#رواية_أبي_والغزلان
#للكاتبة_Reem_ريام_هادي
#الجزء_الأول #البارت_الرابع_عشر
#مدونة_نور_قلبي
لاتشوف الناس بعيون الزغار
وقيس خلك الله بادب وبمعرفه
ولاتفاخر بالجديد من الثياب
هواي ناس اللبست وماكو وفه
صير دله تجود لصحاب العفاف
الكباره عند اهلهه مكلفه
مايعلي الجيب واحد لو ثكيل
تعله من طبعك حلووطيب الصفه
من تماشي الناس ماشيهم جبير
وخلي كلبك بيه رحمه وعاطفه
بقيت فاتح عيني واني اشوف اختي ويه منو ويه سعد زين شسوي الزمها من شعرها هاي عرمه هسه تگلب الشارع علينا اعرفها انعام الثانيه وتبقى تعيط وننفضح هلمره مكان مااستر اختي افضحها وهذا سعد اخاف يحجي شى وتصير كارثه نار بصدري صارت واضرب بلكاع ختلت وره شجره براس شارعنا وعفتها تنزل وتمشي للبيت واني وراها بدون متحس يعني هم طالعه ويه واحد ساقط وباقيه للمغرب انعام وين عنج وصلت قريب بيتي جان الزمها من وره واسد حلكها وحاوطت ايدها حيل وسحلتها لبيتي وهي ادفر برجلها دفعت الباب حيل ودخلتها وهي تعيط بكل قوتها بس اني حيل ساد حلكها وادفر برجلي باب الهول حتى تفتحه سندس لان مااكدر افتحه وبس اهدها راح تگلب الدنيا بقيت ادفر جان ينفتح الباب وهاي جفلت من شافتني
سندس : صخام شكو طة هاي شبيك ويه اشواق
حجي طه : وخري من دربي
سندس : غير افهم شصاير
حجي طه : ( بعيطه قويه ) كتلج وخري من دربي ومشيتها للغرفه مال النوم مالتي وشمرتها على الجربايه وسديت الباب
اشواق : شبيك تخبلت والله اله اكول لأمي عليك
حجي طه : ولج ياامج لتخليني حتى امج اسبها وين دايحه بهذا الليل ويه سعد العركچي مخفتي مكلتي اخاف احد يشوفني اخاف انفضح زين سمعتنا مو بعينج اخوج الجبير الارعن مو بعينج شنو هاي الصلافه
اشواق : هاااا ياسعد
حجي طه : بعيني شفتج نازله من سيارته لهاي الدرجه فلتي وماكو واحد يوكف بعينج مالج رداد
اشواق : اريد امي وطفرت تركض حتى تطلع جان يلزمها حيل ودفعها
حجي طه : ولج ياامج اليوم اطلع حليبها من خشمج وجان اسحب النطاق مال العسكريه جانت سندس معلكته وجان اضربها بيه من اول ضربه عاطت عيطه هزت البيت
اشواق : يمه الحكيني ااااااااااخ
حجي طه : ولج حقيره وين جنتي شسوه وياج وفوكاها امج لسانها شطوله علية وعلى ذيج الفقيره وينها عنج لو بس تكدر على ذيج
كامت تبجي من الالم والخوف والله طة مسويت شى هو يحبني ويريد يتزوجني
حجي طه : يعني اني اخلص الجبيره منه ومن اخلاقه الزباله اجي اذب الصغيره اله ولج مو تعرفين هو شنو مو جان خطيب اختج وكوه شلعناها منه وجان اضربها مره ثانيه اجت الضربه بزرها وكامت تكمز وتبجي طبت سندس تركض
سندس : كافي طه ليصير بيها شى ونبتلي بيها
حجي طه : كولشي مابيها مثل الصل اطلعي بره
سندس : انعام مراح ترحمنا اذا عرفت شسويت بأشواق
حجي طه : اطلعين لو اكومج فوكاها والضربه تصير ضربتين
سندس : لا عيني طالعه طبها مرض اني شنو عسى لو تموتها تعالو ماما نطلع وادفع بحسام ورشا لان دخلو ويه امهم
اشواق : ولج سندس صيحي امي
سندس : انتي واخوج اني شنو
طلعت وسدت الباب وراها
حجي طه : احجي شجابه عليج شصار بينكم
اشواق : تبجي وتعيط والله مصار شى هو رادني زواج وگلي بس نتفاهم ساعه وارجعج للبيت
حجي طه : يازواج ولج وانتي نازله من سيارته وبكل عين صلفه زين مگلتي احد يشوف راح اتخبل متخافين على سمعتج هيج بايعه كولشي
اشواق : والله طه يحبني ويريدني
حجي طه : جان ارجع اضربها حيل بجتفها شاغت روحها وكعدت بلكاع تشهك
يايحبج هذا واحد سرسري ابو نسوان حتى نسوان متزوجه يدور ساقط عرگجي كولشي محرم مسوي شنو الناقصج حتى تقبلين بهيج واحد اني اخذت نهر من ايدها وطلعتها من بيتكم حتى لتتزوج واحد مثله تجين انتي تتزوجي
اشواق : مو بكيفك بكيف امي وامي اكيد راضيه واني اريده
