رواية ابي والغزلان للكاتبة ريام هادي (REEM) الفصل السابع وسبعون 77 - بقلم الناشر آدم العربي

#رواية_أبي_والغزلان_الجزءالثاني
#للكاتبة___REEM___ريام_هادي
#البارت_الثالث_والثلاثون

عمت عين الزمان اليمشي بالمكلوب
مايرحم الزين يحركة ويمرده
عمت عين الزمان وعمت ذيج عيون
  من درب الحقيقة مغمضة وغمدة
مثل الموت بس يفتر على الزينين
ويخلي الاغم متونس بسدة !!

نهر : صخاام هااي شتحجي
ريم : عوفيها عمه تغرد وبعد وبعد شايفه انتي
راح تصير بلنعل بعدين
جان اطب سليل وبيدها ابنها واجت تركض على العياط
رشا : جان يعيط شعلان وكاال
شعلان : اله اسحلج سحل وغصب عنج ترجعين لبيتج واذا مااعيد تربيتج من جديد ولج اني تتجاوزين وتغلطين عليه بت الگلب
رشا : هم الك عين وتحجي عن التربيه والله عمي عينك كويه ولو الي يدك دكتك الناقصه كلشي اتوقع منه هو اكثر واحد يحجي بلشرف والمثاليات كول هذا اسقط خلق الله وهااا اذا اكو حايط يمك اركع راسك بيه شسوي سوي طلكني وصير رجال بليه فضايح اني مخايفه تره اني صاحبه حق انتم الانذال انت وذيج ام الزلم سبحان الله شلون واحد لايك للثاني بس مااريد بتي بيوم تكبر وتسمع بفضيحتك ياابو الشرف ياابو الدواوين وتروح فدووه لتراب الي يمشي عليه ابويه لتسبه
شعلان : مااطلع من ظهر ابويه اذا ماسحلتج مثل الجلب وارجعج اني تقشمريني وتلعبين عليه اله اخليج تبوسين ايدي وقندرتي بس حتى تشوفين بتج

رشا : والله لو اعرف اعفط جان عفطتلك انت رجال واخذ بتي مني سديته بوجهه وغلقته نهائياً حتى ليرجع يدك جسمي كله يرجف كوه اجر النفس

نهر : ولجن فهمني مو حتى ضغطي صعد
ريم : اني افهمج عمه بت اخوج الشريفه العفيفه الصايمه المصليه اتزوجت شعلان
نهر : يمه يمه صخااام وكمت بلا وعي اضرب على وجهي ممصدكه السمعته
ريم : عمه فقدت تعيط وتصيح صخام وتضرب بوجهه لزمت ايدها اوكفي بعد وكت اللطم وهاي المكروده شافتهم بفراشها لهذا وكف گلبها جان تخرب عمه ركضت  اني اجيب مي الها وسليل حضنتها وتضرب على وجهه تصحيها

رشا : كمت كوه اتنفس وتغوش عيني رجعت راسي اني بعدني نايمه بلكاع فارشيلي والتخم بصفي بحيث من اكعد انتجي على التخم رجعت راسي على التخم وغمضت ردت بس دكات گلبي تهدأ
ريم :رشيت مي على وجهه عمه وخطيه فزت وهي فزه وهي بجيه ولطم على صدرها حقها هاي بتها اخوها ورشا هم بت اخوها وهي ضاله بلنص رجعت لزمتها فدووه عمه شوفي رشا شلون تعبانه مو وكت لطم
نهر : ولجن تعزينا وتصخمنا ولجن راح تصير دمايه ليش جناااات هاي تاليها

ريم : عيطي وصيحي بس مو هسه شوفيها لتروح تتخربط معودنا صحت
كامت تزحف من الكااع وحضنت رشا وتبجي رشا متحملت وكااام تشهك وتعيط
رشا : عمه بفراشي لكيتهم على فراشي والله امنت بيها مثل ما أمن بخواتي هاي جزاتي والله ممقصره وياه والشده البيها اني وداعت بنتي ماقصرت وياه كمت حتى من گلبي يوجعني واتعب ويريد مني شى ماكول لا ولا اصده اكول خطيه شنو ذنبه مااريد اقصر بحقه لان هو ممقصر بحقي ومراعي الله بيه هاي تاليهه هيج يجازيني
نهر : سوده بوجهج جناات الله ياخذج شلون تسوين هيج
رشا : سوتها عمه سوتها

نهر : كاافي يمه ليوكف گلبج عساها بحضها وبختها الله لايوفقها ولايشوفها يوم راحه يالزهره بجاه حركت گلبج على ولدج الحسين تحركين گلبهم مثل محركو گلب هاي المسكينه
ريم : اباوع على سليل جامده وكاعده بلكاع وصافنه الووو يمعوده نحن هنا
سليل : شلون مسحلتنها شلون طبيتن البيت وشفتوها موجوده وسكتن بدون مااصلخها بلشارع واخليها فرجه للكل شلون تخلين شعلان يتقرب منج وتبقين هادئه فهمني شلوون

ريم : لازم هيج يصير حتى نكدر نطلع من الكوت
رشا : لو مسين هوسه جان بابا وسجاد يتأذون وانتي اكثر وحده تعرفين رجلج دمه حامي ومراح يسكت وهذا بين اهله وناسه وهمي الاكبر بنتي هسه گلي اخذها منج واخليج تبوسين ايدي حتى بس تشوفيها هو يعرف هسه نقطه ضعفي الوحيده بتي وخفت يستغلها اذا سوينا هوسه
سليل : اني عقلي ميشيلها جسمي كله كزبر
شنكول لبابا ولسجاد وللناس هي شلون تفكر اصلاً تتقرب من رجلج
رشا : فكرت وحست وتزوجت ونامت شحجي ياسليل شكول

