رواية ابي والغزلان للكاتبة ريام هادي (REEM) الفصل الثاني عشر 12 - بقلم الناشر آدم العربي

#رواية_أبي_والغزلان
#للكاتبة_Reem_ريام_هادي
#الجزء_الأول #البارت_الثاني_عشر
#مدونة_نور_قلبي

شسولف
ياهو يسمع
ياهو يفهم
ياهو يعذر
ياهو يهتم
هيه دنيا الناس حايط طين شما بجت غيمه يتهدم
وبيا بشر ماتلكه الوجع ملتم
وياهو التفكده بلا سبب تلكه السبب عنده
مثل عطاب شم ينشم
تلكه وجوه عنده تنافس الزار
وبكل وجه عنده يتلثم

شهر ١ لعام ١٩٨٧ قبل ايام تزوجت نهر واستحيت امر عليها لأول مره احس اكو شى يمنعني من اختي شكد حاولت انعام تحرمني منها مكدرت بس من تزوجت وصارت بيت زوجها بذاك الوكت حسيت ابتعدت عني بس الحنين حنين لو حطو الف جبل گباله يعبره ويجيك اليوم التحق اخذت الجنطه مثل كل مره وحطيت مصرف للجهال ولسندس جان باقي عندي من الفلوس ٣٠٠ دينار عفت الهم منها بستهم  وهمه نايمين وخاصه رشا لان عيد ميلادها بعد كم يوم ومااكدر اكون موجود صار عمرها سنه حبيبتي اباوع على سليل شون نايمه وحاضنه لعابتها بس حسام بحضن امه ودعتهم وطلعت اتمشى هوا بارد يكص كص ساعه ٥ ونص الفجر وصلت لنهايه الشارع قريب مااوصل بيت سامي واشوفها واكفه وبيدها دولگه المي حسيت مو اختي واكفه امي من كثر الحنيه الي عدها رحت الها بلهفه واني حيل مشتاق الها جان تحضني حيل وتبجي

نهر : اشتاقيتلك حيل
حجي طه : شطلعج بهلبرد
نهر : شون مااطلع وادري بيك اليوم تلتحق
حجي طه : من يوم ملتحقت بلجيش وسنين انتي الي تذبين المي ورايه كمت اتفائل من تسوين هيج
نهر : شعندي غيرك يشهد الله تروح وتجي واني بس ادعيلك جان يمد راسه سامي
سامي : تره بديت اغار
حجي طه : هههههه ها ولك على شنو تغار مكافي اخذتها مني
سامي : لا اخذتها ولا شى هاك بعز البرد كامت من فرشتها واجت تركض عليك
نهر : غير هو ابويه واخويه شون مااكوم من فراشي اله لو يريد عمري انطي جوه رجليه جان يلزم راسي ويبوسه
حجي طه : يله ادخلي لبيتج بارده مااريدج تتمرضين وانت سامي عينك عليها
سامي : من عيوني شعندي غيرها
نهر : مودع بالله حبيبي
بوسته وطبيت والدمعه بعيني اااخ ياخويه من يومك حنين وماعندك حظ
سامي : نهر گلبي شون منام اليوم
نهر : ادخل حبيبي جايه وراك
سامي : لا مو اريدج ويايه حتى اسولفلج الخطه العراقيه لضرب القطعات الايرانيه
نهر : ههههههه متعبت من ضرب القطعات
سامي : ليش هاي الحرب ينشبع منها كل مااضرب القطعات اكول هل من مزيد
نهر : هههههه امشي حضرت الواء سامي
سامي : يرحولج فدوة حتى رئيس اركان الجيش
نهر : ههههه عزه ليسمعك احد وتخلص ضرب القطعات هناك يمهم
جان يحضني ودخلنا للبيت حياتي ويه سامي هادئه وحلوة يحاول شكد ميكدر يراعي الله بيه وحيل مداريني

حجي طه : وصلت للجبهه ورجعت لضيم الحرب والقطعات الحربيه بس الحلو بيومها اجه محسن ويوزع حلويات اجاه ولد سماه فيصل
حجي طه : ولك شو فيصل
محسن : غير ابويه گتل نفسه على اسم الملك فيصل تكول عبالك جان وزير بحكومته وهسه يجدد الولاء بأبني
حجي طه : وشعجب مغيرته بلبيان
محسن : حتى يبيتني بلشارع اذا هي مرتي الرعنه طبكت وياه تعرف عائله ملكيه نحب اسماء ولدنا من العائله المالكه

حجي طه : هههههه بس تره اسمه حلو قابل شسميه
محسن: اني ردت اسمي غضب حتى يصير اسمه غضب محسن او قوي حتى يصير قوي محسن
حجي طه : شنو هاي الاسماء مال واحد يريد يتعارك بيك زود انت تعارك وعوف اسم ابنك
محسن :شبيها الاسماء كلها قوه امي تدري شتكولي
حجي طه : شتكول الحجيه
محسن : تكولي اسكت لا اسمي دوده حتى يصيحولك ابودودة ترضاها
حجي طه : ههههههههه والله زين تسوي من سوالفك بس تكمز
محسن : بعيني اذا مااخلي ابويه يصادق على امي واردها الها شون تطبك وياهم وتعوفني اقاتل وحدي واخسر المعركه وتالي يتسمى فيصل

