي جوه خدي واستمع لكلامه
فيصل : ثاني شى هنا راح يشدولج راتب بحكم ماخذه اقامه لان زوجتي راتب الج مالي دخل بيه بس اني اصرف اكل وشرب وبس اي شى يخصج تكدرين براتبج تشترين والافضل وره متتعودين على الجو تتعلمين لغه حتى لتضوجيني هذا شكال وهذا شيحجي من اطلعين
غزل : وبعد
فيصل : مرات ابات بره مطلعين لباب الشقه تقفليها عليج وتكعدين وتسكتين
غزل : بس اني اخاف وحدي ابات
فيصل : ليش عبالج عايشة بلعراق اهنا امان

غزل : اقلها بات هنا هسه كلشي كلته راضيه بيه بس هاي الفتره بات لحد مااتعلم
فيصل : لتخنكيني تره اني متعلم على حريه مااريد احس شايل علاكه على ظهري وافتر بيها
غزل : مطلبت منك اطلعني بس هلفتره ابقى هنا لحد مااتعلم
فيصل : اشوف حسب وضعي وهااا اخاف اني ماكو الشقه المقابيلي مال صاحبي حسن هو واخته نوران هي ممرضه واكثر الاوقات ممتواجده بس اخاف تحتاجين شى همه الوحيدين الي تتعاملين وياهم
غزل : ان شاء الله مااحتاج شى
فيصل : اني طالع
غزل : من هسه
فيصل : جنت احجي هندي كتلج لتقيديني وهاج هذا خط سويدي حطي بتلفونج مفعل وكامل بله جيبي تلفونج
غزل : انطينه اله وحول الخط وكتب رقمه وانطاني جهازي
فيصل : متخابرين اله بلحالات القسوى مااريد كل شويه تعال وجيب وحط وادوخيني
غزل : جريت نفس وكتله صار
اخذ المفاتيح وعافلي نسخه وراح
بقيت افتر وافتح مجر مجر وخانه خانه حتى بس اندل اكو شغلات مرتبه ونظيفه واكو لا بديت انظف بيها اباوع الجو يخبل وصافي وهيج وكت احنا بلعراق التراب حتى بحلكنا انظف منا نصبح البيت كله تراب تكول بلصحراء عايشين

كملت شغلي الشقه كثر ما حلوة وجديده تسوي واهس كملت كل الشغل اباوع والله طلعت تخبل وطبيت للغرفه الجنت نايمه بيها وبديت ارتب ملابسي اتذكرت مخابرتهم واطمنت شلون مااعرف هنا اكو نت اقلها ارسل الهم فايبر
كملت كلشي رفعت راسي ساعه ٥ العصر حيييل ولا حسيت بلوكت خلي اسبح الحمام يسوي واهس واحد ينام بيه مو بس يسبح
دخلت سبحت ومشطت ولبست تراكسود جديد وكعدت حطيت ايدي على خدي وبعدين فتحت التلفزيون مااعرف اگلب بيه ضجت من اول يوم فتحت الشباك هااي ليش متظلم عدهم صارت ساعه ٨ والشمس شعلاتها شوكت تصير ظلمه حتى اشوفها بليل اندكت الباب خفت طفرت من مكاني واروح واجي بلشقه شلون ياربي اروح اجيب تلفوني واخابر على فيصل لزمته وخفت ليعيط شويه ورجعت اندك واسمع غزل غزل صوت بنيه
تقربت من الباب وصحت منو
اني نوران
اتذكرت كال نوران اخت حسن حطيت شاله على راسي وغطيت رگبتي وفتحت الباب اباوع بنيه نازكه بنطرون جينز حصر والقميص ويه الگمر واقل ربع ردن والشعر مفتوح ومكياج بسيط رغم عراقيه بس ترتيبها ينطي الطابع الاوربي
هاااي  الْحٍمَدٍ للـّہ على سلامتج
غزل : الله يسلمج
نوران : اني نوران صديقه فيصل وتكدرين تكولين مثل الاخوه وشقتنا گبالكم
غزل : تفضلي
نوران : شكراً
دخلت وكعدت ورفعت رجليها وتربعت على التخم باوعت عليها جان تنزلهم
نوران : اسفة متعلمه هيج اكعد
غزل : اخذي راحتج
نوران : اي كلش احب هاي الكعده ورجعت تربعت وكعدت شلونها ستوكهولم
غزل : ماشفت شى منها بس الشقه وبلطريق جان راسي يوجعني ومركزت
نوران : تشبعين منها ارتاحي واني اخذج افررج الدنيا كلها بس بوقت فراغي لان مرات عندي دوام
غزل : شكراً
نوران : خوش منظفه الشقه
غزل : هي حلووه بس يراد الها شويه نظافه وبس
نوران : عااشت ايدج هاي العشه جبته الج ضيافه من عندي لان اول يوم بس الج هذا الخايس فيصل لتنطي
غزل : بقيت صافنه عليه
نوران : عفيه لتصفنين وتعلمي عليه هاي اني لساني شيسموها بله فالت اي فالت مني اغلط عليها واشاقه وياهم حسن وفيصل اخوتي واصدقائي بنفس الوكت تعلمي على الميانه البينا حتى لتعبين ولا تضوجين
غزل : ان شاء الله
نوران : محتاجه شى عندي شفت ليلي كان بقيت بس مااكدر
غزل : لا شكراً كافي الضيافه تعبتي نفسج
نوران : لا يمعوده قابل طبختها بيدي من المطعم الشف تعب مو اني
غزل : هم شكراً لان ذكرتيني
نوران : يله باي
غزل : باي سديت الباب وراها وفتحت الاكل جان طعمه طيب مبين اكل عربي مو سويدي اكلت وبقيت لفيصل كلت اخاف جوعان بقيت اروح واجي الوب على اهلي اريد اخابرهم اطمنهم وافتحت الباب رحت اركض عليه
فيصل : هااا شبيج
غزل : همزين اجيت عفيه اريد احجي ويه اهلي بالي عليهم