ريم : هسه شلون نكول لبابا وسجاد لازم طريقه نخفف عليهم الصدمه
نهر : ولج يمه ياصدمه هاي فضيحه هاي عيبه بحقنا اذا هي تريد تتزوج مكالت مو قبل مده اجت ام عباس جيرانه ورادتها لابن خالها ارمل وكتلها وكالت مااتزوج باقيه على ابني
ريم : لا مو هيج نماذج تحب تاخذ مال غيرها تستمتع من تحصل شى مستحيل تحصله متريد گبل تحب المغامرات
نهر : يمه يعين گلبج حقه يوكف والله حقه
سليل : لك زين اكعد لا اكوم اكطعك
ريم : لتذبين حركتج بلجاهل صغير شمفهمه

سليل : معدتي گلبت والله راح يطك وكمت ابجي والله السمعته خلاني ارجف
نهر : يمه جم مره كتلج لتخليها يمج ميصير جلبتي بيها يمه ترجع هذا بيت عمها وعيب تضل رجال غريب اريد تحسين ميصير هذا الوضع وانتي لا عمه اريدها يمي لا عمه مااكدر بدونها هاج هاي تاليها خذت رجلج وبيتج وانتي رجعتي لبيت ابوج اكو وحده تخلي بنيه شابه ارمله ويه رجلها وسنتين وادك على رجلها من القهر واعض بأصابيعي
سليل : حتى من كملت شغلتها وفضت جلبت بيها

رشا : جاين تلوموني نسيتو هاي منو نسيتو خلي اذكركم قبل لتلوموني هاي مو نفسها بت اخوج جعفر الطيب گلتي يمه مكسوره وماعدها احد لتعوفنها وحطنها بنصجن وخلنها حالها من حالجن
نهر : بس مو تاخذيها سنتين يمج
رشا : هي لو شريفه وعينها مليانه ومغزر بيها الزاد والعشره لو اعوفها العمر كله ويه رجلها المفروض متطعني على كلامهم ماكو وحده ارمله شريفه
سليل : ماكلنا هيج قصدنا صغيره وماعدها رجال ميصير تبقى وحدها ويه رجلج

رشا : فدووه افهموني اني حسبتها حالها من حالكم وانتم لو مكاني هم تسوون هيج ليش هي مو نفسها الدكت صدرها وكفت بوجهه بيبيتها وانطت الفلوس لابونا لو ما سوايتها جان صار حسره علينا اللكمه نسيتو حال بابا من يرجع من العماله وهو رجال جبير مابيه حيل ينام على بطنه لان ميكدر ينام على ظهره من التعب والالم يكعد من الفجر حتى بس يجيب العشره والعشرين توكل بنات شابات وعمتهم هي نفسها بفلوسها خلت بابا يرجع يفتح محل ويصير هو ابو المال بدون حتى متطلب ورقه منه تضمن حقها وطردت بيبيتها واكلت كتله من رجلها حتى بس اني وانتي نعيش وناكل ومنحتاج احد اذا اليوم ناكل احسن اكل ونلبس احسن لبس وندفع ايجار بفضل فلوسها الي انطتهم لبابا حتى ميحتاج لبشر ويرجع يبني نفسه صّـْْ(☑)ـْْحّ رجعهن بس تبقى صاحبه فضل

بعد كل هذا تردون مني ما أمن بيها انتي مو نفسج عمه جنتي دوم تكولين الي يوگلج يوم لفه بعز جوعج وگلي شهر بعز شبعج والي يسوي الج فضل مره مااريدكم تنسون فضله مهما جان صغير وفضل جنات جان جبير ورجعت بينا وعاشت سنين ماشفنه العيبه منها وتعالو والله لو انتم مكاني تسوون هيج يعني تقنعيني ياسليل لو جايه وطالبه منج تعيش يمج مراح تفتحين بيتج الها وانتي هم ريم هم جان اخذتيها يمج الي سوته جنات خلانه نشوفها ملاك خلاني اني بلذات احسها اخت الي ومستحيل اتوقع اخت ادك الناقصه بإختها

سليل : صحيح والله كلامج
نهر : يمه كلامج كله صّـْْ(☑)ـْْحّ بس تبقى ارمله وشابه وتريد رجال
رشا : واذا ارمله مو اكو نسوان ارامل ينحطن على الراس مو كل ارمله ادور رجال ولا كل ارمله تحب تخرب بيوت اكو ارامل حتى احسن من المتزوجات بالالتزام والاخلاق والعفه يعني هسه انتي سليل متاخذين ريم يمج اختج ارمله وتعيشيها بنص بيتج ويه رجلج وترحين للدوام مأمنه
سليل : طبعاً مأمنه غير اختي
رشا : اني هم شفت جنات هيج اخت
حتى وان كانت ارمله حتى وان مطلقه هاي النظره ظلم بحق كل ارمله وهسه اني راح اطلك معناها ادور رجال اخذه من مرته حتى اهدم بيتها تره والله حرام فوك ما الدنيا طيحت حظنا احنا الارامل والمطلقات تجي الناس  تباوع بلعين الصغيره النا على هجامات بيوت وميصير يلفونا

ريم : بسرعه ماشاء الله صارت مطلقه خيه بعدج على ذمت مشعول الصفحه الله واخيراً اكول مشعول براحتي بدون متغزريني

رشا : كولي التريدي نبشي اهل اهله الكواد الناقص
نهر : والله حقج يمه هاي اني مو اطلكت وجنت دوم اخاف من الكلام وحتى ماابقى يم احد اخاف وحده تكول تاخذ رجلي
ريم : والله عمه كله منج
نهر : يااا مني
ريم : لو متزوجه طالب الله يرحمه وكاسره خشم هاي الحيه هند اقلها تحس بلي حسته هسه رشا
نهر : الف رحمه على روحه جان خوش رجال
ريم : هي بس الزين يروح وتضل العاريه اوووف
نهر : وهند شعليها
رشا : هو يكول من وراها لعبت بعقلي
سليل : ياعيني والله صغير زين هو ويتقشمر
رشا : نفس كلامي والله كلت بابا من كل عقلكم هند هو دوني طمع بيها عجبته ويذب الصوج بأخته