حجي طه : راضيه اعرفها تحب هيج اشكال رخيصه بس قبل مااوديج الها لازم اعلمج تحترمين سمعتنا ورجعت ضربتها شمرته من ايدي ودك راشديات ودفرات تهسترت عليها من قهري واعيط حقيره گلبة هاي تاليها اليوم اطيح حظ حظج ضرب بلا رحمه لان عرفت راح تتزوجه اكيد امها تزوجها هيج واحد وهاي مو مثل نهر هاي هي تريده اول مره اضرب بهيج همجيه ردت اموتها ولا ازوجها هيج واحد تعبت من الضرب وكعدت بصفها وهي تون بلكاع لا رجل ولا ايد بس اسمع ونها وشعرها ملخته من حركت گلبي اول مره اشواق تنضرب محد يكدر يطخها بسبب امها ضربتها لقله عقلها ضربتها لان محروك گلبي على اختي الراح تضيع طول ما تمشي وره انعام ضربتها لان اخلاق سزز ولسانها طويل ضربتها لان احبها ومااريدها تتزوج سعد مااريدها اااخ يايابه شوف حالي شوف بتك ومرتك شيسوون تالي عمرنا ننطي لحمنا للناقصين
رجعت دخلت سندس وضربت خدودها
سندس : عزه بس لا ماتت موتتها طة
حجي طه : كاعد وتعبان من كثر مضربتها وكاعد بصفها بلكاع لتخافين متموت هاي انعام الثانيه بزون بسبع ارواح
سندس : يااا متموت شوف حالها بس تون بله خلي اشوف وجهه دنجت وخرت الشعر من وجهه يمه دخيلك ياالله شمسوي بيها البنيه خشمها وحلكها كله دم
حجي طه : ولو بيه حيل بعد اكوم اذبحها
سندس : هاي امها راح تبيتنا بلشارع مصار ساعه من جابت الشرطه واجت لان والله شنو عالجت بت جعفر هاي اذا شافت هذا حالها شتجيبلك الحرس الجمهوري كله غير هاي اشواق حبيبتها
حجي طه : طبهن مرض وشتجيب خلي تجيب
سندس : متكولي شسوت بس اسمع سعد وانت تعيط اله اطيح حظج
حجي طه : كمت وكفت على حيلي كومي لج وادفر بيها كومي ارجعج لحضن امج وطبج مرض شيصير بيج خلي يصير انتي مو ادميه كومي
سندس : على كيفك خلي اغسل الها البنيه حتى حركة متكدر تتحرك
حجي طه : كولشي مابيها هسه تشوفيها بس تعرف رايحه لأمها تكوم مثل الحيه تسوي نفسها ميته وهي عدله
كوووومي
سندس : اوكف بروح ابوك خلي اجيب وصله ومي امسح وجهه بس تستعدل وركضت سندس واني كعدت على الجربايه حطيت ايدي على راسي وميت قهر على قلة حيلتي مهما كان تبقى اختي واعرف ذابه روحها بلتهلكه وباقي اتفرج عليها
كعدت سندس يمها بلكاع وتمسح بوجهه وهي تون تحركت شوي وتصيح اريد امي
سندس : بس اصحي وانوديج لأمج ااااخ عمي صلفات متكعدن راحه ذيج انهزمت لحبيبها وهسه انتي تردين تنهزمين
جان يدفرها طه برجله
انجبي لتحجين على نهر
سندس : اااخ على كيفك لتذب حرگتك بيه قابل جذب بس انت ماطول الحجي على اختك تتخبل ومتقبل
حجي طه : حطي لسانج بحلكج وكملي البيدج وخلي اوديها
سندس : تمسح بوجهه اشواق وتحجي على كيف بس طه يسمعها
والله عاشت ايده برد گلبي منج تذكرين شجنتي تسوين بيه والله لو مااخاف اخوج يهطرني (يضربني ) اله اهلهل من الفرحه
حجي طه : كمت طلعت بلباب اذا ابقى ارجع اضربها لكيت انعام كل شويه تمد راسها عرفت بالها يمها تمشيت الها شافتني غنزرت وعيونها تريد تاكلني
هااا منتظره بيتج الدماغ سزز المعرفتي تربيها
انعام : بتي احسن منك ومن اخلاقك ولك هاي عليمن لتشوف قبل شويه مكدرت اذبك بلتوقيف تره اكدر اكسر ظهرك كسر
حجي طه : احسن ماضاله تهددين وحاطه راسج براسي وراس ذيج الفقيره انتبهي على بتج وين بهاي الليالي ويه منو
انعام : شنو قصدك وين اشواق ولك طه اذا سويت بيها شى وتراب ابويه احركك واحرك حتى بناتك
حجي طه : والج عين تهددين وتحجين مكافي شوكت تخافين الله ومتعرفين غضبه عظيم
انعام : بنتي وين
حجي طه : طبي جوه مثل الجلب مشموره
ركضت دفعته وطبت لبيت طة ودفعت الباب حيل ودخلت تعيط اشواق اشواق
اشواق : بتعب وكوه تعيط الحكيني يمه
سندس : تعالي عيني نعوم بتج هياتها
انعام : يمه بتي ولكم شمسون بيهم الله لايوفقكم اشواق يمه اشواق تسمعيني
جان تحضن امها حيل وتبجي ماما الحكيني كتلني طة كسر عظامي
سندس : يمه يمه يلعياره يلام بيج طة من كال سبع ارواح