حجي طه : بلعافيه على خساره المعركه
محسن : هاك اكل شوف شون كليچه سوت الحجيه تخبل
حجي طه : عاشت ايدها
محسن : ولو اكل الحجيه لا يعلى علية بس هم ماكو اطيب من گليجه صبا الله يذكرها بلخير
حجي طه : اووووف ياخويه لاتلچم جرحي تره بعده ينزف
محسن : كولشي قسمه وهي مو قسمتك عندك مرتك وجهالك اكيد يسون الدنيا عيش وانسى
حجي طه : لو الواحد ينسى حبه الاولي جان هاي الدنيا كلها بخير
الحب الاولي مينسي محسن ينحفر مو بس بلگلب حتى بلعظم وكل متلزم قطعه تصيح ااخ شكد مشتاق
محسن : ليش ماازوجك صديقه امي ام حمزة هي عورة صحيح بس طولها بعشر نسوان صح زركه بس طولها بعشر نسوان صح جنهه رجال من تحجي على لحظة تحس راح تشيلك وتركعك بلكاع بس طولها بعشر نسوان صح خشمها جنه تريله محمله صواريخ بس طولها بعشر نسوان
حجي طه : اوكف اوكف هاي مو مره اعور الدجال
محسن : بس طولها بعشر نسوان
حجي طه : وشسوي بطولها
محسن : اقلها تستغني عن الدرج واذا تريد تنتحر تصعد على راسها وتشمر نفسك مباشره تلكه روحك بلكبر والملائكه تحاسبك ومن يشوفون شمزوج يدخلوك الجنه گبل بدون حساب

حجي طه : خرب حظك طه لو سندس لو ام حمزة  العوره ادري امي بشنو توحمت وخلفتني
محسن : توحمت بام حمزة شافتها وكالت الله هاي شطولها وخلفتك
حجي طه : ههههه شبيك بس بالك طولها
محسن : ولك من اني وصغير من اشوفها اكول هاي المره ليش هلكد طويله عبالي جوه العبايه اكو احد شايلها
حجي طه : لا بربك
محسن :اي والله جانت امي اذا ماانام تخوفني بيها ولك خلصت طفولتي كلها منكع فراشي من وراها بس احلم بيها لازم اصبح الصبح منكع نفسي وفوكاها انكتل كتله معدله  اكلها لأمي من وره صاحبتج متصدكني غير مشايف طولها تكره نفسك تحس روحك قزم وفوكاها يخبل شگلها تحيه كاريوكا مو مثل حسنها
حجي طه : هههههههه ولك كافي شلت ذنب المره
محسن : لتخاف كل مااشوفها اكول الها وهاي جم مره اسويها  خاله حالليني واهبيني وهي بسرعه تكول يمه محالل وموهوب والمصيبه اتحرك خطوتين منها واحجي بگلبي واكول شون رجلج جان يبوسج خطيه مات بعز شبابه من كثر متكعده من النوم كوم ابو حمزه وحده من الفزات وكف گلبه المسكين
حجي طه : هههههه لك كافي والله بطني كامت توجعني من وراك
محسن : اضحك شكو عليك خوما خلصتها مثلي نام لاتجي ام حمزه تعضك وتذبها على روحك
حجي طه : حيل بيك تستاهل والله دواك طلعت ام حمزة
يله كوم ابو فيصل ورانا واجب
محسن : اااخ يافيصل اله اسميك غضب وداعت ام حمزه
حجي طه : هههههههه يله امشينا ابو غضب

مرت الايام خلصناها رعب وخوف على ساعه نموت المعارك اشتدت وضعنا صعب ننجمع ٢٠ و٣٠ واحد ناكل ونكعد سوه لو وره ساعات او يوم او يومين نصفى ١٠ كلها شهداء نفسيتنا ادمرت وكل شويه اكول شوكت يجي السره عليك يا طه وتنلف بعلم لويجوز تتأسر لو اصلاً تنفقد حالك حال المئات الي انفقدو
كامو ينقلونا من مكان لمكان وخاصه مع دخول القوات الايرانيه حدود البصره والخسائر والحروب الطاحنه الي جانت تصير هناك عدا بث الرعب بين صفوف الجيش جنا نسمع شون كل كم الف ينطحنون سوه وكأنهم نمل وبنفس الوقت القوات الايرانيه ترسل قوات بين فتره والثانيه من جهه الشمال حتى النزولات والاجازات توقفت لان الوضع خطر
جان بهذا الوقت عملية كربلاء 5  وهاي عملية هجوميه شرسه من القوات الايرانيه للسيطره على ميناء البصره استنزفت منا قوات واسلحه كولش هوايه وحتى الجانب الايراني خسائره متقل عنا رغم سيطره القوات الايرانيه على ٣ خطوط شرق البصره لكن قواتنا حاولت تحافظ على باقي المناطق