نهر :هسه شون ولجن طه شلون نخبره
ريم : والله ماكو غير وجهه بوجهه الشغله جبيره متتصغر ولا تتلزك
سليل : الله يستر مجرد اتخيل يعرفون اريد اوكع على وجهي
رشا : متشوفين وكف گلبي متحمل
ريم : كومي تريكي وراج علاج
نهر : شتكوم يمه هسه اجيبه ليمها تاكل
ريم : هو انتي وين بيج حيل بسرعه خربتي وانجطلتي بصفها راح افتح ردهه هنا ياهو يسمع الخبر ينجطل بصف رشا حتى منكمل العدد واسدد الباب واكتب عليه ردهت الصدمه من مشعول ترحب بكم

سليل : ههههه خرب ولج والله رغم المصيبه الهسه احنا بيها مشتاقين لسوالفج
ريم : يمعوده ياسوالف الي يعيش عيشتنا يتمنى الموت كل وكت
نهر : اوف يابنات طه بس لو ادري امجن بشنو توحمت وخلت حظجن ردي هيج
ريم : على اساس ابويه حظه فوك الجبل خلصها ايطاليا اسبانيا فرنسا سفرات ونسه وهسه استقر بلعراق هو مكابله ابويه وخلفتنا وهاج هاي النماذج الاجت البؤساء

سليل : اروح اطفي الجدر عفته على نار ناصيه يااكل يادنيه
ريم : فدوه سليل اخذي تيم وفرح يمج بين مااسبح رشا
نهر : ليش يمه اني مو موجوده
ريم : عمه انتي هم وجهج اصفر ويمكن ضغطج صعد خرب حظي لو ضاله مصدومه مو احسن اقلها جنتو اداروني صحيت لازم اداري شعبة الطوارئ كلها
سليل : والله بعيوني اداريج بس لترجعين لحالتج
ريم : شلون ارجع واعوف هاي المصيبه الصارت اذا هاي المصيبه تصحي المطي من صفنته مو عاد اني يله فدووه اخذيهم بس من اسبح رشا واسوي نومي لعمه بلكت ضغطها يستقر واكمل الغدا

سليل : صار حبيبتي واذا احتاجيتي شى دكيلي
ريم : بعد يااختي راح تجي ايام الله يعلم شيصير بيها
سليل : هسه من يجي سجاد اكول اله لو شسوي
رشا : لا اني اجمعه ويه بابا واحجيلهم بس انتو هم موجودات اقلها تهدون الوضع
ريم : اااخ لو الزمها اله اطلع ضيم گلبي كله بس هين يجنووو وين ترحين مني خلي نخلص من مشعول وراها استلمج

سليل : اخذت الجهال وامشي والله عقلي ميشيل الصار يمكن اتحمل لو كايله من تزوج من بره وحده منعرفها بس مو جنات وهم ليش يتزوج ولك حفيت لحد ما اخذتها عزه العزاج سليل بس لا سجاد هم هيج يسوي بس هااا لا سجاد ميسويها وليش ميسويها هم رجال سجاد يحبني لا عيني ميسويها لعد شعلان مو يموت على رشا وسواها يمه راح اتخبل دخيلك ربي مدري شحس ونار وگبت بروحي هاي شلون ما ماتت رشا رحمتك يارب والله تعبنا من المصايب بعدنا مجارين نفس من مصيبه ريم واجتنا هاي صفح
دخلت للبيت شربت مي احس حتى سكري هبط كعدت الجهال انطيتهم جبس وحلويات والعاب خلي يهوسون بلبيت المهم ميطلعون
بالي يم سجاد اذا عرف شراح يسوي

ريم : كومت رشا وكمت سبحتها مثل الجاهل حطيت كرسي وكعدتها جوه الدوش متكدر توكف اغسل وهي ساكته غسلت شعرها رشاوي شبيج ساكته
رشا : اعرف جنات احلى مني وابيض مني وجسمها حلوو بس والله اني هم مو قاصره ولا محلوه وجنت دوم البس وارتب نفسي ومايوم عفت روحي وصخه او بيه شعر ولا يوم مهتميت بجسمي ونفسي وريحتي والله ياريم مقصرت شكد مجنت اتعب كمت اخر فتره والله مااشكي اكول حتى ليمل
ريم : انتي عقلج راح يوكف من التفكير
رشا : شلون ميوكف واني صدمت بحب عمري

ريم : دنكت وصرت يم رجلها والمي يطفر عليه وكتلها اسمعي رشاوي الي يريد يخون تره يخون مو شرط مرته محلوه او مو نظيفه او بيها عيب هي دنائه نفس وعين فارغه لو مرته ملكة جمال وعجبه يخون راح يخونها ويه عوبه ولو هي عوبه وزركه اذا مراعي الله بيها لو ملكة جمال متهزه يشوفها احسن وحده واحلاهن وحتى من تقصر يعذرها هاي الامور الضمير والعشره والنفس هنه الي يحكمن الرجال مو حلات الشكل لو التقصير لو النظافه مالها علاقه وعيونج ابو طبع مايغير طبعه بس الجفن والعينه فارغه يبقى حتى تراب النجف كلها متترسها لتضلين تاكلين بروحج لو جنات تلعب النفس وجنها غراب وراد يخونج وياها يخون ويتزوجها

الي عليج كدام الله وضميرج ونفسج ماقصرتي بيوم ولا أذيتي وراح يتندم بكد شعر راسه ربج تره عادل ولو بعد حين يجي يوم تلكي يبجي دم عليج
رشا : هو گال طلكها تتوقعين يرجعها
ريم : والله كلشي اتوقع
رشا : عساهم بحركة گلبي يحتركون
ريم : امين خيه تره راح نتيخ من المي عجبج الوضع
رشا : اي والله جسمي ارتاح
ريم : اروح اشوف الجدر واجيج
رشا : لا كوميني اطلع كافي
ريم : يله كومي وكومتها ونشفت جسمها ولبستها وطلعتها ورجعت اني سبحت سريع لان هدومي كلها مي وصابون
وركضت على الاكل