انعام : ولك طة الچلب شون تمد ايدك على بتي ولك انت منو وتمد ايدك عليها
حجي طه : بتج النافخه نفسج وادافعيلها
جانت نازله من سياره سعد الخايس
انعام : شنو ولج اشواق هذا شيحجي
حجي طه : تعرفين بيه مااكذب وسأليها قبل شويه شجانت تسوي وياه
انعام : احجي اشواق صدك جنتي ويه سعد وشعندج وياه
اشواق : يوم والله يريد يتزوجني وكال بس اسولف وياج ساعه ومتأخرت وهو اصلاً اسبوع الجاي جاي يخطبني
انعام : امشي كومي هناك بيتنا خلي افتهم السالفه عدل
حجي طه : شنو التردين تفتهمي هاي تربيتج الجنتي تحجين بيها يعني احسن محايره بيه شون ادمرين حياتي انتبهي شويه عليها بله شافها واحد من المنطقه شيكول علينا
انعام : حتى لو غلطت ميصير هيج تضربها انكسرت ايدك
حجي طه : موزين ماذبحتها
انعام : ليش يمه شمسويه واحد ويريد يتزوجها على شنو تنذبح
سندس : هاي كون غير وحده مو بتج مجان شهرتيها وبقيتي اطعنين بعرضها
انعام : انتي تسكتين لا الزمج هسه وامسح البيت بيج
سندس : يعني هذا بيتي مو بيتج وامشو اطلعو بره بس انتي تعرفين اطردينا من بيتج اخذي بتج السگط واطلعي بره
انعام : والله وكت بت الخبازه تطردني لو اريد هذا العش المكيفه بيه اهدمه على راسج وراس الخلفج
حجي طه : هو هذا الحصلته منج من يوم ماابويه مات تحجين وتهددين وعايفه هاي تصول وتجول وحدها مكان ما هسه تلزميها تكطعيها ادافعين عنها
انعام :مالك دخل شى ميخصك
حجي طه : شون ميخصني وهي اختي وسمعتها من سمعتي
انعام : لا عبالك اعوفك تدخل بأشواق وتنفخ صدرك مثل سالفه نهر واخذتها وزوجتها واحد تفله ميسوه حافي هاي بتي واني حره بيها ذيج حقيره من يومها طالعه عن شوري وهي ماتت بلنسبه اليه اشبع بيها بس اشواق خط احمر بس تتجاوزه رجلك اكسرها ازوجها بمزاجي واياك اشوفك بيوم تدخل بينا بعد
حجي طه : اني غاسل ايدي منها ومنج وهم ولدج عاريه مابيهم حظ زوجيها يطبها طوب هاي اذا خطبها مثل متكول
سندس : والله تلوك لسعد نفس الزباله جدر ولكة غطاه
انعام : ماكو غيرج زباله ولج انتي شايفه نفسج تحجين على بتي
سندس : هسه يله قابل حجيت على الموناليزا العفو يعني اشواق ليزا
حجي طه : كافي سندس وانتي اخذي بتج واتذكري زين محد راح يضيع هاي البنيه غيرج شمرتيها بلنار وانتي اشواق يجي يوم تبجين دم وتكولين ياريت سمعت كلام طه
انعام : كومي يمه كومي
اشواق : اااااخ
انعام : سودة علية امشي اخذلج حقج لتخافين هين كولشي بوقته حلو
واخذتها تسحل بيها وعيونها دم من الاعصاب
سندس : والله وعاشت ايدك بس لو كاسر ايد رجل الها جان صارت بعد احلى
حجي طه : اسمعي سندس اذا كلمة طلعت من الي صار اليوم الايد والرجل الترديها تنكسر بأشواق تنكسر بيج
سندس : واني شنو حتى تكسرني قابل المن احجي
حجي طه : اعرف لسانج بلسان انوار وهاي من المنطقه وتحجي اذا طلع حرف متلومين اله نفسج
سندس : خوش والله هنه يلعبن لعب واني انكتل
حجي طه : هو احد طخ شعره منج كتلج اذا طلع حرف ولتكولين مكال
سندس : ماشي اروح اسوي العشا الجهال ماتت جوع شحصلنا من ذاك البيت بس العياط والخزي
حجي طه : طلعت من الغرفه توضيت واني مخنوك خنكه بس الله يعلم بيها وتوجهت للصلاه مديت السجاده واشوف بصفي انمد خاولي باوعت هاي سليل
سليل : يله بابا اسوي مثلك وتبتسم
حجي طه : ابتسمت على برائتها وشلتها وابوس بيها
سليل : يله بابا قبل متجي ماما وتضربني هذا الخاولي مالتها
حجي طه : ههههه فدوة الج ومااخليها تضربج لتخافين
رجعت وكفت وهي بصفي ولعابتها بصفها وشسوي تسوي مثلي وتباوع واني اصلي بگلبي توجهت لله وادعي بأن يحفظ بناتي مااريد يتأذن
كملت الصلاه واجت سندس تركض تريد تضرب سليل هي ركضت وختلت ورايه
سندس : ولج اني مو كتلج لتلعبين بهذا الخاولي
حجي طه : عوفيها شنو قيمته اني اجيبلج واحد غيره روحي بابا العبي ويه اخوتج طلعت تركض من وره ظهري