فيصل : ابويه هم خبصني بيج كل شويه ارجع اريد اسمع صوتها من وراج رجعت
اخذت تلفوني وعلمني شلون اكنك نت وتفعلت البرامج مباشره اتصلت بيهم دكيت على ماما وبابا
نهر : يمه وينج دمنا نشف من الخوف عليج لو ما محسن الله ينطي العافيه كل شويه يخابرنا ويطمنا
غزل : والله حقكم عليه بس مااعرف شلون استخدم النت وهسه فيصل علمني انطيني بابا اسلم عليه اول مسمعت صوته نزلت دموعي ياربي عفته يوم واحد طك گلبي عليه رغم بلعراق مجنت يوميه يمهم بس مأمنه كل مااشتاق ربع ساعه يمهم هسه من اشتاق وين اودي وجهي
حجي طه : هااا حبيبة ابوج طمنيني عنج بنتي شنو تبجين
غزل : مشتاقتلكم
حجي طه : اوف الله يعلم بحالنه بس نكول الف  الْحٍمَدٍ للـّہ انتي سالمه شلونج صحتج شلونها وفيصل شلونه
غزل :  الْحٍمَدٍ للـّہ اثنينا بخير
بقيت اسولف وياهم وخابرت ماما سليل وحجيت ويه عمو سجاد وخابرت رشا حسيت الكل صار سنين مشايفتهم مو يوم واحد

كملت كلامي وطلعت من الغرفه شفت الغرفه الي بصفي بابها مفتوح ومتمدد على الجربايه ونايم على بطنه ويشوخر استغربت اني انام بغرفه وهو بغرفه اخاف نظام الخارج هيج كل واحد بغرفه اخاف اسأله وهسه يكول ميته على النوم بصفي وافشل نفسي واطلع بنظره متخلفه وماافهم الافضل اسكت والله انام وحدي احسن شو اني خلصتها سنين نايمه وحدي بقت على هاي الايام خلي امشي الوضع كما هو واسكت

مرت الايام جنت اكعد الصبح نتريك سوه ويطلع ميجي اله تالي الليل حتى من اسأله متعشي يكول اي وينام لا تقرب مني ولا طخني ولا كأني مرته وصار سنين تاركني
سبوع فات والملل خيم على حياتي ومثل كل يوم مكابله التلفزيون واگلب بيه بملل اندكت الباب هلمره مخفت كلت اسأل منو قابل صغيره واخاف صحت منو
نوران : اني يحلووه
جريت الشال ومثل كل مره غطيت رگبتي وفتحت الباب هلوو نوران
نوران : هلوو يله بسرعه بدلي
غزل : خير
نوران : نغير جو مامليتي الكعده بلشقه
غزل : بس اخاف فيصل ميقبل
نوران : فيصل شنو بكيفه بابا هنا كل الحق للمره اطب وتطلع وشسوي براحتها محد يكدر يحكمها
حسن : هااا هوسه اجيتي
غزل : خجلت لان بعدني ممتعلمه عليهم
باست اخوها وكالت راح اخذ غزل ونطلع نفتر تعال ويانه وهو معارض اني كلت
ابلغ فيصل بالاول
نوران : هم كالت فيصل
غزل : مااطلع بدون ماابلغه
نوران : خابري يله
غزل : اخذت التلفون وادك وميشيله مره مرتين وماكو كتلهم مااطلع
نوران : يمعوده امشي والله ميحجي
غزل : ميخالف اله يعرف يله اطلع
حسن : اني ادك عليه
غزل : تفاجأت اول مدك حسن جاوبه وكله راح ناخذ غزل ونطلع نفتر وفتح سبيكر
فيصل : اي اخذوها عادي
نوران : سمعتي يله
غزل : طبيت ابدل بس بخاطري ليش مجاوبني قابل شرايده منه بدلت بنطرون وقميص طويل مال محجبات وشال وحطيت مكياج كلش خفيف بس تبرز عيووني وطلعت
نوران : ليش هلكد مقبطه من يمي احتريت
غزل : غير محجبه
نوران : يله بكيفج بعدين نبدل ستايلج امشي
غزل : جنت امشي وياهم مثل الطفله الي تطلع ويه امها للسكوت اول مره تباوع هنا وهنا ومتخبله على الالوان والغراض ومجلبه بعبايت امها تخاف لتضيع هذا حالي

حسن : ليش ساكته
غزل : شحجي
حسن : يعجبج المكان
غزل : حلوو بس هوسه واني مااحب الهوسه
نوران : هو اكو احلى من الشوبنك والهوسه والماركات والمولات
غزل : احب الطبيعه والهدوء اكثر
حسن : هاي ماكو اسهل منها اذا تحبين باجر نطلع لمكان كله خضار وهدوء اوديج لمنطقه اسمها ديورغاردن راح تحبيها متأكد
نوران : وديها لمتنزه هاجا وكعدها على البحيره هناك وكت الغروب المنظر يًـجّـنن
غزل : ليش انتي متجين ويانه
نوران : مو كتلج مو كل وقت اكدر اطلع
غزل : لعد خليها من يصير عندج مجال
حسن : ليش متردين اني اطلعج
غزل : سكتت مجاوبته اني ميته مستحه لان هو ويانه وهلمره اطلع وياه وحدنا على اي اساس ابن عمي ابن خالي هو افتهم كلامي ومفتح الموضوع كعدنا ناكل اني اكلت شويه لان استحي ونوران اخذت الباقي سفري وانطتنياه رغم المستحه الكنت بيها والخوف والقلق ناس مااعرفهم طالعه وياهم بس جمال المكان يجبرني افتح كل عيوني على الجمال الموجود وخاصه هيج اماكن احلم اشوفها بلحقيقه