صار الغده وكوه اكلنا كل وحده تفكر شراح يصير وحتى سليل سدت باب بيتها واجت يمنا وحطت الجهال بلهول يلعبون واحنا بالاستقبال كاعدين اجه بابا المغرب منتظريهم على نار وطب سجاد وراه ب٥ دقايق
غسلو وصلو واحنا كاعدات مثل بلاع الموس تكول احنا المسويات الجريمه مو ذولاك
حجي طه : شلونج باباتي
رشا :  الْحٍمَدٍ للـّہ
حجي طه : وانتي ريم البراري نورت البيت بطولج وحسج يابه
ريم : تسلم حبيبي بابا وبست ايده
سجاد : ريم وضعج شلونه
ريم : زينه عمو لتخاف
سجاد : قويه
ريم : ان شاء الله قويه
سجاد : عفيه بزيبك هاي بنيتي السباعيه
حجي طه : بنتي اني مو بنتك
سجاد : اسكت طه بتي هاي خيستها وسوالفها عندي
ريم : انفضحنا
حجي طه : بهاي حقك شبيج بابا رشاوي ساكته وضعج مو طبيعي وانتي نهر وسليل الوجوه مگلوبه
نهر : والله ياخويه شكول شحجي يعينك الله ويعينا على الجاي
سجاد : شصار

حجي طه : ياستار اول مدخلت الوجوه تتلاطم احجو مااحب هذا الجر والعر بلحجي
رشا : احجيلك بس بالاول بروح ابوك وامك وبمعزتنا متتعصب انت صاحب ضغط ليصير بيك شى منو اليه بعد
حجي طه : وتالي احجو
رشا : بلعت ريك ردت احجي بقوه وبدون خوف وتردد ودموع بس البي اني لو شكد مااكون قويه راح تنزل دموعي لان گلبي وروحي بعدهن يصرخن ويبجن دم بجيت وكتله
شعلان تزوج عليه جفلو وبابا جان يسبح ويحجي وكعت السبحه من ايده
سجاد : شمدريج
رشا : مو هنا الكسره بابا تزوج جنات شفتهم بعيني بفراشي
طفر سجاد يعيط وركضت سليل تهدي بقيت اباوع بعيون بابا الي مرمشت الصدمه مثل مجانت قويه عليه هو هم قوي

سجاد : اليوم احرك اهله شلون متحجين من جنا هناك شلون سكتي
رشا : والله خفت عليكم
سجاد : اشعل اهل اهله الساقط هي تايهه يتزوج من هاي ويعوف هاي احنا نطي مره امانه يمه يزوجها السافل العديم الرجوله تدنت نفسه على الدخيله ولك اليوم اشعل ساسه لو كاتل لو مكتول
سليل : لزمت سجاد فدووه بداعت زين لتسوي شى
سجاد : وخري مني لج هذا طعنا بظهرنا شنو هيج مستصغرنا وشايفنا مو زلم ويتزوج بكيفه مالهن اهل زلم وراهن اليوم اعلم شلون يدك الناقصه ويدوس كرامتنا
طلع سجاد وسليل ركضت وراه

نهر : طفرت على طه فدووه طه احجي شى عيط صيح لا تسكت حسيت عيونه تسد وتفتح وايده يفرك بيها عطت ولج ريم الحكي صيحي سجاد ابوج مدري شبيهه
رشا : كمت من مكاني كووه وحضنته فدووه بابا ليصير بيك شى منو الي منو ياخذ حقي منهم

ريم : ركضت بملابس البيت بس جريت ربطه ورحت لبيت سليل بعد ٣ بيوت ودفعت الباب وطبيت لكيت سليل طاكه بيجي ولازمه سجاد الي جار سلاح ويريد يطلع
ريم : الحك عموو بابا وكع
شمر السلاح وركضنا كلنا رجعنا للبيت وجاب تكسي واخذوه للمستشفى سليل وعمه وعمو وبقيت اني يم رشا
رشا : كله من ورايه كله
ريم : شجاج بعدج بالاول ونهاريتي
رشا : اذا صار شى بابا والله اذبحهم
ريم : ان شاء الله ماكو شى ضغط وصعد حقه تره الشغله حيل جبيره مو بس مبدأ انتي تزوج عليج رجلج مبدأ شلون بت اخوه مأمنها عن ابن خاله ودخيله ويتزوجها بلسر والله عيبه وجبيره حيل
رشا : همه ذوله يعرفون العيب اااخ ياربي روحي شوفي جهال صوتهم عالي
ريم : رايحه

سليل : اخذنا بابا للطوارئ وبعد الفحوصات والمغذيات والتخطيط بعد خمس ساعات نطحن بروحنا اني وماما وسجاد يركض هنا وهنا همزين جان بيومها اكو دكتور يفتهم وشخص حالته كال جلطه قلبيه بس عبرت
گلبه مثل گلب رشا متحمل الصار
حجي طه : رجعوني لبيتي مااريد ابات
سجاد : ابقى طه للصبح اكو اخصائي كالو دين يشخص الحاله ونطلع
حجي طه : شراح اسوي بهاي المصيبه هاي جبيره شلون اركعها
سجاد : متتركع غير بلدم والله لا اكتله وخلي ادخل سجن
حجي طه : اذا انت دخلت سجن واني متت ذني منو الهن هم يبقن يتلطم هنه وجهالهن بلدنيا گبل وهنه صغار انت موجود هسه منو الهن وكل وحده برگبتها جاهل