القلق والخوف اگلني اكل وخاصه صارلنا  شهرين منازل صح مرات جنت ماانزل بس على الاقل جنت ادز مصرف بيد محسن لبيتي هسه حتى مصرف مكدرت ادز
وفجأه اجت تعليمات تنقسم الفرق الي موجوده مجموعه تبقى ومجموعه تنزل اجازات ومجموعه الجبيره تتحرك بأتجاه البصره گلت اكيد اني من جماعه البصره اعرف حظي بس الي صار أذاني اكثر اني من مجموعه النزول ومحسن من مجموعه الي تتحرك للبصره بوقتها رحت اركض لعمر اتوسل بيه ميدزه
عمر : هاي شبيك طه شنو احنه بمدرسه وهذا يداوم وذاك لا اسماء اجتي ومنكدر نغيرها وحتى مالنا صلاحيه نغيرها
حجي طه : زين اروح وياه
عمر : انت تحجي صدك بابا هاي حرب مو سفره روح انزل لبيتك واذا انت اليوم هنا يجوز باجر بلبصره منعرف شيصير الوضع تعبان
حجي طه : عمر بروح ابوك بروح كل موتاك خليني وياه اذا متكدر تنزله ويايه
عمر : لو اكدر والله اسويها بس تغيير القيادات والضباط هواي سوه اشكال واكثر جماعتي انقلو وتشديد على الاوامر  لتسوي لنفسك مشكله وان شاء الله يرجع بلسلامه 
حجي طه : طلعت وقلبي مقبوض والوب شون هذا هم ياخذه الموت مني
رحت بأتجاهه واني لوبيدي احضنه ومااخلي يروح محسن صار سلوتي بتعبي هو سبب ضحكتي صديق والنعم منه
محسن : هاا ولك وين جنت
حجي طه : باوعت علية دمعت عيني
محسن : شبيك طة منو وياك
حجي طه : تدري بلفرقه وين تحركها
محسن : اي ادره للبصره وشبيك اسمك مموجود على شنو ضايج بعد
حجي طه : ما اريدك تروح
محسن : هههههه مو هي الجبهه مال الوالد هاي شبيك طه الي اله عمره لو بنص الموت الله يخلي عايش والي ماله خبزة بلدنيا بفراشه يموت كلمن ويومه لتخاف العار ميموت
حضنته حيل واحس روحي اودعه اعرف بيه خايف بس هو هذا محسن يكابر حتى وهو متوجهه للموت الضحكه تارسه وجهه
محسن : كافي ولك اني مو مرتك حتى هيج تحضني
حجي طه : دير بالك على نفسك
محسن : لتخاف راجعلك بس اخاف يصير شى امانتك ابني فيصل اريدك تعلمه على اخلاقك وطيبتك وتدينك اني تعرفني سگط مابيه خير ودوم اكول ابني يطلع سرسري علية بس اذا مكدرت ارجع واربي اريد عينك علية واريد تكول لأسراء احبها ومحبيت مره بكدها وماشفت مره مثلها وكل مره اتشاقه وياها من اكول الها اله اصادق واتزوج احلى منج نسوان الدنيا كلها مو بعيني بس هي حب عمرري وابويه وامي بوسهم اليه وخلي يبروني الذمه
حجي طه : كافي محسن ابوس ايدك كافي
محسن : ماعندي ورقه وقلم جان كتبت رساله ومبقى وقت حتى نتحرك كول الهم مو تنسى
حجي طه : رجعت حضنته وابجي
محسن : ولك شبيك تره بعدني مميت واكف گبالك وانت هم كافي فهاوه موتتني طيبه گلبك زياده ياخويه الدنيا متنعاش هيج
حجي طه : بس ارجع بخير والله كريم
ودعته وعيني علية وروحي مفرفحه نزلت ورغم اشتياقي لبيتي وجهالي بس عقلي وگلبي يم محسن وحيل خايف اخسره

رجعت للبيت جان نهايه شهر الثالث والجو بدا يكسر وطيب فتحت الباب شفت سليل كاعده بلكاع بلكراج تلعب وبحضنها لعابتها الي متفاركها ابد وبصفها رشا تمشي وتلعب كبرن بناتي وحتى مشفتهن شون يكبرن خلصتها حرب وجبهه اجت تركض سليل علية وتبوس بيه وتصيح بابا اجه بس رشا تباوع بوجهي حقها هي شافت مني
حضنتهم حيل وابوس بيهم وحسام واكف على صفحه صحته تعاال بابا
حسام : مااا
تمشيت علية وحضنته دفعني وركض لأمه عفته ورجعت حضنت البنات
سندس : الله يساعدك طولت
حجي طه : بستها شسوي مخلونا ننزل
سندس : يله ولو متعوده عليك مرات تقفل ومتنزل بس على الاقل جنت ادز مصرف
حجي طه : اي صحيح بس حتى جماعتي منزلوهم تعالي احجيلي شصار مصار واني ماكو