سندس : بله طه مو شفت نفسك صار شهر من كعدت تريد مااحاسب واعلم وانت تتحكم بكولشي
حجي طه : اني بعد رجعت صحيح هاي السنين كلها عايفج بس مو بيدي وانتي تعرفين كولش زين مغصوب حالي حال الالاف من الجنود والحمدلله فضت ورجعتلكم يعني لتتعاملين ويايه كأني مموجود مثل قبل وخطار وكم يوم وراجع اني مااكولج لتحاسبيها بس على كيفج وياها اني انتبهت بس تسوي شى تضربيها واخوها يكسر البيت ولا يمج من تعلمين وتحاسبين وتربين صيري حقانيه لا ناس وناس كلهم جهالج
سندس : اهوو اشتغلت المحاظرات التربويه والله هاي تربيتي واني كلهم اعاملهم نفس الشى
حجي طه : لا مو نفس الشى واني عيني على حركاتج ولو ميحتاج بعد انبه اني موجود واعرف شون اعلم الجهال
سندس : اهوو طة هسه الي يسمعك يكول موتتها هو بس احاسبها
حجي طه : روحي كملي العشا ويصير خير
سندس : ثواني وارجع
حجي طه : وين رايحه شفتها صعدت فوك تركض هاي شسويلها وتعقل قبل اكول مراهقه ومتفهم احجي وميفيد هسه عمرها صار ٢٢ سنه وبعدها على نفس وضعها اذا مو اتعس
بيدي السبحه وكاعد على الكرويته (القنفه) واسبح جان تجي تنزل بسرعه
حجي طه : راح توكعين شبيج
سندس : طه الحك
حجي طه : شكو
سندس : غير انعام لزمت اشواق شبعتها كتل فوك كتلتك واسمعها تكولها خليتيني بحلك واتفشر مااحجي شكالت احسن
حجي طه : واذا ضربتها شراح يقدم ويأخر بكل الاحوال اعرف اذا تقدم سعد الهه راح تزوجها هاي احترك گلبها لان وگعت بيدي واله هي تزوجها لهيج واحد حتى لو ساقط وحتى لو جان خاطب اختها
سندس : اي والله صحيح كلامك بس المهم امها كتلتها اول تالي اشواق تاكل طن گتل هم منك وهم من امها شوف بوجهه منو مصبحه هههههه
حجي طه : انتي شوكت اتوبين تتسنطين متعبتي من تزوجنا لهسه صار سنين وانتي مگابله هذا الشباك وكاعده من راقب الناس مات هماً وانتي ماشاء الله كعد تتخبلين يوم بعد يوم
سندس : لعد وين اولي اذا لا طلعه لا طبه اقلها اخلص وگتي اشوف شكو هناك
حجي طه : هسه هو منفذ الطابق الفوك لوما يخنك الفوك اله الغي وابني واخلص منه شايفه روحج شون تصعدين وتفقدين هناك بله مكلتي جاهل ينضرب يتأذه عايفتهم وصاعده
سندس : ماعليهم شى بس لتحط عينك هسه من وراك تصير بلاوي دوم اصعد وانزل والوضع زين
حجي طه : الله يهديج وشوكت مااعرف
سندس : انت معاجبك الاسوي بس لو ما اسمعهم مجان عرفت اليوم بجنات محتركه وجان الطفله اسكطت
حجي طه : ٦ سنوات تتسنطين اول مره تسوين شى عدل والباقي تبقين اطحنين وبس ادوخيني فلان كالو وهيج جابو وهيج حطو بس لو اتوبين من هاي السالفه ارحمي صحتج
سندس : مابيه شى خاف انت على صحتك تعالي ماما رشا اوكلج ابوج مبين اليوم حاط عقله ويايه
بقيت على كعدتي اسبح وسليل اجت تركض بحضني اعرف تفلت من امها كعدنا تعشينا ودخلت انام بقيت متمدد وافكر بأنعام وسوالفها لحد متعبت من التفكير ونمت
ثاني يوم كعدت الفجر صليت وباوعت الشمس بعدها مطالعه خيط صغير منها بدا يطلع بدلت بس شربت جاي لان الصبح لازم اشرب ودخنت جگاره من وقت الجبهه واني ادخن بس قليل وخاصه الصبح لازم ادخن لفيتلي وحده وشربتها ويه الجاي وتوكلت على الله وطلعت صعدت نفرات ولباب الشرجي حاله حال باقي الايام
وصلت والعمال يعدلون بلمطعم كلمن على شغله دخلت سلمت وردت اصعد للطابق الثاني حتى ابدل والبس هدوم الشغل بعدني بأول بايه وجان يوكفني واحد من العمال وكال الحجي يريدك
نزلت ورحت للحجي هو جان مو حاج بيت الله بس يصيحوله الحجي لان ابوالمال
صباح الخير
هله طة اكعد
كول حجي واحد من الولد كال تريدني
شوف ابو حسام انت انسان محترم وفقير وماعندك اذيه والكل حمدلي بشغلك واني مشفت شى عليك موزين بس اني عندي عمال هوايه واريد اصفي وذولاك اكثرهم عمر صارلهم ويايه لهذا گلت الجدد ابطلهم وابقي بس القدامى