سجاد : لعد نسكت اله وعلى دكته اذا نسكت نلبس شيلات ونكعد ويه النسوان
حجي طه : منسكت بس مو دم مااريد اخسرك لك سجاد انطعنت بظهري لمن ظهري انترس طعنات حتى مكان ماضل بيه بديتها من ابويه من سجلني بأسم وحده متخاف الله ونهيتها من بت اخويه نامت بفرشت بتي خذاها ابن خالي الي اعتبرته رجال

سجاد : على كيفك هسه الدكتور كال موزين على صحتك نطلع ونرجع للبيت ونفكر
سليل : اباوع بابا وسجاد ماكلهم الضيم وخايفه على سجاد ليسوي البراسه ولو يستاهل شعلان الگلب الذبح بس مو مال اضحي بسجاد ربي هونها ياربي هاي نار وتحركنا دك تلفوني رشا
رشا : هااا بشري شصار
سليل : جلطه قلبيه
رشا :يايمه بابا شلونه عفيه
سليل : لتبجين مابيه شى والله وكعد هسه واستقر وضعه بس الصبح انطلعه ونجي اقفلن الباب عليجن
رشا : سليل مكعد تقشمرين عليه
سليل : لا والله شبيج عبرت  يجوز بالعشره اذا مو قبلها بلبيت ولتفتحون الباب ابد لاحد
رشا : مااشي
سديته وفتحت دكم الدشداشه ورفعت ايدي وعطت ربي مثل ماحرگت گلب ابويه الطيب وگلبي كون تحركهم
ريم : شكوو شكوو سمعت عيطتج
رشا : بابا جلطه قلبيه من وره ذوله الانذال
ريم : يمه وهسه

رشا : تكول سليل عبرت وزين هسه وباجر الصبح يجون هسه بيش الساعه
ريم : ساعه ١١ ونص تقريباً
رشا : قفلي الباب مراح يجون للصبح
ريم : مااشي
رشا : جيبي الجهال وكلنا انام هنا
ريم : هو كلنا انام سوه بس كون زين ميلعب علينا بليل ويبجي
رشا : لا هو متعلم ينام هنا بس نومي على هاي القنفه دوم يحب ينام عليها واكو بطانيه جوه بغرفه عمه غطيها بيه هسه يغفى
ريم : شمدريج انتي
رشا : غير يوميه اخابر سليل جنت ونسولف واعرف كلشي
ريم : مااشي

جبت الجهال ونومتهم كلهم وبقينا اني ورشا نسولف الليل كله نحجي على بلاوينا الي متخلص
ريم : اريد اروح لبيتي
رشا : مو هسه خلي تخلص شغلتي واطيب ونروح سوه
ريم : زينه هم تخابر تسأل
رشا : اي والله دوم حتى سليل تكول تسأل عنج وعن تيم بس اكو شى لازم تعرفي
ريم : اكيد مصيبه احجي عادي تعلمت
رشا : حموينج عرضو البيت للبيع
ريم : لا ليييش
رشا : حسب كلام زينه اخر مره من خابرت سليل البيت ورثه مال ابوهم وصار اشهر مسدود
ريم : بس همه اخوته بلخارج وممحتاجين

رشا : ماكو واحد يعوف ملايين جامده وبلعراق شكد ميجي الهم يعتبروه زايد خير
ريم : وغراضي وشغلاتي
رشا : الله شاهد بهوستنا من جنا نركض بيج اجت وره السابع حماتج وجابت جنطه موجوده بكنتور بابا بيها الذهب مالتج وفلوس يمكن مال رجلج الله يرحمه وكالت ذني مال ريم
ريم : كمت لغرفه بابا وفتحت كنتوره ولكيت الجنطه جانت مالتي جبتها ورجعت كعدت بصف رشا فتحتها لكيت ذهبي كله الهدايه والنيشان وحتى كم حاجه اشتريتهم وحجول رفوله الذهب بستهم فدووه لرجلج ونزلت دمعتي

رشا : هم خلف الله عليها جابتهم نسينا احنا
ريم : هاي فلوس سامر مال العياده جان شغله زين
رشا : الله يرحمه وكالت مااخذنه فلس منهن والفاتحه اخوته شالوها و بس تصحى كولولها هاي الفلوس الج ولتيم مااخذنا دينار منها
ريم : الله يحفظهم بس اريد اروح للبيت قبل ليبيعوه
رشا : نروح بس نفض هاي السالفه الوكعنا بيها
رجعت الذهب والفلوس بلجنطه وحطيتهم بكنتور بابا ورجعت بصف رشا تمددت وكوه نمنا وبس ندعي الله يرجع بابا زين للبيت لان حيل خايفين عليه

سليل : طلعنا الصبح بابا بعد ماكشف عليه الطبيب وانطونا عنوان طبيب بساحه بيروت طبيب قلبيه نراجع حتى يشوف اخاف محتاج قسطره للقلب بقينا اني وماما وحده تباوع بوجهه الثانيه بله نعالج گلب بابا لو گلب رشا اووووف شفضها هاي السالفه
واول منزلنا فتحت ريم الباب وركضت بحضن بابا
سجاد : على كيفج ريم ابوج بعده تعبان
ريم : والله الليل كوه نمنا
حجي طه : مابيه شى باباتي ليضل بالكم
دخلناه وجان تندك الباب عمو محسن
محسن : هااا ولك كبرت صار بيك قلب عبالي ذيب امعط مايكدرلك المرض
حجي طه : اليشوف المصايب بكدي المفروض من زمان مات
محسن : اي والله كم مره كتلك ليش عايش خرب حياتك الزفره بس انت مامتت بلحروب ماسمعت كلامي اقلها شهيد متتحاسب هسه اذا متت ناكر ونكير يستلموك دك بلصونده

ريم : شلونك عموو
محسن : هاااا منو ريم والله ممصدك عيووني ولج واكفه على طولج واسمع صوتج جان يجرني من ايدي وحضني حيييل
والله ممصدك شفتج سالمه شلونج بنيتي وباس راسي
ريم :  الْحٍمَدٍ للـّہ عمو انت شلونك
محسن : والله هسه صرت عال العاال غير تحجون تكولون والله ناذر لوجهه الله بس تكومين بلسلامه اذبح طلي جوه رجلج على سلامتج
ريم : شكراً عمو متقصر هااي شنو صاير ادمع عيونك