رجعنا للشقه وتشكرت منهم ودخلت واستاذ فيصل ماكو هسه غير افهم هو وين يروح كل وكته مو يمي غسلت وبدلت اباوع على الحذاء مالتي واضحك هاي كون بلعراق جان انترس اتراب وصار ابيض هنا بعده نظيف هواي مشينا اذا طلعت مره ثانيه البس بوتين (ترانشوز) افضل واخف
كعدت اكل جنت جوعانه مأكلت زين وشلت ورايه واجه فيصل
فيصل : مبينه مرتاحه
غزل : وعليكم السلام
فيصل : لتتعلمين تخلين حسن يخابرني من تردين شى
غزل : على اساس انت شلته من دكيت عليك وثاني شى اني مردت اطلع همه چلبو بيه خلف الله عليهم غيرولي جو
فيصل : هاااا يعني همه احسن مني
غزل : ماكلت هيج

فيصل : هم عايزه تكولين
غزل : تقربت منه وكتله بس فهمني انت شبيك صار اسبوع من اجيت بوجهي متباوع وعلى اعصابك تبات بلبيت وبس الريوك يجمعني بيك اذا هيج مرايدني المن دزيت عليه جان عفتني بلعراق
فيصل : غير ابويه اني لو ما هو اجيبج تحلمين اعيشج هنا ويايه
غزل : محلمانه اعيش وياك ولا اريد عيشتك
فيصل : لعد ليش جيتي
غزل : لان المفروض انت زوجي وهذا مكاني الطبيعي اما بلعراق وانت يمي واما هنا واني يمك لو اطلكني
فيصل : لو اكدر جان طلكت من زمان
غزل : شنو المانعك اذا هيج منزعج مني
فيصل : شتردين هسه
غزل : اريد افهم اني شنو بحياتك
فيصل : انتي لا شى
غزل : سكتت واتنفس سريع كلامه حييل يجرح وكتله بهدوء مكدرت اسكت على جرحه الي
فعلاً اني لا شى وانت هم بحياتي لا شى تره احساس متبادل
فيصل : كلش زين لعد متفقين تبقين هنا بدون دوخه وقال وقلت وتحاولين تتأقلمين ويه حياتج الجديده
غزل : وشنو الي يجبرني ابقى
فيصل : لو تردين تطلكين جان من الاول ما جيتي اعرف بيج متردين واني هم مااريد حتى لا اخسر اهلي بسببج نتفق من هسه كلمن اله حياته وماله دخل بلثاني
غزل : بكلشي
فيصل : عفيه بكلشي هذا مكانج ومااسمع حسج لا كل مااطب ادوخيني
غزل : صار عفته ومخليته يكمل تندمت لان ماعندي الجرئه واطلك واجيت برجلي لهنا لازم اتعود واعتبر روحي وحدي وابدي ارتب وضعي الي مصبرني على هذا الحال هدف واحد اذا سويته حياتي احسها كلها تتغير هنا الطب مطور واحسن من عدنا بس اداوي الحرك مالتي بعد كلشي مااريد

سليل : ركضت بيدي ورجلي على القرض والمديره مالتي هوايه سهلت الامر عليه وكدرت اسحب القرض وهي جانت الكفيله وسحبته وسجاد باع السياره ودفعنا فلوس البيت جنت فرحانه لدرجه جبيره بس وضع اختي يمنعني اظهر هاي الفرحه وخطيه بابا هم فرحلي هو وماما وجابلي طلي فجران دم للبيت ذبحته وزعت للناس المحتاجه دزلي بابا عامل عنده ولد يحبه صار سنتين ويااه اسمه عمار مهجر جان من سكنة الحريه وكعدو بيت قريب مطعم بابا ومن وكتها شغله يمه ويعزه يكول فقير وحباب اجه دك الباب اني لابسه الشال طلعت اله   هاي الفتره تيم يمي يلعب ويه زيون لان جنات راحت يم رشا اخذت ابنها وياها وهذا وحده بقى يضوج لهذا ابقي ويه زيون يلعبون بالالعاب لو بلكراج ركضو كدامي وفتحوها وصار الولد گبالي

عمار : العفو اختي دزني الحجي
سليل : اي عيني هسه اجيبلك العلاليك
جنت مقسمه كل كم لحمه بعلاكه وسويت كم وحده وانطيهم لهذا الولد كال بمنطقتنا هوايه فقره انطيتهم اله جان باب الشارع مفتوح كله وباب المطبخ واني اطب واطلع انطي
سجاد : هااا عمار شو هنا
عمار : هله عمي ابو زين الحجي دزني علمود التوزيع
سجاد : كملت
عمار : بس ام زين كالت بقت اثنين
سليل : طلعت وشفت سجاد يحجي ويه عمار اني عادي تعاملت طبيعي بس شو هذا شافني لو عيونه براسه صارت بس راح الولد سد الباب وسحبني من ايدي للمطبخ واني اريد افتهم شبيهه شسويت
سجاد : هيج طالعه حضرتج
سليل : شبيهه شو دشداشه وردن وشال على راسي ولا شعره طالعه مني
سجاد : وهاي اللابستها جنها فستان ملزك على جسمج وفوكاها ترحين وتجين وادنجين كدامه ولد شاب مستحيتي
سليل : عيب تره هذا الحجي الولد مارفع راسه وانطيته العلاليك وراح
سجاد : ما رفعهم لان الدشداشه لازكه وكلشي مبين هو استحه وانتي ما ستحيتي

سليل : الي يسمعك يكول مصلخه هااك شعرضاتها
سجاد : تعاالي شووفي شلون لازكه وسحبني لمرايه المغسله ودارني وكاال باعي
سليل : مااشوف شى
سجاد : لان عميه
سليل : اشكرك
سجاد : اسمعي لج اذا طلعتي بعد هيج والامام علي اكطعج تكطع واحرم عليج باب الشارع
سليل : تره ممسويه شى حتى هيج تگلب الدنيا وتعيط وتهدد
جان يلزم الدشداشه ويشكها عليه من الطول للطول جفلت منه ودمعتي بسرعه نزلت