حجي طه : ضليت صافن على كلامه وممقتنع بيه كتله زين المن بطلت بعد غيري
بعدني ممقرر واعذرني شويه شغل المطعم هاي الايام موزين واكيد انت فاهمني
حجي طه : طخ بعقلي سالفه انعام ذاك الرجال وجابوله البلديه هذا شون قنعوه يطردني اعرف بس اني طلعني من الشغل واكيد من وراهم لان وضع المطعم كولش زين اااخ ياانعام شوكت اتوبين مني كتله شكراً حجي رحمة الله والديك
اعذرني ابو حسام هذا الشغل ومابيه خواطر
حجي طه : لا ماكو داعي خواطر من رخصتك
خليت وطلعت واني مثل الجبل وانحط على صدري معودت لكيت شغل استرزق منه بقيت امشي بلشوارع واباوع على الناس هاي تالي عمري افتر وماعندي شغله اوكل بيها جهالي باوعت للسما يارب عبدك الفقير انكسر ظهره وقلت حيلته انت الرزاق برگبتي عائله منين اوكلهم منين اعيشهم كعدت على مصطبه احس حتى من امشي اريد اوكع من القهر على وجهي
صار الظهر واني على نفس الكعده شسوي ياربي كمت افتر من محل لمحل بلكت يردون عامل وكلها متريد تكول عبالك الناس كلها اتفقت متشغلني هي من تنسد تنسد ومن كل الجهات
رجعت للبيت واني حيل مخنوك طبيت استغربت سندس رجوعي من وكت
سندس : هااا طة خير شو من وكت
كعدت على الكرويته لازم راسي ومدنج
سندس : خير خوفتني
حجي طه : طردني ابو الشغل
سندس : يايمه صخام ليش شسويت
حجي طه : كولشي مسويت
سندس : هيج من وحده
حجي طه : اكيد مو من وحده والكالته انعام سوته
سندس : اليوم اله اشهرها بلشارع هاي الساقطه
اشششش اكعدي وجريتها حيل من ايدها
ذيج المره طلعتي وهوستي وحجينا ومافاد وهلمره هم ميفيد اكعدي واسكتي
سندس : كعدت وتضرب على رجلها الله لا يوفقج ياانعام نار بروحج تشب كون اشوف الحاجتين جواج ومذلوله قادر ياكريم
حجي طه : النا الله
سندس : وهسه شون منين نعيش ومنين ناكل وفوكاها اني حامل
حجي طه : شنو حامل
سندس : حظي الفكر غير
حجي طه : الْحٍمَدٍ للـّہ على كل حال
سندس : شون بيه اوكعه بس اخاف يطلع ولد واني اريد ولد
حجي طه : استغفري ربج هو احنا ماشين بلحلال وممسوين شى يغضبه وامورنا تعبانه هلمره نكتل روح
واذا مو ولد شنو الفرق
سندس : لا عيني اني اريد ولد حتى يصيرون اثنين بنات واثنين ولد قابل ابقي حسام وحده بلا اخ
حجي طه : اهم شى الخلقه التامه وكله رزق الله
سندس : كول ان شاء الله ولد حتى وراها بعد ولا اسوي
حجي طه : ميهمني ولد ولا بنيه اثنينهم نفس المعزه بس المهم شون نكدر نعيشهم
سندس : ليش مااخلي انوار تشوفلي شغله
حجي طه : اني جم مره كتلج عوفيها لهاي
سندس : وهي شمسويه حتى اعوفها حير هسه بهمك لازم تلكه شغل وعوف انوار
حجي طه : شكد عدنا
سندس : تفاليس
حجي طه : فكرت اسوي عربانه وابيع بيها
سندس : شتبيع
حجي طه : الجو برد والشتا جاي ابيع لبلبي وباگله شتكولين
سندس : خرب حظج سندس هاي تاليها رجلج يبيع لبلبي
حجي طه : وشبيه اهم شى شغل حلال وماابقى تحت رحمه واحد كلها چم يوم ويبطلني
سندس : شسوي سوي المهم اكو مصرف بلبيت اني تره تعبت وفاض بيه انت
مو تكول رجعت وبعد لتعامليني خطار يله يرجال البيت نريد مصرف
حجي طه : من باجر اشوفلي عربانه مستعمله اشتريها واصلحها وابدي الشغل بيها بس اريدج تساعديني
سندس : شسوي الزملك الدخل مال الفندق
حجي طه : كافي حجيج هذا الماصخ لتستهزأين اريد منج تنكعين الحمص والباكلا يعني تساعديني
سندس : صار بس المهم ميصير شى وهاي الشيطان وتأذيك هلمره وروح ابويه وداعت جهالي اسحلها بلشارع حتى مو بلبيت
حجي طه : ان شاء الله ماكو شى الجهال وين
سندس : يلعبون
حجي طه : صبي الغدا خلي ناكل وبلكت هسه هم اطلع افتر اشوف احد عنده عربانه
سندس : ماشي
بيومها بقيت افتر من ناس لناس ولكيت عربانه صح تعبانه بس اني اكدر ارتبها جبتهت للبيت وكعدت اشتغل بيها بلكراج يومين اصلح وارتب بيها واشتريت كاسات وخواشيك وجدرين كبار واشتريت حمص وباكلا وكسور عظم احطهم للحمص