محسن : والله من وره سوالفكم الغمه يوميه كاسرين ظهورنا وبس نفكر بيكم هاي الخلفه ياطه بس القهر وراهم لو ضالين زكرتيه (اعزب) هواي اشرف لا عين تشوف ولا گلب يحزن بس نتگلب على هاي الحلوات هسه بلشارع بويايه مو نسوان غضب عبوات على مفخخات على احزمه ناسفه تمشي وتغم بگصتك وتكول وين جنتن من جنا شباب واكول ياليت الشباب يعود يوماً
ريم : ميفيد بعد عمو حجي يفيدك هذا
محسن : لا العب لعب بعرضي
ريم : غيرك لعب خوش لعب
محسن : منو قصدج

حجي طه : تعال اكعد
محسن : شلونج بنتي رشاوي هاي صدمتني من شفتها واكفه ونسيت اتحمدلج بلسلامه
رشا : الله يسلمك عمو
محسن : وجوهكم مو طبيعيه
حجي طه : تعال ويايه للغرفه
واخذه ودخلو
سجاد : رايح للبيت اسبح واجي
سليل : اجي وياك
رحنا للبيت دخلنا واول مدخلنا حضنته فدووه سجاد بداعه زين بمنو احلفك لتتهور والله مالنا بس الله وانت اذا صار بيك شى وين انطي وجهي هسه انت رجلي وابو ابني وحبيبي والي خواتي عفيه ابويه شفته شلون مكسور ويوميه كسره شكل حتى گلبه ميتحمل وضال حاير سوده عليه ويباوع بلوجوه هسه اذا انت صار عليك شى مو كلنا نتيه
سجاد : والسواه شعلان يفلت منه

سليل : ميفلت بس بلعقل تعال اسبح وصلي مال الصبا قضا لان مصليت وارتاح وراها نروح لبيت اهلي واكعدو ونشوف شيصر
سجاد : خلي اسبح واطلع
سليل : دخل للحمام باوعت على الميز سلاحه شلت وضميته اخاف يغافلني ويطلع

ريم : سويت اكل وخليت عمه ترتاح اباوع ساعه ١٢ وجان تندك الباب حيييل فزيت
طلع عمو محسن من الغرفه
محسن : هاي منو يدك هيج الباب
ريم : مااعرف والله طلع عمو وفتحت البرده واشوف شعلان يطب صاير بارود وحده والله عين كويه ركضت على فرح ولزمت تيم وزين وكتلهم نصعد فوك عندي كومه حلويات امشوو صعدتهم للغرفه خفت يجر فرحه وياخذها ويضيع كل تعبنا صعدتهم فرح مو صغير حييل عمرها هسه اربع سنين وكم شهر تفطن كتلها العبي ويه اخوتج وعينج عليها وقفلت الباب عليهم من بره
وحطيت المفتاح بصدري ونزلت اركض يم رشا لكيتها ترجف
رشا : هووو مووو صوته
ريم : اي الخايس المعفن
رشا : ليدخل فدووه
ريم : خلي اخابر عمو سجاد يجي
رشا : فرح وينها
ريم : لتخافين فوك والمفتاح بصدري لو يموت ميكدر ياخذها

فتحت الشباك اسمع شيحجون
شعلان : ابو فيصل اجيت اخذ بتي واروح وبتكم يمكم
محسن : يعني فوك دكتك تريد تاخذ الطفله من امها ارجع لبيتك شعلان غير واحد ميشوفنه وجهه
شعلان : اني احبك ابو فيصل ومااريد اتجاوز واكول مالك دخل من رخصتك وخر من وجهي وخليني اطب اخذ بنتي وذيج بلغها اله اسحلها بلمحاكم واطلبها بيت الطاعه
محسن : شنو محد بعينك جاي تهدد وتعيط وانت العايل
شعلان : ماسويت غلط تزوجت على سنه الله ورسوله
محسن : ايباااخ لك هاي عليمن تقشمر روحك لو تقشمرنا غير ماخذ بت عمها الي المفروض خطارك وبلسر تره هاي عيبه عدكم يل تعرف العيبه

جان يدفع محسن وكاام يعيط وينها ودفر الباب طفر بابا عليه ولزمه من دشداشته بس تعبان ويرجف بعده مشاد حيله
حجي طه : اليوم اذبحك هاي تاليها هيج انطيك بنتي وبت اخويه امانه وتخونها يلنذل
شعلان : اتزوجتها مالزمتها بلحرام
حجي طه :ياحرام تحجي عليه وانت طلعت حالك حال ابن الحرام تعض الايد الي تنمد الك

ريم : خابرت على عمو سجاد وكتله الحك شعلان هنا
سليل : جنت بلحمام طبيت وره سجاد اسبح حاره بنص شهر التاسع وبايته بلمستشفى لهذا بس طلع سبحت وراه ودك تلفونه وسمعته كاال جاي ويعيط ولج وين السلاح
سليل : بس اريد اغسل جسمي كله صابون واركض وراه طلعت ملكيته راكض بدون سلاح
شعلان : طه اريد بنتي وعندك بتك
حجي طه : مو هي كوتره وبكيفك تاخذها وتطلع دفعه حيييل وكله اطلع وعندك عشيره اله اكاومك عشائرياً واطلك بتي ورجلك فوك راسك
شعلان : والله ولا اطلكها اله اعوفها هيج معلكه اني تغلط عليه وتتجاوز وتكول اسويك مضحكه بتك هاي الممتربايه تغلط على رجلها
جان يطب عمو سجاد حاافي وكاال
سجاد : والله المفروض متغلط تنزع الي برجلها وعلى راسك ياعار وتلازمو