سندس : روح اسبح بين مااكمل الاكل واسولفلك كولشي
حجي طه : اي رايح بس قبل كولشي انعام سوتلكم شى
سندس : لا ليش
حجي طه : هيج اسأل هسه اجي ودخلت سبحت وبدلت ملابسي
وكعدت وسليل اجت بحضني كعدت وتبوس بيه افيش ياروح ابوج لج انتي شكد طيبه
سليل : بابا لتروح بعد
حجي طه : هو بيدي يابابا
سليل : حباب حباب
حجي طه : الله كريم وابوس بيها ورشا تتختل وتضحك  الْحٍمَدٍ للـّہ شفتها بعافيه وصحتها زينه
اما حسام لازم دشداشه امه ويفتر وراها مقبل حتى يجي يمي
صبينا الاكل وكاعدين سوه اي سولفي
سندس : مصار شى هوايه بس مرت علي جابت ولد ولو تشوف شسوه الذبايح والهلاهل وانعام شايلته على گلبها
حجي طه : الله يحفظة اله والله فرحتله
سندس : فرحتله بعد كل الصار
حجي طه : قابل شسوه حتى ادعي علية يبقى ابن اخويه وطفل
سندس : اني مقصدت على الطفل قصدت على علي الميخاف الله
حجي طه : كملي شصار بعد
سندس : اوف منك اي المهم لو تشوف من طهرو للولد تكول عريس مزايق وعشى حارو شيحطون قابل مثل حظي طهرت ابني بلمستوصف
حجي طه : كلمن وقابليته
سندس : اعرف عيني ميحتاج تذكرني
حسره حجيت شى وذكرتني بلخير العايشه بيه
حجي طه : هسه اني ردت اعرف شصار وانتي وين دخلتينا
سندس : انت شعجب تسأل اول تالي دوم من اكعد اسولف هيج كالو وهيج صار تعيط متقبل تسمع

حجي طه : هيج عجبني بوقتها جنت خايف من انعام لتسوي شى بس  الْحٍمَدٍ للـّہ كولشي ماكو بس هذا مو معناه مراح تسوي شى لان اعرف خلگها الي تنتظر اكثر من ٢٤ سنه حتى تنتقدم من ابن ضرتها تكدر كولشي تسوي لو اخر يوم بعمرها
سندس : شو صفنت
حجي طه : لا هيج ماكو شى وجنات بت جعفر
سندس : مرات اسمعها تبجي وتسكتها لو اشواق لو امك يمكن نوريه شالت ايدها من عدها
حجي طه : والله لو تنطيني انعام جنات اليه اخذها اربيها ويه بناتي
سندس : شنو يمه اي عيني مو انت الراح تربي هو انت مربي جهالك حتى تربي بت اخوك هاج صار شهرين ونص ماكو وهسه ١٠ ايام وتلتحق وعلى هاي الرنه وفوكاها بلضيم
حجي طه : كلت لو تقبل واعرف متقبل كافي ابتليت حجيت على طاري الضيم منين جنتو تصرفون
سندس : لكيت انت ضام كم فلس واخذت منهن
طه : هذا هو المهم محتاجيتو شى
سندس : لا الحمدلله
حجي طه : صدك شسمه علي ابنه
سندس : سماه حسين على اسم ابوك لواكه عود شوفوني حنين
حجي طه : يجوز محبه بأبويه شكو بيها
سندس : يامحبه فدوة لعينك متسكت ولو حقة يسمي حسين اني لو عمي عافلي كل هذا الخير اله اسمي كل جهالي حسين حتى البنات

حجي طه : نهر شونها
سندس : تجي كل كم يوم تشوف الجهال وتروح زين مغزره الخوه بيها
حجي طه : غير جانت انعام مانعتها واله هي متقصر محجت شى على حياتها وضعها مرتاحه لا
سندس : تكول مرتاحه بس شايفه امها بلشارع ودايره وجهه منها وهاي الخبله ضاله تبجي على شنو ماادري هو انتي عفتي اهلج علمود حبيب الگلب على شنو البجي والله نسوان عيارات
حجي طه : اكوم اصلي احسن اني صوجي سألتج
سندس : عيني مسبيت العنب الحامض عشتو ولا يتحمل حجي مني اكوم اكمل شغلي احسن اليه

حجي طه : ثاني يوم من الصبح طلعت لخال سامي الجنت دوم من انزل اشتغل يمه تعلمت صار كم سنه وياه والرجال مقصر واني طول مااشتغل يمه اذب روحي بلشغل اول موصلت للمحل وكف الحجي واجه يسلم حسيت بوجهه كلام موطبيعي
حجي طه : رايح للشغل حجي
تعال طة اكعد اريد احجي وياك
كعدت واني بحيره كول حجي اسمعك
شوف ابني اني وداعت عافيتي كولش احبك وجنت دوم اكول لو الله منطيني ولد مثلك على اخلاقك والتزامك رغم كل مده تجي تشتغل كم يوم بس شغلك يعادل ٣ عمال ولا عمرك اشتكيت او مليت بس انت هم تعرف اني رجال جبير ومااحب المشاكل ومو كد اهلك
حجي طه : بقيت متفاجأ بكلامه اهلي منو
قبل مده اشتغلتني البلديه والصحه كل شويه لجنه موتوني على ساعه يسدولي المحل وتعرف النا حبايبنا هناك واستفسرت وطلع علي اخوك وره هاي السالفه ومن رحت اله اعاتبه كال مااجوز منك اله تبطل طه