وره يومين طلعت على باب الله ادفع بلعربانه بأرض الله الواسعه خطيه شفت نهر واكفه وتفاجأت بيه جانت تغسل بلباب من الصبح
نهر : هاا طه هاي شنو
وحجيت الها كولشي
نهر : وليش مرحت الها وگلبت البيت يعني شنو هذا الاجرام
حجي طه : وحجيت وتعاركت راح اغير شى كولشي ماكو ادعيلي بس الله يرزقني
نهر : بجاه النبي واهل بيته يرزقك من اوسع ابوابه ويحفظك ويبعد شرهم عنك
حجي طه : انتي زينه ليش احسج ذبلانه
نهر : لتخاف حبيبي زينه وبخير ليضل بالك
حجي طه : خلي اروح تأخرت
بستها من راسها وتوكلت على الله اول يوم شغل قليل كولش وكل شويه اتحرك لمكان لحد مستقريت بمكان قريب السوك وبديت اشتغل
جنت ارجع مهدود الحيل والظهر من الدفع ماافتهم اي شى من يومي بس اشتغل والعالم بدت شوي شوي تعرفني وتاكل مني صح الرزق بسيط بس يجيب علاكه مسواك واكل ومااقصر شى بلبيت رغم اشوف سندس ممقتنعه بس مابيدي
مرت الايام ومن صار الشتا الشغل تحسن كولش وكمت ابيع خير من الله لان بارده واسوي مرتين مره الصبح على المدارس والظهر والعصر على السوك وارجع بليل
ارجع ولا عظمه بيه صاحيه من الدفع والوكفه بس اهم شى اشوفهم نايمين مرتاحين وشبعانين
دخلنا سنه ١٩٨٩ ومثل كل يوم رجعت الظهر حتى اخذ وجبه العصر واطلع للسوك جان اسمع مزيقه وهلاهل باوعت على سندس شكو
سندس : اخاف احجي وتكول تتسنطين
حجي طه : احجي شكوو
سندس : اليوم عرس اختك على سعد
حجي طه : لا بربج وهاي شوكت خطبها
سندس : حيل صار شكد بس اني سكتت حتى لتكول تنقلين كلام
حجي طه : يعني الرادته انعام صار
سندس : والله انت مكبرها انت غير مشفت سيارته السوبر الجديده الحمره تخبل تخبل
حجي طه : بابا هذا واحد سكير وابو نسوان
سندس : بس عنده فلوس ويجوز على ايدها يعقل شستفادينا من العقال والي يخافون الله
حجي طه : خلق الله عليج هاي تاليها يعني سعد احسن مني
سندس : هسه اني گلت احسن لتأول بلحجي قصدت يجوز تعيش مرتاحه عنده اروح اشر ملابس وهم اشوف من السطح الزفه وانت روح لشغلك وخليك بعيشه جهالك
حجي طه : وانتي شوكت تحمدين الله على النعمه البيدج
سندس : حامدتها هسه قابل كافره مو ساكته اووي طة حسره احجي شى تاكلني اكل تحسسني يهوديه ويوميه اكفر مو كاعده وساكته
حجي طه : اروح لباب رزقي احسن
سندس : روح عيني روح وخليني اروح اشوف الضيم والفلوس
حجي طه : طلعت ويه طلعتي شفت اشواق لازمه سعد وطايره من الفرح وانعام واكفه تصفك وتهلهل والشارع مگلوب نزلت راسي ودفعت العربانه واني گلي قهر على ضياعها
باوعت شفت نهر واكفه بلباب ودمعتها بعينها توجهت الها شبيج نهر
نهر : شفت اختك المن تزوجت هاي من كل عقلها
حجي طه : طبها مرض هي رادت وخلي تتحمل اختيارها
نهر : اخاف امي جبرتها
حجي طه : لا مجبرتها هي كتلت نفسها ادخلي لبيتج وسدي بابج متحصلين بس القهر منهم همه ادره بمصلحتهم
نهر : تمنيت اكون وياهم
حجي طه : مو كولشي نتمناه نحصله اروح اني وانتي ادخلي لتخليهم يشوفوج
نهر : ماشي
رحت للسوك واشتغل بس عقلي وبالي كله بلي صار واني اصب لواحد ومدنج جان اسمع واحد يكول لك انت صبلي كاسه وكثرلي الحامض تره اديره على راسك
رفعت راسي واشوف الشعوذه كدامي محسن ولك ابو فيصل وحضنته صار ٣ اشهر مشايفه
محسن ؛ انت ليش ناقص بله نكمل خدمه ادير وجهك وتروح
حجي طه : متجي انت اله اني امر
محسن : وشنو هذا شغلك جنت افتر اتسوك ولمحتك
حجي طه : الحال ضاك ياخوي وملكيت غير هاي الشغله
محسن : تعال اشتغل ويايه
حجي طه : شكعد تشتغل
محسن : ويه ابويه بمحل الادوات الاحتياطيه
حجي طه : هو محلكم صغير يادوب يكفيكم خليني بهاي شغلتي
محسن : يمعود اليجيني اني وياك بلنص اقلها تبقى ويايه طول النهار نلعب دومنه لو طاولي
حجي طه : هاي هيه گلبنا محل ابوك كهوه وخلي الرجال يتخبل هنا اشتغل واليطلع نعمه وستر
شخبار ابنك فيصل