رشا : كمت على حيلي واكفه اني وره ريم واشوف عمو وشعلان ناس تضرب ناس وعمو محسن وبابا يردون يفاككوهم وعمه نهر تلطم وتبجي
جان يدفعهم لان تلاثتهم عليه وركض للسياره ودخل بيده سلاح اني شفته هيج طلعت اركض دخيل الله عوفهم
شعلان :انطوني بنتي لو اكتل واحد منكم
رشا : الله ياخذك دمرتني شتريد مني
جان يجيت عمو سجاد وتقاوه ويااه بلقوه وطلعت طلقتين وعياطنا صار ماله والي نباوع شعلان كله دم وكعت بلكاع كلت مااات من وكعت من الهبطه و مو انقهرت عليه موتت الجلاب عساه بس ضاع كل تعبنا مردت اخسر عمو وراح نخسره طبت سليل تعيط
نريد نركز بلي صاار

نباوع صاحي بعده ويعيط اااااخ صاح عمو محسن
محسن : برجله برجله
جر السلاح عمو سجاد وحطه براسه وكال انت لو صدك رجال وبيك خير مجان هديت بسلاحك وتهددهم فوك سوايتك لو عندك ذره رجوله اتجيب عشيرتك وتوكع يم رجلها وتبوسها وتعتذر منها وسالفه جنات ماافوتها الك لو اعرف انعدم
حجي طه : جيبو تكسي نودي
سجاد : مااخذ جلاب اداويها تردون انتم اخذوه عسااه مات وخلصنا منه

ركض محسن وخابر على حسين حتى يجيب سيارته
سليل تبجي وتعيط من الخوف جان يعيط بيها سجاد كااااافي مااسمع صوتج
ريم : ركضت على سليل ودخلتها وخطيه تمرد بروحها وتصيح راح يروح مني
ريم : لتخافين قابل مات متشوفي مدد المطي شطوله بس طول گبر اي والله الي يشوفه يكول اختل بسده حتى سلاح مادبرها يهد بيه تالي اكله طلقتين برجله هاي الرجل سكطت لا محاله گبل جاي وهسه طلقات ناقصها شويه بانزين تصير فل
سليل : خايفه يدخلوه سجن

ريم : لتخافين والله هسه يحلوها هو متعدي وهذا دفاع على النفس حتى لو اشتكه هاي عود انتي دارسه وفاهمه
سليل : شعليها الهندسه بهاي السوالف
ريم : عوفج من الدراسه خلصنا عمرنا مكابلين المسلسلات المصريه والخليجيه والافلام الاكشن ملكطتي شويه منهم
خلي اروح على رشا

طب حسين يركض ومتفاجأ بلي صار شعلان بلكاع مدمه وسجاد كاعد وبصفه سلاح وعمو محسن يكوم بشعلان حتى ياخذوه طبيت للمطبخ ماردت اشوفه
واخذ شعلان وسط صدمه منه
نهر : شراح يصير هسه طه
حجي طه : ميصير شى دك تلفونه باوع هذا خالي خضير
نهر : جاوبه
جاوبته ويكول تره شعلان اجاكم
حجي طه : تعال خالي ابن اخوك بلمستشفى تصوب وكول اله اذا مطلك بنتي الطلقه الجايه براسه مو برجله

سليل : خفت اوصل يم سجاد جان حيل عصبي رجعت للبيت جبت ملابس اله وحذاء لان جاي بلشورت والتيشيرت مال البيت وحافي مصار دقايق من طلع من الحمام
كام بدل ومشط
تقربت منه وبست جتفه وحجيت بهدوء ليش هيج سويت
سجاد : لان رجال وماكو رجال صاحب غيره يقبل على الصار لو متزوج غريبه نكعد نتفاهم وياه ونشوف القصور منين منه من بتنا ويجوز يريد اكثر من مره المهم نفتهم الصار بس مو يتزوج بلسر من بت عمها وياخذها مثل الساقطات بلبيوت هاي اسمها غدر واستهانه بينا وبرجولتنا
سليل : واذا اشتكى عليك
سجاد : جبان خري هذا بس هوسه هسه ميشتكي عشيرته متخلي لان تكبر السالفه واكيد كلهم عرفو بسوايته

سليل : بس همه عدهم عادي يتزوج وحده واثنين وتلاثه
سجاد : بس مو الدخيله اكو فرق وهسه يجون اهله ونشوف وحتى اذا انسجنت عادي المهم بردت گلبي
سليل : حضنته وكمت ابجي
سجاد : اذا تحبيني لتبجين شوفي خواتج شكد قويات اريدج مثلهن انتي هسه جبيرتهم وابوج مريض والافضل تاخذين اجازه وتكعدين هنا بينهن لحد متفض
سليل : وانت
سجاد : هااي شبيج ماعليه شى وداعتج اله اخلي يطلكها وراسه فوك رجله

عدا يومين النوم منامه الاكل كوه يطب بحلكنا وشعلان مابيه شى طلقتين برجله طلعوها بس وحده منهن كسر سوت بلعظم وأذت رجله حييل
وخابرو بابا وكالو نجي ونجيب اهلنا ونحلها ومثل مكال سجاد مشتكه ابد والسبب خال بابا خضير طمطم الشغله حتى لا حييل تكبر وخاصه بابا وشعلان من نفس العشيره يبقى ابن خاله وخاله يصير ابن عم ابوه اللح يعني نفس العشيره مو عشيرتين تكعد وتتفاصل بس عمو محسن مقبل كاال ماطول نفس العشيره اخاف يضيع حق بتك وهاي لخاطر فلان وخاطر علان ويطيح كلشي  لازم ندخل طرف ثاني وبيومها تواصل ويه سيد معروف واله كلمته وهواي عشاير ادز عليه بلفصول الجبيره يعرفه عمار العامل بمطعم بابا هو ميعرف القضيه شنو عمار بس سمع عمو محسن يخابر واحد ويستفسر منه وكال ماطول للحجي ماعندك غير عشيره فلان والسيد فلان يفضوها
وتحدد موعد الكعده بعد ٣ ايام وانخبصنا