حجي طه : دنجت وگلبي اعتصر هيج وصلت حتى لباب رزقي واني ممأذيهم
حاولت افهم اخوك قافل لو يسدلي المحل بعلاقاته وفلوسه ولو ابطلك وانت تعرف هذا المحل فاتح بيتي وبيوت كومه عمال واني مو كدهم وانت مترضالي الاذيه
حجي طه : لا حجي ماارضى وخلف الله عليك ذيج الفترات كلها ساعدتني ومقصرت ويايه
وليدي اعذرني
عاذرك عمي عاذرك ولا تهتم من رخصتك
طلعت واني صاير نار ولكم ليش هيج حتى واني اشتغل عامل متردون استرزق طلعت بوجهي على محل ابويه وشفت علي كاعد على الدخل ويوجهه العمال طبيت لزمته من ياخته نار وشابه بيه ولك انتو من يامله حتى اليهود مو مثلكم هسه اني جاي يمك واصل لرزقك ليش تأذيني برزقي شسويتلك جان يدفع ايده بقوه ونزلها
علي : عبالك اخليك ترتاح ولك انت المتسوه فلس تحط راسك براسي
حجي طه : هو اني اجيت يمك انت ليش متعرف تحجي جان يشاورني والعمال كلها واكفه يخافون لنتعارك
علي : وتراب ابويه اذا مااخليك تجدي مااتسمى علي
حجي طه : انت لو تعرف ابوك جان عرفت شگد كاعد تأذي بسوالفك ولو شترجى منك طلي وامك تكوده اعرف هاي سوالفها
علي : امشي لك اطلع بره وخلي اشوف شون تشتغل بعد

حجي طه : الرزق لو بيدك جان گلت يجوز كلامك صح بس ماطول بيد الله لا انت ولا عشره مثلك يكطعوه عني وهاا لتنسى الدنيا دواره وانت هسه عندك ولد والي تسوي اليوم راح يطلع بعدين على راسك
علي : امشي لك عود يهدد البوخه
حجي طه :اني مااهدد بس اذكرك
طلعت واني مااعرف شسوي نار بصدري اعرف لو متعارك يذبوني سجن مبين من حرشتهم رجعت للبتاوين افتر على المطاعم بلكت احد يرضى يشغلني الي يعرفني ابن حجي حسين ميشغلني لان يعرف بسالفه علي هذا سوك وكولشي يطش بيه ويمكن علي طاشها حتى ميشغلوني والي مسامع شى وميدري من يعرف عسكري يكول مااشغل كم يوم شستفاد خلصت ٣ ساعات فر وملكيت شغل رجعت للبيت واني روحي بخشمي ومكسوره نفسي
طبيت وجان تجي سندس
سندس : ها شو من وكت
كعدت وحاط ايدي على راسي وحاير لحت اكثر من مره حتى تعرف وسولفت الها مااشوف غير تطفر للغرفه وحطي عبايه على راسها واطلعي صحت ولج وين رايحه مجاوبت كمت وراها واشوفها ادكدك باب ذاك البيت كسرته

جريتها من ايدها شبيج تخبلتي
سندس : عوفني اليوم احرك ابهاتهم شنو يكطعون رزقك ذني اذا مو بلنعال ميمشن
حجي طه : جريتها حيل وجان تنفتح الباب اشواق اطفري من ايدي طلقه وادفعي اشواق وادخلي ركضت وراها
واكفه بنص الهول وتعيط ولج انعام ساس البله والمصايب انعاام
انعام : وجعت امي وابويه شرايده
سندس : ولج رجلج بلكبر ومتخافين الله لاحكتنا على اللكمه
حجي طه : امشي يمعوده لتخليني اسحلج من شعرج امشي
سندس : اوكف انت موتتني اريد افتهم ليش تأذوه برزقه وبرگبته كومه لحم ماخفتي الله ولج وتصلين المن تشقمرين الله لو تقشمرينا
انعام : انجبي بت الفكر مبقت علية بس بت الخبازه ولج بأصبع رجلي الصغير بس أشر اخليج انتي وجهالج بلشارع
سندس : عمي تسويها هي معروفه الكح.. كولشي تكدر تسوي

انعام : اخذ مرتك لا اطيح حظك وحظها متشوف لسانها شطوله واكف تتفرج عليها نسيت اني مرت ابوك حتى احترام ماضل
حجي طه : امشي سندس كافي فضحتينا
سندس : اسكت لا احرك روحي هسه اريد اشوف هاي العجيز شون تأذيه وتخلين علي يبطله من شغله
انعام : كتلك طه رجعلي نهر وانت تحديتني
سندس : وهو شعلي بتج ادبسسز انهزمت من عندج وركضت لصاحبها فوك ما زوجها وسترها المفروض تبوسين ايده احسن ماتكسر وجوهكم وتسوي شى موزين
انعام : انتي بت الگلب اسكتي بتي اشرف منج
سندس : اذا اشرف مني المن متحامله على اخوها المن بعد هذا الحجي الماصخ قابل هو شسوه اخذها وشغلها بملهى وعايش منها لو شربها عرك وديحها بلشوارع هي رادت سامي واتزوجته المن بعد تفترين جنج سحليه المگابر بكل مكبره اطب تنبش وتطلع
انعام : طة مرتك اذا مجربتها هسه وروح ابوك اسحلها بلشارع واشتكي عليكم
حجي طه : شوفي انعام مرتي ماخذها وطالع بس اريد اذكرج بشى اني مأذيتج بيوم ومايوم طلعت العيبه مني وانتي من يوم وفاه ابويه حرتي شسويتي وساكتلج لان مره جبيره ولخاطر ابويه وتربته بس كافي تره حيل أذيتيني والي سويته لنهر لو ينعاد الزمن هم اسوي لان هاي اختي واذا انتي حسيتي بقهر من الصار من ايدج مو مني انتي عمتج الفلوس ونسيتي الله وعقابه وقطع الاعناق ولا قطع الارزاق وهاي سوايتج متهمني كافي وتسوه عمرج من زوجتها غصب عنج ابعدو عني وخلوني بحالي لا اريد اشوفكم بعد ولا تشوفوني واذا وصلتي لعائلتي بيوم واذيتيهم انسى انتي بيوم جنتي امي وبيدي وتراب ابويه اذبحج انسيني وانساج وكافي لحد هسه الصار