سجاد : هااي حتى بعد متنلبس وتنذب بلزباله واي احد يجي تلبسين اما جبه اسلاميه عريضة لو عبايه على الراس ماعندي استعراض ملابس داخليه لو اجسام وهاي اخر مره انبهه بيها مره ثانيه تشوفيني مني المشايفته
سليل : عافني وصعد واني ركض للحمام طكيت بجي حتى فرحه البيت كسرها بعيني والله ممسويه شى خبلني اي شى يحاسبني عليه ذبيتها للدشداشه وسحبت وحده بلغساله ملبوسه وطلعت من الحمام رحت للحبل سحبت نظيفه ورجعت للحمام بس شفت الجهال اخاف يلعبون بلكهرباء طبيت سبحت بيه ريحه لحم وزفره بدلت دشداشتي وكعدت كملت شغلي بس ميته قهر كملت الاكل وطفيته وصبيت للجهال وكلتهم اثنينهم

نزل ميباوع بوجهي عفته ولا حجيت شى وصبيت الاكل اكلنا اني ويااه وكمل غسل وراح ناام حتى مكلف نفسه يطيب خاطري بكلمة عفته واخذت الجهال نومتهم ومر يومين واني وياه على كد شتردين وشتاكل غيرها ماكو متحملت اشتاقيت اله جنت امشي وابوس بيه واتحارش بيه لو هو يحضن بيه وهسه ابد واحدنا بعيد عن الثاني كلت هم اتنازل اني واروح اصالحه اني هسه لو مسويه شى طبني طوب اروح اعتذر بس ممسويه جان يكدر ينبهني مو يتعامل بعصبيه وگلب الدنيا عليه
ورها بيوم بدلت العصر ورحت لبيت اهلي واخذت الجهال عفتهم يم ماما وصعدت لريم فتحت الضوا وكعدتها

كوومي اسبحي ريم ميصير هيج كوومي صار كم يوم لا تاكلين عدل لا تكومين من فراشج على كد الحمام وبس تره والله حرام عليج الي تسوي هذا اسمه اعتراض على امر الله كومي حبيبتي كوه تحجي وتفتح وتسد بعيونها
ريم : عوفوني
سليل : هااا شبيج شوو كومي سحبتها وكعت مني ياالله هاي شبييهه
ركضت نزلت على ماما يوم فدوه تعالي
نهر : هااا يمه شبيج تعيطين
سليل : ريم مدري شبيهه كوه تحجي
نهر : ياستار هسه راح اجيب اخت نزار جوارينا الجدد معاونه صيدلاني وتفتهم

سليل : اركضي يوم
اجت البنيه جانت بعمري وبيدها جهاز الضغط قاست ضغطها
يمعودين هاي ضغطها ٣ لتروح تنجلط
نهر : دخيل ياعلي عفيه ناخذها مستشفى
هسه اشوف شسوي
سليل : حضنت ريم واغسل بوجهه اريدها بس تصحى ركضت البنيه وجابت مغذيات وشكلت الها مالح حتى يصعد شويه وبدت تراقب حالتها وشكلت الثاني واحنا كاعدين على نار خلي اخابر سجاد يجي دكيت عليه استغرب اتصالي وخاصه صار اكثر من ٥ ايام منتحاجه
سجاد : اكو شى
سليل : تعال بسرعه
سجاد : شصار بيج شى
سليل : حسيته خايف عليه وكتله لا مابيه بس ريم متخربطه
سجاد : جااي هسه
وره عشر دقايق كلته فوك راسنا
سجاد : خلي ناخذها للمستشفى
البنيه لا ميحتاج بدا يصعد الضغط عدها وكلوها شوربه لبن شويه مالح شربوها
سليل : تحجي وتباوع لسجاد وسجاد يستمع الها ضجت حييل رغم البنيه مصدر شى منها بس ليش متحجي ويانه
حضرتك اخوها
سليل : لا حبيبتي زوجي وبمثابه اخوها
ابو زين
البنيه : اهلاً وسهلاً مثل مكتلكم واذا احتاجيتو شى بس حضرتك تعال بلغني اني بلبيت اليوم ماعندي دوام
سليل : شكراً مقصرتي واذا صار شى عود نوديها مستشفى رحمه الله والديج
سجاد : تفضلي اختي
سليل : طلعت من الغرفه وهو وراها سحبته من ايده وين
سجاد : اوصل البنيه
سليل : شبيهه كزه ومتندل
سجاد : سليل عيب موزين منها اجت
سليل : خلف الله عليها ماما فدوه اطلعي وصلي اخت نزار خطيه صغيره متندل بيتهم بدهوك والطريق طويل عليها
سجاد : لج شبيج
سليل : مابيه ضل هنا واذا نزلت وراها والقران اگلب الدنيا
سجاد : ايااا خبله
سليل : تقربت منه اي خبله وبعدك مشايف خبالاتي من تطلع
سجاد : عينج على اختج اذا صار شى خابري رايح للمحل شويه واعزل واجي
سليل : مو هسه شويه وروح كعدت بصف ريم وهو يهز بيده وحاصرته الضحكه
سجاد : والله مو صاحيه
سليل : باوعت عليه صفح وسكتت لحد محسيت ريم وعت علينا

سجاد : هااا اروح هسه ست سليل
سليل : روح واباوع صفح وعاوجه حلكي معاجبني
عافني وراح كومت ريم الجانت تترنح من التعب وهبوط الضغط غسلت الها وبدلت ملابسه ودمعتي بعيني هاي ريمو الجان صوتها يلعلع بكل البيت هاي الجانت تتعارك على الجبس ويومه مقفصه على واحد حتى يشتري الها اوووف انطيج عمري بس كون ترجعين مثل قبل امشط واسولف وياها واحجيلها على كلشي صار ويايه وسوالف سجاد وسوالف زين وسوالف تيم حتى تحس هي مو بعيده عنا بس كلمة وحده كالتها كالت غزل

اي غزل زينه وبديت هم اسولف شتكول من تخابرنا لان يوميه نتراسل وياها لان خطيه تبقى وحدها بلشقه كتلها ريموً اجيبلج تيم
والله مشتاقلج شنو ذنبه طفل محروم اكثر من ٥ اشهر من امه بس احضني نومي بحضنج  كامت من حضني وتمددت ومحجت شى ياربي هاي شلون اصحيها
بستها ونزلت وصيت ماما عليها لان مااكدر ابقى اكثر ذوله خبصو الامه بلعياط واللعب سحبتهم من ايدهم وطلعت بلباب ردت اسده وارجع لبيتي مشي وجان اتفاجأ بصفي واحد يكول شلونج سليل انداريت واشوفه حسين فتحت عيني ممصدكه والله لو ما العيبه جان حضنته اني احبه لحسين
الْحٍمَدٍ للـّہ على سلامتك