محسن : شاذي موتني بس يكمز
حجي طه : عليمن يطلع غير على ابوه
محسن : ذاك اليوم اندور علية والكاه يم الجيران ردت اكتله كتله ابرد نار گلبي بيه
حجي طه : ولك ليش غير جاهل ويطلع على كيفك وياه صوجكم غير تنتبهون علية
محسن : ولك ردت اضربه مو لان طلع
حجي طه : ليش لعد تضربه
محسن : لان جان بحضن وحده جيرانه تخبل بطة هو شافني عوف حضنها واركض علية ابن الگلب غير تبقى بحضنها واجي اني اخذك صار حنين بذيج اللحظه ويحبني ابن النعال
حجي طه : هههههههههه واني گلت محروك گلبك علية شو هذا ابنك بعده عمره سنتين ويدور حلوات من يكبر شون
محسن : مثل ابوه يشوف ويتحسر مابيه خير
حجي طه : كون تسمعك ام فيصل
محسن : حايره بصحتها ام فيصل حامل وبشهرها طوبه وتفتر بيها من اريدها تجي تدعبل
حجي طه : الله يكومها بلسلامه
محسن : جهالك شونهم سلايه شونها
حجي طه : منو سلايه
محسن : بتك الجبيره غير انت مسميها اسم صعب اتذكر بس السلايه من اتجك
حجي طه : سليل يامتخلف صوت الغزال
محسن : وشبي نور مها ريم ركضت على صوت الغزال
حجي طه : اذا اجت بنيه ثالثه اسميها ريم
محسن : مرتك هم طوبه مثل مرتي
حجي طه : مبقى شى وتصير طوبه
محسن : خلي اروح تأخرت ابويه ينتظرني وهو يمشي ويوصي لتتأخر هذا الرجال نهايته على ايدي
حجي طه : جان خلصان منك ومن سوالفك
محسن : والله ابويه اكبر لوتي ذاك اليوم لمحته يسولف ويه جيرانه ام عمار وركضت على امي كتلها رجلج تزوج عليج وهاي المره اوكعي واخربي جان انجلطت
حجي طه : وتالي ولك
محسن : كعدت گلشي مابيها بس كتلها بأذنها جذب كعد يسولف ويه ام عمار هي كومه وهي كفخه على راسي خلتني اليوم كله افتر وراسي يوجعني وكملتها من اجه ابويه وحجتله وهو خطيه مقصر ركض ورايه بلمصياده تكول جريدي ويردون يصيدوه
وفوكاها اشوف ابويه يتوسل بأمي ويكولها والله هذا جذاب واني اعيط جان يتغزل بيها الصجمه مصارت براسي تحلفلي اشتغل اسبوع بدون يوميه وينطي المصرف لمرتي ولك ذلني خلاني اروح اكول لأمي اني جنت اتغزل بأم عمار
حجي طه : هههههه ولك كبرت بطل هاي سوالفك
محسن : يمعود ضوجة وين الواحد يخلصها
يله اروح خليني اشوفك وبطل سوالف الناقصين مالتك تعال عود
حجي طه : ان شاء الله
هاك هاي جيس لبلبي وباگله للبيت
محسن : فد بطل وياك واخلي السهره للصبح حتى ابويه اخلي يتزوج ام عمار
حجي طه : ههههه ولك امشي ابو البطاله هم بيك حظ بس حجي امشي روح
محسن : ههههه اودعناك
حجي طه : الله وياك جنت حيل مشتاق اله بس الشغل والركض لهتني عن كولشي
مرت الايام وحياتي بس شغل بشغل اركض من الصبح لليل واجه الصيف وشغل البلبي قل حيل وحاره منو ياكل حورت العربانه كاستر ومحلبي ونفس المنوال اشتغل مبطلت الشغل بيوم
وبشهر السادس ١٩٨٩ ﻧـورت غزالتي الثالثه بس عيطت سندس الهزت البيت خبلتني لان جابت ابنيه بيومها بجت بجي تكول امها ماتت
ام سندس : يمه شجرالج تخبلتي
سندس : يمه ردتها ولد مااريد بنيه
ام سندس : استغفري ربج كله رزق منه ونعمه وهاي البت الماترديها حماتج ميته على اضفرها
سندس : مالي دخل بنهر اني ردت يصير عندي ولد حتى يصيرون اثنين بأثنين مااريد يصيحولي ام البنات
ام سندس : وشبيهن البنات يمه سبعه واكولن گليلات
سندس : غير حتى اشمر نفسي من السطح
ام سندس : لو شايفه زلمتج شون حضنها ويبوس بيها ويكبر باذنها تكول الجنه حطوها بيده زلمتج راضي وفرحان شنهي العياره بعد
سندس : مالي دخل ب طة اني اريد ولد شنو بنيه اااااخ
ام سندس : بسج دموع انتي نفسه وحليبج ينشف وهاي شتشرب حرام عليج
سندس : مااريد حتى ارضعها
ام سندس : وروح ابيج اذا ماكضيتي لسانج لا اطيح بشعرج اكطعه گله وانتي نفسه بسج واسگتي واحمدي ربج تامه الخلقه
حجي طه : شكو صوتكم لبره
ام سندس : جيبها يمه ميصير تفتر بيها وهي بت نفاس
حجي طه : لا بس شوفتها لأخوتها اني سميتها ريم شتكولين