انعام : روح يجي يوم وتكول كالتها انعام وسوتها
سندس : ولك هدني عليها خلي اسحلها ميبرد گلبي اله امسح البيت عليها
اشواق : شحدج تلزمين شعره من امي حتى اطيح حظج ولج من طبيتي لهسه تعدين وتصفين وانت طة متشوف مرتك لو بس رجال علينا وتهدد وسلاح واخذت نهر وطلعت ويم مرتك دجاجه
حجي طه : انجبي لج هاي عليمن ومشيت بأتجاهه اريد اضربها جان تختل وره امها ودفعتني انعام يله اطلع بره لا اخلي علي اليوم يبيتك بلسجن
سندس : اي عيني ليش لا غير هو الطلي مالتج وتمشي بكيفج
حجي طه : لزمت سندس حيل من ايدها وجريتها
سندس : ولج انعال يجي يوم واتفل بوجهج على سوالفج
حجي طه : كافي دفعتها حيل وطببتها للبيت شجاج تخبلتي شنو هذا اللسان الزفر مو عيب مو اكبر منج
سندس : انت اسكت لا احرك روحي واحرك جهالك ويايه ياعيب ياصخام كطعت رزقك وبعدك تفكر عيب واكبر مني ولك لو امي وتكطع رزقك ازفها بلشارع مو عاد هاي

حجي طه : ادخلي وكافي عياط وغلط مراح نحصل شى كعدت بلكاع وتربعت وادك على رجلها
سندس : ااااخ من خرب حظج سندس وين كاعد بيا حفره حتى الفلس طار منج وين اولي وذوله شوكلهم حصو
حجي طه : وجع كافي قابل متي جوع الراتب وموجود واني ادبرلج فلوس مالج دخل
سندس : هذا الحصلته منك بس حجي يدبرلي فلوس تكول راح يدبرلي الالاف
عفتها تلطم وطلعت اختنكت فوك خنكتي وخوفي على محسن وفوك خنكتي لان ماكو شغل هلمره سندس تمشي وتعير بيه

تمشيت لبيت سامي مشفت نهر مشتاق الها دكيت الباب طلعلي سامي فرح من شافتي
وركضت نهر لحضني وتبجي لان شافتني
سامي : ولج كافي مو هياته كدامج
نهر : والله خفت عليك وبالي يمك
حجي طه : لتخافين ماكو شى وكعدنا سوالف وضحك شويه ارتاحيت من الهم الي من لحظه جيتي لهسه
سامي : خالي گلي على سالفه علي
حجي طه : خلف الله علية لخالك ومقصر هاي السنين وحقه باب رزقه
سامي : لكيتلك شغله بمطعم باب الشرجي ابن عم ابويه ومنتظرك باجر
حجي طه : ياالله صدوك بس اخاف هم علي يسويله شى
سامي : وشمدري علي اشتغلت هناك ولتخاف هذا الرجال ميخاف من اكبر واحد
وعنده معارفه اكثر حتى من اخوك
نهر : سودة علية كل من ورايه
حجي طه : شعليج انتي هي من الاول متحلفه اليه لتضوجين
سامي : باجر انتظرك نروح سوه
حجي طه : ان شاء الله
انتي خوما احد تعرضلج
سامي : شحده اليوصل يمها واني موجود
حجي طه : والنعم منك اعرف بيك كدها بس هم انتبه كولشي يصير
نهر : لتخاف حبيبي ماكو شى