حسين : الله يسلمج
سليل : شوكت اجيت
حسين : البارحه تالي الليل
سليل : والله مشتاقيلك والجهال يجرون بيه يردون اهدهم حتى يلعبون بلشارع
ولكم كعدو
حسين : شنو السالفه خلفتي واحد ثاني هذا شوكت كبر
سليل : هذا ابني الصغير والاكبر منه ابن ريم
دنك عليه وصار بمستواه ومد ايده
حسين : شلونك عمو تعاال تيم
سليل : تعرف اسمه
حسين : هو بس اسمه اعرفه اول مره اشوفه ماشاء الله حلوو
سليل : اي يشبهه ابوه وبيبيته الله يرحمهم

حسين : تعاال
سليل : ختل ورايه خااف جان يباوع عليه ويكول
حسين : شلونها ريم
سليل : اوووف شلونها ميته وبس النفس يصعد وينزل
حسين : الله يساعدها مو هينه عليها خسارتها جبيره
سليل : اي والله قبل شويه جان ضغطها ٣ وربك ستر منجلطت
حسين : اريد اشوفها واسلم عليها اكيد هسه العده مالتها خلصت
سليل : اي خلصت بس شتشوف منها حسين والله اذا تشوفها متعرفها جلد وعظم وهم متنزل من غرفتها الافضل متشوفها هسه
حسين : رجعت بس حتى اخذ من خاطرها
سليل : اعرفك صاحب واجب بس بعدها مامستوعبه الي يصير خلي تصحى وهله بيك انت تبقى ابن عمنا وحسبت اخونا
حسين : وانتم خواتي الله شاهد والي يصيبكم يصبني
تجي عمو اشتريلك
سليل : ميقبل ميوالف بسرعه مو مثل امه سوده عليه بس واحد يكول الها تعالي اشتريلج تركض گبله جانت
حسين : ان شاء الله ترجع احسن من قبل وتوكف على حيلها ريم قويه
سليل : كل قوي للزمان يلين واختي ما لانت انكسرت والله
حسين : اكدر كل فتره امر اشوف تيم
سليل : شو تيم
حسين : يعني اشوفكم كلكم
سليل : البيت بيتك هله بيك
حسين : اترخص اني
سليل : متدخل لماما تشوفها
حسين : اجي غير وكت واشوف عمي هم مشتاقلهم
سليل : مااشي براحتك
حسين : باي تيم باي زيد ودنك باسهم وراح
اباوع عليه حاط ايده بجيبه ويمشي مثل الحاير بزمانه سحبت الجهال ورجعت للبيت

بليل بعد منومت الجهال دكت تلفوني اباوع رشاوي هااا ولج
رشا : هلوو سليل
سليل : شبيج شو ضايجه
رشا : سلامتج شلونها ريم احجيلي شصار اليوم وبديت اسولف الها حسيت رشا مو طبيعيه وره ثلث ساعه سوالف هاي ساكته يمعوده وين بالج
رشا : تدرين شكد احتاجيت ريم هسه
سليل : شصاير
رشا : جان على الاقل تساعدني بخططها تفهمني
سليل : ليش اني مو موجوده مو بعينج
رشا : لتفهميني غلط انتي الخير والبركه بس اذا احجي راح تكولين انتي مخبله انتي مريضة مو لهاي الدرجه اعرف مراح تقبلين على تفكيري يمكن بس ريم راح تفهمني والله محتاجتها بكد الدنيا جان على الاقل تنورني بطريقه اريح گلبي وفكري بيها
سليل : احجي رشا والله يجوز افهمج لتنسين اني اختج الجبيره
رشا : اووووف شحجي هو الي بالي لو سهل وينحجي جان حجيته
سليل : كولي ياالله لهاي الدرجه
رشا : كايله ياالله واصلي واستغفر صار كم يوم بس الشيطان اذا دخل بعقل واحد شيطلعه متكوليلي

سليل : احجي مو حتى وكعتي گلبي بمعدتي
رشا : حااسه شعلان عنده وحده غيري
سليل : هاااا خرب احساسج ليش هيج تحسين لج هذا شعلان الي يباوع على طولج  ويموت عليج وذبح روحه حتى ياخذج شلون عنده غيرج
رشا : حااسه سليل وگلبي نار وحتى ماانام وكارهه روحي ومااعرف شلون اطمن لا بيه اكول اله اخاف ياخذ حذره وينتبه اكثر ومااكشف شى ولا بيه اسكت
سليل : تعوذي من الشيطان وصلي ركعتين لوجهه الله ان شاء الله ماكو هيج شى
رشا : واذا اكو شلون
سليل : شفتي عليه وحسيتي
رشا : هواي امور صاير ميكعد ويسولف ويايه مثل قبل من اريد شى منه يتهزم مرات يخابر تالي الليل ومن اجي يسده واكو هواي امور خاصه هاي الايام كعد تتوضح

سليل : اهووو شنو هذا الوسواس يعني اذا انشغل عنج شويه معناها يخونج شفتي شى كدامج 
رشا : المره تحس بخيانة رجلها حتى لو متشوف الله منطيها حاسه خااصه بهاي الشغله
سليل : على هيج منوال جان كلهن اطلكن لو كلهن يحسن بلخيانه
رشا : كلهن وداعتج بس الفرق اكو مره تحس وتغلس وتگلك عادي مرجعه اليه وين يولي  واكو مره تحس وتبقى مطنشه لحد متلزم دليل وراها تاخذ حقها  واكو مره متتحمل اطكها بوجهه وتگبها عركه مترتاح اله تعلگها واكو مره تاكل بروحها لدرجه تتمرض وتاليها متلزم شى بس تبقى تعرف رجلها خان بس ماعدها دليل وكل متشوفه تحس بلموت لان متكدر تاخذ حقها