وصار العصر وكاعدات كلنا بلمطبخ وانترس الاستقبال نباوع من وره البرده على الكراج وطب سيف وابوه خال بابا وشعلان بلعربانه يدفعوه وحسين ومحسن وحتى عمو سجاد كعد وبابا وناس معكله هوايه والسيد واكم رجال معكلين من العشيره الثانيه وبدو يحجون وشوي شوي علا الصوت ومنسمع بس هوسه تقربنا شويه ونسمعه يكول عمو سجاد

سجاد : هو اجه وتعدى على حرمه البيت واني دافعت عن حرمته كون اني واحد من اهله واذا عدكم بقانون العشاير يحقني قيد شعره اني مستعد لكلشي
شعلان : اجيت اخذ بتي
سجاد : مالك حق تجي تعيط وتتجاوز وسلاح بيدك ولو باقي بعد تتجاوز جان الطلقه صارت براسك وهم متحقوني عشائرياً
وشتغل العياط وناس تجر وناس تعر لحد ما وكع حق شعلان وصار لحق لسجاد كون شعلان الجاي للبيت بلسلاح والسلاح الي انضرب بيه مال شعلان مو سجاد يعني دفاع عن النفس وسقط كلشي يدين سجاد عشائرياً ورجعو للموضوع الاساسي هو موضوع رشا وهم نقاش طويل وسكتهم السيد وراد يسمع من شعلان ليش هيج سوه

اني رجال والي احتياجاتي وهي مريضة ومتكدر وعدها القلب ومن حقي اشوفلي مره اني مظلمتها مكعدها بيت الف مره تتمناه ومعينها وكلشي تريده ليمها يجي وسألوها بس ردت حقي وهي متكدر تنطي الي لان تتعب ومردت اجرحها واقلل من قيمتها وهم خفت عليها علمود موضوع الخلفه وهاي اني عمري ٤٠ سنه وماعندي ولد يحمل اسمي بس بنيه وردت ولد اجرمت كفرت شرع الله وطبقته
سجاد : ملكيت غير بت عمها

شعلان : مو حرام وهي مو مراهقه واخذتها شابه وجبيره واعيه وارمله وبرضاتها وردت أجر الها وحدها وكل وحده بيتها
حجي طه : يعني انت مقتنع بكلامك من كل عقلك انطيك بت اخويه حتى تحميها من عيالها تروح تتزوجها بلسر هاي عيبه لو مو عيبه جاوبوني يااهل الرحم عيبه لو اني غلطان تعال كوول هاكم بتكم واني اريد اتزوج والي اخذها بت اخوك مااكلك اوافق هم راح ارفض بس اقلها اعتبرك رجال وكدر توكف بوجهنا وتاخذها مو تتختل مثل الحراميه
ريم : مدخلوني على هذا ابو الاحتياجات اسكطه اكثر ما هو سكط واخلي طول حياته ميحتاج

سليل : خلي نسمع اسكتي
رشا : الله لايوفقه عساه لا تهني ولا كاام وبقى بلعربانه طول عمره
نهر : يمعودات اسكتن
وبدت المناقشات واخذت اكثر من ساعتين اخر شى كال شعلان اريدها ترجع وهي زوجتي وذيج طلكتها وهاي ام بنتي ومااتنازل عنها السيد كال يابه صيحولنا البنيه خلي نشوف شتريد

رشا : خفت ورجفت طلع عموو سجاد كال البسي عبايه مو جبه ولفي نفسج زين حتى جف ايدج مااريد تطلع لبست عبايه على راسي وتلفلفت زين وطبيت ويه عمو والدمعه بعيني خايفه مو بس خايفه مرعوبه وخاصه بنص شيوخ وهو يباوع عليه وعيونه براسه
السيد كال بنتي راضيه ترجعين لرجلج وكال اراضيها والي تريده يجرالها وهااي كدام الناس الخيره التردي ينفذه وهو الممنون
رشا : بلعت ريك وگلبي يدك سريع وكتله بهدوء وبصوت مسموع سيدنا احلفك بجدك رسول الله طلكني منه
السيد : لا اله الا الله بنيتي ابغض الحلال عند الله الطلاك وهو غلط وجاي لدارج يستسمح منج

رشا : بس اسألك سيدنا لو بنتك صار بيها الي صار بيه ودخلت لبيتها وبنص فراشها ولكت رجلها ويه بنت عمها الي تعتبرها اختها ولفتها سنتين عدها وحمتها من عيالها حتى لياخذون ابنها  ودارتها مثل الماي بلصينيه وامنت بيتها عدها ومافرقت بينها وبين نفسها بكلشي تقبل ترجع بنتك لرجلها وكأن كلشي مصار صفن بوجهي وكاال
السيد : لا والله يابنتي ماارجعها لو على كص رگبتي
رشا : من رخصتك اعتبرني بنتك ولترجعني لهيج واحد داس كرامتي برجله ودنس فراشي لترجعني للذل الله لايراوي بنتك الي شفته والي حسيته لتكسر بختي اكثر ما هو مكسور دخيل بختك سيد

السيد : سمعتو كلامها للبنيه والي يرضى على بنته الذل يرفض كلامها الكل سكت ومحد حجه
السيد : روحي بنيتي التردي يجرالج
رشا : طلعت منهم امشي بكل ثقه بس والله داخلي تراب ومن طلعت شمرت نفسي بحضن ريم
ريم : عفيه بلسباعيه
شويه وعلى الصوت مره ثانيه وطلع اجه بابا كاال
حجي طه : احسبي حسابج بعد كم يوم يطلكج بس لازم تتنازلين عن حقوقج
رشا : متنازله كلشي مااريد
رجع بابا الهم واجاني وكاال هذا هو بنتي كم يوم وتصيرين حره راح يطلكج شعلان وفرح تبقى عندج
يتبع .....