طلعت منهم رجعت للبيت شويه فرحان لان لكيت شغل دخلت لكيت سندس شاده راسها بوصله وحسام بحضنها والبنات كاعدات ياكلن
سندس : بعد وكت جان بتت بره
حجي طه : شبيه راسج
سندس : من ضيمك وضيم اهلك ساعه السوده راح يطگ راسي واموت
حجي طه : متموتين وانتي عندج هذا اللسان الطويل
سندس : هو لاحكني على اللسان مبقى بس ينكص حتى يكمل البخت
حجي طه : لكيت شغل باجر اطلع من الصبح
شمرت حسام وطفرت من مكانها
سندس : صدك ياالله وين
حجي طه : بمطعم باب الشرجي موكتلج تفرج اني بلغرفه تعبان راح اطب انام
دخلت للغرفه بدلت بس حطيت راسي غفيت حسيت بسندس تنام بحضني ووخرتها على كيفي ضايج من تصرفاتها جان تحط راسها على صدري
سندس : لتضوج مني اني هم حقي انت متعرف شنو يعني ابنك لو بتك تريد شى ومتكدر تشتري الها
حجي طه : شون مااعرف لعد منو اليصرف
سندس : انت تبقى ايام قليله بس اني اشهر حايره بلجهال وتعبهم وطلباتهم المتخلص طة اني مشفت شى من شبابي اباوع على عمري اخلصه بس اتحسر انت هم قدر وضعي
كعدت وخليت ظهري على الجربايه وكتلها
انتي هم قدري وضعي وعيشي عيشتي وارضي بلقليل اني مااكدر اعيشج مثل متردين هاي امكانيتي يابت الناس والف مره كلتها الج يعني معيشه روحج بجحيم وقهر وتعرفين ماكو شى يتغير ارضي بلي الله كتبه الج حتى يباركنا بيه حتى القليل الي هسه تتعاركين ويايه علية اكو ناس تتحسر علية
سندس :اوف كرهت عيشتي وكولشي بهذا البيت
حجي طه : واني مابيدي شى اسوي الاكدر علية دااحطه بيدج وحتى هاج فديوم اشتريت شى اليه شاب عمري ٢٩ سنه قميص مثل الاوادم ماعندي كله الراتب والمصرف بيدج يعني اني لو عندي فلوس ومقصر عليج حقج كولشي تسوين بس اني ماعندي حسي بيه ولو مره خليني احسج ام بيتي وحزام ظهري مو وحده عايشه بس حتى تذكرني بفكري وقله حيلتي

سندس : الله كريم بس انت هم اتحملني
حجي طه : اكثر من هيج اليوم دخلتي تعدين وتغلطين حتى محترمتي وجودي واكولج كافي اسكتي ولا يمج مردت اضربج وازيد قهرج بس كعد تتجاوزين هوايه وساكتلج هم هوايه
سندس : والله من حرگت گلبي ولو عايفني شويه الا احركهن بلتنور واحرك شعرهن امهات الوصخ
حجي طه : كافي والله فرجها
سندس : مشتاقيتلي
حجي طه : هو انتي تخلين الواحد يشتاق
سندس : هااي شبيك طة صار شهرين مو يمي شنو سالفتك مكان متحضني وتكولي مشتاقلج سندوسه
حجي طه : هههههه والله خبله تعالي اشتاقيتلج سندوسه
خرب ببليسج من تعرفين اكو شغل وفلوس شكد تكونين هادئه وحبابه وبس اكول ماكو تنگلبين طنطل
سندس : هو اكو افقر مني ليش فاهمني غلط
حجي طه : لا يابوي افقر وحده عيوني شافتها تعالي ياسندوسه الفقيره
تقربت منها بلهفه صار مده طويله تاركهه بس لو الله يهديها وتعقل

كعدت الصبح ورحت اشتغل وتعرفت على الرجال الوضع زين ويوميتي اكثر من يوميتي القديمه عسى ان تكرهو شيئاً وهو خيراً لكم
يوم يجر يوم والوضع هدوء رحت مرتين لبيت محسن وماكو اي خبر عنه اكلني الخوف علية وعلى اعصابي اشتغل المفروض ينزل ومانزل كملت اجازتي والحمدلله كدرت ويه الراتب اعوف مبلغ زين مصرف وخليت الفلوس كلها گلت كولشي يصير اخاف مثل ذيج المره اتأخر
والتحقت واكيد نهر مثل كل مره واكفه بلباب تودعني
التحقت واول موصلت رحت سألت عن وجبه محسن واي خبر ماكو بقيت ايام واني مثل السمجه المزوهره اسبوعين واي خبر ماكو لحد مااجت وجبه اسماء شهداء جدد من معركه البصره
كاعد على الساتر ولازم سلاحي وصافن مكانه فارغ جان حتى الواجب يهونه علية وجان يجي عمر استغربت صار شكد مجاي للموقع
عمر: شونك طة
حجي طه : عمر شصار وجهك مو طبيعي
عمر : انت مؤمن بقضاء الله وكلنا لهذا الدرب
حجي طه : احس دمي نشف وهوا الله اختفى احساسي مثل مافقدت ابويه وجعفر نفس الاحساس وكفت على حيلي ومااريد اسمعها منه
عمر : اجت اسماء الشهداء وياهم اسم محسن
حجي طه : كعدت على حيلي وصافن واكله لا تتشاقه محسن مابيه شى كال ارجع
عمر : المجموعه مالته كلهم شهداء وياهم من فرقه ثانيه المعركه قويه كولش وخلفت هاي المره الفين شهيد خلال يومين
حجي طه : كمت اعيط واضرب على راسي ولك محسن خويه ولك ماضل الي بس انت ولك ليش تكسرني هيج مو كتلك عمر اني طايح حظ اني فگر جنت انام واكعد واكول ربي لتلجم گلبي بيه لان هو ضحكتي
حضني حيل عمر ويبجي ويايه
عمر : انت انسان مؤمن وكله بيد الله
حجي طه : ولك مؤمن بس مو هيج مابقالي صديق ولا اخ كلهم للگبور ليش كل فتره ادفلي واحد ردته يبقى ظهري محسن اخويه عمر تعرف شنو اخويه ولك وروح ابويه مااضحك بس وياه مااشكي بس اله منو اليه بعد منوو