سليل : كافي رشا وانسي هذا الي بالج شعلان خوش رجال واخو خيته وابن عشاير ميسويها مو من ذوله شباب تالي وكت وجبير وفاهم مو صغير وتقشمره وحده وهم يحبج واخذج عن حب وانتي
كل متفكرين هيج اتذكري حبه وخوفه عليج ولهفته يمعوده والله يباوع على حلكج من تحجين ويخاف عليج اكثر من نفسه مو شعلان يسويها هاي كلها وسواس شيطان والعياذ بالله منه روحي توضي وصلي وحضني رجلج ونامي
رشا : اوووووف الله كريم
سليل : يله حبيبتي تصبحين على خير
رشا : وانتي من اهل الخير باي
سليل : باي
رشا :سديته من سليل وگلت بگلبي مفهمتيني ياسليل كتلج محتاجه ريم جان بسرعه فهمتني حتى متجرأت اكولج شاكه بشعلان ويه جنات اخاف تگلبين الوضع ومتفهميني مجرد كتلج حااسه مصدكتي لو اكلج شاكه ويه جنات شسوين اكيد راح اطلعيني الغلطانه والمجرمه هم بحق بنت عمي اليتيمه الفقيره الي ماطلعت العيبه بيوم منها

سليل : بدلت ملابس البيت ولبست شى للنوم وتمددت
سجاد : ويا منو تسولفين
سليل : ويه رشا ليش مسمعت صوتي
سجاد : وشبيج شگلت
سليل : انطيته ظهري وغمضت عيووني
سجاد : راح تبقين هيج مدلغمه
سليل : احجي ومغمضه ليش مدلغمه
سجاد : انداري مو احجي وياج
سليل : منداريت وبقيت وكتله نعسانه اريد انام
سجاد : هااا نسيت اكولج باجر يمكن اروح لهاي جوارينا تقيس ضغطي واخذ منها ورقه اكيد عدها معارف بلمختبرات اسوي تجييك كامل مال دهون واملاح
سليل : انداريت عليه بسرعه وكتله بعصبيه احد گلك هي دكتوره
سجاد : اي بس معاون صيدلاني يعني هم تفهم ودارسه
سليل : خلصت الاطباء والصيادله
سجاد : لان جيرانه وحبابه وحسيتها بس تريد تقدم خدمه ارتاحيت الها
سليل : كعدت على حيلي وكتله واحرك اصبعي  بأعصاب بصيغه تهديد اذا رحت الها ياسجاد وداعت زين ماابقى لحظه بلبيت جان يحجي برود ويايه وايده جوه راسه ويباوع عليه
سجاد : روحي احد لازمج

سليل : هيج صارت مووو كمت من الجربايه متعصبه حييل جان يجرني لحضنه كمت ادفر واكول اله وخر مني
سجاد : مااوخر
سليل : شهكت وكتله وخر مني جان يحط يحط وجهه برگبتي قريب اذني ويحجي
سجاد : شفتي الغيره شسوي شفتي شلون انعمت عينج عن كلشي
سليل : بجيت وكتله انت عجبتك موو
جان يجرني حييل وحضني
سجاد : ليش هي اكو مره تحلالي غيرج
سليل : لعد ليش تريد تروح الها
سجاد : مااروح بس ردت اشوفج شصار بيه من شفت الدشداشه عليج مخصره ولد شاب واكف والله زين وماضربتج مدري شلون لزمت نفسي وما ركعت راسج بلحايط
سليل : بس والله عريضة
سجاد : حبيبي الرياجيل يعرفون وين يباوعون وشنو البارز بجسم المره يركزون عليه
سليل : الظاهر انت هم تركز لهذا تعرف
سجاد : هههههه ماكو رجال ميركز بس اكو الي يهتم واكو الي يدير وجهه ويتذكر عنده عرض وميباوع

سليل : هسه راح تروح الها
سجاد : ام عقل الصغير شلون اروح بس ردت اشوف بعدج تغارين عليه
سليل : ضربته على صدره اي اغاار واموت غيره هم ولو شويه مزودها ويايه بلبيت ماابقى
سجاد : فدوه لام دميعه الغيوره جان يبوس راسي وخدي وهمس هذا الگلب وهاي العين ميحبون ولا يشوفون غيرج اطمني بس قدري غيرتي وخوفي عليج
سليل : مااشي وهااا اطلبك دشداشه جديده ذيج شكيتها
سجاد : تدللين عشره اشتري بس للبيت تلبسيهم بره او تفتحين الباب لاحد مااقبل
سليل : بسته من خده صار حبيبي
سجاد : تعالي اصالحج
سليل : مو صالحتني
سجاد : لا اني مااحب النواشف احب الهبيط  شووو تعالي
سليل : بيومها قشمرني ههههه اخ منه احبه رغم سوالفه ومرات يخنكني بس موبيدي كلمة منه اطيب گلشي بيه

سليل : مر يومين واني بين دوام والبيت وكت الدوام اعوف زين وتيم يم ماما دك تلفون من شعلان تفاجأت جان صوته مخنوك ومبين اكو كارثه كال الحكي اختج بالانعاش وكع التلفون مني وانكسرت الشاشه بس دنكت واخذته واخذت الجنطه وركض على رئيس القسم كتله اختي بالانعاش

متحملت انتظر سجاد يجي اخذت تكسي وكبل لبيت اهلي وخابرته بلطريق وخابرت بابا وماما الي لكيتهم متخبلين مثلي
لازم نروح للكوت
نهر : وريم منو يبقى يمها ابقي انتي سليل
سليل : غير اموت ماابقى والله ناخذها ويانه
نهر : يمه الطريق طويل وهلمره تتخربط علينا
سليل : لازم تجي ويانه كمت سحبت الجبه الاسلاميه مالتي لبستها الها ولبستها الشال مالتها جانت تباوع بعيونها ومحجيت شى الها بس كتلها رشا عازمتنا بلبدايه رفضت دفعتني ورادت ترجع تنام مقبلت وسحبتها كوه واخذناها بهذا الوكت سجاد راح اجر سياره النا تكفينا كلنا جاب جمسي علمود السرعه