سندس : شسمي سمي مالي دخل
حجي طه : شون وانتي امها
سندس : عوفني بحالي طة لااهج هسه
ام سندس : يمه روح لشغلك انه يمها لا تخاف
حجي طه : عقلي بتج عمه تره حيل زودتها مااريد اكسرها وهي تعبانه ونفسه
سندس : قابل شحجيت اني وتهدد ردت ولد مو بنيه
حجي طه : هذا حجيج كله كفر نعمه ربج واني راضي بناتي هسه بعزيه روحي وحسام هم مايفرق احد بينهم كافي بجي وعياط واخذي ريم رضعيها
ام سندس : روح يمه انه يمها
اااخ منج ومن سوالفج لا وانتي وصغيره ريحتيني ولا من زوجتج ارتاحيت بس الهم وراج
هاج رضعي واسگتي
شهر التاسع ١٩٨٩ اخذتها بأيدي اباوع عليها صدريتها والقميص الابيض والبوتين والجواريب الكصيره ام الكركش والجنطه بظهرها والكصيبه منا وحده ومنا الثانيه وبيهم شريط ابيض سليل صف اول ابتدائي تباوع بعيوني والرهبه والخوف عليها دنجت عليها بابا لتخافين اني وياج
سليل : بابا اخاف والله
حجي طه : من شنو تخافين يابابا
سليل : يضربوني الجهال ويوكعوني
حجي طه : لتخافين محد يضربج
سليل : وين النستله مالتي
حجي طه : طلعت النستله ام تمر وحطيتها بجنطتها
اذا مبجيتي اشتريلج موطا ام اللبن
سليل : الله احبها اريد هسه
حجي طه : لا من ترجعين من المدرسه يله حبيبتي اخذتها من ايدها والضحكه ممزوجه بلخوف والفرح تمشي وتكمز
وصلنا يله حبيبتي ادخلي
سليل : تعال ويايه حباب
حجي طه : ميصير باباتي الست متقبل
سليل : رجعني لماما اخاف
حجي طه : هاااا تردين ازعل منج ومااشتريلج موطا
سليل : لا لا اريد موطا
حجي طه : خلي امسح عيونج وخشمج ويله انطيني بوسه وادخلي ركض
باستني من خدي وطبت باوعت شون تدخل بهدوء الي عمر واشوفج احسن البنات وبشهاده عالية انطيني العمر يارب اوصلهن واعوض كولشي معشته بيهن
بقيت شويه واكف باب المدرسه خفت تطلع رجعت اتمشى وبيدي سبحه ابويه وظهري يوجعني من دفع العربانه بس هذا رزقي بعد
رجعت للبيت لكيت سندس توكل الجهال وحسام لازم شعر رشا ويجر بيها
مكعد تشوفي حسام اكعد بابا
سندس : ديلعبون عوفهم خلي اكمل شغلي
حجي طه : شيلعب وهو كطع شعر اخته تعال بابا عيب تضرب اختك
حسام : اكلت العنب مالتي
حجي طه : اني اجيبلك بس لتضربها هاي اختك خطيه تحبك
حسام : واني مااحبها ودفع رشا حيل وركض عطت بيه تعاال لك ختل وره امه
سندس : شبيك طة ليش تعيط علية
حجي طه : مشفتي شون دفع اخته
سندس : واذا قابل ذبحها جهال ويلعبون بينهم عوفهم سولتك بلولد بس يسوي شى تتخبل
حجي طه : لج بابا هذا اخوهن الوحيد لازم يصير خيمتهن ويخاف عليهن اكثر من روحه مو يضربهن وياكل اكلهن وذاك اليوم لازم نعال سليل وكاصه وقرصتها مكسرهن وانتي ولا يمج
سندس : غير جهال شتريد اضربه واعقده من هسه
حجي طه : لعد من تضربين البنات وحد اني هذا وضعج كولش محابه كعد تفرقين هوايه
سندس : رحمة لأبوك اسكت عندي شغل وغسل ملابس وظهري انكسر همه جهال بينهم عوفهم
حجي طه : اني مو على الجهال على سوالفج اذا تبقين هيج هذا الولد يسكط ويصير لانفع ولا دفع ولا ظهر لخواته
سندس : عود من يكبر يتعلم اني رايحه لأمي اجيب الدشاديش البازه منها خيطت لكل وحده دشداشه وبجامه لحسام ما اتأخر عينك عليهم
وره ١٠ دقايق اباوع رشا ماكو هاي وينها دخلت للغرفه ماكو صعدت فوك ماكو ياربي هاي وينها باوعت ريم نايمه وحسام يلعب جوه الدرج وحده ركضت للكراج الباب مفتوح مديت راسي الصبح وماكو احد اسمع صوتها بس هاي صوت انعام يمها باوعت الباب مردود مو حيل مديت عيني واشوف انعام كاعده تحط حنه لشعرها ورشا صافنه عليها وعاطت انعام امشي ولي لأهلج وهاي رشا تضحك وتلزم شعرها وتكول عيييع كخ وتهز براسها
انعام : ولج بت طة تولين لو احطه بحلكج جان ادنج رشا الزمي دولكه محطوطه بلكاع صغيره ستيل واشمريها بحضن انعام وعاطت
يتبع ..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!