عمر : اني موجود وعائلتك كلنا وياك اذكر الله وكوم اني طلبت من الامر انت تبلغ اهله حتى تنزل چم يوم هم ترتاح
حجي طه : حرام عليك عمر تريد اروح لأبوه ولأمه الفتحولي بيتهم وكت مضاكت الدنيا بيه واكول الهم تعالو ابنكم استشهد تره والله كعد تقضي علية انت
عمر : اني ردتك تنزل وتوكف بجانبهم اكيد راح يتأذون
حجي طه : واني منو يوكف ويايه منو وادك على راسي فاقد من القهر
عمر : كافي انت رجال وشكد شفنا شهداء قابل اول مره
حجي طه : بس مو اخويه مو صاحب محنتي
عمر : كوم طة وصير قوي جايتك ايام صعبه الله يعين اهله ويعينك
بقيت ابجي والجنود التمو علية واكو بيهم يبجون على بجيتي

نزلت واني ابجي دم علية جثته كالو لحد هسه بسبب المنطقه محاصره منكدر نجيبها ينتظرون الوضع بلكت يهدأ هاي اذا لكو جثه اله بعد كل هاي الصواريخ والقاذفات
وصلت منطقتهم وياريت ماوصلت دگيت الباب جن امه تعرف ومنتظره الخبر سمعت صوت رجلها وهي تركض ادري بگلبها نار وفتحت الباب صرت بوجهه وعيوني دم دنجت حتى مكدرت اكول لشنو جاي
ام محسن : يمة طة رجعت وحيدك وين صاحبك
حجي طه : بجيت بشهكه وجان تعيط
يمه ولييييدي رااح
بلحظتها اجت زوجته وابوه واشوف شون فاقدين كلها تلطم وتبجي ثواني المنطقه كلها صارت فوك راسهم اني كعدت على دجه الباب مكدرت اطب كاعد ومدنج وابجي مثل الجاهل ومات اخوه وابوه

بقيت لليل وامه تخربطت حرت بيها بلمستشفى تكعد تعيط وتصيح جيبولي وليدي لو اكدر يايمه اشتريله الروح والله اشتريها وارجعه يومين واني بلمستشفى وياهم مدري امه الي بين الحياه والموت لو ابوه الكل شويه يوكع واشيله شفت عائله بكاملها تموت كدامي امي جانت تصيح متسوون فاتحه اله اشوف تابوته گبال عيني
ابو محسن يعيط ميصير لازم نسوي لان عمامهم وخوالهم كلهم اجويه وهي متقبل

الاب خاف لتموت كال تجي جثته ونشيعه ونسويله اكثر الناس انتقدت غير يسوون بس ابوه مجان مهتم بأحد كافي خساره ابنه اشوف شون حاضن فيصل ويشم بيه ويبجي طفل بعده مشبع منه شنو ذنبه يعيش يتيم
بسبب العالم الهوايه جابو طباخين وكامو يسون ثواب على روحه جنت من اختنك اروح لراس الشارع اكعد بلكاع ابجي وسامي مرات يكعد يمي وهم يبجي ويتذكر وكفته وياه

اليوم مر اسبوع على الكارثه وبعد المعركه مخلصانه والاوضاع تعبانه وصل خبر اكثر الجثث دفنوها بمكانها من كثرتها وهذا الشى سوه احباط عند الكل ويمكن منحصل جثته
صفنت هم مثل جعفر تاليتك يامحسن مالكم گبر ازوركم بيه حتى انحرمت من ريحه ترابكم دخيلك ياربي شسويت اني وهيج تعاقبني بلي احبهم والله تعبت والصبر خلص مابيه طاقه اتحمل
واكف بابهم ماتركتهم ابد حتى ابات يمهم ماانام عيوني اذا اخذت ساعه بليوم نوم اني بخير مكدرت اعوف اهله بس الى متى كلها ايام والتحق مرجعت حتى لبيتي صار الصبح واكف بابهم واليوم اول خميس اله كالو على الاقل نسوي ثواب واذا مكدرنا نحصل جثته اسبوع الجاي ننصب الجادر مابيها مجال بعد
جابو الطلي وذبحوه واكف اني وسامي ولد عمه اثنين ولد صديقه جيرانهم باب بيتهم
وعيوني كوه اشوف بيها هم قله نوم وهم بجي اباوع وصافن على الشارع بين ميكملون الطباخين شغل اختنكت من العياط والبجي واني بيه عيطه يمكن اهز المنطقه كلها من قهري علية عيوني شارده وصافن واشوف واحد من بعيد جاي يهف ويصوفر ويغني

ركزت اباوع لابس عسكري والبيريه بلعكس لابسها والبدله العسكريه مفتوح اول دكمتين منها والجنطه وره ظهره
ويغني اريد افتح حلكي وانطق اسمه مااكدراخرسيت اكول اخاف كعد اتخيل من التعب والقهر وبس اني اشوفه تقرب بعد ويمشي لا مكعد اتخيل وجان يعيط بضحكه
هااااا ولكم سيبنديه شكو متجمعين بابنا منو مات اخاف ام حمزة

يتبع ...