واني اكل بروحي شجاها شصار وكعت بابا وماما معافو الادعيه وريم صافنه على الجامه بغير دنيا بين الواعيه وبين لا
وره ساعه ونص تقريباً وصلنا طول الطريق نخابر نريد نفتهم منه بس يكول تعالو
وصلنا للمستشفى بلكوت
سجاد : اني راح اخذ الجهال وريم واوديهم بيت رشا واجيكم
سليل : اي فدووه
ركضنا ولكينا شعلان كاعد بلكاع وحالته تبجي الصخر
حجي طه : شبيهه بنتي
شعلان : مااعرف وكعت ونقلناها للمستشفى يكولون ضعف بلقلب وحالته كلش خطره لك طه رشا دتموت

نهر :لطمت على وجهه وعاطت يمه بنيتي
سليل : متحملت الخبر وكمت الطم على صدري اختي راح تروح منا وابجي واجت الممرضات طلبو من عدنا الهدوء ممنوع نصعد لردهت الانعاش وانطب بيها
لزمت شعلان فدووه شبيهه
شعلان : مااعرف رجعت من الدوام وكعت من طولها وجبتها ركض يحجي ويبجي
بلحظتها كلت راح نخسرها الطبيب كال هي والله حالتها مطمن حتى عمليه منكدر ندخلها متتحمل بنج توسلنا بيهم بس انطب نشوفها كالو ممنوع
بابا كعد وبيده السبحه سوده عليه ويبجي عليها ويمسح بيده ويباوع للسما ويحجي اعرف كعد يناجي رب العالمين
اجه سجاد ومن عرف ضرب ايده بلحايط وحضني
كتله جنات هناك
سجاد : اي هناك وحطيت ريم والجهال امانه يمها
سليل : اختي راح تروح من ايدنا
سجاد : لتكولين هيج والله لو اعرف ابيع البيت ونداين ونسويلها اي عمليه بأي دوله بس اطيب وتكوم
سليل : شبيج ياروح اختج شصار وكعتي وصلتي الموت شنو الصار يارشا اكعدي وفهمينا

قبل بيوم /
رشا : صافنه كاعده بلحديقه
وتذكرت الموقف الي صار قبل كم يوم من رحت داومت استدعونا لازم انداوم نهايه الثامن بدلت وطلعت الصبح بعد ما وصلني شعلان الصبح للمدرسه اقل الساعه كاعدين كلنا اتجمعنا تالي المديره كالت اقسمكم واني وكم مدرسه كالت انداوم 9/1 كملنا الاجتماع بسرعه وجنت متفقه ويه شعلان ساعه ١٠ ونص يجيني لان مو دوام كامل باوعت الساعه شفتها ٩ وربع المن ابقى بعد ساعه وربع اخذت تكسي وباب البيت ذبني كلت اخاف اخابره ويعيط عندي شغل ويخليني انتظر ارجع وعود اكله بلبيت اني رجعت ويه صديقتي حتى ليحجي دخلت للبيت لكيت سياره شعلان بلكراج هذا شعنده راجع وهو كال رايحه للعلوه واجي فتحت باب المطبخ مقفول من جوه ضجت ولعب گلبي اني مو قصدي الشك بس ليش راجع وليش مقفوله البيبان دكيت الباب جان يطلعلي هو مستغرب رجعتي
شعلان : شرجعج

رشا : ليش متريدني ارجع
شعلان : لا قصدي مو بعد ساعه وربع وهم اني اجيبك
رشا : كملت من وكت ورجعت انت شعجب رجعت للبيت مو المفروض طالع حسيته ارتبك وكاال
شعلان : ملكيت الرجال الي المفروض انطي الفلوس كلت ارجع ارتاح و١٠ ونص اجيج
رشا : هاااا زين لعد جنات وين
شعلان : شمدريني مشفتها يجوز بعدها نايمه
رشا : هذا الحجي كله واحنا باب المطبخ نزعت حذائي وطبيت لبست نعال البيت ودخلت بس مدري ليش گلبي يلعب اني مو غبيه ولا ماافهم ولا مااحس بس اكو شغلات العقل نفسه ميشيلها دخلت لغرفتي لكيت فراشي مترتب اني اصلاً عفته هوسه ورحت معقوله شعلان الي ميجيب لنفسه كلاص مي يرتب الفراش سكتت ومعلقت بس والله كوه اجر النفس وكل شويه اتعوذ من الشيطان واكول انجبي رشا هذا شعلان هذا حبيبج هذا الي مينام اله يبوسج ويشمج اله اذا صحت اااخ گبلج يطفر وهم من افكر بجنات اكو هاي حالها حال خواتي نسيتي السوته لابوج نسيتي طيبتها سنتين عايشة وياج العيبه مطلعت منها وراها كعدنا واباوع الوضع طبيعي وكعدت جنات تكمل شغل وتساعدني بس من يومها واني اراقب حركاتهم لدرجه حتى من انام افز اذا تحرك وراح حمام صار هاجس وهوس عندي
فزيت من صفنتي على صوت جنات اجت بصفي كعدت بلحديقه بلكرسي الي بصفي وفرح وامير يلعبون كدامنا وكاالت

جنات : شبيج رشا شو وضعج مو طبيعي
رشا : لا مابيه شى
جنات : هند وماكو صار مده شنو المضوجج
رشا : صدك شوكت ترجعين لبغداد حسيتها استغربت كلامي
جنات : ليش ضايجه من وجودنا
رشا : لا بلعكس بس لان باجر واحد بلشهر وكالو احنا المدرسات لازم نلتحق بلدوام تعرفين جماعتي بدت قبل كم يوم بس اني المديره خلف الله عليها من رحت ذاك اليوم كالت بدايه شهر التاسع داومي اني وجم مدرسه وبعد ايام يبدون يداومون الطلاب واكيد اموري عنده مدرسه
جنات: والله الحجي بيني وبينج حبيت العيشه هنا يمكن اسحب الفلوس من المصرف واشتري بيت صغير قريب منكم هم هنا اهدأ واحسن وهم ابتعد عن عيالي تعرفين عمتي دوم تاكل راسي علمود اموري
رشا : انقبض گلبي من كلامها وگلت
ليش متشترين بغداد وهم يم عمه وبابا

جنات : فلوسي متجيب بيت بغداد بينما هنا تجيب
رشا : حسيت الوضع راح يفلت من ايدي واذا شكيت وشكي صّـْْ(☑)ـْْحّ بطلعه جنات من البيت وتكعد بيت قريب مني مراح اكدر الزم عليهم شى مو مثل ما هنا كدام عيني كتلها بهدوء حتى مااثير الشك عدها
اي والله ياريت يوم عيد تكعدين قريب مني اقلها مااحس روحي وحدي خلي شعلان يدورلج
جنات : كوليله انتي استحي
رشا : صار حبيبتي يله نكوم نسوي العشا صار الغروب
جنات : باجر اداومين
رشا : اي مو كتلج ولان اول يوم راح ابقى لل١٢ باجر الغدا عليج ولو اتعبج
جنات : يااا صدك كذب من عيووني
رشا : سالمه عيوونج ولتنسين فروحه ريكيها وياج من تكعد
جنات : فروحه غير ويه اموري عيني عليهم وحالها من حال اموري اذا مو اعز
رشا : اي والله اعرفج متقصرين

بيومها مااعرف شلون اوصف احساسي گلبي شلون تحمل تمر الساعات بدون مايوكف مااعرف جنت امشي واكول بگلبي يارب بجاه الحسين بجاه ام البنين بجاه الزهراء عندك كون يخيب ظني والله اذا خاب حتى مستعده رجلهم ابوسها وعمري مااشك بيهم امثل الهدوء واللامبالاة وتعشينا ونسولف ونضحك بس كله لكمه تنزل سم المي احسه مر بحلكي وگلبي ساعه يدك سريع وساعه بطئ نمت وحضنته شعلان بعد ما بلغته باجر اتأخر لان اول يوم راح يعتبروه واداوم دوام كامل

كعدت الصبح ولو بالاحرى منايمه غير ساعه وحده النوم هجرني الليل كله افكر بطريقه شلون اطب واشوفهم وخاصه همه يقفلون باب المطبخ وباب الاستقبال مقفول على طول مينفتح بس من يجي خطار ويطبون واني على سجاده الصلاه عرفت شلون كمت جبت مفاتيح باب الاستقبال جان باب خشب جبير اكيد ميتوقعون مفتوحه وخاصه صار اكثر من شهر مسدوده ومجاينه خطار غريب حتى هند وامها من يجون يطبون من باب المطبخ وطبتنا وطلعتنا منه فتحتها ورجعت سديتهت يعني بس الزم اليده مال الباب تنفتح بدون قفل ورجعت كلشي لمكانه حتى المفاتيح ورحت تمددت كعدت الصبح بدلت طبيعي وسويت لفه لان كتله راح اتأخر واجوع

شعلان : حبيبي اذا طلعتي من وكت كوليلي اني اجيج اخاف عليج من التكسيات ويه صديقاتج
رشا : لا حبيبي مااطلع تره عبالك مثل ذاك اليوم تره مراح تتكرر لان بدا دوام رسمي حتى لو الطلاب ماكو لازم انداوم انت ساعه ١٢ الظهر تعالي
شعلان : الله كريم
وصلني للمدرسه وبقيت ساعه ضبط وستأدنت من المديره بحجه عفت الطباخ يمكن مفتوح ربع ساعه وارجع وركضت اخذت تكسي جنت كل خطوه امشيها يضيق النفس اكثر عندي وصلت للبيت واول شى خليت التكسي يوكف بعيد الباب يمكن من كثر منشوف مسلسلات تركيه تعلمنا منها الطرق والحيل بس تمنيت الي داعيشه هسه مسلسل تركي واطفي التلفزيون وانهي الحلقه الي داعيشه واقع
فتحت الباب على كيفي ولكيت سيارته واني دموعي نزلت حتى بدون مااشوف شى

خطواتي كوه امشيها ردت ارجع والله ردت ارجع من كثر ماخايقه ومتأذيه فتحت الباب دفعت باب الخشب على كيفي وانفتح نزعت حذائي ومشيت بخطوات هادئه جان البيت حييل هادئ مكدرت اشك وكلت انجبي انتي متوهمه هسه ادخلين تلكين جنات بغرفتها حاضنه ابنها ونايمه
متجرأت ادخل غرفتي خفت اغلط بشكي واخسر شعلان وبيتي لاخر لحظه اكول اني مريضة اني حقيره شلون اشك بأصدق اثنين بحياتي فتحت الغرفه لكيت الباب مقفوله من بره والمفتاح بيها استغربت فتحت على كيفي ولكيت امير وحده نايم وفروحه على الجهه الثانيه مو بغرفتنا منومين الجهال بغرفه سوه وقافلين الباب عليهم

بلحظتها متحملت وركضت اي لازم اركض واشوفهم بعيني فتحت الباب بقوه مقفول دكيت الباب كسرته واعيط افتح لك شعلان افتح انهارت اعصابي واعيط وابجي كمت اهدد اذا متفتح هسه اطلع بلشارع واعيط وافضحك والقران افضحكم وجان تنفتح الباب وياريت مانفتحت جنات لابسه دشداشه نوم مخلعه ومغطيه جزء منها وشعلان بلفانيلا والداخلي ويريد بس يلزمني لان عياطي وصوتي واصل للشارع
متحملت المنظر والله لو جايبي الي ميت ولا اشوفه هيج بلحظتها لزمني وكال لتعيطين وتسوين فضيحه اني ماارمش واريد اكطعهم ودكات گلبي راح توكف عطت وجان يلزم حلكي ويكول  هاي مرتي  متحملت وكعت ومحسيت بلدنيا
يتبع ....